(1)

Il-Ftehim bejn l-Unjoni Ewropea u l-Ukrajna dwar it-trasport tal-merkanzija bit-triq (1) (il-“Ftehim”) ġie ffirmat mill-Unjoni fid-29 ta’ Ġunju 2022, u ilu jiġi applikat b’mod proviżorju minn dik id-data, f’konformità mad-Deċiżjoni tal-Kunsill (UE) 2022/1158 (2). Daħal fis-seħħ fil-5 ta’ Diċembru 2022.

(2)

L-Artikolu 7(1) tal-Ftehim jistabbilixxi Kumitat Konġunt biex jissorvelja u jimmonitorja l-applikazzjoni u l-implimentazzjoni tal-Ftehim u jirrieżamina perjodikament il-funzjonament tal-Ftehim fid-dawl tal-objettivi tiegħu. Skont l-Artikolu 7(2) tal-Ftehim, il-Kumitat Konġunt irid jitlaqqa’ mhux aktar tard minn 3 xhur qabel l-iskadenza tal-Ftehim sabiex jivvaluta u jiddeċiedi dwar il-ħtieġa tal-kontinwazzjoni tal-Ftehim.

(3)

Id-Deċiżjoni Nru 2/2023 tal-Kumitat Konġunt (3) tawlet id-durata tal-Ftehim sat-30 ta’ Ġunju 2024.

(4)

Fl-20 ta’ Ġunju 2024, ġie ffirmat mill-Unjoni l-Ftehim bejn l-Unjoni Ewropea u l-Ukrajna li jemenda l-Ftehim (4) (il-“Ftehim Emendatorju”), u huwa ilu jiġi applikat b’mod proviżorju minn dakinhar, f’konformità mad-Deċiżjoni tal-Kunsill (UE) 2024/1876 (5). Il-Ftehim Emendatorju tawwal id-durata tal-Ftehim sat-30 ta’ Ġunju 2025, b’tiġdid taċitu għal perjodu wieħed ta’ 6 xhur. Il-Ftehim ġie mġedded b’mod taċitu sal-31 ta’ Diċembru 2025.

(5)

Sabiex kemm l-Unjoni kif ukoll l-Ukrajna jkomplu jibbenefikaw mill-effetti pożittivi tal-Ftehim, billi jiffaċilitaw it-trasport tal-merkanzija bit-triq bejn l-Unjoni u l-Ukrajna u minn ġo fihom u jappoġġaw il-funzjonament effettiv tal-Korsiji ta’ Solidarjetà fil-kuntest tal-gwerra ta’ aggressjoni tar-Russja kontra l-Ukrajna, il-Ftehim jenħtieġ li jitkompla sal-31 ta’ Marzu 2027.

(6)

Il-Kumitat Konġunt, matul il-laqgħa li jmiss tiegħu, irid jadotta deċiżjoni dwar il-ħtieġa ta’ kontinwazzjoni ulterjuri tal-Ftehim. Dik id-deċiżjoni ser tkun vinkolanti għall-Unjoni.

(7)

Huwa xieraq li tiġi stabbilita l-pożizzjoni li trid tittieħed f’isem l-Unjoni fil-Kumitat Konġunt fir-rigward tal-kontinwazzjoni tal-Ftehim.

(8)

Minħabba t-tħassib u l-inċertezzi mqajma minn xi Stati Membri dwar l-impatt negattiv tal-Ftehim, il-Kummissjoni ser tniedi studju dwar l-impatt tal-Ftehim fuq l-industrija tat-trasport bit-triq li ser jeżamina wkoll it-tħassib dwar is-sikurezza fit-toroq, fil-livell tal-Unjoni u dak nazzjonali.

(9)

Jenħtieġ li kwalunkwe kontinwazzjoni ulterjuri tal-Ftehim tkun soġġetta għal progress sodisfaċenti li sar fl-allinjament tal-leġiżlazzjoni Ukrena mal-acquis tal-Unjoni fil-qasam tat-trasport tal-merkanzija bit-triq li għadu ma ġiex traspost u jenħtieġ li jitqiesu r-riżultati tal-istudju dwar l-impatt tal-Ftehim fuq l-industrija tat-trasport bit-triq.

(10)

Għalhekk, jenħtieġ li l-pożizzjoni tal-Unjoni fi ħdan il-Kumitat Konġunt tkun ibbażata fuq l-abbozz ta’ deċiżjoni mehmuż,