EUR-Lex Access to European Union law
This document is an excerpt from the EUR-Lex website
Document 32020D1705
Council Decision (EU) 2020/1705 of 23 October 2020 on the signing, on behalf of the European Union, of a Protocol to the Agreement on the international occasional carriage of passengers by coach and bus (Interbus Agreement) regarding the international regular and special regular carriage of passengers by coach and bus
Deċiżjoni tal-Kunsill (UE) 2020/1705 tat-23 ta’ Ottubru 2020 dwar l-iffirmar, f’isem l-Unjoni Ewropea, ta’ Protokoll għall-Ftehim dwar it-trasport okkażjonali internazzjonali tal-passiġġieri bil-kowċ u bix-xarabank (il-Ftehim Interbus) rigward it-trasport internazzjonali regolari u regolari speċjali tal-passiġġieri bil-kowċ u bix-xarabank
Deċiżjoni tal-Kunsill (UE) 2020/1705 tat-23 ta’ Ottubru 2020 dwar l-iffirmar, f’isem l-Unjoni Ewropea, ta’ Protokoll għall-Ftehim dwar it-trasport okkażjonali internazzjonali tal-passiġġieri bil-kowċ u bix-xarabank (il-Ftehim Interbus) rigward it-trasport internazzjonali regolari u regolari speċjali tal-passiġġieri bil-kowċ u bix-xarabank
ĠU L 385, 17.11.2020, p. 1–2
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
17.11.2020 |
MT |
Il-Ġurnal Uffiċjali tal-Unjoni Ewropea |
L 385/1 |
DEĊIŻJONI TAL-KUNSILL (UE) 2020/1705
tat-23 ta’ Ottubru 2020
dwar l-iffirmar, f’isem l-Unjoni Ewropea, ta’ Protokoll għall-Ftehim dwar it-trasport okkażjonali internazzjonali tal-passiġġieri bil-kowċ u bix-xarabank (il-Ftehim Interbus) rigward it-trasport internazzjonali regolari u regolari speċjali tal-passiġġieri bil-kowċ u bix-xarabank
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 91, flimkien mal-Artikolu 218(5) tiegħu,
Wara li kkunsidra l-proposta mill-Kummissjoni Ewropea,
Billi:
(1) |
Permezz tad-Deċiżjoni tal-Kunsill 2002/917/KE (1), fit-3 ta’ Ottubru 2002 ġie konkluż, f’isem l-Unjoni, il-Ftehim dwar it-trasport okkażjonali internazzjonali tal-passiġġieri bil-kowċ u bix-xarabank (il-Ftehim Interbus) (2) u dan daħal fis-seħħ fl-1 ta’ Jannar 2003 (3). |
(2) |
Fis-16 ta’ Lulju 2018, il-Kunsill adotta d-Deċiżjoni (UE) 2018/1195 (4) dwar l-iffirmar tal-Protokoll għall-Ftehim Interbus rigward is-servizzi internazzjonali regolari u regolari speċjali (‘il-Protokoll’). |
(3) |
Il-Protokoll kien miftuħ għall-iffirmar mis-16 ta’ Lulju 2018 sas-16 ta’ April 2019 u ġie ffirmat mill--Unjoni fil-11 ta’ April 2019. L-ebda parti kontraenti oħra għall-Ftehim Interbus (‘Parti Kontraenti’) ma ffirmat dak il-Protokoll qabel ma skada l-perijodu għall-iffirmar. Għaldaqstant, il-Protokoll ma daħalx fis-seħħ. |
(4) |
Fit-18 ta’ Frar 2020, il-Kunsill awtorizza lill-Kummissjoni tiftaħ negozjati għall-emendar tal-Protokoll sabiex isiru ċerti bidliet tekniċi rigward l-iffirmar u d-dħul fis-seħħ tiegħu, u biex tiġi riflessa l-bidla fl-isem ta’ Parti Kontraenti waħda. |
(5) |
In-negozjati għall-emendar tal-Protokoll ġew konklużi b’suċċess. Ġiet stabbilita skadenza ġdida ta’ sentejn għall-iffirmar tal-Protokoll. Barra minn hekk, il-Protokoll ġie emendat biex id-dħul fis-seħħ tiegħu jkun jirrikjedi l-approvazzjoni jew ir-ratifika minn numru iżgħar ta’ Partijiet Kontraenti, u perijodu ta’ stennija iqsar wara tali approvazzjoni jew ratifika, minn kif speċifikat fil-Ftehim Interbus. Barra minn hekk, il-bidla fl-isem l-Eks Repubblika Jugoslava tal-Maċedonja, li saret ir-Repubblika tal-Maċedonja ta’ Fuq, ġiet riflessa fil-Protokoll. |
