27.9.2016   

MT

Il-Ġurnal Uffiċjali tal-Unjoni Ewropea

L 260/104

(1)

Permezz ta' sentenza tas-27 ta' Ottubru 2011 (2), il-Qorti tal-Ġustizzja tal-Unjoni Ewropea (minn hawn 'il quddiem: il-Qorti) kkonfermat id-deċiżjoni tal-Qorti tal-Prim'Istanza (3) (issal-Qorti Ġenerali) li permezz tagħha d-Deċiżjoni tal-Kummissjoni C(2004) 2037 tat-30 ta' Ġunju 2004 fil-kawża dwar l-għajnuna mill-Istat NN 34 A/2000 dwar il-programmi ta' kwalità u t-tikketti tal-kwalità ta' AMA Biosiegel (minn hawn 'il quddiem: il-bijotikketta) u AMA Gütesiegel (minn hawn 'il quddiem: it-tikketta tal-kwalità) ġiet annullata.

(2)

Wara s-sentenza tal-Qorti, il-Kummissjoni hija mitluba li tieħu l-miżuri meħtieġa sabiex tikkonforma ma' dik is-sentenza. Għalhekk, hija għandha tadotta deċiżjoni ġdida.

(3)

Is-sentenzi ċċitati hawn fuq huma l-kulminazzjoni ta' proċedura li l-istadji prinċipali tagħha huma stipulati hawn taħt.

(4)

Wara żewġ ilmenti tal-21 ta' Settembru 1999 u tal-5 ta' Novembru 1999, li ġew irreġistrati fit-23 ta' Settembru 1999 u fl-20 ta' Jannar 2000 rispettivament, il-Kummissjoni talbet lill-awtoritajiet Awstrijaċi, permezz ta' ittra tal-15 ta' Frar 2000, sabiex ifornu informazzjoni xierqa dwar il-miżuri ta' għajnuna relatati mal-attivitajiet ta' kummerċjalizzazzjoni ta' Agrarmarkt Austria Marketing GesmbH (AMA Marketing), sussidjarja ta' Agrarmarkt Austria (AMA).

(5)

L-awtoritajiet Awstrijaċi fornew l-informazzjoni mitluba permezz ta' ittra tal-20 ta' Marzu 2000, li ġiet irreġistrata fil-21 ta' Marzu 2000.

(6)

Permezz ta' ittra tal-4 ta' April 2000, li ġiet irreġistrata fis-7 ta' April 2000, it-tieni kwerelant issottometta informazzjoni addizzjonali.

(7)

Waslet informazzjoni addizzjonali mit-tieni kwerelant fit-18 ta' Mejju 2000 u fit-30 ta' Mejju 2001, li ġew irreġistrati fis-26 ta' Mejju 2000 u fis-6 ta' Ġunju 2001, rispettivament. It-tielet ilment dwar l-istess suġġett ġie riċevut mill-Kummissjoni nhar it-22 Jannar 2003.

(8)

Abbażi tal-informazzjoni riċevuta fl-ilmenti, il-Kummissjoni għarrfet lill-awtoritajiet Awstrijaċi permezz ta' ittra tad-19 ta' Ġunju 2000 li l-miżuri kkonċernati kienu rreġistrati bħala għajnuna mhux innotifikata (NN 34/2000) u talbet lill-awtoritajiet Awstrijaċi sabiex jissottomettu aktar informazzjoni. L-awtoritajiet Awstrijaċi wieġbu permezz ta' ittra tad-29 ta' Settembru 2000, li ġiet irreġistrata fl-istess jum, u permezz ta' ittra tas-16 ta' Ottubru 2000, li ġiet irreġistrata fis-17 ta' Ottubru 2000. Intalbet informazzjoni addizzjonali permezz ta' ittra tal-15 ta' Ottubru 2001, li l-awtoritajiet Awstrijaċi wieġbu għaliha permezz ta' ittra tas-7 ta' Novembru 2001. Permezz ta' ittra tad-19 ta' Diċembru 2002, l-awtoritajiet Awstrijaċi pprovdew informazzjoni addizzjonali u għarrfu lill-Kummissjoni dwar id-direttivi ta' AMA (interni) mmodifikati (AMA Richtlinien) li jirregolaw l-attivitajiet ta' reklamar għal prodotti li juru t-tikketta tal-kwalità ta' AMA u l-bijotikketta ta' AMA li daħlu fis-seħħ fis-26 ta' Settembru 2002.

(9)

Permezz ta' din l-ittra, li kienet tinkludi formola ta' notifika mimlija, l-awtoritajiet Awstrijaċi sostnew li għandhom jiġu nnotifikati l-miżuri tat-tikketta tal-kwalità u tal-bijotikketta tal-AMA implimentati skont ir-regoli interni ġodda (4). Madankollu, il-Kummissjoni sostniet li din l-ittra ma setgħetx titqies bħala notifika tal-għajnuna ġdida minħabba li d-direttivi mmodifikati dwar l-AMA kienu diġà daħlu fis-seħħ fis-26 ta' Settembru 2002 u, b'hekk, ġew implimentati qabel kwalunkwe approvazzjoni tal-miżuri ta' għajnuna li kienu bbażati fuqhom (5).

(10)

Wara talba mill-awtoritajiet Awstrijaċi datata u riċevuta fit-8 ta' Marzu 2004, il-Kummissjoni ddeċidiet li taqsam il-kawża NN 34/2000. In-numru tar-reġistrazzjoni NN 34 A/2000 ingħata għall-eżaminazzjoni li tikkonċerna d-dispożizzjonijiet dwar il-bijotikketta tal-AMA u t-tikketta tal-kwalità tal-AMA applikabbli wara s-26 ta' Settembru 2002, filwaqt li, taħt in-numru tar-reġistrazzjoni NN 34/2000, il-Kummissjoni indirizzat il-miżuri li jikkonċernaw il-bijotikketta tal-AMA u t-tikketta tal-kwalità tal-AMA qabel is-26 ta' Settembru 2002, kif ukoll il-miżuri ta' kummerċjalizzazzjoni l-oħrajn mill-AMA.

(11)

Għal raġunijiet amministrattivi interni, fis-16 ta' Marzu 2004 infetaħ dossier ġdid NN 34B/2000 rigward il-miżuri implimentati qabel is-26 ta' Settembru 2002. Il-Kummissjoni tinnota li din il-kawża ma għandha ebda impatt fuq is-sustanza tal-proċedura preżenti.

(12)

Ir-regoli interni ġodda tal-AMA introduċew disinn ġdid għat-tikketti u għamlu standards ta' kwalità ġodda applikabbli għall-prodotti li juru waħda minn dawn it-tikketti. Mill-ispjegazzjonijiet ipprovduti mill-awtoritajiet Awstrijaċi u l-eżaminazzjoni dettaljata tat-tikketti u l-istandards ta' kwalità ġodda, deher li dawn kienu adottati biex jikkonformaw mar-regoli ġodda tal-Komunità.

(13)

Filwaqt li l-verżjoni l-ġdida tar-regoli interni tal-AMA ma stipulatx il-kundizzjonijiet dwar l-oriġini tal-prodotti, l-att legali bażiku li jirregola l-AMA, l-Att dwar l-AMA, xorta rrefera biss għal prodotti nazzjonali. F'dan ir-rigward, permezz ta' ittra datata d-19 ta' Diċembru 2002 u rreġistrata fit-23 ta' Diċembru 2002, l-awtoritajiet Awstrijaċi kkonfermaw li, skont ir-regoli ġodda, it-tikketti tal-AMA huma disponibbli għall-prodotti kollha, irrispettivament mill-oriġini tagħhom, filwaqt li impenjaw ruħhom għall-adattament sussegwenti tal-Att dwar l-AMA. Abbażi tar-raġunijiet imsemmija fuq, is-servizzi tal-Kummissjoni kienu tal-fehma li l-iskema ta' għajnuna mhux innotifikata rreġistrata bħala NN 34/2000 kienet immodifikata sostanzjalment mis-26 ta' Settembru 2002 sabiex tkun konformi mar-regoli dwar l-għajnuna mill-Istat u, għal din ir-raġuni, kienet ġustifikata valutazzjoni separata tal-iskema wara dik id-data.

(14)

Rigward il-kawża NN 34 A/2000, ġiet ipprovduta informazzjoni addizzjonali mill-awtoritajiet Awstrijaċi permezz ta' ittri tat-2 ta' April 2004 (irreġistrata fil-5 ta' April 2004), tad-19 ta' April 2004, tad-29 ta' April 2004, tal-4 ta' Mejju 2004, tas-7 ta' Mejju 2004, tat-13 ta' Mejju 2004, tad-9 ta' Ġunju 2004, tas-16 ta' Ġunju 2004 u tal-24 ta' Ġunju 2004, kollha rreġistrati fil-jum tal-wasla tagħhom.

(15)

Permezz tad-deċiżjoni C(2004) 2037, il-Kummissjoni ddeċidiet li ma tqajjem ebda oġġezzjoni għal dik il-miżura u qisitha bħala kompatibbli mas-suq komuni skont it-tifsira tal-Artikolu 87(3)(ċ) tal-KE (issal-Artikolu 107(3)(ċ) tat-TFUE), fis-sens li kienet konformi mal-kundizzjonijiet imposti mill-punti 13 u 14 tal-Linji Gwida tal-Komunità għall-għajnuna mill-Istat fis-settur agrikolu (6) (minn hawn 'il quddiem: il-Linji Gwida għall-perjodu 2000-2006) u mil-Linji Gwida tal-Komunità għall-għajnuna mill-Istat għar-reklamar tal-prodotti elenkati fl-Anness I għat-Trattat tal-KE u ta' ċerti prodotti mhux elenkati fl-Anness I (7) (minn hawn 'il quddiem: il-Linji Gwida dwar ir-Reklamar). L-iskema ta' għajnuna eżaminata fil-kawża NN 34 A/2000 kienet limitata fiż-żmien sal-31 ta' Diċembru 2008 għall-miżuri kollha tat-tikketta tal-kwalità (AMA Gütesiegel) u għall-miżuri ta' sostenn għall-kwalità tal-bijotikketta (Biozeichen), filwaqt li l-miżuri ta' reklamar tal-bijotikketta (Biozeichen) kienu limitati fiż-żmien sal-31 ta' Marzu 2006.

(16)

Skont id-deċiżjoni, il-miżuri kollha implimentati minn AMA u AMA Marketing qabel is-26 ta' Settembru 2002, li baqgħu soġġetti għall-kawża NN 34/2000, kienu espressament esklużi mill-eżaminazzjoni fil-kawża NN 34 A/2000. Madankollu, f'dan ir-rigward, mhuwiex ċar meta ddaħħlu fis-seħħ ir-regoli interni ġodda ta' AMA, jiġifieri, jekk il-miżuri ta' għajnuna ngħatawx abbażi tar-regoli l-ġodda diġà mis-26 ta' Settembru 2002, id-data li fiha daħlu fis-seħħ ir-regoli, jew jekk kienx hemm perjodu tranżitorju wara s-26 ta' Settembru 2002, li matulu l-għajnuna kompliet tingħata skont ir-regoli l-antiki.

(17)

Fit-tweġiba tal-14 ta' Settembru 2012, l-awtoritajiet Awstrijaċi sostnew li ma applika ebda perjodu tranżitorju u li r-regoli l-ġodda ddaħħlu fis-seħħ fis-26 ta' Settembru 2002.

(18)

Fit-28 ta' Mejju 2004, l-awtoritajiet Awstrijaċi nnotifikaw il-miżuri ta' kummerċjalizzazzjoni ta' AMA, li jinkludu miżuri ta' kummerċjalizzazzjoni ġenerika, miżuri ta' kummerċjalizzazzjoni barra l-Awstrija u riċerka tas-suq. L-iskema ta' għajnuna rreġistrata taħt in-numru tal-għajnuna mill-Istat N 239/2004 kienet approvata mid-deċiżjoni tal-Kummissjoni C(2004) 3945 tal-20 ta' Ottubru 2004. Permezz tad-deċiżjoni C(2010) 377 tal-21 ta' Jannar 2010, il-Kummissjoni approvat, taħt l-għajnuna mill-Istat bin-numru N 496/2009, kontinwazzjoni tal-iskema ta' għajnuna msemmija fuq sal-31 ta' Diċembru 2013. Dawn id-deċiżjonijiet mhumiex affettwati mid-deċiżjonijiet tal-Qorti ċċitati hawn fuq u l-miżuri approvati mhumiex soġġetti għad-deċiżjoni preżenti.

(19)

Permezz ta' ittra tal-15 ta' Marzu 2006, irreġistrata fl-istess jum, l-awtoritajiet Awstrijaċi nnotifikaw estensjoni sal-31 ta' Diċembru 2010 għall-miżuri li jirrigwardjaw il-bijotikketta (8) (l-iskema ta' għajnuna mill-Istat N 175/2006 approvata mid-deċiżjoni tal-Kummissjoni C(2006) 2281 tat-2 ta' Ġunju 2006). Permezz ta' ittra tad-19 ta' Novembru 2008, l-Awstrija nnotifikat estensjoni sal-31 ta' Diċembru 2013 tal-miżura ta' għajnuna NN 34 A/2000 rigward it-tikketta tal-kwalità u l-bijotikketta, li skadiet fil-31 ta' Diċembru 2010. Fl-istess ħin, l-għajnuna nnotifikata li kienet irreġistrata bħala N 589/2008 u approvata permezz tad-deċiżjoni tal-Kummissjoni C(2009) 1092 tal-25 ta' Frar 2009 issostitwixxiet il-miżura ta' għajnuna N 175/2006.

(20)

Id-deċiżjoni preżenti ma tikkonċernax l-iskemi ta' għajnuna approvati u deskritti fuq N 175/2006, N 589/2008, N 239/2004 u N 496/2009.

(21)

Is-suġġetti tad-deċiżjoni preżenti huma l-miżuri mhux innotifikati ta' AMA taħt l-iskema ta' għajnuna NN 34/2000 (li tkopri l-perjodu qabel is-26 ta' Settembru 20022) u l-miżuri ta' AMA li kienu indirizzati mid-deċiżjoni annullata tal-Kummissjoni NN 34 A/2000 (li tkopri l-perjodu wara s-26 ta' Settembru 2002).

(22)

Id-Deċiżjoni tal-Kummissjoni fil-kawża NN 34 A/2000 kienet ikkontestata quddiem il-Qorti tal-Prim'Istanza (issal-Qorti Ġenerali) mill-kwerelanti msemmija fil-premessa (4) fis-17 ta' Settembru 2004. Il-kawża kienet irreġistrata bħala T-375/04.

(23)

Fis-sentenza tagħha tat-18 ta' Novembru 2009, il-Qorti Ġenerali kkonkludiet li l-Kummissjoni kellha tibda l-proċedura ta' investigazzjoni formali minħabba l-eżistenza ta' kontradizzjoni bejn (i) il-kliem tal-Att dwar l-AMA tal-1992 li, skont il-Qorti Ġenerali, jillimita l-iskema għal prodotti nazzjonali, u (ii) id-direttivi interni tal-AMA u l-assigurazzjonijiet tal-awtoritajiet Awstrijaċi, li sostnew li l-iskema kienet miftuħa għal prodotti minn Stati Membri oħrajn. Il-Qorti Ġenerali sabet li din il-kontradizzjoni kienet biżżejjed sabiex toħloq dubji serji dwar il-kompatibbiltà tal-iskema mas-Suq Intern.

(24)

Għalhekk, il-Qorti Ġenerali kkonkludiet (il-paragrafu 86 tas-sentenza) li l-Kummissjoni kellha tibda l-proċedura pprovduta mill-Artikolu preċedenti 88(2) tal-KE (issal-Artikolu 108(2) tat-TFUE). Abbażi ta' dan, il-Qorti Ġenerali annullat id-Deċiżjoni tal-Kummissjoni fil-kawża NN 34 A/2000.

(25)

Fis-27 ta' Jannar 2010, ir-Repubblika tal-Awstrija appellat is-sentenza msemmija hawn fuq tal-Qorti Ġenerali. L-appell ġie rreġistrat bħala l-kawża C-47/10.

(26)

Fis-sentenza tagħha tas-27 ta' Ottubru 2011, il-Qorti tal-Ġustizzja ma laqgħetx l-appell imressaq mir-Repubblika tal-Awstrija u laqgħet bis-sħiħ id-deċiżjoni tal-Qorti Ġenerali.

(27)

Wara s-sentenza tal-Qorti, il-Kummissjoni fetħet il-proċedura ta' investigazzjoni formali skont l-Artikolu 108(2) tat-TFUE fil-kawża NN 34 A/2000. Wara li kkunsidrat il-motivi tas-sentenza, fid-deċiżjoni tal-ftuħ tat-12 ta' Ġunju 2012 (9), il-Kummissjoni stiednet lill-awtoritajiet Awstrijaċi u lill-partijiet ikkonċernati sabiex jissottomettu l-kummenti tagħhom fi żmien xahar bil-għan li jikkjarifikaw id-dubji rigward il-kontradizzjoni deskritta fil-premessa (23).

(28)

Il-Kummissjoni ma rċeviet ebda kumment minn partijiet terzi.

(29)

L-Awstrija wieġbet permezz ta' ittra tad-29 ta' Ġunju 2012, fejn talbet għal estensjoni tad-data ta' skadenza sabiex tingħata tweġiba. Fit-13 ta' Lulju 2012, il-Kummissjoni tat estensjoni tad-data ta' skadenza sabiex tingħata tweġiba.

(30)

L-awtoritajiet Awstrijaċi pprovdew il-kummenti tagħhom fl-14 ta' Settembru 2012.

(31)

Il-Kummissjoni talbet għal informazzjoni addizzjonali permezz ta' ittra tad-19 ta' Frar 2014. L-awtoritajiet Awstrijaċi wieġbu fl-14 ta' Marzu 2014 u talbu għal estensjoni tad-data ta' skadenza sabiex iwieġbu. L-Awstrija bagħtet informazzjoni addizzjonali fis-7 ta' Mejju 2014.

(32)

Il-Kummissjoni bagħtet talba ġdida għall-informazzjoni fis-17 ta' Diċembru 2014. Fit-23 ta' Diċembru 2014, l-awtoritajiet Awstrijaċi talbu għal estensjoni tad-data ta' skadenza sabiex iwieġbu. Il-Kummissjoni tat din l-estensjoni permezz ta' ittra datata t-8 ta' Jannar 2015. It-tweġiba tal-awtoritajiet Awstrijaċi ġiet sottomessa fis-26 ta' Frar 2015 u fit-3 ta' Marzu 2015.

(33)

miżuri ta' kummerċjalizzazzjoni ta' AMA

(34)

L-Att dwar l-AMA li jistabbilixxi l-AMA daħal fis-seħħ fl-1992. Skont l-informazzjoni pprovduta mill-awtoritajiet Awstrijaċi f'ittra tal-4 ta' Lulju 1997, irreġistrata fis-7 ta' Lulju 1997, il-miżuri ta' kummerċjalizzazzjoni ilhom fis-seħħ mill-1994, jiġifieri qabel l-1 ta' Jannar 1995, id-data meta l-Awstrija ssieħbet fl-Unjoni Ewropea. Madankollu, il-miżuri ta' AMA ma ġewx ikkomunikati mill-awtoritajiet Awstrijaċi lill-Kummissjoni b'konformità mal-Artikoli 143 jew 144 tal-Att ta' Adeżjoni tar-Repubblika tal-Awstrija (10).

(35)

Fis-sottomissjoni tal-14 ta' Settembru 2012 l-Awstrija ddikjarat li l-Kummissjoni kienet “infurmata” dwar il-miżuri ta' kummerċjalizzazzjoni mill-Österreichische Weinmarketing. Madankollu, l-informazzjoni pprovduta f'dik is-sottomissjoni (11) tirreferi biss għall-miżuri xierqa imposti mill-Kummissjoni skont l-Artikolu 93(1) tat-Trattat tal-KE (issal-Artikolu 108(1) tat-TFUE) għas-settur tal-inbid. Dawn il-miżuri ma jaqgħux fl-ambitu tad-deċiżjoni preżenti.

(36)

Permezz ta' ittra tas-7 ta' Frar 1997, fil-kuntest tar-rapport ta' monitoraġġ tal-OECD, il-Kummissjoni għarrfet lill-Awstrija li l-miżuri ta' promozzjoni ta' AMA jistgħu jikkostitwixxu għajnuna mill-Istat u konsegwentement talbet lill-awtoritajiet Awstrijaċi sabiex jipprovdu l-informazzjoni kollha meħtieġa bil-għan li jivvalutaw dawk il-miżuri skont ir-regoli dwar l-għajnuna mill-Istat fis-seħħ u jimlew il-formoli ta' notifika rilevanti. Permezz ta' ittra tat-23 ta' Ġunju 1997, l-awtoritajiet Awstrijaċi pprovdew l-informazzjoni mitluba u formola ta' notifika mimlija. (12)

(37)

Fis-sottomissjoni tagħhom tal-14 ta' Settembru 2012, l-awtoritajiet Awstrijaċi sostnew li l-ittra tat-23 ta' Ġunju 1997 kienet tikkostitwixxi notifika valida u li, mal-iskadenza tal-perjodu ta' xahrejn, l-Istat Membru kien intitolat li jemmen li kienet teżisti approvazzjoni valida għall-għajnuna mill-Istat għal dawk il-miżuri.

(38)

Fir-rigward tad-data tal-għeluq tal-implimentazzjoni, għandha ssir distinzjoni bejn l-attivitajiet ta' kummerċjalizzazzjoni differenti ta' AMA.

(39)

Il-Kummissjoni tinnota f'dan ir-rigward li, permezz tad-deċiżjoni tal-20 ta' Ottubru 2004, il-Kummissjoni approvat, taħt in-numru tal-għajnuna mill-Istat N 239/2004, il-miżuri ta' kummerċjalizzazzjoni tal-AMA li ġejjin: miżuri ta' kummerċjalizzazzjoni ġenerika (reklamar u attivitajiet ta' PR), miżuri ta' kummerċjalizzazzjoni barra l-Awstrija u riċerka tas-suq.

(40)

Fil-qosor, fir-rigward tal-bijotikketta u tat-tikketta tal-kwalità ta' AMA, id-data tat-tmiem tal-miżura kienet il-31 ta' Diċembru 2008, għajr għall-miżuri ta' reklamar tal-bijotikketta li skadew fil-31 ta' Diċembru 2006 (ara l-premessi 15 u 19 ta' hawn fuq). F'dak li għandu x'jaqsam mal-miżuri ta' kummerċjalizzazzjoni l-oħrajn ta' AMA, huma applikaw sal-20 ta' Ottubru 2004, id-data li fiha ġiet approvata l-miżura nnotifikata N 239/2004 (ara l-kapitolu 1.4 u l-premessa 39 ta' hawn fuq).

(41)

Il-Kummissjoni tinnota wkoll li miżura ta' kampanja ta' promozzjoni taċ-ċanga minn AMA ġiet innotifikata u approvata taħt in-numru tal-għajnuna mill-Istat N 570/1998 permezz ta' ittra tal-15 ta' Diċembru 1998. It-tul ta' żmien tal-għajnuna kien limitat għal sentejn.

(42)

Għajr għall-miżuri koperti mid-deċiżjonijiet tal-Kummissjoni fil-kawżi N 570/1998, NN 34 A/2000 u N 239/2004, il-Kummissjoni mhijiex konxja dwar miżuri ta' għajnuna approvati oħrajn relatati mal-attivitajiet ta' kummerċjalizzazzjoni ta' AMA fil-perjodu inkwistjoni.

(43)

Skont l-informazzjoni pprovduta fir-rapporti tal-baġits dettaljati għas-snin 1995-1999 (13) u 2000-2008 (14), intefqu l-ammonti li ġejjin għall-attivitajiet ta' kummerċjalizzazzjoni ta' AMA:

(44)

Permezz ta' ittra tat-12 ta' Ġunju 2012, l-awtoritajiet Awstrijaċi ġew mistiedna jikkonfermaw iċ-ċifri msemmija fuq u jipprovdu tqassim tal-baġit kull sena għal kull kategorija ta' għajnuna (reklamar għat-tikketti tal-kwalità, reklamar għall-bijotikketti, reklamar ġeneriku, reklamar barra l-Awstrija, miżuri ta' kwalità, kif ukoll appoġġ tekniku rigward it-tikketti u l-prodotti ġeneriċi). Iċ-ċifri li ġejjin ġew ipprovduti fis-sottomissjoni tal-14 ta' Settembru 2012.

(45)

L-awtoritajiet Awstrijaċi pprovdew iċ-ċifri li ġejjin għall-miżuri tal-bijotikketta u t-tikketta tal-kwalità fil-perjodu 2002-2008.

(46)

Mill-informazzjoni disponibbli jidher li l-benefiċjarji tal-miżuri ta' kummerċjalizzazzjoni huma l-produtturi agrikoli kif ukoll l-impriżi attivi fl-ipproċessar u fil-kummerċjalizzazzjoni ta' prodotti agrikoli, inkluża l-industrija tal-ikel.

(47)

L-att legali bażiku għall-miżuri ta' kummerċjalizzazzjoni kollha ta' AMA huwa l-Att dwar l-AMA — Bundesgesetz über die Errichtung der Marktordnungsstelle “Agrarmarkt Austria” (il-Liġi Federali dwar l-istabbiliment tal-aġenzija li tirregola s-suq “Agrarmarkt Austria”) (15).

(48)

Wara talba għall-informazzjoni tat-30 ta' April 2014, l-awtoritajiet Awstrijaċi ssottomettew l-atti legali ta' implimentazzjoni kollha (Richtlinien, Verordnungen, eċċ., inklużi direttivi interni dwar l-AMA u regoli interni oħrajn) li jirregolaw it-tikketta tal-kwalità u l-bijotikketta, kif ukoll il-miżuri ta' kummerċjalizzazzjoni rispettivi.

(49)

L-AMA hija korp irregolat bil-liġi pubblika stabbilit fl-1992 mill-Att dwar l-AMA u kkontrollat mill-Istat. L-iskema hija amministrata minn AMA Marketing, sussidjarja bi proprjetà sħiħa tal-AMA.

