|
B.
|
Lista ta’ persuni fiżiċi jew ġuridiċi, entitajiet jew korpi msemmijin fl-Artikolu 2(1):
|
|
Isem
|
Informazzjoni ta’ Identifikazzjoni
|
Raġunijiet
|
Data tal-elenkar
|
|
“1.
|
DIAW, Malick
|
Post tat-twelid: Ségou
Data tat-twelid: 2.12.1979
Nazzjonalità: Mali
Numru tal-passaport: B0722922 validu sat-13.8.2018
Sess: raġel
Pożizzjoni: President tal-Kunsill Tranżizzjonali Nazzjonali (organu leġiżlattiv tat-tranżizzjoni politika tal-Mali), Logutenent Ġeneral
|
Malick Diaw huwa membru ewlieni taċ-ċirku intern tal-Kurunell Assimi Goïta. Bħala kap kmandant tat-tielet reġjun militari ta’ Kati, kien wieħed mill-istigaturi u l-mexxejja tal-kolp ta’ stat tat-18 ta’ Awwissu 2020 flimkien mal-Kurunell Maġġur Ismaël Wagué, il-Kurunell Assimi Goïta, il-Kurunell Sadio Camara u l-Kurunell Modibo Koné.
Għaldaqstant Malick Diaw huwa responsabbli għal azzjonijiet jew politiki li jheddu l-paċi, is-sigurtà u l-istabbiltà tal-Mali.
Malick Diaw huwa wkoll attur ewlieni fil-kuntest tat-tranżizzjoni politika tal-Mali, bħala l-President tal-Kunsill tat-Tranżizzjoni Nazzjonali (CNT) minn Diċembru 2020. Fis-16 ta’ Ottubru 2024, Malick Diaw ġie promoss għall-grad ta’ Logutenent Ġeneral ‘3 stilel’ mill-Kunsill tal-Ministri tal-Mali.
Is-CNT naqas milli jikseb riżultati fil-ħin fuq il-‘missjonijiet’ imnaqqxa fil-Karta tat-Tranżizzjoni tal-1 ta’ Ottubru 2020 (‘Karta tat-Tranżizzjoni’) u li suppost kellhom jitlestew fi żmien 18-il xahar, kif jidher mid-dewmien tas-CNT biex jadotta l-abbozz tal-liġi elettorali.
Dak id-dewmien ikkontribwixxa għad-dewmien fl-organizzazzjoni tal-elezzjonijiet u b’hekk għat-tlestija b’suċċess tat-tranżizzjoni politika tal-Mali. Barra minn hekk, l-abbozz ta’ liġi elettorali l-ġdid, kif eventwalment adottat mis-CNT fis-17 ta’ Ġunju 2022 u ppubblikat fil-Ġurnal Uffiċjali tar-Repubblika tal-Mali fl-24 ta’ Ġunju 2022, jippermetti lill-President tat-Tranżizzjoni u lill-Viċi President tat-Tranżizzjoni u lill-membri tal-Gvern ta’ Tranżizzjoni jkunu kandidati għall-elezzjonijiet presidenzjali u leġiżlattivi, f’kontradizzjoni mal-Karta ta’ Tranżizzjoni.
Malick Diaw ippresieda s-sessjoni li fit-3 ta’ Lulju 2025 approvat ir-reviżjoni tal-Karta tat-Tranżizzjoni li tagħti lil Assimi Goïta mandat rinnovabbli ta’ ħames snin mingħajr elezzjonijiet. Ir-reviżjoni tal-Karta tat-Tranżizzjoni tikkonsolida l-pożizzjoni ta’ Assimi Goïta u s-setgħat tal-ġunta billi ma tipprevedix obbligu immedjat li jsiru elezzjonijiet.
Il-Komunità Ekonomika tal-Istati tal-Afrika tal-Punent (ECOWAS) adottat sanzjonijiet individwali kontra l-Awtoritajiet ta’ Tranżizzjoni (inkluż Malick Diaw) f’Novembru 2021 għad-dewmien tagħhom fl-organizzazzjoni tal-elezzjonijiet u t-tlestija tat-tranżizzjoni politika tal-Mali. Fit-3 ta’ Lulju 2022, l-ECOWAS iddeċidiet li żżomm dawk is-sanzjonijiet individwali.
Għaldaqstant, Malick Diaw qed jostakola u jdgħajjef it-tlestija b’suċċess tat-tranżizzjoni politika tal-Mali.
|
4.2.2022
|
|
2.
|
WAGUÉ, Ismaël
|
Post tat-twelid: Bamako
Data tat-twelid: 2.3.1975
Nazzjonalità: Mali
Numru tal-passaport: passaport diplomatiku AA0193660 validu sal-15.2.2023
Sess: raġel
Pożizzjoni: Ministru għar-Rikonċiljazzjoni, Logutenent Ġeneral
|
Il-Kurunell Maġġur Ismaël Wagué huwa membru ewlieni fiċ-ċirku intern tal-Kurunell Assimi Goïta u kien wieħed mill-atturi ewlenin responsabbli għall-kolp ta’ stat tat-18 ta’ Awwissu 2020, flimkien mal-Kurunell Goïta, il-Kurunell Sadio Camara, il-Kurunell Modibo Koné u l-Kurunell Malick Diaw.
