This document is an excerpt from the EUR-Lex website
Document 32020D1308
Commission Implementing Decision (EU) 2020/1308 of 21 September 2020 determining, for a limited period of time, that the regulatory framework applicable to central counterparties in the United Kingdom of Great Britain and Northern Ireland is equivalent, in accordance with Regulation (EU) No 648/2012 of the European Parliament and of the Council (notified under document C(2020) 6539) (Text with EEA relevance)
Deċiżjoni ta’ Implimentazzjoni tal-Kummissjoni (UE) 2020/1308 tal-21 ta’ Settembru 2020 li tiddetermina, għal perjodu ta' żmien limitat, li l-qafas regolatorju applikabbli għall-kontropartijiet ċentrali fir-Renju Unit tal-Gran Brittanja u l-Irlanda ta' Fuq huwa ekwivalenti, f’konformità mar-Regolament (UE) Nru 648/2012 tal-Parlament Ewropew u tal-Kunsill (notifikata bid-dokument C(2020) 6539) (Test b’rilevanza għaż-ŻEE)
Deċiżjoni ta’ Implimentazzjoni tal-Kummissjoni (UE) 2020/1308 tal-21 ta’ Settembru 2020 li tiddetermina, għal perjodu ta' żmien limitat, li l-qafas regolatorju applikabbli għall-kontropartijiet ċentrali fir-Renju Unit tal-Gran Brittanja u l-Irlanda ta' Fuq huwa ekwivalenti, f’konformità mar-Regolament (UE) Nru 648/2012 tal-Parlament Ewropew u tal-Kunsill (notifikata bid-dokument C(2020) 6539) (Test b’rilevanza għaż-ŻEE)
C/2020/6539
ĠU L 306, 21.9.2020, p. 1–5
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 30/06/2022
21.9.2020 |
MT |
Il-Ġurnal Uffiċjali tal-Unjoni Ewropea |
L 306/1 |
DEĊIŻJONI TA’ IMPLIMENTAZZJONI TAL-KUMMISSJONI (UE) 2020/1308
tal-21 ta’ Settembru 2020
li tiddetermina, għal perjodu ta' żmien limitat, li l-qafas regolatorju applikabbli għall-kontropartijiet ċentrali fir-Renju Unit tal-Gran Brittanja u l-Irlanda ta' Fuq huwa ekwivalenti, f’konformità mar-Regolament (UE) Nru 648/2012 tal-Parlament Ewropew u tal-Kunsill
(notifikata bid-dokument C(2020) 6539)
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 648/2012 tal-Parlament Ewropew u tal-Kunsill tal-4 ta' Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet (1) u b'mod partikolari l-Artikolu 25(6) tiegħu,
Billi:
(1) |
Fid-29 ta’ Marzu 2017, ir-Renju Unit tal-Gran Brittanja u l-Irlanda ta’ Fuq (“ir-Renju Unit”) ressaq in-notifika tal-intenzjoni tiegħu li jirtira mill-Unjoni skont l-Artikolu 50 tat-Trattat dwar l-Unjoni Ewropea. Fis-17 ta’ Ottubru 2019, l-Unjoni u r-Renju Unit laħqu ftehim dwar il-Ftehim dwar il-Ħruġ (2), bi Protokoll rivedut dwar l-Irlanda u l-Irlanda ta’ Fuq u Dikjarazzjoni Politika riveduta (3). Skont dak il-ftehim u wara r-ratifika tiegħu mill-House of Commons fir-Renju Unit, l-adozzjoni tiegħu mill-Parlament Ewropew u l-konklużjoni tiegħu mill-Kunsill, ir-Renju Unit sar pajjiż terz fl-1 ta’ Frar 2020 u d-dritt tal-Unjoni mhux se jibqa’ japplika għar-Renju Unit u fih fil-31 ta’ Diċembru 2020. |
(2) |
