5.12.2013   

MT

Il-Ġurnal Uffiċjali tal-Unjoni Ewropea

L 325/66

(1)

Fit-8 ta' Novembru 2012, il-Kummissjoni Ewropea (il-“Kummissjoni”) ħabbret permezz ta' notifika ppubblikata f'Il-Ġurnal Uffiċjali tal-Unjoni Ewropea  (2) (“Notifika ta' Bidu”), il-bidu ta' proċediment antisussidji fir-rigward tal-importazzjonijiet fl-Unjoni ta' moduli fotovoltajċi tas-siliċju kristallin u komponenti ewlenin (jiġifieri ċelloli u wejfers) li joriġinaw mir-Repubblika Popolari taċ-Ċina (“RPĊ” jew il-“pajjiż ikkonċernat”).

(2)

Il-proċedura antisussidji tnediet wara lment ippreżentat fis-26 ta' Settembru 2012 minn EU ProSun (“l-ilmentatur”) f'isem il-produtturi li f'dan il-każ jirrappreżentaw iktar minn 25 % tal-produzzjoni totali tal-Unjoni ta' moduli fotovoltajċi tas-siliċju kristallin u komponenti ewlenin. L-ilment kien fih evidenza prima facie ta' sussidju tat-tali prodott u ta' dannu materjali li rriżulta minnu, li tqieset biżżejjed biex tiġġustifika l-bidu ta' proċediment.

(3)

Qabel il-bidu tal-proċediment u b'konformità mal-Artikolu 10(7) tar-Regolament tal-Kunsill (KE) Nru 597/2009 (“ir-Regolament bażiku”), il-Kummissjoni nnotifikat lill-Gvern tar-RPĊ (“il-GTĊ”) li kienet irċeviet ilment iddokumentat kif suppost li jallega li l-importazzjonijiet sussidjati ta' moduli fotovoltajċi tas-siliċju kristallin u komponenti ewlenin li joriġinaw mir-RPĊ kienu qegħdin jikkaġunaw dannu materjali lill-industrija tal-Unjoni. Il-GTĊ kien mistieden għal konsultazzjonijiet bil-għan li tiġi ċċarata s-sitwazzjoni fir-rigward tal-kontenuti tal-ilment u sabiex tinstab soluzzjoni maqbula b'mod reċiproku. Il-GTĊ aċċetta l-offerta ta' konsultazzjonijiet li mbagħad saru. Matul il-konsultazzjonijiet, ma setgħet tinstab ebda soluzzjoni miftehma b'mod reċiproku. Madankollu, ittieħdet nota tal-kummenti li saru mill-GTĊ dwar in-nuqqas ta' kumpensabbiltà tal-iskemi elenkati fl-ilment. Wara l-konsultazzjonijiet, daħlu sottomissjonijiet mill-GTĊ.

(4)

Fis-6 ta' Settembru 2012, il-Kummissjoni ħabbret permezz ta' notifika ppubblikata f'Il-Ġurnal Uffiċjali tal-Unjoni Ewropea  (3), il-bidu ta' proċediment antidumping dwar importazzjonijiet fl-Unjoni ta' moduli fotovoltajċi tas-siliċju kristallin u komponenti ewlenin (jiġifieri ċelloli u wejfers) li joriġinaw mir-RPĊ.

(5)

Fis-6 ta' Ġunju 2013, il-Kummissjoni, permezz tar-Regolament tal-Kummissjoni (UE) Nru 513/2013 (4), imponiet dazju antidumping provviżorju fuq l-importazzjonijiet ta' moduli fotovoltajċi tas-siliċju kristallin u komponenti ewlenin (jiġifieri ċelloli u wejfers) li joriġinaw jew li huma kkunsinnati mir-RPĊ (“Regolament antidumping provviżorju”).

(6)

L-analiżijiet tad-dannu li saru f'din l-investigazzjoni antisussidji u antidumping huma bbażati fuq l-istess definizzjoni tal-industrija tal-Unjoni, il-produtturi rappreżentanti tal-Unjoni u l-perjodu tal-investigazzjoni u wasslu għal konklużjonijiet identiċi sakemm ma jkunx speċifikat mod ieħor. Dan tqies xieraq sabiex tiġi simplifikata l-analiżi tad-dannu u sabiex jinkisbu sejbiet konsistenti fiż-żewġ proċedimenti. Għal din ir-raġuni, kummenti dwar l-aspetti tad-dannu mressqa fi kwalunkwe wieħed minn dawn il-proċedimenti ttieħdu inkunsiderazzjoni fiż-żewġ proċedimenti.

(7)

Wara talba mill-ilmentatur appoġġata mill-evidenza meħtieġa, il-Kummissjoni adottat fl-1 ta' Marzu 2013 ir-Regolament tal-Kummissjoni (UE) Nru 182/2013 (5) li jagħmel l-importazzjonijiet ta' moduli fotovoltajċi bis-silikon kristallin u l-komponenti ewlenin (jiġifieri ċelloli u wejfers) li joriġinaw fi jew li huma kkonsinjati mir-Repubblika Popolari taċ-Ċina soġġetti għar-reġistrazzjoni mis-6 ta' Marzu 2013.

(8)

Uħud mill-partijiet interessati ddikjaraw li d-deċiżjoni għar-reġistrazzjoni tal-importazzjonijiet ma kellhiex bażi, peress li l-kundizzjonijiet ma kinux issodisfati skont l-Artikolu 24(5) tar-Regolament bażiku. Madankollu, dawn id-dikjarazzjonijiet ma kinux sostanzjati jew ibbażati fuq evidenza fattwali. Fiż-żmien li ttieħdet id-deċiżjoni biex jiġu rreġistrati l-importazzjonijiet, il-Kummissjoni kellha biżżejjed evidenza prima facie biex tiġġustifika l-bżonn li jiġu rreġistrati l-importazzjonijiet, b'mod partikolari żieda qawwija kemm f'termini ta' importazzjonijiet assoluti kif ukoll f'temini ta' sehem mis-suq. Għaldaqstant, id-dikjarazzjonijiet f'dan ir-rigward kellhom jiġu rifjutati.

(9)

Il-Kummissjoni avżat b'mod uffiċjali lill-ilmentaturi, lil produtturi oħrajn magħrufa tal-Unjoni, il-produtturi esportaturi magħrufa fir-RPĊ, l-awtoritajiet tar-RPĊ u importaturi magħrufa bil-bidu tal-proċediment. Il-partijiet interessati ngħataw l-opportunità li jiddikjaraw il-fehmiet tagħhom bil-miktub u li jitolbu smigħ matul il-perjodu ta' żmien stipulat fin-Notifika ta' Bidu.

(10)

Fid-dawl tan-numru apparentement għoli ta' produtturi esportaturi, produtturi tal-Unjoni u importaturi mhux relatati, kull produttur esportatur u importatur mhux relatat magħruf intalab iħabbar lilu nnifsu lill-Kummissjoni u jipprovdi, kif speċifikat fin-Notifika ta' Bidu, informazzjoni bażika dwar l-attivitajiet tiegħu relatati mal-prodott ikkonċernat matul il-perjodu tal-investigazzjoni kif definit fil-premessa (38) hawn isfel. Din l-informazzjoni ntalbet skont l-Artikolu 27 tar-Regolament bażiku sabiex il-Kummissjoni tkun tista' tiddeċiedi fuq jekk ikunx hemm bżonn kampjunar u, jekk iva, tagħżel il-kampjuni. L-awtoritajiet tal-RPĊ ġew ikkonsultati wkoll.

(11)

Għall-ewwel, 121 produttur esportatur/grupp ta' produtturi Ċiniżi pprovdew l-informazzjoni mitluba u qablu li jkunu inklużi f'kampjun. Il-kumpaniji li kkooperaw jirrappreżentaw iktar minn 80 % mill-volum totali ta' esportazzjoni taċ-Ċina. Fuq il-bażi tal-informazzjoni riċevuta mill-produtturi esportaturi u skont l-Artikolu 27 tar-Regolament bażiku, fil-bidu l-Kummissjoni pproponiet kampjun ta' seba' produtturi esportaturi/gruppi ta' produtturi esportaturi.

(12)

Il-kampjun magħżul ta' seba' gruppi ta' kumpaniji jikkonsisti fi tliet esportaturi li jikkooperaw bl-akbar volum ta' esportazzjonijiet ta' moduli, iż-żewġ esportaturi li jikkooperaw bl-akbar volum ta' esportazzjonijiet ta' ċelloli u ż-żewġ esportaturi li jikkooperaw bl-akbar volum ta' esportazzjonijiet ta' wejfers. Il-kampjun ta' dawn is-seba' gruppi ta' produtturi esportaturi serva bħala l-bażi biex jiġi ddeterminat il-livell ta' sussidju għal dawk il-gruppi kif ukoll il-livell ta' sussidju għall-produtturi esportaturi kollha li kkooperaw mhux inklużi fil-kampjun, kif mitlub mill-Artikoli 15(2) u 15(3) tar-Regolament bażiku. Kif spjegat fil-premessa (46) hawn isfel, il-Kummissjoni eskludiet il-wejfers mill-ambitu tal-prodott fl-istadju definittiv tal-investigazzjoni. Ċerti kumpaniji ġew magħżula fil-kampjun fuq il-bażi tal-akbar volumi ta' esportazzjonijiet ta' wejfers tagħhom. Madankollu, wara li ttieħed inkunsiderazzjoni li l-Kummissjoni diġà kienet investigat dawn il-kumpaniji, ivverifikat id-dejta ppreżentata minnhom u anki l-fatt li dawn il-kumpaniji kollha kellhom esportazzjonijiet sinifikanti ta' moduli u/jew ċelloli, ma tqiesx li hemm bżonn li jiġi emendat il-kampjun.

(13)

Eventwalment, in-numru ta' produtturi esportaturi fil-kampjun tqies li sar tmien kumpaniji/gruppi. Dan għaliex, għad li għall-ewwel kien irrapportat li Jinko Solar Co. Ltd u Renesola Jiangsu Ltd kienu relatati, wara ġie stabbilit li ma kinux.

(14)

Fin-Notifika ta' Bidu, il-Kummissjoni ħabbret li kienet għażlet b'mod provviżorju kampjun ta' produtturi tal-Unjoni. Kull produttur tal-Unjoni u assoċjazzjoni tal-produtturi magħrufa ġew informati dwar l-għażla tal-kampjun provviżorju ta' produtturi tal-Unjoni. Dan il-kampjun provviżorju kkonsista f'disa' produtturi tal-Unjoni minn madwar 215-il produttur tal-Unjoni li kienu magħrufa qabel il-bidu tal-investigazzjoni li jipproduċu l-prodott simili, magħżula fuq il-bażi tal-ikbar volum rappreżentattiv ta' produzzjoni, billi ttieħed inkunsiderazzjoni l-volum ta' bejgħ u l-post ġeografiku li seta' raġonevolment ikun investigat matul iż-żmien disponibbli. Kien żgurat li l-kampjun ikopri kemm produtturi tal-Unjoni integrati vertikalment kif ukoll produtturi mhux integrati. Il-partijiet interessati kienu mistiedna wkoll sabiex jiddikjaraw il-fehmiet tagħhom dwar il-kampjun provviżorju.

(15)

Bosta partijiet interessati qajmu l-oġġezzjonijiet li ġejjin dwar il-kampjun provviżorju ta' produtturi tal-Unjoni:

(16)

L-argumenti mqajma mill-partijiet kienu indirizzati kif ġej: Il-produtturi tal-Unjoni talbu li l-ismijiet tagħhom jinżammu kunfidenzjali minħabba r-riskju ta' ritaljazzjoni. Tabilħaqq kien hemm theddid reali kontra l-produtturi tal-Unjoni sabiex issirilhom ħsara fin-negozju tagħhom kemm fl-Unjoni kif ukoll barra. Il-Kummissjoni qieset li dawn it-talbiet kienu sostanzjati biżżejjed biex jintlaħqu. Id-divulgazzjoni tal-post jew is-sehem fil-produzzjoni u l-bejgħ ta' produtturi individwali tal-Unjoni magħżula fil-kampjun faċilment setgħet tikxef l-identità tal-produttur ikkonċernat u t-talbiet f'dan ir-rigward kellhom jiġu rifjutati.

(17)

Il-Kummissjoni ma “ħawditx” id-determinazzjoni tal-appoġġ għall-bidu tal-investigazzjoni, id-determinazzjoni tal-industrija tal-Unjoni u l-għażla ta' kampjun provviżorju peress li dawn l-istadji baqgħu indipendenti minn xulxin u ttieħdet deċiżjoni fuqhom b'mod separat. Ma ntweriex kemm l-użu tad-dejta dwar il-produzzjoni u l-bejgħ ipprovduta mill-produtturi tal-Unjoni fil-kuntest tal-analiżi tal-appoġġ għall-bidu tal-investigazzjoni kien affettwa r-rappreżentattività tal-kampjun. Fil-bidu, l-industrija tal-Unjoni tabilħaqq kienet definita b'mod provviżorju. L-informazzjoni kollha għad-dispożizzjoni dwar il-produtturi tal-Unjoni, inkluża informazzjoni pprovduta fl-ilment u d-dejta miġbura mill-produtturi tal-Unjoni u partijiet oħrajn qabel il-bidu tal-investigazzjoni, intużat sabiex tiġi stabbilita b'mod provviżorju l-produzzjoni totali tal-Unjoni għall-perjodu tal-investigazzjoni, kif definita fil-premessa (38) hawn isfel.

(18)

Il-produtturi kollha tal-Unjoni li wieġbu l-mistoqsijiet relatati mal-appoġġ għall-bidu tal-investigazzjoni ġew ikkunsidrati għall-kampjun, irrispettivament x'kienu jappoġġaw, jopponu jew jekk ma esprimew ebda opinjoni dwar l-investigazzjoni. Għaldaqstant, din id-dikjarazzjoni ġiet rifjutata.

(19)

Il-kwistjoni ta' għadd doppju/triplu ġiet ikkunsidrata meta ntgħażel il-kampjun provviżorju. Deher li l-esklużjoni tal-produzzjoni u l-bejgħ ta' ċelloli tal-produtturi tal-Unjoni integrati vertikalment ma kinitx tieħu inkunsiderazzjoni l-parti tal-produzzjoni taċ-ċelloli mibjugħa fis-suq ħieles. Għalhekk tqies li l-esklużjoni tal-bejgħ taċ-ċelloli mill-volum totali ta' produzzjoni mhux bilfors kien iwassal għal kampjun iktar rappreżentattiv. Barra minn hekk, ir-rappreżentattività tal-kampjun ma kinitx stabbilita biss fuq il-bażi tal-volum ta' produzzjoni iżda anki fuq il-bażi tal-firxa ġeografika u rappreżentazzjoni bbilanċjata ta' produtturi integrati vertikalment u mhux integrati. Ir-rappreżentattività relattiva tal-volum ta' produzzjoni kienet ikkalkolata fil-livell ta' kull tip tal-prodott simili. Fuq din il-bażi, tqies li l-metodoloġija sabiex jingħażel kampjun provviżorju kienet raġonevoli u għalhekk il-kampjun jitqies rappreżentattiv għall-industrija tal-Unjoni tal-prodott investigat b'mod ġenerali. Għaldaqstant, din id-dikjarazzjoni ġiet rifjutata. F'dak li għandu x'jaqsam mal-kredibbiltà tad-dejta, il-kampjun intgħażel fuq il-bażi tal-informazzjoni disponibbli fi żmien l-għażla tal-kampjun kif stipulat fl-Artikolu 27 tar-Regolament bażiku. Dwar il-kredibbiltà tad-dejta użata fl-appoġġ tal-bidu tal-investigazzjoni, l-investigazzjoni ma sabet ebda evidenza li d-dejta miġbura qabel il-bidu kellha nuqqasijiet importanti. Għaldaqstant, jista' jiġi supponut b'mod raġonevoli li l-bażi li fuqha ntgħażel il-kampjun provviżorju kienet kredibbli biżżejjed. Għaldaqstant, din id-dikjarazzjoni ġiet rifjutata.

