(1)

L-Artikolu 4(1) tad-Direttiva 2011/65/UE jirrikjedi li l-Istati Membri jiżguraw li t-tagħmir elettriku u elettroniku mqiegħed fis-suq ma jkunx fih is-sustanzi perikolużi elenkati fl-Anness II ta’ dik id-Direttiva. Dik ir-restrizzjoni ma tapplikax għal ċerti applikazzjonijiet eżentati li huma elenkati fl-Anness III ta’ dik id-Direttiva.

(2)

Il-kadmju huwa sustanza ristretta elenkata fl-Anness II tad-Direttiva 2011/65/UE. Il-valur massimu tal-konċentrazzjoni ttollerat huwa ta’ 0,01 % skont il-piż ta’ kadmju f’materjali omoġenji.

(3)

Permezz tad-Direttiva Delegata (UE) 2017/1975 (2), il-Kummissjoni tat eżenzjoni għall-użu tas-selenid tal-kadmju fil-punti kwantistiċi tan-nanokristalli semikondutturi għal bidla fil-frekwenza tad-dawl li jgħaddi minnhom għall-użu f’applikazzjonijiet tat-tidwil għall-wiri (“l-eżenzjoni kurrenti”), li hija elenkata fl-entrata 39(a) tal-Anness III tad-Direttiva 2011/65/UE. L-eżenzjoni kellha tiskadi fil-31 ta’ Ottubru 2019.

(4)

Fid-29 ta’ Settembru 2017, fid-29 ta’ April 2018 u fit-30 ta’ April 2018, il-Kummissjoni rċeviet applikazzjonijiet għall-emendar tal-eżenzjoni kurrenti (“l-applikazzjonijiet”), jiġifieri fil-limitu ta’ żmien stabbilit fl-Artikolu 5(5) tad-Direttiva 2011/65/UE. F’konformità mal-Artikolu 5(5), it-tieni subparagrafu, tad-Direttiva 2011/65/UE, eżenzjoni tibqa’ valida sa meta tittieħed deċiżjoni dwar it-talba għat-tiġdid.

(5)

L-evalwazzjoni tal-applikazzjonijiet, li qieset id-disponibbiltà tas-sostituti u l-impatt soċjoekonomiku tas-sostituzzjoni, kienet tinkludi studju ta’ valutazzjoni teknika u xjentifika (3) u studju ta’ segwitu (4). L-evalwazzjoni kienet tinkludi konsultazzjonijiet mal-partijiet ikkonċernati f’konformità mal-Artikolu 5(7) tad-Direttiva 2011/65/UE. Il-kummenti li waslu matul dawk il-konsultazzjonijiet saru disponibbli għall-pubbliku fuq sit web apposta.

(6)

L-eżenzjoni attwali ma tiddistingwix bejn konfigurazzjonijiet differenti fil-mod kif il-materjal b’bażi ta’ kadmju huwa integrat fil-punti kwantiċi. L-evalwazzjoni sabet li l-applikazzjonijiet bl-hekk imsejħa konfigurazzjonijiet on-edge u on-surface ma għadhomx jissodisfaw il-kundizzjonijiet stabbiliti fl-Artikolu 5(1), il-punt (a), tad-Direttiva 2011/65/UE. L-hekk imsejħa konfigurazzjoni on-chip tirrikjedi l-anqas ammont ta’ kadmju u turi livelli ta’ prestazzjoni aħjar.

(7)

L-evalwazzjoni kkonkludiet ukoll li bħalissa huma disponibbli alternattivi għat-teknoloġija “on-chip” applikabbli fl-applikazzjonijiet tat-tidwil li huma affidabbli u li jiksbu livelli ta’ prestazzjoni simili. Għal dawk l-applikazzjonijiet, l-evalwazzjoni kkonkludiet li l-benefiċċji ta’ eżenzjoni ma jissuperawx l-impatti negattivi tagħhom fuq l-ambjent, is-saħħa u s-sikurezza tal-konsumatur. Għalhekk, il-kundizzjonijiet stabbiliti fl-Artikolu 5(1), il-punt (a), tad-Direttiva 2011/65/UE ma humiex issodisfati għat-teknoloġija “on-chip” applikabbli fl-applikazzjonijiet tat-tidwil.

