Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32023R0661

    Regolament Delegat tal-Kummissjoni (UE) 2023/661 tat-2 ta’ Diċembru 2022 li jemenda r-Regolament (KE) Nru 2111/2005 tal-Parlament Ewropew u tal-Kunsill dwar il-kriterji komuni biex jitqiesu l-implimentazzjoni jew it-tneħħija ta’ projbizzjoni ta’ operar fil-livell tal-Unjoni

    C/2022/8706

    ĠU L 83, 22.3.2023, p. 54–57 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_del/2023/661/oj

    22.3.2023   

    MT

    Il-Ġurnal Uffiċjali tal-Unjoni Ewropea

    L 83/54

    REGOLAMENT DELEGAT TAL-KUMMISSJONI (UE) 2023/661

    tat-2 ta’ Diċembru 2022

    li jemenda r-Regolament (KE) Nru 2111/2005 tal-Parlament Ewropew u tal-Kunsill dwar il-kriterji komuni biex jitqiesu l-implimentazzjoni jew it-tneħħija ta’ projbizzjoni ta’ operar fil-livell tal-Unjoni

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (KE) Nru 2111/2005 tal-Parlament Ewropew u tal-Kunsill tal-14 ta’ Diċembru 2005 dwar l-istabbiliment ta’ lista Komunitarja ta’ trasportaturi tal-ajru li huma soġġetti għal projbizzjoni ta’ operar fil-Komunità u li jinforma lill-passiġġieri tat-trasport bl-ajru dwar l-identità tat-trasportatur tal-ajru li jopera, u li tħassar l-Artikolu 9 tad-Direttiva 2004/36/KE (1), u b’mod partikolari l-Artikolu 3(2) tiegħu,

    Billi:

    (1)

    Ir-Regolament (KE) Nru 2111/2005 jipprevedi l-istabbiliment ta’ lista tal-Unjoni tat-trasportaturi tal-ajru li huma soġġetti għal projbizzjoni ta’ operar fit-territorji li għalihom japplikaw it-Trattati.

    (2)

    L-istabbiliment tal-lista tal-Unjoni tat-trasportaturi tal-ajru huwa bbażat fuq kriterji komuni għall-impożizzjoni ta’ projbizzjoni ta’ operar ta’ trasportatur tal-ajru mfassla fil-livell tal-Unjoni. Dawn il-kriterji komuni huma stabbiliti fl-Anness tar-Regolament (KE) Nru 2111/2005.

    (3)

    Valutazzjoni tar-Regolament (KE) Nru 2111/2005 imwettqa mill-Kummissjoni identifikat diversi oqsma fejn l-implimentazzjoni ta’ dak ir-Regolament tista’ tittejjeb sabiex jitqiesu l-iżviluppi xjentifiċi u tekniċi. F’dawn l-aħħar snin, il-ġestjoni tas-sikurezza tal-ajru ġiet appoġġata minn avvanzi tekniċi ġodda li ppermettew il-kejl ta’ evidenza verifikabbli fir-rigward tal-valutazzjoni tal-kapaċitajiet tal-operaturi ta’ pajjiżi terzi u l-informazzjoni li tirriżulta minn spezzjonijiet fir-rampa biex jintlaħqu l-istandards rilevanti tas-sikurezza. Barra minn hekk, il-ġbir ta’ għarfien xjentifiku, permezz tal-attivitajiet tar-riċerka tal-Aġenzija tas-Sikurezza tal-Avjazzjoni tal-Unjoni Ewropea, isaħħaħ il-kapaċità tagħha li tevalwa sistema ta’ ġestjoni tas-sikurezza ta’ operatur. Għalhekk, jeħtieġ li l-Anness tar-Regolament (KE) Nru 2111/2005 jiġi emendat biex jitqiesu dawk l-iżviluppi.

    (4)

    Il-kriterji komuni stabbiliti fl-Anness tar-Regolament (KE) Nru 2111/2005 jelenkaw l-elementi li għandhom jitqiesu meta tiġi kkunsidrata l-impożizzjoni ta’ projbizzjoni (jew ta’ restrizzjonijiet fuq l-operar). F’konformità mal-Artikolu 4(1)(b) tar-Regolament (KE) Nru 2111/2005, il-lista tal-Unjoni għandha tiġi aġġornata sabiex jitneħħa trasportatur tal-ajru minnha meta n-nuqqasijiet fis-sikurezza jkunu ġew rimedjati u ma jkun hemm l-ebda raġuni oħra, abbażi tal-kriterji komuni, biex it-trasportatur tal-ajru jinżamm fuq dik il-lista. Għal raġunijiet ta’ trasparenza, jeħtieġ li jiġu elenkati l-elementi meħtieġa għall-valutazzjoni jekk il-kriterji komuni, li n-nuqqas ta’ rispett tagħhom wassal għall-identifikazzjoni tan-nuqqasijiet imsemmija qabel, ma jibqgħux issodisfati iktar.