(20)

Rigward il-lista ta' madwar 150 produttur addizzjonali tal-Unjoni, ta' min jinnota li din l-informazzjoni ġiet sottomessa ferm wara d-data ta' skadenza stabbilita għall-partijiet interessati sabiex jikkummentaw dwar l-għażla tal-kampjun provviżorju u għall-produtturi tal-Unjoni sabiex jgħarrfu bil-preżenza tagħhom u sabiex jitolbu li jintgħażlu fil-kampjun. Barra minn hekk, madwar 30 mill-produtturi tal-Unjoni f'din il-lista kienu magħrufa mal-Kummissjoni fi żmien l-għażla tal-kampjun. Ukoll, il-produtturi kollha tal-Unjoni li għarrfu bil-preżenza tagħhom wara l-pubblikazzjoni tan-Notifika ta' Bidu ġew ikkunsidrati meta ntgħażel il-kampjun. Fuq din il-bażi, ir-rappreżentattività tal-kampjun ma kinitx affettwata. Għaldaqstant, din id-dikjarazzjoni ġiet rifjutata.

(21)

Wara li daħlu l-kummenti, ġiet riveduta l-kompożizzjoni tal-kampjun fuq il-bażi li kien hemm indikazzjonijiet li waħda mill-kumpaniji magħżula ma kinitx tkun fil-pożizzjoni li tikkoopera bis-sħiħ. Sabiex jinżamm il-livell ta' rappreżentattività tal-kampjun, intgħażel produttur ieħor tal-Unjoni. B'hekk, dan il-kampjun rivedut ikkonsista f'għaxar kumpaniji, magħżula fuq il-bażi tal-ikbar volum rappreżentattiv għal kull livell ta' produzzjoni, filwaqt li jittieħed inkunsiderazzjoni l-volum ta' bejgħ fis-suq tal-Unjoni u l-post ġeografiku li raġonevolment jista' jiġi investigat matul iż-żmien disponibbli. Wara l-esklużjoni tal-wejfers mid-definizzjoni tal-prodott ikkonċernat, u b'hekk anki mill-ambitu ta' din l-investigazzjoni (ara l-premessi (42) — (46) u (349) hawn isfel), il-kampjun kien jikkonsisti minn tmien kumpaniji. Għalhekk, il-kampjun rivedut ta' produtturi tal-Unjoni, mogħti bħala perċentwal mill-produzzjoni sħiħa tal-Unjoni, ammonta għal bejn 18 % u 21 % għall-moduli u bejn 17 % u 24 % għaċ-ċelloli u kopra produtturi integrati vertikalment u mhux integrati. Peress li perċentwal preċiż jippermetti li jiġi kkalkolat il-volum ta' produzzjoni tal-produttur l-ieħor tal-Unjoni msemmi hawn fuq u b'hekk setgħet tiġi determinata l-identità tiegħu, ma seta' jkun iddivulgat ebda perċentwal preċiż bħal dan.

(22)

Il-produtturi tal-Unjoni li pprovdew lill-Kummissjoni bl-informazzjoni meħtieġa għall-għażla ta' kampjun f'dan il-proċediment antisussidji jikkoinċidu mal-produtturi tal-Unjoni li pprovdew l-informazzjoni rilevanti fl-investigazzjoni parallela antisussidji attwali. Barra minn hekk, il-produtturi kollha tal-Unjoni magħżula fil-kampjun finali fl-investigazzjoni antidumping ipprovdew l-informazzjoni rilevanti fl-investigazzjoni antisussidji preżenti li ppermettiet lill-Kummissjoni tagħżel kampjun. Għalhekk, tqies xieraq li l-kampjuni finali tal-produtturi tal-Unjoni fiż-żewġ proċedimenti jkunu identiċi.

(23)

Il-GTĊ tenna d-dikjarazzjoni tiegħu li l-użu tal-kunfidenzjalità tal-ismijiet tal-Ilmentaturi u l-produtturi tal-Unjoni fil-kampjun mhuwiex iġġustifikat. Kif diġà ġie ddikjarat fil-premessa (9) għar-Regolament provviżorju, il-produtturi tal-Unjoni talbu li l-ismijiet tagħhom jinżammu kunfidenzjali minħabba r-riskju ta' ritaljazzjoni. Il-Kummissjoni qieset li dawn it-talbiet kienu sostanzjati biżżejjed biex jintlaħqu. L-informazzjoni li ġiet ipprovduta lill-Kummissjoni sabiex tissostanzja r-riskju ta' ritaljazzjoni ma tistax tiġi ddivulgata lil partijiet terzi, peress li divulgazzjoni bħal din tkun tmur kontra l-iskop tat-talba għal kunfidenzjalità. Barra minn hekk, f'każ fejn, kif irrapportat mill-GTĊ, produttur tal-Unjoni jerġa' jevalwa l-pożizzjoni tiegħu u juri l-identità tiegħu billi jimla applikazzjoni għal kawża l-Qorti kontra r-regolament provviżorju, ma jkunx għad hemm raġuni għaliex tiġi ddivulgata l-informazzjoni li fuq il-bażi tagħha ngħatat l-anonimità, peress li l-identità tkun inkixfet.

(24)

Wara d-divulgazzjoni finali, il-Kamra tal-Kummerċ taċ-Ċina għall-Importazzjoni u l-Esportazzjoni ta' Makkinarju u Prodotti Elettroniċi (is-CCCME) tenniet l-argumenti dwar il-metodu użat għall-għażla tal-kampjun provviżorju tal-produtturi tal-Unjoni. Iddikjarat b'mod partikolari li l-Istituzzjonijiet ma ħadux f'kunsiderazzjoni 120 produttur. Il-Kummissjoni diġà indirizzat din il-kwistjoni fil-premessa (9) għar-Regolament provviżorju. Barra minn hekk, l-Istituzzjonijiet ivverifikaw l-attivitajiet tal-kumpaniji pprovduti f'dik il-lista. Instab li l-lista kienet tinkludi fil-parti l-kbira installaturi, distributuri, importaturi relatati u produttur esportatur fiċ-Ċina, it-Tajwan u l-Indja. Għaldaqstant, ma kinitx adattata biex turi li l-Istituzzjonijiet kienu injoraw numru importanti ta' produtturi tal-Unjoni. Barra minn hekk, is-CCCME ma kkontestatx il-produzzjoni totali tal-Unjoni billi pprovdiet figuri alternattivi, u lanqas ma pprovdiet xi evidenza li r-rappreżentattività tal-kampjun setgħet tkun affettwata, peress li l-ebda wieħed mill-produtturi addizzjonali allegati tal-Unjoni ma kienu jintgħażlu fil-kampjun li kieku l-Kummissjoni kienet taf bihom.

(25)

Minn madwar 250 importatur mhux relatat li tressqu mill-ilmentatur, li l-Kummissjoni kkuntattjat, 20 parti wieġbu għall-formola ta' kampjunar mehmuża man-Notifika ta' Bidu, tnax għall-moduli, waħda għaċ-ċelloli. Barra minn hekk, seba' partijiet oħrajn għarrfu bil-preżenza tagħhom iżda ma rrapportaw ebda importazzjoni jew bejgħ mill-ġdid tal-prodott ikkonċernat. Il-kampjun intgħażel b'konformità mal-Artikolu 27 tar-Regolament bażiku biex ikopri l-ikbar volum rappreżentattiv ta' importazzjonijiet li raġonevolment seta' jiġi investigat matul iż-żmien disponibbli. Fuq din il-bażi ntgħażel kampjun ta' importaturi mhux relatati li jikkonsisti f'żewġ importaturi għall-moduli u importatur wieħed għaċ-ċelloli, li kienu jirrappreżentaw madwar 2 % — 5 % tal-importazzjonijiet totali mill-pajjiż ikkonċernat. Madankollu, wara li waslet it-tweġiba għall-kwestjonarju, deher li l-attività ċentrali ta' wieħed mit-tliet importaturi kienet installazzjonijiet solari u mhux in-negozjar tal-prodott ikkonċernat. Rigward l-attività ta' importatur ieħor, din kienet waħda ta' importatur ta' moduli u mhux ta' importatur ta' ċelloli. Minkejja dan, il-kwalità tal-informazzjoni pprovduta fit-tweġiba tiegħu għall-kwestjonarju ma kinitx biżżejjed sabiex tiddaħħal fl-analiżi tal-importaturi mhux relatati. Barra minn hekk, l-investigazzjoni kixfet li l-parti l-kbira tal-importazzjonijiet tal-prodott ikkonċernat daħlet fis-suq tal-Unjoni permezz ta' kumpaniji relatati mal-produtturi esportaturi fir-RPĊ jew permezz ta' installaturi jew żviluppaturi ta' proġetti.

(26)

Wara l-impożizzjoni ta' miżuri antidumping provviżorji fl-investigazzjoni parallela antidumping, il-Kummissjoni kkuntattjat importaturi addizzjonali li diġà kienu kkooperaw fl-investigazzjoni fl-istadju bikri billi pprovdew informazzjoni bażika fuq l-attivitajiet tagħhom relatati mal-prodott investigat matul il-perjodu tal-investigazzjoni, kif speċifikat fin-Notifika ta' Bidu. L-iskop kien li jiġi ddeterminat jekk id-daqs tal-kampjun ta' importaturi mhux relatati setax jiżdied. Sitt kumpaniji kkwalifikaw bħala importaturi mhux relatati li nnegozjaw il-prodott ikkonċernat (jiġifieri x-xiri u l-bejgħ mill-ġdid tiegħu) ressqu u kienu lesti jikkooperaw iktar fl-investigazzjoni. Minn dawn is-sitta, ħamsa wieġbu sad-data ta' skadenza. Mill-ħames tweġibiet riċevuti, tlieta biss kienu kompluti b'mod sodisfaċenti u ppermettew li ssir valutazzjoni sinifikanti. Fuq din il-bażi, il-kampjun tal-importaturi mhux relatati tkabbar u kkonsista f'erba' importaturi għall-moduli, li kienu jirrappreżentaw madwar 2 % — 5 % tal-importazzjonijiet totali mill-pajjiż ikkonċernat. Minħabba l-istruttura tal-importaturi mhux relatati, li fil-parti l-kbira kienu kumpaniji żgħar u medji, ma kienx possibbli li jkun hemm kampjun li jirrappreżenta sehem ikbar, minħabba r-riżorsi limitati għad-dispożizzjoni tal-Istituzzjonijiet.

(27)

Il-Kummissjoni bagħtet kwestjonarji lir-rappreżentanti tar-RPĊ (inklużi kwestjonarji speċifiċi għaċ-China Development Bank, l-Export Import Bank of China, il-Bank of China, il-Bank of Shanghai, Sinosure, istituzzjonijiet finanzjarji rilevanti oħrajn u produtturi tal-Istat ta' polisiliċju, ħġieġ u aluminju li fornew din il-materja prima lill-industrija kkonċernata matul il-perjodu tal-investigazzjoni), it-tmien produtturi esportaturi fil-kampjun fir-RPĊ, produtturi esportaturi oħrajn fir-RPĊ li talbu hekk, kif ukoll lill-produtturi tal-Unjoni fil-kampjun, l-importaturi mhux relatati fil-kampjun u operaturi upstream u downstream u l-assoċjazzjonijiet tagħhom li għarrfu bil-preżenza tagħhom fil-limitu ta' żmien stipulat fin-Notifika ta' Bidu. Il-Kummissjoni kkuntattjat ukoll assoċjazzjoni tal-konsumaturi rappreżentattiva.

(28)

Daħlu tweġibiet mill-GTĊ, il-produtturi esportaturi kollha fil-kampjun, il-kumpaniji relatati magħhom fir-RPĊ, ħames produtturi esportaturi li talbu analiżi individwali, mill-produtturi kollha tal-Unjoni fil-kampjun, l-importaturi kollha tal-Unjoni mhux relatati fil-kampjun u 21 operatur upstream u downstream u tlieta mill-assoċjazzjonijiet tagħhom.

(29)

Il-Kummissjoni fittxet u vverifikat l-informazzjoni kollha meqjusa neċessarja għad-determinazzjoni tas-sussidju, id-dannu li rriżulta u l-interess tal-Unjoni. Saru żjarat ta' verifika fil-bini tal-awtoritajiet tal-Istat u fl-istituzzjonijiet finanzjarji li ġejjin, il-kumpaniji fil-kampjun, importatur mhux relatat minnhom, żewġ operaturi upstream u erba' downstream, assoċjazzjonijiet u konsulent indipendenti:

(30)

Il-kummenti sottomessi mill-partijiet interessati ġew ikkunsidrati u tqiesu, fejn kienu xierqa.

(31)

L-Assoċjazzjoni għall-Enerġija Solari Affordabbli (“AFASE”), li tirrappreżenta importaturi, operaturi downstream u upstream xeħtet dubju fuq il-bażi ġuridika għaż-żjara li saret fil-bini ta' Europressedienst, billi ddikjarat li konsulent indipendenti mhuwiex parti interessata skont l-Artikolu 26 tar-Regolament bażiku. Madankollu, is-sejbiet għandhom ikunu bbażati fuq dejta kredibbli u verifikabbli kull meta dan ikun possibbli. Europressedienst tat informazzjoni dwar indikaturi makroekonomiċi fuq il-bażi ta' kuntratt. Il-Kummissjoni wettqet verifika fuq il-post fil-bini tagħha għall-fini tal-prinċipju ta' amministrazzjoni tajba biex tivverifika l-kredibbiltà u l-korrettezza tad-dejta li fuqha l-Kummissjoni bbażat is-sejbiet tagħha.

(32)

Il-GTĊ iddikjara li d-drittijiet ta' difiża tiegħu fir-rigward tal-aċċess għall-fajls miftuħin għal spezzjoni mill-partijiet interessati nkisru għaliex (i) l-informazzjoni kienet nieqsa mill-fajls mhux kunfidenzjali mingħajr ma ntweriet “kawża ġusta” jew mingħajr ma ġew ipprovduti sommarji dettaljati, jew b'mod eċċezzjonali, ir-raġunijiet għan-nuqqas ta' forniment tas-sommarju mhux kunfidenzjali, (ii) il-verżjoni mhux kunfidenzjali ta' tweġiba sħiħa għall-kwestjonarju ta' produttur tal-Unjoni kienet nieqsa u (iii) id-dewmien biex il-verżjonijiet mhux kunfidenzjali tat-tweġibiet għall-kwestjonarji tal-produtturi tal-Unjoni jitqiegħdu għad-dispożizzjoni tal-partijiet interessati kien eċċessiv.

(33)

(i) Rigward id-dikjarazzjoni li kien hemm informazzjoni nieqsa mill-fajl miftuħ, il-parti interessata ma speċifikatx liema informazzjoni kienet qed tirreferi għaliha. (ii) Id-dikjarazzjoni tagħha li l-verżjoni mhux kunfidenzjali ta' tweġiba sħiħa għall-kwestjonarju ma kinitx disponibbli kienet żbaljata. (iii) Rigward id-dewmien fit-tqegħid għad-dispożizzjoni tat-tweġibiet mhux kunfidenzjali għall-kwestjonarji tal-produtturi tal-Unjoni fil-kampjun, kien spjegat lill-parti kkonċernata li l-kwestjonarji żdiedu biss mal-fajl mhux kunfidenzjali wara li ġew ivverifikati dwar il-kompletezza u r-raġonevolezza tas-sommarji. Sabiex jiġi żgurat id-dritt ta' anonimità tal-produtturi tal-Unjoni, kien iggarantit ukoll li l-verżjonijiet mhux kunfidenzjali tal-kwestjonarji tabilħaqq ma kinux jikxfu l-identità tal-produttur tal-Unjoni kkonċernat. Għalhekk, f'ċerti każijiet, il-verżjonijiet mhux kunfidenzjali riedu jiġu korretti kif xieraq mill-parti li tissottomettihom qabel ma setgħu jitqiegħdu għad-dispożizzjoni ta' partijiet interessati oħra.