(50)

Fil-kawża NN 34 A/2000 l-awtoritajiet Awstrijaċi pprovdew l-informazzjoni li ġejja dwar l-istatus u l-attivitajiet ta' AMA:

(51)

Skont l-awtoritajiet Awstrijaċi, AMA u AMA Marketing ma jikkummerċjalizzawx prodotti jew servizzi. AMA Marketing tissorvelja l-użu tat-tikketta tal-kwalità u tal-bijotikketta, tippjana u tikkoordina l-miżuri ta' promozzjoni (reklamar, fieri, wirjiet, avvenimenti ta' PR u avvenimenti simili), tipproduċi materjal ta' informazzjoni dwar programmi u tikketti ta' kwalità, u tikkummissjona proġetti ta' riċerka dwar diversi suġġetti konnessi mal-kwalità fil-produzzjoni agrikola.

(52)

AMA Marketing ma twettaqx kampanji ta' reklamar jew kontrolli tal-prodotti. Minflok, AMA Marketing tagħżel impriżi privati b'konformità mal-leġiżlazzjoni nazzjonali li tittrasponi d-Direttiva tal-Kunsill 92/50/KEE (16) u sussegwentement id-Direttiva 2004/18/KE tal-Parlament Ewropew u tal-Kunsill (17) sabiex iwettqu tali kampanji jew kontrolli.

(53)

L-impriżi Awstrijaċi fl-industrija tal-ikel u tal-agrikoltura jħallsu imposti obbligatorji stabbiliti mill-Att dwar l-AMA biex jiffinanzjaw sa 100 % ta' dawk il-miżuri. AMA u AMA Marketing infushom huma ffinanzjati wkoll minn dawk l-imposti.

(54)

L-Att dwar l-AMA (§ 21ċ(1)) jistabbilixxi li l-imposti għandhom jitħallsu għall-operazzjonijiet jew il-prodotti li ġejjin:

(55)

L-ammont massimu tal-kontribuzzjonijiet huwa stabbilit ukoll fl-Att dwar l-AMA (§ 21d). Il-livell konkret tal-kontribuzzjonijiet huwa stabbilit permezz ta' regolament tal-bord amministrattiv tal-AMA (Verordnung des Verwaltungsrates).

(56)

Permezz ta' ittra tal-14 ta' Settembru 2012, l-awtoritajiet Awstrijaċi kkomunikaw l-ammonti li ġejjin tal-imposti miġbura fil-perjodu 1995-2008 (18):

(57)

Permezz ta' eżempju, fis-sena 2003 inġabar total ta' EUR 13 529 199,62 f'imposti kif ġej:

(58)

Skont § 21ċ (2) tal-Att dwar l-AMA, il-prodotti li joriġinaw minn barra l-Awstrija huma eżentati minn dawn il-ħlasijiet.

(59)

Permezz ta' ittra tas-16 ta' Ottubru 2000, fil-kuntest tal-proċedura NN 34/2000, l-awtoritajiet Awstrijaċi pprovdew ir-rapporti annwali għas-snin 1995, 1996, 1997, 1998 u 1999 li fihom huma elenkati l-miżuri ta' kummerċjalizzazzjoni kollha ta' AMA.

(60)

Fir-rigward tat-tikketta tal-kwalità u tal-bijotikketta, l-awtoritajiet Awstrijaċi pprovdew deskrizzjoni dettaljata fil-qafas tal-valutazzjoni tal-iskema tal-għajnuna NN 34 A/2000.

(61)

Abbażi ta' din l-informazzjoni, jidher li l-attivitajiet ta' kummerċjalizzazzjoni jistgħu jiġu raggruppati taħt il-kategoriji ta' għajnuna li ġejjin:

(62)

Deskrizzjoni dettaljata tal-miżuri għal kull kategorija ta' għajnuna tingħata fil-kapitoli 4.1 sa 4.3, rispettivament.

(63)

Skont l-informazzjoni pprovduta mill-awtoritajiet Awstrijaċi rigward l-iskema ta' għajnuna NN 34 A/2000, il-bijotikketta tista' tkun jew tista' ma tkunx inkludiet indikazzjoni tal-oriġini. It-tikketta tal-kwalità dejjem kienet tinkludi indikazzjoni speċifika tal-oriġini u t-tieni qasam b'kuluri u/jew simboli li jindikaw (b'mod grafiku) l-oriġini, skont l-Istat Membru jew ir-reġjun tal-produzzjoni.

(64)

Skont l-informazzjoni pprovduta mill-awtoritajiet Awstrijaċi dwar l-iskema ta' għajnuna NN 34 A/2000, it-tikketti kellhom l-apparenza li ġejja wara s-sena 2002:

L-apparenza tat-tikketti mis-sena 2002  (19)

(65)

Mill-eżempji sottomessi lill-Kummissjoni għall-perjodu 1995-2002 jirriżulta li l-bijotikketta kellha l-istess apparenza bħal fil-perjodu wara l-2002, filwaqt li sal-31 ta' Diċembru 1999, it-tikketta tal-kwalità kellha disinn differenti (kif muri hawn taħt): minflok ir-referenza “AMA Gütesiegel” tpoġġiet il-kelma “Austria” (fl-istess daqs) fil-qasam ċentrali, jiġifieri l-parti viżwalment dominanti tat-tikketta.

Apparenza tat-tikketta tal-kwalità fil-perjodu mill-1 ta' Jannar 1995 sal-31 ta' Diċembru 1999 Tikketta tal-kwalità (L-Awstrija)

(66)

Minn Jannar 2000, it-tikketta tal-kwalità oriġinali ġiet sostitwita bit-tikketta murija hawn fuq fil-premessa 65 (21). Din hija riflessa fir-rapporti annwali minn dak il-perjodu 'l quddiem.

(67)

Skont l-informazzjoni pprovduta b'rabta mal-iskema ta' għajnuna NN 34 A/2000, il-bijotikketta u t-tikketta tal-kwalità ngħataw biss fir-rigward tal-prodotti li jissodisfaw ċerti kriterji ta' kwalità rigward il-metodi ta' produzzjoni, il-karatteristiċi tal-prodotti u, f'ċerti każijiet, rekwiżiti b'rabta mal-oriġini ġeografika ta' prodott.

(68)

L-awtoritajiet Awstrijaċi taw assigurazzjonijiet li d-dispożizzjonijiet tad-Direttiva 2000/13/KE tal-Parlament Ewropew u tal-Kunsill (22) ġew irrispettati fir-reklamar issussidjat.

(69)

Il-bijotikketta ngħatat biss fir-rigward tal-prodotti organiċi li jissodisfaw il-kriterji stipulati fir-Regolament tal-Kunsill (KEE) Nru 2092/91 (23).

(70)

It-tikketta tal-kwalità ngħatat biss għall-prodotti li ssodisfaw ir-rekwiżiti tal-kwalità skont l-Artikolu 24a (b) tar-Regolament tal-Kunsill (KE) Nru 1257/1999 (24). Il-prodotti li jissodisfaw il-kriterji tal-kwalità meħtieġa għall-użu tat-tikketta tal-kwalità ssodisfaw l-istandards ogħla li ġejjin skont it-tifsira tal-punt 47 tal-Linji Gwida għall-perjodu 2000-2006 (25).

(71)

Ir-reġjun tal-oriġini ppreżentat fit-tikketti tqies bħala r-reġjun fejn sar l-ipproċessar tal-prodott u minn fejn oriġinaw il-materji primi determinanti (wertbestimmende Rohstoffe). Terz ta' tali materji primi jistgħu jiġu minn reġjuni oħrajn jekk ma jkunux jistgħu jitkabbru jew jinkisbu fir-reġjun tal-oriġini.

(72)

Fil-produzzjoni tal-bajd frisk, it-tiġieġ tal-bajd kellhom ikunu mwielda u msemmna fir-reġjun ikkonċernat. Fil-produzzjoni taċ-ċanga, tal-vitella, tal-majjal, tad-dundjan u tal-ħaruf, l-annimali kellhom ikunu mwielda fir-reġjun ikkonċernat.

(73)

Fir-rigward tal-logo użat għat-tikketta tal-kwalità, fis-sottomissjoni tagħhom ta' informazzjoni tal-14 ta' Settembru 2012, l-awtoritajiet Awstrijaċi hemżu r-regoli applikabbli għall-perjodu sal-1999. Din l-informazzjoni turi li kemm l-atti regolatorji (AMA-Gütesiegel Richtlinien (26), Regulativ für die Verleihung des Rechts zur Führung der Urspungs- und Gütezeichen für Lebensmittel (27)) kif ukoll il-formoli tal-applikazzjoni (Antrag auf Verleihung des Herkunfts- und Gütezeichens für Lebensmittel (28)) użaw il-logo muri fil-premessa 65.

(74)

Wara s-sena 1999, il-logo użat għat-tikketta tal-kwalità kien identiku għal-logo muri fil-premessa 64 aktar 'il fuq.

(75)

Fir-rigward tat-tikketta tal-kwalità, abbażi tal-informazzjoni pprovduta fir-rapporti annwali għas-snin 1995 sal-1999 u dik relatata mal-iskema ta' għajnuna NN 34 A/2000, jista' jiġi konkluż li l-għajnuna ngħatat għall-ispejjeż tal-kampanji ta' reklamar maħsuba biex itejbu l-għarfien tal-kwalità tal-konsumaturi u jippromwovu t-tikketta tal-kwalità. L-għan kien li tinħoloq immaġini tat-tikketta tal-kwalità bħala gwida biex isir ix-xiri (Orientierungshilfe beim Einkauf).

(76)

Fir-rigward tal-bijotikketta, l-għajnuna ngħatat għall-ispejjeż tal-kampanji ta' reklamar sabiex il-konsumaturi jiġu informati dwar il-prodotti li għandhom il-bijotikketta, kif ukoll dwar ir-rekwiżiti għall-użu tat-tikketta u dwar il-biedja organika b'mod ġenerali.

(77)

Il-kampanji kienu jikkonsistu f'reklami fuq mezzi stampati u elettroniċi, fil-punti tal-bejgħ (POS) u f'avvenimenti pubbliċi, fi stands ta' informazzjoni b'fuljetti li jikkonċernaw il-prodotti li għandhom it-tikketta tal-kwalità jew il-bijotikketta, f'fuljetti ta' informazzjoni, bħala parti minn dewqan tal-prodotti f'fieri u okkażjonijiet pubbliċi oħrajn, kif ukoll mezzi oħrajn sabiex tinġibed l-attenzjoni tal-konsumaturi, bħal stikers mal-art (impoġġija fis-supermarkets) b'simboli u informazzjoni marbuta mat-tikketta tal-kwalità u l-bijotikketta. Il-kampanji kkonċentraw fuq gruppi ta' prodotti differenti fi żmien li jiddependi fuq is-sitwazzjoni lokali u tas-suq.

(78)

Skont l-informazzjoni pprovduta mill-awtoritajiet Awstrijaċi b'rabta mal-miżura NN 34 A/2000, ir-reklami jew l-attivitajiet fil-POS u f'avvenimenti pubbliċi għall-perjodu 2002-2008 ma għamlu ebda referenza għal kwalunkwe produtturi jew marki msemmija. Minflok, dawn kienu jinkludu biss informazzjoni dwar ir-rekwiżiti tal-kwalità tal-prodotti u l-kontrolli tal-kwalità marbuta mat-tikketta tal-kwalità sabiex il-konsumaturi jkunu jistgħu jirrikonoxxu l-kwalità speċjali tal-prodotti li għandhom it-tikketta. L-appoġġ għall-attivitajiet tal-POS kien disponibbli għall-impriżi interessati kollha li xtaqu jorganizzaw tali kampanji fil-bini tagħhom. Dawn l-impriżi nfushom ma rċevew ebda għajnuna diretta taħt l-iskema ta' għajnuna nnotifikata.

(79)

Barra minn hekk, skont l-awtoritajiet Awstrijaċi, l-oriġini tal-prodott, fejn tissemma, kellha tkun il-messaġġ sekondarju fir-reklamar issussidjat. L-awtoritajiet Awstrijaċi ssottomettew eżempji rappreżentattivi ta' reklamar stampat u awdjoviżiv sabiex juru kif ġew iddisinjati r-reklami bil-għan li jkun żgurat li l-messaġġ li jikkonċerna l-oriġini dejjem jibqa' sekondarju.

(80)

Mill-informazzjoni relatata mal-miżura NN 34 A/2000 jidher li parti mill-miżuri tal-bijotikketta tikkonċerna attivitajiet ta' promozzjoni koffinanzjati mill-UE.

(81)

L-informazzjoni pprovduta fir-rapporti annwali 1995-1999 turi li l-kampanji ta' reklamar kienu jikkonċernaw il-ħalib u prodotti tal-ħalib, il-laħam u prodotti tal-laħam, il-bajd, il-frott, il-ħxejjex u l-patata, kif ukoll prodotti pproċessati minn din il-materja prima u fjuri.

(82)

Il-kampanji ta' reklamar kienu jikkonsistu f'reklami fuq mezzi stampati u elettroniċi u promozzjoni tal-bejgħ f'punti ta' bejgħ (POS), fieri u avvenimenti pubbliċi. Il-promozzjoni tal-bejgħ għamlet użu minn stands ta' informazzjoni b'kampjuni ta' prodotti u fuljetti li jikkonċernaw il-prodotti rreklamati u mezzi oħrajn sabiex tinġibed l-attenzjoni tal-konsumaturi, bħal ittestjar tal-prodotti, konkorsi bi premjijiet (Gewinnspiele), kif ukoll posters, bnadar u stikers fuq il-bankini b'informazzjoni relatata mal-prodotti rreklamati. Barra minn hekk, ġew prodotti diversi materjali stampati u oħrajn sabiex jippromwovu prodotti differenti jew gruppi ta' prodotti. Tali materjali jinkludu fuljetti ta' informazzjoni, rivisti, kotba tat-tisjir, ħwejjeġ stampati u rigali promozzjonali.

(83)

Fl-eżempji ta' reklamar minn dak il-perjodu disponibbli għall-Kummissjoni, l-oriġini tal-prodott tidher f'kelma u simbolu mhux biss fuq it-tikketta tal-kwalità iżda wkoll f'postijiet oħra fuq il-materjal ta' reklamar.

(84)

Sabiex jiġu pprovduti ftit eżempji inklużi fir-rapport annwali tal-1995 u l-kampjuni sottomessi mill-Awstrija lill-Kummissjoni:

(85)

Ir-rapport annwali tal-1996 jiġbor fil-qosor il-missjoni ta' AMA kif ġej: “li tikkonvinċi lill-konsumaturi domestiċi, minkejja d-diversità dejjem tikber tal-oġġetti tal-ikel Ewropej, dwar il-benefiċċji tal-prodotti Awstrijaċi” (“die einheimischen Konsumenten, trotz der zunehmenden Vielfalt des europäisch werdender Lebensmittelangebotes, von den Vorzügen österreichischer Produkte zu überzeugen”) (29). Huwa mbagħad ikompli jgħid: “Il-kultivazzjoni ta'” preferenza għall-Awstrija “hija kontribut ewlieni għaż-żamma tas-sehem mis-suq għall-prodotti agrikoli tagħna”. (“Diese Kultivierung der” Präferenz für Osterreich “ist ein wesentlicher Beitrag zur Marktanteilsicherung für unsere Agrarprodukte”). L-istess rapport jiddikjara li l-kooperazzjoni bejn AMA Marketing u l-produtturi nazzjonali tant irnexxiet li l-produtturi barranin tal-ħalib u tal-butir bilkemm daħlu fis-suq Awstrijak (30).

(86)

Il-kapitolu finali tar-rapport intitolat “Patriotism valued by trade and the consumer” (“Patriotismus bei Handel und Konsument gefragt”) jiddikjara li s-sehem għoli mis-suq ta' prodotti nazzjonali, imqabbel mal-kompetizzjoni minn prodotti oħrajn tal-UE, kien salvagwardjat (31). Ir-rapport isemmi l-kumpaniji (bejjiegħa bl-imnut) involuti (32) fil-kampanja u jenfasizza li l-użu tal-logo aħmar-abjad-aħmar kien ikkombinat mal-enfasi fuq il-vantaġġi tal-oġġetti tal-ikel Awstrijaċi għall-konsumaturi.

(87)

Fir-rigward tal-kampanji u l-azzjonijiet immexxija fis-sena 1996, dawn li ġejjin huma pprovduti bħala eżempji:

(88)

Ir-rapport isemmi wkoll kampanji li ma jagħmlu ebda referenza għall-oriġini tal-prodotti bħal “Milch — white energy” (36) jew il-kampanja skolastika taħt is-slogan “The unbeatable apple” (“Der unbesiegbare Apfel”) (37). Dan ma jinkludi ebda referenza għal ismijiet kummerċjali jew għall-oriġini tal-prodott, iżda jirreferi biss għal karatteristiċi ġeneriċi tal-frott (nutrijenti, enerġija, vitamini u minerali eċċ.).

(89)

Ir-rapport annwali tas-sena 1997 isemmi li l-miżuri ta' AMA rnexxielhom “jibnu ostakoli għad-dħul għal prodotti oħrajn tal-UE” u jiċċita l-każ tal-jogurt li għalih il-produtturi nazzjonali kisbu lura sehem mis-suq ta' 15 % mill-produtturi barranin (38).

(90)

Għas-sena 1999, f'xi eżempji ta' reklamar, ir-reklamar huwa marbut ma' impriżi partikolari (pereżempju, reklam stampat dwar il-ġobon Awstrijak jirreferi għall-produttur tal-ġobon […….] (39) u reklamar għall-bajd Awstrijak għall-kumpanija tal-bejgħ tal-ikel bl-imnut […….] (40)).

(91)

Fir-reklamar għall-jogurt bit-tikketta tal-kwalità ta' AMA, intwera t-test li ġej “Jogurt mill-Awstrija” (41).

(92)

Ir-rapporti annwali għas-snin 1997, 1998 u 1999 jinkludu kampanji u slogans simili kif deskritti fuq.

(93)

Ir-rapporti annwali għas-snin 2000 u 2001 jirreferu għal kampanji bħal:

(94)

L-iskop tal-miżuri ta' reklamar kien li jgħarrfu lill-konsumaturi u lill-professjonisti dwar offerti ta' prodotti mill-Awstrija — it-togħma u l-użu kulinari tagħhom — u li jħeġġuhom (għall-ewwel darba) jipprovaw tali prodotti.

(95)

Il-kampanji ta' reklamar kienu jikkonsistu f'reklami fuq il-mezzi tax-xandir, fuljetti, rigali promozzjonali, ittestjar tal-prodotti u e-mails diretti lill-konsumaturi.

(96)

Ir-reklamar għall-prodotti Awstrijaċi sar ukoll fil-kuntest tal-ġimgħat iddedikati għall-ikel fl-Awstrija u ta' fieri internazzjonali fl-Istati Membri tal-UE barra l-Awstrija.

(97)

Skont l-awtoritajiet Awstrijaċi, l-imposti għall-perjodu 2002-2008 imsemmija hawn fuq ma rriżultaw f'ebda effett diskriminatorju skont it-tifsira tal-Artikolu 90 tat-Trattat tal-KE (issal-Artikolu 110 tat-TFUE). B'mod partikolari, huma jiddikjaraw li ma hemmx indikazzjonijiet li l-prodotti ta' oriġini Awstrijaka kummerċjalizzati barra l-Awstrija ma jistgħux jibbenifikaw mill-miżura sal-istess punt bħall-prodotti kummerċjalizzati fl-Awstrija.

(98)

Fir-rigward tat-tikketta tal-kwalità u tal-bijotikketta ta' AMA, l-għajnuna ngħatat għall-iżvilupp ta' sistemi ta' assigurazzjoni tal-kwalità (studji dwar it-titjib tal-kwalità tal-produzzjoni b'mod ġenerali, l-abbozzar u d-distribuzzjoni ta' dokumenti dwar l-assigurazzjoni tal-kwalità, l-iżvilupp ta' sistemi ta' informatika relatati fi ħdan AMA Marketing), kontrolli tal-kwalità u kontrolli għal prodotti organiċi (kontrolli fuq il-post minn korpi esterni u analiżijiet fil-laboratorju). Il-kontrolli tal-kwalità kollha ta' rutina tħallsu mill-pussessuri tal-liċenzji nfushom.

(99)

Barra minn hekk, miżura li tikkonsisti fl-introduzzjoni ta' skema ta' assigurazzjoni tal-kwalità ISO 9002 hija elenkata fir-rapporti annwali għas-snin 1995-1999.

(100)

L-għajnuna ngħatat għal proġetti ta' informazzjoni ġenerali, attivitajiet ta' PR għat-tixrid ta' għarfien ġenerali dwar it-tikketti u għal kompetizzjonijiet organizzati għall-promozzjoni tat-tikketti tal-kwalità (Gewinnspiele).

(101)

L-ispejjeż eliġibbli kienu dawk imġarrba għall-organizzazzjoni ta' laqgħat ta' informazzjoni u għall-produzzjoni ta' fuljetti, katalogi, newsletters u kontribuzzjonijiet fuq l-Internet.

(102)

L-għan kien li l-konsumaturi jingħataw informazzjoni fattwali dwar il-programm tat-tikketta tal-kwalità u tal-bijotikketta ta' AMA b'mod ġenerali, bħall-orjentazzjoni tal-kwalità tal-programm tat-tikketta tal-kwalità, il-kontenut tat-tikketti u s-sistemi ta' kontroll.

(103)

Skont l-informazzjoni mill-awtoritajiet Awstrijaċi, il-miżuri msemmija hawn fuq ma kinux jikkonċernaw gruppi ta' prodotti speċifiċi u lanqas ma kienu jipperswadu lill-klijenti sabiex jixtru prodott partikolari.

(104)

Skont ir-rapporti annwali, fil-perjodu mill-1995 sal-1999 ingħatat għajnuna għal attivitajiet ta' PR u informazzjoni ġenerali, l-organizzazzjoni ta' fieri u l-parteċipazzjoni fihom u r-riċerka tas-suq

(105)

L-attivitajiet ta' PR u informazzjoni ġenerali, li għalihom ingħatat għajnuna, kienu mmirati biex jippreżentaw il-karatteristiċi ġeneriċi tal-oġġetti tal-ikel u indirizzaw tħassib ta' interess ġenerali, bħall-għoti ta' pariri u informazzjoni f'każ ta' skandlu tal-ikel. L-attivitajiet ta' PR kienu jinkludu wkoll it-titjib tal-bażi ta' komunikazzjoni fil-mezzi tax-xandir u l-mezzi użati, bħal stqarrijiet għall-istampa, konferenzi stampa, servizz tal-istampa, newsletters, jiem għall-pubbliku u lobbying.

(106)

Ingħatat ukoll għajnuna għall-organizzazzjoni ta' u l-parteċipazzjoni f'avvenimenti bħal kompetizzjonijiet, konferenzi, seminars u sessjonijiet ta' ħidma fl-Awstrija, kif ukoll f'“ġimgħat Awstrijaċi” u fieri fi Stati Membri oħrajn tal-UE.

(107)

L-għajnuna għar-riċerka tas-suq ingħatat għat-tħejjija ta' studji dwar dejta tas-suq ġenerali dwar l-ikel, l-iżvilupp tas-swieq, l-imġiba tal-konsumaturi, ix-xejriet u l-analiżijiet tal-bejgħ tal-prodotti agrikoli rilevanti.

(108)

L-għajnuna kienet tkopri 100 % tal-ispejjeż eliġibbli tal-miżuri ta' kummerċjalizzazzjoni ta' AMA.

(109)

Skont l-informazzjoni pprovduta mill-awtoritajiet Awstrijaċi, l-għajnuna għal prodotti ta' kwalità u għal appoġġ tekniku rigward it-tikketta tal-kwalità u l-bijotikketta qatt ma kienet aktar minn EUR 100 000 għal kull benefiċjarju f'perjodu ta' tliet snin.

(110)

F'dak li għandu x'jaqsam mal-miżuri ta' kontroll rigward l-użu tat-tikketta tal-kwalità, l-awtoritajiet Awstrijaċi kkonfermaw li l-għajnuna kienet eliminata sal-2009.

(111)

L-Artikolu 107(1) tat-TFUE li jipprojbixxi l-għajnuna mill-Istat japplika jekk għajnuna tingħata minn Stat Membru jew permezz ta' riżorsi tal-Istat fi kwalunkwe forma, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew il-produzzjoni ta' ċerta merkanzija, sakemm din taffettwa l-kummerċ bejn l-Istati Membri.

(112)

Fir-rigward tal-klassifikazzjoni tal-fondi bħala riżorsi tal-Istat, ma hemm bżonn li ssir ebda distinzjoni bejn il-każijiet fejn l-għajnuna titħallas direttament mill-Istat jew fejn titħallas minn korpi pubbliċi jew privati maħtura jew stabbiliti mill-Istat għal dak l-iskop (46).

(113)

Il-Kummissjoni tinnota li fil-kawża preżenti l-għajnuna tingħata mhux direttament mill-Istat, iżda minn AMA, korp intermedju stabbilit bil-liġi u kkontrollat mill-Istat (ara l-premessa 49). AMA tamministra u għandha l-proprjetà sħiħa ta' AMA Marketing, li abbażi tagħha jista' jiġi preżunt li hija teżerċita influwenza deċiżiva fuq tal-aħħar. Għalhekk, għall-fini ta' din it-taqsima, AMA u AMA Marketing ser jiġu vvalutati flimkien. Għalhekk, għandu jiġi eżaminat jekk l-imposti miġbura minn AMA jistgħux jitqiesu bħala riżorsi tal-Istat imputabbli lill-Istat.

