(1)

L-Artikolu 199c tad-Direttiva 2006/112/KE jippermetti lill-Istati Membri, b’deroga mill-Artikolu 193 ta’ dik id-Direttiva u taħt ċerti kundizzjonijiet, sat-30 ta’ Ġunju 2022, biex jintroduċu mekkaniżmu tar-reverse charge ġeneralizzat (“GRCM”) fuq provvisti mhux transfruntiera ta’ prodotti u servizzi, jistabbilixxi li l-persuna responsabbli għall-ħlas tal-VAT tkun il-persuna taxxabbli li ssirilha l-provvista kollha ta’ merkanzija jew ta’ servizzi ’il fuq mil-livell limitu ta’ EUR 17 500 għal kull tranżazzjoni.

(2)

Permezz ta’ ittri rreġistrati mal-Kummissjoni fil-21 ta’ Jannar 2019 u fit-22 ta’ Marzu 2019, iċ-Ċekja talbet awtorizzazzjoni biex tapplika l-GRCM.

(3)

Id-diskrepanza tal-VAT fiċ-Ċekja fl-2014 kienet 16,14 % tal-obbligazzjoni tat-taxxa totali tal-VAT, skont il-metodu u ċ-ċifri stabbiliti fir-rapport finali tal-2016 tal-Kummissjoni tat-23 ta’ Awwissu 2016 dwar id-diskrepanza tal-VAT. Għalhekk id-diskrepanza tal-VAT taċ-Ċekja qabżet id-diskrepanza medja tal-VAT tal-Komunità (10,4 %) b’aktar minn 5 punti perċentwali.

(4)

Il-livell tal-frodi karusell fi ħdan id-distakk totali tal-VAT taċ-Ċekja kien aktar minn 25 % skont il-valutazzjoni tal-impatt li akkumpanjat il-proposta għad-Direttiva tal-Kunsill (UE) 2018/2057 (2), li introduċiet il-GRCM.

(5)

Iċ-Ċekja pprovdiet dettalji lill-Kummissjoni li juru li, għalkemm bosta miżuri ta’ kontroll kienu ġew implimentati fiċ-Ċekja b’riżultati pożittivi, il-miżuri ma kinux biżżejjed biex tiġi miġġielda l-frodi karusell. Barra minn hekk, il-kooperazzjoni amministrattiva fil-qasam tal-VAT ma kinitx biżżejjed biex tiġi miġġielda l-frodi karusell.

(6)

Iċ-Ċekja pprovdiet dettalji lill-Kummissjoni li juru li d-dħul stmat fi ġbir tat-taxxa u r-rispett tal-obbligi fiskali bħala riżultat tal-introduzzjoni tal-GRCM huwa mistenni li jkun ta’ 10 biljun koruna Ċeka (CZK). Iċ-Ċekja wriet ukoll li l-piż addizzjonali ġenerali fuq l-awtoritajiet tan-negozju u tat-taxxa huwa mistenni li jkun CZK 604 miljun. Għalhekk id-dħul stmat fi ġbir tat-taxxa u r-rispett tal-obbligi fiskali jegħlbu l-piż addizzjonali kumplessiv mistenni fuq in-negozji u l-awtoritajiet tat-taxxa b’minn tal-inqas 25 %.

(7)

Minħabba li ċ-Ċekja ma tistenniex li l-piż addizzjonali ġenerali fuq in-negozji u l-awtoritajiet tat-taxxa li jirriżulta mill-introduzzjoni tal-GRCM ser ikun sinifikanti, in-negozji u l-awtoritajiet tat-taxxa mhux ser ikollhom iġarrbu kostijiet li huma ogħla minn dawk imġarrba minħabba l-applikazzjoni ta’ miżuri oħra ta’ kontroll.

(8)

Iċ-Ċekja talbet awtorizzazzjoni biex tapplika l-GRCM mill-1 ta’ Jannar 2020 sat-30 ta’ Ġunju 2022.

(9)

Iċ-Ċekja tat konferma lill-Kummissjoni li ser jittieħdu azzjonijiet biex il-persuni taxxabbli jiġu infurmati dwar l-introduzzjoni tal-applikazzjoni tal-GRCM permezz tal-posta elettronika, lectures pubbliċi, diskussjonijiet ma’ assoċjazzjonijiet tan-negozju, is-sit web tal-amministrazzjoni, u l-materjal promozzjonali stampat jew elettroniku.

(10)

Iċ-Ċekja pprovdiet lill-Kummissjoni b’deskrizzjoni dettaljata tal-mekkaniżmi eżistenti tagħha għall-kontroll tal-VAT u kkonfermat li, biż-żieda ta’ kodiċi speċjali GRCM, il-miżuri eżistenti ser ikunu biżżejjed biex jiġi żgurat il-funzjonament u l-monitoraġġ effettiv tal-applikazzjoni tal-GRCM.

(11)

Abbażi tal-informazzjoni pprovduta miċ-Ċekja lill-Kummissjoni, jitqies li ċ-Ċekja hija konformi mal-kundizzjonijiet stabbiliti fl-Artikolu 199c(1) tad-Direttiva 2006/112/KE u li t-talba ppreżentata miċ-Ċekja hija konformi mar-rekwiżiti l-oħra stabbiliti fl-Artikolu 199c(3) ta’ dik id-Direttiva. Huwa għalhekk xieraq li ċ-Ċekja tiġi awtorizzata tapplika l-GRCM mill-1 ta’ Jannar 2020 sat-30 ta’ Ġunju 2022.

(12)

Id-deroga mhu ser ikollha l-ebda impatt avvers fuq ir-riżorsi proprji tal-Unjoni li jirriżultaw mill-VAT,