(34)

Fi kwalunkwe każ, huwa meqjus li dan bl-ebda mod ma affettwa d-drittijiet ta' difiża tal-partijiet interessati. Il-Kummissjoni tat lill-partijiet interessati kollha l-opportunità li jwieġbu għall-informazzjoni inkluża fil-fajl miftuħ għal spezzjoni fil-ħin sabiex il-kummenti tagħhom ikunu jistgħu jittieħdu f'kunsiderazzjoni, meta sostanzjati u ġġustifikati, qabel ma nħarġet xi konklużjoni fl-investigazzjoni. Il-parti interessata kellha kull opportunità sabiex tikkummenta fuq il-kwestjonarji mill-produtturi tal-Unjoni fil-kampjun anki wara d-divulgazzjoni provviżorja u finali. Għaldaqstant, anki jekk id-divulgazzjonijiet u l-aċċess għall-fajl miftuħ għal spezzjoni mill-partijiet interessati huma bbażati fuq dispożizzjonijiet ġuridiċi differenti, ta' min jinnota li kien hemm żmien adegwat biex il-partijiet interessati jikkummentaw fuq l-informazzjoni kollha mqiegħda għad-dispożizzjoni minn kwalunkwe parti fl-investigazzjoni. Għaldaqstant, din il-pretensjoni kellha tiġi rifjutata.

(35)

Il-partijiet interssati kollha kienu mgħarrfa bil-fatti u l-kunsiderazzjonijiet essenzjali li fuq il-bażi tagħhom kien maħsub li tiġi rakkomandata l-impożizzjoni ta' dazji kompensatorji fuq l-importazzjonijiet ta' moduli tas-siliċju kristallin u modulu fotovoltajiċi u komponenti ewlenin (jiġifieri ċelluli), li joriġinaw fi jew jintbagħtu mir-Repubblika Popolari taċ-Ċina (“id-divulgazzjoni finali”). Il-partijiet kollha ngħataw perjodu li fih setgħu jikkummentaw fuq id-divulgazzjoni finali.

(36)

Il-kummenti sottomessi mill-partijiet interessati ġew ikkunsidrati u tqiesu, fejn kienu xierqa.

(37)

Wara d-divulgazzjoni finali, il-Kummissjoni rċeviet offerta emendata għal impenn minn produtturi esportaturi flimkien mal-Kamra tal-Kummerċ taċ-Ċina għall-Importazzjoni u l-Esportazzjoni ta' Makkinarju u Prodotti Elettroniċi, li tkopri wkoll l-investigazzjoni antidumping parallela. Permezz tad-Deċiżjoni ta' Implimentazzjoni tal-Kummissjoni 2013/707/UE tal-4 ta' Diċembru 2013 li tikkonferma l-aċċettazzjoni ta' impenn offrut b'rabta mal-proċedimenti ta' anti-dumping u antisussidji li jikkonċernaw l-importazzjonijiet ta' moduli fotovoltajċi bis-silikon kristallin u l-komponenti ewlenin (jiġifieri ċ-ċelloli) li joriġinaw jew jintbagħtu mir-Repubblika Popolari taċ-Ċina għall-perjodu ta' applikazzjoni ta' miżuri definittivi (6), il-Kummissjoni kkonfermat li taċċetta dak l-impenn.

(38)

L-investigazzjoni tas-sussidju u d-dannu kopriet il-perjodu bejn l-1 ta' Lulju 2011 sat-30 ta' Ġunju 2012 (il-“perjodu tal-investigazzjoni” jew “PI”). L-analiżi tax-xejriet rilevanti għall-valutazzjoni tad-dannu kopriet il-perjodu mill-1 ta' Jannar 2009 sa tmiem il-PI ('il-perjodu kkunsidrat').

(39)

Il-prodott ikkonċernat kien definit fl-istadju tal-bidu bħal moduli jew pannelli PV tas-siliċju kristallin u ċ-ċelloli u l-wejfers tat-tip użat f'moduli jew pannelli PV tas-siliċju kristallin, li joriġinaw jew jintbagħtu mir-RPĊ. Iċ-ċelloli u l-wejfers għandhom ħxuna li ma taqbiżx l-400 mikrometru. Bħalissa, dan il-prodott jaqa' fil-kodiċijiet NM ex3818 00 10, ex8501 31 00, ex8501 32 00, ex8501 33 00, ex8501 34 00, ex8501 61 20, ex8501 61 80, ex8501 62 00, ex8501 63 00, ex8501 64 00 u ex8541 40 90.

(40)

It-tipi ta' prodotti li ġejjin huma esklużi mid-definizzjoni tal-prodott ikkonċernat:

(41)

L-investigazzjoni wriet li l-prodott ikkonċernat kif ukoll il-prodott manifatturat u mibjugħ fl-Unjoni mill-industrija tal-Unjoni għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi finali bażiċi. Għalhekk, jitqiesu li huma l-istess skont it-tifsira tal-Artikolu 2(c) tar-Regolament bażiku.

(42)

Il-partijiet interessati talbu li l-wejfers jitneħħew mill-ambitu tal-prodott peress li l-wejfers ma għandhomx l-istess karatteristiċi fiżiċi, kimiċi u tekniċi bażiċi bħaċ-ċelloli u l-moduli. Minbarra l-argumenti mressqa qabel il-pubblikazzjoni tar-Regolament antidumping provviżorju, wara tressqu żewġ argumenti addizzjonali f'dan ir-rigward.

(43)

L-ewwel nett, il-partijiet interessati ddikjaraw li l-wejfers jistgħu jintużaw għal skopijiet oħrajn minbarra l-produzzjoni ta' ċelloli, b'mod partikolari l-produzzjoni ta' ċirkwiti integrati u mikroapparati oħrajn. F'dan ir-rigward, huwa osservat li mhux il-wejfers kollha huma inklużi fl-ambitu tal-prodott ta' din l-investigazzjoni, li huwa limitat għal “wejfers tat-tip użat f'moduli jew pannelli PV tas-siliċju kristallin”, u li dawk il-wejfers “għandhom ħxuna li ma taqbiżx l-400 mikrometru”. Filwaqt li l-wejfers żgur li jeżistu f'applikazzjonijiet oħrajn, l-investigazzjoni qatt ma kopriet wejfers li jintużaw fil-produzzjoni ta' prodotti oħrajn bħal ċirkwiti integrati. Barra minn hekk, ebda produttur, importatur jew utent involut fis-suq għal dawn it-tipi differenti ta' wejfers ma allega li l-wejfers tiegħu jkunu soġġetti għal reġistrazzjoni jew dazji antidumping provviżorji. Għaldaqstant huwa konkluż li dawn it-tipi l-oħrajn ta' wejfers mhumiex soġġetti għall-ambitu tal-prodott ta' din l-investigazzjoni. Fl-istess ħin, dan juri li l-wejfers mhux bilfors għandhom l-istess użu finali bħaċ-ċelloli u l-moduli.

(44)

It-tieni, huwa ddikjarat li wejfer mhux ipproċessat ma fih ebda waħda mill-proprjetajiet elettriċi essenzjali li jiddistingwu ċelloli u moduli solari minn prodotti oħrajn. B'mod partikolari, il-wejfers ma għandhomx il-kapaċità li jiġġeneraw l-elettriku mid-dawl tax-xemx, li hija funzjoni fundamentali taċ-ċelloli u l-moduli fotovoltajċi kristallini.

(45)

Tabilħaqq, l-investigazzjoni wriet li huwa biss ladarba l-wejfer tkun ittrasformata f'ċellola, li tikseb il-funzjonalità sabiex tiġġenera l-elettriku mid-dawl tax-xemx. Il-konverżjoni hija operata b'ċelloli li jassorbu dawl u jibdluh f'elettriku permezz ta' siliċju kristallin. Iċ-ċelloli għandhom konnessjoni pożittiva-negattiva biex jiġbru u jgħaddu l-elettriku li huwa ġġenerat miċ-ċellola. Biex jiġu assemblati l-moduli, iċ-ċelloli jitwaħħdu flimkien b'wajers ċatti jew faxxa tal-metall biex jipproduċu strixxa ta' ċelloli. Dawn huma laminati bejn il-folji. Spiss jintuża ħġieġ fin-naħa ta' fuq u folja ta' appoġġ polimerika ma' isfel. Normalment l-oqfsa jinħolqu biex ikun jista' jsir l-immuntar fuq il-post (pereżmpju. fuq il-bjut). Il-modulu jista' jkollu inverter jew le.

(46)

Minħabba l-karatteristiċi fiżiċi u tekniċi bażiċi differenti, definiti matul l-investigazzjoni, fost l-oħrajn bħala l-funzjonalità li tiġġenera l-elettriku mid-dawl tax-xemx, ġie konkluż fuq bilanċ li l-wejfers għandhom ikunu esklużi mid-definizzjoni tal-prodott ikkonċernat, u b'hekk mill-ambitu ta' din l-investigazzjoni.

(47)

Bosta partijiet interessati ddikjaraw li l-investigazzjoni ma tistax tkopri żewġ prodotti b'karatteristiċi fiżiċi, kimiċi u tekniċi differenti, u għalhekk moduli u ċelloli għandhom ikunu soġġetti għal żewġ investigazzjonijiet separati. Barra minn hekk, iddikjaraw li mhuwiex ċar jekk l-investigazzjoni tkoprix prodott waħdu jew żewġ prodotti separati u b'hekk ma għandhomx l-opportunità sħiħa li jiddefendu l-interessi tagħhom.

(48)

Il-produzzjoni taċ-ċelloli-moduli hija proċess uniku wieħed ta' produzzjoni bi stadji differenti tal-produzzjoni. Iċ-ċelloli jiddeterminaw il-karatteristiċi tal-prodott lest (jiġifieri moduli). L-investigazzjoni wriet li l-produzzjoni taċ-ċelloli hija ddedikata direttament u esklussivament għall-produzzjoni tal-moduli; il-moduli u ċ-ċelloli jaqsmu l-istess karatteristiċi fiżiċi, kimiċi u tekniċi (determinati mill-materja prima użata) u għandhom l-istess użi bażiċi finali, jiġifieri jinbiegħu għal integrazzjoni f'sistemi solari PV. Il-prestazzjoni tal-moduli hija marbuta direttament mal-prestazzjoni taċ-ċelloli.

(49)

In-Notifika ta' Bidu stipulat biċ-ċar li l-moduli u ċ-ċelloli jikkostitwixxu l-prodott investigat. Għaldaqstant, il-partijiet interessati kellhom kull opportunità li jiddefendu l-interessi tagħhom fuq il-bażi tal-prodott ikkonċernat kif definit. Għal dawn ir-raġunijiet, l-argumenti ġew rifjutati.

(50)

Ġie ddikjarat ukoll li l-moduli u ċ-ċelloli ma setgħux jitqiesu bħala prodott uniku peress li għandhom diversi kodiċi NM bi tmien ċifri, subintestatura b'sitt ċifri u intestatura HS b'erba' ċifri differenti. F'dan ir-rigward, huwa osservat li kemm iċ-ċelloli kif ukoll il-moduli jistgħu jkunu ddikjarati taħt l-intestatura doganali 8541 40 90, filwaqt li l-intestaturi doganali taħt l-intestatura 8501 huma għal ġeneraturi elettriċi inġenerali u mhux b'mod partikolari għal prodotti solari. Għal dawn ir-raġunijiet, l-argument ġie rifjutat.

(51)

Bosta partijiet iddikjaraw li l-valur miżjud fil-proċess ta' konverżjoni taċ-ċelloli jammonta għall-ikbar sehem mill-valur ta' modulu u b'hekk iċ-ċelloli jridu jitqiesu bħala prodott separat.

(52)

L-investigazzjoni żvelat li l-produzzjoni taċ-ċelloli hija l-iktar parti teknoloġikament sofistikata fil-proċess ta' produzzjoni. Madankollu, uriet ukoll li ż-żewġ stadji tal-ipproċessar huma marbuta ma' xulxin u l-valur miżjud mhuwiex ikkonċentrat fi stadju partikolari tal-proċess ta' produzzjoni iżda huwa mifrux fuq il-proċess sħiħ ta' produzzjoni. Għal dawn ir-raġunijiet, il-pretensjoni ġiet rifjutata.

(53)

Uħud mill-partijiet interessati ddikjaraw li l-moduli u ċ-ċelloli għandhom swieq merkantili separati u għalhekk għandhom jitqiesu bħala prodotti differenti, sitwazzjoni murija wkoll mill-fatt li numru kbir ta' produtturi mhumiex integrati vertikalment.

(54)

Il-moduli u ċ-ċelloli ma jistgħux jitqiesu li huma prodotti separati li l-prezzijiet tagħhom ivarjaw biss skont il-fatturi tas-suq. Il-prezzijiet tagħhom huma strettament marbuta ma' xulxin u affettwati mill-prezz tal-polisiliċju. Bl-istess mod, kif ġie spjegat hawn fuq fil-premessa (49) ta' hawn fuq, il-prodott ikkonċernat huwa prodott fi proċess uniku wieħed ta' produzzjoni bi stadji differenti. Il-fatt li wħud mill-produtturi mhumiex integrati vertikalment huwa dovut biss għal deċiżjoni tan-negozju u l-ekonomiji tal-kobor u ma jmurx kontra din il-konklużjoni. Għal dawn ir-raġunijiet, dan l-argument kellu jiġi rifjutat.

(55)

Bosta partijiet interessati ddikjaraw li l-moduli u ċ-ċelloli jridu jitqiesu bħala prodotti differenti għaliex għandhom użi finali differenti u mhumiex interkambjabbli.

(56)

Kif intqal hawn fuq l-investigazzjoni wriet li l-produzzjoni taċ-ċelloli-moduli huwa proċess ta' produzzjoni uniku wieħed u għalhekk, il-kwistjoni ta' interkambjabbiltà bejn stadji differenti ta' proċess wieħed ta' produzzjoni mhijiex applikabbli. Barra minn hekk, il-moduli u ċ-ċelloli għandhom l-istess użu finali, jibdlu d-dawl tax-xemx f'elettriku, u għalhekk ma jistgħux jintużaw f'applikazzjonijiet oħrajn.

(57)

Parti interessata minnhom iddikjarat li l-moduli u ċ-ċelloli ma jaqsmux l-istess mezzi ta' distribuzzjoni u għalhekk ma għandhomx jitqiesu bħala prodott uniku wieħed. L-investigazzjoni wriet li l-moduli u ċ-ċelloli jistgħu jkunu distribwiti b'mezzi ta' distribuzzjoni differenti jew simili. Madankollu, il-kriterji ewlenin għad-definizzjoni ta' prodott waħdu huma l-istess karatteristiċi fiżiċi, kimiċi u tekniċi u użi finali. Wara li jiġu kkunsidrati l-premessi minn (47) sa (49) hawn fuq, huwa konkluż li, għalhekk, mezzi ta' distribuzzjoni differenti ma jitqiesux li huma element determinanti. Għaldaqstant, l-argument għandu jiġi rifjutat.

(58)

Kien iddikjarat li l-moduli u ċ-ċelloli jvarjaw b'mod sostanzjali f'termini ta' perċezzjoni tal-konsumatur u għalhekk, ma għandhomx jitqiesu bħala prodott wieħed waħdu.

(59)

Hekk ukoll bħal ma ntqal hawn fuq, il-kriterji ewlenin biex jiġi definit prodott uniku huma l-istess karatteristiċi fiżiċi, kimiċi u tekniċi u użi finali. Wara li jiġu kkunsidrati l-premessi minn (47) sa (49) hawn fuq, huwa konkluż li, għaldaqstant, il-perċezzjoni tal-konsumatur ma titqiesx li hija element determinanti. Għaldaqstant, l-argument għandu jiġi rifjutat.

(60)

Il-partijiet interessati jtennu li ċ-ċelloli u l-moduli mhumiex prodott uniku, u għalhekk għandhom jiġu vvalutati b'mod separat. Madankollu, b'differenza mill-wejfers, iċ-ċelloli u l-moduli jaqsmu l-istess proprjetà bażika, jiġifieri l-abbiltà li jiġġeneraw elettriku mid-dawl tax-xemx. Għaldaqstant, dawn l-argumenti ġew rifjutati.

