(1)

Ir-rekwiżiti ta’ rapportar għandhom rwol ewlieni fl-iżgurar tal-monitoraġġ kif suppost u l-infurzar korrett ta’ atti legali tal-Unjoni. Madankollu, huwa importanti li tali rekwiżiti jiġu ssimplifikati sabiex jiġi żgurat li jissodisfaw l-iskop li għaliħ kienu maħsuba u biex jillimitaw il-piż amministrattiv.

(2)

Fil-komunikazzjoni tagħha tas-16 ta’ Marzu 2023 bit-titolu “Il-kompetittività fit-tul tal-UE: inħarsu lil hinn mill-2030”, il-Kummissjoni impenjat ruħha li tirrazzjonalizza u tissimplifika r-rekwiżiti ta’ rapportar, bl-għan aħħari li tnaqqas dawn il-piżijiet b’25 %, mingħajr ma timmina l-objettivi ta’ politika relatati.

(3)

Id-Direttivi 1999/2/KE (3), 2000/14/KE (4), 2011/24/UE (5) u 2014/53/UE (6) tal-Parlament Ewropew u tal-Kunsill fihom għadd ta’ rekwiżiti ta’ rapportar fl-oqsma tal-ikel u tal-ingredjenti tal-ikel, tal-ħoss ta’ barra, tad-drittijiet tal-pazjenti, u tat-tagħmir tar-radju.

(4)

Skont l-Artikolu 7(3) tad-Direttiva 1999/2/KE, l-Istati Membri għandhom jirrapportaw kull sena lill-Kummissjoni r-riżultati tal-kontrolli mwettqa fil-faċilitajiet tal-irradjazzjoni jonizzanti u tal-kontrolli mwettqa fl-istadju tat-tqegħid fis-suq tal-prodott. L-Artikolu 7(4) ta’ dik id-Direttiva jistipula li l-Kummissjoni għandha tippubblika, f’Il-Ġurnal Uffiċjali tal-Unjoni Ewropea, rapport ibbażat fuq l-informazzjoni pprovduta kull sena mill-Istati Membri. L-Artikolu 113 tar-Regolament (UE) 2017/625 tal-Parlament Ewropew u tal-Kunsill (7) jipprevedi li kull Stat Membru għandu jippreżenta lill-Kummissjoni, sal-31 ta’ Awwissu ta’ kull sena, rapport li jistabbilixxi l-eżitu tal-kontrolli uffiċjali mwettqa fis-sena preċedenti skont il-pjan ta’ kontroll pluriennali nazzjonali tiegħu. Il-pjanijiet ta’ kontroll pluriennali nazzjonali għandhom ikopru, fost l-oħrajn, il-kamp ta’ applikazzjoni tad-Direttiva 1999/2/KE. Barra minn hekk, l-Artikolu 114 tar-Regolament (UE) 2017/625 jipprevedi li kull sena l-Kummissjoni għandha tagħmel disponibbli għall-pubbliku rapport annwali dwar l-operat ta’ kontrolli uffiċjali fl-Istati Membri, filwaqt li tqis ir-rapporti annwali ppreżentati mill-Istati Membri f’konformità mal-Artikolu 113 ta’ dak ir-Regolament. Peress li l-obbligi ta’ rapportar annwali stabbiliti fl-Artikoli 113 u 114 tar-Regolament (UE) 2017/625 diġà jiżguraw l-infurzar u l-monitoraġġ ta’ atti legali tal-Unjoni dwar l-ikel u l-ingredjenti tal-ikel irradjati, l-obbligu ta’ rapportar annwali simili attwalment stabbilit fid-Direttiva 1999/2/KE jenħtieġ li jitħassar sabiex jitnaqqas il-piż amministrattiv għall-awtoritajiet kompetenti u għall-Kummissjoni.

(5)

Skont l-Artikolu 16 tad-Direttiva 2000/14/KE, il-manifatturi, jew ir-rappreżentanti awtorizzati tagħhom, għandhom jibagħtu kopja tad-dikjarazzjoni ta’ konformità tal-KE għat-tagħmir għall-użu ta’ barra li jaqa’ fil-kamp ta’ applikazzjoni ta’ dik id-Direttiva lill-awtoritajiet responsabbli tal-Istati Membri u lill-Kummissjoni. Il-Kummissjoni għandha tiġbor id-data u tippubblika l-informazzjoni rilevanti perjodikament. Il-konsumaturi jistgħu jsibu l-informazzjoni rilevanti dwar l-emissjonijiet ta’ ħoss tat-tagħmir kopert mid-Direttiva 2000/14/KE direttament fuq it-tagħmir, peress li l-Artikolu 4(1) ta’ dik id-Direttiva jipprovdi, fost l-oħrajn, għal indikazzjoni tal-livell tal-qawwa tal-ħoss garantit fuq it-tagħmir. Għalhekk, l-obbligi fuq l-Istati Membri u l-Kummissjoni stabbiliti fl-Artikolu 16 tad-Direttiva 2000/14/KE li jipprovdu dokumentazzjoni, jiġbru data u jippubblikaw informazzjoni huma superfluwi u jenħtieġ li, fl-interess tar-razzjonalità u sabiex jiġi limitat il-piż amministrattiv għall-kumpaniji u għall-awtoritajiet, jitħassru.

