4.10.2016   

MT

Il-Ġurnal Uffiċjali tal-Unjoni Ewropea

L 269/20

(1)

L-istandardizzazzjoni għandha rwol importanti fil-ħidma favur l-istrateġija Ewropa 2020, kif stipulat fil-Komunikazzjoni tal-Kummissjoni intitolata “Ewropa 2020: Strateġija għal tkabbir intelliġenti, sostenibbli u inklussiv”. Diversi inizjattivi ewlenin tal-istrateġija Ewropa 2020 jisħqu fuq l-importanza tal-istandardizzazzjoni volontarja fis-swieq tal-prodotti jew tas-servizzi sabiex tiġi żgurata l-kompatibbiltà u l-interoperabbiltà bejn il-prodotti u s-servizzi, sabiex jitrawwem l-iżvilupp teknoloġiku u sabiex jingħata appoġġ lill-innovazzjoni.

(2)

L-istandards huma essenzjali għall-kompetittività Ewropea u kruċjali għall-innovazzjoni u għall-progress. Ir-rilevanza tagħhom hija enfasizzata mill-Kummissjoni fil-kuntest tal-inizjattivi riċenti għall-ikkompletar tas-Suq Uniku (2) u s-Suq Uniku Diġitali (3) fejn ir-rwol tal-istandardizzazzjoni u tal-interoperabbiltà fil-ħolqien ta' Ekonomija Ewropea Diġitali huwa msaħħaħ bl-adozzjoni tal-Komunikazzjoni dwar il-Prijoritajiet għall-Istandardizzazzjoni tal-ICT għas-Suq Uniku Diġitali (4) billi jiġi stabbilit approċċ komprensiv u strateġiku għal politika ta' standardizzazzjoni tat-Teknoloġiji ICT prijoritarji li huma kruċjali għall-ikkompletar tas-Suq Uniku Diġitali.

(3)

Fis-soċjetà diġitali, l-istrumenti tal-istandardizzazzjoni huma indispensabbli biex tiġi żgurata l-interoperabbiltà tan-netwerks u tas-sistemi. Il-Komunikazzjoni mill-Kummissjoni bl-isem ta' “Viżjoni strateġika għal standards Ewropej: il-mixja 'l quddiem biex jittejjeb u jitħaffef it-tkabbir sostenibbli tal-ekonomija Ewropea sal-2020” (5) tagħraf l-ispeċifiċità tal-istandardizzazjoni fil-qasam tat-teknoloġiji tal-informazzjoni u tal-komunikazzjoni (l-ICT), fejn is-soluzzjonijiet, l-applikazzjonijiet u s-servizzi ħafna drabi jiġu żviluppati minn Fora u Konsorzji globali tal-ICT, li saru organizzazzjonijiet ewlenin għall-iżvilupp tal-istandards tal-ICT.

(4)

Ir-Regolament (UE) Nru 1025/2012 għandu l-għan li jimmodernizza u jtejjeb il-qafas Ewropew tal-istandardizzazzjoni. Jistabbilixxi sistema li biha l-Kummissjoni tista' tiddeċiedi li tidentifika l-ispeċifikazzjonijiet tekniċi tal-ICT li huma l-iktar rilevanti u aċċettati maħruġin minn organizzazzjonijiet li mhumiex organizzazzjonijiet nazzjonali, Ewropej jew internazzjonali tal-istandardizzazzjoni. Il-possibbiltà li tintuża l-medda sħiħa tal-ispeċifikazzjonijiet tekniċi tal-ICT fl-akkwist ta' hardware, software u servizzi tat-teknoloġija tal-informazzjoni se tippermetti l-interoperabbiltà bejn l-apparat, is-servizzi u l-applikazzjonijiet, ser tgħin lill-amministrazzjonijiet pubbliċi jevitaw ir-restrizzjonijiet li jseħħu meta x-xerrej pubbliku ma jkunx jista' jibdel il-fornitur wara l-iskadenza tal-kuntratt tal-akkwist minħabba l-użu ta' soluzzjonijiet tal-ICT esklussivi, u se tħeġġeġ il-kompetizzjoni fil-provvista ta' soluzzjonijiet interoperabbli tal-ICT.

(5)

L-ispeċifikazzjonijiet tekniċi tal-ICT li jistgħu jkunu eliġibbli għar-referenzjar fl-akkwist pubbliku jridu jkunu konformi mal-ħtiġiet stipulati fl-Anness II tar-Regolament (UE) Nru 1025/2012. Il-konformità ma' dawk il-ħtiġiet tiggarantixxi lill-awtoritajiet pubbliċi li l-ispeċifikazzjonijiet tekniċi tal-ICT ikunu stabbiliti skont il-prinċipji tal-aċċess miftuħ, tal-imparzjalità, tal-oġġettività u tan-nondiskriminazzjoni li huma rrikonoxxuti mill-Organizzazzjoni Dinjija tal-Kummerċ fil-qasam tal-istandardizzazzjoni.

(6)

Id-deċiżjoni li tiġi identifikata l-ispeċifikazzjoni tal-ICT għandha tiġi adottata wara konsultazzjoni mal-Pjattaforma Ewropea ta' bosta Partijiet Interessati dwar l-Istandardizzazzjoni tal-ICT, stabbilita permezz tad-Deċiżjoni tal-Kummissjoni 2011/C-349/04 (6) ikkumplimentata minn forom oħra ta' konsultazzjoni ma' esperti fis-settur.

