EUR-Lex Access to European Union law
This document is an excerpt from the EUR-Lex website
Document 32020R0105
Commission Implementing Regulation (EU) 2020/105 of 23 January 2020 making imports of certain hot rolled stainless steel sheets and coils originating in the People’s Republic of China and Indonesia subject to registration
Regolament ta’ Implimentazzjoni tal-Kummissjoni (UE) 2020/105 tat-23 ta’ Jannar 2020 li jagħmel l-importazzjonijiet ta’ ċerti pjanċi u kojls tal-azzar inossidabbli llaminati bis-sħana li joriġinaw mir-Repubblika tal-Poplu taċ-Ċina u mill-Indoneżja soġġetti għar-reġistrazzjoni
Regolament ta’ Implimentazzjoni tal-Kummissjoni (UE) 2020/105 tat-23 ta’ Jannar 2020 li jagħmel l-importazzjonijiet ta’ ċerti pjanċi u kojls tal-azzar inossidabbli llaminati bis-sħana li joriġinaw mir-Repubblika tal-Poplu taċ-Ċina u mill-Indoneżja soġġetti għar-reġistrazzjoni
C/2020/231
ĠU L 19, 24.1.2020, p. 10–14
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
24.1.2020 |
MT |
Il-Ġurnal Uffiċjali tal-Unjoni Ewropea |
L 19/10 |
REGOLAMENT TA’ IMPLIMENTAZZJONI TAL-KUMMISSJONI (UE) 2020/105
tat-23 ta’ Jannar 2020
li jagħmel l-importazzjonijiet ta’ ċerti pjanċi u kojls tal-azzar inossidabbli llaminati bis-sħana li joriġinaw mir-Repubblika tal-Poplu taċ-Ċina u mill-Indoneżja soġġetti għar-reġistrazzjoni
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2016/1037 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet sussidjati minn pajjiżi mhux membri tal-Unjoni Ewropea (1) (“ir-Regolament bażiku”) u, b’mod partikolari, l-Artikolu 24(5) tiegħu,
Wara li informat lill-Istati Membri,
Billi:
(1) |
Fl-10 ta’ Ottubru 2019, il-Kummissjoni Ewropea (“il-Kummissjoni”) ħabbret, permezz ta’ avviż ippubblikat f’Il-Ġurnal Uffiċjali tal-Unjoni Ewropea (2) (“in-notifika ta’ bidu”), il-bidu ta’ proċediment antisussidji (“il-proċediment”) fir-rigward ta’ importazzjonijiet fl-Unjoni ta’ ċerti pjanċi u kojls tal-azzar inossidabbli llaminati bis-sħana li joriġinaw mir-Repubblika tal-Poplu taċ-Ċina (“ir-RPĊ”) u mill-Indoneżja wara lment imressaq fis-26 ta’ Awwissu 2019 mill-Eurofer, l-Assoċjazzjoni Ewropea tal-Azzar (“l-ilmentatur”) f’isem erba’ produtturi tal-Unjoni li jirrappreżentaw il-produzzjoni totali tal-Unjoni ta’ ċerti pjanċi u kojls tal-azzar inossidabbli llaminati bis-sħana. |
(2) |
Fit-12 ta’ Awwissu 2019, il-Kummissjoni Ewropea kienet diġà ħabbret il-bidu ta’ investigazzjoni anti-dumping fir-rigward tal-importazzjonijiet lejn l-Unjoni Ewropea tal-istess prodott li joriġina mir-RPĊ, mit-Tajwan u mill-Indoneżja (3) (“il-proċediment anti-dumping parallel”) skont l-Artikolu 5 tar-Regolament (UE) 2016/1036 tal-Parlament Ewropew u tal-Kunsill (4) (“ir-Regolament anti-dumping bażiku”). |
1. PRODOTT IKKONĊERNAT U PRODOTT SIMILI
(3) |