(6)

Skont l-Artikolu 20(1), il-punt (a), tad-Direttiva 2000/14/KE, il-Kummissjoni għandha tippreżenta lill-Parlament Ewropew u lill-Kunsill rieżami tad-data miġbura dwar il-ħoss f’konformità mal-Artikolu 16 ta’ dik id-Direttiva. Peress li tali data dwar il-ħoss mhux se tibqa’ tinġabar, dak l-obbligu jenħtieġ li jitħassar ukoll.

(7)

Skont l-Artikolu 20(1) tad-Direttiva 2011/24/UE, il-Kummissjoni għandha tippreżenta lill-Parlament Ewropew u lill-Kunsill rapport dwar l-operat ta’ dik id-Direttiva kull tliet snin. Dak ir-rapport huwa bbażat ħafna fuq l-assistenza u l-informazzjoni pprovduta mill-awtoritajiet nazzjonali kompetenti. L-Artikolu 14(1) tad-Deċiżjoni ta’ Implimentazzjoni tal-Kummissjoni 2014/287/UE (8) jipprevedi li n-Networks Ewropej ta’ Referenza stabbiliti skont id-Direttiva 2011/24/UE għandhom jiġu evalwati kull ħames snin. Sabiex jiġu allinjati r-rekwiżiti ta’ rapportar u ta’ evalwazzjoni, u biex jitnaqqas il-piż amministrattiv għall-Kummissjoni u għall-Istati Membri li huma mitluba jipprovdu informazzjoni dwar l-implimentazzjoni tad-Direttiva 2011/24/UE, il-frekwenza tar-rapportar mill-Kummissjoni jenħtieġ li tinbidel għal kull ħames snin. Meta jitqies li l-aktar rapport reċenti dwar l-operat tad-Direttiva 2011/24/UE ġie ppubblikat fl-2022, ir-rapport li jmiss jenħtieġ li jiġi ppubblikat fl-2027.

(8)

Skont l-Artikolu 47(1) tad-Direttiva 2014/53/UE, l-Istati Membri għandhom jippreżentaw lill-Kummissjoni rapporti regolari dwar l-applikazzjoni ta’ dik id-Direttiva mill-inqas kull sentejn. Il-frekwenza ta’ dak ir-rapportar obbligatorju hija ogħla milli meħtieġ. Fl-interess tar-razzjonalità u sabiex jiġi limitat il-piż amministrattiv għall-Istati Membri, il-frekwenza tar-rapportar obbligatorju mill-Istati Membri jenħtieġ li tinbidel għal kull ħames snin, sabiex tikkorrispondi mal-obbligu tal-Kummissjoni skont l-Artikolu 47(2) ta’ dik id-Direttiva li tirrapporta lill-Parlament Ewropew u lill-Kunsill dwar l-operat ta’ dik id-Direttiva. Tali frekwenza se tibqa’ tipprovdi lill-Kummissjoni bl-informazzjoni meħtieġa għall-valutazzjoni li għandha twettaq meta tadotta atti delegati skont l-Artikolu 5(2) tad-Direttiva 2014/53/UE, li jispeċifikaw liema kategoriji ta’ tagħmir tar-radju huma kkonċernati mir-rekwiżit tar-reġistrazzjoni, u se jippermetti lill-Kummissjoni tuża l-informazzjoni mir-rapporti tal-Istati Membri b’mod aktar effiċjenti.

(9)

Minħabba li l-objettiv ta’ din id-Direttiva, jiġifieri li jiġu ssimplifikati r-rekwiżiti ta’ rapportar stabbiliti fid-Direttivi 1999/2/KE, 2000/14/KE, 2011/24/UE and 2014/53/UE, ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat tal-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkiseb dak l-objettiv.

(10)

Għaldaqstant, id-Direttivi 1999/2/KE, 2000/14/KE, 2011/24/UE u 2014/53/UE jenħtieġ li jiġu emendati skont dan,

(1)

l-Artikolu 16 huwa mħassar;

(2)

fl-Artikolu 20(1), il-punt (a) huwa mħassar.