(61)

Wara d-divulgazzjoni finali, esportatur minnhom argumenta li ċ-ċelloli waħedhom ma jistgħux jipproduċu elettriku. Allegatament, iridu jkunu integrati fil-moduli għal dan. Madankollu, is-soltu, kull ċellola waħedha għandha l-kapaċità li tiġġenera madwar 4W elettriku mid-dawl tax-xemx. Filwaqt li din l-enerġija jaf mhijiex biżżejjed għal ħafna mill-applikazzjonijiet li jeħtieġu assemblaġġ ta' bosta ċelloli f'moduli, dan ma jfissirx li ċellola waħedha ma għandiex diġà l-kapaċità li tiġġenera elettriku.

(62)

Wara d-divulgazzjoni finali, esportatur minnhom kompla jargumenta li ċ-ċelloli mhumiex sempliċiment tip ta' modulu ieħor, iżda prodott kompletament differenti. Ċellola hija l-komponent ewlieni ta' modulu. Bħala komponent ewlieni, ċellola żgur mhijiex “prodott kompletament differenti”, peress li l-moduli u ċ-ċelloli jaqsmu l-istess karatteristiċi bażiċi ta' ġenerazzjoni ta' elettriku mid-dawl tax-xemx, kif indikat fil-premessa (60) hawn fuq.

(63)

Barra minn hekk, l-istess parti argumentat li meta ntgħażlu l-kampjuni għall-produtturi tal-Unjoni u l-esportaturi Ċiniżi, id-differenza bejn iċ-ċelloli u l-moduli ttieħdet f'kunsiderazzjoni. Għalhekk, kellhom jiġu stabbiliti rati ta' dazju differenti għall-moduli u ċ-ċelloli. F'dan ir-rigward, huwa kkonfermat li d-differenza bejn il-moduli u ċ-ċelloli tabilħaqq ittieħdet f'kunsiderazzjoni meta ttieħed kampjun tal-produtturi tal-Unjoni u l-esportaturi Ċiniżi, kif indikat fil-premessi (10) u (14) għar-Regolament antidumping provviżorju. Madankollu, dan sar biss biex jiġi żgurat li l-kampjun huwa rappreżentattiv u ma jfissirx li ċ-ċelloli u l-moduli ma għandhomx jitqiesu bħala prodott uniku ikkonċernat, jew li għandhom jiġu stabbiliti rati ta' dazju separati għaċ-ċelloli u l-moduli. Tabilħaqq, sabiex jiġi żgurat li l-kampjun kien rappreżentattiv għat-tipi ta' prodotti kollha, kien importanti li ssir distinzjoni bejn ċelloli u moduli meta ntgħażel il-kampjun. Barra minn hekk, peress li kien hemm ċertu grad ta' inċertezza dwar il-kwistjoni ta' jekk iċ-ċelloli u l-moduli kellhomx jitqiesu li huma prodott wieħed jew żewġ prodotti separati, kien hemm bżonn li tiġi żgurata rappreżentattività għaż-żewġ eżiti possibbli.

(64)

Il-produtturi esportaturi ddikjaraw li l-fatt li l-impenn jimponi prezzijiet u volumi ta' importazzjoni minimi differenti għaċ-ċelloli u l-moduli allegatament jikkonferma li l-moduli u ċ-ċelloli huma prodotti għalihom li jeħtieġu żewġ investigazzjonijiet għalihom. Madankollu, il-prezzijiet ta' importazzjoni minimi differenti huma sempliċiment indikazzjoni li ċ-ċelloli u l-moduli huma gruppi differenti ta' tipi ta' prodotti li jinbiegħu bi prezzijiet differenti. Għaldaqstant, hemm bżonn li jiġu definiti l-prezzijiet differenti sabiex il-prezzijiet minimi ta' importazzjoni jsiru sinifikanti.

(65)

Barra minn hekk, il-fatt li ċ-ċelloli u l-moduli huma gruppi għalihom ta' tipi ta' prodotti mhuwiex relevanti minnu nnifsu għad-definizzjoni tal-prodott ikkonċernat. Għad-definizzjoni tal-prodott ikkonċernat, biżżejjed li l-prodotti jaqsmu l-istess karatteristiċi bażiċi u użi finali, li huwa l-każ għall-moduli u ċ-ċelloli kif deskritti fil-premessi (46) u (71) rispettivament.

(66)

Il-GTĊ argumenta li l-valutazzjoni ta' jekk iċ-ċelloli u l-moduli humiex prodott wieħed ikkonċernat ma tindirizzax għadd ta' kriterji definiti mill-Korp tal-Appell f'KE — Asbestos  (7). Dawn il-kriterji jintużaw għad-definizzjoni tal-“prodott simili”, mhux il-prodott ikkonċernat. Fi kliem ieħor, dawn il-kriterji jridu jintużaw biex jiddefinixxu l-prodott simili, pereżempju l-prodott simili prodott mill-Industrija tal-Unjoni, li mbagħad jitqabbel mal-prodott ikkonċernat esportat mill-produtturi esportaturi Ċiniżi. Għaldaqstant, dawn il-kriterji mhumiex pertinenti meta jiġi definit il-prodott ikkonċernat. Fi kwalunkwe każ, l-Istituzzjonijiet josservaw li l-applikazzjoni tal-kriterji użati f'KE — Asbestos għad-definizzjoni tal-prodott ikkonċernat f'dan il-każ ma jwassalx għal eżitu differenti. L-ewwel u t-tieni kriterju (proprjetajiet, għamla u kwalità rispettivament u utenti finali) huma l-istess bħall-kriterji proprjetajiet fiżiċi, kimiċi u tekniċi u utenti finali użati fil-premessi ta' qabel. It-tielet kriterju (gosti u drawwiet tal-konsumatur) mhuwiex utli wisq f'dan il-każ, peress li ċ-ċelloli huma l-komponent ewlieni tal-moduli; rigward ir-raba' kriterju, klassifikazzjoni tat-tariffa, huwa osservat li kemm iċ-ċelloli kif ukoll il-moduli jistgħu jiġu ddikjarati taħt l-intestatura doganali 8541 40 90, filwaqt li l-intestaturi doganali taħt l-intestatura 8501 huma għal ġeneraturi elettriċi inġenerali u mhux għal prodotti solari b'mod partikolari.

(67)

Partijiet interessati oħrajn jargumentaw li applikazzjoni oġġettiva tal-kriterji żviluppati mill-Qorti tal-Ġustizzja fil-kawżi ta' qabel (8) allegatament twassal għall-konklużjoni li l-moduli u ċ-ċelloli huma prodotti differenti. F'dan ir-rigward, huwa osservat li l-qorti indikat biss numru ta' kriterji li jistgħu jittieħdu f'kunsiderazzjoni ma hemm ebda obbligu li jintużaw il-kriterji kollha fil-każijiet kollha, peress li jista' jkun li mhux kollha kemm huma jkunu relevanti. Dawn il-kriterji ġew ivvalutati fil-premessi minn (27) sa (39) għar-Regolament antidumping provviżorju, fejn instab li numru ta' kriterji mhumiex relevanti f'dan il-każ. Fil-kawża Brosmann il-valutazzjoni dwar jekk tipi differenti ta' żraben kinux jappartjenu għall-“prodott ikkonċernat” saret ukoll fuq il-bażi ta' tliet kriterji biss li nstabu li kienu relevanti. Peress li l-partijiet interessati ma pprovdew ebda raġuni għaliex applikazzjoni oġġettiva tal-kriterji twassal għall-konklużjoni li ċ-ċelloli u l-moduli huma prodotti differenti, l-argument ma jistax jintlaqa'.

(68)

Barra minn hekk, huwa mfakkar li ċ-ċelloli u l-moduli għandhom l-istess użi finali bażiċi, jiġifieri jinbiegħu għall-integrazzjoni fis-sistemi solari PV. Il-prestazzjoni tal-moduli hija marbuta direttament mal-prestazzjoni taċ-ċelloli, kif indikat fil-premessa (28) tar-Regolament antidumping provviżorju.

(69)

Parti interessata minnhom argumentat li bl-esklużjoni tal-wejfers mill-ambitu tal-prodott, u minħabba l-ipproċessar sinifikanti involut biex isiru moduli miċ-ċelloli, l-argument li ċ-ċelloli u l-moduli għandhom l-istess użi finali għandu jiġi rifjutat ukoll. Huwa argumentat ukoll li l-valutazzjoni li l-moduli u ċ-ċelloli għandhom l-istess użi finali hija bbażata fuq is-suppożizzjoni li l-wejfers, il-moduli u ċ-ċelloli għandhom l-istess proċess ta' produzzjoni.

(70)

L-ewwel nett, il-konklużjoni li l-valutazzjoni li l-moduli u ċ-ċelloli għandhom l-istess użi finali hija bbażata fuq il-proċess ta' produzzjoni hija żbaljata. Filwaqt li tabilħaqq iż-żewġ dikjarazzjonijiet huma fl-istess premessa (36) għar-Regolament provviżorju, dan ma jfissirx li konklużjoni waħda hija bbażata fuq is-suppożizzjoni l-oħra. Il-frażi “barra minn hekk” li tissepara ż-żewġ dikjarazzjonijiet tagħmilha ċara li t-tieni dikjarazzjoni mhijiex ibbażata fuq l-ewwel waħda. Barra minn hekk, iż-żewġ dikjarazzjonijiet saru biex jindirizzaw kwistjonijiet separati taħt l-intestatura “L-użu finali u l-interskambjalità”. L-ewwel dikjarazzjoni dwar il-proċess ta' produzzjoni tindirizza l-interkambjabbiltà, filwaqt li t-tieni dikjarazzjoni tindirizza l-użu finali. Għalhekk, is-suppożizzjoni sottostanti li l-valutazzjoni li l-moduli u ċ-ċelloli għandhom l-istess użi finali hija bbażata fuq is-suppożizzjoni li l-wejfers, il-moduli u ċ-ċelloli għandhom l-istess proċess ta' produzzjoni hija żbaljata.

(71)

Rigward l-użu finali propju taċ-ċelloli u l-moduli, mhuwiex argumentat mill-partijiet interessati li l-moduli u ċ-ċelloli jinbiegħu għall-integrazzjoni f'sistemi solari PV. Għaldaqstant, il-konklużjoni li l-moduli u ċ-ċelloli għandhom l-istess użu finali hija kkonfermata.

(72)

Parti interessata minnhom iddikjarat li l-prodotti PV b'rita rqiqa għandhom ikunu inklużi fid-definizzjoni tal-prodott ikkonċernat, billi argumentat li jaqsmu l-istess karatteristiċi fiżiċi, kimiċi u tekniċi bażiċi u l-istess użi finali bażiċi.

(73)

Il-prodotti PV b'rita rqiqa huma esklużi b'mod ċar mid-definizzjoni tal-prodott (ara l-premessa (40) hawn fuq). Tabilħaqq, prodotti PV b'rita rqiqa għandhom karatteristiċi fiżiċi, kimiċi u tekniċi differenti meta mqabbla mal-prodott ikkonċernat. Huma prodotti permezz ta' proċess ta' produzzjoni differenti u mhux minn siliċju kristallin li huwa l-materja prima ewlenija għall-produzzjoni ta' moduli u ċelloli. Għandhom effiċjenza ta' konverżjoni inqas u output ta' wattage inqas u għalhekk mhumiex xierqa għall-istess tipi ta' applikazzjonijiet bħal dawk tal-prodott ikkonċernat. Għal dawn ir-raġunijiet, l-argumenti kellhom jiġu rifjutati.

(74)

Barra minn hekk, kien iddikjarat li ċ-ċelloli għandhom jitqiesu bħala prodotti alimentaturi nofshom lesti filwaqt li l-moduli huma prodotti finali, u għaldaqstant, ma għandhomx jitqiesu bħala prodott uniku wieħed.

(75)

Kif intqal hawn fuq, il-kriterji ewlenin għad-definizzjoni ta' prodott uniku huma l-istess karatteristiċi fiżiċi, kimiċi u tekniċi u użi finali. Wara li ġew ikkunsidrati l-premessi minn (47) sa (49) hawn fuq, huwa konkluż li għaldaqstant, id-differenza bejn prodotti nofshom lesti jew lesti ma titqiesx bħala element determinanti. Għaldaqstant, l-argument għandu jiġi rifjutat.

(76)

Parti interessata minnhom talbet l-esklużjoni ta' pannelli solari ddedikati biss għal iċċarġjar tal-batterija ta' 12V fuq il-bażi li għandhom użu finali differenti mill-moduli għall-kollegament mal-grilja minħabba li jiġġeneraw vultaġġ ħafna iktar baxx u għalhekk mhumiex xierqa għal kollegament mal-grilja.

(77)

Skont in-Notifika ta' Bidu, ċarġers solari li jikkonsistu f'inqas minn sitt ċelloli, huma portabbli u jfornu elettriku lil apparati jew li jiċċarġjaw batteriji huma esklużi mill-prodott investigat. Moduli ta' iktar minn sitt ċelloli ddedikati biss għall-iċċarġjar tal-batteriji għandhom l-istess karatteristiċi bażiċi u prestazzjoni bħall-moduli għall-kollegament mal-grilja. Jużaw ċirkwit miftuħ tal-vultaġġ li għandu vultaġġ inqas miċ-ċirkwit użat f'moduli għal kollegament mal-grilja. Minkejja din id-differenza, l-investigazzjoni kixfet li dan it-tip ta' modulu jista' jkun kollegat mal-grilja. Il-vultaġġ iktar baxx faċilment jista' jkun ikkumpensat minn żieda fid-daqs u/jew numru taċ-ċelloli. Għaldaqstant, moduli ddedikati għall-iċċarġjar ta' batteriji, u li jikkonsistu f'iktar minn sitt ċelloli, jaqgħu fi ħdan id-definizzjoni tal-prodott ikkonċernat.

(78)

Il-partijiet interessati ddikjaraw ukoll li d-definizzjoni ta' “ċarġers solari li jikkonsistu f'inqas minn sitt ċelloli” hija limitata wisq, u għandha tkun estiża għal prodotti b'funzjoni simili li mhumiex koperti minn din id-definizzjoni bħal prodotti b'daqs simili li jużaw numru ikbar ta' ċelloli iżgħar.

(79)

Barra minn hekk, il-partijiet interessati ddikjaraw li d-definizzjoni ta' “prodotti PV tas-siliċju li huma integrati b'mod permanenti fi prodotti elettriċi” hija limitata wisq, peress li l-prodott elettriku komplut biss huwa eskluż, filwaqt li l-komponenti solari għall-integrazzjoni fil-prodotti elettriċi mhux bilfors li huma esklużi.

(80)

Tabilħaqq, analiżi tal-argumenti mressqa mid-diversi partijiet interessati wriet li jkun iktar xieraq li tiġi definita l-esklużjoni tat-tali prodotti fuq il-bażi ta' standards tekniċi minflok in-numru ta' ċelloli. B'mod partikolari, kien stabbilit li d-definizzjonijiet tal-istandard “IEC 61730-1 Klassi ta' Applikazzjoni Ċ” tiddefinixxi aħjar il-prodotti li għandhom ikunu esklużi mill-ambitu tal-miżuri.

(81)

Wara d-divulgazzjoni definittiva, daħlu kummenti dwar l-esklużjoni bbażata fuq l-istandard internazzjonali msemmi hawn fuq. Kien argumentat li minflok ma ssir referenza għall-istandard, ikun iktar xieraq li tiġi definita l-esklużjoni fuq il-bażi tal-vultaġġ tal-output u l-output tal-enerġija bħala “moduli jew pannelli b'vultaġġ tal-output li ma jaqbiżx il-50 V DC u output tal-enerġija li ma jaqbiżx il-50 W biss għall-użu dirett bħala ċarġers tal-batteriji f'sistemi bl-istess karatteristiċi tal-vultaġġ u l-enerġija”. Din id-dikjarazzjoni tista' tkun aċċettata, u l-esklużjoni hija finalment iddeterminata skont din id-definizzjoni.