Il-prodott soġġett għal reġistrazzjoni (“il-prodott ikkonċernat”) huwa prodotti tal-azzar inossidabbli ċatti rrumblati, kemm jekk ikunu f’kojls u kemm jekk ma jkunux (inklużi l-prodotti maqtugħin skont id-daqs u li jkunu strixxi dojoq), li ma jibqgħux jinħadmu wara li jiġu llaminati bis-sħana u li jeskludu prodotti, mhux f’kojl, b’wisa’ ta’ 600 mm jew aktar u ta’ ħxuna li taqbeż 10 mm. Dawn il-prodotti bħalissa jaqgħu taħt il-kodiċijiet SA 7219 11, 7219 12, 7219 13, 7219 14, 7219 22, 7219 23, 7219 24, 7220 11 u 7220 12. Dawn il-kodiċijiet SA qed jingħataw biss għall-informazzjoni. |
2. TALBA
(4) |
Fl-ilment tiegħu, l-ilmentatur diġà talab ir-reġistrazzjoni tal-importazzjonijiet. Fil-31 ta’ Ottubru 2019, l-ilmentatur ippreżenta talba ta’ reġistrazzjoni separata, fir-rigward tal-importazzjonijiet li huma soġġetti għal dan il-proċediment skont l-Artikolu 24(5) tar-Regolament bażiku. L-ilmentatur talab li l-importazzjonijiet tal-prodott ikkonċernat isiru soġġetti għar-reġistrazzjoni sabiex sussegwentement ikunu jistgħu jiġu applikati miżuri kontra dawk l-importazzjonijiet mid-data ta’ tali reġistrazzjoni. Komunikazzjoni ulterjuri b’appoġġ għal din it-talba ġiet ippreżentata fit-22 ta’ Novembru u fl-10 ta’ Diċembru 2019. |
(5) |
Fl-14 ta’ Novembru 2019, Marcegaglia Specialties (“Marcegaglia”), utent tal-prodott ikkonċernat, li qed jikkoopera fil-proċediment antisussidji, ippreżenta kummenti fir-rigward tat-talba tal-ilmentatur għar-reġistrazzjoni tal-importazzjonijiet. |
3. RAĠUNIJIET għar-reġistrazzjoni
(6) |
Skont l-Artikolu 24(5) tar-Regolament bażiku, il-Kummissjoni tista’ titlob lill-awtoritajiet tad-dwana jieħdu l-passi meħtieġa għar-reġistrazzjoni tal-importazzjonijiet, sabiex il-miżuri jkunu jistgħu jiġu sussegwentement applikati fuq dawk l-importazzjonijiet mid-data ta’ dik ir-reġistrazzjoni. L-importazzjonijiet jistgħu jsiru soġġetti għar-reġistrazzjoni wara talba mill-industrija tal-Unjoni li jkun fiha biżżejjed evidenza biex tiġġustifika din l-azzjoni. |
(7) |
Skont l-ilmentatur ir-reġistrazzjoni hija ġġustifikata peress li l-prodott ikkonċernat li joriġina mir-RPĊ u mill-Indoneżja qed ikun oġġett ta’ dumping. Huwa rraġuna li qed ikun ikkawżat dannu sinifikanti għall-industrija tal-Unjoni b’żieda rapida ta’ importazzjonijiet bi prezzijiet baxxi li se jdgħajfu l-effett ta’ rimedju tad-dazji definittivi potenzjali billi jippermetti l-ħżin eċċessiv. |
(8) |
Il-Kummissjoni eżaminat it-talba fid-dawl tal-Artikolu 16(4) tar-Regolament bażiku. Il-Kummissjoni vverifikat jekk hemmx ċirkustanzi kritiċi fejn, għall-prodott issussidjat inkwistjoni, l-importazzjonijiet massivi f’perjodu relattivament qasir ta’ prodott li jibbenefika minn sussidji kumpensabbli jikkawżawx dannu li jkun diffiċli jiġi rimedjat u jekk huwiex meqjus meħtieġ li jiġu vvalutati dazji kumpensatorji b’mod retrospettiv fuq dawn l-importazzjonijiet sabiex tiġi evitata r-rikorrenza ta’ dan id-dannu. |
3.1. Sussidju tal-prodott ikkonċernat
(9) |
Il-Kummissjoni għandha għad-dispożizzjoni tagħha biżżejjed evidenza li l-importazzjonijiet tal-prodott ikkonċernat mir-RPĊ u mill-Indoneżja qed ikunu ssussidjati. |
