(1)

Fit-13 ta’ April 2023, l-Assoċjazzjoni Ġermaniża tal-Industriji tal-Enerġija u tal-Ilma (Bundesverband der Energie- und Wasserwirtschaf e.V., “BDEW” jew “l-Applikant”) ressqet talba lill-Kummissjoni skont l-Artikolu 35(1) tad-Direttiva 2014/25/UE (“it-Talba”). It-Talba tikkonforma mar-rekwiżiti formali stabbiliti fl-Artikolu 1(1) tad-Deċiżjoni ta’ Implimentazzjoni tal-Kummissjoni (UE) 2016/1804 (2) u fl-Anness I ta’ dik id-Deċiżjoni ta’ Implimentazzjoni.

(2)

Il-BDEW hija assoċjazzjoni li tirrappreżenta l-impriżi fis-settur Ġermaniż tal-enerġija u tal-ilma li huma kkunsidrati bħala entitajiet kontraenti skont it-tifsira tal-Artikolu 4 tad-Direttiva 2014/25/UE. It-talba tikkonċerna attivitajiet relatati mal-ġenerazzjoni u mal-bejgħ bl-ingrossa tal-elettriku minn sorsi rinnovabbli fil-Ġermanja, bl-eċċezzjoni tal-elettriku minn sorsi rinnovabbli ġġenerat f’installazzjonijiet li bdew joperaw qabel l-1 ta’ Awwissu 2014 u li għadhom jirċievu finanzjament pubbliku.

(3)

It-talba kienet akkumpanjata minn pożizzjoni motivata u sostanzjata tal-Uffiċċju Federali tal-Akkordji Ġermaniż (Bundeskartellamt, minn hawn ’il quddiem imsejjaħ “BKartA”) datata l-25 ta’ Mejju 2022. F’din il-pożizzjoni, il-BKartA janalizza bir-reqqa l-kundizzjoni għall-applikabbiltà tal-Artikolu 34(1) tad-Direttiva 2014/25/UE għall-attività kkonċernata, f’konformità mal-paragrafi 2 u 3 ta’ dak l-Artikolu.

(4)

F’konformità mal-punt 1(a) tal-Anness IV tad-Direttiva 2014/25/UE, peress li l-aċċess liberu għas-suq jista’ jiġi preżunt abbażi tal-ewwel subparagrafu tal-Artikolu 34(3) ta’ dik id-Direttiva, il-Kummissjoni trid tadotta Deċiżjoni ta’ Implimentazzjoni dwar it-talba fi żmien 90 jum ta’ xogħol.

(5)

Fis-16 ta’ Mejju 2023, il-BDEW issottomettiet argumenti addizzjonali li jispjegaw għaliex hija qieset partijiet mill-analiżi tal-BKartA dwar l-esponiment ta’ partijiet mill-attività tal-ġenerazzjoni tal-elettriku rinnovabbli għall-kompetizzjoni fil-Ġermanja bħala mhux fondati għalkollox.

(6)

Fil-15 ta’ Ġunju 2023, Ørsted A/S ippreżentat talba lill-Kummissjoni skont l-Artikolu 35(1) tad-Direttiva 2014/25/UE. Din it-talba tikkonċerna l-ġenerazzjoni u l-bejgħ bl-ingrossa tal-elettriku minn parks eoliċi lil hinn mill-kosta fil-Ġermanja kkummissjonati wara l-1 ta’ Jannar 2012 u soġġetti għall-Att dwar is-Sorsi tal-Enerġija Rinnovabbli (Erneuerbare-Energien-Gesetz, minn hawn ’il quddiem imsejjaħ “EEG” 2012). Skont l-Artikolu 35(5) tad-Direttiva 2014/25/UE, din it-talba ma hijiex trattata bħala proċedura ġdida u hija trattata fil-kuntest tal-ewwel talba. Il-Kummissjoni u l-BDEW qablu li, bħala riżultat ta’ din it-tieni talba, l-iskadenza għall-adozzjoni ta’ att ta’ implimentazzjoni mill-Kummissjoni tiġi stabbilita għall-25 ta’ Settembru 2023.

(7)

Id-Direttiva 2014/25/UE tapplika għall-għoti ta’ kuntratti għat-twettiq ta’ attivitajiet relatati mal-ġenerazzjoni u l-bejgħ bl-ingrossa tal-elettriku msemmija fl-Artikolu 9(1)(b), sakemm din l-attività ma tkunx eżentata skont l-Artikolu 34 ta’ dik id-Direttiva.

(8)

Skont l-Artikolu 34(1) tad-Direttiva 2014/25/UE, kuntratti maħsuba sabiex jippermettu t-twettiq ta’ attività li għaliha tapplika d-Direttiva ma għandhomx, fuq talba minn Stat Membru jew minn entità kontraenti, ikunu soġġetti għal dik id-Direttiva jekk, fl-Istat Membru fejn titwettaq, l-attività tkun esposta direttament għall-kompetizzjoni fi swieq li għalihom l-aċċess ma huwiex ristrett.

(9)

L-esponiment dirett għall-kompetizzjoni jrid jiġi vvalutat abbażi ta’ kriterji oġġettivi, filwaqt li jitqiesu l-karatteristiċi speċifiċi tas-settur ikkonċernat. Madankollu, din il-valutazzjoni hija limitata mill-iskadenzi qosra applikabbli u mill-ħtieġa li wieħed jibbaża fuq l-informazzjoni disponibbli għall-Kummissjoni. Dik l-informazzjoni toriġina jew minn sorsi diġà disponibbli jew mill-informazzjoni miksuba fil-kuntest tat-talba skont l-Artikolu 35 tad-Direttiva 2014/25/UE, u ma tistax tiġi ssupplimentata minn metodi li jieħdu aktar ħin, inkluż, b’mod partikolari, investigazzjonijiet pubbliċi indirizzati lill-operaturi ekonomiċi kkonċernati.