(114)

AMA u AMA Marketing ġew stabbiliti bil-liġi. L-Istat jistabbilixxi l-objettivi ta' dawn il-korpi (l-Artikolu 2 tal-liġi dwar l-AMA), l-istruttura tal-ġestjoni tagħhom (l-Artikoli 4-17 tal-liġi dwar l-AMA) u l-kompożizzjoni tal-bord tat-tmexxija (ara wkoll il-premessa 118). Għalhekk, dawn il-korpi huma kkontrollati mill-Istat. L-attivitajiet ta' kummerċjalizzazzjoni tagħhom huma ffinanzjati minn imposti parafiskali (ara l-premessi 49 u 53) (47). Il-liġi dwar l-AMA (l-Artikolu 21a(1)) tistabbilixxi l-użu tal-imposti miġbura. AMA hija soġġetta għal skrutinju mill-istituzzjonijiet tal-Istat, bħall-Qorti tal-Awdituri Awstrijaka (48). Barra minn hekk, l-Artikolu 29 tal-liġi dwar l-AMA jiddikjara li, meta twettaq proċeduri amministrattivi, AMA tapplika l-Att dwar il-Proċedura Amministrattiva Ġenerali (allgemeines Verwaltungsverfahrensgesetz).

(115)

Id-deċiżjonijiet tal-AMA jistgħu jiġu kkontestati fil-Bundesverwaltungsgericht (il-Qorti Amministrattiva Federali) (49). Skont il-verżjoni tal-2004 tal-liġi dwar l-AMA, id-deċiżjonijiet ta' AMA jistgħu jiġu kkontestati mal-Ministeru tal-Agrikoltura u l-Forestrija.

(116)

Il-ġbir tal-kontribuzzjoni skont il-Liġi dwar l-AMA huwa kompetenza tal-AMA. AMA għandha l-kompetenza li tispezzjona l-bini jew iż-żoni agrikoli u li titlob għal rapporti jew evidenza mill-impriżi responsabbli għall-imposta (50). Ir-reati kontra l-liġi dwar l-AMA huma punibbli mill-awtorità amministrattiva distrettwali (Bezirksverwaltungsbehörde) b'multa sa massimu ta' EUR 3 630 (51). Tentattiv biex wieħed jaħrab ir-regoli tal-AMA huwa punibbli wkoll. F'każ li l-multa ma tkunx tista' tinġabar, jista' jiġi impost perjodu ta' priġunerija sa massimu ta' sitt ġimgħat (52).

(117)

L-awtoritajiet Awstrijaċi ddikjaraw li l-iskop tal-imposta, l-ambitu tagħha u l-livell massimu tal-imposta huma stabbiliti mil-Liġi dwar l-AMA (53). Il-livell konkret tal-imposta huwa stabbilit mill-bord tat-tmexxija ta' AMA (Verwaltungsrat der Agrarmarkt Austria). Il-bord tat-tmexxija jistabbilixxi l-livell konkret tal-imposta abbażi tas-sitwazzjoni tas-suq ta' kull prodott ikkonċernat, l-iżvilupp tal-bejgħ, is-sitwazzjoni tad-dħul tal-prodotti domestiċi fl-Awstrija u barra u l-ħtieġa għal u l-adegwatezza tal-implimentazzjoni tal-miżuri ta' kummerċjalizzazzjoni (54).

(118)

Il-bord tat-tmexxija ta' AMA huwa kompost minn 4 membri li jirrappreżentaw lill-Kamra tal-Agrikoltura (Landwirtschaftskammer Österreich), il-Kamra Federali tax-Xogħol (Bundesarbeitskammer), il-Kamra tal-Ekonomija (Wirtschaftskammer Österreich) u l-Federazzjoni Awstrijaka tat-Trade Unions (Österreichischer Gewerkschaftsbund) (55).

(119)

Fid-deċiżjoni tal-ftuħ, il-Kummissjoni vverifikat l-applikazzjoni tal-ġurisprudenza Pearle għall-kawża inkwistjoni. Fil-15 ta' Lulju 2004, il-Qorti tal-Ġustizzja rrimarkat fis-sentenza tagħha fil-kawża Pearle  (56) li l-kontribuzzjonijiet obbligatorji imposti minn korp intermedjarju fuq l-impriżi kollha f'settur kummerċjali jistgħu jitqiesu bħala li ma jikkostitwixxux riżorsi mill-Istat meta jiġu ssodisfati l-erba' kundizzjonijiet kumulattivi li ġejjin:

(120)

Abbażi tal-informazzjoni disponibbli, il-Kummissjoni tqis li l-iskema ma tissodisfax dawn il-kundizzjonijiet kollha.

(121)

Fir-rigward tal-ewwel kundizzjoni, għandu jiġi nnotat li l-finanzjament tal-miżuri ta' kummerċjalizzazzjoni huwa amministrat mhux minn organizzazzjoni professjonali li tirrappreżenta lis-settur, iżda minn AMA Marketing, korp pubbliku stabbilit u kkontrollat mill-Istat (ara l-premessa 49 u l-Artikolu 3 tal-Att dwar l-AMA).

(122)

F'dak li għandu x'jaqsam mat-tielet kundizzjoni, l-imposta u l-ammont massimu tal-kontribuzzjonijiet jiġu imposti permezz tal-liġi (jiġifieri permezz tal-Att dwar l-AMA) u miġbura minn korp ikkontrollat mill-Istat u mhux minn organizzazzjoni professjonali tas-settur kummerċjali. Barra minn hekk, skont l-Att dwar l-AMA, l-imposta hija obbligatorja (ara l-premessa 53). Dawn l-elementi juru l-intervent tal-Istat rigward il-metodu ta' finanzjament tal-għajnuna.

(123)

B'hekk, il-Kummissjoni hija tal-fehma li l-kawża preżenti hija differenti mill-kundizzjonijiet li abbażi tagħhom il-kontribuzzjonijiet analizzati fis-sentenza tal-Qorti tal-Ġustizzja fil-kawża Pearle kienu meqjusa bħala li ma jikkostitwixxux riżorsi tal-Istat.

(124)

Fit-30 ta' Mejju 2013, fil-kawża Doux Élevage, il-Qorti tal-Ġustizzja wieġbet mistoqsija li rreferiet għal deċiżjoni preliminari dwar l-interpretazzjoni tal-kunċett ta' riżorsi tal-Istat (57).

(125)

Fis-sentenza tagħha, il-Qorti kkonkludiet li deċiżjoni tal-awtorità nazzjonali li testendi, għal dawk kollha li jaħdmu fis-settur agrikolu, ftehim li, fil-qafas ta' organizzazzjoni interprofessjonali rikonoxxuta mill-awtorità nazzjonali, jintroduċi kontribuzzjoni maħsuba biex tippermetti l-implimentazzjoni ta' miżuri dwar il-komunikazzjoni, il-promozzjoni, ir-relazzjonijiet esterni, l-assigurazzjoni tal-kwalità, ir-riċerka u d-difiża tal-interessi tas-settur ikkonċernat u, b'hekk, jagħmel l-obbligu li titħallas il-kontribuzzjoni applikabbli b'mod ġenerali u ma tikkostitwixxi ebda għajnuna mill-Istat.

(126)

Fis-Sentenza tagħha, il-Qorti qieset li l-kontribuzzjonijiet inkwistjoni kienu ġejjin minn operaturi ekonomiċi privati li jeżerċitaw attività fis-swieq ikkonċernati, li jfisser li l-mekkaniżmu ma jinvolvi ebda trasferiment dirett jew indirett ta' riżorsi tal-Istat. Il-fondi li jinħolqu mill-ħlasijiet ma jgħaddux mill-baġit tal-Istat jew minn entità pubblika oħra u l-Istat ma jirrinunzja għall-ebda riżorsa, irrispettivament mill-forma (bħal taxxi, imposti, kontribuzzjonijiet jew oħrajn) li, skont il-leġiżlazzjoni nazzjonali, kellhom jiġu ttrasferiti fil-baġit tal-Istat.

(127)

Kuntrarju għal din il-kawża, il-kawża preżenti ma tinvolvix kontribuzzjonijiet (volontarji) stabbiliti b'mod kollettiv minn organizzazzjoni interprofessjonali. Kif muri fil-premessa 53 ta' hawn fuq, l-impriżi Awstrijaċi fl-industrija tal-ikel u tal-agrikoltura jħallsu imposti obbligatorji stabbiliti mill-Att dwar l-AMA. Għalhekk, l-imposti mhumiex ta' natura privata, iżda jiġu ordnati b'mandat mill-Istat permezz ta' att leġiżlattiv.

(128)

Barra minn hekk, kuntrarju għall-kawża Doux Élevage, AMA ma tikkonċernax il-kontribuzzjonijiet introdotti minn organizzazzjonijiet privati. Kif muri hawn fuq fil-premessi 49 sa 54, il-kontribuzzjonijiet jiġu stabbiliti mill-Istat u amministrati minn AMA, korp irregolat bil-liġi pubblika stabbilit mill-Att dwar l-AMA u kkontrollat mill-Istat. AMA Marketing, sussidjarja bi proprjetà sħiħa tal-AMA, tamministra l-iskema.

(129)

Fil-kawża Doux Élevage, il-Qorti kienet tal-fehma li l-kontribuzzjonijiet inkwistjoni żammew il-karattru privat tagħhom kompletament u l-awtoritajiet nazzjonali fil-fatt ma tħallewx jużaw dawk ir-riżorsi primarjament biex jappoġġjaw ċerti negozji. Minflok, kienu l-organizzazzjonijiet interprofessjonali kkonċernati li ddeċidew dwar l-użu ta' dawk ir-riżorsi u, konsegwentement, dawk ir-riżorsi kienu ddedikati kompletament għall-issodisfar tal-għanijiet stabbiliti minn dawk l-organizzazzjonijiet. Barra minn hekk, ir-riżorsi ma kinux kontinwament soġġetti għal monitoraġġ pubbliku u ma kinux disponibbli għall-awtoritajiet tal-Istat.

(130)

Kuntrarju għall-kawża Doux Élevage, fil-kawża preżenti, l-għanijiet segwiti minn AMA mhumiex stabbiliti minn organizzazzjoni privata li tiddeċiedi dwar l-użu ta' dawn ir-riżorsi, iżda fl-att leġiżlattiv li jirregola l-korp pubbliku (jiġifieri l-Att dwar l-AMA, ara l-premessa 54).

(131)

Għalhekk, il-kundizzjonijiet tal-kawża Doux Élevage għall-preżunzjoni tal-eżistenza tar-riżorsi privati mhumiex issodisfati.

(132)

Għar-raġunijiet imsemmija fuq, il-Kummissjoni hija tal-fehma li l-finanzjament tal-miżuri inkwistjoni mwettqa minn AMA huwa attribwibbli lill-Istat u li, b'hekk, il-fondi jikkostitwixxu riżorsi tal-Istat.

(133)

Skont il-ġurisprudenza stabbilita tal-Qorti tal-Ġustizzja, miżuri li, irrispettivament mill-forma tagħhom, jiffavorixxu direttament jew indirettament lil ċerti impriżi, jew li għandhom jitqiesu bħala vantaġġ ekonomiku li l-impriża benefiċjarja ma kinitx tikseb f'kundizzjonijiet normali tas-suq, jitqiesu bħala għajnuna (58). Barra minn hekk, miżuri li, f'diversi forom, itaffu l-imposti li normalment jiġu inklużi fil-baġit ta' impriża u li, għalhekk, mingħajr ma huma sussidji fit-tifsira stretta tal-kelma, huma simili fil-karattru u għandhom l-istess effett, jitqiesu bħala li jikkostitwixxu għajnuna (59). Il-Qorti tal-Ġustizzja rrimarkat ukoll li miżura adottata mill-awtorità pubblika u li tiffavorixxi ċerti impriżi jew prodotti ma titlifx il-karattru ta' vantaġġ gratwit minħabba l-fatt li hija kompletament jew parzjalment iffinanzjata minn kontribuzzjonijiet imposti mill-awtorità pubblika u fuq l-impriżi kkonċernati (60).

(134)

Mill-miżura jibbenifikaw il-kumpaniji attivi fil-produzzjoni, fl-ipproċessar u fil-kummerċjalizzazzjoni ta' prodotti agrikoli, inkluża l-industrija tal-ikel (ara l-premessa 46) permezz ta' reklamar, appoġġ għal prodotti ta' kwalità u appoġġ tekniku.

(135)

F'dan ir-rigward, l-awtoritajiet Awstrijaċi ġew mistiedna jipprovdu aktar informazzjoni dwar l-ambitu tal-benefiċjarji, kif ukoll dwar l-għadd ta' benefiċjarji għal kull miżura ta' kummerċjalizzazzjoni. Fis-sottomissjoni tagħhom tal-14 ta' Settembru 2012, l-awtoritajiet Awstrijaċi wieġbu li mhuwiex possibbli li jiġu identifikati l-benefiċjarji ta' kull miżura unika, minħabba li ma kinux biss il-produtturi u l-bejjiegħa bl-imnut li jużaw il-logos li bbenifikaw mill-iskema, iżda wkoll il-produtturi li ma jipparteċipawx direttament fl-iskema u, b'hekk, is-settur bħala tali. L-Awstrija sostniet li l-miżuri żiedu l-għarfien tal-konsumaturi b'mod ġenerali, sabiex b'hekk anki l-produtturi li ma jipparteċipawx fl-iskema kellhom iżidu l-kwalità tal-prodotti tagħhom.

(136)

Barra minn hekk, fid-deċiżjoni tal-ftuħ, il-Kummissjoni talbet lill-Awstrija sabiex tikkjarifika kemm l-industrija tal-ikel tibbenifika mill-miżuri ta' kummerċjalizzazzjoni. L-awtoritajiet Awstrijaċi użaw l-istess argument bħal dak ta' fuq (il-premessa 135).

(137)

Skont il-ġurisprudenza, (61) miżura żżomm il-karattru selettiv tagħha anki jekk tapplika għal settur sħiħ (iżda mhux għal setturi oħrajn). L-argumenti tal-awtoritajiet Awstrijaċi li jsostnu li l-miżura hija ġenerali fin-natura tagħha għandhom jiġu rrifjutati.

(138)

Skont il-ġurisprudenza tal-Qorti tal-Ġustizzja, it-tisħiħ tal-pożizzjoni kompetittiva ta' impriża permezz tal-għoti ta' għajnuna mill-Istat ġeneralment joħloq distorsjoni tal-kompetizzjoni ma' impriżi kompetituri oħrajn li ma jkunux ibbenifikaw minn din l-għajnuna (62). L-għajnuna għal impriża li topera f'suq miftuħ għall-kummerċ fl-Unjoni hija soġġetta li taffettwa l-kummerċ bejn l-Istati Membri (63).

(139)

Fil-perjodu 1995-2008 kien hemm kummerċ sostanzjali fl-Unjoni ta' prodotti agrikoli. Permezz ta' eżempju, fis-sena 2004, il-prodotti agrikoli fl-UE b'valur ta' bejn madwar EUR 183 biljun (importazzjonijiet) u madwar EUR 187 biljun (esportazzjonijiet) kienu soġġetti għal kummerċ fl-Unjoni, fejn kienu jammontaw għal madwar 57 % tal-produzzjoni agrikola totali ta' EUR 324 biljun (64).

(140)

Għalhekk, bil-ħsieb tal-kummerċ sostanzjali fl-Unjoni ta' prodotti agrikoli fil-perjodu rilevanti, jista' jitqies li l-miżuri li huma s-suġġett tad-deċiżjoni preżenti jfixklu jew jheddu li jfixklu l-kompetizzjoni u jaffettwaw il-kummerċ bejn l-Istati Membri. Barra minn hekk, dan huwa kkonfermat minn uħud mid-dikjarazzjonijiet ta' AMA stess fir-rapporti annwali tagħha tal-perjodu rilevanti (ara l-premessi 84-90 ta' hawn fuq), li juru l-fehim ta' AMA li l-attivitajiet ta' kummerċjalizzazzjoni kienu adatti sabiex jippromwovu l-produzzjoni domestika fil-kompetizzjoni mal-produtturi minn Stati Membri oħrajn.

(141)

Fid-dawl ta' dak li ntqal qabel, il-kundizzjonijiet tal-Artikolu 107(1) tat-TFUE huma ssodisfati. Għalhekk, jista' jiġi konkluż li l-miżuri li huma s-suġġett tad-deċiżjoni preżenti jikkostitwixxu għajnuna mill-Istat skont it-tifsira ta' dak l-Artikolu.

(142)

Il-miżuri ta' kummerċjalizzazzjoni mhux innotifikati ta' AMA taħt l-iskema ta' għajnuna NN 34/2000 u l-miżuri ta' AMA tad-deċiżjoni tal-Kummissjoni annullata NN 34 A/2000 kienu s-suġġett tad-deċiżjoni tal-ftuħ tal-2012.

(143)

Meta wieħed iqis li l-liġi dwar l-AMA u d-dispożizzjonijiet ta' implimentazzjoni tagħha ġew immodifikati diversi drabi, li seħħew ħafna passi proċedurali u li l-għajnuna tikkonsisti f'għadd numeruż ta' miżuri b'tul ta' żmien differenti, id-data tal-bidu u finali eżatta għall-implimentazzjoni tal-miżuri u, b'hekk, l-ambitu temporali tad-deċiżjoni jridu jiġu stabbiliti.

(144)

Skont l-informazzjoni pprovduta mill-awtoritajiet Awstrijaċi, il-miżuri ta' kummerċjalizzazzjoni ilhom fis-seħħ mill-1994, jiġifieri qabel l-1 ta' Jannar 1995, id-data meta l-Awstrija ssieħbet fl-Unjoni Ewropea. Madankollu, il-miżuri ta' AMA ma ġewx ikkomunikati mill-awtoritajiet Awstrijaċi lill-Kummissjoni b'konformità mal-Artikoli 143 jew 144 tal-Att ta' Adeżjoni tar-Repubblika tal-Awstrija (ara l-premessa 34) u, għalhekk, ma jistgħux jitqiesu bħala għajnuna eżistenti. Għaldaqstant, dawn il-miżuri għandhom jitqiesu bħala għajnuna ġdida mhux innotifikata mid-data tal-adeżjoni fl-1 ta' Jannar 1995 li, għalhekk, għandha titqies bħala d-data tal-bidu għall-għoti tal-għajnuna.

(145)

Barra minn hekk, kif deskritt fil-premessa 36, l-awtoritajiet Awstrijaċi jsostnu li, permezz ta' ittra tat-23 ta' Ġunju 1997, huma pprovdew formola ta' notifika mimlija rigward il-miżuri ta' kummerċjalizzazzjoni ta' AMA li għalihom il-Kummissjoni naqset milli tirreaġixxi matul il-perjodu preskritt ta' xahrejn (65). Fil-fehma tagħhom, din kienet notifika valida u, wara l-perjodu ta' xahrejn, l-għajnuna għandha titqies bħala approvata u, b'hekk, tikkwalifika bħala għajnuna eżistenti. L-istess linja ta' argument tintuża f'opinjoni legali mehmuża mas-sottomissjoni tal-informazzjoni mill-25 ta' Frar 2015.

(146)

Il-Kummissjoni ma taqbilx ma' dan l-argument. Billi l-miżuri kienu diġà implimentati qabel l-1997, l-ittra ta' hawn fuq ma tistax titqies bħala notifika valida tal-miżuri li jikkonformaw mal-Artikolu 108(3) tat-TFUE u, b'hekk, l-għajnuna ma tikkwalifikax bħala għajnuna eżistenti. Skont is-sentenza ta' Lorenz, l-għajnuna titqies biss bħala għajnuna eżistenti jekk tkun għadha ma ġietx implimentata meta l-miżura ġiet innotifikata lill-Kummissjoni; f'każ ta' nuqqas ta' implimentazzjoni minn qabel, l-għajnuna tista' titqies biss bħala għajnuna eżistenti jekk, wara perjodu ta' xahrejn, l-Istat Membru jkun ta notifika minn qabel lill-Kummissjoni. Madankollu, l-awtoritajiet Awstrijaċi implimentaw il-miżura qabel notifika formali u ma taw ebda notifika minn qabel lill-Kummissjoni. Għalhekk, l-ittra msemmija fuq tat-23 ta' Ġunju 1997 ma tittrasformax il-miżura preżenti f'għajnuna eżistenti skont it-tifsira tal-Artikolu 108(1) tat-TFUE.

(147)

Fid-dawl tal-informazzjoni u l-kunsiderazzjonijiet imsemmija fuq, il-Kummissjoni tikkonkludi li, fir-rigward tal-ambitu temporali tad-deċiżjoni, id-data tal-bidu tal-miżuri ta' kummerċjalizzazzjoni kollha ta' AMA hija l-1 ta' Jannar 1995 (ara l-premessi 34 u 144).

(148)

Fir-rigward tad-data tat-tmiem tal-implimentazzjoni, permezz ta' ittra tal-14 ta' Settembru 2012, l-awtoritajiet Awstrijaċi kkonfermaw li l-miżuri nnotifikati bħala l-iskema ta' għajnuna N 239/2004 huma relatati ma' parti waħda mill-miżuri ta' AMA investigati taħt il-kawża numru NN 34/2000 (wara modifika sostanzjali tal-miżuri sabiex jikkonformaw mar-regoli applikabbli (ara l-premessa 39).

(149)

Fl-istess ittra, l-awtoritajiet Awstrijaċi kkonfermaw li, fil-perjodu wara s-sena 2002, AMA Marketing ma implimentat ebda miżura ta' għajnuna għajr dawk koperti minn NN 34 A/2000 u N 239/2004 (u l-estensjonijiet sussegwenti tagħhom (66)).

(150)

Mill-informazzjoni pprovduta mill-awtoritajiet Awstrijaċi, jirriżulta li l-iskema ta' għajnuna approvata N 570/1998 mhijiex relatata mal-miżuri ta' kummerċjalizzazzjoni ta' AMA li huma s-suġġett ta' din id-deċiżjoni.

(151)

F'dak li għandu x'jaqsam mal-bijotikketta u mat-tikketta tal-kwalità ta' AMA, id-data tat-tmiem għall-għoti tal-għajnuna kienet il-31 ta' Diċembru 2008, għajr għall-miżuri ta' reklamar tal-bijotikketta li skadew fil-31 ta' Diċembru 2006 (ara l-premessi 15 u 19).

(152)

Il-miżuri ta' kummerċjalizzazzjoni l-oħrajn ta' AMA applikaw sal-20 ta' Ottubru 2004, id-data li fiha ġiet approvata d-deċiżjoni N 239/2004 (ara l-kapitolu 1.4 u l-premessa 39 ta' hawn fuq). Għalhekk, l-ambitu tad-deċiżjoni preżenti jikkonċerna l-perjodu mill-1 ta' Jannar 1995 sal-31 ta' Diċembru 2008 għall-miżuri kollha għajr għall-miżuri ta' reklamar tal-bijotikketta, fejn il-perjodu rilevanti jkun mill-1 ta' Jannar 1995 sal-31 ta' Diċembru 2006 u l-miżuri ta' kummerċjalizzazzjoni l-oħrajn fejn il-perjodu rilevanti jkun mill-1 ta' Jannar 1995 sal-20 ta' Ottubru 2004.

(153)

Skont l-Artikolu 108(3) tat-TFUE, il-Kummissjoni għandha tkun infurmata dwar kwalunkwe pjanijiet li tagħti jew tbiddel l-għajnuna. Skont l-Artikolu 1(f) tar-Regolament (KE) Nru 659/1999, għajnuna ġdida li tiddaħħal fis-seħħ f'kontravenzjoni tal-Artikolu 108(3) tat-TFUE hija għajnuna illegali. L-obbligu sabiex tiġi notifikata għajnuna mill-Istat huwa stabbilit fl-Artikolu 2 tar-Regolament imsemmi.

(154)

L-Awstrija ma għarrfitx lill-Kummissjoni, skont l-Artikolu 108(3) tat-TFUE, dwar id-dispożizzjonijiet li jintroduċu l-miżuri u l-imposta li tiffinanzjahom qabel jiddaħħlu fis-seħħ.

(155)

Kif muri hawn fuq fil-kapitolu 6, il-miżuri implimentati mill-Awstrija jikkostitwixxu għajnuna mill-Istat. Kif iddikjarat fil-premessa 34, il-miżuri ta' kummerċjalizzazzjoni ilhom fis-seħħ mill-1994, jiġifieri qabel l-1 ta' Jannar 1995, id-data meta l-Awstrija ssieħbet fl-Unjoni Ewropea. Madankollu, il-miżuri ta' AMA qatt ma ġew ikkomunikati mill-awtoritajiet Awstrijaċi lill-Kummissjoni b'konformità mal-Artikoli 143 jew 144 tal-Att ta' Adeżjoni tar-Repubblika tal-Awstrija. Għalhekk, l-għajnuna kienet tikkostitwixxi għajnuna ġdida fil-mument tal-adeżjoni u l-awtoritajiet Awstrijaċi kellhom jinnotifikawha. Fin-nuqqas ta' notifika xierqa, l-għajnuna hija illegali skont id-dispożizzjonijiet rispettivi tat-TFUE (f'dan ir-rigward ara wkoll il-premessa (144)).

(156)

Barra minn hekk, kif deskritt fil-premessi 9, 36 u 148, la l-ittra tat-23 ta' Ġunju 1997 u lanqas l-ittra tad-19 ta' Diċembru 2002 ma jistgħu jitqiesu bħala notifika valida ta' din l-għajnuna ġdida.

(157)

Il-Qorti Ġenerali annullat id-deċiżjoni tal-Kummissjoni NN 34 A/2000 għar-raġuni li kienet teżisti kontradizzjoni fl-Att dwar l-AMA tal-1992. Fil-paragrafu 21a tiegħu b'rabta mal-iskop tal-kontribuzzjoni, saret referenza għal prodotti nazzjonali. B'mod aktar preċiż, il-punt 1 irrefera għall-għan ta' “il-promozzjoni u l-garanzija tal-bejgħ tal-prodotti agrikoli u forestali nazzjonali u l-prodotti dderivati minnhom” (67). Il-punt 2 irrefera għal “il-promozzjoni ta' miżuri oħra ta' marketing (b'mod partikolari l-provvisti ta' servizzi u l-ispejjeż tal-persunal li huma marbuta magħhom)”.

