(1)

Ir-Regolament ta’ Implimentazzjoni tal-Kummissjoni (UE) Nru 1352/2013 (2) jistabbilixxi l-formoli li jridu jintużaw biex tiġi ppreżentata applikazzjoni li titlob lill-awtoritajiet doganali jieħdu azzjoni fir-rigward ta’ oġġetti suspettati li qed jiksru dritt tal-proprjetà intellettwali msemmija fl-Artikolu 6 tar-Regolament (UE) Nru 608/2013, u biex jippreżentaw talba għal estensjoni tal-perjodu li matulu l-awtoritajiet doganali jridu jieħdu l-azzjoni msemmija fl-Artikolu 12 ta’ dak ir-Regolament (“il-formoli”).

(2)

Il-formoli jeħtieġ li jiġu adattati biex iqisu l-introduzzjoni tal-Portal tan-Negozjanti Doganali tal-UE għall-preżentazzjoni elettronika tal-formoli. Sabiex jingħata aċċess sikur għal dan il-portal, huwa importanti li l-applikanti u r-rappreżentanti tagħhom jiġu identifikati b’mod uniku. Biex dan iseħħ, in-numru tar-Reġistrazzjoni u tal-Identifikazzjoni tal-Operaturi Ekonomiċi (EORI) se jsir qasam obbligatorju fil-kaxxa għall-applikant u r-rappreżentant fil-formoli.

(3)

Is-sistema EORI diġà tipprovdi numri uniċi ta’ identifikazzjoni għall-operaturi ekonomiċi. Huwa xieraq li dik is-sistema tiġi applikata wkoll għal persuni oħra għajr l-operaturi ekonomiċi skont it-tifsira tal-Artikolu 6(1)(a) tar-Regolament Delegat tal-Kummissjoni (UE) 2015/2446/ (3).

(4)

Ir-Regolament (UE) Nru 386/2012 tal-Parlament Ewropew u tal-Kunsill (4), u b’mod partikolari l-Artikolu 2(2)(b) tiegħu, jassenja lill-Uffiċċju tal-Proprjetà Intellettwali tal-Unjoni Ewropea (EUIPO) il-kompitu li jiġbor, janalizza u jxerred data oġġettiva rilevanti, komparabbli u affidabbli dwar il-ksur tad-drittijiet tal-proprjetà intellettwali.

(5)

Skont l-Artikolu 5(1)(b) tar-Regolament (UE) Nru 386/2012, il-Kummissjoni tibgħat lill-EUIPO kull informazzjoni rilevanti pprovduta mill-Istati Membri skont l-Artikolu 31(2) tar-Regolament (UE) Nru 608/2013 u relatata mas-sospensjoni tar-rilaxx jew is-sekwestru ta’ oġġetti ssuspettati li qed jiksru d-drittijiet tal-proprjetà intellettwali.

(6)

Sabiex tkun tista’ ssir analiżi aktar fil-fond tad-data dwar il-ksur u biex jitjieb il-fehim tal-ambitu ġeografiku u tal-impatt tal-ksur, huwa importanti li s-sospensjoni tar-rilaxx u s-sekwestru ta’ tali oġġetti tkun tista’ tiġi attribwita lid-detentur tad-deċiżjoni. Malli l-formoli jiġu ppreżentati, huwa importanti wkoll li dik il-persuna tkun infurmata bil-fatt li d-data personali tiegħu jew tagħha se tiġi pprovduta lill-EUIPO, u li tagħti l-kunsens tagħha għal dak it-trasferiment tad-data. Għalhekk, il-formoli jeħtieġ li jiġu adattati skont dan.

(7)

Wara d-dħul fis-seħħ tar-Regolamenti (UE) 2016/679 (5) u (UE) 2018/1725 (6) tal-Parlament Ewropew u tal-Kunsill, se jkun hemm bżonn li r-referenzi fil-formoli għad-dispożizzjonijiet tal-protezzjoni tad-data jiġu aġġornati.

(8)

Meta jitqies li, skont l-Artikolu 31 tar-Regolament (UE) Nru 608/2013, l-iskambji kollha ta’ data dwar deċiżjonijiet marbuta ma’ applikazzjonijiet u sekwestri bejn l-Istati Membri u l-Kummissjoni jridu jsiru permezz ta’ bażi ta’ data ċentrali tal-Kummissjoni u li dik il-bażi ta’ data trid tiġi aġġustata skont il-formoli l-ġodda, l-emendi fl-Annessi I sa III tar-Regolament ta’ Implimentazzjoni (UE) Nru 1352/2013 jenħtieġ li japplikaw mill-15 ta’ Settembru 2020.

(9)

Għaldaqstant, jenħtieġ li r-Regolament ta’ Implimentazzjoni (UE) Nru 1352/2013 jiġi emendat skont dan.

(10)

Il-Kontrollur Ewropew għall-Protezzjoni tad-Data ġie kkonsultat skont l-Artikolu 42(1) tar-Regolament (UE) 2018/1725 u ta l-opinjoni tiegħu fl-24 ta’ Ġunju 2020.

(11)

Il-miżuri previsti f’dan ir-Regolament huma skont l-opinjoni tal-Kumitat tal-Kodiċi Doganali,