(1)

Ir-Regolament (UE) 2023/988 jipprevedi l-possibbiltà li l-konsumaturi u partijiet interessati oħra jinfurmaw lill-Kummissjoni dwar prodotti li jistgħu joħolqu riskju għas-saħħa u s-sikurezza tal-konsumaturi permezz ta’ taqsima separata tal-Portal Safety Gate.

(2)

Jenħtieġ li l-mekkaniżmu ta’ informazzjoni li għandu jiġi speċifikat mill-Kummissjoni jikkonsisti fil-modalitajiet biex tintbagħat l-informazzjoni mill-konsumaturi, kif ukoll il-modalitajiet għat-trażmissjoni ta’ din l-informazzjoni lill-awtoritajiet nazzjonali kkonċernati. Dan il-mekkaniżmu se jeżisti flimkien ma’ mekkaniżmi fil-livell nazzjonali li jippermettu lill-konsumaturi u lil partijiet interessati oħra jressqu lmenti lill-awtoritajiet kompetenti, b’mod partikolari dwar is-sikurezza tal-prodotti, kif stabbilit fl-Artikolu 33(4) tar-Regolament (UE) 2023/988. Jenħtieġ li dawn il-mekkaniżmi kollha jiffaċilitaw it-trażmissjoni tal-informazzjoni mill-konsumaturi u mill-partijiet interessati oħra lill-awtoritajiet u jgħinu lill-awtoritajiet jidentifikaw kwistjonijiet potenzjali ta’ sikurezza tal-prodotti.

(3)

Jenħtieġ li l-Kummissjoni tfassal il-Portal Safety Gate b’mod li tevita jew tnaqqas l-użu ħażin jew it-theddid għas-sigurtà teknika tiegħu. Il-konsumaturi u partijiet interessati oħra jenħtieġ li jużaw din is-sistema biex jidentifikaw lilhom infushom meta jibagħtu informazzjoni lill-Kummissjoni dwar prodotti li jistgħu jippreżentaw riskju għas-saħħa u s-sikurezza tal-konsumaturi u meta jikkonsultaw l-istatus tal-ilmenti tagħhom.

(4)

Il-konsumaturi u partijiet interessati oħra jistgħu jibagħtu informazzjoni lill-Kummissjoni dwar prodotti li jistgħu jkunu ta’ riskju għas-saħħa u s-sikurezza tal-konsumaturi anki jekk ma jkunux xtraw il-prodott ikkonċernat iżda pereżempju sempliċiment użaw dak il-prodott mingħajr ma kienu s-sidien tiegħu jew ingħataw b’donazzjoni il-prodott ikkonċernat. F’dawk ix-xenarji, il-konsumatur jew parti interessata oħra li jirrapportaw din l-informazzjoni jaf ma jkunux jistgħu jipprovdu informazzjoni dettaljata dwar il-prodott jew il-katina tal-provvista tiegħu.

(5)

L-informazzjoni mressqa mill-konsumaturi u partijiet interessati oħra permezz tal-Portal Safety Gate jenħtieġ li tkun kompluta kemm jista’ jkun sabiex l-awtoritajiet nazzjonali rilevanti jkunu jistgħu jsegwu dik l-informazzjoni b’mod effettiv. Jenħtieġ li l-informazzjoni pprovduta tippermetti l-identifikazzjoni tal-prodott u, fejn dik l-informazzjoni tkun disponibbli għall-konsumaturi jew għal partijiet interessati oħra, il-katina tal-provvista tiegħu. B’mod partikolari, dan jinkludi l-operatur ekonomiku jew il-fornitur ta’ post tas-suq online li permezz tiegħu jkunu xtraw il-prodott u, meta jkun differenti, il-persuna responsabbli għall-prodott, skont l-Artikolu 16(1) tar-Regolament (UE) 2023/988 jew l-Artikolu 4 tar-Regolament (UE) 2019/1020 tal-Parlament Ewropew u tal-Kunsill (2). L-identifikazzjoni pprovduta jenħtieġ li tinkludi wkoll ir-riskji possibbli għas-saħħa u s-sikurezza tal-konsumaturi. Sabiex ikun jista’ jsir segwitu xieraq għall-informazzjoni mibgħuta, jenħtieġ li l-konsumatur jew parti interessata oħra jindikaw f’liema Stat Membru għandhom ir-residenza tagħhom jew f’liema Stat Membru ikunu jinsabu, jekk dan tal-aħħar ikun aktar konvenjenti għall-konsumatur jew għal parti interessata oħra sabiex ikun jista’ jsir segwitu, pereżempju fir-rigward tal-lingwa għall-komunikazzjoni, fejn applikabbli.