(82)

Parti interessata oħra ddikjarat li l-moduli solari integrati fuq il-bjut għandhom ikunu esklużi mill-ambitu tal-prodott tal-investigazzjoni, peress li jħalltu l-funzjonalità ta' modulu solari ma' dik ta' maduma tas-saqaf jew lavanja. B'hekk, mhumiex direttament interkambjabbli ma' modulu solari standard.

(83)

Madankollu, l-investigazzjoni wriet li kemm il-moduli standard kif ukoll il-modulu solari integrat fuq il-bejt iridu jikkonformaw mal-istess standards elettriċi. U filwaqt li l-modulu solari integrat fuq il-bejt mhux sempliċiment jinbidel ma' modulu standard, jista' jinbidel ma' modulu standard flimkien ma' madum tas-saqaf jew lavanja. Għaldaqstant, dawn il-prodotti għandhom l-istess proprjetà teknika bażika ta' ġenerazzjoni tal-elettriku mid-dawl tax-xemx. Il-funzjonalità miżjuda (li f'każ ieħor tkun ipprovduta minn materjal tas-soqfa) ma titqiesx sostanzjali u ma tiġġustifikax esklużjoni tal-moduli solari integrati fuq il-bjut mill-ambitu tal-prodott.

(84)

Wara d-divulgazzjoni definittiva, l-istess parti interessata argumentat li n-nuqqas ta' interkambjabbiltà doppja bejn moduli solari integrati fuq il-bjut u moduli solari standard hija indikazzjoni li l-moduli solari integrati fuq il-bjut għandhom ikunu esklużi mill-ambitu tal-miżuri, b'referenza għall-kawża footware  (9) inġenerali u l-ilbies atletiku għar-riġlejn b'teknoloġija speċjali “STAF” b'mod partikolari. Madankollu, ir-raġunijiet għall-esklużjoni ta' STAF kienu bosta, u n-nuqqas ta' interkambjabbiltà doppja waħdu ma tqiesx bħala raġuni valida biżżejjed mill-Qorti Ġenerali fil-kawża Brosmann  (10), xi ħaġa li kkonfermat li prodotti ferm differenti bħal żraben formali u żraben tal-ħajkijiet tabilħaqq jistgħu jitqiesu bħala prodott ikkonċernat f'investigazzjoni antidumping waħda minkejja d-differenzi bejniethom.

(85)

Barra minn hekk, il-parti interessata argumentat li n-nuqqas ta' produzzjoni fl-UE u l-fatt li l-parti interessata għandha drittijiet ta' proprjetà intellettwali allegatament jikkonfermaw li moduli solari integrati fuq il-bjut huma innovattivi u differenti minn kull prodott ieħor. Madankollu, b'referenza mill-ġdid għall-kawża footwear imsemmija mill-parti interessata, fi Brosmann il-Qorti Ġenerali ddikjarat li “n-nuqqas ta' produzzjoni Komunitarja ta' dan it-tip ta' lbies għar-riġlejn u fuq l-eżistenza ta' privattiva, għandu jiġi kkonstatat li dawn ma humiex determinanti.” (11). B'hekk, ilbies għar-riġlejn b'teknoloġija bil-privattiva tqies bħala prodott ikkonċernat f'dak il-każ.

(86)

Il-parti interessata argumentat ukoll li moduli solari integrati fuq il-bjut għandhom ikunu esklużi mid-definizzjoni tal-prodott ikkonċernat, peress li jinbiegħu bi prezzijiet sostanzjalment ogħla mill-moduli standard. Barra minn hekk, fil-każ tal-footwear STAF ta' aktar minn ċertu prezz ġie eskluż mid-definizzjoni tal-prodott ikkonċernat. F'dan ir-rigward, huwa osservat li modulu solari integrati fuq il-bejt ma jgħaqqadx il-funzjonalità ta' modulu solari u madum tas-soqfa jew lavanja, kif indikat fil-premessa (83). Għalhekk, paragun dirett tal-prezzijiet mhuwiex sinifikanti, peress li l-funzjonalità miżjuda twassal b'mod naturali għal prezzijiet ogħla.

(87)

Bħala tweġiba għal dan l-argument, il-parti interessata argumentat li fuq il-bażi ta' dan l-argument, kien ikun impossibbli li jissemmew d-differenzi fil-prezzijiet bħala indikatur addizzjonali li jiġġustifika l-esklużjoni mill-ambitu tal-prodott. Madankollu, din l-interpretazzjoni timraħ wisq. Dak li ntqal fil-premessa ta' qabel jistipula sempliċiment li f'dan il-każ partikolari fejn il-moduli integrati fuq il-bjut jgħaqqdu l-funzjonalità tal-prodott ikkonċernat flimkien ma' prodott ieħor (f'dan il-każ madum tas-soqfa jew lavanja), il-prezz ovvjament mhuwiex sinifikanti. Dan bl-ebda mod ma jfisser li f'każijiet oħrajn id-differenza fil-prezz ma tistax tkun indikatur utli biex jiġi stabbilit jekk prodott għandux ikun eskluż mid-definizzjoni tal-prodott ikkonċernat.

(88)

Finalment, il-parti interessata argumentat li l-fornitur tagħha ta' moduli solari integrati fuq il-bjut għandu jingħata aċċess għall-impenn tal-prezz minimu. Madankollu, jidher li l-esportatur Ċiniż ikkonċernat ma kkooperax fl-investigazzjoni, u bħala parti li ma kkooperatx, mhijiex eliġibbli li tieħu sehem fl-impenn. Għaldaqstant, din it-talba ma tistax tintlaqa'.

(89)

Parti interessata minnhom iddikjarat li ma kien hemm ebda produzzjoni ta' ċelloli monokristallini fl-Unjoni, u li l-esportazzjonijiet tagħha ta' ċelloli monokristallini ma kinux qegħdin jikkompetu mal-industrija tal-UE. Madankollu, l-investigazzjoni wriet li tabilħaqq kien hemm produzzjoni ta' ċelloli monokristallini fl-Unjoni. Għalhekk dan l-argument huwa rifjutat. Għaldaqstant, dan l-argument ġie rifjutat. Xorta waħda, fi Brosmann il-Qorti Ġenerali ddeċidiet li n-nuqqas ta' produzzjoni fil-Komunità ta' tip ta' prodott partikolari mhuwiex deċiżiv.

(90)

Uħud mill-partijiet interessati argumentaw li l-estensjoni tal-ambitu tal-investigazzjoni għal prodotti “kkunsinjati mir-”RPĊ ma kinitx iġġustifikata, filwaqt li l-każ inbeda biss kontra prodotti li joriġinaw mir-RPĊ.

(91)

Madankollu, prodotti kkunsinjati mir-RPĊ diġà kienu koperti fl-istadju tal-bidu. Fil-punt 5 tan-Notifika ta' Bidu, huwa ddikjarat li l-“kumpaniji li jesportaw il-prodott investigat mir-Repubblika Popolari taċ-Ċina iżda li jikkunsidraw li parti minn dawk l-esportazzjonijiet jew saħansitra kollha ma għandhomx oriġini doganali tagħhom fir-Repubblika Popolari taċ-Ċina, huma mistiedna biex jippreżentaw ruħhom fl-investigazzjoni u biex ifornu l-informazzjoni kollha rilevanti”. Għaldaqstant, huwa ċar li l-kumpaniji kollha li jikkunsinjaw prodotti mir-RPĊ kellhom l-opportunità li jikkooperaw f'din l-investigazzjoni. Barra minn hekk, peress li l-prodott investigat spiss jinkorpora komponenti u partijiet minn pajjiżi differenti, fil-punt 5 tan-Notifika ta' Bidu tħabbar ukoll li “jistgħu jiġu adottati dispożizzjonijiet speċjali” biex tiġi indirizzata din il-kwistjoni.

(92)

Għaldaqstant, huwa meqjus li l-operaturi ekonomiċi kollha affettwati kienu informati kif suppost bil-possibbiltà li jistgħu jiġu adottati dispożizzjonijiet speċjali fir-rigward tal-prodotti kkonsinjati mir-RPĊ, jekk ikunu xierqa, u kienu mistiedna jikkooperaw fl-investigazzjoni. B'hekk, l-ambitu tal-investigazzjoni ma kienx estiż għal prodotti “kkunsinjati mir-RPĊ”, peress li dawn kienu koperti mill-bidu nett.

(93)

Wara d-divulgazzjoni, il-partijiet interessati argumentaw li indipendentement mid-dispożizzjonijiet fin-Notifika ta' Bidu msemmija fil-premessa (91) hawn fuq, l-investigazzjoni kienet limitata għal prodotti li joriġinaw mir-RPĊ u ma vvalutatx l-impatt tal-prodotti kkunsinjati mir-RPĊ.

(94)

F'dan ir-rigward, huwa osservat li l-passi ta' wara ttieħdu sabiex jiġi żgurat li l-prodotti kollha kkunsinjati mir-RPĊ ġew ivvalutati matul l-investigazzjoni, u mhux biss prodotti li oriġinaw fir-RPĊ:

(95)

Fuq din il-bażi, huwa konkluż li l-investigazzjoni kopriet il-prodotti kollha li oriġinaw fir-RPĊ jew ikkunsinjati minnha, u li s-sejbiet tal-investigazzjoni, inklużi s-sussidju u d-dannu, ikopru l-prodotti kollha li joriġinaw jew li huma kkunsinjati mir-RPĊ.

(96)

Wara d-divulgazzjoni finali, il-partijiet interessati argumentaw li l-ilment kien fih bis evidenza prima facie dwar importazzjonijiet ta' pannelli solari li joriġinaw fir-RPĊ, mhux prodotti kkunsinjati mir-RPĊ. F'dan ir-rigward, ta' min jiċċara li l-ilment tabilħaqq kopra prodotti “mir-RPĊ”, li jista' jidher mill-paġna tal-qoxra sottomessa mill-applikant li fiha t-timbru. Qabel din il-paġna, hemm paġna oħra fuq il-fajl li tabilħaqq tuża l-kliem “li joriġina fir-Repubblika Popolari taċ-Ċina”. Iżda dan il-każ ma kienx parti mid-dokument sottomess mill-ilmentatur, iżda żdied bħala paġna tal-qoxra mis-Servizzi tal-Kummissjoni, billi użat isem l-investigazzjoni minflok ma tenniet it-titlu tal-ilment. Għaldaqstant, jitqies li l-ilment kopra l-prodotti kollha mir-RPĊ, kemm jekk joriġinaw mir-RPĊ jew le.

(97)

Il-produtturi esportaturi Ċiniżi qablu wkoll li l-produtturi esportaturi f'pajjiżi terzi ma jistgħux ikunu raġonevolment mistennija jkunu jafu li l-prodotti tagħhom jistgħu jkunu fil-mira tal-investigazzjoni wkoll. F'dan ir-rigward, huwa osservat li l-miżuri ma japplikawx għal prodotti li huma fi transitu skont it-tifsira tal-Artikolu V GATT. Għalhekk, il-produtturi esportaturi li ma għandhomx operazzjonijiet fir-RPĊ mhumiex affettwati mill-miżuri. Barra minn hekk, ebda produttur esportatur fil-pajjiżi terzi ma qajjem il-kwistjoni li l-prodotti li jesporta huma soġġetti għall-miżuri.

(98)

L-istess produtturi esportaturi argumentaw li l-produtturi esportaturi f'pajjiżi terzi ma ntalbux jgħarrfu bil-preżenza tagħhom, u ma ngħatawx l-opportunità li juru li l-prodotti tagħhom mhumiex sussidjati. L-Istituzzjonijiet iqisu li dawk il-produtturi esportaturi mingħajr ebda operazzjoni fir-RPĊ mhumiex affettwati mill-miżuri, peress li l-prodotti tagħhom, jekk ikkunsinjati mir-RPĊ, kienu jkunu fi transitu. Il-produtturi esportaturi kollha l-oħrajn kienu mgħarrfin permezz tan-Notifika ta' Bidu li l-operazzjonijiet tagħhom huma parti mill-investigazzjoni.

(99)

Fid-dawl ta' dak li ntqal hawn fuq, l-ambitu tal-prodott huwa definit b'mod definittiv bħala moduli jew pannelli PV tas-siliċju kristallin u ċ-ċelloli tat-tip użat f'moduli jew pannelli PV tas-siliċju kristallin, li joriġinaw minn jew li huma kkunsinnati mir-Repubblika Popolari taċ-Ċina, sakemm ma jkunux fi tranitu fis-sens tal-Artikolu V GATT. Iċ-ċelloli għandhom ħxuna li ma taqbiżx l-400 mikrometru. Bħalissa dan il-prodott jaqa' taħt il-kodiċijiet NM ex8501 31 00, ex8501 32 00, ex8501 33 00, ex8501 34 00, ex8501 61 20, ex8501 61 80, ex8501 62 00, ex8501 63 00, ex8501 64 00 u ex8541 40 90.

(100)

It-tipi ta' prodotti li ġejjin huma esklużi mid-definizzjoni tal-prodott ikkonċernat:

(101)

L-ilmentatur allega li r-RPĊ qiegħda tissussidja bil-qawwa l-industrija fotovoltajka tagħha (“industrija PV”) u rrefera għal numru ta' dokumenti ta' politika u ppjanar kif ukoll leġiżlazzjoni li huma l-bażi għall-appoġġ mill-istat fis-settur. Il-Kummissjoni rrevediet u analizzat id-dokumenti msemmija fl-ilment kif ukoll dokumenti addizzjonali sottomessi mill-GTĊ u l-produtturi esportaturi fil-kampjun matul l-investigazzjoni u sabet li, tabilħaqq, ħafna minnhom juru li l-industrija PV fir-RPĊ tirċievi trattament preferenzjali f'bosta oqsma.

(102)

Il-GTĊ inkluda l-industrija PV fost l-industriji “strateġiċi” fit-12-il Pjan ta' Ħames Snin (12). Il-GTĊ ħareġ ukoll pjan speċifiku għall-industrija fotovoltajka solari (subordinat għat-12-il Pjan ta' Ħames Snin ewlieni), jiġifieri t-12-il Pjan ta' Ħames Snin għall-Industrija Fotovoltajka Solari. Fil-pjan tiegħu, il-GTĊ esprima l-appoġġ tiegħu għal “impriżi superjuri” (13) u “impriżi ewlenin” (14), u impenja ruħu li “jippromwovi l-implimentazzjoni ta' bosta politiki li jappoġġaw l-industrija fotovoltajka” (15), u li “jsawwar tħejjija ġenerali ta' politiki ta' appoġġ fuq l-industrija, il-finanzi, it-taxxa …” (16).

Id-Deċiżjoni Nru 40 tal-Kunsill tal-Istat tissuġġerixxi li l-GTĊ se jappoġġa b'mod attiv l-iżvilupp tal-industrija tal-enerġija l-ġdida u jħaffef l-iżvilupp tal-enerġija solari (17), tordna lill-istituzzjonijiet finanzjarji kollha sabiex jipprovdu appoġġ ta' kreditu biss lil proġetti mħeġġa (il-kategorija li fiha jappartjenu l-proġetti PV) u twiegħed l-implimentazzjoni ta' “politiki preferenzjali oħrajn fuq il-proġetti mħeġġa” (18). Deċiżjoni oħra tal-Kunsill tal-Istat tal-10 ta' Ottubru 2010 titħaddet dwar l-espansjoni tal-“intensità tal-appoġġ tal-politika fiskali u finanzjarja”, billi tħeġġeġ lill-istituzzjonijiet finanzjarji ħalli “jespandu l-appoġġ ta' kreditu” u twiegħed li “tagħmel użu mill-politiki fiskali preferenzjali bħal kumpens għar-riskju” (19) għal industriji strateġiċi ġodda, kategorija li fiha tappartjeni l-industrija PV solari. Il-Pjan Nazzjonali għall-Iżvilupp Xjentifiku u Teknoloġiku fit-Terminu Medju u Twil (2006 — 2020) iwiegħed li “jagħti l-ewwel prijorità lill-finanzjament tal-politiki”, “iħeġġeġ lill-istituzzjonijiet finanzjarji sabiex jagħtu appoġġ ta' kreditu preferenzjali lil proġetti ta' industrijalizzazzjoni nazzjonali kbar fix-xjenza u t-teknoloġija”, li “Jħeġġeġ lill-istituzzjonijiet finanzjarji sabiex itejbu u jsaħħu s-servizzi finanzjarji lil impriżi ta' teknoloġija avvanzata” u li “jimplimenta l-politiki ta' taxxa preferenzjali biex jippromwovi l-iżvilupp ta' impriżi ta' teknoloġija avvanzata” (20).