(10)

L-esponiment dirett għall-kompetizzjoni f’suq partikolari jenħtieġ li jiġi evalwat abbażi ta’ diversi kriterji, li l-ebda wieħed minnhom ma huwa deċiżiv minnu nnifsu.

(11)

Għall-finijiet tal-valutazzjoni dwar jekk l-attivitajiet rilevanti humiex soġġetti għal kompetizzjoni diretta fis-swieq ikkonċernati minn din id-Deċiżjoni, irid jitqies is-sehem mis-suq tal-atturi ewlenin, kif ukoll l-eżistenza u l-firxa tal-appoġġ għall-ġenerazzjoni u l-bejgħ bl-ingrossa tal-elettriku rinnovabbli fil-Ġermanja permezz ta’ skemi.

(12)

L-għan ta’ din id-Deċiżjoni huwa li tistabbilixxi jekk l-attivitajiet ikkonċernati mit-talba, fis-swieq li għalihom l-aċċess ma huwiex ristrett skont it-tifsira tal-Artikolu 34 tad-Direttiva 2014/25/UE, humiex esposti għal livell ta’ kompetizzjoni li jiżgura li, anke fin-nuqqas tad-dixxiplina tal-akkwist miġjuba mir-regoli dettaljati dwar l-akkwist stabbiliti fid-Direttiva 2014/25/UE, l-akkwist għat-twettiq tal-attività kkonċernata jsir b’mod trasparenti u mhux diskriminatorju, abbażi tal-kriterji li jippermettu lill-akkwirenti jidentifikaw is-soluzzjoni li b’mod ġenerali tkun l-aktar waħda ekonomikament vantaġġuża.

(13)

Din id-Deċiżjoni hija bbażata fuq is-sitwazzjoni ġuridika u fattwali minn April u Ġunju 2023 rispettivament u fuq l-informazzjoni sottomessa mill-BDEW, minn Ørsted, mill-awtoritajiet Ġermaniżi, u fuq l-informazzjoni li hija disponibbli għall-pubbliku. Din tista’ tiġi riveduta, jekk bidliet sinifikanti fis-sitwazzjoni legali jew fattwali jfissru li l-kundizzjonijiet għall-applikabbiltà tal-Artikolu 34(1) tad-Direttiva 2014/25/UE ma jibqgħux jiġu ssodisfati.

(14)

L-aċċess għal suq jitqies li ma huwiex ristrett jekk l-Istat Membru kkonċernat ikun implimenta u applika l-atti legali rilevanti tal-Unjoni elenkati fl-Anness III tad-Direttiva 2014/25/UE, li jinkludu, fir-rigward tal-ġenerazzjoni u l-bejgħ bl-ingrossa tal-elettriku, id-Direttiva (UE) 2019/944 tal-Parlament Ewropew u tal-Kunsill (3).

(15)

Abbażi tal-informazzjoni disponibbli għall-Kummissjoni, il-Ġermanja ttrasponiet u tapplika d-Direttiva (UE) 2019/944. Konsegwentement, l-aċċess għas-suq rilevanti jitqies li ma huwiex ristrett skont it-tifsira tal-Artikolu 34(3) tad-Direttiva 2014/25/UE.

(16)

Skont il-BDEW, is-suq tal-prodott rilevanti huwa magħmul minn ġenerazzjoni u bejgħ bl-ingrossa konvenzjonali u rinnovabbli, bl-eċċezzjoni tal-elettriku minn sorsi rinnovabbli ġġenerat f’installazzjonijiet li bdew joperaw qabel l-1 ta’ Awwissu 2014 u li għadhom jirċievu finanzjament pubbliku. Skont Ørsted, is-suq rilevanti jinkludi l-ġenerazzjoni u l-bejgħ bl-ingrossa tal-elettriku soġġetti għall-opzjoni ta’ kummerċjalizzazzjoni diretta mill-2012 jew l-obbligu ta’ kummerċjalizzazzjoni diretta mill-2014.

(17)

Il-BDEW tosserva (4) li għall-installazzjonijiet kollha kkummissjonati wara l-1 ta’ Awwissu 2014, il-kummerċjalizzazzjoni diretta obbligatorja hija l-forma standard ta’ kummerċjalizzazzjoni. L-installazzjonijiet fil-kummerċjalizzazzjoni diretta obbligatorja jistgħu jagħżlu bejn il-kummerċjalizzazzjoni diretta bi premium tas-suq u l-kummerċjalizzazzjoni diretta mingħajr appoġġ (l-hekk imsejħa kummerċjalizzazzjoni diretta oħra). Eċċezzjoni għall-obbligu ta’ kummerċjalizzazzjoni diretta teżisti biss għal installazzjonijiet żgħar. Għall-installazzjonijiet ikkummissjonati qabel l-1 ta’ Jannar 2016, dawn huma installazzjonijiet sa 500 kW filwaqt li għall-installazzjonijiet ikkummissjonati mill-1 ta’ Jannar 2016, dawn huma installazzjonijiet taħt u sa 100 kW. Tali installazzjonijiet żgħar jistgħu jiddeċiedu jekk jagħżlux il-mudell tariffarju feed-in fissa jew il-kummerċjalizzazzjoni diretta.

