(1)

Wara l-adozzjoni tar-Regolament (UE) 2021/241 tal-Parlament Ewropew u tal-Kunsill (4), li stabbilixxa l-Faċilità għall-Irkupru u r-Reżiljenza (il-’Faċilità’), ġrajjiet ġeopolitiċi mingħajr preċedent ikkawżati mill-gwerra ta’ aggressjoni kontra l-Ukrajna mir-Russja, u ż-żieda fil-gravità tal-konsegwenzi tal-kriżi tal-COVID-19 ikkawżata direttament u indirettament minnhom, affettwaw konsiderevolment lis-soċjetà u l-ekonomija tal-Unjoni, liċ-ċittadini tagħha u l-koeżjoni ekonomika, soċjali u territorjali tagħha. B’mod partikolari, huwa aktar ċar minn qatt qabel li s-sigurtà tal-enerġija u l-indipendenza enerġetika tal-Unjoni huma indispensabbli għal irkupru mill-kriżi tal-COVID-19 li jkun ta’ suċċess, sostenibbli u inklużiv, peress li huma wkoll fatturi ewlenin li jikkontribwixxi għar-reżiljenza tal-ekonomija tal-Unjoni.

(2)

Minħabba r-rabtiet diretti bejn irkupru sostenibbli, il-bini tar-reżiljenza tal-Unjoni u s-sigurtà tal-enerġija tal-Unjoni, it-tnaqqis tad-dipendenza mill-fjuwils fossili, b’mod partikolari mir-Russja, u r-rwol tal-Unjoni fi tranżizzjoni ġusta u inklużiva, il-Faċilità hija strument adattat sew biex jikkontribwixxi għar-rispons tal-Unjoni għal dawk l-isfidi emerġenti. Dan huwa wkoll il-każ fid-dawl tal-leġiżlazzjoni klimatika u ambjentali tal-Unjoni u tal-impenji internazzjonali tal-Unjoni, u b’mod partikolari tal-Ftehim ta’ Pariġi adottat skont il-Konvenzjoni Qafas tan-Nazzjonijiet Uniti dwar it-Tibdil fil-Klima (5).

(3)

Fid-Dikjarazzjoni ta’ Versailles tal-10 u l-11 ta’ Marzu 2022, il-Kapijiet ta’ Stat u ta’ Gvern stiednu lill-Kummissjoni biex sal-aħħar ta’ Mejju tal-istess sena tipproponi pjan REPowerEU biex gradwalment titneħħa d-dipendenza tal-Unjoni fuq l-importazzjoni ta’ fjuwils fossili Russi, liema stedina ġiet imtennija fil-Konklużjonijiet tal-Kunsill Ewropew tal-24 u l-25 ta’ Marzu 2022. Dak l-għan jenħtieġ li jinkiseb ferm qabel l-2030 b’mod li jkun konsistenti mal-Patt Ekoloġiku Ewropew, stabbilit fil-komunikazzjoni tal-Kummissjoni tal-11 ta’ Diċembru 2019, u mal-objettivi klimatiċi għall-2030 u l-2050 minquxa fir-Regolament (UE) 2021/1119 tal-Parlament Ewropew u tal-Kunsill (6).

(4)

Il-kapaċità tal-Faċilità li tappoġġa riformi u investimenti ddedikati għad-diversifikazzjoni tal-provvisti tal-enerġija, b’mod partikolari l-fjuwils fossili, kif ukoll li żżid ir-reżiljenza, is-sigurtà u s-sostenibbiltà tas-sistema tal-enerġija tal-Unjoni, u b’hekk tikkontribwixxi għall-affordabbiltà tal-enerġija u ssaħħaħ l-awtonomija strateġika tal-Unjoni b’mod parallel ma’ ekonomija miftuħa, jenħtieġ li tiżdied. Biex tilħaq dawk l-objettivi, l-Unjoni jenħtieġ li żżid l-effiċjenza enerġetika u l-affidabbiltà u r-reżiljenza tan-networks tat-trażmissjoni u tad-distribuzzjoni, li tippromwovi l-flessibbiltà tas-sistema, li timminimizza l-konġestjonijiet, inkluż permezz ta’ żieda fil-kapaċità tal-grilja u tal-ħżin tal-elettriku, li tippromwovi d-diġitalizzazzjoni, u li tiżgura ktajjen tal-provvista reżiljenti, iċ-ċibersigurtà u l-protezzjoni u l-adattament għat-tibdil fil-klima tal-infrastruttura kollha, filwaqt li tnaqqas id-dipendenzi strateġiċi tal-enerġija.

(5)

Biex jiġu massimizzati l-komplementarjetà, il-konsistenza u l-koerenza tal-politiki u l-azzjonijiet meħuda mill-Unjoni u mill-Istati Membri biex titrawwem l-indipendenza, is-sigurtà u s-sostenibbiltà tal-provvista tal-enerġija tal-Unjoni, jenħtieġ li dawk ir-riformi u l-investimenti relatati mal-enerġija jiġu stabbiliti permezz ta’ “kapitolu REPowerEU” tal-pjanijiet għall-irkupru u r-reżiljenza ddedikat għal hekk.

(6)

It-tranżizzjoni effettiva lejn enerġija ekoloġika u t-tnaqqis rapidu fid-dipendenza fuq l-enerġija mill-fjuwils fossili b’mod inklużiv jeħtieġu miżuri biex tingħata spinta lill-effiċjenza enerġetika u l-iffrankar fil-bini u l-infrastruttura kritika relatata tal-enerġija u biex l-industriji jiġu dekarbonizzati aktar malajr. Huwa essenzjali li jiżdied malajr l-investiment f’miżuri ta’ effiċjenza enerġetika, bħall-użu ta’ soluzzjonijiet sostenibbli u effiċjenti għat-tisħin u t-tkessiħ, li jippreżentaw mezz effettiv biex jiġu indirizzati wħud mill-aktar sfidi urġenti tal-provvista tal-enerġija u l-kost tal-enerġija. Għalhekk, jenħtieġ li jingħata appoġġ ukoll lir-riformi u l-investimenti li jżidu l-effiċjenza enerġetika, li jwasslu għad-dekarbonizzazzjoni tal-industrija - inkluż bl-użu ta’ fjuwils b’livell baxx ta’ emissjonijiet ta’ karbonju, bħall-idroġenu b’livell baxx ta’ emissjonijiet ta’ karbonju, u bl-użu tal-idroġenu rinnovabbli u fjuwils rinnovabbli oħra ta’ oriġini mhux bijoloġika - u li jżidu l-iffrankar tal-enerġija tal-ekonomiji tal-Istati Membri, f’konformità mal-miri u l-qafas legali tal-Unjoni dwar l-enerġija u l-klima. Jenħtieġ li l-Kummissjoni tħeġġeġ, b’mod partikolari, lill-Istati Membri biex fil-kapitoli REPowerEU tagħhom jinkludu miżuri li jappoġġaw id-dekarbonizzazzjoni tal-industrija.