Anki l-Liġi tar-RPĊ dwar il-Progress Xjentifiku u Teknoloġiku telenka numru ta' miżuri għall-appoġġ tal-industriji strateġiċi inkluża l-industrija PV solari. Fost l-oħrajn, turi li l-Istat iħeġġeġ u jiggwida lill-istituzzjonijiet finanzjarji sabiex jappoġġaw l-iżvilupp ta' industriji ta' teknoloġija għolja u ġdida billi jagħtu self (21), tordna lill-istituzzjonijiet finanzjarji orjentati lejn il-politki sabiex jagħtu prijorità għall-iżvilupp ta' industriji tat-teknoloġija għolja u ġdida billi joffru servizzi finanzjarji (22), tipprovdi għal “imgħax skontat u garanzija għas-self” riċevuti minn ċerti impriżi u “għajnuna speċjali” mill-istituzzjonijiet finanzjarji orjentati lejn il-politiki għal proġetti mħeġġa mill-Istat (23). L-applikazzjonijiet prattiċi ta' dawn il-miżuri huma spjegati hawn isfel.

(103)

Kemm il-GTĊ kif ukoll il-produtturi esportaturi Ċiniżi fil-kampjun ippreżentaw tweġibiet għall-kwestjonarji u aċċettaw żjarat fuq il-post (24) sabiex jiġu vverifikati t-tweġibiet.

(104)

Fir-rigward tal-GTĊ, wara l-analiżi tat-tweġiba għall-kwestjonarju, il-Kummissjoni bagħtet ittra ta' defiċenza u verifika minn qabel, segwita minn korrispondenza sussegwenti dwar l-aġenda taż-żjara ta' verifika. Il-Kummissjoni tat lill-GTĊ ħafna żmien għat-tħejjija u s-sottomissjoni tar-rappreżentazzjonijiet tiegħu kull meta dan intalab u kien iġġustifikat. Tabilħaqq, ingħatat estensjoni sostanzjali tad-data ta' skadenza lill-GTĊ, jiġifieri estensjoni ta' 30 jum għat-tweġiba għall-kwestjonarju li rriżultat f'data ta' skadenza eventwali ta' 69 jum għas-sottomissjoni tat-tweġiba għall-kwestjonarju u l-Kummissjoni tat lill-GTĊ 25 jum biex iwieġeb għall-ittra ta' defiċenza. Għalhekk, b'mod ġenerali, il-GTĊ kellu iktar minn tliet xhur biex jipprovdi l-informazzjoni neċessarja mitluba mill-Kummissjoni.

(105)

Matul il-verifika fuq il-post fil-Ministeru tal-Kummerċ Ċiniż f'Beijing u erba' istituzzjonijiet finanzjarji (Iċ-China Development Bank, l-Export Import Bank of China, il-Huaxia Bank u SINOSURE) il-Kummissjoni impenjat ruħha sabiex tivverifika l-informazzjoni pprovduta fuq il-bażi tad-dokumenti ta' sostenn li ntużawx biex titħejja t-tweġiba tal-GTĊ, b'konformità mad-dispożizzjonijiet tal-Artikoli 11 u 26 tar-Regolament bażiku. Wara dan, il-Kummissjoni waslet għall-konklużjoni preliminari li n-nuqqas ta' informazzjoni u dokumenti ta' sostenn disponibbli mill-GTĊ ma ppermettiex sabiex issir verifika xierqa tat-tweġiba għall-kwestjonarju. Barra minn hekk, ċerta informazzjoni ma kinitx sottomessa affattu għad li ntalbet b'mod speċifiku u ċerti mistoqsijiet sempliċiment ma tweġbux. Konsegwentement, il-GTĊ kien mgħarraf bil-konsegwenzi tan-nuqqas ta' kooperazzjoni b'konformità mal-Artikolu 28(1) u (6) tar-Regolament bażiku.

(106)

Il-GTĊ iddikjara wkoll li l-Kummissjoni kienet qiegħda timponi piż mhux raġonevoli fuq il-GTĊ u li talbet informazzjoni irrilevanti u mhux neċessarja fil-kwestjonarju u l-ittra ta' defiċenza sussegwenti.

(107)

Fir-rigward tal-informazzjoni mitluba, huwa osservat li l-Kummissjoni talbet biss informazzjoni dwar allegazzjonijiet fl-ilment li hija qieset neċessarja sabiex tasal għal sejba rappreżentattiva u baqgħet konsistenti fit-talbiet tagħha billi talbet l-istess dejta u informazzjoni matul il-proċess ta' investigazzjoni u talbet lill-GTĊ jispjega l-informazzjoni sottomessa u l-impimentazzjoni tiegħu għall-iskemi investigati. Fi kliem ieħor, il-Kummissjoni talbet biss informazzjoni li kienet neċessarja sabiex jiġu vvalutati l-eżistenza u l-livell tas-sussidju disponibbli għall-prodott ikkonċernat skont l-iskemi ta' sussidji allegati fl-ilment.

(108)

Kif diġà ntqal fil-premessa (105) hawn fuq, wara ż-żjarat ta' verifika fuq il-post, fit-23 ta' Mejju 2013, il-Kummissjoni nnotifikat lill-GTĊ li kienet qiegħda tikkunsidra l-applikazzjoni tal-fatti disponibbli b'konformità mal-Artikolu 28 tar-Regolament bażiku. Il-Kummissjoni bagħtet din l-ittra, peress li kienet waslet għall-konklużjoni preliminari li n-nuqqas ta' informazzjoni u evidenza ta' sostenn mill-GTĊ ma kienx jippermetti li ssir verifika xierqa tat-tweġiba għall-kwestjonarju antisussidji, ittra ta' defiċenza u sottomissjonijiet oħrajn li saru mill-GTĊ matul il-proċediment inkwistjoni. Barra minn hekk, fuq il-post instab li ċerta informazzjoni tneħħiet fit-tweġiba għall-kwestjonarju u sottomissjonijiet sussegwenti mill-GTĊ, għad li din intalbet b'mod speċifiku mill-Kummissjoni. Barra minn hekk, ċerti mistoqsijiet sempliċiment ma tweġbux. L-applikazzjoni potenzjali tal-fatti disponibbli kienet tikkonċerna l-pjanijiet tal-gvern, proġetti, diversi dokumenti ta' leġiżlazzjoni u oħrajn; Self ta' politiki preferenzjali, finanzjament, garanziji u assigurazzjoni oħrajn; ċirkulari tal-PBOC; verifiki fil-banek; Assigurazzjoni ta' kreditu għall-esportazzjoni u verifikazzjoni ta' Sinosure; il-programm ta' Dimostrazzjoni Golden Sun; programmi ta' tnaqqis u eżenzjoni mit-taxxa diretta; programmi ta' taxxa indiretta u tariffi ta' importazzjoni; forniment ta' inputs b'remunerazzjoni inqas minn dik adegwata: polisiliċju, estrużjonijiet tal-aluminju u ħġieġ; u l-forniment tad-Drittijiet ta' Użu tal-Art

(109)

Fl-ittra tiegħu tat-3 ta' Ġunju 2013 il-GTĊ oġġezzjona l-intenzjoni preliminari tal-Kummissjoni li tapplika d-dispożizzjonijiet tal-Artikolu 28 tar-Regolament bażiku, billi rraġuna li l-kundizzjonijiet meħtieġa biex titwarrab l-informazzjoni sottomessa jew anki sabiex “jimtela l-vojt fl-informazzjoni” ma ntlaħqux f'dan il-każ.

(110)

Il-GTĊ ddikjara li “dubji” dwar il-preċiżjoni tal-informazzjoni, li tfeġġ biss mill-fatt li l-informazzjoni sottomessa ma tistax tkun verifikata bis-sodisfazzjoni “sħiħa” tal-Kummissjoni, ma għandhomx iwasslu sabiex tkun injorata dik l-informazzjoni. Il-Kummissjoni ma taqbilx ma' din id-dikjarazzjoni peress li ma tirrappreżentax ir-realtà. Tabilħaqq, il-Kummissjoni ma “injoratx” xi informazzjoni fuq l-unika bażi li ma setgħetx tivverifikaha matul iż-żjara ta' verifikazzjoni fuq il-post. Madankollu, jekk l-informazzjoni u l-ispjegazzjoni mogħtija mill-GTĊ instabu li huma kontradittorji u/jew inkompluti meta mqabbla ma' informazzjoni oħra għad-dispożizzjoni tal-Kummissjoni u, fl-istess ħin, ma kienx possibbli li din tiġi vverifikata matul iż-żjara ta' verifika fuq il-post, il-Kummissjoni ma setgħetx tieħu t-tali informazzjoni bil-valur nominali tagħha. Ma' kull biċċa informazzjoni huwa mehmuż piż xieraq skont il-grad ta' nuqqas ta' kooperazzjoni mill-GTĊ. Huwa osservat ukoll li l-Kummissjoni ma kellhiex problema bil-format li bih kienet ipprovduta din l-informazzjoni, hekk kif allega l-GTĊ, iżda bl-impreċiżjoni u/jew inkompletezza tagħha.

(111)

Il-GTĊ iddikjara wkoll li partijiet mill-informazzjoni mitluba mill-Kummissjoni kienu jinvolvu piż tali li l-GTĊ ma kellux il-ħila prattika li jipprovdiha. F'dan ir-rigward huwa osservat li l-Kummissjoni talbet biss informazzjoni li kienet neċessarja biex jiġu verifikati l-allegazzjonijiet li saru mill-ilmentatur (u appoġġati minn evidenza prima facie) u tat lill-GTĊ ħafna żmien u ċans sabiex jissottometti t-tali informazzjoni. Barra minn hekk, il-Kummissjoni hija ferm konxja mill-fatt li n-numru sinifikanti ta' allegazzjonijiet dettaljati tal-ilmentatur f'dak il-każ kien jobbligaha titlob ammont sostanzjali ta' informazzjoni mill-GTĊ. Madankollu, kif spjegat hawn fuq (il-premessi minn (104) sa (107)), l-informazzjoni mfittxija ma kinitx eċċessiva u ngħata żmien xieraq sabiex tiġi pprovduta.

(112)

Barra minn hekk, il-GTĊ indika d-distinzjoni bejn li tinjora l-informazzjoni sottomessa u li tissupplimenta l-informazzjoni riċevuta b'informazzjoni li fil-fatt huma fir-rekords. Filwaqt li l-Kummissjoni hija ferm konxja b'din id-distinzjoni u taġixxi b'konformità mad-dispożizzjonijiet rilevanti tal-Artikolu 28 tar-Regolament bażiku, tixtieq tindika li meta l-informazzjoni sottomessa tkun tikkontradixxi informazzjoni oħra għad-dispożizzjoni tal-Kummissjoni dwar l-istess suġġett, ma jkunx possibbli li din l-informazzjoni tkun supplimentata. F'dawn l-okkażjonijiet (pereżempju informazzjoni sottomessa dwar is-sjieda ta' banek), il-Kummissjoni kellha tiddeċiedi liema informazzjoni hija l-iktar waħda kredibbli. Meta għamlet dan, il-Kummissjoni żgurat li l-użu tal-fatti disponibbli mhuwiex punittiv u huwa bbażat fuq fatti li effettivament huma disponibbli.

(113)

Il-GTĊ iddikjara li l-Kummissjoni ma kellha ebda bażi fuq xiex tikkunsidra lill-GTĊ bħala mhux kooperattiv f'dan il-każ peress li la injora u lanqas ma fehem b'mod żbaljat l-obbligu tiegħu li jqis il-“ħila prattika” tal-GTĊ biex iwieġeb għad-domanda tagħha. Skont il-GTĊ, l-investigazzjoni inġenerali kienet diffiċli żżejjed tant li l-kooperazzjoni inġenerali saret impossibbli, u l-Kummissjoni bħala awtorità investigattiva baqgħet tirrifjuta milli taħdem mal-GTĊ sabiex tnaqqas dawn id-diffikultajiet. Din id-dikjarazzjoni hija miżinterpretazzjoni ċara tal-fatti. Il-Kummissjoni, sabiex tissodisfa l-obbligi ġuridiċi tagħha wara r-riċevuta ta' lment dokumentat kif xieraq u fl-istess ħin tirrispetta l-ġurisprudenza rilevanti tad-WTO, talbet mingħand il-GTĊ biss dik l-informazzjoni neċessarja biex tivverifika u tivvaluta l-allegazzjonijiet fl-ilment appoġġat minn evidenza suffiċjenti. Il-Kummissjoni offriet assistenza lill-GTĊ fl-ittra ta' spjegazzjoni tagħha mal-kwestjonarju kif ukoll fil-kwestjonarju stess. Anki fl-ittra ta' defiċenza, il-GTĊ kien mistieden jikkuntattja lill-Kummissjoni jekk ikollu xi mistoqsija dwar l-informazzjoni mitluba. Il-Kummissjoni tat ukoll estensjonijiet eċċezzjonalment twal fid-data ta' skadenza sabiex tiġi sottomessa l-informazzjoni (ara l-premessa (104) hawn fuq). Barra minn hekk, f'din l-investigazzjoni, il-Kummissjoni talbet għal informazzjoni speċifika għat-tranżazzjonijiet mill-GTĊ biss fir-rigward tal-esportaturi fil-kampjun, mhux il-produtturi tal-pannelli solari kollha fiċ-Ċina, u b'hekk naqqset il-volum potenzjali ta' informazzjoni meħtieġa bil-bosta. Il-Kummissjoni tosserva li l-GTĊ jidher li qiegħed iħallat l-argumenti dwar il-ħila prattika tiegħu biex jipprovdi d-dejta ma' kwistjonijiet oħrajn.

Pereżempju, meta ddiskuta t-talba allegatament eċċessiva tal-Kummissjoni għal informazzjoni dwar banek u istituzzjonijiet finanzjarji, jibbaża l-argument tiegħu l-iktar fuq l-insuffiċjenza allegata tal-ilment, billi ddikjara li huwa bbażat fuq “determinazzjonijiet illegali” fil-kawża Karta Fina Miksija. Għaldaqstant, l-ilment tal-GTĊ donnu huwa relatat mal-kwalità tal-evidenza għall-bidu, u mhux mal-ħila prattika tiegħu li jipprovdi din l-informazzjoni. Tabilħaqq, fl-ittra tiegħu tat-3 ta' Ġunju 2013 il-GTĊ tenna d-dikjarazzjoni tiegħu mis-sottomissjonijiet ta' qabel li t-tnedija ta' ħafna mill-programmi ma kinitx tissodisfa l-limitu evidenzjarju tal-Artikolu 11.2 tal-Ftehim tad-WTO dwar l-SCM u li bit-tnedija ta' dawn il-programmi, il-Kummissjoni kisret l-Artikolu 11.3 tal-Ftehim tad-WTO dwar l-SCM. Il-Kummissjoni diġà wieġbet għal dawn id-dikjarazzjonijiet f'ittra u Memorandum lill-GTĊ u peress li ma saret l-ebda dikjarazzjoni oħra fl-ittra tat-3 ta' Ġunju 2013 ma hemmx bżonn li jerġgħu jiġu indirizzati l-istess dikjarazzjonijiet għat-tieni darba f'dan ir-Regolament.