(10) |
Fir-rigward tar-RPĊ, il-prattiki ta’ sussidju allegati jikkonsistu speċifikament fi trasferiment dirett ta’ fondi, dħul tal-gvern mitluf jew mhux miġbur, u forniment ta’ prodotti jew servizzi mill-gvern għal remunerazzjoni inqas minn adegwata. Dan jinkludi, pereżempju, self preferenzjali u l-provvista ta’ linji ta’ kreditu minn banek tal-Istat, programmi ta’ sussidju ta’ krediti għall-esportazzjoni, garanziji ta’ esportazzjoni u assigurazzjonijiet u programmi ta’ għotjiet; tnaqqis fit-taxxa għal Impriżi tat-Teknoloġija Avvanzata u Ġdida, kumpens fiskali għal riċerka u żvilupp, deprezzament aċċellerat ta’ tagħmir użat minn intrapriżi tat-Teknoloġija Avvanzata għal żvilupp u produzzjoni ta’ Teknoloġija Avvanzata, eżenzjoni mid-dividendi bejn intrapriżi residenti kkwalifikati, tnaqqis tat-taxxa minn ras il-għajn għal dividendi minn intrapriżi Ċiniżi b’investiment barrani lill-kumpaniji omm mhux Ċiniżi tagħhom, eżenzjonijiet mit-taxxa fuq l-użu tal-art u rifużjoni tat-taxxa fuq l-esportazzjoni; u l-forniment mill-gvern ta’ art u enerġija għal remunerazzjoni inqas milli adegwat. |
(11) |
Fir-rigward tal-Indoneżja, il-prattiki ta’ sussidju allegati jikkonsistu speċifikament fi trasferiment dirett ta’ fondi, dħul tal-gvern mitluf jew mhux miġbur, u forniment ta’ prodotti jew servizzi mill-gvern għal remunerazzjoni inqas minn adegwata. Dan jinkludi, pereżempju, self preferenzjali ta’ poloz u benefiċċji fiskali skont il-liġijiet Indoneżjani u eżenzjoni mid-dazju tal-importazzjoni fuq l-importazzjoni ta’ materja prima u tagħmir ta’ produzzjoni. |
(12) |
Huwa allegat li dawk il-miżuri huma sussidji peress li jinvolvu kontribuzzjoni finanzjarja mill-Gvern tar-RPĊ mill-Gvern tal-Indoneżja jew minn gvernijiet reġjonali jew lokali oħra (inklużi korpi pubbliċi) u jikkonferixxu benefiċċju lill-produtturi esportaturi tal-prodott ikkonċernat. Huwa allegat li dawn huma kontinġenti fuq il-prestazzjoni tal-esportazzjoni u/jew fuq l-użu ta’ prodotti domestiċi minflok ta’ dawk importati u/jew huma limitati għal ċerti setturi u/jew għal ċerti tipi ta’ intrapriżi u/jew postijiet, u għalhekk huma speċifiċi u kumpensabbli. |
(13) |
L-evidenza tas-sussidjar tqiegħdet għad-dispożizzjoni fil-verżjoni miftuħa tal-ilment u kompliet tiġi analizzata fil-memorandum dwar is-suffiċjenza tal-evidenza. |
(14) |
Għalhekk, f’dan l-istadju l-evidenza disponibbli x’aktarx li tindika li l-esportazzjonijiet tal-prodott ikkonċernat qed jibbenefikaw minn sussidji kumpensabbli. |
3.2. L-eżistenza ta’ importazzjonijiet massivi f’perjodu relattivament qasir
(15) |
Fl-ilment u l-preżentazzjonijiet sussegwenti relatati mat-talba ta’ reġistrazzjoni, l-evidenza rigward il-volum tal-importazzjonijiet turi żieda kbira fl-importazzjonijiet f’termini assoluti u f’termini tas-sehem mis-suq fil-perjodu bejn l-2015 u Ġunju 2019. B’mod speċifiku, l-evidenza pprovduta fl-ilment turi li l-esportaturi Ċiniżi u Indoneżjani żiedu sew il-volum tal-bejgħ tal-prodott ikkonċernat lejn l-Unjoni, u dan wassal għal żieda qawwija fis-sehem mis-suq għal 28,7 % fit-tieni nofs tal-2018. |