Fid-19 ta’ Awwissu 2020, huwa ħabbar li l-armata kienet ħadet il-poter f’idejha, u mbagħad sar kelliem għall-Kumitat Nazzjonali għas-Salvazzjoni tal-Poplu (Comité national pour le salut du peuple, CNSP). Fis-16 ta’ Ottubru 2024, Ismaël Wagué ġie promoss għall-grad ta’ Logutenent Ġeneral ‘3 stilel’ mill-Kunsill tal-Ministri tal-Mali.
Għaldaqstant Ismaël Wagué huwa responsabbli għal azzjonijiet li jheddu l-paċi, is-sigurtà u l-istabbiltà tal-Mali.
Bħala Ministru għar-Rikonċiljazzjoni fil-Gvern ta’ Tranżizzjoni minn Ottubru 2020, Ismaël Wagué kien inkarigat mill-implimentazzjoni tal-Ftehim ta’ Paċi u Rikonċiljazzjoni fil-Mali.
Permezz tad-dikjarazzjoni tiegħu f’Ottubru 2021 u n-nuqqas ta’ qbil perpetwu tiegħu mal-membri tal-Qafas Strateġiku Permanenti (Cadre Stratégique Permanent, CSP), huwa kkontribwixxa għall-imblukkar tal-Kumitat ta’ Monitoraġġ tal-Ftehim għall-Paċi u r-Rikonċiljazzjoni fil-Mali (Comité de suivi de l’accord, CSA), li wassal għas-sospensjoni tal-laqgħat tas-CSA minn Ottubru 2021 sa Settembru 2022.
Dik is-sitwazzjoni xekklet l-implimentazzjoni ta’ dak il-Ftehim, li kien wieħed mill-‘missjonijiet’ tat-tranżizzjoni politika tal-Mali, kif previst fl-Artikolu 2 tal-Karta ta’ Tranżizzjoni.
Fil-25 ta’ Jannar 2024, il-Gvern ta’ Tranżizzjoni ddenunzja l-Ftehim ta’ Paċi u Rikonċiljazzjoni fil-Mali u ddikjara t-terminazzjoni immedjata tiegħu. Minn dik id-data, kien hemm żieda sinifikanti fir-restrizzjonijiet awtoritarji imposti mill-Gvern ta’ Tranżizzjoni.
Il-Komunità Ekonomika tal-Istati tal-Afrika tal-Punent (ECOWAS) adottat sanzjonijiet individwali kontra l-Awtoritajiet ta’ Tranżizzjoni (inkluż Ismaël Wagué) f’Novembru 2021 għad-dewmien tagħhom fl-organizzazzjoni tal-elezzjonijiet u t-tlestija tat-tranżizzjoni politika tal-Mali. Fit-3 ta’ Lulju 2022, l-ECOWAS iddeċidiet li żżomm dawk is-sanzjonijiet individwali.
Għaldaqstant Ismaël Wagué huwa responsabbli għal azzjonijiet li jheddu l-paċi, is-sigurtà u l-istabbiltà tal-Mali, u qed jostakola u jdgħajjef it-tlestija b’suċċess tat-tranżizzjoni politika fil-Mali.
|
4.2.2022
|
|
4.
|
MAÏGA, Ibrahim Ikassa
|
Post tat-twelid: Tondibi, Gao region, Mali
Data tat-twelid: 5.2.1971
Nazzjonalità: Mali
Numru tal-Passaport: passaport diplomatiku maħruġ mill-Mali
Sess: raġel
Pożizzjoni: eks Ministru għar-Rifondazzjoni
|
Ibrahim Ikassa Maïga huwa membru tal-kumitat strateġiku tal-M5-RFP (Mouvement du 5 juin - Rassemblement des forces patriotiques), li kellu rwol ewlieni biex jitneħħa l-President Keita.
Bħala Ministru għar-Rifondazzjoni minn Ġunju 2021 sa Novembru 2024, Ibrahim Ikassa Maïga kien fdat bl-ippjanar tal-Konsultazzjonijiet Nazzjonali għar-Rifondazzjoni (Assises nationales de la Refondation, ANR) imħabbra mill-Prim Ministru Choguel Maïga.
Anke wara li ġie sostitwit fir-rwol tiegħu fil-gvern, Ibrahim Ikassa Maïga esprima ruħu politikament u f’solidarjetà mal-gvern tal-Mali, u wera li għadu jżomm rabtiet mill-qrib miegħu.
Kuntrarju għall-iskeda ta’ żmien għar-riforma u l-elezzjonijiet maqbula preċedentement mal-Komunità Ekonomika tal-Istati tal-Afrika tal-Punent (ECOWAS) f’konformità mal-Karta ta’ Tranżizzjoni, l-ARN tħabbru mill-Gvern ta’ Tranżizzjoni bħala proċess ta’ qabel ir-riforma u prekundizzjoni għall-organizzazzjoni tal-elezzjonijiet skedati għas-27 ta’ Frar 2022.