(114)

Il-GTĊ iddikjara wkoll li l-Kummissjoni ma tatx lill-GTĊ biżżejjed żmien biex ilesti l-kwestjonarju. Dan huwa sempliċiment żbaljat. Kif spjegat fil-premessa (104) hawn fuq, il-Kummissjoni tat lill-GTĊ estensjonijiet sostanzjali fid-dati ta' skadenza, billi pprovdiet lill-GTĊ bi żmien massimu possibbli bla ma jitħalla impatt negattiv sostanzjali fuq it-tlestija fil-ħin tal-każ. Iż-żmien mogħti għat-tlestija tal-kwestjonarju u t-tweġiba għall-ittra ta' defiċenza kien sostanzjalment iktar miż-żmien meħtieġ mill-Artikolu 11(2) tar-Regolament bażiku.

(115)

Il-GTĊ iddikjara li l-Kummissjoni injorat it-talba tiegħu għal għajnuna fid-determinazzjoni tal-ħtieġa relattiva tat-tweġibiet tal-kwestjonarju sabiex jiġu evitati determinazzjonijiet tal-fatti disponibbli. Fis-sottomissjoni tiegħu rrefera għat-talba tiegħu lill-Kummissjoni sabiex tispjega l-iskop ta' informazzjoni partikolari mitluba u għal liema determinazzjonijiet fattwali twassal, sabiex “jiżgura li jkun jista' jikkoopera fl-aħjar ħila prattika tiegħu filwaqt li fl-istess ħin jipprovdi l-iktar informazzjoni essenzjali”. Ovvjament, il-Kummissjoni ma setgħetx tkun taf minn qabel ma kienet ipprovduta għal liema konklużjonijiet ser twassal l-informazzjoni propja. Il-GTĊ jiddikjara wkoll li l-Kummissjoni strutturat il-kwestjonarju sabiex tagħmlu “funzjonalment impossibbli” li jitlesta u l-Kummissjoni għamlet “mistoqsijiet bla skop ċar.” Il-Kummissjoni tiċħad kategorikament dawn l-allegazzjonijiet. Kif spjegat hawn fuq, il-kwestjonarju talab biss l-informazzjoni li kienet neċessarja biex issir id-determinazzjoni tagħha.

(116)

Il-GTĊ iddikjara wkoll li l-Kummissjoni saħqet fuq il-forniment ta' dokumenti li l-GTĊ ma setax jipproduċi jew jara li jiġu pprovduti skont il-liġi u f'dan il-kuntest irrefera għal-liġi rilevanti tal-UE u d-WTO li tagħmilha ċara li hija biss informazzjoni falza jew qarrieqa li għandha tkun injorata u li ma kellu ebda “ħila prattika” li jforni ċerta informazzjoni li, bħala sigriet tal-Istat jew xi ħaġa simili, il-liġijiet interni tiegħu jipprojbixxu b'mod strett it-tixrid tagħha. Huwa ddikjarat ukoll li d-dispożizzjonijiet rilevanti tal-ADA u l-ASCM tad-WTO li jipprevedu modi li bih tista' tiġi pprovduta informazzjoni kunfidenzjali lil awtoritajiet investigattivi u tingħata “trattament kunfidenzjali” mhux dejjem japplikaw fil-każ fejn l-informazzjoni għandha tkun ipprovduta mill-awtorità ta' pajjiż terz, f'dan il-każ il-GTĊ. Il-GTĊ iddikjara wkoll li l-Kummissjoni ser tmur kontra l-ASCM jekk tirrifjuta milli tirrikonoxxi d-distinzjoni ġuridika bejn il-ħila prattika ta' gvern li jipprovdi informazzjoni li huwa legalment ipprojbit milli joħroġ, min-naħa, u l-forom l-oħrajn ta' informazzjoni kunfidenzjali li għalihom tista' titlob trattament kunfidenzjali fil-perkors normali ta' investigazzjoni.

(117)

Il-Kummissjoni ma injorat l-ebda informazzjoni li l-GTĊ ma pproduċiex, kienet x'kienet ir-raġuni, għaliex huwa sempliċiment impossibbli li tinjora xi ħaġa li mhijiex ipprovduta. Min-naħa l-oħra, f'sitwazzjoni fejn il-GTĊ ma pprovdiex, jew ma tax għad-dispożizzjoni għal spezzjoni, ċerta informazzjoni, u informazzjoni ta' għamla simili kienet għad-dispożizzjoni tal-Kummissjoni minn sorsi oħrajn (fil-parti l-kbira pubblikament disponibbli, iżda anki minn produtturi esportaturi li kkooperaw jew sottomessi minn ċerti banek matul investigazzjonijiet fuq il-post); il-Kummissjoni inkludiet din l-informazzjoni fil-fajl tal-każ u użatha fid-determinazzjoni tagħha. Il-Kummissjoni ma taqbilx mad-dikjarazzjoni li d-dispożizzjonijiet tal-ADA u l-ASCM tad-WTO li jipprevedu modi li bihom tista' tkun ipprovduta informazzjoni kunfidenzjali lil awtoritajiet investigattivi u tingħata “trattament kunfidenzjali” ma japplikawx għall-GTĊ. F'dan ir-rigward, il-GTĊ qiegħed jiddikjara li l-gvernijiet għandhom jagħtu kont ta' standards differenti ta' kooperazzjoni minn dawk tal-esportaturi u s-sitwazzjoni tal-gvernijiet tiġġustifika “ammont minimu ta' korteżija” li l-esportaturi mhumiex intitolati għalih. Fir-rigward tal-kondotta tal-investigazzjonijiet tad-dazju kompensatorju, il-Kummissjoni ma taqbilx. Il-GTĊ huwa wieħed mill-partijiet interessati fil-proċediment għall-fini tar-Regolament bażiku u fl-istess ħin, bħala “Membru interessat”, ir-RPĊ hija marbuta mid-dispożizzjonijiet u l-ġurisprudenza.

L-Artikolu 28(1) tar-Regolament bażiku jiddikjara: “Fil-każijiet fejn parti interessata tiċħad l-aċċess għal, jew b'mod ieħor ma tipprovdix l-informazzjoni meħtieġa fil-limiti ta' żmien stabbiliti skont id-dispożizzjonijiet ta' dan ir-Regolament, jew tostakola b'mod sinifikanti l-investigazzjoni, is-sejbiet provviżorji jew finali, fil-pożittiv jew fin-negattiv, jistgħu jittieħdu fuq il-bażi tal-fatti disponibbli.” L-Artikolu 12.7 tal-Ftehim tad-WTO dwar l-SCM, jirreferi b'mod espliċitu għall-konsegwenzi tan-nuqqas ta' kooperazzjoni mill-gvernijiet (“Membru Interessat”): “Fil-każijiet fejn parti interessata tiċħad l-aċċess għal, jew b'mod ieħor ma tipprovdix l-informazzjoni meħtieġa fi żmien perjodu raġonevoli jew tostakola b'mod sinifikanti l-investigazzjoni, is-sejbiet provviżorji jew finali, fil-pożittiv jew fin-negattiv, jistgħu jittieħdu fuq il-bażi tal-fatti disponibbli.” Għaldaqstant, meta l-pajjiż li qed jinvestiga, f'dan il-każ l-UE, jeżerċita d-drittijiet tad-WTO tiegħu f'investigazzjoni tad-dazju kompensatorju u jitlob informazzjoni meqjusa neċessarja għall-fini tal-investigazzjoni, il-gvernijiet u l-esportaturi jaqgħu taħt l-istess obbligu li jikkooperaw. Matul l-investigazzjoni, il-GTĊ spiss irrefera għal regoli dwar il-kunfidenzjalità bħala raġuni għan-nuqqas ta' forniment tal-informazzjoni mitluba, pereżempju, iċ-ċirkulari tal-PBOC, għal skopijiet ta' verifika. Ġie osservat li anki li kieku l-GTĊ, kif jiddikjara, kien “legalment projbit milli joħroġ it-tali informazzjoni”, xorta huwa marbut mill-obbligi tiegħu tad-WTO li jipprovdi informazzjoni meqjusa neċessarja għall-investigazzjoni. F'dan ir-rigward, dispożizzjonijiet tal-liġi muniċipali jew regoli interni ta' Membru tad-WTO ma jistgħux jassolvuh mill-obbligi tiegħu tad-WTO sabiex jikkoopera fl-investigazzjonijiet; f'dawn il-każijiet ta' kunflitt, huwa f'idejn il-GTĊ li jissuġġerixxi modi li bihom jista' jingħata aċċess għall-informazzjoni sabiex tkun tista' tiġi verifikata b'mod adegwat. Minkejja dak li ntqal hawn fuq, il-GTĊ qatt ma spjega din id-dikjarazzjoni u qatt ma ta xi evidenza (pereżempju. dispożizzjoni ġuridika li skont din huwa “legalment projbit” milli joħroġ it-tali informazzjoni) f'dan ir-rigward.

(118)

Barra minn hekk, il-GTĊ iddikjara li l-ittra ta' qabel il-verifika tal-25 ta' Marzu 2013 ma kinitx iddettaljata biżżejjed u ma kienx fiha mistoqsijiet speċifiċi li se jkunu indirizzati matul iż-żjara ta' verifika fuq il-post. F'dan ir-rigward ta' min josserva li filwaqt li ma hemm ebda rekwiżit li l-Kummissjoni tibgħat lista tal-mistoqsijiet kollha li ser isiru matul il-verifika fuq il-post (u l-Kummissjoni ma tqisx li dan huwa xieraq), l-ittra ta' qabel il-verifika tal-25 ta' Marzu 2013 kien fiha lista ferm speċifika u ddettaljata tal-kwistjonijiet u d-dokumenti li se jkunu indirizzati skont l-Artikolu 26(3) tar-Regolament bażiku u r-rekwiżiti tad-WTO. Madankollu, l-ittra għamlitha ċara li l-lista ma kinitx eżawrjenti u li kwistjonijiet u evidenza oħrajn jistgħu jkunu indirizzati, jekk dan ikun xieraq. F'dan ir-rigward ta' min jinnota wkoll li l-GTĊ ma oġġezzjonax għall-kontenuti ta' din l-ittra qabel il-verifika, għad li min-naħa l-oħra irrifjuta milli jiddiskuti wħud mill-punti mhux imsemmija b'mod espliċitu f'din l-ittra, bħal informazzjoni fuq l-ikbar banek fir-RPĊ, l-involviment tal-Partit Komunista Ċiniż (“CCP”) fil-ġestjoni ta' ċerti banek jew l-aċċess ta' ċerti banek għar-riżervi tal-muniti barranin tal-Amministrazzjoni tal-Istat tar-Riżervi Barranin, billi ddikjara li mhuwiex lest li jwieġeb għall-mistoqsijiet fuq dawn il-kwistjonijiet.

(119)

Il-GTĊ argumenta wkoll li l-Kummissjoni ma kinitx flessibbli matul iż-żjara ta' verifika fuq il-post u fil-fatt “stabbilixxiet limitu ta' żmien obbligatorju fir-rigward ta' kwalunkwe tweġiba għal bidliet mill-GTĊ”. Fuq l-istess nota ddikjara li l-Kummissjoni ma aċċettat ebda waħda mis-soluzzjonijiet “fattibbli” proposti mill-GTĊ dwar il-verifikazzjoni fl-Uffiċċju Nazzjonali tal-Istatistika (NBS) u rrifjutat milli testendi l-verifika sa nhar it-Tnejn it-22 ta' April 2013 biex tivverifika l-NBS. Barra minn hekk, l-uffiċjali tal-Kummissjoni bdew tard bil-verifiki kważi kull jum tax-xogħol minħabba, skont il-GTĊ, li jaslu tard.

(120)

Fir-rigward tad-dikjarazzjonijiet ta' hawn fuq, il-Kummissjoni tisħaq fuq il-fatt li l-grad ta' flessibbiltà muri mill-uffiċjali tagħha fuq il-post kien sħiħ u inkondizzjonali. L-uffiċjali tal-Kummissjoni offrew b'mod eċċezzjonali li jivverifikaw id-dokumenti u l-evidenza li l-GTĊ introduċa ferm wara l-għeluq ta' ċertu suġġett, ferm lil hinn mill-ħinijiet tax-xogħol regolari f'għadd ta' okkażjonijiet. Dan sar bosta drabi, anki jekk kien ifisser ċaqliq f'ħinijiet tard lejn siti ta' verifika oħrajn u/jew ritorn lejn siti fejn l-uffiċjali tal-Kummissjoni diġà kienu jew diġà kienu taw opportunità ta' verifika tad-dokumenti. Madankollu, b'xorti ħażina l-GTĊ ma laqax dawn l-offerti fil-każijiet inkwistjoni, u dan jissuġġerixxi ferm li n-nuqqas ta' sottomissjoni tad-dokumenti mitluba mill-Kummissjoni matul il-ħin regolari ma kienx dovut għar-restrizzjonijiet fiż-żmien tagħhom jew għan-nuqqas ta' rieda mill-Kummissjoni li tivverifikahom. Fir-rigward tad-dewmien fil-bidu taż-żjara ta' verifika, il-Kummissjoni tosserva li l-uffiċjali kienu preżenti fil-ħin kuljum iżda li, b'xorti ħażina, ċertu dewmien kien ikkaġunat mill-proċeduri ta' reġistrazzjoni ta' kuljum biex jingħata aċċess għas-siti ta' verifika differenti meħtieġa mill-GTĊ jew sempliċiment min-nuqqas ta' rappreżentanti tal-GTĊ sabiex jakkumpanjaw lill-uffiċjali meta waslu fis-siti ta' verifika li ġiegħlhom jistennew ħafna qabel jibdew. Il-Kummissjoni tosserva wkoll li ż-żjarat ta' verifika kuljum damu ferm iktar mill-ħinijiet normali tax-xogħol, u li kien il-GTĊ li kkanċella s-sessjoni ta' wara nofsinhar taż-żjara ta' verifika fl-ewwel jum hekk kif ir-rappreżentanti tal-Ministeru tat-Teknoloġija ddeċidew li ma jiħdux sehem fiż-żjara (ara l-premessa (122)). Li kieku l-GTĊ aċċetta l-offerti kollha ripetuti mill-uffiċjali tal-Kummissjoni sabiex jivverifikaw id-dokumenti wara l-ħin tax-xogħol, iż-żjarat kienu jdumu iktar u dan ma kienx il-każ biss għaliex il-GTĊ naqas milli jikkoopera bis-sħiħ.

(121)

Il-GTĊ ilmenta wkoll li l-prattika tal-Kummissjoni li ma taċċettax dokumenti u evidenza ġodda li jeħtieġu li jiġu verifikati wara tmiem is-sessjoni ta' verifika li jappartjenu għaliha. F'dan ir-rigward irid ikun iċċarat li mhijiex u qatt ma kienet l-intenzjoni tal-Kummissjoni li tinjora minnufih informazzjoni pprovduta b'dan il-mod. Il-Kummissjoni ħadet inkunsiderazzjoni l-informazzjoni sottomessa kollha, analizzat il-kwalità tagħha (pereż. l-estratt tad-dikjarazzjonijiet finanzjarji awditjati huwa ttrattat b'mod differenti minn sempliċi tabella tal-excel jew dokument tal-word b'figuri mhux appoġġati minn sors uffiċjali) u attribwitilha l-piż xieraq minħabba li ma setgħetx tivverifika din l-informazzjoni matul iż-żjara ta' verifika fuq il-post.

(122)

Fir-rigward tas-sitt dokumenti (25) sottomessi mill-GTĊ matul l-investigazzjoni u l-kontenut li l-GTĊ irrifjuta milli jiddiskuti matul iż-żjara ta' verifika fuq il-post, il-GTĊ iddikjara li l-Kummissjoni ma kellha ebda bażi biex tapplika l-fatti disponibbli skont l-Artikolu 28 tar-Regolament bażiku. Dan iddikjara wkoll li l-Kummissjoni naqset milli tassisti lill-GTĊ biex jifhem ir-rekwiżit sabiex jipprovdi dawn id-dokumenti u milli turi li d-dokumenti kollha kkonċernati kienu rilevanti minkejja li l-GTĊ “stieden b'mod speċifiku lill-Kummissjoni qabel ma bdiet il-verifika sabiex tassisti lill-GTĊ biex jifhem ir-rekwiżit sabiex jipprovdi dawn id-dokumenti u sabiex turi li d-dokumenti kkonċernati kollha kienu rilevanti”. F'dan ir-rigward, l-ewwel nett, huwa osservat li d-dokumenti kollha jappartjenu direttament għall-industrija kkonċernata (26) u għalhekk, l-inklużjoni tagħhom fi ħdan l-ambitu ta' verifika kienet ferm rilevanti.