(7)

Huwa mistenni li t-tneħħija gradwali tad-dipendenza fuq l-importazzjoni ta’ fjuwils fossili Russi twassal għal tnaqqis fid-dipendenza enerġetika ġenerali tal-Unjoni. Jenħtieġ li l-kapitoli REPowerEU jikkontribwixxu biex tiżdied u tissaħħaħ l-awtonomija strateġika tal-Unjoni mingħajr ma tiżdied b’mod eċċessiv id-dipendenza tagħha fuq l-importazzjoni ta’ materja prima minn pajjiżi terzi.

(8)

Fit-tħejjija tal-pjanijiet għall-irkupru u r-reżiljenza kif ukoll tal-kapitoli REPowerEU, jenħtieġ li l-Istati Membri jikkoordinaw il-politiki ekonomiċi tagħhom b’tali mod li jiksbu l-objettivi dwar il-koeżjoni ekonomika, soċjali u territorjali stipulati fl-Artikolu 174tat-Trattat, bl-għan li jitnaqqsu d-diverġenzi bejn il-livelli ta’ żvilupp tar-reġjuni varji u r-ritard ta’ dawk ir-reġjuni li huma anqas favoriti, b’attenzjoni partikolari għaż-żoni u l-gżejjer remoti, periferiċi u iżolati, li diġà jġarrbu restrizzjonijiet addizzjonali.

(9)

Biex jiġi mmassimizzat il-kamp ta’ applikazzjoni tar-rispons tal-Unjoni, jenħtieġ li l-Istati Membri kollha li jippreżentaw pjan għall-irkupru u r-reżiljenza wara d-dħul fis-seħħ ta’ dan ir-Regolament, li jitlob l-użu ta’ finanzjament addizzjonali fil-forma ta’ self, jew, f’konformità mar-regoli l-ġodda li għandhom jiġu stabbiliti skont dan ir-Regolament emendatorju, mill-irkantar tal-kwoti mill-iskema għall-iskambju ta’ kwoti tal-emissjonijiet skont id-Direttiva 2003/87/KE tal-Parlament Ewropew u tal-Kunsill (7) jew minn trasferimenti mir-Riżerva ta’ Aġġustament għall-Brexit stabbilita bir-Regolament (UE) 2021/1755 tal-Parlament Ewropew u tal-Kunsill (8), ikunu meħtieġa jinkludu kapitolu REPowerEU fil-pjan għall-irkupru u r-reżiljenza tagħhom. F’konformità mal-possibbiltà eżistenti, skont ir-Regolament (UE) 2021/241, li jiġi ppreżentat abbozz ta’ pjan għall-irkupru u r-reżiljenza, u sabiex tiġi żgurata tħejjija xierqa tal-kapitoli REPowerEU, l-Istati Membri jistgħu jippreżentaw abbozz ta’ kapitolu REPowerEU qabel il-preżentazzjoni ta’ pjan modifikat għall-irkupru u r-reżiljenza. Jenħtieġ li jiġi evitat piż amministrattiv mhux meħtieġ.

(10)

Jenħtieġ li l-kapitoli REPowerEU jinkludu riformi u investimenti ġodda, li jibdew mill-1 ta’ Frar 2022, li jikkontribwixxu għall-għanijiet tar-REPowerEU u jindirizzaw l-kriżi kkawżata minn ġrajjiet ġeopolitiċi reċenti,. Madankollu, il-miżuri inklużi diġà fid-deċiżjoni ta’ implimentazzjoni tal-Kunsill adottata li jikkontribwixxu għall-objettivi tar-REPowerEU jistgħu jiġu inklużi fil-kapitolu REPowerEU jekk, wara l-aġġornament tal-kontribuzzjoni finanzjarja massima, l-Istat Membru kkonċernat ikun soġġett għal tnaqqis tal-kontribuzzjoni finanzjarja massima tiegħu. F’dak il-każ, l-Istat Membru jenħtieġ li jkun jista’ jinkludi tali miżuri fil-kapitolu REPowerEU tiegħu sa ammont ta’ kostijiet stmati ugwali għat-tnaqqis fil-kontribuzzjoni finanzjarja massima.

(11)

Jenħtieġ li Stat Membru jkun jista’ jinkludi fil-kapitolu REPowerEU tiegħu l-parti msaħħa tal-miżuri inklużi fid-deċiżjoni ta’ implimentazzjoni tal-Kunsill diġà adottata, flimkien mal-istadji importanti u l-miri korrispondenti. Jenħtieġ li dan it-tisħiħ jintroduċi titjib sostantiv fil-livell ta’ ambizzjoni tal-miżuri, kif rifless fit-tfassil jew fil-livell tal-istadji importanti u l-miri korrispondenti, filwaqt li jibni fuq il-miżuri inklużi fid-deċiżjoni ta’ implimentazzjoni tal-Kunsill diġà adottata.

(12)

Jenħtieġ li Stat Membru jippreżenta l-kapitolu REPowerEU tiegħu fil-forma ta’ addendum mal-pjan tiegħu għall-irkupru u r-reżiljenza. Jenħtieġ li l-kapitolu REPowerEU jkun fih spjegazzjoni dwar kif il-miżuri inklużi fih huma koerenti mal-isforzi tal-Istat Membru kkonċernat biex jintlaħqu l-objettivi tar-REPowerEU, filwaqt li jitqiesu l-miżuri inklużi fid-deċiżjoni ta’ implimentazzjoni tal-Kunsill diġà adottata, kif ukoll spjegazzjoni dwar il-kontribut ġenerali ta’ dawk il-miżuri u miżuri komplementari jew ta’ akkumpanjament oħra ffinanzjati fuq livell nazzjonali u ffinanzjati mill-Unjoni għall-objettivi tar-REPowerEU.

(13)

Jenħtieġ li l-kapitoli REPowerEU jikkontribwixxu, fost affarijiet oħra, biex jiżdied is-sehem tal-enerġiji sostenibbli u rinnovabbli fit-taħlita tal-enerġija u biex jiġu indirizzati l-konġestjonijiet fl-infrastruttura tal-enerġija. Fir-rigward tal-infrastruttura tal-gass naturali, jenħtieġ li r-riformi u l-investimenti fil-kapitoli REPowerEU maħsuba biex jiddiversifikaw il-provvista lil hinn mir-Russja jibnu fuq il-bżonnijiet identifikati attwalment permezz tal-valutazzjoni mwettqa u maqbula min-Network Ewropew tal-Operaturi tas-Sistemi ta’ Trażmissjoni tal-Gass, stabbiliti fi spirtu ta’ solidarjetà fir-rigward tas-sigurtà tal-provvista, u jqisu l-ħtiġijiet strateġiċi għas-sigurtà tal-enerġija tal-Istat Membru kkonċernat u l-miżuri ta’ tħejjija msaħħa, inkluż il-ħżin tal-enerġija, meħuda biex ikun hemm adattament għal theddidiet ġeopolitiċi ġodda, mingħajr ma jiddgħajjef il-kontribut fit-tul għat-tranżizzjoni ekoloġika.

