(1)

Ir-Regolament (UE) 2017/625 jistabbilixxi regoli għall-kontrolli uffiċjali u għal attivitajiet ta’ kontroll oħra mwettqa mill-awtoritajiet kompetenti tal-Istati Membri sabiex tiġi ċċekkjata l-konformità mal-leġiżlazzjoni tal-Unjoni, fost l-oħrajn, fil-qasam tas-sikurezza tal-ikel fi kwalunkwe stadju tal-produzzjoni, tal-ipproċessar u tad-distribuzzjoni.

(2)

L-Artikolu 126(2), il-punt (a), tar-Regolament (UE) 2017/625 jipprevedi li att delegat jista’ jirrikjedi li biss il-kunsinni ta’ ċerti annimali u oġġetti minn pajjiż terz jew reġjun tiegħu li jidher f’lista mfassla mill-Kummissjoni għal dak l-iskop jistgħu jidħlu fl-Unjoni.

(3)

Ir-Regolament Delegat tal-Kummissjoni (UE) 2022/2292 (2) jissupplimenta r-Regolament (UE) 2017/625 billi jistabbilixxi rekwiżiti tad-dħul biex jiżgura li l-kunsinni tal-annimali li jipproduċu l-ikel u ta’ ċerti oġġetti maħsuba għall-konsum mill-bniedem minn pajjiżi terzi jew mir-reġjuni tagħhom jikkonformaw mar-rekwiżiti rilevanti stabbiliti fir-regoli dwar is-sikurezza tal-ikel imsemmija fl-Artikolu 1(2), il-punt (a), tar-Regolament (UE) 2017/625 jew ma’ rekwiżiti rikonoxxuti li tal-inqas huma ekwivalenti għalihom. B’mod partikolari, l-Artikolu 3 tar-Regolament Delegat (UE) 2022/2292 jidentifika l-annimali li jipproduċu l-ikel u l-oġġetti maħsuba għall-konsum mill-bniedem li huma soġġetti għar-rekwiżit li jiġu minn pajjiż terz jew reġjun tiegħu li jidher fil-lista msemmija fl-Artikolu 126(2), il-punt (a), tar-Regolament (UE) 2017/625.

(4)

Ir-Regolament ta’ Implimentazzjoni tal-Kummissjoni (UE) 2021/405 (3) jistabbilixxi l-listi tal-pajjiżi terzi jew reġjuni tagħhom li minnhom huwa awtorizzat id-dħul fl-Unjoni tal-kunsinni ta’ ċerti annimali u oġġetti maħsuba għall-konsum mill-bniedem f’konformità mal-Artikolu 126(2), il-punt (a), tar-Regolament (UE) 2017/625.

(5)

L-Artikolu 6(1) tar-Regolament Delegat (UE) 2022/2292 jipprevedi li, minbarra r-rekwiżiti stabbiliti fir-Regolament (UE) 2017/625, il-kunsinni ta’ annimali li jipproduċu l-ikel, ta’ prodotti ta’ oriġini mill-annimali u ta’ prodotti komposti, għandhom jidħlu fl-Unjoni biss minn pajjiż terz li jkollu stabbilit pjan ta’ kontroll għas-sustanzi farmakoloġikament attivi, għall-pestiċidi u għall-kontaminanti.

(6)

L-Artikolu 7 tar-Regolament Delegat (UE) 2022/2292 jipprevedi li, minbarra l-kundizzjonijiet stabbiliti fir-Regolament (UE) 2017/625, il-kunsinni ta’ annimali li jipproduċu l-ikel, ta’ prodotti ta’ oriġini mill-annimali u ta’ prodotti komposti, jistgħu jidħlu fl-Unjoni biss minn pajjiż terz li jikkonforma mar-rekwiżiti previsti fl-Artikolu 6(1) tar-Regolament Delegat (UE) 2022/2292 u li huwa inkluż fil-lista ta’ pajjiżi terzi approvati għad-dħul fl-Unjoni tal-annimali li jipproduċu l-ikel ikkonċernati jew tal-prodotti ta’ oriġini mill-annimali, stabbilita fl-Anness -I tar-Regolament ta’ Implimentazzjoni (UE) 2021/405.

