(1)

Skont l-Artikolu 78(3) tar-Regolament (KE) Nru 1107/2009, is-sustanzi attivi inklużi fl-Anness I tad-Direttiva tal-Kunsill 91/414/KEE (2) jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (3). Is-sustanzi attivi approvati skont ir-Regolament (KE) Nru 1107/2009 huma elenkati fil-Parti B tal-Anness tar-Regolament ta’ Implimentazzjoni (UE) Nru 540/2011, u s-sustanzi attivi approvati skont ir-Regolament (KE) Nru 1107/2009 bħala kandidati għas-sostituzzjoni huma elenkati fil-Parti E ta’ dak l-Anness.

(2)

Is-sustanzi attivi 2-fenilfenol (inklużi l-mlieħi tiegħu bħall-melħ tas-sodju), amidosulfuron, bifenoks, dikamba, difenokonażol, diflufenikan, dimetaklor, etofenproks, fenoksaprop-P, fenpropidin, lenasil, napropammid, nikosulfuron, żjut tal-paraffina, żejt tal-paraffina, penkonażol, pikloram, kubrit, tetrakonażol u tri-allat huma elenkati fil-Parti A tal-Anness tar-Regolament ta’ Implimentazzjoni (UE) Nru 540/2011. Is-sustanzi attivi 1-naftilaċetammid, aċidu 1-naftilaċetiku, 8-idrossikwinolina, fenpirażammina, fluważifop P, proeżadjon u spiroksammina huma elenkati fil-Parti B u s-sustanza attiva esfenvalerat hija elenkata fil-Parti E ta’ dak l-Anness.

(3)

Ir-Regolament ta’ Implimentazzjoni tal-Kummissjoni (UE) 2022/1480 (4) estenda l-perjodu ta’ approvazzjoni tas-sustanzi attivi 2-fenilfenol, 8-idrossikwinolina, amidosulfuron, bifenoks, dikamba, difenokonażol, diflufenikan, dimetaklor, esfenvalerat, etofenproks, fenoksaprop-P, fenpropidin, fenpirażammina, lenasil, nikosulfuron, żjut tal-paraffina, żejt tal-paraffina, penkonażol, pikloram, proeżadjon, kubrit, tetrakonażol u tri-allat sal-31 ta’ Diċembru 2023.

(4)

Ir-Regolament ta’ Implimentazzjoni tal-Kummissjoni (UE) 2019/291 (5) estenda l-perjodu ta’ approvazzjoni tas-sustanzi attivi 1-naftilaċetammid, aċidu 1-naftilaċetiku, fluważifop P u spiroksammina sal-31 ta’ Diċembru 2023.

(5)

L-approvazzjoni tas-sustanza attiva napropammid se tiskadi fil-31 ta’ Diċembru 2023 f’konformità mar-Regolament ta’ Implimentazzjoni tal-Kummissjoni (UE) 2018/670 (6).

(6)

L-applikazzjonijiet u d-dossiers supplimentari għat-tiġdid tal-approvazzjoni ta’ kull waħda minn dawk is-sustanzi attivi ġew ippreżentati f’konformità mar-Regolament ta’ Implimentazzjoni tal-Kummissjoni (UE) Nru 844/2012 (7). Dawk l-applikazzjonijiet kollha ġew iddikjarati ammissibbli mill-Istati Membri relaturi rispettivi.

(7)

Għas-sustanzi attivi 1-naftilaċetammid, aċidu 1-naftilaċetiku, bifenoks, esfenvalerat, etofenproks, fenpirażammina, fluważifop P, napropammid, żjut tal-paraffina, proeżadjon, spiroksammina, tetrakonażol u tri-allat, il-valutazzjoni tar-riskju skont l-Artikolu 11 tar-Regolament ta’ Implimentazzjoni (UE) Nru 844/2012 għadha ma ġietx iffinalizzata mill-Istati Membri relaturi rispettivi.

(8)

Għas-sustanzi attivi 8-idrossikwinolina, dikamba, dimetaklor, nikosulfuron u penkonażol, l-Awtorità Ewropea dwar is-Sigurtà fl-Ikel (“l-Awtorità”) teħtieġ aktar żmien biex tasal għal konklużjoni u fejn xieraq torganizza konsultazzjoni mal-esperti. Barra minn hekk, huwa meħtieġ żmien addizzjonali biex il-Kummissjoni tadotta d-deċiżjoni li tirriżulta dwar il-ġestjoni tar-riskju.