(14)

Jenħtieġ li jiżdied kriterju ta’ valutazzjoni xierqa biex iservi bħala bażi biex il-Kummissjoni tivvaluta r-riformi u l-investimenti fil-kapitoli REPowerEU u biex tiżgura li dawk ir-riformi u l-investimenti jkunu adatti biex jintlaħqu l-objettivi speċifiċi REPowerEU. Jenħtieġ li tkun ingħatat klassifikazzjoni A skont dak il-kriterju ta’ valutazzjoni l-ġdid biex il-pjan għall-irkupru u r-reżiljenza rilevanti jiġi vvalutat b’mod pożittiv mill-Kummissjoni.

(15)

L-investimenti fl-infrastruttura u t-teknoloġiji waħedhom mhumiex biżżejjed biex jiżguraw tnaqqis tad-dipendenza tal-fjuwils fossili meta jitqiesu l-iskarsezzi eżistenti ta’ ħaddiema u ħiliet. F’dak il-kuntest, diġa’ huwa possibbli li jiġu ddedikati riżorsi għat-taħriġ mill-ġdid u t-titjib tal-ħiliet tan-nies, biex il-forza tax-xogħol tiġi mgħammra b’aktar ħiliet ekoloġiċi kif ukoll għar-riċerka u l-iżvilupp ta’ soluzzjonijiet innovattivi marbuta mat-tranżizzjoni ekoloġika. L-Istati Membri huma mħeġġa jinvestu aktar fit-taħriġ mill-ġdid u fit-titjib tal-ħiliet, speċjalment għall-ħiliet u t-teknoloġiji ekoloġiċi u diġitali relatati, biex jiżguraw li ħadd ma jitħalla jibqa’ lura matul it-tranżizzjoni ekoloġika. Meta fil-kapitolu REPowerEU tiegħu Stat Membru jinkludi miżuri relatati mat-taħriġ mill-ġdid u t-titjib tal-ħiliet tan-nies, il- Kummissjoni jenħtieġ li tqis jekk miżuri bħal dawn jagħtux kontribut sinifikanti għall-kwalifika mill-ġdid tal-forza tax-xogħol lejn ħiliet ekoloġiċi u diġitali relatati.

(16)

Fid-dawl tal-impatt ekonomiku u soċjali tal-kriżi tal-enerġija attwali, fejn il-prezzijiet persistentement għoljin u instabbli tal-enerġija qed jaggravaw l-impatt tal-kriżi tal-COVID-19 billi jkomplu jżidu l-piż finanzjarju għall-konsumaturi, b’mod partikolari għal dawk l-aktar vulnerabbli, inkluż l-unitajiet domestiċi b’introjtu baxx, u għall-kumpanniji vulnerabbli inkluż impriżi mikro, żgħar u ta’ daqs medju, u bħala għarfien tal-prinċipji tal-Pilastru Ewropew tad-Drittijiet Soċjali, jenħtieġ li jkun possibbli li jiġi inkluż, fil-kapitoli REPowerEU, miżuri li jgħinu biex jiġu indirizzati b’mod strutturali sitwazzjonijiet ta’ faqar enerġetiku, permezz ta’ riformi u investimenti dejjiema. Jenħtieġ li riformi u investimenti li huma mmirati biex jindirizzaw il-faqar enerġetiku jipprovdu livell ogħla ta’ appoġġ finanzjarju għal skemi ta’ effiċjenza enerġetika, inkluż permezz ta’ strumenti finanzjarji ddedikati, politiki ta’ enerġija nadifa u skemi biex titnaqqas id-domanda għall-enerġija għal dawk l-unitajiet domestiċi u l-kumpanniji inkluż impriżi mikro, żgħar u ta’ daqs medju li jiffaċċjaw diffikultajiet serji minħabba kontijiet għoljin tal-enerġija.

(17)

Jenħtieġ li l-miżuri għat-tnaqqis tad-domanda għall-enerġija meħuda mill-Istati Membri jinċentivaw l-investimenti fl-iffrankar tal-enerġija.

(18)

Jenħtieġ li l-applikazzjoni ta’ dan ir-reġim il-ġdid dwar il-kapitoli tar-REPowerEU tkun mingħajr preġudizzju għar-rekwiżiti legali l-oħrajn kollha skont ir-Regolament (UE) 2021/241, sakemm mhux ipprovdut mod ieħor.

(19)

Jenħtieġ li l-pjan għall-irkupru u r-reżiljenza, inkluż il-kapitolu REPowerEU, jikkontribwixxi biex jiġu indirizzati b’mod effettiv l-isfidi kollha identifikati fir-rakkomandazzjonijiet rilevanti speċifiċi għall-pajjiżi, jew subsett sinifikanti minnhom, inkluż ir-rakkomandazzjonijiet speċifiċi għall-pajjiżi adottati fil-qafas taċ-ċiklu tas-Semestru Ewropew 2022 li jirreferu, fost oħrajn, għall-isfidi tal-enerġija li qed jiffaċċjaw l-Istati Membri.

(20)

Tranżizzjoni effettiva lejn enerġija ekoloġika u tnaqqis fid-dipendenza enerġetika jinvolvu investimenti diġitali sinifikanti. Fid-dawl tar-Regolament (UE) 2021/241, jenħtieġ li l-Istati Membri jipprovdu spjegazzjoni dwar kif il-miżuri fil-pjan għall-irkupru u r-reżiljenza, inkluż dawk fil-kapitolu REPowerEU, mistennija jikkontribwixxu għat-tranżizzjoni diġitali u jindirizzaw l-isfidi li jirriżultaw minnha u jekk jikkostitwixxux ammont li jikkontribwixxi għall-mira diġitali fuq il-bażi tal-metodoloġija għall-ittaggjar diġitali. Madankollu, minħabba l-urġenza bla preċedent u l-importanza tal-isfidi tal-enerġija li qed tiffaċċja l-Unjoni, jenħtieġ li r-riformi u l-investimenti fil-kapitolu REPowerEU ma jitqisux waqt il-kalkolu tal-allokazzjoni totali tal-pjan għall-fini tal-applikazzjoni tar-rekwiżit tal-mira diġitali stabbilit mir-Regolament (UE) 2021/241. Madankollu, jenħtieġ li l-Istati Membri jagħmlu ħilithom biex jinkludu fil-kapitoli REPowerEU, kemm jista’ jkun possibbli, miżuri li jikkontribwixxu għall-mira diġitali abbażi tal-metodoloġija għall-ittaggjar diġitali.