(18)

Fir-rigward tal-installazzjonijiet li għadhom jirċievu finanzjament pubbliku, il-BDEW tindika li l-installazzjonijiet “ta’ wara l-appoġġ” huma dawk li huma esklużi jew li se jiġu esklużi mill-appoġġ wara għoxrin sena ta’ appoġġ mill-1 ta’ Jannar 2021 ’il quddiem. L-installazzjonijiet “ta’ wara l-appoġġ” b’kapaċità elettrika installata ta’ aktar minn 100 kW iridu jikkummerċjalizzaw l-elettriku direttament mingħajr ebda appoġġ (kummerċjalizzazzjoni diretta oħra). L-installazzjonijiet b’kapaċità elettrika installata sa u li tinkludi 100 kW għandhom l-għażla bejn kummerċjalizzazzjoni diretta oħra (mhux appoġġata) u l-bejgħ dirett lill-operatur tal-grilja bi ħlas ta’ tariffa feed-in. Madankollu, din it-tariffa feed-in issa tammonta biss għall-“valur annwali tas-suq” nieqes il-kostijiet medji tal-kummerċjalizzazzjoni tal-operaturi tas-sistema ta’ trażmissjoni għall-elettriku mibjugħ lill-operatur tal-grilja (5). Għalhekk, il-leġiżlatur Ġermaniż kif ukoll il-Kummissjoni jittrattaw din ir-remunerazzjoni bħala appoġġ esklużivament ibbażat fuq is-suq (“element tranżizzjonali”) u għalhekk mhux bħala għajnuna mill-Istat (“ebda għajnuna”) (6). Bl-eċċezzjoni ta’ impjanti fuq skala żgħira, kummerċjalizzazzjoni diretta obbligatorja oħra tapplika għal impjanti ta’ “wara l-appoġġ”.

(19)

F’deċiżjoni preċedenti relatata mal-ġenerazzjoni tal-elettriku fil-Ġermanja (7), il-Kummissjoni kienet għamlet distinzjoni bejn is-suq għall-ġenerazzjoni tal-elettriku konvenzjonali u s-suq għall-ġenerazzjoni tal-elettriku rinnovabbli. Il-Kummissjoni qieset li l-produzzjoni u l-kummerċjalizzazzjoni tal-elettriku regolati mill-EEG ma kinux parti mis-suq għall-ġenerazzjoni u l-ewwel bejgħ tal-elettriku prodott minn sorsi konvenzjonali minħabba li l-elettriku ġġenerat minn sorsi rinnovabbli normalment ma kienx jinbiegħ direttament fis-suq bl-ingrossa iżda jinxtara l-ewwel mill-operaturi tal-grilja ta’ trażmissjoni għal rata ta’ remunerazzjoni statutorja.

(20)

F’deċiżjonijiet aktar tard, il-Kummissjoni sabet li l-ġenerazzjoni tal-elettriku konvenzjonali u (mill-inqas xi wħud) rinnovabbli kienu parti mill-istess suq. Fid-deċiżjoni tagħha dwar in-Netherlands (8), il-Kummissjoni nnotat li l-elettriku ġġenerat minn sorsi rinnovabbli nbiegħ direttament fis-suq, u li s-sistema Olandiża SDE+ ħeġġet offerti kompetittivi, filwaqt li l-kompetituri jippruvaw jimminimizzaw il-kost tagħhom (għalhekk il-premium feed-in li jirċievu). Fid-deċiżjoni tagħha dwar l-Italja (9), il-Kummissjoni rrimarkat li l-iskemi tal-elettriku rinnovabbli aktar riċenti kienu soġġetti għal proċess ta’ offerti b’għadd kbir ta’ applikanti. Fid-deċiżjoni tagħha relatata mal-Litwanja (10), il-Kummissjoni ddikjarat li l-elettriku prodott skont it-tielet skema ta’ appoġġ irċieva appoġġ abbażi tal-premium stabbilit permezz ta’ proċedura kompetittiva ta’ offerti u sabet li kien parti mill-istess suq bħall-ġenerazzjoni konvenzjonali tal-elettriku. Fl-2022 fir-rigward tad-Danimarka (11), il-Kummissjoni sabet li l-allokazzjoni tal-finanzjament pubbliku kienet esposta għall-kompetizzjoni permezz ta’ proċess ta’ offerti, li jiddixxiplina l-imġiba tal-produtturi tal-elettriku minn sorsi rinnovabbli fir-rigward tal-politika tal-akkwist tagħhom. B’riżultat ta’ dan, hija kkonkludiet li l-faċilitajiet għall-ġenerazzjoni tal-elettriku rinnovabbli soġġetti għat-talba kienu jappartjenu għall-istess suq bħall-ġenerazzjoni konvenzjonali tal-elettriku.

