This document is an excerpt from the EUR-Lex website
Document 32016D1155
Commission Implementing Decision (EU) 2016/1155 of 14 July 2016 on the equivalence of the public oversight, quality assurance, investigation and penalty systems for auditors and audit entities of the United States of America pursuant to Directive 2006/43/EC of the European Parliament and the Council (notified under document C(2016) 4363) (Text with EEA relevance)
Deċiżjoni ta' Implimentazzjoni tal-Kummissjoni (UE) 2016/1155 tal-14 ta' Lulju 2016 dwar l-ekwivalenza tas-sistema tas-sorveljanza pubblika, l-aċċertament tal-kwalità, tal-investigazzjoni u l-penali għall-awdituri u l-entitajiet tal-awditjar tal-Istati Uniti tal-Amerika skont id-Direttiva 2006/43/KE tal-Parlament Ewropew u tal-Kunsill (notifikata bid-dokument C(2016) 4363) (Test b'rilevanza għaż-ŻEE)
Deċiżjoni ta' Implimentazzjoni tal-Kummissjoni (UE) 2016/1155 tal-14 ta' Lulju 2016 dwar l-ekwivalenza tas-sistema tas-sorveljanza pubblika, l-aċċertament tal-kwalità, tal-investigazzjoni u l-penali għall-awdituri u l-entitajiet tal-awditjar tal-Istati Uniti tal-Amerika skont id-Direttiva 2006/43/KE tal-Parlament Ewropew u tal-Kunsill (notifikata bid-dokument C(2016) 4363) (Test b'rilevanza għaż-ŻEE)
C/2016/4363
ĠU L 190, 15.7.2016, p. 80–82
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 31/07/2022
15.7.2016 |
MT |
Il-Ġurnal Uffiċjali tal-Unjoni Ewropea |
L 190/80 |
DEĊIŻJONI TA' IMPLIMENTAZZJONI TAL-KUMMISSJONI (UE) 2016/1155
tal-14 ta' Lulju 2016
dwar l-ekwivalenza tas-sistema tas-sorveljanza pubblika, l-aċċertament tal-kwalità, tal-investigazzjoni u l-penali għall-awdituri u l-entitajiet tal-awditjar tal-Istati Uniti tal-Amerika skont id-Direttiva 2006/43/KE tal-Parlament Ewropew u tal-Kunsill
(notifikata bid-dokument C(2016) 4363)
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2006/43/KE tal-Parlament Ewropew u tal-Kunsill tas-17 ta' Mejju 2006 dwar l-awditi statutorji tal-kontijiet annwali u tal-kontijiet konsolidati, li temenda d-Direttivi tal-Kunsill 78/660/KEE u 83/349/KEE u li tħassar id-Direttiva tal-Kunsill 84/253/KEE (1), u b'mod partikolari l-ewwel subparagrafu tal-Artikolu 46(2) tagħha,
Billi:
(1) |
Skont l-Artikolu 45(1) tad-Direttiva 2006/43/KE l-awtoritajiet kompetenti ta' Stat Membru huma meħtieġa jirreġistraw lill-awdituri u l-entitajiet tal-awditjar kollha ta' pajjiżi terzi li jipprovdu rapporti tal-awditjar dwar id-dikjarazzjonijiet finanzjarji konsolidati ta' kumpaniji inkorporati barra l-Unjoni li t-titoli trasferibbli tagħhom huma ammessi għan-negozju f'suq regolat f'dak l-Istat Membru. L-Artikolu 45(3) tad-Direttiva 2006/43/KE jeħtieġ li l-Istati Membri jippreżentaw lil dawn l-awdituri u l-entitajiet tal-awditjar għas-sistemi tagħhom ta' sorveljanza pubblika, aċċertament tal-kwalità, investigazzjonijiet u penalitajiet. |
(2) |