(158)

Il-Qorti Ġenerali ddikjarat li r-restrizzjoni għall-prodotti nazzjonali fil-Punt 1 tal-paragrafu 21a tal-Att dwar l-AMA tal-1992 qajmet dubji dwar il-kompatibbiltà tal-għajnuna inkwistjoni, li kellha twassal lill-Kummissjoni biex tibda proċedura ta' investigazzjoni formali (68).

(159)

Għalhekk, il-kwistjoni tal-oriġini nazzjonali tal-prodott hija element li jirrikjedi analiżi dettaljata.

(160)

Il-kwerelanti sostnew li t-tikketti u l-miżuri sussidjati kienu disponibbli biss għall-produtturi Awstrijaċi. F'dan ir-rigward, huma sostnew li skont il-paragrafu 21a (1) tal-Att dwar l-AMA tal-1992 huma biss il-prodotti Awstrijaċi li jibbenifikaw mill-miżuri ta' kummerċjalizzazzjoni ssussidjati.

(161)

F'dan ir-rigward, l-awtoritajiet Awstrijaċi kkjarifikaw permezz ta' ittra tad-19 ta' Diċembru 2002 li l-bijotikketta u t-tikketta tal-kwalità ta' AMA kienu disponibbli għall-prodotti kollha, irrispettivament mill-oriġini tagħhom. Permezz ta' ittra tal-5 ta' Marzu 2004, l-awtoritajiet Awstrijaċi bagħtu r-regoli interni ġodda, maħruġa minn AMA Marketing u awtorizzati mill-Ministeru Federali Awstrijak tal-Agrikoltura, il-Forestrija, il-Ħarsien Ambjentali u r-Riżorsi Idroloġiċi (BMLFUW), li jirregolaw l-għoti ta' dawn it-tikketti. Skont dawn ir-regoli, it-tikketti jistgħu jingħataw għall-prodotti kollha, kemm dawk Awstrijaċi kif ukoll dawk minn Stati Membri oħrajn, li jissodisfaw ir-rekwiżiti tal-kwalità. Barra minn hekk, l-awtoritajiet Awstrijaċi impenjaw ruħhom li jadattaw l-Att dwar l-AMA tal-1992, li kien emendat bil-liġi b'effett minn Lulju 2007. Minn dik id-data, il-paragrafu 21a (1) tal-Att dwar l-AMA ma baqa' jinkludi ebda referenza għal prodotti “nazzjonali” (69).

(162)

Għalhekk, filwaqt li l-perjodu wara t-30 ta' Ġunju 2007 ma jqajjem ebda problema partikolari rigward l-oriġini tal-prodotti u l-benefiċjarji ta' dawn it-tikketti jew il-miżuri, hija meħtieġa analiżi aktar dettaljata għall-perjodu qabel dik id-data. Minħabba l-ispeċifiċitajiet tal-miżuri differenti inklużi f'din l-iskema u l-importanza differenti tar-referenza għall-oriġini nazzjonali, hija meħtieġa analiżi separata għal kull miżura.

(163)

Fir-rigward tat-tikketta tal-kwalità, minn Jannar 2000, in-normi li jimplimentaw l-Att dwar l-AMA (Regulativ zur Verwendung des AMA-Gütesiegels für Lebensmittel) ma kienu jinkludu ebda referenza għal prodotti nazzjonali, iżda kienu jkopru l-prodotti kollha, irrispettivament mill-provenjenza tagħhom. L-Artikolu 23 dwar id-dikjarazzjoni tal-oriġini jirreferi espliċitament għal reġjun (pereżempju, Tiroll jew il-Bavarja) jew pajjiż (pereżempju, l-Awstrija, Franza) bħala l-oriġini tal-prodott, li b'hekk jindika li kwalunkwe reġjun/pajjiż jista' jissemma bħala l-oriġini tal-prodotti. Il-pretensjoni li t-tikketta tal-kwalità kienet disponibbli biss għal prodotti nazzjonali (jiġifieri Awstrijaċi) għandha tiġi miċħuda għall-perjodu wara din id-data.

(164)

Barra minn hekk, id-dispożizzjonijiet kollha li jirrigwardjaw l-oriġini tal-prodott jinkludu d-definizzjoni li ġejja ta' “nativ/nazzjonali” (heimisch): “F'dawn il-linji gwida, it-terminu” nativ/nazzjonali “jirreferi għar-reġjun speċifikat bħala l-oriġini tal-prodott” (“Wird in diesen Richtlinien der Begriff “heimisch” verwendet, ist darunter die im Herkunftsanteil des Zeichens angeführte Region zu verstehen.”) (70) Għal darba oħra, dan jindika li r-referenza għal “prodotti nazzjonali” użata fl-atti ta' implimentazzjoni ma tirreferix biss għall-prodotti Awstrijaċi, iżda kwalunkwe reġjun jista' jintuża bħala oriġini.

(165)

Minnha nnifisha, bijotikketta tirreferi primarjament għar-rekwiżiti tal-kwalità speċjali ta' prodott. It-tikketti rispettivi taħt l-iskema kellhom ir-referenza għal BIJO bħala l-messaġġ ewlieni tagħhom u kienu miftuħa għall-prodotti kollha, irrispettivament mill-oriġini tagħhom. Tal-aħħar jista' jissemma biss bħala messaġġ sussidjarju.

(166)

Fir-rigward tal-għajnuna għal prodotti ta' kwalità, din ingħatat għall-iżvilupp ta' skemi ta' assigurazzjoni tal-kwalità, kontrolli tal-kwalità u kontrolli għall-prodotti organiċi (il-premessa 98). Minnhom infushom, tali miżuri mhumiex limitati għall-prodotti ta' oriġini nazzjonali partikolari.

(167)

L-għajnuna għal reklamar ġeneriku ma tqajjem ebda kwistjoni rigward l-oriġini ta' dawk il-prodotti, minħabba li l-kampanji rreklamaw jew irreferew għal prodott fi kwistjoni purament ġenerika billi ma għamlu ebda referenza għall-oriġini.

(168)

Skont l-Artikolu 107(3)(ċ) tat-TFUE, l-għajnuna maħsuba sabiex tiffaċilita l-iżvilupp ta' ċerti attivitajiet ekonomiċi jew ta' ċerti oqsma ekonomiċi tista' titqies bħala kompatibbli mas-suq komuni, meta tali għajnuna ma taffettwax b'mod negattiv il-kundizzjonijiet tal-kummerċ b'mod li jmur kontra l-interess komuni.

(169)

Skont l-avviż tal-Kummissjoni dwar id-determinazzjoni tar-regoli applikabbli għall-valutazzjoni ta' għajnuna illegali (71), kwalunkwe għajnuna illegali skont it-tifsira tal-Artikolu 1(f) tar-Regolament (KE) Nru 659/1999 għandha tiġi evalwata skont ir-regoli applikabbli fiż-żmien meta ngħatat l-għajnuna.

(170)

Bejn l-1 ta' Jannar 2000 u l-31 ta' Diċembru 2006 applikaw il-Linji Gwida għall-perjodu 2000-2006. B'effett mill-1 ta' Jannar 2007, bdew japplikaw il-linji gwida tal-Komunità għall-għajnuna mill-Istat fis-settur agrikolu u tal-forestrija 2007–2013 (72) (minn hawn 'il quddiem: il-Linji Gwida għall-perjodu 2007-2013) skont il-punt 194 tagħhom.

(171)

F'dan ir-rigward, għandu jiġi nnotat li skont il-punt 196 tal-Linji Gwida għall-perjodu 2007-2013, l-Istati Membri kellhom perjodu tranżitorju sal-31 ta' Diċembru 2007 sabiex iġibu l-iskemi ta' għajnuna eżistenti konformi mad-dispożizzjonijiet tal-Linji Gwida. Id-definizzjoni ta' għajnuna eżistenti hija stipulata fl-Artikolu 1(b) tar-Regolament (KE) Nru 659/1999. Skont l-Artikolu 1(b)(ii), li japplika għall-kawża inkwistjoni, għajnuna eżistenti għandha tfisser għajnuna awtorizzata, jiġifieri, skemi ta' għajnuna u għajnuna individwali li kienu awtorizzati mill-Kummissjoni jew mill-Kunsill.

(172)

L-iskema ta' għajnuna NN 34 A/2000 kienet tabilħaqq approvata mill-Kummissjoni fit-30 ta' Ġunju 2004. Madankollu, f'Settembru 2004, id-deċiżjoni kienet ikkontestata mill-kwerelanti quddiem il-Qorti tal-Prim'Istanza (issal-Qorti Ġenerali), li annullat id-deċiżjoni tal-Kummissjoni permezz ta' sentenza tat-18 ta' Novembru 2009. Din is-sentenza kienet appellata mill-Awstrija u l-Qorti tal-Ġustizzja ma laqgħetx l-appell u laqgħet is-sentenza tal-Qorti tal-Prim'Istanza fis-27 ta' Ottubru 2011.

(173)

L-awtoritajiet Awstrijaċi jsostnu li l-iskema inkwistjoni kienet tikkostitwixxi l-għajnuna eżistenti u kellha tiġi vvalutata skont il-Linji Gwida ġodda għall-perjodu 2007-2013 biss mill-1 ta' Jannar 2008. Fis-sottomissjoni tagħha tal-14 ta' Settembru 2012, l-Awstrija tirreferi wkoll għall-prinċipju tal-aspettattivi leġittimi u ssostni li d-deċiżjoni tal-Kummissjoni kienet annullata biss fl-2011.

(174)

Skont il-ġurisprudenza (73) rigward l-aspettattivi leġittimi, “fejn jiġi ppreżentat rikors għal annullament, il-benefiċjarju ma jistax ikollu tali ċertezza sakemm il-qorti Komunitarja tkun għadha ma tatx deċiżjoni b'mod definittiv”. Għalhekk, ma tista' tiġi invokata ebda aspettattiva leġittima fil-kawża inkwistjoni.

(175)

Bħala konsegwenza, l-iskema ta' għajnuna NN 34 A/2000 ma setgħetx tikkwalifika bħala għajnuna eżistenti abbażi tad-deċiżjoni tal-Kummissjoni tat-30 ta' Ġunju 2004 u, għalhekk, il-perjodu tranżitorju msemmi fil-punt 196 tal-Linji Gwida għall-perjodu 2007-2013 ma japplikax. L-iskema ta' għajnuna kellha tinġieb f'konformità mal-Linji Gwida għall-perjodu 2007-2013 mill-1 ta' Jannar 2007.

(176)

Fir-rigward tal-miżuri ta' reklamar, il-kompatibbiltà tal-għajnuna mogħtija fil-perjodu mill-1 ta' Jannar 1995 sal-31 ta' Diċembru 2001 għandha tiġi vvalutata fid-dawl tal-komunikazzjoni tal-Kummissjoni li tikkonċerna l-involviment tal-Istat fil-promozzjoni ta' prodotti agrikoli u tas-sajd (74) (minn hawn 'il quddiem: il-Komunikazzjoni tal-1986) u l-Qafas għall-għajnuna nazzjonali għar-reklamar ta' prodotti agrikoli u ċerti prodotti mhux elenkati fl-Anness II għat-Trattat tal-KEE, minbarra prodotti tas-sajd (75) (minn hawn 'il quddiem: il-Qafas tar-Reklamar tal-1987).

(177)

L-għajnuna mogħtija mill-1 ta' Jannar 2002 għandha tiġi vvalutata fid-dawl tal-linji gwida tal-Komunità għall-għajnuna mill-Istat għar-reklamar tal-prodotti elenkati fl-Anness I għat-Trattat tal-KE u ta' ċerti prodotti mhux elenkati fl-Anness I (minn hawn 'il quddiem: il-Qafas tar-Reklamar tal-2001) (76).

(178)

Meta tivvaluta l-għajnuna mill-Istat għar-reklamar tal-prodotti agrikoli mogħtija wara l-1 ta' Jannar 2007, il-Kummissjoni tapplika t-Taqsima VI.D tal-Linji Gwida għall-perjodu 2007-2013.

(179)

Il-Qafas tar-Reklamar tal-1987 japplika għar-reklamar, definit bħala kwalunkwe operazzjoni li tuża l-mezzi (bħall-istampa, ir-radju, it-TV jew posters) li huma maħsuba biex jipperswadu lill-konsumaturi jixtru l-prodott rilevanti. Huwa jeskludi mill-ambitu tiegħu l-operazzjonijiet ta' promozzjoni fis-sens usa' tal-kelma, bħat-tixrid ta' għarfien xjentifiku lill-pubbliku ġenerali, l-organizzazzjoni ta' fieri kummerċjali jew wirjiet, il-parteċipazzjoni f'dawn u f'eżerċizzji simili tar-relazzjonijiet pubbliċi, inklużi stħarriġ u riċerka tas-suq (77).

(180)

Fil-prinċipju, l-ambitu tal-Linji Gwida dwar ir-Reklamar tal-2001 huwa l-istess bħal dak tal-Qafas tar-Reklamar tal-1987 deskritt hawn fuq, madankollu b'xi differenzi. L-ewwel bidla sostantiva tikkonċerna l-fatt li l-operaturi ekonomiċi żdiedu bħala d-destinatarji potenzjali tar-reklamar (78). It-tieni bidla tikkonċerna l-fatt li d-definizzjoni ta' reklamar kienet estiża sabiex tikkomprendi l-attivitajiet ta' reklamar (bħad-distribuzzjoni ta' materjal għal dak l-iskop) immirati għall-konsumaturi fil-punt tal-bejgħ (79).

(181)

L-ambitu tat-Taqsima IV.D tal-Linji Gwida għall-perjodu 2007-2013 huwa identiku għall-ambitu tal-Linji Gwida dwar ir-Reklamar tal-2001 (80).

(182)

Kemm il-Qafas tar-Reklamar tal-1987 kif ukoll il-Linji Gwida dwar ir-Reklamar tal-2001 japplikaw għall-attivitajiet ta' reklamar iżda mhux għall-attivitajiet ta' promozzjoni. L-għajnuna għall-kategorija tal-aħħar hija kklassifikata bħala għajnuna teknika li għaliha japplikaw regoli speċifiċi.

(183)

Fil-każ preżenti, l-għajnuna ngħatat għal kampanji ta' reklamar li jużaw mezzi tax-xandir differenti u mezzi oħrajn ta' pubbliċità. Il-kampanji ta' reklamar kienu jikkonċernaw

(184)

Mill-informazzjoni sottomessa mill-awtoritajiet Awstrijaċi, jista' jiġi konkluż li l-għan tal-miżuri kien li jipperswadu lill-konsumaturi jixtru l-prodott rilevanti (ara l-premessi 75 u 94). Għalhekk, il-miżuri msemmija hawn fuq jaqgħu fl-ambitu tar-reklamar u għandhom jiġu analizzati fid-dawl tar-regoli applikabbli.

(185)

Il-kompatibbiltà tal-għajnuna mogħtija qabel l-1 ta' Jannar 2002 għandha tiġi vvalutata fid-dawl tal-Komunikazzjoni tal-1986 u tal-Qafas tar-Reklamar tal-1987 (il-premessa 176).

(186)

Il-punt 2.2 tal-Qafas tar-Reklamar tal-1987 jipprojbixxi l-għajnuna għar-reklamar b'rabta ma' impriżi partikolari.

(187)

Il-punt 3 jistipula l-kundizzjoni li r-reklamar għandu jikkonċerna mill-inqas waħda mill-kategoriji li ġejjin (kriterji pożittivi):

(188)

Fl-aħħarnett, skont il-punt 4 tal-Qafas tar-Reklamar tal-1987, l-għajnuna mogħtija taħt il-qafas imsemmi hawn fuq ma għandhiex taqbeż l-ammont li impenja s-settur innifsu għal kampanja ta' reklamar partikolari, li jfisser li intensità tal-għajnuna massima ta' 100 % tista' tkun permessa biss jekk il-kummerċ ikun ikkontribwixxa għal mill-inqas 50 % tal-ispiża, permezz ta' kontribuzzjonijiet volontarji jew inkella permezz tal-ġbir ta' imposti parafiskali jew kontribuzzjonijiet obbligatorji. Għalhekk, hija permessa intensità tal-għajnuna massima ta' 100 %.

(189)

Kemm il-punt 2 tal-Komunikazzjoni tal-1986 kif ukoll il-punt 2.1. tal-Qafas tar-Reklamar tal-1987 (81) jenfasizzaw il-fatt li l-għajnuna għar-reklamar ma tistax titqies bħala kompatibbli mas-suq komuni jekk il-materjal ta' promozzjoni jikser l-Artikolu 30 tat-Trattat tal-KEE (issal-Artikolu 34 tat-TFUE).

(190)

Skont il-punt 2.1 tal-Komunikazzjoni tal-1986, il-kampanji promozzjonali ġeneriċi li ma jagħmlu ebda referenza għall-oriġini tal-prodott, il-kampanji promozzjonali tal-esportazzjoni organizzati fi Stati Membri oħrajn, kif ukoll il-kampanji fis-suq domestiku li jippromwovu kwalitajiet jew varjetajiet speċifiċi ta' prodotti li ma jagħmlu ebda referenza speċifika għall-oriġini nazzjonali tal-prodott, għajr dawk li jistgħu jkunu evidenti mir-referenzi li saru għall-kwalitajiet jew varjetajiet ikkonċernati jew għad-denominazzjoni normali tal-prodott, ma jiksrux l-Artikolu 34 tat-TFUE.

(191)

B'kuntrast ma' dan, skont il-punt 2.2 tal-Komunikazzjoni tal-1986, il-kampanji li ġejjin jiksru b'mod ċar l-Artikolu 30 tat-Trattat tal-KEE (issal-Artikolu 34 tat-TFUE): kampanji promozzjonali li jagħtu pariri lill-konsumaturi biex jixtru prodotti nazzjonali biss minħabba l-oriġini nazzjonali tagħhom jew kampanji promozzjonali maħsuba biex jiskoraġġixxu x-xiri ta' prodotti minn Stati Membri oħrajn jew imaqdru dawk il-prodotti f'għajnejn il-konsumatur (promozzjoni negattiva).

(192)

Barra minn hekk, il-punt 2.3 tal-Komunikazzjoni tal-1986 jistipula li l-kampanji promozzjonali fis-suq domestiku ta' Stat Membru, minħabba r-referenzi magħmula għall-oriġini nazzjonali tal-prodotti, u sakemm ma jiġux osservati ċerti restrizzjonijiet, jistgħu jkunu miftuħa għal oġġezzjoni skont l-Artikolu 30 tat-Trattat tal-KEE (issal-Artikolu 34 tat-TFUE).

(193)

Skont il-punt 2.3.1 tal-Komunikazzjoni tal-1986, il-kampanji promozzjonali li jiġbdu l-attenzjoni għall-varjetajiet jew għall-kwalitajiet tal-prodotti manifatturati fi Stat Membru fil-prattika mhumiex limitati għall-ispeċjalitajiet nazzjonali jew reġjonali u ta' spiss jiġbdu l-attenzjoni għall-kwalitajiet partikolari tal-prodotti manifatturati fi Stat Membru u għall-oriġini nazzjonali tal-prodotti, anki jekk dawk il-prodotti u l-kwalitajiet tagħhom ikunu simili għall-prodotti manifatturati band'oħra. Jekk issir enfasi bla bżonn fuq l-oriġini nazzjonali tal-prodott f'tali kampanji promozzjonali, hemm periklu ta' ksur tal-Artikolu 30 tat-Trattat tal-KEE (issal-Artikolu 34 tat-TFUE).

(194)

Għalhekk, il-Komunikazzjoni tal-1986 talbet lill-Istati Membri biex jiżguraw, b'mod partikolari, li l-linji gwida li ġejjin jiġu rrispettati strettament:

(195)

F'opinjoni legali mehmuża mas-sottomissjoni tal-informazzjoni mill-25 ta' Frar 2015, l-awtoritajiet Awstrijaċi jsostnu li l-ksur tal-Artikolu 30 tat-Trattat tal-KEE (issal-Artikolu 34 tat-TFUE) għandu jiġi vvalutat f'“perspettiva storika” u li fil-perjodu mill-1995 sal-2002 ma kien hemm ebda kawża fil-Qorti fejn it-test u l-messaġġ grafiku ta' tikketta tqiesu bħala li jiksru l-Artikolu 30 tat-Trattat tal-KEE. Fil-fehma tal-Kummissjoni, dan l-argument mhuwiex rilevanti. Kif muri hawn fuq, kemm il-Komunikazzjoni tal-1986 (82) kif ukoll il-Qafas tar-Reklamar tal-1987 kienu jinkludu linji gwida dettaljati u espress għall-Istati Membri dwar kif għandhom jiddisinjaw il-miżuri tagħhom sabiex jevitaw il-ksur tal-Artikolu 30 tat-Trattat tal-KEE.

(196)

Abbażi tal-informazzjoni disponibbli lill-Kummissjoni għall-perjodu qabel l-2002, ma kienx possibbli li tiġi vvalutata l-kompatibbiltà tal-miżuri ta' reklamar mar-regoli msemmija fuq fiż-żmien li tittieħed id-deċiżjoni tal-ftuħ. Għalhekk, l-awtoritajiet Awstrijaċi ġew mistiedna jipprovdu l-informazzjoni meħtieġa fir-rigward tal-kundizzjonijiet imsemmija fuq.

(197)

It-tweġiba pprovduta mill-awtoritajiet Awstrijaċi fl-14 ta' Settembru 2012 ma kinitx tinkludi biżżejjed informazzjoni sabiex tkun tista' ssir valutazzjoni tal-kompatibbiltà (l-awtoritajiet Awstrijaċi rreferew biss għar-rapporti annwali għas-snin 1995-2001). Għalhekk, fid-19 ta' Frar 2014 intbagħtet talba oħra għall-informazzjoni dwar dawn il-punti u l-Awstrija pprovdiet tweġiba fil-5 ta' Mejju 2014.

(198)

F'din tal-aħħar, l-awtoritajiet Awstrijaċi ddikjaraw li l-kampanji ta' reklamar kienu jikkonċernaw prodotti agrikoli żejda u/jew ir-reklamar ta' prodotti ta' kwalità għolja. Għalhekk, il-kriterji pożittivi stipulati fil-punt 3 tal-Qafas tar-Reklamar tal-1987 kienu rrispettati.

(199)

Skont l-informazzjoni pprovduta mill-awtoritajiet Awstrijaċi, ir-reklamar ma għamel ebda referenza għal impriżi partikolari.

(200)

Fir-rigward tal-intensità tal-għajnuna massima, l-imposti mis-settur kienu jikkostitwixxu aktar minn 50 % tal-ammont ta' għajnuna (ara wkoll il-premessi 43 u 56). Għalhekk, il-kriterju tal-punt 4 tal-Qafas tar-Reklamar tal-1987 rigward l-intensità tal-għajnuna huwa ssodisfat.

(201)

Fid-deċiżjoni tal-ftuħ, il-Kummissjoni esprimiet dubji fir-rigward ta' ksur potenzjali tal-Artikolu 30 tat-Trattat tal-KEE (issal-Artikolu 34 tat-TFUE). Fil-fehma preliminari tal-Kummissjoni, ir-referenza għall-oriġini nazzjonali fit-tikketta tal-kwalità ma kinitx tidher li hija sussidjarja (ara l-premessa 65). Barra minn hekk, il-Kummissjoni nnotat li f'ħafna materjal ta' reklamar, ir-referenza għall-oriġini tal-prodott ma kinitx limitata għat-tikketta tal-kwalità, iżda kienet tidher ukoll fi bnadi oħra fir-reklam (ara l-premessa 83).

(202)

Għalhekk, fid-deċiżjoni tal-ftuħ, l-awtoritajiet Awstrijaċi ntalbu jiddeskrivu l-apparenza tat-tikketta tal-kwalità u tal-bijotikketta fil-perjodu 1995-2001 u jipprovdu eżempji rappreżentattivi tal-materjal ta' promozzjoni fejn intużaw it-tikketti.

(203)

Fl-14 ta' Settembru 2012, l-awtoritajiet Awstrijaċi wieġbu li r-rapporti annwali dwar l-għajnuna mill-Istat ipprovduti għas-snin 1995-2004 diġà kienu jinkludu din l-informazzjoni. Permezz ta' ittra tad-19 ta' Frar 2014, il-Kummissjoni wieġbet li din l-informazzjoni ma kinitx biżżejjed sabiex issir analiżi tal-kompatibbiltà u talbet għal rendikont dettaljat (jiġifieri skedi ta' notifika) abbażi tar-regoli applikabbli fil-mument tal-miżura. Din il-valutazzjoni ġiet ipprovduta bit-tweġiba tal-5 ta' Mejju 2014.

(204)

Il-kriterji speċifiċi tal-kompatibbiltà għat-tipi differenti ta' reklamar huma analizzati hawn taħt.

(205)

Fir-rigward tar-referenza għal impriżi partikolari f'xi kampanji ta' reklamar (il-premessa 90), il-Kummissjoni tinnota li, skont il-punt 2.2 tal-Qafas tar-Reklamar tal-1987, l-għajnuna għar-reklamar relatat ma' impriżi partikolari hija pprojbita.

(206)

Fis-sottomissjoni tagħhom tal-14 ta' Settembru 2012, l-awtoritajiet Awstrijaċi sostnew li l-impriżi msemmija kkontribwixxew għal uħud mill-ispejjeż tal-kampanja (Druck und Werbeeinschaltung). Madankollu, tali kampanji li jirreferu għal impriżi partikolari ma jistgħux jiġu approvati skont ir-regoli dwar l-għajnuna mill-Istat (il-punt 2.2 tal-Qafas tar-Reklamar tal-1987). Il-fatt li l-impriżi kkontribwixxew parzjalment għall-ispejjeż relatati mal-kampanja ma jbiddilx din il-valutazzjoni.

(207)

Mill-informazzjoni disponibbli jidher li wħud mill-kampanji ta' reklamar ġeneriku rreferew espliċitament għall-oriġini tal-prodott (jiġifieri l-Awstrija) (ara l-eżempji pprovduti fil-premessi 84 u 90).

