(1)

Il-Bacillus thuringiensis subsp. israelensis tas-Serotip H14, tar-Razza AM65-52 ġie inkluż fl-Anness I tad-Direttiva 98/8/KE tal-Parlament Ewropew u tal-Kunsill (2) bħala sustanza attiva għall-użu fil-prodotti bijoċidali tat-tip 18. Skont l-Artikolu 86 tar-Regolament (UE) Nru 528/2012, ġie għalhekk ikkunsidrat bħala approvat skont dak ir-Regolament sat-30 ta’ Settembru 2023 soġġett għall-kundizzjonijiet stabbiliti fl-Anness I tad-Direttiva 98/8/KE.

(2)

Fit-30 ta’ Marzu 2022, ġiet sottomessa applikazzjoni f’konformità mal-Artikolu 13(1) tar-Regolament (UE) Nru 528/2012 għat-tiġdid tal-approvazzjoni tal-Bacillus thuringiensis subsp. israelensis tas-Serotip H14, tar-Razza AM65-52 għall-użu fil-prodotti bijoċidali tat-tip ta’ prodott 18 (“l-applikazzjoni”).

(3)

Fit-2 ta’ Frar 2023, l-awtorità kompetenti li tevalwa tal-Italja infurmat lill-Kummissjoni li kienet iddeċidiet, skont l-Artikolu 14(1) tar-Regolament (UE) Nru 528/2012, li kienet meħtieġa evalwazzjoni sħiħa tal-applikazzjoni. Skont l-Artikolu 8(1) ta’ dak ir-Regolament, l-awtorità kompetenti li tevalwa trid twettaq evalwazzjoni sħiħa tal-applikazzjoni fi żmien 365 jum mill-validazzjoni tagħha.

(4)

L-awtorità kompetenti li tevalwa tista’, kif ikun xieraq, teżiġi li l-applikant jipprovdi biżżejjed data biex titwettaq l-evalwazzjoni, f’konformità mal-Artikolu 8(2) tar-Regolament (UE) Nru 528/2012. F’dak il-każ, il-perjodu ta’ 365 jum jiġi sospiż għal perjodu li ma jistax jaqbeż il-180 jum b’kollox, sakemm ma tkunx iġġustifikata sospensjoni itwal minħabba n-natura tad-data mitluba jew minħabba ċirkostanzi eċċezzjonali.

(5)

Fi żmien 270 jum minn meta tirċievi rakkomandazzjoni mill-awtorità kompetenti li tevalwa, l-Aġenzija Ewropea għas-Sustanzi Kimiċi (“l-Aġenzija”) trid tħejji opinjoni dwar it-tiġdid tal-approvazzjoni tas-sustanza attiva u tissottomettiha lill-Kummissjoni f’konformità mal-Artikolu 14(3) tar-Regolament (UE) Nru 528/2012.

(6)

Id-Deċiżjoni ta’ Implimentazzjoni tal-Kummissjoni (UE) 2023/1085 (3) ipposponiet id-data tal-iskadenza tal-approvazzjoni tal-Bacillus thuringiensis subsp. israelensis tas-Serotip H14, tar-Razza AM65-52 għall-użu fil-prodotti bijoċidali tat-tip ta’ prodott 18 għall-31 ta’ Marzu 2026, sabiex ikun hemm biżżejjed żmien għall-eżami tal-applikazzjoni.

(7)

Fit-13 ta’ Ġunju 2025, l-awtorità kompetenti li tevalwa infurmat lill-Kummissjoni li l-evalwazzjoni ddewmet minħabba li l-awtorità teħtieġ studji addizzjonali biex tlesti l-evalwazzjoni. L-awtorità kompetenti tal-evalwazzjoni tistenna li tibgħat ir-rapport ta’ valutazzjoni tat-tiġdid lill-Aġenzija fl-ewwel trimestru tal-2026.

(8)

Għaldaqstant, għal raġunijiet lil hinn mill-kontroll tal-applikant, l-approvazzjoni aktarx tiskadi qabel ma tkun ittieħdet deċiżjoni dwar it-tiġdid tagħha. Għalhekk, jixraq li d-data tal-iskadenza tal-approvazzjoni tiġi posposta ulterjorment għal perjodu ta’ żmien biżżejjed biex tkun tista’ tiġi eżaminata l-applikazzjoni. Wara li tqiesu l-limiti ta’ żmien għall-evalwazzjoni mill-awtorità kompetenti tal-evalwazzjoni, u għat-tħejjija u għas-sottomissjoni mill-Aġenzija tal-opinjoni tagħha u ż-żmien meħtieġ biex il-Kummissjoni tiddeċiedi jekk iġġeddidx l-approvazzjoni tal-Bacillus thuringiensis subsp. israelensis tas-Serotip H14, tar-Razza AM65-52 għall-użu fil-prodotti bijoċidali tat-tip ta’ prodott 18, jenħtieġ li d-data tal-iskadenza tiġi posposta għall-31 ta’ Marzu 2028.

(9)

Wara l-posponiment ulterjuri tad-data tal-iskadenza tal-approvazzjoni, il-Bacillus thuringiensis subsp. israelensis tas-Serotip H14, tar-Razza AM65-52 jibqa’ approvat għall-użu fil-prodotti bijoċidali tat-tip 18 soġġett għall-kundizzjonijiet stabbiliti fl-Anness I tad-Direttiva 98/8/KE,