(21)

Fil-pożizzjoni tiegħu, il-BKartA josserva (12) li, bejn il-bidu tal-2012 u t-tmiem tal-2020, ġew installati madwar 65 GW ta’ kapaċità ta’ ġenerazzjoni appoġġata skont l-EEG, li jirrappreżenta nofs il-kapaċità appoġġata mill-EEG u kwart tal-kapaċità ta’ ġenerazzjoni totali fil-Ġermanja. Fl-2020, l-elettriku appoġġat mill-EAG ammonta għal madwar 20 % tal-ġenerazzjoni totali tal-elettriku fil-Ġermanja. Il-ħlasijiet skont l-EEG żdiedu biss b’mod moderat, peress li għadd dejjem akbar ta’ faċilitajiet ta’ ġenerazzjoni ddeċidew li jbigħu l-produzzjoni tagħhom fis-suq (“kummerċjalizzazzjoni diretta”) minflok ma jirċievu premium fiss. Fir-rigward tad-definizzjoni tas-suq tal-prodotti, il-BKartA ripetutament kien tal-fehma, fil-prattika deċiżjonali tal-antitrust tiegħu, li l-elettriku tal-EEG kien suq separat (13).

(22)

Il-Kummissjoni tinnota li l-ġenerazzjoni tal-elettriku minn sorsi rinnovabbli fil-Ġermanja hija appoġġata minn għadd ta’ skemi b’karatteristiċi differenti.

(23)

Minħabba d-diversità tal-iskemi li jappoġġaw il-produzzjoni tal-elettriku minn sorsi rinnovabbli fil-Ġermanja, is-suq, għall-finijiet tal-analiżi f’dawn il-premessi, se jinqasam bejn, minn naħa waħda, l-installazzjonijiet li jistgħu jirċievu remunerazzjoni indipendenti mill-prezzijiet tas-suq (tariffa feed-in fissa, ħlas addizzjonali għall-elettriku mill-kerrej) u, min-naħa l-oħra, l-installazzjonijiet li jirċievu remunerazzjoni marbuta mal-prezzijiet tas-suq (kummerċjalizzazzjoni diretta b’valur legalment iddeterminat applikabbli, kummerċjalizzazzjoni diretta b’valur applikabbli ddeterminat permezz ta’ offerti, impjanti qodma postssussidjati u kummerċjalizzazzjoni diretta oħra). Dan l-approċċ huwa konformi mad-deċiżjoni ta’ eżenzjoni tal-Kummissjoni 2012/218/UE dwar is-suq tal-elettriku Ġermaniż, li fiha, il-Kummissjoni kienet sabet li l-eżistenza ta’ remunerazzjoni statutorja kienet karatteristika ewlenija meta analizzat l-esponiment għall-kompetizzjoni tal-elettriku tal-EEG.

(24)

Skont il-BDEW, abbażi tal-prattika deċiżjonali tal-Kummissjoni, is-suq ġeografiku rilevanti jenħtieġ li jiġi definit bħala nazzjonali, li jinkludi t-territorju tar-Repubblika Federali tal-Ġermanja (14).

(25)

Fir-rigward tas-suq ġeografiku, fil-prattika preċedenti tiegħu (15), il-Kummissjoni kienet tal-fehma li s-suq għall-ġenerazzjoni tal-elettriku huwa nazzjonali fl-ambitu tiegħu. Il-pożizzjoni tal-Applikant hija konsistenti mal-prassi tal-Kummissjoni.

(26)

Fin-nuqqas ta’ kwalunkwe indikazzjoni ta’ ambitu differenti tas-suq ġeografiku, għall-finijiet tal-valutazzjoni skont din id-Deċiżjoni, u mingħajr preġudizzju għad-dritt tal-kompetizzjoni, l-ambitu ġeografiku tal-ġenerazzjoni u l-bejgħ bl-ingrossa ta’ elettriku minn sorsi rinnovabbli jista’ jitqies li jkopri t-territorju tal-Ġermanja.

(27)

Il-Kummissjoni se twettaq analiżi tas-suq tal-ġenerazzjoni tal-elettriku u tal-bejgħ bl-ingrossa fil-Ġermanja abbażi tad-data disponibbli għall-ġenerazzjoni tal-elettriku konvenzjonali u rinnovabbli rispettivament.

(28)

Il-BKartA jipprovdi ħarsa ġenerali lejn l-ishma tas-suq fir-rapport annwali tiegħu dwar is-suq għall-ġenerazzjoni tal-elettriku konvenzjonali. Matul il-perjodu 2019-2021, l-ishma annwali tas-suq tal-akbar ħames produtturi tal-elettriku konvenzjonali kienu pjuttost stabbli: RWE (26 %, 25,3 %, 26,1 %), LEAG (16,2 %, 14,9 %, 15,7 %), EnBW (12,7 %, 9,9 %, 11,4 %), EON (8,8 %, 9,6 %, 9,2 %) u Vattenfall (6,4 %, 5,6 %, 4,5 %). Tnejn biss minn dawn il-kumpaniji, EnBW u Vattenfall, huma entitajiet kontraenti. Ørsted kellha sehem mis-suq ta’ inqas minn 1 % għas-suq ikkombinat tal-ġenerazzjoni tal-elettriku konvenzjonali u rinnovabbli fl-2020, fl-2021 u fl-2022 (16).

(29)

L-ismijiet u l-ishma mis-suq tal-akbar tliet produtturi tal-elettriku minn sorsi rinnovabbli ma humiex disponibbli għall-pubbliku. Dan huwa parzjalment dovut għall-għadd kbir ta’ atturi attivi fis-suq tal-elettriku minn sorsi tal-enerġija rinnovabbli.

(30)

Il-BKartA ddetermina li l-ishma mis-suq tal-ħames kumpaniji msemmija hawn fuq bl-ogħla bejgħ fil-ġenerazzjoni konvenzjonali tal-elettriku flimkien ammontaw, għall-volum tal-ġenerazzjoni appoġġat skont l-EEG għaż-żona tas-suq tal-Ġermanja fl-2021, għal madwar 6,4 % (17).