(7)

Il-pjattaforma Ewropea ta' bosta partijiet interessati dwar l-Istandardizzazzjoni tal-ICT evalwat u tat parir pożittiv dwar l-identifikazzjoni tal-ispeċifikazzjonijiet tekniċi tal-“World Customs Organization Data Model version 3.5” (minn hawn 'il quddiem imsejjaħ “WCO Data Model v 3.5”) u tal-“Content Management Interoperability Services version 1.0 & version 1.1” (minn hawn 'il quddiem imsejħa CMIS v1.0 & v1.1), “Electronic business XML Messaging Services Version 3.0”: Il-Parti 1 “Core Features” u “Application Statement 4 Profile of ebMS 3.0 Version 1.0” (minn hawn 'il quddiem imsejħa “ebMS3.0-AS4”), “Business Document Metadata Service Location Version 1.0” (minn hawn 'il quddiem “BDX location”) u “Electronic business Core Party Identification Type Technical Specification Version 1.0” (minn hawn' il quddiem “ebCorePartyIdType”), dawk żviluppati minn OASIS, għar-referenzjar fl-akkwist pubbliku. Sussegwentement, l-evalwazzjoni ġiet sottomessa għall-konsultazzjoni ta' esperti settorjali li wkoll taw parir pożittiv dwar l-identifikazzjoni tagħha.

(8)

L-ispeċifikazzjoni teknika “WCO Data Model version 3.5” ġiet żviluppata mill-Organizzazzjoni Dinjija Doganali (WCO) u tikkonsisti minn sett ta' ħtiġiet ta' data li huma ta' appoġġ reċiproku u li jilħqu l-ħtiġijiet proċedurali u legali ta' aġenziji regolatorji transfruntiera bħad-dwana; il-kontroll ta' tranżazzjonijiet, tal-esportazzjoni, tal-importazzjoni u tat-transitu. Hija konsistenti wkoll mad-Direttorju tal-Elementi tad-Data tal-Kummerċ fin-Nazzjonijiet Uniti (UNTDED), u spiss tintuża mill-amministrazzjonijiet membri tad-WCO għall-implimentazzjoni ta' sistemi regolatorji transfruntiera, inklużi s-sistemi ta' dikjarazzjonijiet elettroniċi u l-ambjenti ta' interfaċji uniċi.

(9)

L-ispeċifikazzjoni teknika “CMIS v1.0” maħruġa minn OASIS (Advancing open standards for the information society) tippermetti li jkun hemm sistemi diversi ta' immaniġġar tal-kontenut fuq l-Internet. Hija toffri mod standardizzat biex tfaddal, tikseb lura u ssib id-dokumenti u b'hekk tagħmilha possibbli li jsir skambju ta' informazzjoni bejn id-diversi repożitorji tal-kontenut. B'mod aktar speċifiku, “CMIS v1.0” jfisser saff ta' estrazzjoni biex jikkontrolla diversi sistemi għall-ġestjoni ta' dokumenti u arkivji elettroniċi bl-użu ta' protokolli tal-web. L-ispeċifikazzjoni tiddeskrivi kunċetti u funzjonalitajiet li huma appoġġati u li huma offerti mill-biċċa l-kbira tar-repożitorji tal-kontenut, bħat-tiftix, ir-rikjesti, iż-żieda u l-bdil tal-kontenut u tal-metadata. L-ispeċifikazzjoni teknika “CMIS v1.1” hija kompletament kompatibbli mas-“CMIS v1.0” u tinkludi funzjonijiet addizzjonali.

(10)

L-“electronic business XML Messaging Service” (“ebMS 3.0”) żviluppat minn OASIS jiffaċilita l-iskambju ta' messaġġi tan-negozju elettroniku fi ħdan qafas ta' Servizzi Onlajn tal-XML li jattira speċifikazzjonijiet tekniċi komuni tal-Internet. L-għan ta' “ebMS 3.0” huwa li jrawwem l-adozzjoni wiesgħa fost l-atturi kollha — kbar jew żgħar, amministrazzjoni pubblika jew kumpanija privata — li jikkollaboraw fil-proċessi tan-negozju permezz tal-iskambju ta' messaġġi, biex jittrattaw id-differenzi fil-kapaċità ta' fluss tal-messaġġi, tal-konnettività intermittenti, tan-nuqqas ta' indirizzi IP fissi jew tar-restrizzjonijiet firewall. L-ispeċifikazzjoni teknika “Application Statement 4 Profile of ebMS 3.0 Version 1.0” (mqassra għal “AS4”) hija protokoll modern bbażat fuq is-servizzi tal-web li tipprovdi gwida għal metodoloġija standardizzata għall-iskambju sikur, indipendentement mit-tip ta' dokument, ta' ordnijiet, fatturi u tipi oħra ta' dokumenti kummerċjali via s-servizzi Web.

(11)

L-ispeċifikazzjoni teknika “Business Document Metadata Service Location” (“BDX Location”) maħruġa minn OASIS hija aġġornament tal-kunċett PEPPOL ta' SML (Service Metadata Location). Is-servizz metadata għall-interazzjonijiet kummerċjali jipprovdi informazzjoni dwar it-tip tat-tranżazzjonijiet ta' data u ta' teknoloġiji abilitanti korrispondenti disponibbli għall-parteċipanti fi proċessi ta' negozju speċifiċi. L-ispeċifikazzjoni teknika “BDX Location” tirreferi għall-post ta' servizz ta' metadata primarjament bħala l-identifikatur ta' terminu speċifikat minn URL.

(12)

L-ispeċifikazzjoni teknika “ebCorePartyIdType” żviluppata minn OASIS tispeċifika mekkaniżmu formali għal grupp ta' referenza formali tal-iskemi ta' identifikazzjoni tat-tip bl-użu ta'dominju formali ta' ismijiet URN (Uniform Resource Name) għall-identifikaturi tal-organizzazzjoni li jibbażaw rwieħhom fuq tliet standards internazzjonali: ISO/IEC 6523, ISO 9735 u ISO 20022.