(21)

Proċeduri amministrattivi twal huma wħud mill-ostakli ewlenin għall-varar ta’ ta’ enerġija rinnovabbli. Dawk l-ostakli jinkludu l-kumplessità tar-regoli applikabbli għall-għażla tas-siti u l-awtorizzazzjonijiet amministrattivi għall-proġetti, il-kumplessità u d-durata tal-valutazzjoni tal-impatt ambjentali tal-proġetti, kwistjonijiet ta’ konnessjoni mal-grilja, u nuqqasijiet ta’ persunal tal-awtoritajiet li jagħtu l-permessi jew tal-operaturi tal-grilja. Jenħtieġu aktar simplifikazzjoni u tħaffif tal-proċessi tal-għoti tal-permessi amministrattivi għall-enerġija rinnovabbli u l-infrastruttura tal-grilja tal-elettriku relatata biex jiġi żgurat li l-Unjoni tilħaq il-miri tagħha dwar l-enerġija u l-klima. Saru rakkomandazzjonijiet lill-Istati Membri fil-kuntest tas-Semestru Ewropew 2022 biex jitħaffef il-varar tal-enerġija rinnovabbli. Kif imħabbar fil-komunikazzjoni tal-Kummissjoni tat-18 ta’ Mejju 2022, bit-titolu “Il-Pjan REPowerEU”, il-Kummissjoni pproponiet li temenda d-Direttiva (UE) 2018/2001 tal-Parlament Ewropew u tal-Kunsill (9) dwar l-enerġija minn sorsi rinnovabbli, bl-għan li tistabbilixxi proċess aktar rapidu ta’ għoti ta’ permessi għas-sorsi ta’ enerġija rinnovabbli. Barra minn hekk, ir-Regolament tal-Kunsill (UE) 2022/2577 (10), li jistabbilixxi qafas biex jitħaffef il-varar tal-enerġija rinnovabbli, introduċa regoli ta’ emerġenza temporanji.

(22)

Skont l-Artikolu 18(4), il-punt (q), tar-Regolament (UE) 2021/241, jenħtieġ li l-Istati Membri jipprovdu sommarju tal-proċess ta’ konsultazzjoni, imwettaq f’konformità mal-oqfsa legali nazzjonali, tal-awtoritajiet lokali u reġjonali, is-sħab soċjali u partijiet interessati rilevanti oħra kkonċernati bl-implimentazzjoni tal-pjanjiet għall-irkupru u r-reżiljenza tagħhom. Jenħtieġ li dik il-konsultazzjoni tiġi kkomplementata biex jiġu indirizzati r-riformi u l-investimenti li ser ikunu inklużi fil-kapitolu potenzjali REPowerEU, b’mod li jagħti biżżejjed żmien lill-partijiet interessati biex jirreaġixxu filwaqt li tiżgura finalizzazzjoni rapida tal-kapitolu REPowerEU mill-Istat Membru kkonċernat. Jenħtieġ li s-sommarju aġġornat jistabbilixxi l-partijiet interessati kkonsultati, jispjega l-eżitu tal-konsultazzjoni komplementari u jiddeskrivi kif il-kontribut riċevut mill-partijiet interessati ġie rifless fil-kapitoli REPowerEU.

(23)

L-applikazzjoni tal-prinċipju “la tagħmilx ħsara sinifikanti” fis-sens tal-Artikolu 17 tar-Regolament (UE) 2020/852 tal-Parlament Ewropew u tal-Kunsill (11) (il-prinċipju “la tagħmilx ħsara sinifikanti”) hija essenzjali biex tiżgura li r-riformi u l-investimenti mwettqa bħala parti mill-irkupru mill-kriżi tal-COVID-19 jiġu implimentati b’mod sostenibbli. Jenħtieġ li din tkompli tapplika għar-riformi u l-investimenti appoġġati mill-Faċilità, b’eżenzjoni mmirata waħda biex jiġi indirizzat it-tħassib immedjat tal-Unjoni dwar is-sigurtà tal-enerġija. Meta jitqies l-objettiv li l-provvisti tal-enerġija jiġu ddiversifikati lil hinn mill-fornituri Russi, jenħtieġ li r-riformi u l-investimenti msemmija fil-kapitoli REPowerEU li huma neċessarji għat-titjib tal-infrastruttura u l-faċilitajiet tal-enerġija biex jiġu ssodisfati l-ħtiġijiet immedjati tas-sigurtà tal-provvista għall- gass ikunu eliġibbli għall-appoġġ finanzjarju fl-ambitu tal-Faċilità anki jekk ma jkunux konformi mal-prinċipju “la tagħmilx ħsara sinifikanti”. Bħala regola, l-infrastruttura u l-faċilitajiet taż-żejt huma esklużi mill-kapitolu REPowerEU. B’deroga, Stat Membru li kien soġġett għad-deroga temporanja eċċezzjonali fl-Artikolu 3m(4) tar-Regolament tal-Kunsill (UE) Nru 833/2014 (12) sad-dħul fis-seħħ ta’ dan ir-Regolament emendatorju, minħabba d-dipendenza speċifika fuq iż-żejt mhux maħdum u s-sitwazzjoni ġeografika tiegħu, jenħtieġ li jkun jista’ jinkludi fil-kapitolu REPowerEU l-infrastruttura u l-faċilitajiet taż-żejt meħtieġa biex jiġu ssodisfati l-ħtiġijiet immedjati tas-sigurtà tal-provvista.

Jenħtieġ li l-Kummissjoni tivvaluta jekk il-miżuri li mistennija jindirizzaw il-ħtiġijiet immedjati tas-sigurtà tal-provvista tal-enerġija humiex eliġibbli għad-deroga mill-prinċipju “la tagħmilx ħsara sinifikanti”. Għall-fini ta’ dik il-valutazzjoni, jenħtieġ li l-Kummissjoni tqis, fost kundizzjonijiet oħra, ir-riskju ta’ effetti ta’ intrappolament u n-nuqqas ta’ disponibbiltà ta’ alternattivi aktar nodfa, teknoloġikament u ekonomikament fattibbli li jistgħu jiġu varati fi skeda ta’ żmien komparabbli. Jenħtieġ li tali valutazzjoni tkun proporzjonata, filwaqt li titqies l-urġenza li jinkisbu l-objettivi tar-REPowerEU. F’każ ta’ dubju, jenħtieġ li l-Kummissjoni tkun tista’ titlob lill-Istati Membri biex jipprovdu l-informazzjoni rilevanti li tappoġġa l-valutazzjoni. L-evalwazzjoni ta’ alternattivi aktar nodfa jenħtieġ li titwettaq f’limiti raġonevoli.