(31)

Skont il-BDEW, wieħed jista’ jassumi li l-ishma mis-suq tal-ġeneraturi tal-elettriku minn sorsi rinnovabbli huma relattivament żgħar, u li l-ebda wieħed minnhom ma għandu aktar minn 10 % tas-sehem mis-suq.

(32)

Il-BKartA jiddikjara fil-pożizzjoni tiegħu (18) li fil-bejgħ bl-ingrossa ġenerali tal-elettriku fil-Ġermanja tipprevali pressjoni kompetittiva effettiva u li s-sinjali tal-prezzijiet bl-ingrossa huma r-riżultat ta’ kompetizzjoni effettiva. Għalhekk, il-Kummissjoni tirrikonoxxi l-eżistenza ta’ pressjoni kompetittiva mill-ġenerazzjoni u l-bejgħ bl-ingrossa tal-elettriku konvenzjonali fuq il-ġenerazzjoni u l-bejgħ bl-ingrossa tal-elettriku rinnovabbli, soġġetta għal analiżi aktar dettaljata tal-iskemi ta’ appoġġ għall-elettriku rinnovabbli.

(33)

Il-faċilitajiet għall-ġenerazzjoni tal-elettriku rinnovabbli kkummissjonati bejn l-1 ta’ Jannar 2012 u l-1 ta’ Awwissu 2014 huma eżentati mill-obbligu ta’ kummerċjalizzazzjoni diretta u jistgħu jużaw l-opzjoni tat-tariffa feed-in fissa. Skont il-BKartA, dawn l-installazzjonijiet jirċievu remunerazzjoni fissa mingħand attur mhux tas-suq (l-operaturi tal-grilji tat-trażmissjoni) u ma humiex involuti fi kwalunkwe attività tas-suq. F’konformità mal-analiżi mwettqa mill-Kummissjoni fid-Deċiżjoni tagħha tal-2012 dwar il-ġenerazzjoni u l-bejgħ bl-ingrossa tal-elettriku fil-Ġermanja, tali impjanti ma jistgħux jitqiesu li huma esposti għall-kompetizzjoni.

(34)

Impjanti żgħar ikkummissjonati fl-1 ta’ Awwissu 2014 jew wara (jiġifieri impjanti ta’ < 100 kW jew, jekk ikkummissjonati sa tmiem l-2015, ta’ < 500 kW) huma eżentati mill-obbligu ta’ kummerċjalizzazzjoni diretta u jistgħu jużaw l-opzjoni tat-tariffa feed-in fissa. Skont il-BKartA, dawn l-installazzjonijiet jirċievu remunerazzjoni fissa mingħand attur mhux tas-suq u ma humiex involuti fi kwalunkwe attività tas-suq. F’konformità mal-analiżi mwettqa mill-Kummissjoni fid-Deċiżjoni tagħha tal-2012 dwar il-ġenerazzjoni u l-bejgħ bl-ingrossa tal-elettriku fil-Ġermanja, tali impjanti ma jistgħux jitqiesu li huma esposti għall-kompetizzjoni.

(35)

Fir-rigward tal-“ħlas addizzjonali għall-elettriku mill-kerrej” jew l-elettriku li l-operatur tal-impjant ma jbigħx lill-kerrejja tiegħu, skont il-BKartA, l-operatur tal-impjant jagħżel biss il-ħlas addizzjonali għall-elettriku mill-kerrej jekk dan jippreżenta benefiċċji finanzjarji addizzjonali. Għalhekk, awtomatikament, din hija opzjoni aktar issussidjata. Il-BKartA jikkonkludi li l-impjanti tal-elettriku rinnovabbli soġġetti għall-“ħlas addizzjonali għall-elettriku mill-kerrej” ma humiex esposti direttament għall-kompetizzjoni. Il-Kummissjoni ma tidentifikax elementi li jippermettu li wieħed jitbiegħed minn din il-konklużjoni.

(36)

Għall-finijiet ta’ din id-Deċiżjoni u mingħajr preġudizzju għad-dritt dwar il-kompetizzjoni, il-fatturi deskritti hawn fuq jenħtieġ li jitqiesu bħala indikazzjoni tan-nuqqas ta’ esponiment għall-kompetizzjoni tal-ġenerazzjoni u l-bejgħ bl-ingrossa tal-elettriku rinnovabbli soġġetti għal tariffi feed-in u għal ħlas addizzjonali għall-elettriku mill-kerrejja fil-Ġermanja. Konsegwentement, peress li l-kundizzjonijiet stipulati fl-Artikolu 34 tad-Direttiva 2014/25/UE ma humiex issodisfati, jenħtieġ li jiġi stabbilit li d-Direttiva 2014/25/UE jenħtieġ li tibqa’ tapplika għall-kuntratti intenzjonati biex jippermettu t-twettiq ta’ dawn l-attivitajiet fil-Ġermanja.