    (5)

    Jista’ jinkiseb għadd ta’ titjib billi jiġi emendat l-Anness tar-Regolament (KE) Nru 2111/2005 dwar il-kriterji komuni użati biex tiġi kkunsidrata l-impożizzjoni [jew it-tneħħija] ta’ projbizzjoni ta’ operar fil-livell tal-Unjoni,

    ADOTTAT DAN IR-REGOLAMENT:

    Artikolu 1

    L-Anness tar-Regolament (KE) Nru 2111/2005 huwa sostitwit bl-Anness ta’ dan ir-Regolament.

    Artikolu 2

    Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, it-2 ta’ Diċembru 2022.

    Għall-Kummissjoni

    Il-President

    Ursula VON DER LEYEN

    (1)  ĠU L 344, 27.12.2005, p. 15.

    ANNESS

    “ANNESS

    Kriterji komuni li għandhom jiġu kkunsidrati għall-impożizzjoni ta’ projbizzjoni ta’ operar fil-livell tal-Unjoni

    Id-deċiżjonijiet għal azzjoni fil-livell tal-Unjoni għandhom jittieħdu skont il-merti ta’ kull każ individwali. Skont il-merti ta’ kull każ, trasportatur jew it-trasportaturi kollha ċċertifikati fl-istess stat jista’/jistgħu jkun(u) eliġibbli għal azzjoni fil-livell tal-Unjoni.

    A.   

    Fil-kunsiderazzjoni ta’ jekk jenħtieġx li trasportatur jew it-trasportaturi kollha tal-ajru jiġi/u totalment jew parzjalment projbit(i), għandu jiġi evalwat jekk it-trasportatur tal-ajru hux qed jissodisfa l-istandards rilevanti tas-sikurezza billi jitqiesu dawn li ġejjin:

    1.

    Evidenza vverifikata dwar nuqqasijiet serji fis-sikurezza min-naħa ta’ trasportatur tal-ajru:

    (a)

    rapporti li juru nuqqasijiet serji fis-sikurezza, jew nuqqas persistenti min-naħa tat-trasportatur biex jindirizza n-nuqqasijiet identifikati bi spezzjonijiet fir-rampa mwettqa fil-qafas tal-programm tal-UE tal-Ispezzjoni fir-Rampa (1) li ġew ikkomunikati qabel lit-trasportatur;

    (b)

    nuqqasijiet identifikati fil-qafas tad-dispożizzjonijiet għall-ġbir tal-informazzjoni fis-Subparti RAMP tal-Anness II tar-Regolament tal-Kummissjoni (UE) Nru 965/2012 (2);

    (c)

    projbizzjoni ta’ operar imposta fuq trasportatur minn pajjiż terz minħabba nuqqasijiet sostanzjati relatati ma’ standards rilevanti tas-sikurezza;

    (d)

    informazzjoni sostanzjata relatata ma’ aċċidenti jew inċidenti serji li tindika nuqqasijiet sistemiċi latenti fis-sikurezza;

    (e)

    informazzjoni miġbura permezz tal-proċess ta’ Awtorizzazzjoni tal-Operaturi ta’ Pajjiżi Terzi, dwar jekk twettaqx monitoraġġ inizjali jew kontinwu mill-Aġenzija tas-Sikurezza tal-Avjazzjoni tal-Unjoni Ewropea (“l-Aġenzija”), u b’mod partikolari fir-rigward tal-azzjonijiet meħuda mill-Aġenzija rigward ir-rifjut ta’ applikazzjoni skont il-punt ART.200(e)(1) tal-Anness II tar-Regolament tal-Kummissjoni (UE) Nru 452/2014 (3) jew is-sospensjoni jew ir-revoka ta’ awtorizzazzjoni skont il-punt ART.235, għal raġunijiet ta’ sikurezza.

    2.

    Nuqqas ta’ kapaċità u/jew rieda ta’ trasportatur tal-ajru li jindirizza nuqqasijiet fis-sikurezza kif murija permezz ta’:

    (a)

    nuqqas ta’ trasparenza jew komunikazzjoni adegwata u fil-ħin min-naħa ta’ trasportatur bħala rispons għal inkjesta mill-awtorità tal-avjazzjoni ċivili ta’ Stat Membru jew mill-Kummissjoni jew mill-Aġenzija rigward l-aspett tas-sikurezza tal-operazzjonijiet tiegħu;

    (b)

    pjan ta’ azzjoni korrettiva mhux xieraq jew insuffiċjenti mħejji bħala rispons għal xi nuqqas serju identifikat fis-sikurezza.

    3.

