(1)

Ir-Regolament (UE) Nru 1380/2013 għandu l-għan li jelimina progressivament l-iskartar tal-ħut mis-sajd kollu tal-Unjoni permezz tal-introduzzjoni tal-obbligu tal-ħatt l-art għall-qabdiet ta' speċijiet li huma suġġetti għal limiti fuq il-qbid.

(2)

L-Artikolu 15(6) tar-Regolament (UE) Nru 1380/2013 jagħti s-setgħa lill-Kummissjoni tadotta pjanijiet għall-ħut skartat permezz ta' att delegat għal perjodu ta' mhux aktar minn tliet snin, fuq il-bażi ta' rakkomandazzjonijiet konġunti żviluppati mill-Istati Membri mal-Kunsilli Konsultattivi rilevanti.

(3)

Il-Belġju, id-Danimarka, il-Ġermanja, Franza, il-Pajjiżi l-Baxxi, l-Isvezja u r-Renju Unit għandhom interess dirett fil-ġestjoni tas-sajd fil-Baħar tat-Tramuntana. Dawk l-Istati Membri ssottomettew rakkomandazzjonijiet konġunti lill-Kummissjoni wara li kkonsultaw lill-Kunsill Konsultattiv dwar is-sajd ta' ħut pelaġiku u lill-Kunsill Konsultattiv tal-Baħar tat-Tramuntana. Inkiseb kontribut xjentifiku mill-korpi xjentifiċi rilevanti. Il-miżuri inklużi fir-rakkomandazzjoni konġunta jikkonformaw mal-Artikolu 15(6) tar-Regolament (UE) Nru 1380/2013 u għalhekk, skont l-Artikolu 18(3) tal-istess Regolament, dawn għandhom jiġu inklużi f'dan ir-Regolament.

(4)

Fir-rigward tal-Baħar tat-Tramuntana, skont l-Artikolu 15(1)(a) tar-Regolament (UE) Nru 1380/2013, l-obbligu ta' ħatt l-art għandu japplika għall-bastimenti kollha involuti fis-sajd ta' ħut pelaġiku żgħir u fis-sajd għal skopijiet industrijali għall-ispeċijiet maqbudin waqt l-attivitajiet tas-sajd li huma suġġetti għal limiti fuq il-qbid mhux aktar tard mill-1 ta' Jannar 2015.

(5)

Skont ir-rakkomandazzjoni konġunta, il-pjan għall-iskartar tal-ħut għandu jkopri ċerti tipi ta' sajd għall-kavalli, l-aringi, is-sawrell, l-istokkafixx, l-arġentina silus u l-laċċ ikħal kif ukoll is-sajd għal skopijiet industrijali għall-merluzz tan-Norveġja, il-laċċ ikħal u ċ-ċiċċirell fil-Baħar tat-Tramuntana mill-1 ta' Jannar 2015 'il quddiem.

(6)