Kif imħabbar fil-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni tal-9 ta’ Lulju 2020, “Inlestu għall-bidliet – Komunikazzjoni dwar l-istat tat-tlestija fi tmiem il-perjodu ta’ tranżizzjoni bejn l-Unjoni Ewropea u r-Renju Unit” (4), fuq il-bażi ta’ analiżi mwettqa mill-Bank Ċentrali Ewropew (“BĊE”), il-Bord Uniku ta’ Riżoluzzjoni u l-Awtoritajiet Superviżorji Ewropej, il-Kummissjoni identifikat li jistgħu jinħolqu riskji għall-istabbiltà finanzjarja fil-qasam tal-ikklerjar ċentrali tad-derivattivi permezz ta’ CCPs stabbiliti fir-Renju Unit (“UK CCPs”). Sabiex il-membri tal-ikklerjar stabbiliti fl-Unjoni (“il-membri tal-ikklerjar tal-Unjoni”) jingħataw iż-żmien biex inaqqsu l-iskopertura tagħhom għall-infrastruttura tas-suq tar-Renju Unit kif ukoll biex is-CCPs stabbiliti fl-Unjoni (“CCPs tal-Unjoni”) jingħataw iż-żmien biex jiżviluppaw aktar il-kapaċità tagħhom biex jikklerjaw il-kummerċ rilevanti, u biex jindirizzaw ir-riskji possibbli għall-istabbiltà finanzjarja, huwa ġġustifikat li tiġi adottata deċiżjoni dwar l-ekwivalenza għar-Renju Unit f’dak il-qasam. |
(3) |
L-ikklerjar ċentrali jżid it-trasparenza tas-suq, inaqqas ir-riskji tal-kreditu u jnaqqas ir-riskji ta' kontaġju f'każ ta' inadempjenza ta' parteċipant wieħed jew aktar f'CCP. Li servizzi bħal dawn ikunu disponibbli huwa għaldaqstant kritiku biex tiġi żgurata l-istabbiltà finanzjarja. L-għoti tas-servizzi tal-ikklerjar jista’ jaffettwa wkoll l-implimentazzjoni tal-politika monetarja tal-banek ċentrali fejn tranżazzjonijiet jiġu kklerjati fil-munita maħruġa minn bank ċentrali tal-Unjoni. Barra minn hekk, strumenti finanzjarji kklerjati mis-CCPs huma essenzjali wkoll għall-intermedjarji finanzjarji u l-klijenti tagħhom, pereżempju biex jiħħeġġjaw ir-riskji tar-rata tal-imgħax, u għalhekk ikunu jistgħu jinħolqu wkoll riskji għall-ekonomija reali tal-Unjoni. |
(4) |
Mill-31 ta’ Diċembru 2019, l-ammont nozzjonali pendenti tad-derivattivi OTC huwa madwar EUR 500 triljun mad-dinja kollha, li iktar minn 75 % minnhom huma derivattivi tar-rati tal-imgħax u li kważi 20 % oħra huma derivattivi f’munita barranija. Madwar 30 % tad-derivattivi OTC kollha huma denominati f'euro u f'muniti oħrajn tal-Unjoni. Is-suq għall-ikklerjar ċentrali tad-derivattivi OTC huwa kkonċentrat ħafna, b'mod partikolari s-suq għall-ikklerjar ċentrali ta' derivattivi OTC tar-rata tal-imgħax denominati f’euro, li minnhom iktar minn 90 % huma kklerjati f'CCP wieħed tar-Renju Unit. |
(5) |
Il-ħruġ tar-Renju Unit mis-suq intern u mill-ekosistema ta’ regolamentazzjoni komuni, superviżjoni u infurzar ikkoordinati li jirfdu s-suq intern, flimkien mal-ammont sinifikanti ta’ strumenti finanzjarji denominati f’muniti tal-Unjoni li jiġu kklerjati minn CCPs tar-Renju Unit, joħolqu sfidi kbar għall-awtoritajiet tal-Unjoni u tal-Istati Membri fil-ġestjoni tal-istabbiltà finanzjarja, b’mod partikolari fi żminijiet ta’ stress finanzjarju. |
(6) |
L-impatt tal-ħruġ tar-Renju Unit mill-Unjoni kien is-suġġett ta’ diversi komunikazzjonijiet mill-Kummissjoni lill-Parlament Ewropew, lill-Kunsill u lill-BĊE, inkluż Pjan ta’ Azzjoni ta’ Kontinġenza li jħeġġeġ it-tħejjija u t-tlestija min-naħa tal-parteċipanti fis-suq (5). Il-volum ta’ skoperturi attwali tal-membri tal-ikklerjar tal-Unjoni lejn CCPs tar-Renju Unit, il-bidliet fundamentali fil-qafas regolatorju u superviżorju applikabbli għas-CCPs tar-Renju Unit u s-sistema finanzjarja tar-Renju Unit b’mod