(1)

Permezz ta’ ittra rreġistrata fit-23 ta’ Mejju 2019 u ta’ ittra rreġistrata fis-17 ta’ Ġunju 2019 mal-Kummissjoni, Franza u Spanja, rispettivament, talbu awtorizzazzjoni biex jintroduċu miżura speċjali li tidderoga mill-Artikolu 5 tad-Direttiva 2006/112/KE fir-rigward tal-bini ta’ interkonnessjoni tal-elettriku bejn Gatica fi Spanja u Cubnezais fi Franza (“il-miżura speċjali”).

(2)

Permezz ta’ ittri datati l-10 ta’ Settembru 2019, il-Kummissjoni bagħtet lill-Istati Membri l-oħra, f’konformità mat-tieni subparagrafu tal-Artikolu 395(2) tad-Direttiva 2006/112/KE, it-talbiet magħmula minn Spanja u Franza. Permezz tal-ittra datati l-11 ta’ Settembru 2019, il-Kummissjoni innotifikat lil Spanja u lil Franza li kellha l-informazzjoni kollha li hi tikkunsidra meħtieġa biex tqis it-talbiet.

(3)

Ir-regolatur nazzjonali tas-suq tal-elettriku ta’ Spanja “Comisión Nacional de los Mercados y la Competencia” u r-regolatur nazzjonali tas-suq tal-elettriku ta’ Franza “Commission de Régulation de l’Énergie”, iffirmaw ftehim fit-22 ta’ Settembru 2017 biex jiffinanzjaw interkonnessjoni tal-elettriku bejn Spanja u Franza li tgħaddi mill-Golf tal-Biskalja. Il-bini tal-interkonnessjoni ġie fdat f’idejn l-operaturi tas-sistema ta’ trażmissjoni tal-elettriku fi Spanja u Franza, Red Eléctrica de España u Réseau de transport d’Electricité. Dak il-ftehim jipprevedi li l-kostijiet tal-proġett jiġġarrbu f’partijiet indaqs: 50 % minn Spanja u 50 % minn Franza.

(4)

Permezz tal-miżura speċjali, l-interkonnessjoni tal-elettriku bejn Gatica fi Spanja u Cubnezais fi Franza għandha tiġi kkunsidrata li tinsab 50 % fi Spanja u 50 % fi Franza għall-finijiet tal-provvisti ta’ merkanzija u servizzi, tal-akkwisti intra-Komunitarji ta’ merkanzija u tal-importazzjoni ta’ merkanzija maħsuba għall-bini tagħha.

(5)

Mingħajr il-miżura speċjali, ikun meħtieġ li jiġi aċċertat għal kull provvista jekk il-post ta’ tassazzjoni huwiex fi Spanja jew fi Franza skont il-prinċipju tat-territorjalità.

(6)

Abbażi tal-informazzjoni pprovduta minn Spanja u minn Franza, il-miżura speċjali se tissimplifika l-proċedura għall-ġbir tal-VAT u l-ammont globali tad-dħul mit-taxxa ta’ Spanja u Franza miġbur fl-istadju tal-konsum finali, se jiġi affettwat biss b’mod negliġibbli. Għalhekk jixraq li Spanja u Franza jiġu awtorizzati japplikaw il-miżura speċjali.

(7)

Id-deroga ma huwa ser ikollha l-ebda impatt fuq ir-riżorsi proprji tal-Unjoni li jirriżultaw mill-VAT,