(16) |
Analiżi tal-evoluzzjoni tal-importazzjonijiet għall-perjodu sħiħ ikkunsidrat u ta’ wara l-bidu, jiġifieri l-addizzjoni tad-data ta’ Surveillance 2 li tkopri l-prodott speċifiku kkonċernat mad-data tal-ilment, ma tissuġġerix li ż-żieda massiva fl-importazzjonijiet waqfet: Il-volumi ta’ importazzjoni mill-pajjiżi konċernati (f’tunnellati)
|
(17) |
Abbażi ta’ din id-data statistika, il-Kummissjoni sabet li l-importazzjonijiet massivi mill-pajjiżi kkonċernati ġew ikkonfermati anke fix-xahrejn mill-bidu tal-investigazzjoni, jiġifieri matul Ottubru u Novembru 2019, meta l-volum medju ta’ kull xahar tal-importazzjonijiet matul dawn ix-xhur kien 12 % ogħla mil-livell għoli li kien ġie osservat fil-perjodu ta’ investigazzjoni. Id-data statistika disponibbli għall-Kummissjoni wara l-bidu tal-investigazzjoni turi xejra dejjem tikber ta’ volumi ta’ importazzjoni mill-pajjiżi kkonċernati. Dawn iż-żidiet, flimkien mal-ishma mis-suq rispettivi taż-żewġ pajjiżi esportaturi matul il-perjodu kkunsidrat, jammontaw għal importazzjonijiet massivi f’perjodu relattivament qasir ta’ żmien, fis-sens tal-Artikolu 16(4) tar-Regolament bażiku. |
3.3. Id-dannu, li huwa diffiċli jiġi rimedjat, huwa kkawżat minn dawn l-importazzjonijiet
(18) |
Barra minn hekk, il-Kummissjoni għandha għad-dispożizzjoni tagħha biżżejjed evidenza li l-prattiki ta’ sussidju tal-esportaturi qed jikkawżaw dannu materjali għall-industrija tal-Unjoni. Il-volum u l-prezzijiet tal-importazzjonijiet tal-prodott ikkonċernat kellhom impatt negattiv fuq il-kwantitajiet mibjugħa u fuq il-livell tal-prezzijiet mitluba fis-suq tal-Unjoni u s-sehem mis-suq li kellha l-industrija tal-Unjoni. Dan qed jirriżulta f’effetti negattivi sostanzjali fuq il-prestazzjoni ġenerali u l-qagħda finanzjarja tal-industrija tal-Unjoni. L-evidenza dwar il-fatturi ta’ dannu stabbiliti fl-Artikolu 8(4) tar-Regolament bażiku tikkonsisti f’data li tinsab fl-ilment u l-preżentazzjonijiet sussegwenti rigward ir-reġistrazzjoni u hija sostnuta minn data disponibbli pubblikament mill-Eurostat. L-ilment fost l-oħrajn wera li l-bejgħ tal-industrija tal-Unjoni lil partijiet mhux relatati kien naqas b’6 % mill-2015 sal-2018, li s-sehem mis-suq tagħha f’dak il-perjodu kien naqas b’4,3 % u li l-profittabbiltà fl-2018 kienet baxxa u inqas minn nofs il-profittabilità miksuba fl-2017. Barra minn hekk, il-profittabbiltà kienet naqset b’mod drammatiku matul l-2018 u kienet biss 2,2 % matul it-tieni nofs ta’ dik is-sena. L-ilment wera wkoll li r-rata tal-impjieg naqset bi 3 % mill-2015 ’l hawn. |
(19) |