(37)

L-operaturi tal-impjanti tal-EEG soġġetti għal kummerċjalizzazzjoni diretta b’valur iddeterminat legalment applikabbli jiġġeneraw dħul minn:

(38)

Fil-pożizzjoni tiegħu, il-BKartA jiddikjara li, fir-rigward tal-konsegwenzi prattiċi u ekonomiċi konkreti tiegħu, huwa deċiżiv li l-premium tas-suq jikkumpensa d-differenza bejn il-valur applikabbli speċifiku għall-impjant u l-valur tas-suq tat-teknoloġija rispettiva. Peress li ma jistax isir negattiv, għandu effett dejjem akbar fuq il-profitti tal-operatur tal-impjant jekk ikun pożittiv, jiġifieri jekk il-valur applikabbli speċifiku għall-impjant ikun ogħla mill-valur tas-suq korrispondenti. Il-BKartA wettaq analiżi taż-żewġ valuri fuq perjodu ta’ 23 xahar bejn Mejju 2020 u April 2022. Mill-1 ta’ Jannar 2021, il-valuri applikabbli ġew stabbiliti bil-liġi u huma digressivi maż-żmien b’rata ta’ bejn 0,5 u 1,5 fil-mija fis-sena. Mill-inqas sa madwar nofs is-sena 2021, il-valuri applikabbli kienu fil-biċċa l-kbira ogħla b’mod sinifikanti mill-valuri rispettivi tas-suq tal-aħħar 12-il xahar. Dan kien ifisser li tħallas premium tas-suq għoli b’mod korrispondenti, li iżola l-impjanti RES ikkonċernati mis-suq effettiv u mill-forzi kompetittivi ta’ ġenerazzjoni oħra tal-elettriku. L-impjanti li l-valur applikabbli speċifiku għall-impjant tagħhom jaqbeż il-valur normali tas-suq u li konsegwentement huma appoġġati mill-premium tas-suq iddeterminat legalment huma għalhekk, fil-fehma tal-BKartA, mhux esposti għal kompetizzjoni diretta minn impjanti oħra ta’ ġenerazzjoni.

(39)

Meta ħares lejn teknoloġiji speċifiċi, il-BKartA osserva li sa nofs l-2021, il-valuri applikabbli speċifiċi għall-impjant ta’ impjanti ġodda individwali għall-enerġija idroelettrika u għall-gass tal-landfills biss kienu taħt il-valur tas-suq tal-EPEX b’mod perċettibbli f’xi xhur. Dan applika għall-enerġija idroelettrika b’kapaċità ta’ aktar minn 50 MW f’Settembru 2020 u, minn Novembru 2020 ’il quddiem, l-enerġija idroelettrika b’kapaċità ta’ bejn 20 MW u 50 MW f’Settembru 2020 u minn Diċembru 2020 ’il quddiem, u l-enerġija idroelettrika b’kapaċità ta’ bejn 10 MW u 20 MW f’Jannar u April 2021. Dan affettwa wkoll il-gass tal-landfills b’kapaċità ta’ 1 MW sa 5 MW f’Settembru 2020 u minn Diċembru 2020 ’il quddiem, u l-gass tal-landfills b’kapaċità ta’ 5 MW jew aktar f’Novembru 2020. L-istess japplika għall-installazzjonijiet eoliċi lil hinn mill-kosta. Minn nofs l-2021, għadd kbir ta’ valuri applikabbli waqgħu taħt il-valuri rilevanti tas-suq ta’ kull xahar, u minn tmiem l-2021 dan affettwa l-maġġoranza l-kbira tal-valuri applikabbli.

(40)

Skont il-BKartA, li kieku din ix-xejra kellha tistabbilizza, il-premium tas-suq għal dawn l-impjanti ma jibqa’ jkollu l-ebda effett ekonomiku; għalhekk, dawn joperaw mingħajr restrizzjoni f’kundizzjonijiet kompetittivi tas-suq u jkunu esposti għal kompetizzjoni effettiva. Madankollu, il-BKartA jassumi xejra stabbli bħal din biss jekk il-valur applikabbli speċifiku għall-impjant jaqa’ taħt il-valur tas-suq (jew indiċi korrispondenti tal-Ftehim dwar ix-Xiri tal-Enerġija li jħares ’il quddiem) għal perjodu ta’ żmien xieraq. Perjodu bħal dan ikun ta’ 12-il xahar konsekuttiv. Il-Kummissjoni taqbel mal-BKartA li huwa xieraq li l-esponiment dirett għall-kompetizzjoni ta’ din l-attività jiġi marbut mal-fatt li l-valur applikabbli speċifiku għall-impjant waqa’ taħt il-valur tas-suq (jew indiċi korrispondenti tal-Ftehim dwar ix-Xiri tal-Enerġija li jħares ’il quddiem) għal 12-il xahar konsekuttivi.

(41)

Fir-rigward tal-kummerċjalizzazzjoni diretta bil-valur applikabbli ddeterminat permezz tal-offerti, xi karatteristiċi huma komuni għall-offerti kollha, skont il-BKartA. L-offerti tal-EEG huma kkaratterizzati minn struttura tal-offerti fuq skala żgħira. Id-daqs tal-offerti individwali huwa żgħir meta mqabbel mad-domanda fl-offerta rispettiva u ’l bogħod mil-limitu ta’ preżunzjoni għad-dominanza tas-suq skont il-liġi tal-kartell Ġermaniża. Wara dawn l-offerti, hemm struttura ta’ forniment fuq skala żgħira biżżejjed, u kważi atomistika fil-każ ta’ parks eoliċi fuq l-art u solari. Il-korp pubbliku tal-offerti huwa r-Repubblika Federali tal-Ġermanja, li hija stess ma hijiex attiva bħala offerent.