L-Istati Membri jistgħu ma japplikawx jew jimmodifikaw abbażi tar-reċiproċità r-rekwiżiti tal-Artikolu 45(1) u (3) tad-Direttiva 2006/43/KE fir-rigward tal-awdituri u l-entitajiet tal-awditjar ta' pajjiż terz sakemm is-sistemi tas-sorveljanza pubblika, l-aċċertament tal-kwalità, u s-sistemi tal-investigazzjoni u l-penali għall-awdituri u l-entitajiet tal-awditjar ta' dak il-pajjiż terz għandhom jitqiesu ekwivalenti għar-rekwiżiti taħt id-Direttiva. Il-kundizzjonijiet skont liema r-rekwiżiti tal-Artikolu 45(1) u (3) tad-Direttiva 2006/43/KE ma jiġux applikati jew jiġu mmodifikati bħala konsegwenza tad-determinazzjoni tal-ekwivalenza jridu jkunu stipulati, bħala regola ġenerali, f'arranġament ta' kooperazzjoni kif imsemmi fl-Artikolu 46(3) tad-Direttiva 2006/43/KE bejn l-Istat Membru u s-sistema ta' sorveljanza pubblika, aċċertament tal-kwalità u investigazzjonijiet u penali tal-pajjiż terz rilevanti, u kkomunikati lill-Kummissjoni. |
(3) |
Bid-Deċiżjoni ta' Implimentazzjoni 2013/281/UE (2), il-Kummissjoni kkunsidrat li s-sorveljanza pubblika, l-aċċertament tal-kwalità, u s-sistemi tal-investigazzjoni u l-penali għall-awdituri u l-entitajiet tal-awditjar tal-awtoritajiet kompetenti tal-Istati Uniti, jiġifieri s-Securities and Exchange Commission tal-Istati Uniti tal-Amerika u l-Public Company Accounting Oversight Board tal-Istati Uniti tal-Amerika, kienu ekwivalenti għas-sorveljanza pubblika, l-aċċertament tal-kwalità, u s-sistemi tal-investigazzjoni u l-penali għall-awdituri u d-ditti tal-awditjar tal-Istati Membri. Din id-Deċiżjoni ta' Implimentazzjoni ma tibqax tapplika mill-31 ta' Lulju 2016. Għalhekk, l-ekwivalenza ta' dawn is-sistemi għandhom jiġu rivalutati. |
(4) |
Il-limitazzjoni taż-żmien tal-applikazzjoni tad-Deċiżjoni ta' Implimentazzjoni 2013/281/UE kienet minħabba n-nuqqas ta' fiduċja reċiproka fis-sistemi ta' sorveljanza ta' xulxin. Għalhekk, il-mekkaniżmu ta' kooperazzjoni bejn l-awtoritajiet kompetenti tal-Istati Membri u l-awtoritajiet kompetenti tal-Istati Uniti ġie rivedut sabiex issir valutazzjoni tal-progress li sar lejn il-kisba ta' dipendenza reċiproka. Mill-adozzjoni tad-Deċiżjoni 2013/281/UE, ċerti forom ta' dipendenza ġew stabbiliti, inkluż impenn biex tiġi evitata duplikazzjoni tax-xogħol bla bżonn u sabiex jiġu definiti approċċi għal kooperazzjoni li twassal għal livell ogħla ta' fiduċja fil-futur. |
(5) |
Fil-każ ta' kumpanija inkorporata fl-Istati Uniti u li t-titoli trasferibbli tagħha jkunu ammessi għan-negozju f'suq regolat ta' Stat Membru, iżda li ma tkunx ammessa għan-negozju fl-Istati Uniti tal-Amerika, l-Istati Membri jinħtieġ jiżguraw li kull inkarigu tal-awditjar relatat mar-rapporti finanzjarji ta' din il-kumpanija jkun kopert mill-arranġamenti ta' kooperazzjoni konklużi mal-Istati Uniti tal-Amerika biex ikun determinat liema sistema ta' sorveljanza pubblika, aċċertament tal-kwalità, investigazzjoni u penali se tapplika għall-awdituri ta' dawn il-kumpaniji. F'każ li dawn l-inkarigi tal-awditjar