Barra minn hekk, fit-talba ta’ reġistrazzjoni tiegħu, l-ilmentatur ġibed l-attenzjoni għall-fatt li s-sitwazzjoni ta’ deterjorament rapidu tal-industrija tal-Unjoni osservata fl-ilment matul it-tieni nofs tal-2018 kompliet fl-ewwel nofs tal-2019, bi tnaqqis ulterjuri fil-livelli ta’ produzzjoni u aktar twaqqigħ tal-prezzijiet minħabba l-importazzjonijiet. Fit-talba tiegħu ta’ reġistrazzjoni, l-ilmentatur ipprovda wkoll evidenza li turi li minn dak iż-żmien ’l hawn is-sitwazzjoni marret mill-ħażin għall-agħar, fost l-oħrajn billi indika erba’ avviżi importanti ta’ ristrutturar ta’ tipi differenti mid-diversi manifatturi tal-Unjoni minn Lulju 2019, li kellhom impatt fuq l-impjiegi ta’ mijiet ta’ ħaddiema tagħhom. Tnejn minn dawn l-avviżi kienu saħansitra f’Ottubru 2019. |
(20) |
Barra minn hekk, f’dan l-istadju l-Kummissjoni kkalkulat jekk kienx diffiċli li d-dannu mġarrab jiġi rimedjat. Ladarba l-fornituri Ċiniżi u Indoneżjani jkunu integrati fil-katini ta’ provvista tal-klijenti tal-industrija tal-Unjoni, dawn tal-aħħar jaf ma jkunux iridu jibdlu l-fornituri tagħhom favur il-produtturi tal-Unjoni. Barra dan, il-klijenti tal-industrija tal-Unjoni x’aktarx li ma jaċċettawx prezzijiet ogħla mill-industrija tal-Unjoni anki jekk, b’mod ipotetiku, il-Kummissjoni kellha timponi miżuri kumpensatorji mingħajr effett retroattiv fil-futur. Din it-theddida ta’ telf permanenti tas-sehem mis-suq jew ta’ tnaqqis mid-dħul tikkostitwixxi dannu li huwa diffiċli li jiġi rimedjat. |
3.4. Preklużjoni ta’ rikorrenza tad-dannu
(21) |
Fl-aħħar nett, minħabba d-data stabbilita fit-taqsima 3.3 hawn fuq, il-Kummissjoni qieset li kien hemm bżonn li tħejji l-impożizzjoni retroattiva potenzjali tal-miżuri billi timponi reġistrazzjoni sabiex tipprekludi r-rikorrenza ta’ dannu bħal dan. Tabilħaqq, il-kundizzjonijiet tas-suq ta’ wara l-PI pjuttost jikkonfermaw li s-sitwazzjoni tal-industrija domestika diġà kienet qed tiddeterjora minħabba ż-żieda sinifikanti fl-importazzjonijiet sussidjati bi prezzijiet baxxi. |
4. PROĊEDURA
(22) |
Għaldaqstant, il-Kummissjoni kkonkludiet li hemm biżżejjed evidenza sabiex tiġġustifika li l-importazzjonijiet tal-prodott ikkonċernat ikunu soġġetti għal reġistrazzjoni skont l-Artikolu 24(5) tar-Regolament bażiku. |
(23) |
Il-partijiet interessati kollha huma mistiedna jippreżentaw il-fehmiet tagħhom bil-miktub u jipprovdu evidenza ta’ sostenn. Barra minn hekk, il-Kummissjoni tista’ tisma’ lill-partijiet interessati, bil-kundizzjoni li jagħmlu talba bil-miktub u juru li hemm raġunijiet partikolari għalfejn jeħtieġ li jinstemgħu. |
5. REĠISTRAZZJONI
(24) |
Skont l-Artikolu 24(5) tar-Regolament bażiku l-importazzjonijiet tal-prodott ikkonċernat jeħtieġ li jkunu soġġetti għar-reġistrazzjoni bl-iskop li jiżguraw li, jekk l-investigazzjoni tirriżulta f’konklużjonijiet li jwasslu għall-impożizzjoni ta’ dazji kompensatorji, dawn id-dazji jistgħu, jekk il-kundizzjonijiet neċessarji jintlaħqu, jiġu imposti b’mod retroattiv fuq l-importazzjonijiet irreġistrati f’konformità mad-dispożizzjonijiet legali applikabbli. |
(25) |
Kull responsabbiltà futura tiġi minn x’jirriżulta mill-investigazzjoni antisussidju. |
(26) |
