(1)

Is-suġġett tal-inizjattiva taċ-ċittadini proposta bl-isem “Insalvaw lin-naħal u lill-bdiewa! Lejn agrikoltura favur in-naħal għal ambjent b'saħħtu” jirreferi għal li ġej: “Sabiex jiġu protetti n-naħal u s-saħħa tan-nies, nappellaw lill-Kummissjoni biex tipproponi atti legali biex gradwalment jitneħħew il-pestiċidi sintetiċi sal-2035, biex terġa' tiġi stabbilita l-bijodiversità, u biex jiġu appoġġjati l-bdiewa fit-tranżizzjoni”.

(2)

L-objettivi tal-inizjattiva taċ-ċittadini proposta jirreferu għal li ġej: “Gradwalment jitneħħew il-pestiċidi sintetiċi fl-agrikoltura tal-UE bi 80 % sal-2030, u l-ewwel li jitneħħew huma dawk l-aktar perikolużi, biex sal-2035 inkunu ħielsa minn pestiċidi sintentiċi; jiġu restawrati l-ekosistemi naturali fiż-żoni agrikoli sabiex il-biedja ssir vettur tal-irkupru tal-bijodiversità; ikun hemm riforma fl-agrikoltura billi tiġi prijoritizzata l-biedja fuq skala żgħira, diversa u sostenibbli, tiġi appoġġjata żieda rapida fil-prattika agroekoloġika u organika, u jiġu permessi taħriġ indipendenti bbażat fuq il-bdiewa u riċerka fil-biedja ħielsa mill-pestiċidi u mill-OĠM.”

(3)

It-Trattat dwar l-Unjoni Ewropea (TUE) isaħħaħ iċ-ċittadinanza tal-UE u jkompli jtejjeb il-funzjonament demokratiku tal-Unjoni billi, fost l-oħrajn, jipprovdi lil kull ċittadin bid-dritt li jipparteċipa fil-ħajja demokratika tal-Unjoni permezz tal-inizjattiva taċ-ċittadini Ewropej.

(4)

Għal dan l-għan, jenħtieġ li l-proċeduri u l-kundizzjonijiet meħtieġa għall-inizjattiva taċ-ċittadini jkunu ċari, sempliċi, faċli biex jintużaw u proporzjonati man-natura tal-inizjattiva taċ-ċittadini sabiex titħeġġeġ il-parteċipazzjoni taċ-ċittadini u biex l-Unjoni ssir aktar aċċessibbli.

(5)

Jistgħu jiġu adottati atti legali tal-Unjoni għall-fini tal-implimentazzjoni tat-Trattati:

(6)

Għal dawn ir-raġunijiet, l-inizjattiva taċ-ċittadini proposta ma taqax manifestament barra mill-qafas tas-setgħat tal-Kummissjoni li tressaq xi proposta għal att legali tal-Unjoni għall-fini tal-implimentazzjoni tat-Trattati, skont l-Artikolu 4(2)(b) tar-Regolament.

(7)

Barra minn hekk, ġie ffurmat il-kumitat taċ-ċittadini u l-persuni ta' kuntatt inħatru skont l-Artikolu 3(2) tar-Regolament, u l-inizjattiva taċ-ċittadini proposta la tidher li hija manifestament abbużiva, fiergħa jew vessatorja, u lanqas ma tidher li tmur manifestament kontra l-valuri tal-Unjoni, kif stipulati fl-Artikolu 2 tat-TUE.

(8)

Għaldaqstant, jenħtieġ li l-inizjattiva taċ-ċittadini proposta bl-isem “Insalvaw lin-naħal u lill-bdiewa! Lejn agrikoltura favur in-naħal għal ambjent b'saħħtu” tiġi rreġistrata,