Ir-rakkomandazzjoni konġunta tinkludi eżenzjoni mill-obbligu tal-ħatt l-art għall-kavalli u l-aringi maqbudin bix-xbieki tas-sajd f'ċerti kundizzjonijiet, ibbażata fuq evidenza xjentifika ta' rata għolja ta' sopravivenza, skont l-Artikolu 15(4)(b) tar-Regolament (UE) Nru 1380/2013. L-evidenza xjentifika li tappoġġa r-rata għolja ta' sopravivenza fir-rakkomandazzjoni konġunta ġiet ipprovduta mill-Grupp Scheveningen, u din ir-rakkomandazzjoni tirreferi għal għadd ta' studji xjentifiċi dwar is-sopravivenza tal-ħut meħlus meta dan jinqabad waqt is-sajd bil-purse seine. Dawn l-istudji sabu li r-rati ta' sopravivenza tal-ħut jiddependu fuq iż-żmien tal-iffullar u d-densità tal-ħut fix-xibka, li ġeneralment ikunu limitati f'dan it-tip ta' sajd. Din l-informazzjoni ġiet analizzata waqt is-sessjoni plenarja tal-STECF bin-numru 14-02. L-STECF ikkonkluda li jekk wieħed jassumi li r-riżultati tal-istudji tas-sopravivenza huma rappreżentattivi tar-rati tas-sopravivenza fl-operazzjonijiet tas-sajd kummerċjali, il-proporzjon ta' kavalli meħlus li jibqa' ħaj probabbilment ikun ta' madwar 70 % u jirriżulta f'densitajiet ħafna anqas mid-densità li fiha ġie nnutat li l-mortalità tal-aringi tiżdied. Il-projbizzjoni fuq ir-rilaxx tal-kavalli u tal-aringi qabel ma x-xibka tittella' kompletament abbord bastiment tas-sajd, li jwassal biex il-ħut mejjet jew il-ħut li jkun qed imut jintilef, hija stipulata fl-Artikolu 19b(2) tar-Regolament tal-Kunsill (UE) Nru 850/98 (2). Din l-eżenzjoni bbażata fuq ir-rata ta' sopravivenza ma taffettwax il-projbizzjoni fis-seħħ, billi l-ħut se jiġi rrilaxxat fi stadju tal-operazzjoni tas-sajd fejn ikollu rata għolja ta' sopravivenza wara r-rilaxx. Għalhekk, din l-eżenzjoni għandha tiġi inkluża f'dan ir-Regolament.

(7)

Ir-rakkomandazzjoni konġunta tinkludi wkoll eżenzjoni de minimis mill-obbligu ta' ħatt l-art biex jiġu evitati spejjeż sproporzjonati tal-ipproċessar tal-qabdiet mhux mixtieqa, bħall-ispejjeż tal-ħżin, tax-xogħol u tat-tkessiħ, li tqis id-diffikultà biex tiżdied is-selettività għas-sajd tal-ħut pelaġiku li jkollu fil-mira l-kavalli, is-sawrell u l-aringi fiż-żoni IVb u c tal-ICES li jinsabu fin-Nofsinhar ta' 54 grad tat-Tramuntana. Din l-eżenzjoni hija bbażata fuq evidenza xjentifika pprovduta mill-Istati Membri involuti fir-rakkomandazzjoni konġunta u ġiet analizzata mill-Kumitat Xjentifiku, Tekniku u Ekonomiku għas-Sajd (STECF). L-STECF sab li r-rakkomandazzjoni konġunta tippreżenta argumenti kwalitattivi motivati favur eżenzjoni de minimis fuq il-bażi tal-ispejjeż sproporzjonati tal-ipproċessar tal-qabdiet mhux mixtieqa. Fid-dawl ta' dan ta' hawn fuq u fin-nuqqas ta' informazzjoni xjentifika differenti, huwa xieraq li tiġi stabbilita l-eżenzjoni de minimis skont il-livelli tal-perċentwali proposti fir-rakkomandazzjonijiet konġunti u f'livelli li ma jkunux ogħla minn dawk permessi skont l-Artikolu 15(1)(c) tar-Regolament (UE) Nru 1380/2013. Għalhekk, din l-eżenzjoni għandha tiġi inkluża f'dan ir-Regolament.

(8)

Sabiex jiġi żgurat kontroll xieraq, għandhom jiġu stabbiliti rekwiżiti speċifiċi għad-dokumentazzjoni tal-qabdiet li jaqgħu taħt l-eżenzjonijiet koperti minn dan ir-Regolament.

(9)

Billi l-miżuri previsti f'dan ir-Regolament għandhom impatt dirett fuq l-attivitajiet ekonomiċi marbutin mal-istaġun tas-sajd tal-bastimenti tal-Unjoni u fuq l-ippjanar ta' dan l-istaġun tas-sajd, dan ir-Regolament għandu jidħol fis-seħħ immedjatament wara l-pubblikazzjoni tiegħu.

(10)

Dan ir-Regolament għandu japplika mill-1 ta' Jannar 2015 sabiex jikkonforma mal-limiti taż-żmien stabbiliti fl-Artikolu 15(1) tar-Regolament (UE) Nru 1380/2013. Skont l-Artikolu 15(6) ta' dak ir-Regolament, dan ir-Regolament għandu japplika għal mhux aktar minn tliet snin,