(24)

Jenħtieġ li l-miżuri kollha fil-pjanijiet għall-irkupru u r-reżiljenza jittieħdu f’konformità mal-acquis ambjentali tal-Unjoni u nazzjonali applikabbli, b’mod partikolari fir-rigward tal-valutazzjoni tal-impatt ambjentali u l-protezzjoni tan-natura. Għall-miżuri li jibbenefikaw mid-deroga mill-prinċipju “la tagħmilx ħsara sinifikanti”, jenħtieġ li l-Istati Membri jwettqu sforzi sodisfaċenti biex jillimitaw il-ħsara potenzjali għall-objettivi ambjentali skont it-tifsira tal-Artikolu 17 tar-Regolament (UE) 2020/852, fejn ikun fattibbli, u jtaffu l-ħsara permezz ta’ miżuri oħra, inkluż miżuri fil-kapitoli REPowerEU.

(25)

Jenħtieġ li l-kapitoli REPowerEU jkunu konsistenti mal-pjanijiet nazzjonali għall-enerġija u l-klima tal-Istati Membri u mal-miri klimatiċi tal-Unjoni stabbiliti fir-Regolament (UE) 2021/1119.

(26)

Fid-dawl tal-Patt Ekoloġiku Ewropew bħala l-istrateġija tat-tkabbir sostenibbli tal-Ewropa u l-importanza li jiġi indirizzat it-tibdil fil-klima f’konformità mal-impenji tal-Unjoni biex timplimenta l-Ftehim ta’ Pariġi u l-Għanijiet ta’ Żvilupp Sostenibbli tan-Nazzjonijiet Uniti, il-Faċilità għandha tikkontribwixxi biex jiġu integrati l-azzjoni dwar il-klima u s-sostenibbiltà ambjentali u biex tintlaħaq il-mira ġenerali ta’ 30 % tan-nefqa tal-baġit tal-Unjoni li tappoġġa objettivi klimatiċi. Għal dak l-għan, jenħtieġ li l-miżuri appoġġati mill-Faċilità u inklużi fil-pjanijiet għall-irkupru u r-reżiljenza tal-Istati Membri jikkontribwixxu għat-tranżizzjoni ekoloġika, inkluż il-bijodiversità, jew biex jiġu indirizzati l-isfidi li jirriżultaw minnha, u jenħtieġ li l-miżuri jammontaw għal ammont li jirrappreżenta mill-inqas 37 % tal-allokazzjoni totali tal-pjan għall-irkupru u r-reżiljenza u għal mill-inqas 37 % tal-kostijiet totali stmati tal-miżuri fil-kapitolu REPowerEU abbażi tal-metodoloġija għat-trekkjar klimatiku mogħtija fl-Anness VI għar-Regolament (UE) 2021/241. Dik il-metodoloġija jenħtieġ li tintuża kif xieraq għall-miżuri li ma jistgħux jiġu assenjati direttament għal qasam ta’ intervent elenkat f’ dak l-Anness. Jekk l-Istat Membru kkonċernat u l-Kummissjoni jaqblu, jenħtieġ li jkun possibbli li l-koeffiċjenti għall-appoġġ għall-objettivi klimatiċi jiżdiedu għal 40 % jew 100 % għal investimenti individwali, kif spjegat fil-pjan għall-irkupru u r-reżiljenza, biex jitqiesu l-miżuri ta’ riforma akkumpanjanti li jżidu b’mod kredibbli l-impatt tagħhom fuq l-objettivi klimatiċi. Għal dak l-għan, jenħtieġ li jkun possibbli li l-koeffiċjenti għall-appoġġ għall-objettivi klimatiċi jiżdiedu sa ammont totali ta’ 3 % tal-allokazzjoni tal-pjan għall-irkupru u r-reżiljenza għal investimenti individwali. Jenħtieġ li l-Faċilità tappoġġa attivitajiet li jirrispettaw bis-sħiħ l-istandards u l-prijoritajiet klimatiċi u ambjentali tal-Unjoni u l-prinċipju “la tagħmilx ħsara sinifikanti”.

(27)

Jenħtieġ li l-Istati Membri jinkludu fil-kapitoli REPowerEU, fejn ikun rilevanti, miżuri li jkollhom dimensjoni jew effett transfruntier jew jinvolvu diversi pajjiżi, kif identifikat fil-valutazzjoni tal-ħtiġijiet l-aktar reċenti tal-Kummissjoni, li jikkontribwixxu, fost affarijiet oħra, għall-ġenerazzjoni ta’ valur miżjud Ewropew. Jenħtieġ li jitqies ukoll li l-miżuri mwettqa fi Stat Membru wieħed jista’ jkollhom effetti konsegwenti fi Stati Membri oħra. Jenħtieġ li l-Kummissjoni tiffaċilita l-kooperazzjoni bejn l-Istati Membri kmieni kemm jista’ jkun bil-ħsieb li jiġu żviluppati miżuri b’dimensjoni jew effett transfruntier jew li jinvolvu diversi pajjiżi biex jiġu inklużi fil-kapitoli REPowerEU. Jenħtieġ li l-Istati Membri jistinkaw biex jiżguraw li dawk il-miżuri jammontaw għal ammont li jirrappreżenta mill-inqas 30 % tal-kostijiet stmati tal-miżuri fil-kapitolu REPowerEU. Minbarra l-miżuri b’dimensjoni jew effett transfruntier jew li jinvolvu diversi pajjiżi, il-miżuri f’livell nazzjonali li jikkontribwixxu biex jiżguraw il-provvista tal-enerġija fl-Unjoni kollha kemm hi, f’konformità mal-objettivi tar-REPowerEU, b’mod partikolari fir-rigward tal-indirizzar tal-konġestjonijiet eżistenti f’termini ta’ trażmissjoni, distribuzzjoni u ħżin tal-enerġija, kif identifikati fil-valutazzjoni tal-ħtiġijiet l-aktar reċenti tal-Kummissjoni, u b’hekk jiżdied il-potenzjal għaċ-ċirkolazzjoni transfruntiera bejn l-Istati Membri, jenħtieġ li jitqiesu li għandhom dimensjoni jew effett transfruntier jew li jinvolvu diversi pajjiżi. Jenħtieġ li l-miżuri li jnaqqsu d-dipendenza fuq il-fjuwils fossili u jnaqqsu d-domanda għall-enerġija jitqiesu wkoll li għandhom effett transfruntier pożittiv peress li jilliberaw aktar kapaċità jew provvista għall-Istati Membri l-oħra.

(28)

Jenħtieġ li jiżdied kriterju ta’ valutazzjoni xieraq biex iservi bħala bażi biex il-Kummissjoni tivvaluta d-dimensjoni jew effett transfruntier jew li jinvolvu diversi pajjiżi tar-riformi u l-investimenti fil-kapitoli REPowerEU.