ġenerali li se jseħħu fl-1 ta’ Jannar 2021, flimkien mar-riskji għall-istabbiltà finanzjarja tal-Unjoni u għat-trażmissjoni u t-twettiq tal-politika monetarja tal-Unjoni, jirrikjedu t-tnaqqis tad-dipendenza fuq l-infrastrutturi tar-Renju Unit. Dan jimplika t-tnaqqis tal-iskoperturi tal-membri tal-ikklerjar tal-Unjoni għal CCPs tar-Renju Unit, b’mod partikolari skoperturi tad-derivattivi OTC denominati f’euro u f’muniti oħra tal-Unjoni, u estensjoni u żvilupp ulterjuri tal-kapaċità tas-CCPs awtorizzati fl-Unjoni biex jipprovdu dawn is-servizzi. Sabiex dan it-tnaqqis jinkiseb, l-industrija mistennija tiżviluppa proċess ċar biex tnaqqas l-iskoperturi u d-dipendenza tagħha fuq is-CCPs tar-Renju Unit li huma sistemikament importanti għall-Unjoni. |
(7) |
Mill-1 ta’ Jannar 2021, is-CCPs tar-Renju Unit se jitqiesu bħala “CCPs ta’ pajjiżi terzi” skont it-tifsira tar-Regolament (UE) Nru 648/2012 u, bħala tali, ma jistgħux jipprovdu servizzi tal-ikklerjar fl-Unjoni, sakemm ma jkunux rikonoxxuti mill-Awtorità Ewropea tat-Titoli u s-Swieq (“ESMA”) skont l-Artikolu 25 ta’ dak ir-Regolament. L-ESMA tista’ tirrikonoxxi biss CCP stabbilita f’pajjiż terz meta l-Kummissjoni tkun adottat att ta’ implimentazzjoni li jiddetermina li l-arranġamenti legali u superviżorji li jirregolaw is-CCPs minn dak il-pajjiż jkunu ekwivalenti għar-rekwiżiti stabbiliti fir-Regolament (UE) Nru 648/2012 u wara li tkun iddeterminat jekk is-CCP tkunx sistemikament importanti għall-istabbiltà finanzjarja tal-Unjoni. Fin-nuqqas tar-rikonoxximent tas-CCPs tar-Renju Unit, il-kontropartijiet stabbiliti fl-Unjoni ma jkunux jistgħu jikklerjaw derivattivi OTC li jkunu soġġetti għall-obbligu tal-ikklerjar stabbilit fl-Artikolu 4 tar-Regolament (UE) Nru 648/2012 f'CCPs tar-Renju Unit. Dik is-sitwazzjoni tista' tirriżulta fi sfidi temporanji għal dawk il-kontropartijiet li jissodisfaw l-obbligi tagħhom tal-ikklerjar, li min-naħa tagħhom, jistgħu joħolqu riskji għall-istabbiltà finanzjarja u l-implimentazzjoni tal-politika monetarja tal-Unjoni u l-Istati Membri tagħha. Għalhekk f’dik is-sitwazzjoni mingħajr preċedent, dment li l-arranġamenti legali u superviżorji li jirregolaw is-CCPs tar-Renju Unit jiġu ddeterminati bħala ekwivalenti, huwa meħtieġ li dawk is-CCPs ikunu jistgħu jkomplu jipprovdu servizzi tal-ikklerjar fl-Unjoni għal perjodu ta’ żmien limitat u taħt kundizzjonijiet speċifiċi. |
(8) |
Skont l-Artikolu 25(6) tar-Regolament (UE) Nru 648/2012, iridu jiġu ssodisfati tliet kundizzjonijiet sabiex jiġi determinat li l-arranġamenti legali u superviżorji ta' pajjiż terz rigward is-CCPs awtorizzati hemmhekk ikunu ekwivalenti għal dawk stabbiliti f'dak ir-Regolament. |
(9) |
L-ewwel, li l-arranġamenti ġuridiċi u superviżorji tal-pajjiż terz iridu jiżguraw li s-CCPs awtorizzati f'dak il-pajjiż terz jikkonformaw ma' rekwiżiti ġuridikament vinkolanti li huma ekwivalenti għar-rekwiżiti stipulati fit-Titolu IV tar-Regolament (UE) Nru 648/2012. Abbażi tal-informazzjoni disponibbli għall-Kummissjoni, ir-Renju Unit inkorpora d-dispożizzjonijiet rilevanti tar-Regolament (UE) Nru 648/2012 fid-dritt nazzjonali tiegħu b’effett mid-data tal-ħruġ tar-Renju Unit mill-Unjoni (6) u għalhekk id-dritt nazzjonali tar-Renju Unit tista’ titqies ekwivalenti għar-rekwiżiti stabbiliti fit-Titolu IV tar-Regolament (UE) Nru 648/2012. |