(208)

Għalhekk, il-miżuri ma kinux konformi mal-punti 2.1 (83), 2.2 tal-Qafas tar-Reklamar tal-1987 u kisru l-Artikolu 30 tat-Trattat tal-KEE (issal-Artikolu 34 tat-TFUE). Għalhekk, il-Kummissjoni tqis l-għajnuna għall-miżuri ta' reklamar fil-perjodu mill-1 ta' Jannar 1995 sal-31 ta' Diċembru 1999 b'referenza għall-oriġini tal-prodotti jew għal kumpaniji partikolari bħala inkompatibbli mas-suq komuni. (84)

(209)

Fir-rigward tal-perjodu mill-1 ta' Jannar 2000 sal-31 ta' Diċembru 2001, il-kampanji ta' reklamar irreferew biss għall-kwalitajiet jew il-varjetajiet speċifiċi tal-prodotti mingħajr ebda referenza speċifika għall-oriġini nazzjonali tagħhom.

(210)

Għalhekk, għal dan il-perjodu tal-aħħar, il-kampanji ma kisrux l-Artikolu 30 tat-Trattat tal-KEE u, b'hekk, kienu konformi mal-Qafas tar-Reklamar tal-1987. Għalhekk, il-Kummissjoni tqis li huma kompatibbli mas-suq komuni.

(211)

Fit-tweġiba tagħhom tal-14 ta' Settembru 2012, l-awtoritajiet Awstrijaċi ddikjaraw li għat-tikketta tal-kwalità, intużaw l-istess tikketti bħal dawk approvati fid-deċiżjoni tal-Kummissjoni fil-kawża N 589/2008. Għalhekk, l-awtoritajiet Awstrijaċi kkonkludew li r-referenza għall-oriġini nazzjonali kellha rwol subordinat.

(212)

Il-Kummissjoni ma taqbilx mal-kummenti mill-awtoritajiet Awstrijaċi. Kif intwera hawn fuq (il-premessa 65), intuża logo ieħor għat-tikketta tal-kwalità fil-perjodu 1995 sal-1999. F'dan il-logo, ir-referenza għall-oriġini mhijiex sussidjarja għall-messaġġ tal-kwalità tal-logo. Kemm il-messaġġ viżiv (il-bandiera Awstrijaka) kif ukoll it-test użat jindikaw l-Awstrija bħala l-messaġġ ewlieni.

(213)

Għalhekk, il-punt 2.3.1 tal-Komunikazzjoni tal-1986, li talab li r-referenzi għall-oriġini nazzjonali għandhom ikunu sussidjarji għall-messaġġ ewlieni mwassal lill-konsumaturi permezz tal-kampanja u ma jikkostitwixxux ir-raġuni prinċipali għaliex il-konsumaturi qegħdin jingħataw il-parir sabiex jixtru l-prodott, ma kienx irrispettat. Għalhekk, il-Kummissjoni tqis l-għajnuna għat-tikketta tal-kwalità għall-perjodu mill-1 ta' Jannar 1995 sal-31 ta' Diċembru 1999 bħala inkompatibbli mas-suq komuni.

(214)

Fir-rigward tal-perjodu mill-1 ta' Jannar 2000 sal-31 ta' Diċembru 2001, il-Kummissjoni tqis li l-logos il-ġodda, li kienu l-istess bħal dawk ivvalutati fid-deċiżjoni tal-Kummissjoni fil-kawża N 589/2008, jikkonformaw mal-kundizzjonijiet tal-Qafas tar-Reklamar tal-1987 u, b'hekk, tqis l-għajnuna relatata bħala kompatibbli mas-suq komuni.

(215)

Fil-miżuri ta' reklamar għall-bijologo, kif muri hawn fuq fil-premessa 65, l-istess logos intużaw bħal fil-perjodu wara l-2002.

(216)

Billi dan it-tip ta' reklamar jiġbed l-attenzjoni għall-varjetajiet jew kwalitajiet ta' prodotti manifatturati fi Stat Membru, huma jaqgħu taħt il-punt 2.3.1 tal-Komunikazzjoni tal-1986, li talab li ma kellha titpoġġa ebda enfasi bla bżonn fuq l-oriġini nazzjonali tal-prodott.

(217)

Waħda miż-żewġ verżjonijiet tal-logo ma għamlet ebda referenza għall-oriġini tal-prodotti. L-oħra indikat l-oriġini tal-prodott bħala messaġġ sekondarju. Tal-ewwel ma esprimiet ebda problema fir-rigward ta' ksur potenzjali tal-Artikolu 30 tat-Trattat tal-KEE (issal-Artikolu 34 tat-TFUE). Fir-rigward tal-aħħar, il-kundizzjonijiet tal-punt 2.3.1 tal-Komunikazzjoni tal-1986 ġew issodisfati minħabba li:

(218)

Għalhekk, l-għajnuna għar-reklamar għall-bijologo għall-perjodu mill-1 ta' Jannar 1995 sal-31 ta' Diċembru 2001 kienet konformi mal-kundizzjonijiet tal-Komunikazzjoni tal-1986. Għalhekk, il-Kummissjoni tqis dik l-għajnuna bħala kompatibbli mas-suq komuni.

(219)

Il-kampanji ta' reklamar organizzati barra l-Awstrija ma għamlu ebda referenza speċifika għall-oriġini nazzjonali tal-prodott għajr dik li tista' tkun evidenti mir-referenzi magħmula għall-kwalitajiet jew varjetajiet ikkonċernati jew għad-denominazzjoni normali tal-prodott. B'hekk, dawn il-kampanji kienu konformi mal-punt 2.1 tal-Komunikazzjoni tal-1986 u ma kisrux l-Artikolu 30 tat-Trattat tal-KEE (issal-Artikolu 34 tat-TFUE).

(220)

Għalhekk, l-għajnuna għar-reklamar barra l-Awstrija għall-perjodu mill-1 ta' Jannar 1995 sal-31 ta' Diċembru 2001 kienet konformi mal-kundizzjonijiet tal-Komunikazzjoni tal-1986. Għalhekk, il-Kummissjoni tqis dik l-għajnuna bħala kompatibbli mas-suq komuni.

(221)

Għall-perjodu mill-1 ta' Jannar 2002 sal-31 ta' Diċembru 2006, l-għajnuna għall-attivitajiet ta' reklamar kellha tikkonforma mal-kundizzjonijiet stipulati fil-Linji Gwida għall-perjodu 2000-2006. Skont il-punt 18 tal-Linji Gwida għall-perjodu 2000-2006, il-miżuri għall-promozzjoni u r-reklamar ta' prodotti agrikoli kellhom jiġu vvalutati skont il-Qafas tar-Reklamar tal-1987.

(222)

Mill-1 ta' Jannar 2002 'il quddiem, il-Linji Gwida dwar ir-Reklamar tal-2001 kienu applikabbli u ssostitwixxew il-Komunikazzjoni tal-1986 u l-Qafas tar-Reklamar tal-1987 (il-punti 69 u 75 tal-Linji Gwida dwar ir-Reklamar tal-2001). Għalhekk, il-Kummissjoni ser tibbaża l-valutazzjoni tagħha għall-perjodu mill-1 ta' Jannar 2002 sal-31 ta' Diċembru 2006 fuq il-Linji Gwida dwar ir-Reklamar tal-2001.

(223)

Skont il-punt 12 tal-Linji Gwida dwar ir-Reklamar tal-2001, l-għajnuna mogħtija għar-reklamar tal-prodotti agrikoli u ta' prodotti oħrajn, sabiex tkun kompatibbli mas-suq komuni, ma għandhiex tinterferixxi mal-kummerċ sa ċertu punt li jmur kontra l-interess komuni (kriterji negattivi) u għandha tiffaċilita l-iżvilupp ta' ċerti attivitajiet ekonomiċi jew ta' ċerti oqsma ekonomiċi (kriterji pożittivi).

(224)

Il-punt 18 tal-Linji Gwida dwar ir-Reklamar tal-2001 stabbilixxa li ma setgħet tingħata ebda għajnuna għall-kampanji ta' reklamar li kisru l-Artikolu 28 tal-KE (issal-Artikolu 34 tat-TFUE) li jipprojbixxu r-restrizzjonijiet kwantitattivi fuq l-importazzjonijiet u l-miżuri kollha li għandhom effett ekwivalenti bejn l-Istati Membri.

(225)

L-għajnuna ma setgħetx tingħata għal reklamar marbut direttament mal-prodotti ta' impriża partikolari waħda jew aktar. Jekk it-twettiq ta' attivitajiet ta' reklamar iffinanzjati mill-pubbliku kien fdat lil impriżi privati, tali impriżi kellhom jintgħażlu fuq il-prinċipji tas-suq (il-punti 29 u 30 tal-Linji Gwida dwar ir-Reklamar tal-2001).

(226)

Barra minn hekk, il-kampanji ma setgħux jiksru l-leġiżlazzjoni Komunitarja sekondarja u, b'mod partikolari, kellhom jikkonformaw mad-dispożizzjonijiet tad-Direttiva 2000/13/KE (il-punti 25 sa 28 tal-Linji Gwida dwar ir-Reklamar tal-2001).

(227)

Il-punti 31 u 32 tal-Linji Gwida dwar ir-Reklamar tal-2001 iddikjaraw li, sabiex jikkwalifika għal deroga skont l-Artikolu 87(3)(ċ) tal-KE (issal-Artikolu 107(3)(ċ) tat-TFUE), ir-reklamar kellu jikkonċerna l-prodotti żejda jew speċi mhux sfruttati biżżejjed, prodotti ġodda jew prodotti ta' sostituzzjoni li għadhom mhumiex żejda, prodotti ta' kwalità għolja, l-iżvilupp ta' ċerti reġjuni jew l-iżvilupp tal-SMEs.

(228)

Il-kapitolu 4 tal-Linji Gwida dwar ir-Reklamar tal-2001 spjega fid-dettall l-applikazzjoni tal-kriterji pożittivi msemmija fuq għat-tipi partikolari ta' reklamar, jiġifieri għal għajnuna għar-reklamar fejn l-oriġini hija parti mill-messaġġ (it-taqsima 4.1) u għajnuna għar-reklamar għal prodotti ta' kwalità (it-taqsima 4.2).

(229)

Skont il-punt 23 tal-Linji Gwida dwar ir-Reklamar tal-2001, l-identifikazzjoni tal-pajjiż produttur b'kelma jew b'simbolu setgħet issir diment li jintlaħaq bilanċ raġonevoli bejn ir-referenzi għal, fuq naħa waħda, il-kwalitajiet u l-varjetajiet tal-prodott u, fuq in-naħa l-oħra, l-oriġini nazzjonali tiegħu. Ir-referenzi għall-oriġini nazzjonali kellhom ikunu sussidjarji għall-messaġġ ewlieni mwassal lill-konsumaturi u ma setgħux jikkostitwixxu r-raġuni prinċipali għaliex il-konsumaturi kienu qed jingħataw il-parir sabiex jixtru l-prodott. Ir-reklamar li semma l-oriġini (reġjonali) tal-prodott bħala messaġġ sussidjarju tqies bħala li ma jiksirx l-Artikolu 28 tal-KE (issal-Artikolu 34 tat-TFUE). Sabiex tivvaluta jekk l-oriġini kinitx tabilħaqq messaġġ sussidjarju, il-Kummissarju tieħu f'kunsiderazzjoni l-importanza globali tat-test u/jew tas-simbolu, inklużi stampi u preżentazzjoni ġenerali, b'referenza għall-oriġini u l-importanza tat-test u/jew tas-simbolu li jirreferi għall-punt tal-bejgħ uniku tar-reklam, jiġifieri l-parti tal-messaġġ tar-reklamar li ma tiffokax fuq l-oriġini (il-punti 40 u 41 tal-Linji Gwida dwar ir-Reklamar tal-2001).

(230)

Meta l-għajnuna tkun ingħatat għall-prodotti li jissodisfaw rekwiżiti ta' kwalità speċjali, din kellha tkun miftuħa għall-prodotti kollha manifatturati fil-Komunità, irrispettivament mill-oriġini tagħhom. L-Istati Membri ntalbu wkoll jirrikonoxxu r-riżultati tal-kontrolli komparabbli mwettqa fi Stati Membri oħrajn (il-punt 49 tal-Linji Gwida dwar ir-Reklamar tal-2001).

(231)

Skont il-punt 55 tal-Linji Gwida dwar ir-Reklamar tal-2001, l-għajnuna setgħet tiġi awtorizzata biss meta l-prodotti li kellhom indikazzjonijiet li jirreferu għal metodi ta' biedja organika ssodisfaw ir-rekwiżiti tar-Regolament (KEE) Nru 2092/91. Il-produtturi u l-proċessuri kollha ta' prodotti ta' biedja organika kellhom ikunu soġġetti għas-sistema ta' kontrolli stipulati fir-Regolament.

(232)

Fl-applikazzjoni tad-dispożizzjonijiet imsemmija fuq għall-miżuri ta' reklamar għat-tikketta tal-kwalità u għall-bijotikketta fil-perjodu mill-1 ta' Jannar 2002 sal-31 ta' Diċembru 2006, il-Kummissjoni tasal għall-konklużjonijiet li ġejjin:

(233)

It-tikketta tal-kwalità u waħda miż-żewġ verżjonijiet tal-bijotikketta (ara l-premessa 64) kienu jinkludu referenza għall-oriġini tal-prodott, iżda dan il-messaġġ jista' jitqies bħala sekondarju għall-messaġġ ewlieni dwar il-kwalità (organika) tal-prodott. Ir-referenza għall-oriġini tal-prodott kellha pożizzjoni subordinata kemm fil-messaġġ grafiku (sfond) kif ukoll fit-test tal-logo.

(234)

Fir-rigward tad-disinn tat-tikketti, il-Kummissjoni tinnota li l-ispazju ċentrali tat-tikketti kien okkupat mill-qasam fejn it-test “AMA Gütesiegel” jew “BIJO” iddomina u l-oriġini tal-prodott kienet indikata f'ittri konsiderevolment iżgħar. L-oqsma tal-ġenb ġew ippreżentati f'kuluri nazzjonali (pereżempju, aħmar u abjad għall-Awstrija) mingħajr ebda simbolu addizzjonali li jidentifika l-pajjiż tal-produzzjoni. Il-qasam ċentrali mhux biss okkupa l-ispazju viżwalment dominanti fit-tikketti, iżda kien jikkostitwixxi madwar 65 % tal-wisa' totali tat-tikketta (ara l-premessa 64). L-awtoritajiet Awstrijaċi komplew jispeċifikaw li fir-reklamar kollu marbut maż-żewġ tikketti, il-kwalità tal-prodott kienet il-messaġġ ewlieni u l-oriġini tal-prodott, fejn issemmiet, kienet biss messaġġ sekondarju (ara l-premessa 79).

(235)

Skont l-awtoritajiet Awstrijaċi, il-bijotikketta ngħatat biss għall-prodotti organiċi li jissodisfaw il-kriterji stipulati fir-Regolament (KEE) Nru 2092/91 (ara l-premessa 69).

(236)

L-awtoritajiet Awstrijaċi taw assigurazzjonijiet li d-dispożizzjonijiet tad-Direttiva 2000/13/KE ġew irrispettati fir-reklamar issussidjat (ara l-premessa 68).

(237)

Ir-reklamar ma kienx marbut mal-prodotti ta' impriża partikolari waħda jew aktar. L-awtoritajiet Awstrijaċi speċifikaw li fir-reklamar f'punt tal-bejgħ ma ġewx irreklamati impriżi jew prodotti msemmija u li s-sid tal-punt tal-bejgħ ma bbenifikax mill-għajnuna (ara l-premessa 78).

(238)

L-awtoritajiet Awstrijaċi speċifikaw li l-attivitajiet ta' reklamar kollha ffinanzjati minn AMA Marketing twettqu minn impriżi privati magħżula permezz ta' offerta pubblika (ara l-premessa 52).

(239)

Barra minn hekk, skont l-awtoritajiet Awstrijaċi, l-użu tat-tikketta tal-kwalità kien miftuħ għall-prodotti kollha manifatturati fl-Unjoni jekk huma ssodisfaw ir-rekwiżiti speċjali għall-użu tat-tikketta. Dawn ir-rekwiżiti speċjali jew kienu jikkonċernaw il-kwalità tal-prodotti jew inkella kienu limitati sabiex jiżguraw l-oriġini ġeografika indikata tal-prodott. Fi kwalunkwe każ, ir-rekwiżiti speċjali jistgħu jiġu ssodisfati, irrispettivament mill-oriġini ġeografika tal-prodott (ara l-premessa 161).

(240)

Fid-deċiżjoni tal-ftuħ, il-Kummissjoni rrimarkat li hija ma kellha ebda informazzjoni dwar il-kwistjoni ta' jekk il-kontrolli ekwivalenti mwettqa fi Stati Membri oħrajn ġewx rikonoxxuti. Fis-sottomissjoni tagħhom tal-14 ta' Settembru 2012, l-awtoritajiet Awstrijaċi kkonfermaw li tali kontrolli ġew rikonoxxuti u pprovdew evidenza ta' sostenn għal dan.

(241)

Għalkemm l-awtoritajiet Awstrijaċi kkonfermaw li, mill-2002 'il quddiem, it-tikketta tal-kwalità u l-bijotikketta kienu miftuħa għall-prodotti kollha, irrispettivament mill-oriġini tagħhom, fid-deċiżjoni tal-ftuħ, il-Kummissjoni esprimiet dubji minħabba li r-referenza għal prodotti nazzjonali fil-bażi ġuridika ewlenija għall-miżuri, jiġifieri l-Att dwar l-AMA, ġiet abolita biss fl-2007 (ara l-premessa 161).

(242)

Fis-sottomissjonijiet tagħhom, l-awtoritajiet Awstrijaċi pprovdew ir-regoli interni ġodda li abbażi tagħhom it-tikketti kienu miftuħa għall-prodotti kollha, kif ukoll dejta li turi li għadd ta' prodotti mhux Awstrijaċi tabilħaqq kisbu t-tikketti wara l-2001. Huma reġgħu kkonfermaw ukoll li, mill-2002 'il quddiem, ir-regoli ġew applikati għall-prodotti kollha, irrispettivament mill-oriġini tagħhom.

(243)

Fid-deċiżjoni tal-ftuħ, il-Kummissjoni nnotat li ma kienx ċar jekk ir-regoli interni ġodda ta' AMA kinux diġà ddaħħlu fis-seħħ mis-26 ta' Settembru 2002 jew jekk kienx hemm perjodu tranżitorju wara s-26 ta' Settembru 2002 li matulu l-għajnuna kompliet tingħata skont ir-regoli l-antiki. Fis-sottomissjoni tagħhom tal-14 ta' Settembru 2012, l-awtoritajiet Awstrijaċi ddikjaraw li ma kien hemm ebda perjodu tranżitorju bħal dan.

(244)

Fil-premessa 175 tad-deċiżjoni tal-ftuħ, il-Kummissjoni ddikjarat li hija ma kellhiex biżżejjed informazzjoni sabiex tivvaluta jekk ir-regoli dwar l-għajnuna mill-Istat humiex applikabbli għall-miżuri koffinanzjati ta' promozzjoni tal-bijotikketta msemmija fil-premessa 80 ta' hawn fuq. Għal dak il-għan, l-awtoritajiet Awstrijaċi ġew mistiedna jipprovdu aktar informazzjoni dwar l-approvazzjoni tal-għajnuna mill-Istat tal-miżuri, kif ukoll dwar it-tul ta' żmien tal-perjodu ta' programmazzjoni. Fis-sottomissjoni tagħhom tal-14 ta' Settembru 2012, l-awtoritajiet Awstrijaċi indikaw li l-miżuri ta' promozzjoni tal-bijotikketta kienu parti mill-programm ta' promozzjoni u informazzjoni koffinanzjat mill-Awstrija għall-prodotti bijoloġiċi.

(245)

Fit-tweġiba tagħhom tal-14 ta' Settembru 2012, l-awtoritajiet Awstrijaċi ddikjaraw ukoll dan li ġej: Fil-perjodu 2002-2008 (20 ta' Settembru 2002-15 ta' Settembru 2005) kien qed jopera programm koffinanzjat ta' informazzjoni u promozzjoni għall-prodotti organiċi. Dan il-programm kien approvat mid-Deċiżjoni tal-Kummissjoni C (2002) 3116 tat-22 ta' Awwissu 2002 (85). Barra minn hekk, id-Deċiżjoni tal-Kummissjoni C (2007) 3299 tal-10 ta' Lulju 2007 approvat programm ieħor ta' 3 snin għall-bijotikketta (1 ta' Ottubru 2007-30 ta' Settembru 2010) (86).

(246)

Għar-raġunijiet iddikjarati hawn fuq, l-għajnuna għall-miżuri ta' reklamar imwettqa fil-perjodu mill-1 ta' Jannar 2002 sal-31 ta' Diċembru 2006 kienet konformi mal-Linji Gwida dwar ir-Reklamar tal-2001 u, b'hekk, mal-Linji Gwida għall-perjodu 2000-2006. Għalhekk, il-Kummissjoni tqis li din l-għajnuna kienet kompatibbli mas-suq intern.

(247)

Il-kampanji ta' reklamar setgħu jiġu awtorizzati jekk kienu organizzati direttament jew indirettament minn Stat Membru wieħed fis-suq ta' Stat Membru ieħor jew fis-suq domestiku tal-Istat Membru ta' sostenn u l-prodott jiġi rreklamat b'mod purament ġeneriku mingħajr ma ssir referenza għall-oriġini nazzjonali tiegħu (il-punt 19 (a)-(b) tal-Linji Gwida dwar ir-Reklamar tal-2001).

(248)

Skont il-Linji Gwida dwar ir-Reklamar tal-2001, il-Kummissjoni tilqa' b'mod favorevoli l-kampanji ta' reklamar li twettqu sabiex il-konsumaturi jiġu introdotti għall-prodotti agrikoli u għal prodotti oħrajn ta' Stat Membru jew reġjun partikolari. L-enfasi primarja ta' tali kampanji tista' tkun l-oriġini tal-prodott diment li l-kampanja tkun twettqet barra l-Istat Membru jew ir-reġjun fejn ġew manifatturati l-prodotti agrikoli u prodotti oħrajn. Il-kampanji kellhom ikunu limitati għall-preżentazzjoni tal-karatteristiċi oġġettivi tal-prodotti kkonċernati u, fil-prinċipju, ma għandhomx jinkludu pretensjonijiet suġġettivi dwar il-kwalità tal-prodotti (il-punti 35-39 tal-Linji Gwida dwar ir-Reklamar tal-2001).

(249)

Abbażi tal-informazzjoni disponibbli fil-ħin tad-deċiżjoni tal-ftuħ għall-perjodu 2002-2004 rigward ir-reklamar ġeneriku u r-reklamar barra l-Awstrija (ara t-taqsimiet 2.7.1.2 u 2.7.1.3 tad-deċiżjoni tal-ftuħ) ma kienx possibbli li tiġi vvalutata l-kompatibbiltà tal-miżuri mal-kundizzjonijiet stipulati fil-punti 19(b), 29, 30 u 39 tal-Linji Gwida dwar ir-Reklamar tal-2001.

(250)

Għalhekk, fid-deċiżjoni tal-ftuħ, l-awtoritajiet Awstrijaċi ġew mistiedna jipprovdu l-informazzjoni meħtieġa fir-rigward tad-dispożizzjonijiet imsemmija fuq.

(251)

Il-kampanji ta' reklamar barra l-Istat Membru u r-reklamar ġeneriku fl-Istat Membru kellhom ikunu konformi mal-kriterji pożittivi tal-Linji Gwida dwar ir-Reklamar tal-2001 (ara l-premessi 227 u 228).

(252)

Barra minn hekk, il-punt 47 tal-Linji Gwida dwar ir-Reklamar tal-2001 stabbilixxa li għar-reklamar ta' prodotti li jissodisfaw rekwiżiti ta' kwalità partikolari, tali prodotti għandhom jissodisfaw l-istandards jew l-ispeċifikazzjonijiet li kienu evidentement ogħla jew aktar speċifiċi minn dawk li kienu stipulati fil-leġiżlazzjoni nazzjonali jew Komunitarja rilevanti.

(253)

Il-punt 60 tal-Linji Gwida dwar ir-Reklamar tal-2001 stabbilixxa li fil-każ tal-għajnuna għar-reklamar, ir-rata tal-għajnuna diretta, bħala regola ġenerali, ma għandhiex taqbeż il-50 % u l-impriżi mis-settur kellhom jikkontribwixxu mill-inqas 50 % tal-ispiża, fejn l-għajnuna diretta kienet ġejja minn baġit tal-gvern bi skop ġenerali. Il-kontribuzzjoni tas-settur tista' tiġi wkoll mill-imposti parafiskali jew minn kontribuzzjonijiet obbligatorji.

(254)

Fir-rigward tar-reklamar ġeneriku u r-reklamar barra l-Awstrija, abbażi tal-informazzjoni disponibbli għall-Kummissjoni fiż-żmien tad-deċiżjoni tal-ftuħ għall-perjodu 2002-2004, ma kienx possibbli li tiġi vvalutata l-kompatibbiltà tal-miżuri mar-regoli msemmija fuq. Għalhekk, l-awtoritajiet Awstrijaċi ġew mistiedna jipprovdu l-informazzjoni meħtieġa fir-rigward tal-kundizzjoni stipulata fil-punt 32 tal-Linji Gwida dwar ir-Reklamar tal-2001 (il-premessa (174) tad-deċiżjoni tal-ftuħ).

(255)

Fit-tweġiba tal-14 ta' Settembru 2012, l-Awstrija rreferiet għas-sottomissjoni tagħha tat-13 ta' Diċembru 2002. Madankollu, din is-sottomissjoni tinkludi biss eżempji konkreti u l-bażi legali nazzjonali għall-miżuri. Għalhekk, fit-talba tagħha għall-informazzjoni tad-19 ta' Frar 2014, il-Kummissjoni talbet lill-awtoritajiet Awstrijaċi sabiex jimlew il-formoli ta' notifika rilevanti u jissottomettuhom lill-Kummissjoni. Fit-tweġiba tagħhom tat-30 ta' April 2014, l-awtoritajiet Awstrijaċi ssottomettew il-formoli ta' notifika mitluba. Madankollu, l-informazzjoni mimlija fil-formoli rreferiet biss għad-deskrizzjonijiet ġenerali tal-kundizzjonijiet tal-iskema u ma kinitx biżżejjed għall-valutazzjoni xierqa tal-miżuri.