(29)

Jenħtieġ li jiġu pprovduti aktar inċentivi biex l-Istati Membri jitolbu appoġġ fil-forma ta’ self biex jiżguraw l-użu tal-fondi disponibbli mill-Istati Membri filwaqt li jikkonformaw mal-prinċipji ta’ trattament ugwali, solidarjetà, proporzjonalità u trasparenza. Għal dak l-għan, jenħtieġ li l-Istati Membri jikkomunikaw lill-Kummissjoni bl-aktar mod ċar possibbli, sa mhux aktar tard minn 30 jum wara d-dħul fis-seħħ ta’ dan ir-Regolament, jekk għandhomx l-intenzjoni li jissottomettu talba għal appoġġ fil-forma ta’ self. Jenħtieġ li l-Kummissjoni tippreżenta lill-Parlament Ewropew u lill-Kunsill, simultanjament, b’termini ugwali u mingħajr dewmien żejjed, ħarsa ġenerali lejn l-intenzjonijiet li esprimew l-Istati Membri u t-triq ’il quddiem proposta għad-distribuzzjoni tar-riżorsi disponibbli. Il-komunikazzjoni ta’ intenzjoni jenħtieġ li ma tippreġudikax il-kapaċità tal-Istati Membri li jitolbu appoġġ fil-forma ta’ self sal-31 ta’ Awwissu 2023 skont l-Artikolu 14 tar-Regolament (UE) 2021/241, inkluż fil-każ ta’ talbiet ’il fuq minn 6,8 % tal-introjtu nazzjonali gross (ING) fejn japplikaw il-kondizzjonijiet rilevanti. Jenħtieġ li dan ma jippreġudikax wkoll id-dħul fil-ftehim ta’ self korrispondenti mill-Kummissjoni wara l-adozzjoni tad-deċiżjoni ta’ implimentazzjoni tal-Kunsill rilevanti.

(30)

L-Istati Membri huma mħeġġa jippreżentaw il-kapitoli REPowerEU malajr kemm jista’ jkun u preferibbilment sa xahrejn wara d-dħul fis-seħħ ta’ dan ir-Regolament emendatorju. F’konformità mal-Artikolu 19(1) tar-Regolament (UE) 2021/241, il-Kummissjoni jenħtieġ li tivvaluta l-pjan modifikat għall-irkupru u r-reżiljenza ppreżentat mill-Istat Membru fi żmien xahrejn u tagħmel proposta għal deċiżjoni ta’ implimentazzjoni tal-Kunsill. Minħabba l-urġenza tal-isfidi li qed jiffaċċjaw l-Istati Membri, jenħtieġ li l-Kummissjoni tistinka biex tikkonkludi l-valutazzjoni tal-pjanijiet modifikati għall-irkupru u r-reżiljenza mingħajr dewmien żejjed.

(31)

Barra minn hekk, biex jiġi inċentivat livell għoli ta’ ambizzjoni għar-riformi u l-investimenti biex jiġu inklużi fil-kapitolu REPowerEU, jenħtieġ li jiġu pprovduti sorsi ta’ finanzjament dedikati ġodda.

(32)

Ir-Regolament tal-Kunsill (UE) 2022/1854 (13) jintroduċi kontribuzzjoni temporanja ta’ solidarjetà għall-kumpanniji u l-istabbilimenti permanenti tal-Unjoni b’attivitajiet fis-setturi taż-żejt mhux maħdum, tal-gass naturali, tal-faħam u tar-raffineriji applikabbli fl-Istati Membri kollha. L-Istati Membri huma mistiedna jużaw proporzjon tar-rikavati ġġenerati minn dik il-kontribuzzjoni temporanja biex irawmu sinerġiji u komplementarjetajiet mar-riformi u l-investimenti fil-kapitoli REPowerEU tagħhom b’mod koerenti, għall-finanzjament ta’ miżuri li għandhom jiġu implimentati fil-livell nazzjonali f’konformità mal-objettivi tar-REPowerEU.

(33)

Is-sitwazzjoni ekonomika u ġeopolitika attwali teħtieġ li l-Unjoni timmobilizza r-riżorsi disponibbli biex tiddiversifika b’mod rapidu l-provvista tal-enerġija tal-Unjoni u biex tnaqqas id-dipendenza fuq il-fjuwils fossili qabel l-2030. F’dak il-kuntest, jenħtieġ li d-Direttiva 2003/87/KE tippermetti monetizzazzjoni eċċezzjonali bl-irkantar ta’ porzjon tal-kwoti mill-fond għall-innovazzjoni u tal-kwoti allokati lill-Istati Membri, ħlief il-kwoti distribwiti għall-finijiet ta’ solidarjetà, tkabbir u interkonnessjonijiet, u jenħtieġ li tidderieġi d-dħul lejn riformi u investimenti li jikkontribwixxu għall-objettivi tar-REPowerEU, fil-qafas tal-Faċilità. L-irkantar tal-kwoti mill-fond ta’ -innovazzjoni u ta’ kwoti allokati lill-Istati Membri jenħtieġ li wkoll jiġi kkonċentrat fil-bidu. Jenħtieġ li porzjon tal-kwoti mir-riżerva tal-istabbiltà tas-suq li altrimenti jiġi invalidat jintuża għar-riforniment tal-fond għall-innovazzjoni.

(34)

Fil-kuntest tal-intervent ta’ emerġenza tal-Unjoni biex jiġu indirizzati l-prezzijiet għoljin tal-enerġija li jirriżultaw mill-impatt tal-gwerra ta’ aggressjoni tar-Russja kontra l-Ukrajna, jenħtieġ li miżuri temporanji eċċezzjonali mmirati taħt il-qafas tal-politika ta’ koeżjoni 2014-2020 li huma stipulati fir-Regolament (UE) Nru 1303/2013 tal-Parlament Ewropew u tal-Kunsill (14), permezz ta’ użu flessibbli tar-riżorsi mill-Fond Ewropew għall-Iżvilupp Reġjonali (FEŻR), mill-Fond Soċjali Ewropew (FSE), u mill-Fond ta’ Koeżjoni, jgħinu lil impriżi żgħar u ta’ daqs medju (SMEs) partikolarment affettwati miż-żidiet fil-prezzijiet tal-enerġija, kif ukoll lill-unitajiet domestiċi vulnerabbli, biex ikopru l-kostijiet tal-enerġija mġarrba u mħallsa sa mill-1 ta’ Frar 2022. Tali appoġġ huwa għalkollox konformi mal-objettivi tar-REPowerEU.