(6) |
Għal raġunijiet ta’ ċarezza u sabiex jiġu ffaċilitati l-iffirmar u d-dħul fis-seħħ minnufih ta’ protokoll, huwa xieraq li jitħejja Protokoll ġdid dwar it-trasport internazzjonali regolari u regolari speċjali tal-passiġġieri bil-kowċ u bix-xarabank (il-‘Protokoll il-ġdid’) biex jirrifletti l-emendi miftiehema u jissostitwixxi l-Protokoll li kien miftuħ għall-iffirmar sas-16 ta’ April 2019. |
(7) |
Il-Protokoll il-ġdid jenħtieġ li jiffaċilita l-provvista tat-trasport internazzjonali regolari u regolari speċjali tal-passiġġieri bil-kowċ u bix-xarabank bejn il-Partijiet Kontraenti u għaldaqstant jagħti lok għal titjib fil-kollegamenti tat-trasport tal-passiġġieri bejniethom. |
(8) |
Sabiex tiġu ffaċilitata l-applikazzjoni tal-Protokoll il-ġdid, u b’mod partikolari l-operat tal-Kumitat Konġunt stabbilit permezz tal-Artikolu 18 tiegħu, il-Protokoll il-ġdid, fil-biċċa l-kbira tiegħu, jirrifletti d-dispożizzjonijiet stabbiliti mill-Ftehim Interbus. |
(9) |
Sabiex il-benefiċċji tiegħu ma jiddewmux wisq, il-Protokoll il-ġdid jipprevedi d-dħul fis-seħħ tiegħu, għall-Partijiet Kontraenti li jkunu ffirmawh u approvawh jew irratifikawh, meta tliet Partijiet Kontraenti, inkluż l-Unjoni, ikunu iffirmawh u approvawh jew irratifikawh. |
(10) |
Għalhekk, il-Protokoll il-ġdid jenħtieġ li jiġi ffirmat f’isem l-Unjoni, soġġett għall-konklużjoni tiegħu f’data iktar tard, |
ADOTTA DIN ID-DEĊIŻJONI:
Artikolu 1
L-iffirmar tal-Protokoll għall-Ftehim dwar it-trasport okkażjonali internazzjonali tal-passiġġieri bil-kowċ u bix-xarabank (il-Ftehim Interbus) rigward it-trasport internazzjonali regolari u regolari speċjali tal-passiġġieri bil-kowċ u bix-xarabank, li jissostitwixxi l-Protokoll għall-Ftehim Interbus li kien miftuħ għall-iffirmar bejn is-16 ta’ Lulju 2018 u s-16 ta’ April 2019, huwa b’dan approvat f’isem l-Unjoni, soġġett għall-konklużjoni tiegħu (5).
Artikolu 2
Il-President tal-Kunsill huwa b’dan awtorizzat jaħtar lill-persuna jew persuni li jkollhom is-setgħa li jiffirmaw il-Protokoll f’isem l-Unjoni.
Artikolu 3
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fil-Lussemburgu, it-23 ta’ Ottubru 2020.
Għall-Kunsill
Il-President
S. SCHULZE
(1) Id-Deċiżjoni tal-Kunsill 2002/917/KE tat-3 ta’ Ottubru 2002 dwar il-konklużjoni tal-Ftehim Interbus dwar it-trasport okkażjonali internazzjonali tal-passiġġieri bil-coach u bix-xarabank (ĠU L 321, 26.11.2002, p. 11).
(2) ĠU L 321, 26.11.2002, p. 13.
(3) ĠU L 321, 26.11.2002, p. 44.
(4) Id-Deċiżjoni tal-Kunsill (UE) 2018/1195 tas-16 ta’ Lulju 2018 dwar l-iffirmar, f’isem l-Unjoni Ewropea, ta’ Protokoll għall-Ftehim dwar it-trasport okkażjonali internazzjonali ta’ passiġġieri bil-kowċ u bix-xarabank (Ftehim Interbus) fir-rigward tat-trasport internazzjonali regolari u regolari speċjali ta’ passiġġieri bil-kowċ u bix-xarabank (ĠU L 214, 23.8.2018, p. 3).
(5) It-test tal-Protokoll se jiġi ppubblikat flimkien mad-Deċiżjoni dwar il-konklużjoni tiegħu.