(1)

Ir-Regolament (KE) Nru 853/2004 jistabbilixxi regoli speċifiċi ta’ iġjene għall-ikel li joriġina mill-annimali għall-operaturi tan-negozju tal-ikel. B’mod partikolari, l-Anness II ta’ dak ir-Regolament jistabbilixxi r-rekwiżiti li jikkonċernaw diversi prodotti ta’ oriġini mill-annimali, u l-Anness III tiegħu jistabbilixxi rekwiżiti speċifiċi. L-Anness II, it-Taqsima I tar-Regolament (KE) Nru 853/2004 tistabbilixxi r-rekwiżiti dwar l-applikazzjoni ta’ marka ta’ identifikazzjoni għall-prodotti ta’ oriġini mill-annimali. L-Anness II, it-Taqsima I, il-Parti B tar-Regolament (KE) Nru 853/2004 tirreferi għall-Komunità Ewropea, minflok għall-Unjoni Ewropea. Għalhekk, jenħtieġ li l-abbrevjazzjonijiet tal-marka ta’ identifikazzjoni li jirreferu għall-“Unjoni Ewropea” jissostitwixxu r-referenzi għall-“Komunità Ewropea”. Madankollu, tali sostituzzjoni toħloq piż amministrattiv sostanzjali. Għalhekk jenħtieġ li jiġi previst perjodu ta’ tranżizzjoni li matulu l-prodotti li jkollhom marka ta’ identifikazzjoni bl-abbrevjazzjoni għall-“Komunità Ewropea” qabel it-tmiem tal-perjodu ta’ tranżizzjoni jistgħu jibqgħu fis-suq.

(2)

Barra minn hekk, hija meħtieġa kjarifika dwar ir-rabta bejn il-forma tal-marka ta’ identifikazzjoni meħtieġa mir-Regolament (KE) Nru 853/2004, u r-rekwiżiti għal marka ta’ identifikazzjoni speċjali stabbiliti għall-kontroll ta’ ċertu mard tal-annimali fir-Regolament (UE) 2016/429 tal-Parlament Ewropew u tal-Kunsill (2). L-Anness II, it-Taqsima I, il-Parti B tar-Regolament (KE) Nru 853/2004 jenħtieġ li tiġi emendata biex tiċċara liema forma jenħtieġ li tapplika f’ċirkostanzi speċifiċi.

(3)

L-Anness II jirrikjedi wkoll li l-operaturi tan-negozju tal-ikel li joperaw il-biċċeriji kif xieraq, jitolbu, jingħataw, jiċċekkjaw u jaġixxu fid-dawl tal-informazzjoni tal-katina alimentari u dan jgħodd għall-annimali kollha mibgħuta jew maħsuba biex jintbagħtu lejn il-biċċerija, għajr il-kaċċa salvaġġa. L-istess rekwiżiti jenħtieġ li japplikaw għall-operaturi tan-negozju tal-ikel li joperaw stabbilimenti li jipproċessaw il-kaċċa fejn il-kaċċa mrobbija maqtula fil-post tal-oriġini tintbagħat lill-istabbiliment li jipproċessa l-kaċċa.

(4)

Il-biċċeriji mobbli qed jintużaw dejjem aktar biex jiġu evitati kwistjonijiet possibbli dwar it-trattament xieraq tal-annimali matul it-trasport, pereżempju, minħabba ħinijiet twal ta’ trasport tal-annimali mrobbija f’żoni remoti. Il-biċċeriji mobbli huma soġġetti għall-approvazzjoni bħal kwalunkwe biċċerija oħra f’konformità mal-Artikolu 4(2) tar-Regolament (KE) Nru 853/2004 f’kull Stat Membru fejn joperaw. Madankollu, hemm bżonn li jiġi ċċarat kif din l-approvazzjoni jenħtieġ li tapplika fil-każ ta’ taħlita ta’ faċilitajiet mobbli u permanenti tal-biċċerija. L-approvazzjoni tal-biċċeriji hija bbażata l-aktar fuq il-konformità mar-rekwiżiti dwar il-kostruzzjoni, it-tqassim u t-tagħmir ta’ dawk il-biċċeriji previsti fl-Anness III, it-Taqsimiet I u II, il-Kapitolu II tar-Regolament (KE) Nru 853/2004.