(10) |
It-tieni, l-arranġamenti ġuridiċi u superviżorji tal-pajjiż terz iridu jiżguraw li s-CCPs stabbiliti fil-pajjiż terz ikunu soġġetti għal superviżjoni u infurzar effettivi fuq bażi kontinwa. Sal-31 ta’ Diċembru 2020, is-CCPs tar-Renju Unit huma taħt is-superviżjoni tal-Bank of England, kif determinat fid-dritt nazzjonali tar-Renju Unit skont ir-Regolament (UE) Nru 648/2012 (7). Bħala parti mill-inkorporazzjoni tar-Regolament (UE) Nru 648/2012 fid-dritt nazzjonali tar-Renju Unit, il-Bank of England jibqa’ responsabbli għas-superviżjoni tas-CCPs wara dik id-data u, għalissa, ma hemm l-ebda indikazzjoni li prevista xi bidla importanti f’dik is-superviżjoni. |
(11) |
It-tielet, li l-qafas ġuridiku tal-pajjiż terz irid jipprevedi sistema ekwivalenti effettiva għar-rikonoxximent ta' CCPs awtorizzati skont reġimi legali ta' pajjiżi terzi. Ir-Renju Unit inkorpora l-elementi ewlenin tas-sistema ta' ekwivalenza fl-Artikolu 25 tar-Regolament (UE) Nru 648/2012 fid-dritt nazzjonali tar-Renju Unit. Madankollu, ir-Renju Unit introduċa Reġim ta’ Rikonoxximent Temporanju li jissospendi l-emendi ewlenin għar-Regolament (UE) Nru 648/2012 għal perjodu ta’ mill-inqas tliet snin. Dak ir-Reġim ta’ Rikonoxximent Temporanju jagħti wkoll setgħat diskrezzjonali wisgħin lill-Bank of England biex jirtira r-“rikonoxximent meqjus temporanju”, li joħloq inċertezza tad-dritt għas-CCPs rikonoxxuti skont dan ir-reġim. Minkejja dik l-inċertezza, it-tielet kundizzjoni tista’ titqies li hi ssodisfata f’dan il-mument. |
(12) |
Fuq dik il-bażi, jista’ jiġi konkluż li l-arranġamenti legali u superviżorji tar-Renju Unit li se jkunu applikabbli għas-CCPs tar-Renju Unit wara tmiem il-perjodu ta’ tranżizzjoni jissodisfaw il-kundizzjonijiet kollha stabbiliti fl-Artikolu 25(6) tar-Regolament (UE) Nru 648/2012. |
(13) |
Din id-Deċiżjoni hija bbażata fuq l-informazzjoni attwalment disponibbli dwar l-arranġamenti legali u superviżorji applikabbli għas-CCPs tar-Renju Unit mill-1 ta’ Jannar 2021. Jenħtieġ li dawk l-arranġamenti legali u superviżorji jitqiesu bħala ekwivalenti biss meta r-rekwiżiti applikabbli għas-CCPs fid-dritt nazzjonali tar-Renju Unit jinżammu u jibqgħu jiġu applikati u infurzati b’mod effettiv dakinhar u wara, sabiex jiġi evitat li kwalunkwe bidla fil-qafas regolatorju u superviżorju tar-Renju Unit taffettwa b’mod negattiv l-ekwivalenza f’termini ta’ regolamentazzjoni jew superviżjoni, li twassal għal kundizzjonijiet mhux ekwi bejn is-CCPs tal-Unjoni u tar-Renju Unit jew għal riskji għall-istabbiltà finanzjarja għall-Unjoni. Peress li l-Kummissjoni tista’ temenda, tissospendi, tirrevedi jew tirrevoka din id-Deċiżjoni fi kwalunkwe ħin, b’mod partikolari meta jseħħu żviluppi f’pajjiż terz li jaffettwaw id-determinazzjoni tal-ekwivalenza, l-iskambju effettiv tal-informazzjoni u l-koordinazzjoni tal-attivitajiet superviżorji bejn l-ESMA u l-Bank of England huwa prerekwiżit essenzjali biex tinżamm id-determinazzjoni tal-ekwivalenza matul il-perjodu ta’ validità ta’ din id-Deċiżjoni. |