(256)

Fit-talba tagħha għall-informazzjoni tas-17 ta' Diċembru 2014, il-Kummissjoni talbet għal informazzjoni addizzjonali dwar din il-miżura. Fit-tweġiba tagħha tal-25 ta' Frar 2015, l-Awstrija kkonfermat li:

(257)

Għar-raġunijiet iddikjarati hawn fuq, l-għajnuna għall-kampanji ta' reklamar barra l-Awstrija u għar-reklamar ġeneriku fl-Awstrija mwettqa fil-perjodu mill-2002 sal-2004 kienet konformi mal-Linji Gwida dwar ir-Reklamar tal-2001 u, b'hekk, mal-Linji Gwida għall-perjodu 2000-2006. Għalhekk, il-Kummissjoni tqis din l-għajnuna bħala kompatibbli mas-suq intern.

(258)

Meta tivvaluta l-għajnuna mill-Istat għar-reklamar ta' prodotti agrikoli mogħtija wara l-1 ta' Jannar 2007, il-Kummissjoni tapplika t-Taqsima VI.D tal-Linji Gwida għall-perjodu 2007-2013.

(259)

Fl-istadju tad-deċiżjoni tal-ftuħ, il-Kummissjoni ma kellhiex biżżejjed informazzjoni biex tivvaluta jekk dawn il-miżuri kinux konformi mal-Linji Gwida għall-perjodu 2007-2013. F'dan ir-rigward, il-Kummissjoni esprimiet ċerti dubji rigward l-issodisfar tal-kundizzjonijiet li kienu differenti mir-rekwiżiti tal-Linji Gwida għall-perjodu 2007-2013.

(260)

B'mod partikolari, il-Kummissjoni ġibdet l-attenzjoni tal-awtoritajiet Awstrijaċi għall-modifiki stabbiliti fil-punt 153(ċ), it-tieni nofs tas-sentenza, il-punt 155, it-tieni sentenza, u l-punt 158 tal-Linji Gwida għall-perjodu 2007-2013. Għalhekk, l-awtoritajiet Awstrijaċi ġew mistiedna sabiex jipprovdu l-informazzjoni meħtieġa sabiex juru li l-miżuri ta' reklamar ta' kwalità kienu konformi mal-kundizzjonijiet imsemmija fuq tal-Linji Gwida.

(261)

Taħt il-punt 153 tal-Linji Gwida għall-perjodu 2007-2013, l-għajnuna mill-Istat għall-kampanji ta' reklamar fil-Komunità tista' tiġi ddikjarata bħala kompatibbli mat-Trattat jekk jiġu ssodisfati l-kundizzjonijiet li ġejjin:

(262)

Skont l-informazzjoni pprovduta mill-awtoritajiet Awstrijaċi fit-30 ta' April 2014, il-kundizzjonijiet tal-punt 153 tal-Linji Gwida għall-perjodu 2007-2013 ġew irrispettati.

(263)

Il-punt 155 tal-Linji Gwida għall-perjodu 2007-2013 stabbilixxa li, fil-każ tat-tikketti tal-kwalità reġjonali jew nazzjonali, l-oriġini tal-prodotti tista' tissemma (biss) bħala messaġġ sussidjarju. Sabiex tivvaluta jekk l-oriġini kinitx messaġġ sussidjarju jew le, il-Kummissarju kellha tieħu f'kunsiderazzjoni l-importanza globali tat-test u/jew tas-simbolu, inklużi stampi u preżentazzjoni ġenerali, b'referenza għall-oriġini u l-importanza tat-test u/jew tas-simbolu li jirreferi għall-punt tal-bejgħ uniku tar-reklam, jiġifieri l-parti tal-messaġġ tar-reklamar li ma tiffokax fuq l-oriġini.

(264)

Fis-sottomissjoni tagħhom tat-30 ta' April 2014, l-awtoritajiet Awstrijaċi kkonfermaw li t-tikketti użati fl-2007 kienu identiċi għal dawk approvati fid-deċiżjoni tal-Kummissjoni tal-2004 (ara wkoll il-premessa 233). Il-Kummissjoni tirreferi għal din il-valutazzjoni u, għalhekk, tqis li l-kundizzjonijiet tal-punt 155 tal-Linji Gwida għall-perjodu 2007-2013 huma ssodisfati.

(265)

Il-punt 156 tal-Linji Gwida għall-perjodu 2007-2013 iddikjara li r-rata ta' intensità tal-għajnuna diretta ma setgħetx taqbeż il-50 %. Jekk is-settur ikkontribwixxa mill-inqas 50 % tal-ispejjeż, irrispettivament mill-forma tal-kontribuzzjoni, ir-rata ta' għajnuna tista' titla' sa 100 % tal-ispejjeż eliġibbli. Kif intwera fuq (il-premessa 200), din il-kundizzjoni hija ssodisfata.

(266)

Il-punt 158 tal-Linji Gwida għall-perjodu 2007-2013 stabbilixxa li l-attivitajiet ta' reklamar b'baġit annwali f'eċċess ta' EUR 5 miljun kellhom jiġu nnotifikati separatament. Mill-informazzjoni pprovduta mill-awtoritajiet Awstrijaċi (il-premessa 45), jista' jiġi konkluż li din il-kundizzjoni hija rrispettata, billi l-baġit annwali allokat għat-tikketta tal-kwalità fis-snin 2007 u 2008 kien taħt il-EUR 5 miljun.

(267)

Għar-raġunijiet imsemmija hawn fuq, il-miżuri ta' reklamar imwettqa fil-perjodu mill-2007 sal-2008 jikkonformaw mal-Linji Gwida għall-perjodu 2007-2013 u, b'hekk, huma kompatibbli mas-suq intern.

(268)

Il-Kummissjoni tinnota f'dan ir-rigward li l-miżuri ta' reklamar tal-bijotikketta skadew fi tmiem l-2006 u b'hekk mhumiex soġġetti għall-valutazzjoni skont il-Linji Gwida għall-perjodu 2007-2013 (ara l-premessa 15).

(269)

Id-dispożizzjonijiet dwar ir-reklamar ġeneriku u r-reklamar f'pajjiżi terzi mhumiex rilevanti għall-perjodu 2007-2008 minħabba li l-miżuri ta' għajnuna li kkonċernaw dawk l-attivitajiet skadew fl-2004 bl-adozzjoni tal-iskema ta' għajnuna N 239/2004, kif deskritt fil-premessa 39.

(270)

Il-linji gwida speċifiċi dwar l-għajnuna mill-Istat ġew applikati biss għas-settur agrikolu biss mill-1 ta' Jannar 2000. B'hekk, il-kompatibbiltà tal-għajnuna mogħtija qabel din id-data għandha tiġi vvalutata abbażi tat-Trattat u fid-dawl tal-prattika tal-Kummissjoni stabbilita f'dak iż-żmien (ara l-premessa 169 hawn fuq).

(271)

L-operazzjonijiet ta' promozzjoni fis-sens usa' tal-kelma, bħat-tixrid ta' għarfien xjentifiku lill-pubbliku ġenerali, l-organizzazzjoni ta' fieri kummerċjali jew wirjiet, il-parteċipazzjoni f'dawn u f'eżerċizzji simili tar-relazzjonijiet pubbliċi, inklużi stħarriġ u riċerka tas-suq, kienu esklużi mill-ambitu tal-Qafas tar-Reklamar tal-1987 permezz tal-punt 1.1 tiegħu. Safejn hija kkonċernata n-nefqa għal dawn l-attivitajiet, kienet prattika stabbilita tal-Kummissjoni li tikkunsidra għajnuna sa massimu ta' 100 % bħala kompatibbli mas-suq komuni skont l-Artikolu 92(3)(ċ) tat-Trattat (issal-Artikolu 107(3)(ċ) tat-TFUE) (89).

(272)

Barra minn hekk, skont il-prattika u l-politika tagħha, il-Kummissjoni laqgħet b'mod favorevoli l-miżuri ta' għajnuna mhux vinkolanti li kienu maħsuba biex jipprovdu appoġġ tekniku fis-settur agrikolu. Pereżempju, ġiet awtorizzata għajnuna sa massimu ta' 100 % tal-ispejjeż eliġibbli tal-miżuri sabiex jinxterdu tekniki ġodda.

(273)

Il-miżuri ta' kummerċjalizzazzjoni ta' AMA deskritti fil-Kapitolu 4.3 ta' hawn fuq jaqgħu f'dawn il-kategoriji.

(274)

L-għan tal-miżuri inkwistjoni kien it-tixrid ta' għarfien ġenerali permezz tal-organizzazzjoni ta' proġetti ta' informazzjoni ġenerali. Dawn kienu mmirati għall-preżentazzjoni ta' informazzjoni fattwali lill-klijenti u naqsu milli jipperswadu lill-klijenti sabiex jixtru prodott speċifiku.

(275)

Għalhekk, il-miżuri kienu konformi mal-prattika tal-Kummissjoni f'dak iż-żmien, li kienet tal-fehma li l-għan segwit kien leġittimu. L-intensità tal-għajnuna ta' 100 % kienet konformi wkoll mal-intensità tal-għajnuna massima li f'dak iż-żmien kienet meqjusa bħala proporzjonata fid-dawl ta' dan l-għan u l-impatt negattiv limitat fuq il-kompetizzjoni u l-kummerċ.

(276)

L-għajnuna għal promozzjoni f'sens usa' tal-kelma fil-perjodu 1995-1999 kienet konformi mal-prattika stabbilita tal-Kummissjoni f'dak iż-żmien u, għalhekk, il-Kummissjoni hija tal-fehma li dawn il-miżuri kienu kompatibbli mas-suq komuni skont l-Artikolu 92(3)(ċ) tal-KE (issal-Artikolu 107(3)(ċ) tat-TFUE).

(277)

F'dak li għandu x'jaqsam mal-għajnuna għal assistenza teknika u s-servizzi ta' konsulenza b'konnessjoni mat-tfassil ta' skemi ta' assigurazzjoni tal-kwalità, il-Kummissjoni kienet tal-fehma li tali servizzi kienu jikkostitwixxu forma ta' “għajnuna mhux vinkolanti” li segwiet objettiv ta' interess komuni u li kienet proporzjonata (b'mod partikolari minħabba li ma kinitx taffettwa l-kundizzjonijiet tal-kompetizzjoni b'mod sinifikanti) u, b'hekk, kienet kompatibbli mas-suq komuni.

(278)

Il-miżuri deskritti fil-Kapitolu 4.3 jistgħu jitqiesu bħala tali għajnuna mhux vinkolanti li, skont il-prattika stabbilita tal-Kummissjoni f'dak iż-żmien, tqieset bħala kompatibbli mas-suq komuni.

(279)

Fir-rigward tal-miżuri ta' kontroll maħsuba biex jiżguraw il-konformità mal-istandards ta' traċċabbiltà jew kwalità ġestiti mill-industrija, il-Kummissjoni, wara l-approċċ ikkomunikat lill-Istati Membri fl-ittra dwar it-trobbija tal-bhejjem (90), ippermettiet b'mod konsistenti li tingħata għajnuna sa massimu ta' 100 % tal-ispejjeż għall-kontrolli obbligatorji. Għal darba oħra, dan kien ibbażat fuq l-idea li tali għajnuna segwiet objettiv ta' interess komuni u kienet proporzjonata, b'mod partikolari minħabba l-impatt negattiv limitat fuq il-kompetizzjoni u l-kummerċ ta' tali appoġġ indirett.

(280)

Fir-rigward ta' dawk il-miżuri, l-awtoritajiet Awstrijaċi ntalbu jispjegaw jekk il-kontrolli tal-AMA kinux obbligatorji jew le u, jekk dan tal-aħħar ikun il-każ, jindikaw jekk il-limitu tal-intensità tal-għajnuna kienx irrispettat.

(281)

Fis-sottomissjoni tagħhom tat-30.4.2014, l-awtoritajiet Awstrijaċi wieġbu li l-kontrolli inkwistjoni kienu obbligatorji skont l-atti legali ta' implimentazzjoni ta' AMA u li l-limitu tal-intensità tal-għajnuna kien irrispettat.

(282)

Għalhekk, il-kundizzjonijiet għall-kompatibbiltà tal-għajnuna huma ssodisfati.

(283)

L-attivitajiet relatati mal-iżvilupp ta' sistemi tal-kwalità u kontrolli tal-kwalità kienu eliġibbli għall-għajnuna b'rabta kemm mal-bijotikketta kif ukoll mat-tikketta tal-kwalità. Dan jikkostitwixxi għajnuna għall-produzzjoni u l-kummerċjalizzazzjoni ta' prodotti ta' kwalità, li għandha tiġi vvalutata skont il-punt 13 tal-Linji Gwida għall-perjodu 2000-2006.

(284)

Il-punt 13 tal-Linji Gwida għall-perjodu 2000-2006 jistabbilixxi l-kundizzjonijiet li taħthom tista' tingħata għajnuna li tinkoraġġixxi l-produzzjoni u l-kummerċjalizzazzjoni ta' prodotti agrikoli ta' kwalità.

(285)

Skont il-punt 13.2 tal-Linji Gwida għall-perjodu 2000-2006, l-appoġġ jista' jingħata, fost l-oħrajn, għall-ispejjeż tal-konsulenza, tal-istudji tekniċi, tal-istudji tal-fattibbiltà u tad-disinn u tar-riċerka tas-suq, kif ukoll għall-introduzzjoni ta' skemi ta' assigurazzjoni tal-kwalità. Fil-każ tal-SMEs, l-ispejjeż ma jistgħux jaqbżu l-EUR 100 000 għal kull benefiċjarju f'perjodu ta' tliet snin jew 50 % tal-ispejjeż eliġibbli, skont liema minnhom tkun l-akbar. Għall-impriżi kbar applika l-ewwel limitu waħdu.

(286)

Kif speċifikat fil-punt 13.3 tal-Linji Gwida għall-perjodu 2000-2006, il-Kummissjoni kienet tal-fehma li ma għandha tingħata ebda għajnuna fir-rigward tal-kontrolli tal-kwalità ta' rutina mwettqa mill-manifattur. L-għajnuna tista' tingħata biss fir-rigward tal-kontrolli mwettqa minn jew f'isem partijiet terzi, bħall-awtoritajiet regolatorji jew l-organiżmi responsabbli mis-superviżjoni tat-tikketti. Il-punt 13.4 tal-Linji Gwida għall-perjodu 2000-2006 stabbilixxa li l-għajnuna għall-kontrolli tal-metodi ta' produzzjoni organika mwettqa fi ħdan il-qafas tar-Regolament (KEE) Nru 2092/91 kienet permessa bir-rata sa massimu ta' 100 % tal-ispejjeż imġarrba.

(287)

Il-punt 13.5 tal-Linji Gwida għall-perjodu 2000-2006 stabbilixxa li l-għajnuna tista' tingħata b'rata inizjali sa massimu ta' 100 % tal-ispejjeż tal-kontrolli mwettqa mill-korpi responsabbli mis-superviżjoni tal-użu ta' marki u tikketti ta' kwalità taħt l-iskemi ta' assigurazzjoni tal-kwalità rikonoxxuti. Tali għajnuniet kellhom jitnaqqsu b'mod progressiv, sabiex b'hekk ġew eliminati sas-seba' sena wara l-istabbiliment tagħhom.

(288)

L-għajnuna għall-ispejjeż tal-abbozzar u tad-distribuzzjoni tad-dokumenti ta' assigurazzjoni tal-kwalità u għall-iżvilupp ta' sistemi tal-informatika fi ħdan AMA Marketing kienet iddestinata biex tiffinanzja l-ispejjeż amministrattivi ta' AMA Marketing (korp pubbliku, mhux operatur ekonomiku) u, għalhekk, ma tikkostitwixxi ebda għajnuna mill-Istat għall-produzzjoni, id-distribuzzjoni jew il-kummerċjalizzazzjoni tal-prodotti elenkati fl-Anness I tat-Trattat.

(289)

Kif deskritt fil-premessa 98, l-għajnuna għall-kontrolli tal-kwalità kienet disponibbli għall-kontrolli esterni mwettqa mill-korpi magħżula għal dak l-iskop bil-kundizzjoni tal-użu tal-bijotikketta jew tat-tikketta tal-kwalità. Il-kontrolli li jikkonċernaw l-użu tal-bijotikketta u tat-tikketta tal-kwalità ġew issussidjati b'rata ta' 100 %, filwaqt li l-ispejjeż tal-kontrolli ta' rutina tħallsu mill-pussessuri tal-liċenzji u, b'hekk, ma ġewx issussidjati.

(290)

Fis-sottomissjoni tagħhom tal-14 ta' Settembru 2012, l-awtoritajiet Awstrijaċi kkonfermaw li l-għajnuna għall-kontrolli tal-kwalità qatt ma qabżet il-livell limitu ta' EUR 100 000 għal kull benefiċjarju f'perjodu ta' tliet snin. Għalhekk, il-kundizzjonijiet tal-punt 13.2 tal-Linji Gwida għall-perjodu 2000-2006 ġew issodisfati.

(291)

Fis-sottomissjonijiet tagħhom tal-14 ta' Settembru 2012 u tat-30 ta' April 2014, l-awtoritajiet Awstrijaċi ma pprovdewx biżżejjed informazzjoni sabiex tkun tista' ssir valutazzjoni tal-kundizzjonijiet tal-punti 13.3, 13.4 u 13.5 tal-Linji Gwida għall-perjodu 2000-2006.

(292)

Għalhekk, fit-talba tagħha għall-informazzjoni tas-17 ta' Diċembru 2014, il-Kummissjoni talbet għal informazzjoni addizzjonali dwar din il-miżura. Fit-tweġiba tagħha ta' Frar 2015, l-Awstrija kkonfermat li:

(293)

Fis-sottomissjonijiet preċedenti tagħhom tal-14 ta' Settembru 2012 u tat-30 ta' April 2014, l-awtoritajiet Awstrijaċi kienu diġà kkonfermaw li l-għajnuniet tnaqqsu b'mod progressiv u ġew eliminati kompletament fis-sena 2009. Għalhekk, billi l-Linji Gwida għall-perjodu 2000-2006 jipprevedu tnaqqis progressiv tal-għajnuna, il-kundizzjonijiet tal-punt 13.5 tal-Linji Gwida għall-perjodu 2000-2006 ġew issodisfati għall-miżuri kollha mogħtija sal-31 ta' Diċembru 2006.

(294)

Madankollu, billi dawn l-għajnuniet ingħataw ukoll wara l-1 ta' Jannar 2007 (jiġifieri fis-snin 2007 u 2008), il-Linji Gwida għall-perjodu 2007-2013 japplikaw għal dan il-perjodu.

(295)

Fir-rigward tal-istrument legali msemmi l-aħħar, il-kundizzjonijiet, imqabbla mal-Linji Gwida għall-perjodu 2000-2006, inbidlu f'żewġ aspetti: il-lista tat-tipi ta' għajnuna kienet raffinata (91) u din ix-xorta ta' għajnuna kienet disponibbli biss għall-produtturi primarji (92).

(296)

Għalhekk, dawk il-miżuri li minnhom jibbenifikaw il-produtturi primarji u li ssoktaw wara l-2007 jikkonformaw mal-Linji Gwida għall-perjodu 2007-2013 u huma kompatibbli mas-suq intern.

(297)

Madankollu, l-għajnuniet mogħtija lill-impriżi tal-ipproċessar u tal-kummerċjalizzazzjoni għandhom jiġu vvalutati b'konformità mal-punt 99 tal-Linji Gwida għall-perjodu 2007-2013. Għalhekk, issir referenza għall-valutazzjoni fit-taqsima 8.6.2 ta' hawn taħt.

(298)

Fl-aħħarnett, f'dak li għandu x'jaqsam mal-introduzzjoni tal-iskema ta' assigurazzjoni tal-kwalità ISO 9002 (ara l-premessa 99), fil-premessa 203 tad-deċiżjoni tal-ftuħ, l-awtoritajiet Awstrijaċi ġew mistiedna jindikaw jekk din il-miżura kinitx applikabbli wkoll wara l-1999. Jekk il-mistoqsija kellha tiġi mwieġba fl-affermattiv, l-awtoritajiet Awstrijaċi ġew mistiedna juru jekk il-miżura ssodisfatx il-kundizzjonijiet tal-punt 13 tal-Linji Gwida għall-perjodu 2000-2006.

(299)

Fit-tweġiba tagħha ta' Frar 2015, l-Awstrija ddikjarat li la l-istandard ISO 9001:1994 u lanqas ebda ċertifikazzjoni oħra ma kienu obbligatorji skont il-Linji Gwida dwar l-AMA (it-tikketta tal-kwalità jew il-bijotikketta). Barra minn hekk, l-awtoritajiet Awstrijaċi jsostnu li l-iskema ta' assigurazzjoni tal-kwalità ISO 9002 la kienet meħtieġa u lanqas applikabbli.

(300)

Għar-raġunijiet imsemmija hawn fuq, l-għajnuna għall-prodotti ta' kwalità mogħtija fil-perjodu 2000-2006 hija konformi mal-Linji Gwida dwar ir-Reklamar tal-2001. Għalhekk, il-Kummissjoni tqis li l-għajnuna kienet kompatibbli mas-suq intern.

(301)

Tali għajnuna trid tiġi vvalutata taħt il-Kapitolu IV.J tal-Linji Gwida għall-perjodu 2007-2013.

(302)

Skont il-punt 98 tal-Linji Gwida għall-perjodu 2007-2013, il-Kummissjoni tista' tiddikjara l-għajnuna mill-Istat sabiex tinkoraġġixxi l-produzzjoni tal-prodotti ta' kwalità mogħtija lill-produtturi primarji kompatibbli mas-suq komuni skont l-Artikolu 87(3)(ċ) tal-KE (issa: l-Artikolu 107(3)(ċ) tat-TFUE) jekk hija tissodisfa l-kundizzjonijiet tal-Artikolu 14 tar-Regolament tal-Kummissjoni (KE) Nru 1857/2006 (93).

(303)

L-Artikolu 14 tar-Regolament (KE) Nru 1857/2006 iddikjara li l-għajnuna kienet kompatibbli mas-suq komuni skont it-tifsira tal-Artikolu 87(3)(ċ) tal-KE (issa: l-Artikolu 107(3)(ċ) tat-TFUE) jekk ingħatat lejn l-ispejjeż eliġibbli elenkati fl-Artikolu 14(2) u ssodisfat il-kundizzjonijiet stipulati fil-paragrafi 3 sa 6 tal-Artikolu 14 tar-Regolament (KE) Nru 1857/2006.

(304)

Skont l-Artikolu 14(2) tar-Regolament (KE) Nru 1857/2006, l-għajnuna maħsuba biex tinkoraġġixxi l-produzzjoni ta' prodotti agrikoli ta' kwalità tista' tkopri sa 100 % tal-ispejjeż eliġibbli għal, fost l-oħrajn:

(305)

Skont l-Artikolu 14(3) tar-Regolament (KE) Nru 1857/2006, l-għajnuna tista' tingħata biss fir-rigward tal-ispejjeż ta' servizzi pprovduti minn partijiet terzi u/jew kontrolli mwettqa minn jew f'isem partijiet terzi, bħall-awtoritajiet regolatorji kompetenti, jew korpi li jaġixxu f'isimhom, jew organiżmi indipendenti responsabbli għall-kontroll u s-superviżjoni tal-użu ta' indikazzjonijiet ġeografiċi u denominazzjonijiet ta' oriġini, tikketti organiċi jew tikketti ta' kwalità, bil-kundizzjoni li dawn id-denominazzjonijiet u t-tikketti jkunu konformi mal-leġiżlazzjoni Komunitarja. L-għajnuna ma setgħetx tingħata għall-infiq għall-investiment.

(306)

Skont l-Artikolu 14(4) tar-Regolament (KE) Nru 1857/2006, l-għajnuna ma tistax tingħata għall-ispiża tal-kontrolli mwettqa mill-bidwi jew mill-manifattur innifsu, jew fejn il-leġiżlazzjoni Komunitarja stabbilixxiet li l-ispiża tal-kontroll kellha tiġi ssodisfata mill-produtturi, mingħajr ma jiġi speċifikat il-livell reali tal-ħlasijiet.

(307)

L-Artikolu 14(5) tar-Regolament (KE) Nru 1857/2006 stabbilixxa li bl-eċċezzjoni tal-għajnuna msemmija fil-paragrafu 2(f) ta' dak ir-Regolament, l-għajnuna kellha tingħata in natura permezz ta' servizzi ssussidjati u ma setgħetx tinvolvi pagamenti diretti ta' flus lill-produtturi.

(308)

L-għajnuna kellha tkun aċċessibbli għal dawk kollha eliġibbli fil-qasam ikkonċernat, abbażi ta' kundizzjonijiet definiti b'mod oġġettiv. Jekk is-servizzi kienu pprovduti minn gruppi produtturi jew organizzazzjonijiet agrikoli ta' appoġġ reċiproku, is-sħubija ta' tali organizzazzjonijiet ma setgħetx tkun kundizzjoni għall-aċċess għas-servizz u kwalunkwe kontribuzzjoni lejn l-ispejjeż amministrattivi kellha tkun limitata għall-ispejjeż proporzjonali tal-provvista tas-servizz (l-Artikolu 14(6) tar-Regolament (KE) Nru 1857/2006).

(309)

Skont il-punt 100 tal-Linji Gwida għall-perjodu 2007-2013, il-Kummissjoni ma awtorizzatx l-għajnuna mill-Istat għall-ispejjeż koperti favur impriżi kbar.