(5)

L-Artikolu 43(6) tar-Regolament ta’ Implimentazzjoni tal-Kummissjoni (UE) 2019/627 (3) jippermetti, f’ċirkostanzi eċċezzjonali, li annimali ħajjin jistgħu jittieħdu lejn biċċerija oħra. Ir-Regolament (KE) Nru 853/2004 ma jipprevedix din il-possibbiltà. Għall-konsistenza tal-leġiżlazzjoni tal-Unjoni, ir-Regolament (KE) Nru 853/2004 jenħtieġ li jiġi allinjat f’dan ir-rigward mar-Regolament ta’ Implimentazzjoni (UE) 2019/627. Għalhekk jenħtieġ li ll-Anness III, it-Taqsima I, il-Kapitolu IV tar-Regolament (KE) Nru 853/2004 jiġi emendat skont dan.

(6)

Ir-Regolament (KE) Nru 853/2004 jippermetti l-isturdament u l-iżvinar ta’ għadd limitat ta’ ċerti ungulati fil-farm soġġetti għal rekwiżiti speċifiċi inkluż li l-annimali ma jistgħux jiġu ttrasportati lejn il-biċċerija biex jiġi evitat kwalunkwe riskju għal min jieħu ħsiebhom u biex jiġi pprevenut kwalunkwe ħsara lill-annimali matul it-trasport. Dan ir-rekwiżit jillimita din il-possibbiltà ta’ sturdament u żvinar fil-farm fil-biċċa l-kbira għal annimali mrobbija b’mod estensiv u jeskludi l-biċċa l-kbira tal-annimali pproċessati b’mod regolari mill-bdiewa u għalhekk ittrasportati faċilment mingħajr riskju. Abbażi tal-esperjenza miksuba mill-operaturi tan-negozju tal-ikel u mill-awtoritajiet kompetenti u filwaqt li titqies id-domanda dejjem akbar biex tiġi evitata kwalunkwe kwistjoni ta’ trattament xieraq tal-annimali matul it-trasport, huwa xieraq li tiġi estiża dik il-possibbiltà li jiġu storduti u żvinati l-ungulati fil-farm f’konformità ma’ rekwiżiti speċifiċi għall-annimali ovini u kaprini u għal ungulati oħrajn imrobbija fi kwalunkwe kundizzjoni ta’ alloġġ.

(7)

Fid-19 ta’ Jannar 2023, l-Awtorità Ewropea dwar is-Sigurtà fl-Ikel ippubblikat Opinjoni Xjentifika dwar Microbiological Safety of Aged Meat (4) (“l-Opinjoni tal-EFSA”). L-Opinjoni tal-EFSA tindika li l-laħam maturat ma joħloqx riskju akbar għas-saħħa pubblika mil-laħam frisk jekk jiġu ssodisfati ċerti rekwiżiti. Filwaqt li jitqies il-konsum dejjem akbar ta’ laħam maturat, huwa xieraq li jiġu stabbiliti rekwiżiti speċifiċi rrakkomandati fl-Opinjoni tal-EFSA fir-Regolament (KE) Nru 853/2004, b’mod partikolari fir-rigward ta’ laħam maturat fin-niexef minn annimali bovini. Dan il-laħam jiġi introdott fis-suq bħala laħam frisk, eż. billi jiżdiedu kolturi ta’ maturazzjoni matul il-maturazzjoni fin-niexef tal-laħam frisk, bħala preparat tal-laħam. L-Anness III, it-Taqsimiet I u V tar-Regolament (KE) Nru 853/2004 jenħtieġ li jiġu emendati skont dan.

