(1)

Ir-Regolament (UE) 2016/429 jistabbilixxi r-regoli għall-prevenzjoni u l-kontroll ta’ mard trażmissibbli lejn l-annimali jew lejn il-bniedem, inklużi, fost l-oħrajn, ir-regoli għall-istabbilimenti li jżommu l-annimali terrestri u l-imfaqas, u r-regoli għat-traċċabbiltà ta’ ċerti annimali terrestri miżmuma u tal-bajd għat-tifqis fl-Unjoni. Jagħti s-setgħa wkoll lill-Kummissjoni sabiex tadotta regoli li jissupplimentaw ċerti elementi mhux essenzjali ta’ dak ir-Regolament permezz ta’ atti delegati.

(2)

Ir-Regolament Delegat tal-Kummissjoni (UE) 2019/2035 (2) jistabbilixxi regoli addizzjonali għal stabbilimenti rreġistrati u approvati għal annimali terrestri miżmuma u bajd għat-tifqis, u għat-traċċabbiltà ta’ ċerti annimali terrestri miżmuma u bajd għat-tifqis. B’mod partikolari t-Titolu II tal-Parti III ta’ dak ir-Regolament Delegat jistabbilixxi regoli dwar it-traċċabbiltà tal-annimali ovini u kaprini miżmuma, inklużi l-obbligi fuq l-operaturi fir-rigward tal-mezzi u l-metodi ta’ identifikazzjoni ta’ dawk l-annimali.

(3)

Barra minn hekk, l-Artikolu 46 tar-Regolament Delegat (UE) 2019/2035 jipprevedi ċerti derogi mir-rekwiżiti ta’ traċċabbiltà għall-annimali ovini u kaprini miżmuma stabbiliti fl-Artikolu 45 ta’ dak l-att. Dan jinkludi l-possibbiltà li l-operaturi jżommu l-annimali ovini u kaprini inqas minn 12-il xahar biex jidentifikaw l-annimali tagħhom permezz ta’ tikketta ta’ ċomba tal-widna unika elettronika fejn jidher in-numru uniku tar-reġistrazzjoni u l-kodiċi ta’ identifikazzjoni, fejn dawk l-annimali jkunu maħsuba biex jiġu ttrasportati f’biċċerija fl-istess Stat Membru, wara li jkunu għaddew minn operazzjoni ta’ assemblaġġ jew operazzjoni ta’ tismin. Wara l-adozzjoni tar-Regolament Delegat (UE) 2019/2035, il-Kummissjoni rċeviet diversi kummenti minn ċerti partijiet ikkonċernati u minn ċerti Stati Membri dwar l-implikazzjonijiet potenzjali tal-applikazzjoni ta’ dik id-deroga li kienet meqjusa ta’ piż żejjed għan-nissiela tan-nagħaġ u tal-mogħoż, b’mod partikolari meta jitqies il-prezz tas-suq baxx miksub minn dawk in-nissiela għall-annimali maqtula għall-konsum mill-bniedem. Filwaqt li jitqiesu l-kunsiderazzjonijiet stabbiliti fl-Artikolu 118(3) tar-Regolament (UE) 2016/429, iċ-ċomba tal-widna konvenzjonali jew il-faxxa tal-pastur konvenzjonali tista’ titqies li tiżgura livell suffiċjenti ta’ traċċabbiltà meta annimali ovini u kaprini żgħar miżmuma minn stabbilimenti differenti ta’ oriġini jiġu mċaqalqa, wara operazzjoni ta’ tismin, lejn biċċerija. Barra minn hekk, jista’ biss jiġi żgurat livell suffiċjenti ta’ traċċabbiltà jekk tali movimenti jiġu rreġistrati f’bażi ta’ data waħda, u għalhekk isiru fl-istess Stat Membru, li huwa wkoll rekwiżit għall-biċċa l-kbira tad-derogi l-oħra previsti fl-Artikolu 46 tar-Regolament Delegat (UE) 2019/2035.

(4)

Filwaqt li jitqiesu dawk il-kunsiderazzjonijiet, huwa xieraq li r-Regolament (UE) 2019/2035 jiġi emendat billi tiżdied deroga addizzjonali għal annimali ovini u kaprini miżmuma ta’ età żgħira, b’tali mod li ma jiġux imposti piżijiet u spejjeż sproporzjonati fuq l-operaturi, filwaqt li fl-istess ħin tiġi żgurata t-traċċabbiltà tal-annimali ovini u kaprini miżmuma u l-funzjonament bla xkiel tas-sistema ta’ identifikazzjoni u reġistrazzjoni ta’ dawk l-annimali.

(5)

Barra minn hekk, l-Artikolu 108 tar-Regolament (UE) 2016/429 jeħtieġ li l-Istati Membri jkollhom fis-seħħ sistema għall-identifikazzjoni u r-reġistrazzjoni ta’ annimali terrestri miżmuma, inklużi annimali ovini u kaprini miżmuma. Dik is-sistema jenħtieġ li jkollha proċeduri stabbiliti għat-tħaddim tajjeb tagħha, inkluż għall-ġestjoni tad-derogi, li huma applikati fl-Istati Membri. Sabiex jiġi evitat kwalunkwe riskju għas-saħħa tal-annimali, u sabiex tiġi żgurata t-traċċabbiltà tal-annimali ovini u kaprini miżmuma, meta jiġu applikati ċerti derogi previsti fl-Artikolu 46 tar-Regolament (UE) 2019/2035, jenħtieġ li jkun hemm obbligu fuq l-Istati Membri li jistabbilixxu proċeduri dwar l-applikazzjoni ta’ dawn id-derogi.

(6)

Minħabba li r-Regolament Delegat (UE) 2019/2035 japplika mill-21 ta’ April 2021, jenħtieġ li dan ir-Regolament japplika wkoll minn dik id-data,