F’dan l-istadju tal-investigazzjoni għadu mhuwiex possibbli li jiġi stmat l-ammont ta’ sussidju fir-RPĊ u fl-Indoneżja. L-ilment ma jipprevedix stima eżatta tal-ammont ta’ sussidju, li normalment jeħtieġ jintuża bħala l-bażi biex jiġu stabbiliti d-dazji kompensatorji. L-ilment jinkludi biss stima tal-livell ta’ eliminazzjoni tad-dannu ta’ 29,1 % għar-RPĊ u 39,8 % għall-Indoneżja. F’konformità mar-raba’ paragrafu tal-Artikolu 15(1) tar-Regolament bażiku, dan l-ammont stmat ta’ responsabbiltà jkun rilevanti biss f’każ li dazju bbażat fuq l-ammont ta’ sussidji kompensatorji jkun ogħla u l-Kummissjoni tikkonkludi b’mod ċar li mhuwiex fl-interess tal-Unjoni li timponi dan id-dazju ogħla. |
6. IPPROĊESSAR TA’DATA PERSONALI
(27) |
Kull data personali miġbura fil-kuntest ta’ din ir-reġistrazzjoni se tiġi trattata skont ir-Regolament (UE) 2018/1725 tal-Parlament Ewropew u tal-Kunsill (6), |
ADOTTAT DAN IR-REGOLAMENT:
Artikolu 1
L-awtoritajiet doganali huma b’dan ordnati, skont l-Artikolu 24(5) tar-Regolament (UE) 2016/1037, biex jieħdu l-passi xierqa biex jirreġistraw l-importazzjonijiet fl-Unjoni ta’ prodotti tal-azzar inossidabbli ċatti rrumblati, kemm jekk ikunu f’kojls u kemm jekk ma jkunux (inklużi l-prodotti maqtugħin skont id-daqs u li jkunu strixxi dojoq), li ma jibqgħux jinħadmu wara li jiġu llaminati bis-sħana u li jeskludu prodotti, mhux f’kojl, b’wisa’ ta’ 600 mm jew aktar u ta’ ħxuna li taqbeż 10 mm. li bħalissa jaqgħu taħt il-kodiċijiet SA 7219 11, 7219 12, 7219 13, 7219 14, 7219 22, 7219 23, 7219 24, 7220 11 and 7220 12 u li joriġinaw mir-Repubblika tal-Poplu taċ-Ċina u mill-Indoneżja.
Ir-reġistrazzjoni għandha tiskadi disa’ xhur wara d-data tad-dħul fis-seħħ ta’ dan ir-Regolament.
Il-partijiet interessati kollha huma mistiedna jippreżentaw il-fehmiet tagħhom bil-miktub, jipprovdu evidenza ta’ sostenn jew jitolbu li jinstemgħu fi żmien 21 jum mid-data tal-pubblikazzjoni ta’ dan ir-Regolament.
Artikolu 2
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u jkun direttament applikabbli fl-Istati Membri kollha.
Magħmul fi Brussell, it-23 ta’ Jannar 2020.
Għall-Kummissjoni
Il-President
Ursula vON DER LEYEN
(1) ĠU L 176, 30.6.2016, p. 55.
(2) Notifika ta’ bidu ta’ proċediment kontra s-sussidji li jikkonċerna l-importazzjonijiet ta’ ċerti pjanċi u kojls tal-azzar inossidabbli llaminati bis-sħana li joriġinaw mir-Repubblika tal-Poplu taċ-Ċina u mill-Indoneżja (2019/C 342/09) (ĠU C 342, 10.10.2019, p. 18).
(3) Notifika ta’ bidu ta’ proċediment anti-dumping li jikkonċerna l-importazzjonijiet ta’ ċerti pjanċi u kojls tal-azzar inossidabbli llaminati bis-sħana li joriġinaw mir-Repubblika tal-Poplu taċ-Ċina, mit-Tajwan u mill-Indoneżja (2019/C 269 I/01) (ĠU C 269, 12.8.2019, p. 1).
(4) Ir-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (ĠU L 176, 30.6.2016, p. 21).
(5) Ottubru 2019 – Novembru 2019.
(6) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, il-korpi, l-uffiċċji u l-aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).