(8)

L-Anness III, it-Taqsima I, il-Kapitolu VII tar-Regolament (KE) Nru 853/2004 jipprevedi kundizzjonijiet alternattivi tat-trasport għal karkassi, nofs karkassi, kwarti jew nofs karkassi maqtugħa fi tliet qatgħat bl-ingrossa ta’ annimali ovini, kaprini, annimali bovini u porċini. Dawn il-kundizzjonijiet tat-trasport huma bbażati fuq il-kontroll tat-temperatura tal-wiċċ tal-laħam minflok it-temperatura tal-qalba tiegħu u jeħtieġ li jikkonformaw ma’ rekwiżiti speċifiċi.

(9)

Abbażi tal-esperjenza miksuba mill-operaturi tan-negozju tal-ikel u mill-awtoritajiet kompetenti, huwa xieraq li jiġu emendati dawk ir-rekwiżiti speċifiċi stabbiliti fl-Anness III, it-Taqsima I, il-Kapitolu VII tar-Regolament (KE) Nru 853/2004 b’mod partikolari biex jippermettu l-ġbir tal-laħam minn maħżen imkessaħ u minn għadd limitat ta’ biċċeriji, li jiġi permess it-trasport fl-istess kompartiment b’aktar tipi ta’ laħam li jikkonformaw mar-rekwiżiti finali tat-temperatura ta’ dan il-laħam, u li jiġu pprovduti kundizzjonijiet addizzjonali ta’ temperatura u ħin għat-trasport ta’ karkassi, nofs karkassi, kwarti jew nofs karkassi maqtugħin fi tliet qatgħat bl-ingrossa ta’ annimali ovini, kaprini u annimali bovini matul ħin massimu ta’ trasport ta’ 30 siegħa.

(10)

L-awtoritajiet kompetenti indikaw eżiti differenti għall-kejl tat-temperatura tal-wiċċ meta jintużaw metodi differenti. Għalhekk huwa xieraq li jiġi stabbilit metodu ta’ referenza bbażat fuq l-esperjenza miksuba mill-operaturi tan-negozju tal-ikel u l-iżviluppi teknoloġiċi filwaqt li tinżamm il-possibbiltà li jintużaw metodi alternattivi.

(11)

Fl-Anness III, it-Taqsima III tar-Regolament (KE) Nru 853/2004 tirrikjedi li r-ratiti mrobbija u l-ungulati mrobbija maqtula fil-farm għandhom jiġu ttrasportati lejn il-biċċerija għal aktar ipproċessar. Peress li l-istabbilimenti li jipproċessaw il-kaċċa għandhom faċilitajiet xierqa biex jipproċessaw b’mod iġeniku tali kaċċa mrobbija maqtula fil-farm, jenħtieġ li dawn ikunu awtorizzati li jirċievu u jipproċessaw ukoll ratiti mrobbija u ungulati mrobbija.

(12)

L-Anness III, it-Taqsima III, il-punt (3)(i) jirrikjedi wkoll dikjarazzjoni mill-operatur tan-negozju tal-ikel li jkun rabba l-annimali biex takkumpanja ratiti mrobbija u ungulati mrobbija maqtula fil-farm għall-biċċerija. L-informazzjoni pprovduta f’dik id-dikjarazzjoni hija simili għall-informazzjoni dwar il-katina alimentari. Sabiex jitnaqqas il-piż amministrattiv permezz ta’ din id-duplikazzjoni tal-informazzjoni, dan ir-rekwiżit għad-dikjarazzjoni jenħtieġ li jitħassar. Ir-referenzi għall-punt 3(i) jenħtieġ li jiġu sostitwiti b’referenzi għall-informazzjoni dwar il-katina alimentari.

