This document is an excerpt from the EUR-Lex website
Document 32023R1100
Commission Implementing Regulation (EU) 2023/1100 of 5 June 2023 introducing preventive measures concerning certain products originating in Ukraine
Regolament ta’ Implimentazzjoni tal-Kummissjoni (UE) 2023/1100 tal-5 ta’ Ġunju 2023 li jintroduċi miżuri preventivi fir-rigward ta’ ċerti prodotti li joriġinaw fl-Ukrajna
Regolament ta’ Implimentazzjoni tal-Kummissjoni (UE) 2023/1100 tal-5 ta’ Ġunju 2023 li jintroduċi miżuri preventivi fir-rigward ta’ ċerti prodotti li joriġinaw fl-Ukrajna
C/2023/3767
ĠU L 144I, 5.6.2023, p. 1–4
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 15/09/2023: This act has been changed. Current consolidated version: 05/06/2023
5.6.2023 |
MT |
Il-Ġurnal Uffiċjali tal-Unjoni Ewropea |
LI 144/1 |
REGOLAMENT TA’ IMPLIMENTAZZJONI TAL-KUMMISSJONI (UE) 2023/1100
tal-5 ta’ Ġunju 2023
li jintroduċi miżuri preventivi fir-rigward ta’ ċerti prodotti li joriġinaw fl-Ukrajna
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2023/1077 tal-Parlament Ewropew u tal-Kunsill tal-31 ta’ Mejju 2023 dwar il-miżuri ta’ liberalizzazzjoni tal-kummerċ temporanji (1), u b’mod partikulari l-Artikolu 4(6) tiegħu,
Billi:
(1) |
Wara l-gwerra ta’ aggressjoni mhux provokata u mhux ġustifikata tar-Russja kontra l-Ukrajna mill-24 ta’ Frar 2022, biex tappoġġa l-ekonomija tal-Ukrajna, permezz tar-Regolament (UE) 2022/870, l-Unjoni Ewropea introduċiet miżuri ta’ liberalizzazzjoni tal-kummerċ li jissupplimentaw il-konċessjonijiet kummerċjali applikabbli għall-prodotti Ukreni skont il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra (2). |
(2) |
Bir-Regolament ta’ Implimentazzjoni tal-Kummissjoni (UE) 2023/903, l-Unjoni introduċiet miżuri preventivi fir-rigward ta’ ċerti prodotti li joriġinaw fl-Ukrajna (3). Dawk il-miżuri kienu meħtieġa biex jiġu indirizzati ċirkostanzi eċċezzjonali li jirriskjaw li jaffettwaw il-vijabbiltà ekonomika tal-produtturi lokali fil-Bulgarija, fl-Ungerija, fil-Polonja, fir-Rumanija u fis-Slovakkja. |
(3) |
Kemm ir-Regolament (UE) 2022/870 kif ukoll ir-Regolament ta’ Implimentazzjoni (UE) 2023/903 skadew fil-5 ta’ Ġunju 2023. |
(4) |
Biex tkompli bl-appoġġ tagħha tal-ekonomija Ukrena, l-Unjoni adottat ir-Regolament (UE) 2023/1077 dwar miżuri ta’ liberalizzazzjoni tal-kummerċ li jissupplimentaw il-konċessjonijiet kummerċjali applikabbli għall-prodotti Ukreni skont il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra (4) (‘il-Ftehim ta’ Assoċjazzjoni’). |
(5) |
Fid-dawl tal-iskadenza tar-Regolament ta’ Implimentazzjoni (UE) 2023/903, il-Kummissjoni vvalutat jekk iċ-ċirkostanzi eċċezzjonali msemmija fil-premessa 2 ta’ dak ir-Regolament għadhomx jeżistu u għalhekk jirrikjedu l-adozzjoni ta’ miżuri preventivi ġodda f’konformità mal-Artikolu 4(6) tar-Regolament (UE) 2023/1077. |