(310)

Il-biċċa l-kbira tal-kundizzjonijiet sostantivi tal-Linji Gwida għall-perjodu 2007-2013 għall-kompatibbiltà tal-għajnuna għall-produtturi primarji ma nbidlux meta mqabbla mal-Linji Gwida għall-perjodu 2000-2006 deskritti hawn fuq. Issir referenza għall-valutazzjoni fit-taqsima 8.5.

(311)

Il-bidliet sostantivi mqabbla mal-perjodu preċedenti kienu relatati mal-fatt li l-għajnuna kellha tkun in natura (permezz ta' servizzi ssussidjati) u li l-għajnuna kellha tkun aċċessibbli għal dawk kollha eliġibbli fil-qasam ikkonċernat, abbażi ta' kundizzjonijiet definiti b'mod oġġettiv. L-awtoritajiet Awstrijaċi kkonfermaw li dawn il-kundizzjonijiet ġew issodisfati.

(312)

Għalhekk, l-għajnuna għal prodotti ta' kwalità għall-produtturi primarji hija konformi mal-Linji Gwida għall-perjodu 2007-2013. Għalhekk, il-Kummissjoni tqis din l-għajnuna bħala kompatibbli mas-suq komuni skont l-Artikolu 87(3)(ċ) tal-KE (issa: l-Artikolu 107(3)(ċ) tat-TFUE).

(313)

Skont il-punt 99 tal-Linji Gwida għall-perjodu 2007-2013, il-Kummissjoni tista' tiddikjara l-għajnuna mill-Istat sabiex tinkoraġġixxi l-produzzjoni u l-kummerċjalizzazzjoni tal-prodotti agrikoli ta' kwalità mogħtija lill-impriżi attivi fl-ipproċessar u fil-kummerċjalizzazzjoni ta' prodotti agrikoli kompatibbli mas-suq komuni skont l-Artikolu 87(3)(ċ) tal-KE (issa: l-Artikolu 107(3)(ċ) tat-TFUE) jekk hija tissodisfa l-kundizzjonijiet stipulati fl-Artikolu 5 tar-Regolament tal-Kummissjoni (KE) Nru 70/2001 (94).

(314)

Ir-Regolament (KE) Nru 70/2001 ġie sostitwit mir-Regolament tal-Kummissjoni (KE) Nru 800/2008 (95) (2008-2013 GBER), li fl-Artikolu 43 tiegħu jiddikjara li kwalunkwe referenzi għar-Regolament (KE) Nru 70/2001 għandhom jitqiesu bħala referenzi għar-Regolament (KE) Nru 800/2008. Skont l-Artikolu 45 tiegħu, ir-Regolament (KE) Nru 800/2008 daħal fis-seħħ fl-20 jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea, jiġifieri fid-29 ta' Awwissu 2008. Konsegwentement, bejn l-1 ta' Jannar 2007 u t-28 ta' Awwissu 2008, l-Artikolu 5 (a) tar-Regolament (KE) Nru 70/2001 kien applikabbli għall-għajnuna inkwistjoni u, wara dik id-data, l-Artikolu 26 tar-Regolament (KE) Nru 800/2008 sar applikabbli.

(315)

Safejn hija kkonċernata l-għajnuna għas-servizzi ta' konsulenza, dawk l-artikoli jistipulaw l-istess kundizzjonijiet: l-għajnuna setgħet tingħata favur l-SMEs, l-ispejjeż ta' konsulenza tas-servizzi pprovduti minn konsulenti esterni kienu eliġibbli, l-intensità tal-għajnuna ma setgħetx taqbeż il-50 % tal-ispejjeż eliġibbli tas-servizzi u s-servizzi kkonċernati ma setgħux ikunu attività kontinwa jew perjodika u lanqas ma setgħu jkunu marbuta mal-ispejjeż operattivi tas-soltu tal-impriża, bħal servizzi ta' konsulenza fiskali ta' rutina, servizzi legali regolari jew reklamar.

(316)

Barra minn hekk, fir-rigward kemm tal-produzzjoni primarja kif ukoll tal-ipproċessar u tal-kummerċjalizzazzjoni, skont il-punt 101 tal-Linji Gwida, l-għajnuna għall-investimenti meħtieġa għall-ammeljorament tal-faċilitajiet tal-produzzjoni, inklużi l-investimenti meħtieġa għall-ġestjoni tas-sistema ta' dokumentazzjoni u t-twettiq ta' kontrolli tal-proċessi u tal-prodotti, setgħet tingħata biss b'konformità mar-regoli stabbiliti għall-għajnuna għall-investimenti fil-Linji Gwida għall-perjodu 2007-2013.

(317)

F'dan ir-rigward, fid-deċiżjoni tal-ftuħ, il-Kummissjoni esprimiet ċerti dubji rigward l-issodisfar ta' dawk il-kundizzjonijiet li kienu differenti mir-rekwiżiti stipulati fil-Linji Gwida għall-perjodu 2000-2006.

(318)

B'mod partikolari, il-Kummissjoni ġibdet l-attenzjoni tal-awtoritajiet Awstrijaċi għall-modifiki sostantivi li ġejjin:

(319)

Mill-informazzjoni disponibbli fl-istadju tal-proċedura ta' eżaminazzjoni preliminari, ma kienx ċar jekk fl-2007 l-awtoritajiet Awstrijaċi ġabux il-miżuri li qegħdin jiġu eżaminati f'konformità mal-kundizzjonijiet imsemmija fuq tal-Linji Gwida għall-perjodu 2007-2013. Għalhekk, l-awtoritajiet Awstrijaċi ġew mistiedna jissottomettu informazzjoni addizzjonali sabiex juru li, fil-perjodu mill-1 ta' Jannar 2007 sal-31 ta' Diċembru 2007, il-miżuri ta' appoġġ għall-kwalità kienu konformi mar-regoli l-ġodda applikabbli mill-1 ta' Jannar 2007.

(320)

Fis-sottomissjoni tagħhom tal-14 ta' Settembru 2012, l-awtoritajiet Awstrijaċi sostnew li l-obbligu li jadattaw għar-regoli ġodda dwar l-għajnuna mill-Istat beda japplika mill-1 ta' Jannar 2008 u mhux mill-1 ta' Jannar 2007, kif innotat mill-Kummissjoni (ara wkoll il-premessi 172 — 173). Għalhekk, l-awtoritajiet Awstrijaċi ma pprovdew ebda informazzjoni oħra għall-valutazzjoni tal-kompatibbiltà. Fit-talba għall-informazzjoni tad-19 ta' Frar 2014, il-Kummissjoni reġgħet stiednet lill-awtoritajiet Awstrijaċi sabiex jipprovdu l-informazzjoni meħtieġa dwar dan il-punt. Fit-tweġiba tagħhom tat-30 ta' April 2014, l-awtoritajiet Awstrijaċi sostnew il-fehma espressa fis-sottomissjoni preċedenti tagħhom u ma pprovdew ebda informazzjoni oħra għall-valutazzjoni tal-kompatibbiltà.

(321)

Fit-talba għall-informazzjoni tas-17 ta' Diċembru 2014, il-Kummissjoni reġgħet stiednet lill-awtoritajiet Awstrijaċi sabiex jipprovdu l-informazzjoni għal valutazzjoni tal-kompatibbiltà tal-miżuri ta' kwalità. L-awtoritajiet Awstrijaċi tennew li l-obbligu li jadattaw għar-regoli ġodda dwar l-għajnuna mill-Istat beda japplika mill-1 ta' Jannar 2008 u mhux mill-1 ta' Jannar 2007.

(322)

Il-Kummissjoni tixtieq tirrimarka li, kuntrarju għal dak li jsostnu l-awtoritajiet Awstrijaċi, l-obbligu li l-iskema tiġi adattata għar-regoli l-ġodda beda japplika mill-1 ta' Jannar 2007 u mhux mill-1 ta' Jannar 2008.

(323)

Fil-mument tad-dħul fis-seħħ tar-regoli l-ġodda (jiġifieri l-1 ta' Jannar 2007), il-kawża tal-Qorti T-375/04 (ara l-premessa 22) li wasslet għall-annullament tad-Deċiżjoni tal-Kummissjoni NN 34 A/2000 tat-30 ta' Ġunju 2004 kienet għadha pendenti. L-annullament sussegwenti tad-deċiżjoni tal-Kummissjoni fit-18 ta' Novembru 2009 kellu effett retroattiv.

(324)

Għalhekk, l-Awstrija ma setgħetx tistrieħ fuq din id-deċiżjoni sabiex tqis l-għajnuna bħala skema ta' għajnuna eżistenti skont it-tifsira tal-punt 196 tal-Linji Gwida għall-perjodu 2007-2013.

(325)

Barra minn hekk, skont ġurisprudenza stabbilita

“essenzjalment, (…) deċiżjoni pożittiva mill-Kummissjoni ma tistax tagħti lok għal stennija leġittima mill-parti tal-benefiċjarju tal-għajnuna, minn naħa, meta din id-deċiżjoni tkun ġiet ikkontestata f'ħin tajjeb quddiem il-ġudikatura tal-Komunità, u li tkun sussegwentement ġiet annullata u lanqas, min-naħa l-oħra, sakemm ma jiskadi t-terminu għall-preżentata ta' rikors jew, fil-każ li jiġi ppreżentat rikors, sakemm il-qorti Komunitarja ma tkunx tat deċiżjoni finali f'dan ir-rigward” (96).

(326)

Għalkemm il-miżuri koperti taħt din it-taqsima kienu ddikjarati bħala kompatibbli mid-Deċiżjoni tal-Kummissjoni NN 34 A/2000 tat-30 ta' Ġunju 2004, ma nħolqot ebda aspettattiva leġittima abbażi ta' din id-deċiżjoni, kemm jekk fil-livell tal-benefiċjarji jew fil-livell tal-Istati Membri. Fis-17 ta' Settembru 2004 kien diġà ġie mniedi rikors għal annullament u dan kien għadu pendenti fid-data tad-dħul fis-seħħ tar-regoli ġodda dwar l-għajnuna mill-Istat. Għalhekk, minħabba r-rikors għal annullament pendenti, l-awtoritajiet Awstrijaċi kellhom japplikaw il-Linji Gwida għall-perjodu 2007-2013 li jibda mill-1 ta' Jannar 2007.

(327)

Kif muri hawn fuq, ir-regoli li jikkonċernaw lill-impriżi attivi fl-ipproċessar u fil-kummerċjalizzazzjoni ta' prodotti agrikoli nbidlu fis-sustanza fil-Linji Gwida għall-perjodu 2007-2013. Minħabba li l-awtoritajiet Awstrijaċi ma għamlu ebda adattament, il-miżuri dwar il-prodotti organiċi, l-impriżi kbar u l-miżura għajr is-servizzi in natura (kif deskritti fil-premessa 318) ma kinux konformi mal-Linji Gwida għall-perjodu 2007-2013. Għalhekk, il-Kummissjoni tqis li dawn il-miżuri ta' għajnuna mhumiex kompatibbli mas-suq komuni. Il-miżuri l-oħrajn (jiġifieri sakemm ma jikkonċernawx prodotti organiċi, impriżi kbar u l-miżura għajr servizzi in natura  (97)) kienu konformi mal-Linji Gwida għall-perjodu 2007-2013 u, għalhekk, kompatibbli mas-suq komuni.

(328)

L-għajnuna għall-appoġġ tekniku għall-perjodu mill-1 ta' Jannar 2000 sal-31 ta' Diċembru 2006 għandha tiġi vvalutata skont il-punt 14 tal-Linji Gwida għall-perjodu 2000-2006. Skont il-punt 14.1 ta' dawk il-Linji Gwida, tali għajnuniet tqiesu mill-Kummissjoni bħala “għajnuniet mhux vinkolanti” li kkontribwixxew għall-vijabbiltà fit-tul tal-agrikoltura fil-Komunità, filwaqt li pproduċew biss effetti limitati ħafna fuq il-kompetizzjoni. L-għajnuna setgħet tingħata għal massimu ta' 100 % tal-ispejjeż sabiex tkopri, fost l-oħrajn, l-attivitajiet li ġejjin: l-organizzazzjoni ta' kompetizzjonijiet, wirjiet u fieri, inkluż appoġġ għall-ispejjeż imġarrba mill-parteċipazzjoni f'avvenimenti bħal dawn; u attivitajiet oħrajn għat-tixrid ta' għarfien marbut ma' tekniki ġodda, bħal proġetti pilota jew proġetti ta' dimostrazzjoni raġonevoli fuq skala żgħira.

(329)

L-ammont totali ta' appoġġ mogħti ma setax jaqbeż il-EUR 100 000 matul kwalunkwe perjodu ta' tliet snin għal kull benefiċjarju jew, fil-każ tal-SMEs, 50 % tal-ispejjeż eliġibbli, skont liema minnhom tkun l-akbar (il-punt 14.3 tal-Linji Gwida għall-perjodu 2000-2006). Tali għajnuna kellha tkun disponibbli għal dawk kollha eliġibbli fil-qasam ikkonċernat abbażi ta' kundizzjonijiet definiti b'mod oġġettiv (il-punt 14.2 tal-Linji Gwida għall-perjodu 2000-2006).

(330)

Fir-rigward tal-bijotikketta u tat-tikketta tal-kwalità, l-għajnuna ngħatat għal proġetti ta' informazzjoni ġenerali, għal attivitajiet ta' PR għat-tixrid ta' għarfien ġenerali dwar it-tikketti u għal kompetizzjonijiet ta' kwalità (ara l-premessi 100 — 103). Dawn il-miżuri ma jipperswadux lill-klijenti sabiex jixtru prodott partikolari. Għalhekk, minflok ma huma miżuri ta' reklamar, huma miżuri ta' promozzjoni ġenerali u għajnuniet mhux vinkolanti li jaqgħu taħt il-punt 14 tal-Linji Gwida għall-perjodu 2000-2006.

(331)

Il-miżuri ta' informazzjoni jaqgħu taħt it-tixrid ta' għarfien marbut ma' tekniki ġodda. Minnhom infushom, tali miżuri ġenerali huma ta' benefiċċju għall-produtturi kollha li jużaw it-tikketti.

(332)

L-għajnuna maħsuba biex tkopri l-ispejjeż għall-miżuri ta' appoġġ tekniku taqa' taħt il-punt 14.1 tal-Linji Gwida għall-perjodu 2000-2006. Fl-informazzjoni pprovduta b'rabta mal-iskema ta' għajnuna NN 34 A/2000, l-awtoritajiet Awstrijaċi speċifikaw li tali għajnuna qatt ma taqbeż il-EUR 100 000 għal kull benefiċjarju f'perjodu ta' tliet snin (ara l-premessa 109). Fid-deċiżjoni tal-ftuħ, l-awtoritajiet Awstrijaċi ġew mistiedna jipprovdu informazzjoni sabiex juru li l-assigurazzjonijiet imsemmija fuq kienu tabilħaqq irrispettati. Barra minn hekk, huma ntalbu jindikaw jekk ir-rekwiżiti stipulati fil-punti 14.2 u 14.3 tal-Linji Gwida għall-perjodu 2000-2006 ġewx issodisfati wkoll fir-rigward tal-perjodu 2000-2001 (98).

(333)

Fis-sottomissjoni tagħhom tal-14 ta' Settembru 2012, l-awtoritajiet Awstrijaċi kkonfermaw li l-għajnuna għal dawn il-miżuri qatt ma qabżet il-livell limitu ta' EUR 100 000 għal kull benefiċjarju f'perjodu ta' tliet snin. Għalhekk, il-kundizzjoni tal-punt 14.3 tal-Linji Gwida għall-perjodu 2000-2006 ġiet issodisfata.

(334)

Fir-rigward tal-kundizzjonijiet tal-punt 14.2 tal-Linji Gwida għall-perjodu 2000-2006, il-Kummissjoni talbet lill-awtoritajiet Awstrijaċi, f'talba ġdida għall-informazzjoni tas-17 ta' Diċembru 2014, sabiex jipprovdu l-informazzjoni meħtieġa għat-twettiq ta' valutazzjoni tal-kompatibbiltà.

(335)

Fit-tweġiba tagħhom tal-25 ta' Frar 2015, l-awtoritajiet Awstrijaċi kkonfermaw li l-iskema kienet miftuħa għal dawk kollha eliġibbli fil-qasam ikkonċernat abbażi ta' kundizzjonijiet definiti b'mod oġġettiv. Għalhekk, il-kundizzjoni tal-punt 14.2 tal-Linji Gwida għall-perjodu 2000-2006 ġiet issodisfata.

(336)

Għalhekk, l-għajnuna għal appoġġ tekniku kienet konformi mal-kundizzjonijiet stipulati fil-Linji Gwida għall-perjodu 2000-2006 u l-Kummissjoni tqis li din l-għajnuna kienet kompatibbli mas-suq komuni skont l-Artikolu 87(3)(ċ) tal-KE (issa: l-Artikolu 107(3)(ċ) tat-TFUE).

(337)

L-għajnuna maħsuba biex tkopri l-ispejjeż għall-miżuri ta' appoġġ tekniku rigward prodotti ġeneriċi kif deskritti fil-premessi 104 — 107 taqa' taħt il-punt 14.1 (ir-raba' inċiż) tal-Linji Gwida għall-perjodu 2000-2006. Fir-rigward tal-kundizzjonijiet tal-punti 14.2 u 14.3, fil-ħin tad-deċiżjoni tal-ftuħ, il-Kummissjoni ma kellha ebda informazzjoni għal dan il-perjodu li abbażi tagħha setgħet tivvaluta jekk dawk il-kundizzjonijiet ġewx issodisfati. B'hekk, l-awtoritajiet Awstrijaċi ġew mistiedna jissottomettu l-informazzjoni meħtieġa.

(338)

Fis-sottomissjoni tagħhom tal-14 ta' Settembru 2012, l-awtoritajiet Awstrijaċi kkonfermaw li l-għajnuna għal dawn il-miżuri qatt ma qabżet il-livell limitu ta' EUR 100 000 għal kull benefiċjarju f'perjodu ta' tliet snin. Għalhekk, il-kundizzjoni tal-punt 14.3 tal-Linji Gwida għall-perjodu 2000-2006 ġiet issodisfata.

(339)

Fir-rigward tal-kundizzjoni tal-punt 14.2 tal-Linji Gwida għall-perjodu 2000-2006 dwar l-għajnuna disponibbli għal dawk kollha eliġibbli fil-qasam ikkonċernat, il-Kummissjoni tinnota li din il-kundizzjoni hija ssodisfata minħabba li l-miżuri ta' appoġġ tekniku kienu jikkonċernaw informazzjoni ġenerika dwar il-prodotti. Għalhekk, il-kundizzjoni tal-punt 14.2 tal-Linji Gwida għall-perjodu 2000-2006 ġiet issodisfata.

(340)

Għalhekk, il-kundizzjonijiet tal-Linji Gwida għall-perjodu 2000-2006 dwar l-għajnuna sabiex jiġi pprovdut appoġġ tekniku ġew issodisfati. Għalhekk, il-Kummissjoni tqis li din l-għajnuna kienet kompatibbli mas-suq komuni skont l-Artikolu 87(3)(ċ) tal-KE (issa: l-Artikolu 107(3)(ċ) tat-TFUE).

(341)

Skont il-punt 103 tal-Linji Gwida għall-perjodu 2007-2013, il-Kummissjoni tista' tiddikjara l-għajnuna mill-Istat għall-provvista ta' appoġġ tekniku mogħtija lill-produtturi primarji bħala kompatibbli mas-suq komuni skont l-Artikolu 87(3)(ċ) tal-KE (issa: l-Artikolu 107(3)(ċ) tat-TFUE) jekk hija tissodisfa l-kundizzjonijiet kollha tal-Artikolu 15 tar-Regolament (KE) Nru 1857/2006.

(342)

Skont l-Artikolu 15 tar-Regolament (KE) Nru 1857/2006, l-għajnuna tqieset bħala kompatibbli mas-suq komuni skont it-tifsira tal-Artikolu 87(3)(ċ) tal-KE (issa: l-Artikolu 107(3)(ċ) tat-TFUE) jekk ingħatat għall-ispejjeż eliġibbli tal-attivitajiet ta' appoġġ tekniku elenkati fl-Artikolu 15(2) tar-Regolament (KE) Nru 1857/2006 u ssodisfat il-kundizzjonijiet stipulati fl-Artikoli 15(3) u (4) tar-Regolament (KE) Nru 1857/2006.

(343)

Skont l-Artikolu 15(2)(d) tar-Regolament (KE) Nru 1857/2006 dwar l-organizzazzjoni ta' u l-parteċipazzjoni f'fora għall-iskambju ta' għarfien bejn in-negozji, il-kompetizzjonijiet, il-wirjiet u l-fieri, l-għajnuna tista' tingħata għall-ispejjeż eliġibbli li ġejjin: il-miżati tal-parteċipazzjoni, l-ispejjeż tal-ivvjaġġar, l-ispejjeż tal-pubblikazzjonijiet, il-kera ta' bini għall-wirjiet jew premjijiet simboliċi mogħtija fil-qafas tal-kompetizzjonijiet, sa valur ta' EUR 250 għal kull premju u rebbieħ.

(344)

L-Artikolu 15(2)(e) tar-Regolament (KE) Nru 1857/2006 ippermetta li tingħata għajnuna għall-ispejjeż konnessi mal-vulgarizzazzjoni ta' għarfien xjentifiku u informazzjoni fattwali dwar is-sistemi ta' kwalità miftuħa għal prodotti minn pajjiżi oħrajn (mingħajr ebda referenza għal kumpaniji, marki jew oriġini individwali).

(345)

L-Artikolu 15(2)(f) tar-Regolament (KE) Nru 1857/2006 ippermetta li tingħata għajnuna għall-ispejjeż ta' pubblikazzjonijiet bħal katalogi jew siti elettroniċi li jippreżentaw informazzjoni fattwali dwar il-produtturi minn reġjun partikolari jew il-produtturi ta' prodott partikolari, bil-kundizzjoni li l-informazzjoni u l-preżentazzjoni jibqgħu newtrali u li l-produtturi kollha kkonċernati jkollhom opportunitajiet indaqs sabiex ikunu rrappreżentati fil-pubblikazzjoni.

(346)

L-Artikolu 15(3) u (4) tar-Regolament (KE) Nru 1857/2006 ippermetta li tingħata għajnuna għal appoġġ tekniku b'rata sa massimu ta' 100 % tal-ispejjeż, meta jkunu ġew issodisfati l-kundizzjonijiet li ġejjin: l-għajnuna kellha tingħata in natura permezz ta' servizzi ssussidjati u ma setgħetx tinvolvi ħlasijiet diretti ta' flus lill-produtturi; l-għajnuna kellha tkun aċċessibbli għal dawk kollha eliġibbli fil-qasam ikkonċernat, abbażi ta' kundizzjonijiet definiti b'mod oġġettiv; meta l-appoġġ tekniku kien ipprovdut minn gruppi ta' produtturi jew organizzazzjonijiet oħrajn, is-sħubija ta' tali gruppi jew organizzazzjonijiet ma setgħetx tkun kundizzjoni għall-aċċess għas-servizz. Kwalunkwe kontribuzzjoni minn persuni mhux membri għall-ispejjeż amministrattivi tal-grupp jew tal-organizzazzjoni kkonċernata kellha tkun limitata għall-ispejjeż tal-provvista tas-servizz.

(347)

Skont il-punt 105 tal-Linji Gwida għall-perjodu 2007-2013, il-Kummissjoni tista' tiddikjara l-għajnuna mill-Istat għall-provvista ta' appoġġ tekniku lill-kumpaniji attivi fl-ipproċessar u fil-kummerċjalizzazzjoni ta' prodotti agrikoli kompatibbli mas-suq komuni skont l-Artikolu 87(3)(ċ) tal-KE (issa: l-Artikolu 107(3)(ċ) tat-TFUE) jekk hija tissodisfa l-kundizzjonijiet kollha tal-Artikolu 5 tar-Regolament (KE) Nru 70/2001. L-Artikolu 43 tar-Regolament (KE) Nru 800/2008, li ssostitwixxa r-Regolament (KE) Nru 70/2001, iddikjara li kwalunkwe referenzi għar-Regolament (KE) Nru 70/2001 għandhom jitqiesu bħala referenzi għar-Regolament (KE) Nru 800/2008 (100).

(348)

Fir-rigward tal-kundizzjonijiet tal-Artikolu 26 tar-Regolament (KE) Nru 800/2008 u tal-Artikolu 5(a) tar-Regolament (KE) Nru 70/2001, issir referenza għall-premessa 315 ta' hawn fuq.

(349)

L-Artikolu 27 tar-Regolament (KE) Nru 800/2008 u l-Artikolu 5(b) tar-Regolament (KE) Nru 70/2001 iddikjaraw li, fir-rigward tal-għajnuna għall-parteċipazzjoni f'fieri u wirjiet, l-intensità tal-għajnuna ma setgħetx taqbeż il-50 % tal-ispejjeż eliġibbli u li “spejjeż eliġibbli” tfisser l-ispejjeż imġarrba għall-kiri, it-twaqqif u t-tmexxija tal-istand għall-ewwel parteċipazzjoni minn intrapriża fi kwalunkwe fiera jew wirja partikolari.

(350)

Il-Kummissjoni hija tal-fehma li, fis-sustanza, ir-regoli applikabbli mill-1 ta' Jannar 2007 dwar l-appoġġ tekniku għall-produtturi agrikoli primarji kienu kważi identiċi għall-kundizzjonijiet stipulati fil-Linji Gwida għall-perjodu 2000-2006. L-ispejjeż eliġibbli elenkati fl-Artikolu 15(2) tar-Regolament (KE) Nru 1857/2006 huma, fis-sustanza, identiċi għall-ispejjeż enumerati fil-punt 14 tal-Linji Gwida għall-perjodu 2000-2006 (101). Il-kundizzjonijiet stipulati fl-Artikolu 15(4) tar-Regolament (KE) Nru 1857/2006 huma identiċi għad-dispożizzjoni tal-punt 14.2 tal-Linji Gwida għall-perjodu 2000-2006. Madankollu, kuntrarju għal-Linji Gwida għall-perjodu 2000-2006, il-Linji Gwida għall-perjodu 2007-2013 iddikjaraw li l-għajnuna kellha tiġi pprovduta in natura permezz ta' servizzi ssussidjati. Dwar dan il-punt, l-awtoritajiet Awstrijaċi rrimarkaw li, anki fil-perjodu wara l-2007, l-appoġġ tekniku kien fil-forma ta' servizzi ssussidjati.