    Nuqqas ta’ kapaċità u/jew rieda tal-awtoritajiet b’responsabbiltà għas-sorveljanza regolatorja ta’ trasportatur tal-ajru biex jindirizzaw nuqqasijiet fis-sikurezza kif murija permezz ta’:

    (a)

    nuqqas ta’ kooperazzjoni mal-awtorità tal-avjazzjoni ċivili ta’ Stat Membru, mal-Kummissjoni jew mal-Aġenzija mill-awtoritajiet kompetenti ta’ Stat ieħor, meta jkun tqajjem tħassib dwar is-sikurezza tal-operar ta’ trasportatur liċenzjat jew iċċertifikat f’dak l-Istat;

    (b)

    kapaċità insuffiċjenti tal-awtoritajiet kompetenti li jwettqu sorveljanza regolatorja tat-trasportatur biex jiġu implimentati u infurzati l-istandards rilevanti tas-sikurezza. Jenħtieġ li jitqiesu b’mod partikolari dawn li ġejjin:

    (i)

    l-awditjar u l-pjanijiet ta’ azzjoni korrettiva relatati stabbiliti fil-qafas tal-Programm Universali ta’ Awditjar tas-Sorveljanza tas-Sikurezza tal-Organizzazzjoni tal-Avjazzjoni Ċivili Internazzjonali jew fil-qafas ta’ kwalunkwe dritt applikabbli tal-Unjoni;

    (ii)

    jekk l-awtorizzazzjoni ta’ operar jew il-permess tekniku ta’ kwalunkwe trasportatur taħt is-sorveljanza ta’ dak l-Istat kinux ġew rifjutati jew revokati qabel minn xi Stat ieħor;

    (iii)

    iċ-ċertifikat tal-operatur tal-ajru ma nħariġx mill-awtorità kompetenti tal-Istat fejn it-trasportatur għandu l-post prinċipali tan-negozju tiegħu;

    (c)

    kapaċità insuffiċjenti tal-awtoritajiet kompetenti tal-Istat li fih l-inġenju tal-ajru użat mit-trasportatur tal-ajru jkun irreġistrat biex jissorveljaw l-inġenju tal-ajru użat mit-trasportatur f’konformità mal-obbligi fil-qafas tal-Konvenzjoni ta’ Chicago.

    B.   

    F’konformità mal-Artikolu 4(1)(b) ta’ dan ir-Regolament, meta jitqies jekk il-lista tal-Unjoni għandhiex tiġi aġġornata biex trasportatur tal-ajru jitneħħa mil-lista minħabba li n-nuqqasijiet fis-sikurezza jkunu ġew rimedjati u ma jkun hemm l-ebda raġuni oħra, abbażi tal-kriterji komuni elenkati fit-taqsima A, biex it-trasportatur tal-ajru jinżamm fil-lista tal-Unjoni, l-elementi li ġejjin jistgħu jitqiesu li jipprovdu evidenza ta’ dan:

    1.

    evidenza verifikabbli li n-nuqqasijiet identifikati jkunu ġew rettifikati b’mod sostenibbli, li tindika li t-trasportatur tal-ajru jikkonforma għalkollox mal-istandards rilevanti tas-sikurezza u jkun qed jimplimentahom;

    2.

    ċertifikazzjoni mill-ġdid tat-trasportaturi tal-ajru mwettqa mill-awtoritajiet responsabbli għas-sorveljanza regolatorja tat-trasportaturi tal-ajru f’konformità mal-proċess tal-ICAO, b’evidenza li l-attivitajiet kollha jkunu ġew dokumentati kif xieraq;

    3.

    evidenza verifikabbli tal-konformità mal-istandards rilevanti tas-sikurezza u tal-implimentazzjoni effettiva tagħhom mill-awtoritajiet responsabbli għas-sorveljanza regolatorja tat-trasportatur tal-ajru;

    4.

    kapaċità verifikabbli tal-awtoritajiet responsabbli għas-sorveljanza regolatorja tat-trasportatur tal-ajru biex jinfurzaw sistema regolatorja soda;

    5.

    evidenza verifikabbli li s-sorveljanza effettiva tkun qed titwettaq mill-awtoritajiet responsabbli għas-sorveljanza regolatorja tat-trasportatur tal-ajru, li tippermetti l-infurzar u r-rispett adegwat tal-istandards rilevanti tas-sikurezza;

    6.

    informazzjoni miġbura permezz tal-proċess TCO, dwar jekk twettaqx monitoraġġ inizjali jew kontinwu mill-Aġenzija;

    7.

    informazzjoni miġbura permezz tal-ispezzjonijiet fir-rampa.
    ”

    (1)  Programm Ewropew rigward il-prestazzjoni ta’ spezzjonijiet fir-rampa fuq inġenji tal-ajru użati minn operaturi ta’ pajjiżi terzi (SAFA) jew użati minn operaturi taħt is-sorveljanza regolatorja ta’ Stat Membru ieħor tal-UE (SACA).

    (2)  Ir-Regolament tal-Kummissjoni (UE) Nru 965/2012 tal-5 ta’ Ottubru 2012 li jistabbilixxi rekwiżiti tekniċi u proċeduri amministrattivi relatati mal-operazzjonijiet bl-ajru skont ir-Regolament (KE) Nru 216/2008 tal-Parlament Ewropew u tal-Kunsill (ĠU L 296, 25.10.2012, p. 1).

    (3)  Ir-Regolament tal-Kummissjoni (UE) Nru 452/2014 tad-29 ta’ April 2014 li jistabbilixxi rekwiżiti tekniċi u proċeduri amministrattivi relatati mal-operazzjonijiet tal-ajru ta’ pajjiżi terzi skont ir-Regolament (KE) Nru 216/2008 tal-Parlament Ewropew u tal-Kunsill (ĠU L 133, 6.5.2014, p. 12).

    Top