(9)

Għas-sustanzi attivi 2-fenilfenol, difenokonażol, diflufenikan, fenpropidin u pikloram, intalbet informazzjoni addizzjonali mill-Awtorità skont l-Artikolu 13(3a), l-ewwel subparagrafu tar-Regolament ta’ Implimentazzjoni (UE) Nru 844/2012, għall-finijiet tal-valutazzjoni tal-kriterji tal-approvazzjoni stabbiliti fil-punt 3.6.5 u fil-punt 3.8.2 tal-Anness II tar-Regolament (KE) Nru 1107/2009, bi skadenza fl-20 ta’ Settembru 2025 għat-2-fenilfenol, fit-22 ta’ Jannar 2024 għad-difenokonażol, fil-5 ta’ Novembru 2023 għad-diflufenikan, fl-10 ta’ Marzu 2025 għall-fenpropidin u fil-1 ta’ Diċembru 2025 għall-pikloram.

(10)

Fil-każ tas-sustanzi attivi amidosulfuron, fenoksaprop-P, lenasil u żejt tal-paraffina, intalbet informazzjoni addizzjonali mill-Awtorità skont l-Artikolu 13(3a), l-ewwel subparagrafu tar-Regolament ta’ Implimentazzjoni (UE) Nru 844/2012, għall-finijiet tal-valutazzjoni tal-kriterji tal-approvazzjoni stabbiliti fil-punt 3.6.5 u fil-punt 3.8.2 tal-Anness II tar-Regolament (KE) Nru 1107/2009, u din tressqet mill-applikanti fi żmien il-perjodu stabbilit mill-Awtorità. Madankollu, huwa meħtieġ aktar żmien biex l-Awtorità tevalwa l-informazzjoni li rċeviet u tadotta konklużjoni dwar jekk is-sustanzi attivi jistgħux ikunu mistennija li jissodisfaw il-kriterji tal-approvazzjoni u biex il-Kummissjoni tadotta d-deċiżjoni li tirriżulta dwar il-ġestjoni tar-riskju.

(11)

Għas-sustanza attiva kubrit, l-Awtorità ressqet il-konklużjoni tagħha lill-applikant, lill-Istati Membri u lill-Kummissjoni. Il-Kummissjoni bdiet diskussjonijiet dwar din is-sustanza attiva fil-Kumitat Permanenti dwar il-Pjanti, l-Annimali, l-Ikel u l-Għalf.

(12)

Peress li aktarx li l-ebda deċiżjoni dwar it-tiġdid tal-approvazzjoni ta’ dawk is-sustanzi attivi mhi se tkun tista’ tittieħed qabel l-iskadenza tal-perjodi tal-approvazzjoni rispettivi tagħhom fil-31 ta’ Diċembru 2023, u minħabba li r-raġunijiet għad-dewmien fil-proċeduri tat-tiġdid mhumiex fil-kontroll tal-applikanti rispettivi, jenħtieġ li l-perjodi tal-approvazzjoni tas-sustanzi attivi jiġu estiżi sabiex ikunu jistgħu jitlestew il-valutazzjonijiet meħtieġa u sabiex jiġu finalizzati l-proċeduri regolatorji tat-teħid tad-deċiżjonijiet dwar l-applikazzjonijiet rispettivi għat-tiġdid tal-approvazzjoni.

(13)

Billi l-valutazzjoni tar-riskju għadha ma ġietx finalizzata mill-Istati Membri relaturi, u minħabba ż-żmien meħtieġ biex jitlestew il-passi li fadal f’kull proċedura ta’ tiġdid, it-tul ta’ żmien tal-estensjoni għas-sustanzi attivi bifenoks, etofenproks, napropammid, żjut tal-paraffina, tetrakonażol u tri-allat jenħtieġ li jiġu stabbiliti għal disgħa u tletin xahar u għas-sustanzi attivi 1-naftilaċetammid, aċidu 1-naftilaċetiku, esfenvalerat, fenpirażammina, fluważifop P, proeżadjon u spiroksammina jenħtieġ li jiġu stabbiliti għal disgħa u għoxrin xahar.

(14)

Peress li l-Awtorità teħtieġ żmien addizzjonali biex tiftaħ konsultazzjoni pubblika għas-sustanzi attivi dikamba u nikosulfuron, u minħabba ż-żmien meħtieġ biex jitlestew il-passi li fadal f’kull proċedura ta’ tiġdid, it-tul ta’ żmien tal-estensjoni għal dawk is-sustanzi attivi jenħtieġ li jiġi stabbilit għal disgħa u tletin xahar.

(15)

Peress li l-Awtorità jeħtieġ li tasal għal konklużjoni dwar il-valutazzjoni tar-riskju għas-sustanzi attivi dimetaklor u penkonażol, li tirrikjedi, fejn xieraq, konsultazzjoni mal-esperti, u minħabba ż-żmien meħtieġ biex jitlestew il-passi li fadal f’kull proċedura ta’ tiġdid, it-tul tal-estensjoni għal dawk is-sustanzi attivi jenħtieġ li jiġi stabbilit għal tlieta u tletin xahar u nofs.