(351)

Issir referenza għall-valutazzjoni tal-kompatibbiltà tat-taqsima 8.7 hawn fuq. Għalhekk, il-Kummissjoni tqis li din l-għajnuna kienet kompatibbli mas-suq komuni.

(352)

Fir-rigward tal-appoġġ tekniku għall-impriżi attivi fl-ipproċessar u fil-kummerċjalizzazzjoni, il-Linji Gwida għall-perjodu 2007-2013 introduċew bidliet sostantivi meta mqabbla mar-regoli preċedenti; għalhekk, hija meħtieġa valutazzjoni separata għal din il-kategorija. Mill-informazzjoni disponibbli fl-istadju tad-deċiżjoni tal-ftuħ, ma kienx ċar jekk fl-2007 l-awtoritajiet Awstrijaċi ġabux il-miżuri ta' appoġġ tekniku li qegħdin jiġu eżaminati f'konformità mal-kundizzjonijiet imsemmija fuq tal-Linji Gwida. Għalhekk, l-awtoritajiet Awstrijaċi ġew mistiedna jissottomettu informazzjoni addizzjonali sabiex juru li, fil-perjodu mill-1 ta' Jannar 2007 sal-31 ta' Diċembru 2008, il-miżuri kienu konformi mar-regoli l-ġodda. F'dan ir-rigward, il-Kummissjoni esprimiet dubji rigward l-issodisfar ta' dawk il-kundizzjonijiet li kienu differenti mir-rekwiżiti stipulati fil-Linji Gwida għall-perjodu 2000-2006. B'mod partikolari, il-Kummissjoni ġibdet l-attenzjoni tal-awtoritajiet Awstrijaċi għall-modifiki sostantivi li ġejjin:

(353)

Fis-sottomissjoni tagħhom tal-14 ta' Settembru 2012, l-awtoritajiet Awstrijaċi sostnew li l-obbligu li jadattaw għar-regoli ġodda dwar l-għajnuna mill-Istat beda japplika mill-1 ta' Jannar 2008 u mhux mill-1 ta' Jannar 2007, kif innotat mill-Kummissjoni (ara wkoll il-premessi 172 — 175). Għalhekk, l-awtoritajiet Awstrijaċi ma pprovdew ebda informazzjoni oħra għall-valutazzjoni tal-kompatibbiltà. Fit-talba għall-informazzjoni tad-19 ta' Frar 2014, il-Kummissjoni reġgħet stiednet lill-Awstrija sabiex tipprovdi l-informazzjoni meħtieġa dwar dan il-punt. Fit-tweġiba tagħhom tat-30 ta' April 2014, l-awtoritajiet Awstrijaċi sostnew il-fehma espressa fis-sottomissjoni tagħhom tal-2012 u ma pprovdew ebda informazzjoni oħra għall-valutazzjoni tal-kompatibbiltà.

(354)

Issir referenza għar-raġunament fil-premessi 322 — 326 ta' hawn fuq, li japplika ugwalment għax-xorta ta' għajnuna msemmija f'din it-taqsima.

(355)

Għar-raġunijiet imsemmija fuq, sakemm l-għajnuna ta' appoġġ tekniku mogħtija lill-impriżi attivi fl-ipproċessar u fil-kummerċjalizzazzjoni ta' prodotti agrikoli fil-perjodu mill-1 ta' Jannar 2007 sal-31 ta' Diċembru 2008 ma kinitx konformi mal-kundizzjonijiet ġodda stipulati għal din il-kategorija ta' għajnuna fil-Linji Gwida għall-perjodu 2007-2013 (jiġifieri għajnuna għall-impriżi kbar, għajnuna għall-ewwel parteċipazzjoni fil-fieri, rata ta' għajnuna ta' aktar minn 50 % għal kwalunkwe servizz għajr servizzi ta' konsulenza u l-parteċipazzjoni f'fieri ta' aktar minn 50 % jew kumpens in natura) (il-premessa 350, il-Kummissjoni tqis li tali għajnuna kienet inkompatibbli mas-suq komuni skont l-Artikolu 87(3)(c) tal-KE (issa: l-Artikolu 107(3)(c) tat-TFUE).

(356)

Għal miżuri oħrajn għajr dawk imsemmija fil-premessa ta' hawn fuq, il-kriterji tal-kompatibbiltà ma nbidlux meta mqabbla mal-Linji Gwida għall-perjodu 2000-2006. Issir referenza għall-valutazzjoni tal-kompatibbiltà fil-premessa 328 u ta' wara. Għalhekk, dawn il-miżuri huma kompatibbli.

(357)

Minħabba li l-miżuri li huma s-suġġett tad-deċiżjoni preżenti huma ffinanzjati minn imposta parafiskali, il-Kummissjoni għandha teżamina ż-żewġ miżuri ffinanzjati, jiġifieri l-għajnuna effettivament mogħtija u l-mod kif tiġi ffinanzjata.

(358)

Skont ġurisprudenza stabbilita tal-Qorti tal-Ġustizzja, meta l-metodu ta' finanzjament tal-għajnuna, b'mod partikolari permezz ta' kontribuzzjonijiet obbligatorji, ikun jifforma parti integrali mill-miżura ta' għajnuna, il-Kummissjoni għandha tikkunsidra dan il-metodu ta' finanzjament meta teżamina l-għajnuna (102).

(359)

Sabiex taxxa, jew parti minn taxxa, titqies li tifforma parti integrali minn miżura ta' għajnuna, din għandha tiġi ipotekata għall-miżura ta' għajnuna skont ir-regoli nazzjonali rilevanti, fis-sens li d-dħul mit-taxxa għandu neċessarjament jiġi allokat għall-finanzjament tal-miżura ta' għajnuna (103) u l-ammont tat-taxxa għandu jkollu impatt dirett fuq l-ammont tal-għajnuna mill-Istat (104).

(360)

Skont il-premessa 235 tad-deċiżjoni tal-ftuħ, l-applikazzjoni ta' dawn il-kriterji għall-miżuri li qegħdin jiġu eżaminati wasslet lill-Kummissjoni għall-konklużjonijiet preliminari li ġejjin: l-ewwel kriterju deher li ġie ssodisfat billi, skont l-awtoritajiet Awstrijaċi, mill-imposti miġbura bbenifikaw esklussivament il-miżuri ta' għajnuna koperti mid-deċiżjoni (ara l-premessa 53).

(361)

Fir-rigward tal-kwistjoni dwar jekk l-ammont tal-imposta kellux impatt dirett fuq l-ammont ta' għajnuna mill-Istat, fl-istadju tad-deċiżjoni tal-ftuħ, il-Kummissjoni ma kellhiex l-informazzjoni kollha meħtieġa sabiex tivvaluta jekk dan il-kriterju kienx issodisfat. Għal dan il-għan, l-awtoritajiet Awstrijaċi ġew mistiedna jispjegaw jekk l-ammont ta' għajnuna inkwistjoni kienx direttament marbut mad-dħul mill-imposta, jiġifieri, jekk kienx stabbilit bil-quddiem jew jekk kienx jiddependi fuq il-ħtiġijiet ta' kummerċjalizzazzjoni konkreti ta' AMA.

(362)

Il-Kummissjoni indikat ukoll li, f'każ li hija tikkonkludi wara s-sottomissjoni tal-informazzjoni meħtieġa li l-imposti jifformaw parti integrali mill-miżura ta' għajnuna, hija tkun trid teżamina jekk il-finanzjament tal-iskema jiddiskriminax bejn il-prodotti importati u l-prodotti manifatturati fl-Awstrija (105), jew bejn il-prodotti nazzjonali esportati u l-prodotti nazzjonali kkummerċjalizzati fis-suq domestiku (106) (il-premessa 236 tad-deċiżjoni tal-ftuħ).

(363)

L-awtoritajiet Awstrijaċi ġew mistiedna jipprovdu informazzjoni dwar dawn il-punti. B'mod partikolari, huma ġew mistiedna jindikaw jekk § 21ċ(2) tal-Att dwar l-AMA, li abbażi tiegħu l-prodotti li joriġinaw minn barra l-Awstrija huma eżentati mill-imposta (ara l-premessa 58), kienx diġà fis-seħħ fl-1995 jew jekk iddaħħalx permezz ta' emenda sussegwenti tal-liġi. Barra minn hekk, l-Istat Membru ġie mistieden jispjega jekk il-prodotti ta' oriġini Awstrijaka kummerċjalizzati barra l-Awstrija setgħux jibbenifikaw mill-miżura sal-istess punt bħall-prodotti kummerċjalizzati fl-Awstrija.

(364)

Fil-premessa 237 tad-deċiżjoni tal-ftuħ, il-Kummissjoni enfasizzat li hija kellha tivverifika wkoll jekk l-imposta kinitx tmur kontra l-għanijiet tal-organizzazzjoni tas-suq komuni fis-settur agrikolu. F'dan ir-rigward, kellu jiġi vvalutat jekk l-imposti kinux jinterferixxu mal-prezz tal-prodotti finali u, b'hekk, jekk kinitx qed issir diskriminazzjoni mal-prodotti domestiċi meta mqabbla mal-prodotti importati.

(365)

F'dan ir-rigward, fid-deċiżjoni tal-ftuħ, l-awtoritajiet Awstrijaċi ġew mistiedna jipprovdu dejta li turi l-perċentwal tal-prezzijiet tal-bejgħ rispettivi li għalihom kienet tammonta l-imposta u jispjegaw kemm impatt negattiv possibbli kkawżat mill-imposta kien qed jiġi kkumpensat mill-effetti pożittivi tal-miżuri ffinanzjati mill-istess imposta. Barra minn hekk, l-awtoritajiet Awstrijaċi ġew mistiedna jispjegaw jekk il-prezzijiet tal-prodotti rilevanti humiex fil-biċċa l-kbira tagħhom xprunati mis-suq.

(366)

Fis-sottomissjoni tagħhom tal-14 ta' Settembru 2012, l-awtoritajiet Awstrijaċi għarrfu lill-Kummissjoni li l-prodotti barranin kienu eżentati mill-ħlas tal-imposta skont l-Art. 2ċ, il-paragrafu 2, tal-Att dwar l-AMA. Din l-eżenzjoni bdiet tapplika mill-1 ta' Jannar 1994 u, għalhekk, għall-perjodu kollu tal-valutazzjoni.

(367)

Fir-rigward tar-relazzjoni mal-għanijiet tal-organizzazzjoni tas-suq komuni fis-settur agrikolu, fis-sottomissjoni tagħhom tal-14 ta' Settembru 2012, l-awtoritajiet Awstrijaċi ddikjaraw li minħabba l-fatt li l-prezzijiet kienu ffurmati minn provvista u domanda fuq is-swieq rilevanti u minħabba li ma kien hemm ebda intervent min-naħa tal-awtoritajiet, ma kienx possibbli li jiġi kkalkolat il-perċentwal tal-prezzijiet tal-bejgħ li għalihom kienet tammonta l-imposta.

(368)

Fl-istess tweġiba, l-awtoritajiet Awstrijaċi sostnew li l-ammont tal-imposta ma kellu ebda impatt dirett fuq l-ammont tal-għajnuna mill-Istat. Minbarra d-dħul mill-imposta ta' AMA, kienu jeżistu sorsi ta' finanzjament addizzjonali. Jiġifieri, minbarra d-'dħul nett' li ġej mill-imposta, u l-fondi tal-UE (għall-azzjonijiet koffinanzjati), inġabar dħul ieħor mingħand l-operaturi ekonomiċi permezz tal-ħlasijiet tal-liċenzji u mir-rikavat mir-royalties imħallsa fil-ħanut ta' AMA (kotba tat-tisjir, eċċ.) għall-finanzjament tal-miżuri.

(369)

Fil-fatt, l-awtoritajiet Awstrijaċi wrew li parti mill-finanzjament għall-miżuri ta' AMA ma kinitx koperta mill-imposta (107) u, b'hekk, l-ammont tal-għajnuna minfuqa (li min-naħa tiegħu influwenza l-ambitu tal-miżuri effettivament imwettqa) ma kienx jiddependi esklussivament fuq id-dħul mill-imposta; barra minn hekk, id-dħul mill-imposta ma kienx allokat esklussivament għall-finanzjament tal-għajnuna (108).

(370)

B'hekk, il-Kummissjoni hija tal-fehma li l-kriterji għall-ipotekazzjoni skont it-tifsira tal-ġurisprudenza ma ġewx issodisfati għall-perjodu mill-1995 sal-2001.

(371)

L-awtoritajiet Awstrijaċi ġew mistiedna wkoll jipprovdu l-informazzjoni meħtieġa sabiex il-Kummissjoni tkun tista' tivvaluta jekk il-finanzjament parafiskali tal-miżura (imposta) kienx jifforma parti integrali mill-miżuri ta' għajnuna għall-perjodu mill-2002 sal-2008 (il-premessa 238 tad-deċiżjoni tal-ftuħ).

(372)

Għar-raġunijiet iddikjarati hawn fuq, u minħabba li s-sorsi ta' finanzjament baqgħu l-istess, il-Kummissjoni tqis li ma kienet teżisti ebda ipotekazzjoni bejn l-imposta u l-miżuri ta' għajnuna mill-Istat għall-perjodu mill-2002 sal-2008.

(373)

Għar-raġunijiet imsemmija fuq, u minkejja l-premessa 378 ta' hawn taħt, il-miżuri ta' kummerċjalizzazzjoni ta' AMA jikkostitwixxu għajnuna mill-Istat.

(374)

Għar-raġunijiet imsemmija fuq, u minkejja l-premessa 378 ta' hawn taħt, il-miżuri ta' għajnuna msemmija fil-premessi 208, 213, 327, it-tielet sentenza u 355 huma inkompatibbli mas-suq intern. Il-miżuri l-oħrajn ivvalutati hawn fuq huma kompatibbli mas-suq intern.

(375)

Kwalunkwe kumpens li fil-ħin tal-għotja ssodisfa l-kundizzjonijiet stipulati fir-Regolament de minimis (109) jitqies bħala li ma jikkostitwixxi ebda għajnuna. Kwalunkwe għajnuna li, fil-ħin tal-għotja, issodisfat il-kundizzjonijiet tal-eżenzjoni kollha jew skema ta' għajnuna approvata, hija kompatibbli mas-suq intern, sal-intensitajiet tal-għajnuna massima applikabbli għal dak it-tip ta' għajnuna.

(376)

B'konformità mat-Trattat u mal-każistika stabbilita tal-Qorti tal-Ġustizzja, il-Kummissjoni hija kompetenti sabiex tiddeċiedi li l-Istat Membru kkonċernat għandu jabolixxi jew ibiddel l-għajnuna (110) meta jsib li din hija inkompatibbli mas-suq intern. Il-Qorti sostniet ukoll b'mod konsistenti li l-obbligu ta' Stat li jabolixxi l-għajnuna meqjusa mill-Kummissjoni bħala inkompatibbli mas-suq intern huwa maħsub biex jistabbilixxi mill-ġdid is-sitwazzjoni li kienet teżisti qabel (111). F'dan il-kuntest, il-Qorti ddikjarat li dak l-objettiv jintlaħaq ladarba l-benefiċjarju jkun ħallas lura l-ammonti mogħtija permezz ta' għajnuna illegali, sabiex b'hekk jitlef il-vantaġġ li kien gawda fis-suq fuq il-kompetituri tiegħu u titreġġa' lura s-sitwazzjoni ta' qabel ma tħallset l-għajnuna (112).

(377)

Skont dik il-ġurisprudenza, l-Artikolu 16 tar-Regolament tal-Kunsill (UE) 2015/1589 (113) (minn hawn 'il quddiem ir-Regolament Proċedurali) jistabbilixxi li “meta jittieħdu deċiżjonijiet negattivi f'każijiet ta' għajnuna illegali, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa sabiex jirkupra l-għajnuna mill-benefiċjarju.”

(378)

Skont l-Artikolu 17 tar-Regolament Proċedurali, is-setgħat tal-Kummissjoni sabiex tirkupra l-għajnuna inkompatibbli huma soġġetti għal perjodu ta' limitazzjoni ta' għaxar snin. Il-perjodu ta' limitazzjoni jibda minn dakinhar li l-għajnuna illegali tingħata lill-benefiċjarju. Kwalunkwe azzjoni meħuda mill-Kummissjoni fir-rigward tal-għajnuna illegali tinterrompi l-perjodu ta' limitazzjoni. Il-perjodu ta' limitazzjoni jiġi sospiż sakemm id-deċiżjoni tal-Kummissjoni tkun soġġetta għal proċedimenti quddiem l-ECJ.

(379)

L-ilment li wassal għall-proċedura preżenti kien riċevut fil-21 ta' Settembru 1999 (ara l-premessa 4) u l-Kummissjoni rreġistrat l-iskema bħala għajnuna mhux innotifikata fis-sena 2000 (ara l-premessa 8). Barra minn hekk, id-deċiżjoni tal-2004 tirrikonoxxi l-fatt li l-Kummissjoni ddeċidiet, għal raġunijiet amministrattivi, li taqsam il-proċedura (ara l-premessa 10) u tivvaluta l-miżuri qabel u wara s-sena 2003 separatament. Din il-qasma tal-proċedura kienet talba tal-awtoritajiet Awstrijaċi datata mit-8 ta' Marzu 2004.

(380)

L-azzjonijiet (il-qasma tal-proċedura rikonoxxuta mid-deċiżjoni tal-2004) u l-ittri (it-talba tal-Awstrija tat-8 ta' Marzu 2004) iċċitati hawn fuq qegħdin jinterrompu l-avvenimenti skont it-tifsira tal-Artikolu 17 tar-Regolament tal-Kunsill (UE) 2015/1589.

(381)

Dan ifisser li l-Kummissjoni għandha s-setgħa li tordna l-irkupru mill-1 ta' Jannar 1995, id-data tal-adeżjoni tal-Awstrija mal-Unjoni Ewropea.

(382)

Id-deċiżjoni tal-Kummissjoni NN 34 A/2000 kienet ikkontestata quddiem il-Qorti Ġenerali fit-30 ta' Ġunju 2004 u d-deċiżjoni tagħha kienet appellata quddiem il-Qorti tal-Ġustizzja fis-27 ta' Jannar 2010. Is-sentenza tal-Qorti ngħatat fis-27 ta' Ottubru 2011 (ara l-premessa 22 hawn fuq). Għalhekk, skont l-Artikolu 15, il-paragrafu 2, it-tielet sentenza tar-Regolament (KE) Nru 659/1999, il-perjodu ta' limitazzjoni ġie sospiż bejn it-30 ta' Ġunju 2004 u s-27 ta' Ottubru 2011.

(383)

Għar-raġunijiet imsemmija fuq, il-perjodu ta' limitazzjoni ta' 10 snin għall-irkupru fir-rigward tal-miżuri vvalutati f'din id-deċiżjoni ma skadiex. Għalhekk, l-għajnuna inkompatibbli mill-Istat speċifikata fil-premessa 374 hawn fuq għandha tiġi rkuprata mill-awtoritajiet Awstrijaċi.

(384)

L-Artikolu 16(1) tar-Regolament Proċedurali jispeċifika li “fejn jittieħdu deċiżjonijiet negattivi f'każijiet ta' għajnuna illegali, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa biex jirkupra l-għajnuna mingħand il-benefiċjarju”.

(385)

L-Artikolu 16(3) tar-Regolament Proċedurali jispeċifika li “l-irkupru għandu jseħħ mingħajr dewmien u b'konformità mal-proċeduri skont il-liġi nazzjonali tal-Istat Membru kkonċernat, bil-kundizzjoni li dawn jippermettu l-eżekuzzjoni immedjata u effettiva tad-deċiżjoni tal-Kummissjoni.”

(386)

Il-mezzi skont il-liġi nazzjonali stabbilita mill-Istati Membri, li permezz tagħhom jimplimentaw deċiżjonijiet ta' rkupru, għandhom jagħtu effett sħiħ lid-deċiżjoni dwar l-irkupru. Għalhekk, jeħtieġ li l-miżuri nazzjonali meħuda mill-Istati Membri jwasslu għal eżekuzzjoni effettiva u immedjata tad-deċiżjoni tal-Kummissjoni.

(387)

Skont ġurisprudenza stabbilita, fil-każ ta' deċiżjonijiet negattivi għal għajnuna mhux innotifikata, b'mod partikolari fejn ikun għadda perjodu ta' żmien sinifikanti, il-Kummissjoni tista' tirrikorri għal evalwazzjonijiet approssimattivi tas-somom li jridu jiġu rkuprati (114).

(388)

Il-Kummissjoni tixtieq tirrimarka li, skont il-ġurisprudenza “l-ebda dispożizzjoni tad-dritt komunitarju ma tirrikjedi lill-Kummissjoni, meta hija tordna r-restituzzjoni ta' għajnuna ddikjarata inkompatibbli mas-suq komuni, tistabbilixxi l-ammont eżatt tal-għajnuna li għandha tiġi restitwita. Fil-fatt, huwa biżżejjed illi d-deċiżjoni tal-Kummissjoni tinkludi informazzjoni li tippermetti lid-destinatarju tagħha jiddetermina dan l-ammont huwa stess, mingħajr wisq diffikultà” (115)

(389)

Minħabba n-natura ta' wħud mill-miżuri kkonċernati (jiġifieri miżuri li jikkonċernaw l-għajnuna indiretta lil għadd kbir ta' benefiċjarji), il-Kummissjoni mhijiex f'pożizzjoni li tiddetermina fid-deċiżjoni preżenti l-ammont ta' għajnuna eżatt għal kull benefiċjarju għal kull miżura li għaliha jkun ġie ordnat l-irkupru.

(390)

Għalhekk, il-Kummissjoni tirrimarka li s-somom ikkomunikati mill-awtoritajiet Awstrijaċi matul il-perjodu tal-investigazzjoni (ara l-premessi 43-45) jikkostitwixxu l-punt tat-tluq għall-kalkolazzjoni tal-għajnuniet li jridu jiġu rkuprati mill-benefiċjarji rispettivi. Il-kategoriji ta' għajnuna inkompatibbli, kif ukoll il-perjodi rilevanti, ġew identifikati fid-deċiżjoni.

(391)

Għalhekk, il-Kummissjoni hija tal-fehma li, fil-qafas tal-proċedura ta' rkupru, għandu jiġi pprovdut metodu raġonevoli għall-kalkolazzjoni tal-għajnuna għal kull benefiċjarju mill-awtoritajiet Awstrijaċi, u għandu jiġi kkomunikat lill-Kummissjoni, fi spirtu ta' kooperazzjoni leali mal-Kummissjoni.

—

għajnuna għal reklamar ġeneriku fil-perjodu mill-1 ta' Jannar 2000 sal-31 ta' Diċembru 2001,

—

għajnuna għar-reklamar fil-perjodu mill-1 ta' Jannar 2002 sal-31 ta' Diċembru 2006,

—

għajnuna għal/permezz ta' kampanji ta' reklamar barra l-Awstrija u reklamar ġeneriku fl-Awstrija, fil-perjodu mill-1 ta' Jannar 2002 sal-1 ta' Jannar 2004,

—

għajnuna għal reklamar ta' kwalità fil-perjodu mill-1 ta' Jannar 2007 sal-31 ta' Diċembru 2008,

—

għajnuna għal/permezz ta' miżuri ta' promozzjoni f'sens usa' tal-kelma u miżuri ta' appoġġ tekniku fil-perjodu mill-1 ta' Jannar 1995 sal-31 ta' Diċembru 1999,

—

għajnuna fil-forma ta' assistenza teknika, servizzi ta' konsulenza u miżuri ta' kontroll marbuta mal-prodotti ta' kwalità fil-perjodu mill-1 ta' Jannar 1995 sal-31 ta' Diċembru 1999,

—

għajnuna għal prodotti ta' kwalità fil-perjodu mill-1 ta' Jannar 2000 sal-31 ta' Diċembru 2006,

—

għajnuna fil-forma ta' appoġġ tekniku fil-perjodu mill-1 ta' Jannar 2000 sal-31 ta' Diċembru 2006,

—

għajnuna fil-forma ta' appoġġ tekniku għal prodotti ġeneriċi fil-perjodu mill-1 ta' Jannar 2000 sal-31 ta' Diċembru 2004,

—

għajnuna fil-forma ta' appoġġ tekniku fil-perjodu mill-1 ta' Jannar 2007 sal-31 ta' Diċembru 2008 għall-produtturi primarji.

—

għajnuna għal reklamar ġeneriku fil-perjodu mill-1 ta' Jannar 1995 sal-31 ta' Diċembru 1999,

—

għajnuna għat-tikketta tal-kwalità fil-perjodu mill-1 ta' Jannar 1995 sal-31 ta' Diċembru 1999,

—

għajnuna għal prodotti ta' kwalità fil-perjodu mill-1 ta' Jannar 2007 sal-31 ta' Diċembru 2008,

—

appoġġ tekniku għall-impriżi attivi fl-ipproċessar u fil-kummerċjalizzazzjoni fil-perjodu mill-1 ta' Jannar 2007 sal-31 ta' Diċembru 2008.

(a)

il-lista tal-benefiċjarji li rċevew l-għajnuna abbażi tal-iskemi msemmija fl-Artikolu 2 u l-ammont totali tal-għajnuna li kull wieħed minnhom irċieva abbażi ta' dik l-iskema;

(b)

l-ammont totali (il-prinċipal u l-imgħax tal-irkupru) li għandu jiġi rkuprat mingħand il-benefiċjarji;

(c)

deskrizzjoni dettaljata tal-miżuri li diġà ttieħdu u ta' dawk ippjanati biex is-sitwazzjoni ssir konformi ma' din id-Deċiżjoni;

(d)

dokumenti li juru li l-benefiċjarja ġiet ordnata tħallas lura l-għajnuna.