(8)

L-evalwazzjoni kkonkludiet ukoll li bħalissa huma disponibbli ħafna alternattivi għat-teknoloġija “on-chip” applikabbli fl-applikazzjonijiet tal-wiri, madankollu, għal xi teknoloġiji speċifiċi, bħall-unitajiet tal-wiri mikro, bħalissa ma teżisti l-ebda alternattiva affidabbli. Għal dawk l-applikazzjonijiet speċifiċi tal-wiri, għalkemm qed jiġu żviluppati sostituti, hija ssodisfata l-kundizzjoni stabbilita fl-Artikolu 5(1), il-punt (a), it-tieni inċiż, tad-Direttiva 2011/65/UE, jiġifieri li l-affidabbiltà tas-sostituti ma hijiex żgurata.

(9)

Il-konfigurazzjoni “on-chip” tista’ tirriżulta wkoll f’anqas kadmju għal kull apparat, b’mod partikolari għal skrins tal-kristalli likwidi, meta mqabbla mal-konfigurazzjonijiet “on-surface”, li jużaw anqas minn 0,01 % skont il-piż ta’ kadmju f’materjal omoġenu. Minħabba effiċjenza enerġetika akbar u anqas użu tal-kadmju totali, il-benefiċċji ambjentali jissuperaw l-impatti negattivi totali fuq l-ambjent, is-saħħa u s-sikurezza tal-konsumatur ikkawżati minn sostituzzjoni tal-kadmju. Il-kamp ta’ applikazzjoni limitat tal-eżenzjoni mitluba fl-applikazzjonijiet, fil-forma ta’ konċentrazzjoni massima ta’ kadmju għal kull apparat, jiżgura li jitqiegħed anqas kadmju fis-suq milli taħt l-eżenzjoni kurrenti. Għalhekk, il-kundizzjoni stabbilita fl-Artikolu 5(1), il-punt (a), it-tielet inċiż, tad-Direttiva 2011/65/UE hija ssodisfata.

(10)

L-eżenzjoni mitluba hija konsistenti mar-Regolament (KE) Nru 1907/2006 tal-Parlament Ewropew u tal-Kunsill (5) u ma ddgħajjifx il-protezzjoni tal-ambjent u tas-saħħa mogħtija minnu.

(11)

Għalhekk, huwa xieraq li tingħata l-eżenzjoni għall-kadmju fil-punti kwantiċi ta’ nanokristalli semikondutturi għal bidla fil-frekwenza tad-dawl li jgħaddi minnhom (downshifting) iddepożitat direttament fuq ċipep semikondutturi LED biex jintużaw fit-tidwil tas-sistemi ta’ turija u tal-projezzjoni. Huwa mistenni li l-alternattivi għal dawk l-applikazzjonijiet ta’ punti kwantistiċi b’bażi ta’ kadmju jistgħu jkunu disponibbli sa tmiem l-2027. Hawnhekk jitqiesu ż-żewġ effetti pożittivi fuq l-innovazzjonijiet (eż. il-minjaturizzazzjoni) kif ukoll l-effetti negattivi fuq l-innovazzjoni (eż. anqas inċentivi għall-iżvilupp ta’ alternattivi mingħajr kadmju). Għalhekk huwa xieraq li tiġi limitata d-durata tal-eżenzjoni sa dik id-data f’konformità mal-Artikolu 5(2) tad-Direttiva 2011/65/UE.

(12)

Jenħtieġ li tiġi stabbilita data ta’ skadenza għall-eżenzjoni kurrenti f’konformità mal-Artikolu 5(6) tad-Direttiva 2011/65/UE. Sabiex l-industrija tingħata biżżejjed żmien u fid-dawl tal-ktajjen tal-provvista globali għal tali prodotti, huwa xieraq li tiġi stabbilita d-data ta’ skadenza massima possibbli ta’ 18-il xahar wara d-deċiżjoni għall-eżenzjoni kurrenti.

(13)

Għaldaqstant, jenħtieġ li d-Direttiva 2011/65/UE tiġi emendata bix-xieraq,