(16)

Peress li l-Awtorità talbet informazzjoni addizzjonali għall-finijiet tal-valutazzjoni tal-kriterji tal-approvazzjoni stabbiliti fil-punt 3.6.5 u fil-punt 3.8.2 tal-Anness II tar-Regolament (KE) Nru 1107/2009 għas-sustanzi attivi 2-fenilfenol, difenokonażol, diflufenikan, fenpropidin u pikloram, u minħabba ż-żmien meħtieġ biex jitlestew il-passi li fadal f’kull proċedura ta’ tiġdid, it-tul tal-estensjoni għall-2-fenilfenol jenħtieġ li jiġi stabbilit għal sitta u erbgħin xahar u nofs, għad-difenokonażol jenħtieġ li jiġi stabbilit għal sitta u għoxrin xahar u nofs, għad-diflufenikan jenħtieġ li jiġi stabbilit għal erbgħa u għoxrin xahar u nofs, għall-fenpropidin jenħtieġ li jiġi stabbilit għal erbgħin xahar u nofs, u għall-pikloram jenħtieġ li jiġi stabbilit għal disgħa u erbgħin xahar u nofs.

(17)

Peress li l-Awtorità teħtieġ aktar żmien għall-evalwazzjoni tal-informazzjoni addizzjonali li rċeviet għall-finijiet tal-valutazzjoni tal-kriterji tal-approvazzjoni stabbiliti fil-punt 3.6.5 u fil-punt 3.8.2 tal-Anness II tar-Regolament (KE) Nru 1107/2009, u minħabba ż-żmien meħtieġ biex jitlestew il-passi li fadal f’kull proċedura ta’ tiġdid, it-tul tal-estensjoni għas-sustanzi attivi amidosulfuron, fenoksaprop-P, lenasil u żejt tal-paraffina, jenħtieġ li jiġi stabbilit għal dsatax-il xahar u nofs.

(18)

Skont il-punt 3.6.4 tal-Anness II tar-Regolament (KE) Nru 1107/2009, sustanza attiva għandha tiġi approvata biss jekk ma tkunx jew ma għandhiex tiġi kklassifikata, f’konformità mad-dispożizzjonijiet tar-Regolament (KE) Nru 1272/2008 tal-Parlament Ewropew u tal-Kunsill (8), bħala tossika għar-riproduzzjoni kategorija 1B, sakemm l-esponiment tal-bnedmin għal dik is-sustanza fi prodott għall-protezzjoni tal-pjanti f’kundizzjonijiet tal-użu realistiċi proposti ma jkunx negliġibbli. Kif previst fl-Artikolu 4(1) tar-Regolament (KE) Nru 1107/2009, il-valutazzjoni tas-sustanza attiva għandha l-ewwel tistabbilixxi jekk il-kriterji tal-approvazzjoni stabbiliti fil-punti 3.6.2 sa 3.6.4 u 3.7 tal-Anness II humiex issodisfati. Fid-dawl tar-Regolament tal-Kummissjoni (UE) 2017/776 (9), li jemenda l-Anness VI tar-Regolament (KE) Nru 1272/2008, li jikklassifika t-8-idrossikwinolina bħala tossika għar-riproduzzjoni kategorija 1B, it-tul tal-estensjoni għas-sustanza attiva jenħtieġ li jiġi stabbilit għal tnax-il xahar.

(19)

Billi l-Kumitat Permanenti dwar il-Pjanti, l-Annimali, l-Ikel u l-Għalf għad irid jagħti l-opinjoni tiegħu, u minħabba ż-żmien meħtieġ biex jitlestew il-passi li fadal f’kull proċedura ta’ tiġdid, it-tul tal-estensjoni għas-sustanza attiva kubrit jenħtieġ li jiġi stabbilit għal ħmistax-il xahar u nofs. Għaldaqstant jenħtieġ li r-Regolament ta’ Implimentazzjoni (UE) Nru 540/2011 jiġi emendat skont dan.

(20)

F’każ li l-Kummissjoni tadotta Regolament li jipprevedi li l-approvazzjoni ta’ sustanza attiva msemmija fl-Anness ta’ dan ir-Regolament ma tiġġeddidx, il-Kummissjoni tiffissa d-data tal-iskadenza fl-istess data kif kienet qabel l-adozzjoni ta’ dan ir-Regolament, jew fid-data tad-dħul fis-seħħ tar-Regolament, dejjem jekk l-approvazzjoni tas-sustanza attiva ma tiġġeddidx, skont liema data tiġi l-aħħar. Rigward il-każijiet meta l-Kummissjoni tadotta Regolament li jipprevedi t-tiġdid ta’ sustanza attiva msemmija fl-Anness ta’ dan ir-Regolament, il-Kummissjoni se tistabbilixxi, kif ikun xieraq skont iċ-ċirkostanzi, l-eqreb data ta’ applikazzjoni possibbli.

(21)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,