(1)

Ir-Regolament tal-Kunsill (KEE) Nru 2658/87 stabbilixxa nomenklatura tal-oġġetti (minn hawn 'il quddiem imsejħa n-“Nomenklatura Magħquda” jew in-“NM”), li hija stabbilita fl-Anness I tiegħu.

(2)

Bħalissa, il-kliem tan-Noti Addizzjonali 4 u 5 tal-Kapitolu 17 tan-Nomenklatura Magħquda, kif ukoll tan-Noti Addizzjonali 3 u 4 tal-Kapitolu 21 tagħha jirreferi għall-Artikolu 42 tar-Regolament tal-Kummissjoni (KE) Nru 951/2006 (2), li jistabbilixxi l-metodi għall-kalkolu tal-kontenut tas-sukrożju fiz-zokkor mhux maħdum u f'ċerti ġuleppijiet.

(3)

Il-paragrafi 2, 3 u 4 tal-Artikolu 42 tar-Regolament tal-Kummissjoni (KE) Nru 951/2006 se jitħassru mill-1 ta' Ottubru 2017, minħabba li wara li nbidlet il-politika agrikola, ġiet emendata s-sistema ta' kwoti tal-produzzjoni taz-zokkor. Għalhekk, ir-referenzi għall-Artikolu 42 tar-Regolament tal-Kummissjoni (KE) Nru 951/2006 li hemm fin-Noti Addizzjonali 4 u 5 tal-Kapitolu 17 tan-NM, kif ukoll fin-Noti Addizzjonali 3 u 4 tal-Kapitolu 21 tagħha mhux se jibqgħu jgħoddu.

(4)

Fl-interess taċ-ċertezza legali u sabiex jiġi evitat li jinħoloq vojt legali, jeħtieġ li dawk in-Noti Addizzjonali jiġu emendati u li l-metodi analitiċi applikabbli jiddaħħlu direttament fihom.

(5)

Fid-dawl tat-titjib fil-metodi analitiċi li jintużaw biex jiġi stabbilit il-kontenut taz-zokkor, il-metodu analitiku użat dal-ħin biex jiġi kkalkulat il-kontenut taz-zokkor ta' ċerti prodotti li jaqgħu taħt il-Kapitolu 17 u li jistgħu jiġu influwenzati mill-matriċi tal-kampjun jew minn komposti interferenti għandu jinbidel bil-metodu tal-kromatografija likwida bi prestazzjoni għolja (“il-metodu tal-HPLC”).

(6)

Madankollu, l-metodu tal-HPLC ma jistax jintuża għal għadd ta' prodotti oħrajn li jaqgħu taħt il-Kapitolu 17, kif ukoll għall-prodotti li jaqgħu taħt il-Kapitolu 21, li fihom il-kontenut taz-zokkor mhux imsejjes biss fuq is-sukrożju, il-fruttożju, il-glukożju u l-maltożju, minħabba li dawn fihom ukoll tipi ta' zokkor oħrajn. Għal dawk il-prodotti, il-kontenut tas-sukrożju, inklużi tipi ta' zokkor oħrajn mogħtija bħala sukrożju, għandu jiġi stabbilit billi jintuża l-metodu tar-rifrattometrija skont l-Anness tar-Regolament ta' Implimentazzjoni tal-Kummissjoni (UE) Nru 974/2014 (3).

(7)

Sabiex tkun żgurata interpretazzjoni uniformi tan-Nomenklatura Magħquda fl-Unjoni kollha fir-rigward tal-istabbiliment tal-kontenut taz-zokkor ta' ċerti prodotti, jenħtieġ li jiġu emendati n-Noti Addizzjonali 4 u 5 tal-Kapitolu 17 tat-Tieni Parti tan-Nomenklatura Magħquda, kif ukoll in-Noti Addizzjonali 3 u 4 tal-Kapitolu 21 tagħha.

(8)

Għalhekk jenħtieġ li r-Regolament tal-Kunsill (KEE) Nru 2658/87 jiġi emendat skont dan.

(9)

Il-paragrafi 2, 3 u 4 tal-Artikolu 42 tar-Regolament tal-Kummissjoni (KE) Nru 951/2006 se jitħassru mill-1 ta' Ottubru 2017. Għalhekk jenħtieġ li dan ir-Regolament jibda japplika mill-istess data.

(10)

Il-miżuri previsti f'dan ir-Regolament huma skont l-opinjoni tal-Kumitat tal-Kodiċi Doganali,

(a)

fil-Kapitolu 17, in-Noti Addizzjonali 4 u 5 qed jinbidlu b'dan li ġej:

(*1)   Ir-Regolament ta' Implimentazzjoni tal-Kummissjoni (UE) Nru 974/2014 tal-11 ta' Settembru 2014 li jistabbilixxi l-metodu rifrattometru biex jitkejjel residwu xott solubbli fi prodotti proċessati minn frott u ħaxix għall-finijiet tal-klassifikazzjoni tagħhom fin-Nomenklatura Magħquda (ĠU L 274, 16.9.2014, p. 6).”;"

(b)

fil-Kapitolu 21, in-Noti Addizzjonali 3 u 4 qed jinbidlu b'dan li ġej:

(*2)   Ir-Regolament ta' Implimentazzjoni tal-Kummissjoni (UE) Nru 974/2014 tal-11 ta' Settembru 2014 li jistabbilixxi l-metodu rifrattometru biex jitkejjel residwu xott solubbli fi prodotti proċessati minn frott u ħaxix għall-finijiet tal-klassifikazzjoni tagħhom fin-Nomenklatura Magħquda (ĠU L 274, 16.9.2014, p. 6).”."