(13)

Il-kaċċa mrobbija maqtula fl-azjenda li minnha ġejjin l-annimali trid tiġi akkumpanjata b’ċertifikat li jattesta l-konformità mar-rekwiżiti stabbiliti fl-Anness III, it-Taqsima III, il-punt 3 tar-Regolament (KE) Nru 853/2004, bl-użu tal-mudell taċ-ċertifikat tas-saħħa stabbilit fl-Anness IV, il-Kapitolu 3 tar-Regolament ta’ Implimentazzjoni tal-Kummissjoni (UE) 2020/2235 (5). Biex tiġi evitata kwalunkwe ambigwità bejn ir-rekwiżit legali stabbilit fir-Regolament (KE) Nru 853/2004 u l-mudell taċ-ċertifikat tas-saħħa stabbilit fir-Regolament ta’ Implimentazzjoni (UE) 2020/2235, il-kliem fiċ-ċertifikat tas-saħħa kemm fir-Regolament (KE) Nru 853/2004 kif ukoll fir-Regolament ta’ Implimentazzjoni (UE) 2020/2235 jenħtieġ li jkun kompletament konsistenti.

(14)

L-Anness III, it-Taqsima VIII, il-Kapitolu VII, il-punti 1 u 2 tar-Regolament (KE) Nru 853/2004 jipprevedu li l-prodotti tas-sajd friski u l-prodotti tas-sajd mhux ipproċessati maħlula mis-silġ, għandhom jinżammu f’temperatura qrib dik tas-silġ li qed idub u li l-prodotti tas-sajd iffriżati għandhom jinżammu f’temperatura ta’ mhux aktar minn -18 °C fil-partijiet kollha tal-prodotti. Is-settur tal-prodotti tas-sajd xi drabi jeħtieġ li juża magni li jfellu l-prodotti tas-sajd mhux ipproċessati friski u maħlula jew prodotti tas-sajd ipproċessati u li jistgħu jerġgħu jiffurmaw it-tfellil billi jużaw folji f’saffi impoġġija b’mod awtomatiku. F’dan il-każ, dawk il-prodotti tas-sajd jitqiegħdu f’kamra kiesħa biex titnaqqas it-temperatura inizjali tagħhom jew, fil-każ ta’ prodotti diġà ffriżati, it-temperatura tagħhom tiżdied għal aktar minn -18 °C biex ikun permess it-tqattigħ jew it-tfellil. Għalhekk huwa xieraq li jiġi awtorizzat, meta jkun meħtieġ għal temperatura teknoloġikament meħtieġa, li t-temperatura tal-prodotti tas-sajd sottomessi għal dik il-prattika tkun differenti mit-temperaturi meħtieġa fl-Anness III, it-Taqsima VIII, il-Kapitolu VII, il-punti 1 u 2 għal perjodu ta’ żmien limitat. Madankollu, il-ħżin u t-trasport f’dik it-temperatura jenħtieġ li ma jkunux permessi.

(15)

L-Anness III, it-Taqsima IX, il-Kapitolu I, il-Parti I tar-Regolament (KE) Nru 853/2004 tistabbilixxi r-rekwiżiti tas-saħħa għall-ħalib mhux trattat u għall-produzzjoni tal-kolostru f’merħliet ta’ annimali mrobbija li minnhom jinġabru l-ħalib u l-kolostru bil-għan li jiġu introdotti fis-suq. Il-punt 3 ta’ dik il-Parti I jipprevedi li l-ħalib mhux trattat mill-baqar, mill-bufli, min-nagħaġ jew mill-mogħoż li ma jkunux ġejjin minn merħliet ħielsa jew uffiċjalment ħielsa mill-bruċellożi u mit-tuberkulożi għandu jsirlu trattament bis-sħana biex juri reazzjoni negattiva għat-test tal-fosfatażi alkalina. Madankollu, l-ittestjar tal-fosfatażi alkalina ma huwiex metodu xieraq għall-verifika tat-trattament bis-sħana tal-ħalib mhux trattat minn speċijiet mhux bovini jew minn ħalib mhux trattat separat fi frazzjonijiet differenti qabel it-trattament bis-sħana f’impjanti tal-ipproċessar moderni. Għalhekk jenħtieġ li l-operaturi tan-negozju tal-ikel jiġu offruti għażliet alternattivi bbażati fuq il-prinċipji tal-analiżi tal-perikli u tal-punti kritiċi ta’ kontroll (HACCP) stabbiliti fir-Regolament (KE) Nru 852/2004 tal-Parlament Ewropew u tal-Kunsill (6) biex juru l-effettività tat-trattament bis-sħana applikat.