(14) |
Dan l-iskambju ta' informazzjoni bejn l-ESMA u l-Bank of England jeħtieġ il-konklużjoni ta' arranġamenti ta' kooperazzjoni komprensiva u effettiva f'konformità mal-Artikolu 25(7) tar-Regolament (UE) Nru 648/2012. Dawn l-arranġamenti ta' kooperazzjoni jiżguraw l-iskambji tal-informazzjoni rilevanti kollha mal-awtoritajiet imsemmija fl-Artikolu 25(3) tar-Regolament (UE) Nru 648/2012, inkluż il-BĊE u l-membri l-oħrajn tas-Sistema Ewropea ta' Banek Ċentrali, għall-fini ta' konsultazzjoni ma' dawk l-awtoritajiet dwar l-istatus rikonoxxut ta' CCPs tar-Renju Unit jew meta dik l-informazzjoni tkun meħtieġa biex dawk l-awtoritajiet iwettqu l-kompiti superviżorji tagħhom. |
(15) |
L-arranġamenti ta’ kooperazzjoni stabbiliti skont l-Artikolu 25(7) tar-Regolament (UE) Nru 648/2012 iridu jiżguraw li l-ESMA jkollha aċċess immedjat fis-sitwazzjonijiet kollha, fuq bażi kontinwa, għall-informazzjoni kollha, inkluż, iżda mhux limitat għaliha, l-informazzjoni li tippermetti l-valutazzjoni ta’ kwalunkwe riskju materjali ppreżentat mis-CCPs tar-Renju Unit għall-Unjoni jew l-Istati Membri tagħha, direttament jew indirettament. Għaldaqstant, jenħtieġ li l-arranġamenti ta’ kooperazzjoni jispeċifikaw mekkaniżmi u proċeduri għal skambju immedjat ta’ informazzjoni relatata ma’ attivitajiet tal-ikklerjar ta’ CCPs tar-Renju Unit fir-rigward ta’ strumenti finanzjarji denominati f’muniti tal-Unjoni, ta’ ċentri tan-negozjar, ta’ parteċipanti tal-ikklerjar kif ukoll ta’ sussidjarji ta’ istituzzjonijiet ta’ kreditu u ditti ta’ investiment tal-Unjoni; ma’ arranġamenti tal-interoperabbiltà ma’ CCPs oħrajn; ma’ riżorsi proprji; mal-kompożizzjoni u l-ikkalibrar ta’ fondi ta’ inadempjenza, ma’ marġini, riżorsi likwidi u portafolli tal-kollateral fosthom il-kalibrazzjonijiet ta’ telf impost u testijiet tal-istress. Huma jridu jispeċifikaw ukoll il-mekkaniżmi u l-proċeduri għan-notifika immedjata ta’ kwalunkwe bidla li taffettwa lis-CCPs tar-Renju Unit jew l-arranġamenti legali u superviżorji tar-Renju Unit applikabbli għas-CCPs tar-Renju Unit u għan-notifika immedjata tal-ESMA ta’ kwalunkwe żvilupp fir-rigward tas-CCPs tar-Renju Unit li jista’ jaffettwa l-politika monetarja fl-Unjoni. Il-Bank of England irid ukoll jikkoopera mill-qrib mal-awtoritajiet tal-Unjoni f’konformità mal-Artikolu 25(7). B’mod partikolari, huwa importanti li jkun hemm arranġamenti ta’ kooperazzjoni effettivi bejn l-ESMA u l-awtoritajiet responsabbli tar-Renju Unit fir-rigward tal-koordinazzjoni tal-attivitajiet superviżorji tagħhom, inklużi, b’mod partikolari, proċeduri biex tiġi indirizzata kwalunkwe sitwazzjoni ta’ emerġenza relatata mas-CCPs tar-Renju Unit rikonoxxuti li għandhom jew jista’ jkollhom effett negattiv fuq il-likwidità tas-suq jew l-istabbiltà tas-sistema finanzjarja tal-Unjoni. |
(16) |