(42)

Il-BKartA jkompli jgħid li fil-każ tas-sorsi kollha tal-enerġija rinnovabbli, minħabba kunsiderazzjonijiet tal-politika dwar il-klima u fl-isfond tal-miri u l-ispeċifikazzjonijiet ta’ espansjoni politika korrispondenti, ir-reġim tal-offerti għandu l-għan li jespandi l-offerta tal-elettriku minn sorsi tal-enerġija rinnovabbli u domanda għolja b’mod korrispondenti għal proġetti eliġibbli. L-offerta attwali u potenzjali mill-offerenti fil-kuntest tal-offerta, min-naħa l-oħra, tiddependi, fost affarijiet oħra, fuq id-disponibbiltà ta’ art korrispondenti għal proġetti ġodda. L-offerti li jkopru l-impjanti eżistenti bħalissa huma prattikament rilevanti biss fis-settur tal-bijomassa. Fil-każ tal-parks eoliċi fuq l-art, diġà hemm offerti għal impjanti teknikament aġġornati b’mod sostanzjali fl-istess sit (repowering). L-offerti għal impjanti ġodda huma possibbli f’kull settur u huma l-aktar każ sinifikanti fil-prattika. Id-dħul fis-suq huwa ffaċilitat ukoll mill-fatt li l-provvista tal-elettriku rinnovabbli ma hijiex ikkaratterizzata minn użu intensiv u lokali tal-persunal. Barra minn hekk, il-kompetizzjoni għall-valuri applikabbli għall-appoġġ tal-produzzjoni tal-elettriku minn sorsi tal-enerġija rinnovabbli ma hijiex kompetizzjoni għas-suq. Għotja ma tagħtix monopolju jew pożizzjoni dominanti fis-suq downstream, peress li l-bejgħ tal-elettriku ġġenerat mill-bejgħ bl-ingrossa jseħħ f’ambjent kompetittiv bi prezzijiet iddeterminati minn mekkaniżmi tas-suq.

(43)

F’deċiżjonijiet preċedenti (25), il-Kummissjoni sostniet li l-eżistenza ta’ offerti biex jiġi ddeterminat il-livell ta’ appoġġ għall-iskemi tal-elettriku rinnovabbli kienet fattur importanti biex jiġi ddeterminat l-esponiment dirett għall-kompetizzjoni. F’dan il-każ li jikkonċerna l-Ġermanja, il-BKartA, filwaqt li jirrikonoxxi l-prattika deċiżjonali tal-Kummissjoni, jissuġġerixxi li jiġi introdott kriterju addizzjonali li jippermetti li ssir distinzjoni skont l-intensità tal-kompetizzjoni għas-sussidju fl-offerta individwali. Dan il-kriterju jista’ jkun sottoskrizzjoni żejda b’mill-inqas 25 fil-mija tal-kapaċità offruta. Il-BDEW tikkontesta l-fattibbiltà li jiġi applikat kriterju bħal dan, peress li s-sottoskrizzjoni żejda tista’ titkejjel biss wara l-offerta, filwaqt li l-entitajiet kontraenti jeħtieġ li jorganizzaw l-akkwist tagħhom stess qabel ma jipparteċipaw f’offerti bħal dawn. Dan jagħmel eżenzjoni de facto bla effett.

(44)

Fid-deċiżjonijiet preċedenti, il-Kummissjoni sostniet li proċess ta’ offerti għas-sussidji għall-ġenerazzjoni tal-elettriku rinnovabbli kien indikazzjoni ta’ esponiment għall-kompetizzjoni. Pereżempju, fid-deċiżjoni tagħha dwar in-Netherlands, il-Kummissjoni nnotat (26) li “l-allokazzjoni tas-sussidju SDE+ hija esposta għall-kompetizzjoni permezz ta’ proċess ta’ offerti, li jiddixxiplina l-imġiba tal-produtturi tal-elettriku minn sorsi rinnovabbli fir-rigward tal-politika tal-akkwist tagħhom”. Bl-istess mod, fid-Deċiżjoni 2020/1499 dwar l-Italja (27), il-Kummissjoni nnotat li l-iskemi ta’ sussidju l-aktar riċenti operaw f’ambjent kompetittiv minħabba l-għadd kbir ta’ applikanti u offerti fl-offerti rispettivi. Fid-Deċiżjoni 2020/1500 dwar il-Litwanja, il-Kummissjoni osservat (28) li l-elettriku prodott skont it-tielet skema jirċievi appoġġ ibbażat fuq il-premium stabbilit permezz ta’ proċedura kompetittiva ta’ offerti u sabet li kien espost għall-kompetizzjoni. Fl-aħħar nett, fid-deċiżjoni tagħha dwar id-Danimarka, il-Kummissjoni nnotat (29) li l-allokazzjoni tal-finanzjament pubbliku kienet esposta għall-kompetizzjoni permezz ta’ proċess ta’ offerti. F’konformità ma’ dawk id-deċiżjonijiet preċedenti, il-Kummissjoni għalhekk tqis li l-impjanti tal-elettriku rinnovabbli soġġetti għal kummerċjalizzazzjoni diretta bil-valur applikabbli ddeterminat permezz tal-offerti huma direttament esposti għall-kompetizzjoni.

(45)

Il-BKartA huwa tal-fehma li l-impjanti postsussidjati huma esposti għal kompetizzjoni diretta sa fejn jitħallsu tariffa feed-in mill-operatur tal-grilja li tammonta għall-valur tas-suq nieqes il-kostijiet tal-kummerċjalizzazzjoni b’rata fissa. Il-Kummissjoni taqbel ma’ din l-analiżi.