Kif imħabbar minn Choguel Maïga, l-ANR imbagħad ġew posposti diversi drabi u kien hemm dewmien fl-elezzjonijiet. L-ANR, li eventwalment saru f’Diċembru 2021, kienu bbojkottjati minn diversi partijiet ikkonċernati. Abbażi tar-rakkomandazzjonijiet finali tal-ARN, il-Gvern ta’ Tranżizzjoni ppreżenta skeda ta’ żmien ġdida li tipprevedi l-organizzazzjoni ta’ elezzjonijiet presidenzjali f’Diċembru 2025, biex b’hekk l-Awtoritajiet ta’ Tranżizzjoni jkunu jistgħu jibqgħu fil-poter għal aktar minn ħames snin. Wara skeda ta’ żmien riveduta ppreżentata f’Ġunju 2022, li tipprevedi l-organizzazzjoni ta’ elezzjonijiet presidenzjali f’Marzu 2024, fil-21 ta’ Settembru 2023 il-Gvern ta’ Tranżizzjoni ħabbar posponiment ulterjuri tal-elezzjonijiet.
Fil-25 ta’ Jannar 2024, il-Gvern ta’ Tranżizzjoni ddenunzja l-Ftehim ta’ Paċi u Rikonċiljazzjoni fil-Mali u ddikjara t-terminazzjoni immedjata tiegħu. Minn dik id-data, kien hemm żieda sinifikanti fir-restrizzjonijiet awtoritarji imposti mill-Gvern ta’ Tranżizzjoni.
L-ECOWAS adottat sanzjonijiet individwali kontra l-Awtoritajiet ta’ Tranżizzjoni (inkluż Ibrahim Ikassa Maïga) f’Novembru 2021 għad-dewmien tagħhom fl-organizzazzjoni tal-elezzjonijiet u t-tlestija tat-tranżizzjoni politika tal-Mali.
L-ECOWAS issottolinjat li l-Awtoritajiet ta’ Tranżizzjoni użaw il-ħtieġa li jimplimentaw riformi bħala pretest biex jiġġustifikaw l-estensjoni tat-tranżizzjoni politika tal-Mali u biex iżommu lilhom infushom fil-poter mingħajr elezzjonijiet demokratiċi. Fit-3 ta’ Lulju 2022, l-ECOWAS iddeċidiet li żżomm dawk is-sanzjonijiet individwali.
Bħala eks Ministru, kofundatur ta’ Espoir Mali Koura u kofundatur ta’ M5-RFP (Mouvement du 5 juin – Rassemblement des forces patriotiques), Ibrahim Ikassa Maïga għadu sostenitur influwenti u vokali tal-ġunta tal-Mali. Bid-dikjarazzjonijiet pubbliċi tiegħu, Ibrahim Ikassa Maïga qed jostakola u jdgħajjef it-tlestija b’suċċess tat-tranżizzjoni politika fil-Mali, b’mod partikolari billi jostakola u jdgħajjef l-organizzazzjoni tal-elezzjonijiet u t-trasferiment tal-poter lil awtoritajiet eletti.
|
4.2.2022
|
|
6.
|
Ivan Aleksandrovitch MASLOV
Иван Александрович МАСЛОВ
|
Data tat-twelid: 11.7.1982 jew 3.1.1980
Post tat-twelid: Arkhangelsk / Chuguevka village, Chuguev district, Primorsky territory
Nazzjonalità: Russa
Sess: raġel
Funzjoni: eks Kap tal-Wagner Group fil-Mali
Indirizz: Mhux magħruf, irreġistrat fil-belt ta’ Shatki, fir-reġjun ta’ Nizhni Novgorod skont ‘All eyes on Wagner’
|
Ivan Aleksandrovitch Maslov huwa l-kap tal-Wagner Group fil-Mali, li l-preżenza tiegħu fil-pajjiż kibret mill-aħħar tal-2021. Il-Wagner Group irtira mill-Mali f’Ġunju 2025 u ġie sostitwit mill-Africa Corps, u dan tal-aħħar allegatament reġa’ integra l-biċċa l-kbira tal-persunal Russu ta’ Wagner.
Il-preżenza ta’ Wagner fil-Mali ħolqot theddida għall-paċi, is-sigurtà u l-istabbiltà tal-pajjiż. B’mod partikolari, il-merċenarji ta’ Wagner kienu involuti f’atti ta’ vjolenza u abbużi multipli tad-drittijiet tal-bniedem fil-Mali, inkluż qtil extraġudizzjarju, bħall-‘massakru ta’ Moura’ fl-aħħar ta’ Marzu 2022.
Bħala l-ex kap lokali tal-Wagner Group, Ivan Maslov huwa għalhekk responsabbli għall-azzjonijiet tal-Wagner Group li jheddu l-paċi, is-sigurtà u l-istabbiltà tal-Mali, b’mod partikolari l-involviment f’atti ta’ vjolenza u abbużi tad-drittijiet tal-bniedem.
|
25.2.2023”
|
|
In force