(6)

Sabiex tivverifika l-eżattezza u r-rilevanza tal-informazzjoni mibgħuta mill-konsumaturi u minn partijiet interessati oħra dwar prodotti li jistgħu jkunu ta’ riskju għas-saħħa u s-sikurezza tal-konsumaturi, jenħtieġ li l-Kummissjoni tfassal it-taqsima speċifika tal-Portal Safety Gate fejn tiġi mressqa l-informazzjoni b’mod li jippermetti iffiltrar preliminari. Jenħtieġ li dan l-iffiltrar jiżgura li tinżamm biss informazzjoni relatata ma’ kwistjonijiet ta’ sikurezza tal-prodotti, u mhux, pereżempju, informazzjoni marbuta mal-funzjonament ħażin tal-prodotti, mingħajr ebda tħassib dwar is-sikurezza. Jenħtieġ li dan l-iffiltrar ikun awtomatizzat, biex jiġi żgurat li l-verifika tkun tista’ ssir malajr, u b’hekk il-każijiet li jqajmu kwistjonijiet ta’ sikurezza jkunu jistgħu jintbagħtu minnufih lill-awtoritajiet nazzjonali rilevanti. Jenħtieġ li din is-sistema tippermetti lill-awtoritajiet nazzjonali jindirizzaw b’mod effiċjenti l-prodotti li jistgħu jkunu ta’ riskju għas-saħħa u s-sikurezza tal-konsumaturi.

(7)

Ladarba titwettaq din il-filtrazzjoni awtomatizzata, jenħtieġ li l-Kummissjoni tibgħat l-informazzjoni lill-Istati Membri rilevanti, filwaqt li tiżgura li l-Istati Membri kollha jkollhom aċċess għall-informazzjoni fis-sistema. Biex jiġi żgurat segwitu xieraq mill-Istati Membri rilevanti, jenħtieġ li l-informazzjoni tintbagħat lil dawk l-Istati Membri fejn ikollu r-residenza jew jinsab il-konsumatur jew il-parti interessata l-oħra li tkun ressqet din l-informazzjoni u, fejn applikabbli, lill-Istat Membru fejn ikun inxtara l-prodott, kif ukoll lill-Istat Membru fejn tkun stabbilita l-persuna responsabbli għall-prodott, skont l-Artikolu 4 tar-Regolament (UE) 2019/1020 jew l-Artikolu 16(1) tar-Regolament (UE) 2023/988 jew il-fornitur rilevanti ta’ post tas-suq online. Jenħtieġ li s-sistema tkun iddisinjata b’tali mod li jiġu trażmessi lil dawk l-Istati Membri, każijiet fejn prodott joħloq riskji għas-saħħa u s-sikurezza tal-konsumaturi, bl-objettiv li jiġi żgurat is-segwitu xieraq. Dan il-mod kif tintbagħat informazzjoni lill-Istati Membri rilevanti jaqbel mal-prattika attwali skont is-sistema Safety Business Gateway, li permezz tagħha, n-negozji jinfurmaw lill-awtoritajiet dwar kwistjonijiet ta’ sikurezza tal-prodotti. Jenħtieġ li l-preżentazzjoni ta’ informazzjoni lill-Istati Membri rilevanti ma twaqqafx lil Stati Membri oħra milli jkollhom aċċess u segwitu għal dik l-informazzjoni wkoll.

(8)

Id-data personali pprovduta mill-konsumaturi jew minn partijiet interessati oħra jenħtieġ li tiġi pproċessata mill-Kummissjoni skont id-dritt tal-Unjoni dwar il-protezzjoni tad-data personali. Kwalunkwe ipproċessar ta’ data personali skont dan ir-Regolament huwa soġġett għar-Regolamenti (UE) 2016/679 (3) u (UE) 2018/1725 (4) tal-Parlament Ewropew u tal-Kunsill u d-Direttiva 2002/58/KE tal-Parlament Ewropew u tal-Kunsill (5) tal-Parlament Ewropew u tal-Kunsill, kif applikabbli. Meta l-konsumaturi jirrapportaw prodott fuq il-Portal Safety Gate, dik id-data personali li tkun meħtieġa biex jiġi rrapportat il-prodott perikoluż biss jenħtieġ li tinħażen b’mod proporzjonat u għal perjodu massimu ta’ ħames snin wara li tiddaħħal.

(9)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta l-opinjoni tiegħu fis-26 ta’ Marzu 2024.

(10)

Jenħtieġ li dan ir-Regolament japplika mill-istess data tar-Regolament (UE) 2023/988.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat tar-Regolament dwar is-Sikurezza Ġenerali tal-Prodotti stabbilit skont l-Artikolu 46(1) tar-Regolament (UE) 2023/988,