(7)

L-Artikolu 8(1) tar-Regolament Delegat (UE) 2022/2292 jipprevedi, b’deroga mill-Artikolu 7, li l-kunsinni ta’ annimali li jipproduċu l-ikel, ta’ prodotti ta’ oriġini mill-annimali u ta’ prodotti komposti jistgħu jidħlu fl-Unjoni minn pajjiżi terzi li ma għandhomx pjan ta’ kontroll approvat għas-sustanzi farmakoloġikament attivi, għall-pestiċidi u għall-kontaminanti iżda jiżguraw li l-annimali li jipproduċu l-ikel u l-prodotti ta’ oriġini mill-annimali, inklużi dawk użati fil-prodotti komposti, joriġinaw fi Stat Membru jew f’pajjiż terz inkluż fil-lista stabbilita fl-Anness -I tar-Regolament ta’ Implimentazzjoni (UE) 2021/405. L-Artikolu 8(2) tar-Regolament Delegat (UE) 2022/2292 jipprevedi li minbarra r-rekwiżiti stabbiliti fl-Artikolu 127(3) tar-Regolament (UE) 2017/625, il-Kummissjoni għandha tiddeċiedi dwar l-inklużjoni ta’ pajjiż terz fil-lista msemmija fl-Artikolu 126(2), il-punt (a), ta’ dak ir-Regolament biss jekk l-awtorità kompetenti ta’ dak il-pajjiż terz tipprovdi lill-Kummissjoni b’evidenza u b’garanziji ta’ konformità mar-rekwiżiti stabbiliti fil-Artikolu 8(1). Din l-evidenza u dawn il-garanziji għandhom jikkonsistu f’informazzjoni dwar il-proċeduri stabbiliti f’dak il-pajjiż terz biex jiggarantixxu t-traċċabbiltà u l-oriġini ta’ dawk l-annimali li jipproduċu l-ikel u ta’ dawk il-prodotti ta’ oriġini mill-annimali.

(8)

Il-Belize, Kuba, il-Honduras, in-Niġerija u t-Tuneżija huma elenkati fl-Anness -I tar-Regolament ta’ Implimentazzjoni (UE) 2021/405 u mmarkati b’“O” għall-ħalib u l-bajd li tindika l-intenzjoni tagħhom li jesportaw lejn l-Unjoni l-prodotti komposti manifatturati bl-użu tal-ħalib ipproċessat u/jew tal-prodotti tal-bajd ipproċessati li jinkisbu minn Stat Membru jew minn pajjiż terz jew reġjun tiegħu li għandu stabbilit pjanijiet ta’ kontroll għas-sustanzi farmakoloġikament attivi, għall-pestiċidi u għall-kontaminanti. Madankollu, dawk il-pajjiżi naqsu milli jippreżentaw lill-Kummissjoni evidenza u garanziji ta’ konformità mal-Artikolu 8(1) tar-Regolament Delegat (UE) 2022/2292. Għalhekk, jenħtieġ li l-marka “O” għall-Belize, Kuba, il-Honduras, in-Niġerja u t-Tuneżija titħassar mill-Anness -I.

(9)

Il-Brażil bħalissa huwa elenkat fl-Anness -I tar-Regolament ta’ Implimentazzjoni (UE) 2021/405 b’“O” għall-bajd. Il-Brażil ressaq pjan ta’ kontroll għall-bajd. Dak il-pjan jipprovdi l-garanziji meħtieġa u għaldaqstant jenħtieġ li jiġi approvat. Għalhekk jenħtieġ li l-Brażil jiġi elenkat fl-Anness -I tar-Regolament ta’ Implimentazzjoni (UE) 2021/405 b’“X” għall-bajd [minflok l-“O”].

(10)

Il-Brunei u l-Costa Rica huma elenkati fl-Anness -I tar-Regolament ta’ Implimentazzjoni (UE) 2021/405 u mmarkati b’“O” għall-ħalib u l-bajd li tindika l-intenzjoni tagħhom li jesportaw lejn l-Unjoni l-prodotti komposti manifatturati bl-użu tal-ħalib ipproċessat u/jew tal-prodotti tal-bajd ipproċessati li jinkisbu minn Stat Membru jew minn pajjiż terz jew reġjun tiegħu li għandu stabbilit pjanijiet ta’ kontroll għas-sustanzi farmakoloġikament attivi, għall-pestiċidi u għall-kontaminanti. Madankollu, dawk il-pajjiżi infurmaw lill-Kummissjoni li ma għadhomx interessati li jkomplu jesportaw dawn il-prodotti komposti lejn l-Unjoni. Għalhekk, dik il-marka “O” għall-Brunei u l-Costa Rica jenħtieġ li titħassar mill-Anness -I.