(46)

Skont il-BKartA, installazzjonijiet postsussidjati oħrajn tal-EEG ma għandhom l-ebda intitolament skont l-EEG. Dawn huma soġġetti għal kummerċjalizzazzjoni diretta oħra skont it-taqsima 21a tal-EEG. L-installazzjonijiet kollha tal-EEG f’kummerċjalizzazzjoni diretta oħra skont it-Taqsima 21a tal-EEG jipparteċipaw fis-suq tal-ewwel bejgħ tal-elettriku bl-istess mod bħal kwalunkwe sistema oħra ta’ ġenerazzjoni tal-elettriku mhux appoġġata skont l-EEG. Sadanittant, din il-kategorija ta’ remunerazzjoni diġà hija rilevanti għal impjanti mibnija ġodda, bħal impjanti solari mmuntati fuq l-art. Dawn l-impjanti huma esposti għal forzi kompetittivi ġenerali. Il-Kummissjoni taqbel mal-fehma li l-impjanti tal-elettriku rinnovabbli soġġetti għal kummerċjalizzazzjoni diretta oħra huma direttament esposti għall-kompetizzjoni.

(47)

Għall-finijiet ta’ din id-Deċiżjoni u mingħajr preġudizzju għad-dritt tal-kompetizzjoni, il-fatturi elenkati hawn fuq jenħtieġ li jitqiesu bħala indikazzjoni tal-esponiment għall-kompetizzjoni ta’ impjanti tal-elettriku rinnovabbli soġġetti għal kummerċjalizzazzjoni diretta b’valur legalment iddeterminat applikabbli, kummerċjalizzazzjoni diretta bil-valur applikabbli ddeterminat permezz ta’ offerti, impjanti tal-elettriku rinnovabbli qodma postsussidjati u impjanti tal-elettriku rinnovabbli soġġetti għal kummerċjalizzazzjoni diretta oħra fil-Ġermanja. Konsegwentement, peress li l-kundizzjonijiet stipulati fl-Artikolu 34 tad-Direttiva 2014/25/UE huma ssodisfati, jenħtieġ li jiġi stabbilit li d-Direttiva 2014/25/UE ma tapplikax għall-kuntratti maħsubin biex jippermettu t-twettiq ta’ dawk l-attivitajiet fil-Ġermanja.

(48)

Fid-dawl tal-fatturi eżaminati hawn fuq, il-kundizzjoni ta’ esponiment dirett għall-kompetizzjoni stabbilita fl-Artikolu 34(1) tad-Direttiva 2014/25/UE jenħtieġ li titqies li ma ġietx issodisfata fil-Ġermanja fir-rigward tal-attivitajiet relatati mal-ġenerazzjoni u l-bejgħ bl-ingrossa tal-elettriku rinnovabbli soġġetti għal tariffi feed-in u għal ħlas addizzjonali għall-elettriku mill-kerrej.

(49)

Għalhekk, jenħtieġ li d-Direttiva 2014/25/UE tkompli tapplika meta l-entitajiet kontraenti jagħtu kuntratti maħsuba biex jippermettu dawk l-attivitajiet, jew meta jiġu organizzati kompetizzjonijiet ta’ disinn għat-twettiq ta’ tali attivitajiet f’dik iż-żona ġeografika.

(50)

Fid-dawl tal-fatturi eżaminati hawn fuq, il-kundizzjoni ta’ esponiment dirett għall-kompetizzjoni stabbilita fl-Artikolu 34(1) tad-Direttiva 2014/25/UE jenħtieġ li titqies li ġiet issodisfata fil-Ġermanja fir-rigward tal-attivitajiet relatati mal-ġenerazzjoni u l-bejgħ bl-ingrossa tal-elettriku rinnovabbli soġġetti għal kummerċjalizzazzjoni diretta b’valur legalment iddeterminat applikabbli (meta l-valur applikabbli speċifiku għall-impjant jaqa’ taħt il-valur tas-suq (jew indiċi tal-Ftehim dwar ix-Xiri tal-Enerġija korrispondenti iżda li jħares ’il quddiem) għal 12-il xahar konsekuttiv), kummerċjalizzazzjoni diretta bil-valur applikabbli ddeterminat permezz ta’ offerti, kummerċjalizzazzjoni diretta oħra kif ukoll impjanti tal-elettriku rinnovabbli qodma postsussidjati.

(51)

Peress li l-kundizzjoni ta’ aċċess mhux ristrett għas-suq titqies li hija ssodisfata, jenħtieġ li d-Direttiva 2014/25/UE ma tapplikax meta l-entitajiet kontraenti jagħtu kuntratti maħsuba biex jippermettu t-twettiq ta’ dawk l-attivitajiet fil-Ġermanja, u lanqas meta jiġu organizzati kompetizzjonijiet tad-disinn għat-twettiq ta’ tali attivitajiet f’dik iż-żona ġeografika.

(52)

Din id-Deċiżjoni hija mingħajr preġudizzju għall-applikazzjoni tar-regoli dwar il-kompetizzjoni tal-Unjoni u tad-dispożizzjonijiet f’oqsma oħrajn tad-dritt tal-Unjoni. B’mod partikolari, il-kriterji u l-metodoloġija użati għall-valutazzjoni tal-esponiment dirett għall-kompetizzjoni skont l-Artikolu 34 tad-Direttiva 2014/25/UE ma humiex neċessarjament identiċi għal dawk użati sabiex titwettaq valutazzjoni skont l-Artikolu 101 jew l-Artikolu 102 tat-Trattat jew tar-Regolament tal-Kunsill (KE) Nru 139/2004 (30) kif ikkonfermat mill-Qorti Ġenerali (31),