(6) |
Il-valutazzjoni wriet li għad fadal ostakli loġistiċi importanti. B’mod partikolari, l-infrastruttura fil-Bulgarija, fl-Ungerija, fil-Polonja, fir-Rumanija u fis-Slovakkja għadha insuffiċjenti biex tittratta ż-żieda fit-traffiku, b’mod partikolari fil-fruntieri bejn l-Ukrajna u dawk l-Istati Membri. It-tagħmir għadu meħtieġ b’mod urġenti u l-kapaċità hija skarsa u dan jirriżulta fi spejjeż loġistiċi għoljin, filwaqt li hemm ukoll riskju għoli ta’ kapaċitajiet ta’ ħżin insuffiċjenti fl-Istati membri affettwati. |
(7) |
Dawn iċ-ċirkostanzi eċċezzjonali jaffettwaw il-vijabbiltà ekonomika ta’ produtturi lokali f’dawk l-Istati Membri. Għalhekk, iċ-ċirkostanzi eċċezzjonali li jaffettwaw lill-produtturi lokali tal-Unjoni għadhom għaddejjin. Fid-dawl ta’ dawk iċ-ċirkostanzi, il-Kummissjoni vvalutat is-sitwazzjoni bħala li għadha tiġġustifika azzjoni immedjata skont l-Artikolu 4(6) tar-Regolament (UE) 2023/1077. |
(8) |
Għadu meħtieġ li jiġi żgurat li l-oġġetti speċifiċi bħall-qamħ, il-qamħirrum, iż-żerriegħa tal-kolza u ż-żerriegħa tal-ġirasol li joriġinaw fl-Ukrajna, li kollha jikkompetu għall-istess kapaċitajiet ta’ ħażna, ikunu rilaxxati għaċ-ċirkolazzjoni libera jew imqiegħda taħt il-proċeduri ta’ ħażna doganali, żona ħielsa jew proċessar attiv, kif previst fir-Regolament (UE) 952/2013 tal-Parlament Ewropew u tal-Kunsill (5), fi Stati Membri biss għajr il-Bulgarija, l-Ungerija, il-Polonja, ir-Rumanija jew is-Slovakkja. |
(9) |
Madankollu, dik il-limitazzjoni ma taffettwax il-moviment ta’ dawk l-oġġetti fil-Bulgarija, l-Ungerija, il-Polonja, ir-Rumanija jew is-Slovakkja, jew minnhom, lejn Stat Membru ieħor jew lejn pajjiż jew territorju bararra t-territorju doganali tal-Unjoni, skont il-proċedura ta’ tranżitu doganali, kif previst fl-Artikolu 226 tar-Regolament (UE) 952/2013. Jekk madankollu, tali moviment jiġi affettwat b’mod negattiv, il-Kummissjoni se tivvaluta, kif meħtieġ, jekk iċ-ċirkostanzi eċċezzjonali li jeħtieġu azzjoni immedjata jippersistux u jaġixxu kif xieraq. |
(10) |
Biex jiġu ttrattati malajr iċ-ċirkostanzi eċċezzjonali li jagħmlu dan ir-Regolament meħtieġ, ġiet stabbilita Pjattaforma Konġunta ta’ Koordinazzjoni biex tikkoordina l-isforzi tal-Kummissjoni, tal-Bulgarija, tal-Ungerija, tal-Polonja, tar-Rumanija u tas-Slovakkja, kif ukoll tal-Ukrajna u tal-Moldova biex jittejjeb il-fluss tal-kummerċ bejn l-Unjoni u l-Ukrajna inkluż it-tranżitu tul il-kuriduri tal-prodotti agrikoli. Il-Pjattaforma Konġunta ta’ Koordinazzjoni se tipprovdi soluzzjonijiet operazzjonali biex jittejbu l-proċeduri, l-infrastruttura u l-konġestjonijiet loġistiċi bejn l-Ukrajna u l-Unjoni billi jiġu aċċellerati u mtejba l-proċeduri ta’ kontroll fil-fruntieri, jiġi kkoordinat aħjar it-tranżitu, tittejjeb l-infrastruttura