(11)

Il-Każakistan ressaq pjan ta’ kontroll għall-għasel. Il-pjan jipprovdi l-garanziji meħiteġa u għalhekk jenħtieġ li jiġi approvat. Għalhekk, il-Każakistan jenħtieġ li jiġi elenkat fl-Anness -I tar-Regolament ta’ Implimentazzjoni (UE) 2021/405 b’“X” għall-għasel.

(12)

Il-Gżejjer Falkland bħalissa huma elenkati fl-Anness -I tar-Regolament ta’ Implimentazzjoni (UE) 2021/405 b’ “X” għall-akkwakultura, li jindika l-eżistenza ta’ pjan ta’ kontroll approvat. Madankollu, il-Gżejjer Falkland infurmaw lill-Kummissjoni li ma għadhomx interessati li jkomplu jesportaw il-prodotti tal-akkwakultura lejn l-Unjoni. Għalhekk, jenħtieġ li l-marka “X” għall-“akkwakultura” titħassar minn dak l-Anness.

(13)

It-Tanzanija bħalissa hija elenkata fl-Anness -I tar-Regolament ta’ Implimentazzjoni (UE) 2021/405 b’“X” u “P” għall-“akkwakultura: krustaċji biss” li tindika li t-Tanzanija tesporta lejn l-Unjoni krustaċji mrobbija u prodotti komposti manifatturati bi prodotti pproċessati derivati minn molluski bivalvi li joriġinaw jew mill-Istati Membri jew minn pajjiżi terzi jew reġjuni tagħhom elenkati fl-Anness VIII tar-Regolament ta’ Implimentazzjoni (UE) 2021/405. Madankollu, it-Tanzanija infurmat lill-Kummissjoni li l-pjanijiet ta’ kontroll tar-residwi tal-2023 ma ġewx implimentati minħabba n-nuqqas ta’ produzzjoni nazzjonali ta’ krustaċji mrobbija minn Diċembru 2022. Għalhekk, il-marki “X” u “P” għall-“akkwakultura: krustaċji biss” jenħtieġ li jitħassru mill-Anness -I tar-Regolament ta’ Implimentazzjoni (UE) 2021/405. Barra minn hekk, minħabba t-tħassir tal-immarkar “X” għall-“akkwakultura: krustaċji biss”, u f’konformità mal-Artikolu 2a(4) tar-Regolament ta’ Implimentazzjoni (UE) 2021/405, l-immarkar “O” għal “ħalib” u “bajd” għat-Tanzanija jenħtieġ li jitħassar ukoll mill-Anness -I tar-Regolament ta’ Implimentazzjoni (UE) 2021/405.

(14)

New Zealand bħalissa hija elenkata fl-Anness -I tar-Regolament ta’ Implimentazzjoni (UE) 2021/405 b’“X” għall-“ekwini”. Peress li din is-sena New Zealand ma ressqitx il-pjan ta’ kontroll dwar l-annimali ekwini lill-Kummissjoni, minħabba n-nuqqas ta’ produzzjoni tal-ekwini, il-marka “X” għall- “ekwini” għalhekk jenħtieġ li titħassar minn dak l-Anness.

(15)

Singapore bħalissa huwa elenkat fl-Anness -I tar-Regolament ta’ Implimentazzjoni (UE) 2021/405 b’ “X” u nota f’qiegħ il-paġna “10” (biss għall-kunsinni ta’ laħam frisk li joriġina minn New Zealand, destinat lejn l-Unjoni u li jinħatt, kemm jekk jinħażen kif ukoll jekk le, f’Singapore u li jitgħabba mill-ġdid fi stabbiliment approvat waqt it-tranżitu minn Singapore) għal “ekwini”. Peress li New Zealand ma ressqitx pjan ta’ kontroll u għalhekk tneħħiet mil-lista għall-“ekwini”, għaldaqstant jenħtieġ li l-marka “X10” għall-“ekwini” fl-Anness -I tar-Regolament ta’ Implimentazzjoni (UE) 2021/405 għal Singapore titħassar minn dak l-Anness.