L-awtoritajiet tar-Renju Unit mistennija jinfurmaw lill-Unjoni bil-bidliet kollha għall-qafas regolatorju jew superviżorju tar-Renju Unit li jaffettwaw il-forniment ta’ servizzi tal-ikklerjar fir-Renju Unit. Il-Kummissjoni, f'kooperazzjoni mal-ESMA, se timmonitorja kull bidla introdotta fl-arranġamenti ġuridiċi u superviżorji li jaffettwaw l-għoti ta’ servizz tal-ikklerjar fir-Renju Unit, żviluppi tas-suq kif ukoll l-effikaċja tal-kooperazzjoni superviżorja, inkluż l-iskambju immedjat ta' informazzjoni bejn l-ESMA u l-Bank of England. Il-Kummissjoni tista’ twettaq rieżami fi kwalunkwe ħin meta minħabba l-iżviluppi rilevanti jkun neċessarju li l-Kummissjoni tirrivaluta l-ekwivalenza mogħtija b’din id-Deċiżjoni, inkluż meta l-awtoritajiet tar-Renju Unit ma jikkooperawx b’mod effikaċi, ma jippermettux valutazzjoni effikaċi tar-riskju li s-CCPs tar-Renju Unit joħolqu għall-Unjoni jew l-Istati Membri tagħha jew l-azzjonijiet meħuda mis-CCPs tar-Renju Unit jew mill-Bank of England jippromwovu kompetizzjoni inġusta u mhux xierqa. |
(17) |
Bil-ħsieb li l-membri tal-ikklerjar tal-Unjoni jingħataw iż-żmien biex inaqqsu l-iskopertura tagħhom għall-infrastrutturi tas-suq tar-Renju Unit u s-CCPs tal-Unjoni jingħataw iż-żmien biex jiżviluppaw aktar il-kapaċità tagħhom li jikklerjaw il-kummerċ rilevanti u fid-dawl tal-impatt possibbli tal-iżviluppi regolatorji, superviżorji jew tas-suq dwar l-istabbiltà finanzjarja tal-Unjoni u l-Istati Membri tagħha u dwar it-twettiq u t-trażmissjoni tal-politika monetarja tal-Unjoni, jenħtieġ li din id-Deċiżjoni jkollha durata limitata. |
(18) |
Din id-Deċiżjoni tagħti ż-żmien lill-ESMA biex twettaq rieżami komprensiv tal-importanza sistemika tas-CCPs tar-Renju Unit u s-servizzi jew l-attivitajiet tal-ikklerjar tagħhom lill-Unjoni u tieħu kwalunkwe miżura xierqa biex tindirizza r-riskji għall-istabbiltà finanzjarja f’konformità mal-Artikolu 25 tar-Regolament (UE) Nru 648/2012, inkluż li tirrakkomanda lill-Kummissjoni li jenħtieġ li CCP tar-Renju Unit ma tiġix rikonoxxuta jew li r-rikonoxximent tagħha jiġi rtirat. |
(19) |
Sabiex l-ESMA tingħata biżżejjed żmien biex tirrevedi l-importanza sistemika tas-CCPs tar-Renju Unit, is-CCPs tal-Unjoni jingħataw biżżejjed żmien biex jiżviluppaw aktar il-kapaċità tagħhom li jikklerjaw il-kummerċ rilevanti u l-membri tal-ikklerjar tal-Unjoni jingħataw biżżejjed żmien biex inaqqsu l-iskopertura tagħhom għall-infrastrutturi tas-suq tar-Renju Unit, huwa xieraq li din id-Deċiżjoni tiskadi 18-il xahar wara d-data tal-applikazzjoni tagħha. |
(20) |
Jenħtieġ li din id-Deċiżjoni tidħol fis-seħħ b’urġenza sabiex tiġi żgurata ċ-ċertezza tad-dritt għall-membri tal-ikklerjar u ċ-ċentri tan-negozjar stabbiliti fl-Unjoni qabel tmiem il-perjodu ta’ tranżizzjoni f’konformità mal-Ftehim dwar il-Ħruġ. Jenħtieġ li din tapplika mill-għada tal-jum li fih id-dritt tal-Unjoni jieqaf japplika għar-Renju Unit u fih. |
(21) |
Il-miżuri previsti f’din id-Deċiżjoni huma skont l-opinjoni tal-Kumitat Ewropew tat-Titoli, |
ADOTTAT DIN ID-DEĊIŻJONI:
Artikolu 1
Għall-finijiet tal-Artikolu 25 tar-Regolament (UE) Nru 648/2012, l-arranġamenti ġuridiċi u superviżorji tar-Renju Unit tal-Gran Brittanja u l-Irlanda ta' Fuq applikabbli għall-kontropartijiet ċentrali diġà stabbiliti u awtorizzati fir-Renju Unit tal-Gran Brittanja u l-Irlanda ta' Fuq għandhom jitqiesu li huma ekwivalenti għar-rekwiżiti stabbiliti fir-Regolament (UE) Nru 648/2012.