isiru minn awditur jew entità tal-awditjar ta' Stat Membru ieħor, l-Istati Membri kkonċernati għandhom jikkooperaw biex jiżguraw li l-inkarigu tal-awditjar ikun inkluż fl-ambitu ta' waħda mis-sistemi tagħhom ta' sorveljanza pubblika, aċċertament tal-kwalità u investigazzjoni u penali. Dawk l-arranġament ma jimpedixxux lill-Istati Membri milli jistabbilixxu arranġamenti ta' kooperazzjoni dwar analiżi individwali tal-aċċertament tal-kwalità bejn l-awtoritajiet kompetenti tagħhom u l-awtoritajiet kompetenti tal-Istati Uniti. |
(6) |
Kull konklużjoni dwar l-ekwivalenza tas-sistemi ta' sorveljanza pubblika, aċċertament tal-kwalità u investigazzjonijiet u penali ta' pajjiż terz skont l-Artikolu 46(2) tad-Direttiva 2006/43/KE ma jippreġudikax xi deċiżjoni li l-Kummissjoni tista' tadotta dwar l-adegwatezza tar-rekwiżiti milħuqa mill-awtoritajiet kompetenti ta' dak il-pajjiż terz skont l-ewwel subparagrafu tal-Artikolu 47(3) ta' din id-Direttiva. |
(7) |
L-għan aħħari tal-kooperazzjoni bejn l-awtoritajiet kompetenti tal-Istati Membri u dawk tal-Istati Uniti fil-qasam tas-sorveljanza pubblika, l-aċċertament tal-kwalità, is-sistemi tal-investigazzjoni u l-penali għall-awdituri u d-ditti tal-awditjar huwa li tintlaħaq fiduċja reċiproka fis-sistemi ta' sorveljanza ta' xulxin abbażi tal-ekwivalenza tagħhom. |
(8) |
Il-Kummissjoni wettqet valutazzjoni tal-ekwivalenza tas-sorveljanza pubblika, l-aċċertament tal-kwalità, is-sistemi tal-investigazzjoni u l-penali għall-awdituri u l-entitajiet tal-awditjar tas-Securities and Exchange Commission tal-Istati Uniti tal-Amerika u l-Public Company Accounting Oversight Board tal-Istati Uniti tal-Amerika, bl-assistenza tal-Grupp Ewropew tal-Korp ta' Sorveljanza tal-Awdituri. Il-valutazzjoni saret fid-dawl tal-kriterji stabbiliti fl-Artikoli 29, 30 u 32 tad-Direttiva 2006/43/KE li jirregolaw is-sistemi tas-sorveljanza pubblika, l-aċċertament tal-kwalità, l-investigazzjoni u l-penali għall-awdituri u d-ditti tal-awditjar tal-Istati Membri. Is-sorveljanza pubblika, l-aċċertament tal-kwalità, is-sistemi tal-investigazzjoni u l-penali għall-awdituri u l-entitajiet tal-awditjar tas-Securities and Exchange Commission tal-Istati Uniti tal-Amerika u l-Public Company Accounting Oversight Board tal-Istati Uniti tal-Amerika jissodisfaw ir-rekwiżiti li huma ekwivalenti għal dawk tal-Artikoli 29, 30 u 32 ta' din id-Direttiva. |
(9) |
Il-Public Company Accounting Oversight Board tal-Istati Uniti tal-Amerika għandu kompetenza fis-sorveljanza pubblika, fl-aċċertament estern tal-kwalità u fl-investigazzjoni ta' awdituri u ditti tal-awditjar. Is-Securities and Exchange Commission tal-Istati Uniti tal-Amerika għandha kompetenza biex tissorvelja l-operazzjonijiet tal-Public Company Accounting Oversight Board. |
(10) |