(35)

B’mod partikolari, jenħtieġ li l-FEŻR jintuża b’mod eċċezzjonali biex jipprovdi appoġġ ta’ kapital operatorju lill-SMEs partikolarment affettwati miż-żidiet fil-prezzijiet tal-enerġija. L-appoġġ lill-SMEs partikolarment affettwati miż-żidiet fil-prezzijiet tal-enerġija, jenħtieġ li jkun proporzjonat u jirrispetta r-regoli applikabbli dwar l-għajnuna mill-Istat. Barra minn hekk, jenħtieġ li l-FSE jintuża b’mod eċċezzjonali biex jipprovdi appoġġ lill-unitajiet domestiċi vulnerabbli, kif definiti f’regoli nazzjonali, biex jgħinhom ilaħħqu mal-kostijiet tal-konsum tal-enerġija tagħhom anki fin-nuqqas ta’ miżuri li jżidu l-impjegabbiltà tal-persuni appoġġati, jiġifieri, miżuri attivi. Dawk huma miżuri eċċezzjonali strettament meħtieġa biex tiġi indirizzata l-kriżi tal-enerġija li tirriżulta mill-impatt tal-gwerra ta’ aggressjoni tar-Russja konta l-Ukrajna. Huma jiżguraw li n-nies appoġġati jkollhom aċċess għas-servizzi essenzjali, u b’hekk jikkontribwixxu wkoll għall-kundizzjonijiet li jwasslu għal saħħa tajba li huma meħtieġa biex jipparteċipaw fis-suq tax-xogħol. L-appoġġ jista’ jiġi pprovdut mil-FEŻR, l-FSE u l-Fond ta’ Koeżjoni b’mod interkambjabbli. Barra minn hekk, minbarra l-FSE, jenħtieġ li jkun possibbli li jiġi wżat l-FEŻR u l-Fond ta’ Koeżjoni biex jappoġġaw miżuri għaż-żamma tal-impjiegi permezz ta’ xogħol b’ħinijiet iqsar u skemi ekwivalenti, inkluż appoġġ għal dawk li jaħdmu għal rashom. Skemi bħal dawn għandhom l-għan li jipproteġu lill-impjegati u lil dawk li jaħdmu għal rashom kontra r-riskju tal-qgħad. Ir-riżorsi allokati għal skemi bħal dawn iridu jintużaw esklużivament bħala appoġġ lill-ħaddiema u lil dawk li jaħdmu għal rashom. L-appoġġ tal-Unjoni għal tali skemi ta’ xogħol b’ħinijiet iqsar u ekwivalenti jenħtieġ li jkun għal perjodu limitat. Jenħtieġ li jkun possibbli wkoll li jintużaw ir-riżorsi REACT-EU msemmija fl-Artikolu 92a tar-Regolament (UE) Nru 1303/2013 għal dawk it-tliet tipi ta’ appoġġ sabiex jissaħħu l-isforzi kontinwi tal-Istati Membri lejn l-irkupru reżiljenti tal-ekonomiji tagħhom wara l-kriżi tal-COVID-19.

(36)

Jenħtieġ li arranġamenti speċifiċi ta’ programmazzjoni jippermettu li r-riżorsi jiġu pprogrammati esklużivament fi ħdan assi prijoritarji ddedikati u jikkontribwixxu għal prijoritajiet speċifiċi ta’ investiment. Sabiex jiġi offrut appoġġ sinifikanti lill-Istati Membri fl-isforzi tagħhom biex irażżnu l-effetti tal-kriżi tal-enerġija, jenħtieġ li l-Istati Membri jibbenefikaw eċċezzjonalment minn rata ta’ kofinanzjament ta’ 100 % li tiġi applikata għall-assi prijoritarji ddedikati tal-programmi operazzjonali li jipprovdu tali appoġġ esklużivament sa tmiem il-perjodu ta’ programmazzjoni 2014-2020. Dawk il-miżuri limitati u mmirati jenħtieġ li jikkomplementaw l-interventi strutturali fil-politika ta’ koeżjoni li jappoġġaw il-produzzjoni ta’ enerġija nadifa u l-promozzjoni tal-effiċjenza fl-enerġija. Sabiex jittieħed kont tar-restrizzjonijiet baġitarji tal-Unjoni, jenħtieġ li l-pagamenti mill-Kummissjoni għal operazzjonijiet bħal dawn fl-ambitu tal-prijoritajiet iddedikati jkollhom limitu massimu ta’ EUR 5 000 000 000 fl-2023.

(37)

Sabiex l-Istati Membri u r-reġjuni jingħataw biżżejjed flessibbiltà biex jindirizzaw l-isfidi emerġenti l-ġodda, jenħtieġ li r-Regolament (UE) 2021/1060 tal-Parlament Ewropew u tal-Kunsill (15) jipprovdi lill-Istati Membri bil-possibbiltà li jitolbu sa 7,5 % tar-riżorsi fl-ambitu tal-FEŻR, l-Fond Soċjali Ewropew Plus+ u l-Fond ta’ Koeżjoni biex jikkontribwixxu għall-objettivi tar-REPowerEU. Jenħtieġ li jkun possibbli li dawk il-Fondi jipprovdu appoġġ għall-objettivi tar-REPowerEU meta tali appoġġ ikun fl-ambitu tal-Fond ikkonċernat, jikkontribwixxi għall-objettivi speċifiċi tiegħu u jikkonforma mar-regoli stipulati fir-Regolament (UE) 2021/1060 u r-Regolament speċifiku għall-Fond rilevanti, inkluż il-prinċipju “la tagħmilx ħsara sinifikanti”.

(38)

L-Istati Membri jenħtieġ li jkollhom il-possibbiltà li jittrasferixxu l-allokazzjoni proviżorja tagħhom kollha jew parti minnha mir-riżorsi tar-Riżerva ta’ Aġġustament għall-Brexit għall-Faċilità. Il-kriżi tal-COVID-19, aggravata mit-theddida għas-sigurtà tal-enerġija tal-Unjoni, aggravat ir-riperkussjonijiet negattivi tal-ħruġ tar-Renju Unit mill-Unjoni fl-Istati Membri, inkluż ir-reġjuni u l-komunitajiet lokali tagħhom, u s-setturi, b’mod partikolari f’dawk li huma l-aktar milquta ħażin minn dak il-ħruġ. Il-miżuri li jridu jiġu ffinanzjati mir-Riżerva ta’ Aġġustament għall-Brexit u r-riformi u l-investimenti li jridu jiġu ffinanzjati mill-Faċilità jistgħu jservu skopijiet simili u jkollhom kontenut simili. Kemm ir-Riżerva ta’ Aġġustament għall-Brexit kif ukoll il-Faċilità fl-aħħar mill-aħħar għandhom l-għan li jtaffu l-impatti negattivi fuq il-koeżjoni ekonomika, soċjali u territorjali. F’dak il-kuntest, filwaqt li r-riformi u l-investimenti li jaqgħu taħt il-Faċilità primarjament ikollhom l-għan li jindirizzaw il-konsegwenzi ekonomiċi tal-pandemija, dawn jistgħu jikkontribwixxu wkoll għall-ġlieda kontra l-konsegwenzi mhux previsti u negattivi fl-Istati Membri u s-setturi li huma l-aktar affettwati mill-Brexit. Fl-aħħar nett, l-impenji u l-approprjazzjonijiet ta’ pagament li jaqgħu kemm taħt ir-Riżerva ta’ Aġġustament għall-Brexit kif ukoll taħt il-Faċilità jiddaħħlu ‘l fuq mil-limiti massimi tal-qafas finanzjarju pluriennali. F’dak ix-xenarju, u b’kont meħud tat-tfixkil fis-suq dinji tal-enerġija kkawżat mill-iżviluppi ġeopolitiċi l-aktar reċenti, huwa xieraq li tiġi pprovduta flessibbiltà lill-Istati Membri billi jitħallew isiru trasferimenti mir-Riżerva ta’ Aġġustament għall-Brexit għall-Faċilità, li jippermettu li jiġu indirizzati l-objettivi tat-tnejn li huma, u fl-aħħar mill-aħħar li jwasslu għal koeżjoni ekonomika, soċjali u territorjali.