u jitnaqqsu l-ispejjeż ġenerali tal-loġistika, u b’hekk jiġi żgurat li l-qamħ, il-qamħirrum, iż-żerriegħa tal-kolza (kolza) u ż-żerriegħa tal-ġirasol li joriġinaw fl-Ukrajna jkunu jistgħu jidħlu aktar fl-Unjoni u lil hinn minnha skont il-bżonn. Huwa raġonevoli li wieħed jistenna li l-ħidma mwettqa fil-kuntest tal-Pjattaforma Konġunta ta’ Koordinazzjoni tissarraf f’titjib matul ix-xhur li ġejjin. Hekk kif jitfaċċaw soluzzjonijiet bi sħab biex jiġu tttrattati ċ-ċirkostanzi eċċezzjonali msemmija fil-premessa 6, se jkun possibbli li l-miżuri preventivi skont dan ir-Regolament jitħallew jiskadu sa Settembru 2023. |
(11) |
Il-Kummissjoni, f’konformità mal-Artikolu 4(6) tar-Regolament (UE) 2023/1077, infurmat lill-Kumitat tas-Salvagwardji msemmi fl-Artikolu 3(1) tar-Regolament (UE) 2015/478. |
(12) |
Biex tiġi evitata mġiba spekulattiva mill-operaturi tas-suq, dan ir-Regolament jenħtieġ li jidħol fis-seħħ fil-jum tal-pubblikazzjoni tiegħu. Billi huwa mistenni li l-Pjattaforma Konġunta ta’ Koordinazzjoni se ttejjeb is-sitwazzjoni fil-post fix-xhur li ġejjin, jenħtieġ li dan ir-Regolament japplika biss sal-15 ta’ Settembru 2023, |
ADOTTAT DAN IR-REGOLAMENT:
Artikolu 1
Ir-rilaxx għaċ-ċirkolazzjoni libera jew it-tqegħid fil-ħażna taħt il-proċeduri ta’ ħażna doganali, żona ħielsa jew tal-ipproċessar attiv tal-prodotti elenkati fl-Anness ta’ dan ir-Regolament li joriġinaw fl-Ukrajna, għandhom ikunu permessi biss fi Stati Membri għajr il-Bulgarija, l-Ungerija, il-Polonja, ir-Rumanija jew is-Slovakkja.
Artikolu 2
Dan ir-Regolament għandu jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea u għandu japplika sal-15 ta’ Settembru 2023.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, il-5 ta’ Ġunju 2023.
Għall-Kummissjoni
Il-President
Ursula VON DER LEYEN
(1) Ir-Regolament (UE) 2023/1077 tal-Parlament Ewropew u tal-Kunsill tal-31 ta’ Mejju 2023 dwar il-miżuri ta’ liberalizzazzjoni tal-kummerċ temporanji li jissupplimenta l-konċessjonijiet kummerċjali applikabbli għall-prodotti Ukreni Ukreni skont il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra, (ĠU L 144, 5.6.2023, p. 1).
(2) ĠU L 161, 29.5.2014, p. 3.
(3) ĠU L 114I, 2.05.2023, p.1.
(4) ĠU L 161, 29.5.2014, p. 3.
(5) Ir-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni (riformulazzjoni) (ĠU UE L 269, 10.10.2013, p. 1).
ANNESS
Deskrizzjoni tal-Prodott |
Kodiċi tal-Prodott |
Qamħ |
|
Qamħ komuni (ħlief għaż-żerriegħa għaż-żrigħ) |
ex 1001 99 00 |
Qamħirrum |
|
Qamħirrum (qamħ) (ħlief għal żrieragħ għaż-żrigħ) |
1005 90 00 |
Żerriegħa tal-lift |
|
Żerriegħa tal-lift jew tal-lift, imkissra jew le (ħlief għaż-żerriegħa għaż-żrigħ) |
1205 10 90 ; ex 1205 90 00 |
Żerriegħa tal-ġirasol |
|
Żerriegħa tal-ġirasol, imkissra jew le (ħlief għaż-żerriegħa għaż-żrigħ) |
1206 00 91 ; 1206 00 99 |