L-awtoritajiet kompetenti tal-Istati Uniti beħsiebhom ikomplu jevalwaw is-sistemi ta' sorveljanza pubblika, aċċertament tal-kwalità u investigazzjonijiet u penali fl-Istati Membri qabel jiddeċiedu li jafdaw is-sorveljanza li ssir mill-awtoritajiet kompetenti tagħhom. Għaldaqstant, meta wieħed iqis li d-deroga prevista fl-Artikolu 46 tad-Direttiva 2006/43/KE hija bbażata fuq il-prinċipju ta' reċiproċità, il-mekkaniżmu ta' kooperazzjoni bejn l-awtoritajiet kompetenti tal-Istati Membri u l-awtoritajiet kompetenti tal-Istati Uniti tal-Amerika għandu jiġi analizzat sabiex jiġi vvalutat il-progress li sar lejn il-kisba ta' fiduċja reċiproka fis-sistemi ta' sorveljanza ta' xulxin. Dan ir-rieżami għandu jqis ukoll jekk l-Istati Membri sabux diffikultajiet biex jiksbu rikonoxximent tal-ekwivalenza fir-rigward tas-sorveljanza pubblika tagħhom, aċċertament tal-kwalità, sistemi tal-investigazzjoni u l-penali għall-awdituri u d-ditti tal-awditjar mill-awtoritajiet kompetenti tal-Istati Uniti. Għal din ir-raġuni, din id-Deċiżjoni għandha tkun applikabbli għal perjodu ta' żmien limitat. |
(11) |
Minkejja l-limitazzjoni taż-żmien, il-Kummissjoni se timmonitorja l-iżviluppi fis-sistemi ta' sorveljanza u kooperazzjoni regolatorja fuq bażi regolari. Din id-Deċiżjoni se tiġi rieżaminata bħala adegwati fid-dawl tal-bidliet regolatorji u ta' sorveljanza fl-Unjoni u fl-Istati Uniti, filwaqt li tqis is-sorsi disponibbli ta' informazzjoni rilevanti. Dak ir-rieżami jista' twassal għall-irtirar tad-dikjarazzjoni ta' ekwivalenza. |
(12) |
Il-miżuri previsti f'din id-Deċiżjoni huma skont l-opinjoni tal-Kumitat stabbilit bl-Artikolu 48(1) tad-Direttiva 2006/43/KE, |
ADOTTAT DIN ID-DEĊIŻJONI:
Artikolu 1
Għall-fini tal-Artikolu 46(1) tad-Direttiva 2006/43/KE, is-sorveljanza pubblika, l-aċċertament tal-kwalità, is-sistemi tal-investigazzjoni u l-penali għall-awdituri u l-entitajiet tal-awditjar tas- Securities and Exchange Commission tal-Istati Uniti tal-Amerika u l-Public Company Accounting Oversight Board tal-Istati Uniti tal-Amerika għandhom jitqiesu li jissodisfaw ir-rekwiżiti li huma ekwivalenti għal dawk tal-Artikoli 29, 30 u 32 ta' din id-Direttiva.
Artikolu 2
L-Artikolu 1 għandu jkun mingħajr preġudizzju għall-arranġamenti kooperattivi dwar ir-rieżamijiet tal-aċċertament tal-kwalità individwali bejn l-awtoritajiet kompetenti ta' Stat Membru u l-awtoritajiet kompetenti tal-Istati Uniti.
Artikolu 3
Din id-Deċiżjoni għandha tapplika mill-1 ta' Awwissu 2016 sal-31 ta' Lulju 2022.
Artikolu 4
Din id-Deċiżjoni hija indirizzata lill-Istati Membri.
Magħmul fi Brussell, l-14 ta' Lulju 2016.
Għall-Kummissjoni
Jonathan HILL
Membru tal-Kummissjoni
(1) ĠU L 157, 9.6.2006, p. 87.
(2) Id-Deċiżjoni ta' Implimentazzjoni tal-Kummissjoni 2013/281/UE tal-11 ta' Ġunju 2013 dwar l-ekwivalenza tas-sistema tas-sorveljanza pubblika, l-aċċertament tal-kwalità, tal-investigazzjoni u l-penali għall-awdituri u l-entitajiet tal-awditjar tal-Istati Uniti tal-Amerika skont id-Direttiva 2006/43/KE tal-Parlament Ewropew u l-Kunsill (ĠU L 161, 13.6.2013, p. 8).