(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ din l-awtorizzazzjoni.

(2)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni ta’ preparat ta’ Bacillus subtilis FERM BP-07462, Enterococcus lactis FERM BP-10867 u Clostridium butyricum FERM BP-10866. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)

L-applikazzjoni tikkonċerna l-awtorizzazzjoni ta’ preparat ta’ Bacillus subtilis FERM BP-07462, Enterococcus lactis FERM BP-10867 u Clostridium butyricum FERM BP-10866 bħala addittiv tal-għalf biex jintuża fl-għalf u fl-ilma tax-xorb għat-tiġieġ tas-simna, għat-tiġieġ imrobbija għall-bajd jew għat-tnissil, għad-dundjani tas-simna, għad-dundjani mrobbija għall-bajd jew għat-tnissil u għall-ispeċijiet minuri kollha tat-tjur, inklużi l-għasafar għall-isport, l-għasafar eżotiċi u l-għasafar ornamentali l-oħra kollha, sal-punt tal-qatla jew tal-bidien, bit-talba li l-addittiv jiġi kklassifikat fil-kategorija “addittivi żootekniċi” u fil-grupp funzjonali “stabbilizzaturi tal-flora intestinali”.

(4)

Fl-opinjonijiet tagħha tal-4 ta’ Mejju 2022 (2) u tas-27 ta’ Settembru 2023 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li, skont il-kundizzjonijiet tal-użu proposti, il-preparat ta’ Bacillus subtilis FERM BP-07462, Enterococcus lactis FERM BP-10867 u Clostridium butyricum FERM BP-10866 hija sikura għall-ispeċijiet fil-mira, għall-konsumaturi u għall-ambjent. Ikkonkludiet ukoll li l-preparat mhuwiex irritanti għall-ġilda u għall-għajnejn iżda huwa sensitizzatur respiratorju, filwaqt li minħabba n-nuqqas ta’ informazzjoni pprovduta ma setgħet tinsilet l-ebda konklużjoni dwar il-potenzjal tiegħu li jkun sensitizzatur tal-ġilda. L-Awtorità kkonkludiet ukoll li l-preparat huwa effikaċi għall-ispeċijiet fil-mira fil-kundizzjonijiet tal-użu proposti. L-Awtorità kkonkludiet li l-preparat huwa kompatibbli mal-koċċidjostati diklażuril, dekokinat u alofuġinon, filwaqt li ma setgħet tinsilet l-ebda konklużjoni dwar il-kompatibbiltà ta’ dak il-preparat mal-koċċidjostati monensina tas-sodju, salinomiċina tas-sodju, narasina, idroklorur tar-robenidina u ammonju tal-maduramiċina. Ma kinitx tal-fehma li hemm ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq. L-Awtorità vverifikat ukoll ir-rapport dwar il-metodi ta’ analiżi tal-addittiv tal-għalf fl-għalf u fl-ilma, li tressaq mil-Laboratorju ta’ Referenza stabbilit bir-Regolament (KE) Nru 1831/2003.

(5)

Fl-21 ta’ Ġunju 2024, l-applikant irtira l-applikazzjoni fir-rigward tar-rikonoxximent tal-kompatibbiltà tal-użu tal-preparat ta’ Bacillus subtilis FERM BP-07462, Enterococcus lactis FERM BP-10867 u Clostridium butyricum FERM BP-10866 mal-koċċidjostati li ġejjin: monensina tas-sodju, salinomiċina tas-sodju, narasina, kloridrat tar-robenidina u maduramiċina tal-ammonju.

(6)

Fid-dawl ta’ dan ta’ hawn fuq, il-Kummissjoni tqis li l-preparat ta’ Bacillus subtilis FERM BP-07462, Enterococcus lactis FERM BP-10867 u Clostridium butyricum FERM BP-10866 jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li jiġi awtorizzat l-użu ta’ dak il-preparat. Huwa xieraq li jiġi indikat li l-preparat jista’ jintuża simultanjament mal-koċċidjostati diklażuril, dekokinat u alofuġinon. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti avversi fuq is-saħħa tal-utenti tal-addittiv.

(7)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,