Artikolu 2
Din id-Deċiżjoni għandha tidħol fis-seħħ l-għada tal-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Għandha tapplika mill-1 ta’ Jannar 2021.
Għandha tiskadi fit-30 ta’ Ġunju 2022.
Magħmul fi Brussell, il-21 ta’ Settembru 2020.
Għall-Kummissjoni
Il-President
Ursula VON DER LEYEN
(1) ĠU L 201, 27.7.2012, p. 1.
(2) Il-Ftehim dwar il-ħruġ tar-Renju Unit tal-Gran Brittanja u l-Irlanda ta' Fuq mill-Unjoni Ewropea u mill-Komunità Ewropea tal-Enerġija Atomika (ĠU C 384I, 12.11.2019, p. 1).
(3) Dikjarazzjoni politika li tistabbilixxi l-qafas għar-relazzjoni futura bejn l-Unjoni Ewropea u r-Renju Unit (ĠU C 384I, 12.11.2019, p. 178).
(4) COM(2020) 324 final.
(5) Communication from the Commission to the European Parliament, the Council and the European Central Bank of 4 May 2017, ‘Responding to challenges for critical financial market infrastructures and further developing the Capital Markets Union’ (COM (2017) 225 final), il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Bank Ċentrali Ewropew, lill-Kumitat Ekonomiku u Soċjali Ewropew, lill-Kumitat tar-Reġjuni u lill-Bank Ewropew tal-Investiment tad-19 ta’ Lulju 2018, “Tħejjija għall-ħruġ tar-Renju Unit mill-Unjoni Ewropea fit-30 ta’ Marzu 2019” (COM (2018) 556 final) u l-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Bank Ċentrali Ewropew, lill-Kumitat Ekonomiku u Soċjali Ewropew, lill-Kumitat tar-Reġjuni u lill-Bank Ewropew tal-Investiment tat-13 ta’ Novembru 2018, “Tħejjija għall-ħruġ tar-Renju Unit mill-Unjoni Ewropea fit-30 ta’ Marzu 2019: Pjan ta’ Azzjoni ta’ Kontinġenza” (COM(2018) 880 final).
(6) Wara tmiem il-perjodu ta’ tranżizzjoni, diversi biċċiet tal-leġiżlazzjoni tar-Renju Unit jipprovdu l-qafas regolatorju u superviżorju li jkopri s-servizzi tal-ikklerjar fir-Renju Unit. Dan jinkludi, iżda mhux limitat għalihom, il-European Union (Withdrawal) Act 2018, The Over the Counter Derivatives, Central Counterparties and Trade Repositories (Amendment, etc., and Transitional Provision) (EU Exit) Regulations 2020, il-Financial Services (Consequential Amendments) Regulations 2020 u l-Financial Services Contracts (Transitional and Saving Provision (EU Exit) Regulations 2019).
(7) Il-Parti 5 ta’ The Financial Services and Markets Act 2000 (Over the Counter Derivatives, Central Counterparties and Trade Repositories) Regulations 2013.