(39)

L-iżborżi ta’ finanzjament addizzjonali lill-Istati Membri li jinkludi kapitolu tar-REPowerEU fil-pjan għall-irkupru u r-reżiljenza tagħhom jenħtieġ li jsiru skont ir-regoli tal-Faċilità sa tmiem l-2026.

(40)

Talba, ippreżentata fil-pjan ta’ rkupru u reżiljenza, għal finanzjament iddedikat, inkluż allokazzjoni mill-irkantar tal-kwoti tal-iskema għall-iskambju ta’ kwoti tal-emissjonijiet skont id-Direttiva 2003/87/KE, trasferimenti ta’ riżorsi mill- FEŻR, il-Fond Soċjali Ewropew Plus jew il-Fond ta’ Koeżjoni rregolati mill-Artikolu 26 tar-Regolament (UE) 2021/1060 u t-trasferimenti ta’ riżorsi mir-Riżerva ta’ Aġġustament għall-Brexit, għall-miżuri li jinsabu fil-kapitolu tar-REPowerEU jenħtieġ li tirrifletti ħtieġa finanzjarja akbar marbuta ma’ riformi u investimenti addizzjonali inklużi f’dak il-kapitolu.

(41)

Sabiex jiġi żgurat li appoġġ finanzjarju jiġi kkonċentrat fil-bidu biex jingħata rispons aħjar għall-kriżi attwali tal-enerġija, jenħtieġ li jkun possibbli li, fuq talba ta’ Stat Membru li tiġi ppreżentata flimkien mal-kapitolu REPowerEU fi pjan modifikat għall-irkupru u r-reżiljenza, jista’ jitħallas ammont mill-finanzjament addizzjonali meħtieġ biex jiffinanzja l-miżuri tal-kapitolu REPowerEU fil-forma ta’ żewġ pagamenti ta’ prefinanzjament.

Jenħtieġ li l-Kummissjoni, sa fejn ikun possibbli, tagħmel l-ewwel pagament ta’ prefinanzjament fi żmien xahrejn li tidħol fl- impenn legali għall-finijiet tar-Regolament (UE) 2021/241, u t-tieni pagament ta’ prefinanzjament fi żmien 12-il xahar mid-dħul fis-seħħ tad-deċiżjoni ta’ implimentazzjoni tal-Kunsill li tapprova l-valutazzjoni tal-pjan għall-irkupru u r-reżiljenza li jinkludi kapitolu REPowerEU. Jenħtieġ li dawk l-pagamenti jkunu soġġetti għal riżorsi disponibbli, b’mod partikolari d-disponibbiltà ta’ fondi mill-kont tan-NextGenerationEU, ta’ fondi approvati fil-baġit annwali tal-Unjoni u tad-dħul miksub mill-irkantar tal-kwoti tal-iskema għall-iskambju ta’ kwoti tal-emissjonijiet skont id-Direttiva 2003/87/KE, u għal trasferiment effettiv minn qabel ta’ riżorsi taħt programmi ta’ ġestjoni kondiviża, jekk jintalab.

(42)

Sabiex ikun hemm konformità mal-limiti massimi tal-pagamenti tal-qafas finanzjarju pluriennali, jenħtieġ li jiġi stabbilit limitu massimu għall-pagamenti li jikkorrispondi għall-prefinanzjament għall-ammonti trasferiti skont ir-Regolament (UE) 2021/1060.

(43)

Jenħtieġ li jsir monitoraġġ mill-Kummissjoni tal-implimentazzjoni tar-riformi u l-investimenti deskritti fil-kapitolu REPowerEU u tal-kontribut tagħhom għall-objettivi tar-REPowerEU u li hija tipprovdi informazzjoni fir-rigward tiegħu, b’mod partikolari permezz ta’ skambji matul id-djalogu dwar l-irkupru u r-reżiljenza, permezz ta’ rapportar fit-tabella ta’ valutazzjoni għall-irkupru u r-reżiljenza, u permezz ta’ taqsima ddedikata fir-rapport annwali li għandu jiġi ppreżentat lill-Parlament Ewropew u lill-Kunsill.

(44)

Il-ġrajjiet ġeopolitiċi reċenti affettwaw b’mod konsiderevoli l-prezzijiet tal-enerġija, tal-ikel u tal-materjali tal-kostruzzjoni u kkawżaw ukoll skarsezzi fil-ktajjen tal-provvista dinjija, irriżultaw f’inflazzjoni akbar u ġġeneraw sfidi ġodda, inkluż ir-riskju tal-faqar enerġetiku u tal-għoli tal-ħajja. Rispons għal dawk l-isfidi jista’ jiġi rikjest. Jista’ jkun lidawk l-iżviluppi jkollhom impatt dirett fuq il-kapaċità li jiġu implimentati l-miżuri fil-pjanijiet għall-irkupru u r-reżiljenza. Sakemm l-Istati Membri jistgħu juru li żviluppi ta’ dan it-tip iwasslu biex stadju importanti jew mira speċifika ma jkunux għadhom jistgħu jintlaħqu, għalkollox jew parzjalment, sitwazzjonijiet bħal dawn jistgħu jiġu invokati bħala ċirkostanzi oġġettivi skont ir-Regolament (UE) 2021/241. Barra minn hekk, sakemm dawk l-Istati Membri jistgħu juru li l-kisba ta’ stadju importanti jew mira speċifika jkunu f’konflitt mal-kisba tal-objettivi tar-REPowerEU, sitwazzjonijiet bħal dawn jistgħu wkoll jiġu invokati bħala ċirkostanzi oġġettivi skont dak ir-Regolament. Barra minn hekk, jenħtieġ li ebda talba għal emendi ma timmina l-implimentazzjoni ġenerali tal-pjanijiet għall-irkupru u r-reżiljenza, inkluż l-isforzi għar-riforma u l-investiment tal-Istati Membri.

(45)

Jenħtieġ li r-Regolamenti (UE) 2021/241, (UE) Nru 1303/2013, (UE) 2021/1060 u (UE) 2021/1755. u d-Direttiva 2003/87/KE jiġu emendati skont dan.

(46)

Sabiex tiġi żgurata l-applikazzjoni immedjata tal-miżuri previsti f’dan ir-Regolament, jenħtieġ li dan jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,