(16)

Singapore bħalissa huwa elenkat fl-Anness -I tar-Regolament ta’ Implimentazzjoni (UE) 2021/405 b’“X” u nota f’qiegħ il-paġna “14” għall-akkwakultura (ħut bil-pinen biss). Singapore ressaq pjan ta’ kontroll li jkopri wkoll il-krustaċji. Dak il-pjan jipprovdi l-garanziji meħtieġa u għalhekk jenħtieġ li jiġi approvat u n-nota f’qiegħ il-paġna “14” li tillimita l-entrata għall-ħut bil-pinen biss jenħtieġ li titħassar mill-marka “X” f’dak l-Anness.

(17)

It-Tajlandja hija elenkata fl-Anness -I tar-Regolament ta’ Implimentazzjoni (UE) 2021/405 b’“Δ” għal “bajd”, li jindika l-intenzjoni tagħha li tuża għall-produzzjoni ta’ prodotti maħsuba għall-esportazzjoni lejn l-Unjoni biss bajd mill-Istati Membri jew minn pajjiżi terzi oħra approvati għall-importazzjonijiet tal-bajd fl-Unjoni. It-Tajlandja ressqet pjan ta’ kontroll għall-bajd. Dak il-pjan jipprovdi l-garanziji meħtieġa u għaldaqstant jenħtieġ li jiġi approvat. Għalhekk, it-Tajlandja jenħtieġ li tiġi elenkata fl-Anness -I tar-Regolament ta’ Implimentazzjoni (UE) 2021/405 b’“X” għall-“bajd” [minflok “Δ”].

(18)

L-Emirati Għarab Magħquda u l-Gżejjer Pitcairn bħalissa huma elenkati fl-Anness -I tar-Regolament ta’ Implimentazzjoni (UE) 2021/405 b’“X” għall-“għasel”. Madankollu, l-Emirati Għarab Magħquda u l-Gżejjer Pitcairn infurmaw lill-Kummissjoni li mhumiex interessati li jkomplu jesportaw l-għasel lejn l-Unjoni. Għalhekk, jenħtieġ li l-marka “X” għall-“għasel” għall-Emirati Għarab Magħquda u għall-Gżejjer Pitcairn titħassar mill-Anness -I.

(19)

L-Armenja hija elenkata fl-Anness IX tar-Regolament ta’ Implimentazzjoni (UE) 2021/405 bir-rimarka “Ċkal ħaj, ipproċessat bis-sħana u ffriżat minn qabda salvaġġa biss”. L-Armenja infurmat lill-Kummissjoni li, minbarra li tkompli tesporta ċ-ċkal selvaġġ maqbud, hija interessata li tibda tesporta l-ħut bil-pinen u l-prodotti tal-ħut bil-pinen lejn l-Unjoni. Il-pjan ta’ kontroll tal-Armenja għas-sustanzi farmakoloġikament attivi, għall-pestiċidi u għall-kontaminanti jkopri l-ħut bil-pinen u l-prodotti tal-ħut bil-pinen (il-kavjar u l-bajd). L-Armenja pprovdiet evidenza u garanziji li l-ħut bil-pinen u l-prodotti tal-ħut bil-pinen jikkonformaw mar-rekwiżiti rilevanti tal-Unjoni jew mar-rekwiżiti ekwivalenti għalihom, b’mod partikolari fir-rigward tal-iġjene. Għalhekk, jenħtieġ li r-rimarka “Ċkal ħaj, ipproċessat bis-sħana u ffriżat minn qabda salvaġġa biss” fl-entrata għall-Armenja fl-Anness IX tar-Regolament ta’ Implimentazzjoni (UE) 2021/405 tinbidel għal “Ċkal ħaj, ipproċessat bis-sħana u ffriżat minn qabda salvaġġa biss. “Akkwakultura: ħut bil-pinen u prodotti tal-ħut bil-pinen (kavjar u bajd tal-ħut)”.

(20)

Għalhekk, jenħtieġ li r-Regolament ta’ Implimentazzjoni (UE) 2021/405 jiġi emendat skont dan.

(21)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

L-Anness -I huwa sostitwit bit-test stabbilit fl-Anness I ta’ dan ir-Regolament.

(2)

L-Anness IX huwa emendat f’konformità mal-Anness II ta’ dan ir-Regolament.