(16)

L-Anness III, it-Taqsima IX, il-Kapitolu II, il-Parti II tar-Regolament (KE) Nru 853/2004 tistabbilixxi r-rekwiżiti għat-trattament bis-sħana tal-ħalib mhux trattat, tal-kolostru, tal-prodotti tal-ħalib jew tal-prodotti li fihom il-kolostru. Il-punt 1(a) ta’ dik il-Parti II jipprevedi li l-prodotti ppastorizzati jridu juru, meta applikabbli, reazzjoni negattiva għal test tal-fosfatażi alkalina immedjatament wara tali trattament. Minħabba n-nuqqas ta’ adegwatezza tal-ittestjar tal-fosfatażi alkalina għall-verifika tat-trattament bis-sħana tal-ħalib mhux trattat minn speċijiet mhux bovini jew ħalib mhux trattat separat fi frazzjonijiet differenti qabel ma jiġi ttrattat bis-sħana, jenħtieġ li l-operaturi tan-negozju tal-ikel jiġu offruti wkoll għażliet alternattivi bbażati fuq il-prinċipji tal-HACCP biex tintwera l-effettività tal-pasturizzazzjoni.

(17)

L-Anness III, it-Taqsima X, il-Kapitolu I tar-Regolament (KE) Nru 853/2004 jistabbilixxi regoli tal-iġjene għall-produzzjoni tal-bajd u b’mod partikolari jipprevedi li, fil-bini tal-produttur sal-bejgħ lill-konsumatur, il-bajd irid jinżamm ħieles minn riħa barranija peress li tali riħa tista’ tkun indikattiva ta’ alterazzjoni fil-bajd li jagħmilhom mhux adatti għall-konsum dirett mill-konsumatur finali. Madankollu, meta riħa barranija tkun ġiet applikata intenzjonalment għall-bajd minn operatur tan-negozju tal-ikel sabiex jagħtihom togħmiet partikolari, il-preżenza ta’ tali riħa ma tfissirx li l-bajd jippreżenta riskju għall-konsumatur. Għalhekk, jenħtieġ li jkun permess l-introduzzjoni fis-suq ta’ bajd li għalih tkun ġiet applikata riħa intenzjonalment, dment li tali prattika ma tkunx maħsuba biex taħbi l-eżistenza minn qabel ta’ kwalunkwe riħa barranija tal-bajd.

(18)

Huwa xieraq li l-operaturi tan-negozju tal-ikel jingħataw biżżejjed żmien biex jadattaw għar-rekwiżiti l-ġodda dwar il-maturazzjoni fin-niexef taċ-ċanga jew biex juru għas-sodisfazzjon tal-awtoritajiet kompetenti s-sikurezza ta’ approċċi alternattivi. Għalhekk, dawn ir-rekwiżiti l-ġodda stabbiliti fl-Anness III, it-Taqsima I, il-Kapitolu VII tar-Regolament (KE) Nru 853/2004, kif emendat b’dan ir-Regolament, jenħtieġ li japplikaw 6 xhur mid-data tad-dħul fis-seħħ ta’ dan ir-Regolament.

(19)

Għalhekk, ir-Regolament (KE) Nru 853/2004 jenħtieġ li jiġi emendat skont dan,