It-tieni, it-test tal-GTĊ użat fl-ittra tiegħu lill-Kummissjoni tal-11 ta' April 2013 kien differenti minn dak imsemmi fl-ittra tiegħu tat-3 ta' Ġunju 2013. Fl-ittra tiegħu tal-11 ta' April 2013, il-GTĊ iddikjara li l-verifika tat-tali dokumenti “hija sospiża sakemm il-Kummissjoni ma jirnexxiliex turi b'mod konvinċenti kemm dawn id-dokumenti jitqiesu li huma rilevanti għall-investigazzjoni attwali, b'mod partikolari s-sussidji allegati”. Peress li dawn id-dokumenti kollha jirrigwardaw direttament l-industrija kkonċernata u anki skemi partikolari ta' sussidji bħal self preferenzjali jew skemi ta' taxxa preferenzjali, kif inhu ovvju mit-test tagħhom, il-Kummissjoni ma fehmitx x'jista' jiżdied iktar biex tintwera r-rilevanza tagħhom iktar minn hekk. Għall-Kummissjoni kien sorprendenti li l-GTĊ deher li ma kellux problema bir-rilevanza ta' dawn id-dokumenti meta kienu sottomessi, iżda biss meta l-Kummissjoni talbet spjegazzjonijiet.

(123)

Fl-ittra tagħha tat-23 ta' Mejju 2013 il-Kummissjoni ddikjarat li ma setgħetx tivverifika ħafna mill-informazzjoni sottomessa mad-dokumentazzjoni oriġinali u tagħmel kontroverifika mad-dejta sors li ntużat biex jitħejjew it-tweġibiet tal-GTĊ fir-rigward tal-informazzjoni dwar is-suq finanzjarju u l-istituzzjonijiet finanzjarji fir-RPĊ. Il-GTĊ oġġezzjona li minħħabba l-“kwota ferm ġenerali u mhux speċifika”, il-Kummissjoni ma tatx lill-GTĊ opportunità sabiex jikkummenta kif xieraq u għalhekk ma ħallietx lill-GTĊ jeżerċita d-dritt ta' difiża tiegħu kif suppost. Din id-dikjarazzjoni ma tgħidx is-sew. Fil-kwestjonarju, il-Kummissjoni għamlet mistoqsijiet ferm speċifiċi u, b'konformità mal-prattika normali ta' ħafna awtoritajiet investigattivi ppruvat tivverifika t-tweġibiet tal-GTĊ matul żjara ta' verifika fuq il-post.

(124)

B'mod partikolari, fit-tweġiba tiegħu għall-kwestjonarju, il-GTĊ iddikjara li “s-self lill-industrija kkonċernata jammonta għal sehem żgħir ħafna tas-self totali mogħti. Pereżempju, uħud mill-banek fil-kwestjonarju tal-appendiċi tagħhom iddeskrivew li s-self mogħti lill-industrija kkonċernata kien jammonta għal inqas minn 1 % tas-self totali”. Matul il-verifika, il-GTĊ ma rnexxilux isostni din id-dikjarazzjoni b'xi evidenza affattu u sempliċiment irrefera lill-Kummissjoni għall-banek.

(125)

Il-Kummissjoni talbet ukoll statistiki fuq is-self lill-industrija kkonċernata. Il-GTĊ iddikjara li ma jżommx rekords bħal dawn. Meta l-Kummissjoni stħarrġet jekk il-GTĊ ipprovax jikkompila statistiki bħal dawn u talbet din l-informazzjoni mis-CBRC (Awtorità regolatorja tal-banek fir-RPĊ), uffiċjal preżenti matul il-verifika wieġeb li ma kienx jaf dwar dan peress li dipartiment ieħor tas-CBRC huwa responsabbli mill-istatistiki. Ebda statistika kif mitluba fil-kwestjonarju u ripetutament fil-proċess ta' defiċenza ma ġiet sottomessa mill-GTĊ. Fl-ittra ta' qabel il-verifika tagħha, il-Kummissjoni indikat mill-ġdid li dan is-suġġett ser ikun kopert.

(126)

Rigward il-banek, il-Kummissjoni sħarrġet ukoll matul iż-żjara ta' verifika dwar il-valutazzjoni tar-riskju u tal-kredibbiltà kredizja, is-sitwazzjoni operattiva ġenerali, is-sitwazzjoni maniġerjali, il-livell ta' kreditu, l-użu finanzjarju, l-abbiltà ta' ripagament, il-mudell tal-garanzija u l-kooperazzjoni kummerċjali bejn il-banek u l-mutwatarji, peress li l-GTĊ għamel dikjarazzjonijiet dwar dawn il-kwistjonijiet fit-tweġiba tiegħu għall-kwestjonarju. Mill-ġdid, minkejja li dawn is-suġġetti kienu indikati fl-ittra ta' qabel il-verifika, il-GTĊ ma rnexxilux jipprovdi xi evidenza li tappoġġa d-dikjarazzjonijiet tiegħu stess u rrefera lill-Kummissjoni għall-banek.

(127)

Fit-tweġiba tiegħu għall-ittra ta' defiċenza, il-GTĊ issottometta ċerta informazzjoni dwar il-perċentwal ta' sjieda tal-gvern f'ċerti banek. Huwa osservat li għall-ewwel, fit-tweġiba tal-kwestjonarju l-GTĊ ddikjara li ma għandux din l-informazzjoni u li ssottometta biss l-informazzjoni f'dan ir-rigward wara li l-Kummissjoni indikat li l-Artikolu 24 tal-Liġi dwar il-Banek Kummerċjali jeħtieġ li l-banek jirrapportaw din l-informazzjoni lis-CBRC. Meta l-Kummissjoni stħarrġet matul iż-żjara ta' verifika x'kien is-sors ta' din l-informazzjoni, l-uffiċjal tas-CBRC preżenti ddikjara li ma kienx jaf peress li dipartiment ieħor tas-CBRC huwa responsabbli għall-ġbir ta' dejta bħal din. Skont l-Artikolu 2 tar-Regolamenti Interim dwar il-Bords ta' Superviżuri f'Istituzzjonijiet Finanzjarji Importanti tal-Istat (sottomessi mill-Bank EXIM fit-tweġiba tiegħu għall-ittra ta' defiċenza) “il-lista ta' istituzzjonijiet finanzjarji tal-istat li lilhom il-Kunsill tal-Istat jibgħat bords ta' superviżuri għandha tkun rakkomandata mill-korp amministrattiv għall-bords tas-superviżuri f'istituzzjonijiet finanzjarji tal-Istat”. Peress li din id-dispożizzjoni ġuridika tirreferi għall-korp amministrattiv għall-bords tas-superviżuri f'istituzzjonijiet finanzjarji tal-istat, jidher li l-GTĊ jaf liema istituzzjonijiet finanzjarji huma proprjetà tiegħu. Minkejja dan, il-Kummissjoni ma rnexxilhiex tivverifika din l-informazzjoni jew tidentifika s-sors tal-informazzjoni minħabba n-nuqqas ta' kooperazzjoni mill-GTĊ. L-informazzjoni pubblikament disponibbli tissuġġerixxi li hemm ukoll banek oħrajn tal-Istat (li taw self lill-produtturi esportaturi fil-kampjun) minbarra dawk irrapportati mill-GTĊ fit-tweġiba tiegħu għall-ittra ta' defiċenza (27).

(128)

Fl-ittra tiegħu tat-3 ta' Ġunju 2013 il-GTĊ iddikjara li l-Kummissjoni la fil-kwestjonarju u lanqas fl-ittra ta' defiċenza ma “talbet għall-evidenza ta' sostenn jew sors tad-dejta” u “issa f'daqqa waħda qiegħda tallega nuqqas ta' evidenza ta' sostenn jew sors tad-dejta”. Biex kollox ikun ċar, il-Kummissjoni, bħal kwalunkwe awtorità investigattiva oħra, tivverifika d-dejta sottomessa mill-partijiet kollha fil-proċediment u l-GTĊ kien jaf b'dan peress li l-Kummissjoni diġà indikat fil-kwestjonarju tagħha u l-ittra ta' spjega mal-kwestjonarju li t-tweġibiet jistgħu jkunu soġġetti għal verifika. Barra minn hekk, fl-ittra ta' qabel il-verifika tagħha, il-Kummissjoni inkludiet ukoll dan is-suġġett partikolari fost il-kwistjonijiet li għandhom ikunu koperti matul il-verifika (28). Għaldaqstant, il-fatt li l-Kummissjoni qiegħda titlob evidenza ta' sostenn tad-dikjarazzjonijiet li saru mill-GTĊ żgur li ma kinitx sorpriża għall-GTĊ iżda l-proċedura standard segwita mill-Kummissjoni f'kull każ.

(129)

Meta, matul il-verifika, il-Kummissjoni talbet lill-GTĊ sabiex jissottometti lista tal-ikbar 10 banek fil-RPĊ u s-sehem mis-suq li jirrappreżentaw, is-CBRC wieġbet li tista' tagħti t-tali informazzjoni iżda li ma tistax twieġeb il-mistoqsija qabel ma tkun sottomessa f'format bil-miktub. Il-Kummissjoni spjegat li mistoqsija li ssir matul iż-żjara ta' verifika bil-fomm għandha l-istess validità bħal kwalunkwe mistoqsija sottomessa bil-miktub u indikat li għall-mistoqsijiet l-oħrajn li saru bil-fomm, il-GTĊ ma talabx is-sottomissjoni tagħha bil-miktub qabel wieġeb. Minkejja din il-kjarifika, il-GTĊ xorta ma pprovdietx l-informazzjoni.

(130)

Fil-kwestjonarju, il-Kummissjoni talbet dokumenti li kienu l-bażi għall-istabbiliment tas-CBRC u pprovditilha l-mandat. Il-GTĊ issottometta dokument mill-Kungress Nazzjonali Popolari li jiddikjara sempliċiment li għandha tinħoloq is-CBRC. Meta l-Kummissjoni stħarrġet jekk kienx hemm xi dokument ieħor li jispeċifika l-mandat u l-iskop tas-CBRC, l-uffiċjal tas-CBRC preżenti ddikjara li kien hemm ħafna liġijiet oħrajn dwar is-CBRC iżda li, jekk il-Kummissjoni riedet tikseb dawn id-dokumenti missha talbithom qabel il-verifika. Ġie osservat li fil-kwestjonarju l-Kummissjoni talbet lill-GTĊ sabiex “jipprovdi dokumenti li kienu l-bażi għall-istabbiliment ta' din l-awtorità u pprovdewlha l-mandat” u għalhekk, talbet dawn id-dokumenti qabel il-verifika.

(131)

Meta l-Kummissjoni talbet statistiki u rapporti mill-banek li pprovdew self lill-esportaturi fil-kampjun għall-PI, hija indikat l-Artikolu 33 tal-Liġi tar-RPĊ dwar ir-Regolamentazzjoni u s-Superviżjoni fuq l-Industrija Bankarja  (29) xi ħaġa li tissuġġerixxi li s-CBRC tiġbor dawn l-istatistiki. L-uffiċjal tas-CBRC preżenti ddikjara li kellu jfittex li jikseb permess mid-dipartiment ġuridiku l-ewwel, iżda ma pprovda l-ebda informazzjoni f'dan ir-rigward qabel tmiem il-verifika. Mill-ġdid, ta' min jinnota li l-Kummissjoni talbet din l-informazzjoni fil-kwestjonarju u l-ittra ta' defiċenza u li kienet indikat fl-ittra ta' qabel il-verifika li l-istatistiki jkunu suġġett għall-verifika.

(132)

Il-GTĊ kompla billi ddikjara li l-allegazzjonijiet fl-ilment dwar il-banek Ċiniżi li huma korpi pubbliċi huma bbażati sempliċiment fuq dikjarazzjonijiet sempliċi ta' parteċipazzjoni azzjonarja tal-istat li min-naħa tagħhom huma bbażati fuq determinazzjonijiet “illegali” fil-kawża Karta Fina Miksija. Din id-dikjarazzjoni hija interpretazzjoni ħażina tal-fatti fl-ilment. Fl-ilment, l-ilmentatur, minbarra s-sjieda tal-istat, jirreferi, fost l-oħrajn, għas-self ipprovdut minn banek ibbażati fuq direttivi politiċi, lill-aġenziji tal-gvern li jordnaw lill-istituzzjonijiet finanzjarji sabiex iżidu l-kreditu u s-self lil impriżi sabiex jippromwovu teknoloġiji u prodotti ġodda (inkluża l-industrija PV). Is-sejbiet ta' Karta Fina Miksija li l-banek Ċiniżi li huma korpi pubbliċi kienu bbażati fuq iktar elementi milli s-sempliċi sjieda (pereżempju intervent mill-gvern u gwida tal-banek sabiex jallokaw self preferenzjali lill-industrija tal-karta permezz ta' pjanijiet tal-Gvern) u dawn is-sejbiet huma kompletament konformi mal-liġi tal-UE u d-WTO. Barra minn hekk, is-sejbiet dwar l-istatus tal-banek tal-istat bħala korpi pubbliċi kienu kkonfermati f'Azzar Miksi b'Materjal Organiku wkoll.

(133)

Il-GTĊ kompla jiddikjara wkoll li ma setax bl-abbiltà prattika tiegħu jipprovdi informazzjoni dwar 3 800 bank u istituzzjoni finanzjarja li jeżistu fil-RPĊ u li, fi kwalunkwe każ, is-CBRC ma żżommx rekords dwar il-perċentwal tas-sjieda tal-gvern fil-banek. Il-Kummissjoni ma tistax tifhem għaliex il-GTĊ jibqa' jirreferi għall-banek kollha fil-RPĊ b'rabta mas-sjieda tal-GTĊ fihom meta l-informazzjoni mitluba kienet limitata b'mod espliċitu għal dawk il-banek “li fihom il-GTĊ għandu parteċipazzjoni azzjonarja diretta jew indiretta” (30). Kif spjegat fil-premessa (127) hawn fuq, id-dikjarazzjoni tal-GTĊ li s-CBRC (jew xi awtorità oħra tal-gvern) ma żżommx rekords dwar is-sehem mis-sjieda tiegħu fil-banek tidher li tmur kontra bosta dispożizzjonijiet ġuridiċi taċ-Ċina.

(134)

Fl-ittra tiegħu tat-3 ta' Ġunju 2013, il-GTĊ tenna d-dikjarazzjoni tiegħu li ma għandux l-awtorità li jitlob lill-“banek indipendenti” sabiex jipproduċi informazzjoni kunfidenzjali u indika l-ittra li allegatament intbagħtet lill-banek fuq din il-kwistjoni. Huwa minnu li matul il-verifika l-GTĊ wera l-oriġinal tal-ittra maħsuba għall-banek, iżda meta l-Kummissjoni talbet lill-GTĊ sabiex jipprovdi evidenza li turi lil liema banek u istituzzjonijiet finanzjarji ntbagħtet din l-ittra, il-GTĊ ma kienx kapaċi jipprovdi t-tali evidenza. Il-GTĊ allega wkoll li wħud mill-istituzzjonijiet indikati fl-Anness 7 għall-ittra ta' defiċenza ma kinux banek. F'dan ir-rigward, il-Kummissjoni tosserva li dawn l-istituzzjonijiet kellhom ikunu nnotifikati lill-Kummissjoni mill-produtturi esportaturi fil-kampjun bħala istituzzjonijiet li estendewlhom self.

(135)

Il-GTĊ iddikjara li l-Kummissjoni qatt ma indirizzat il-kwistjoni taċ-Ċirkulari tal-PBOC YinFa [2003] u [2004] fil-kwestjonarju tagħha jew fl-ittri ta' defiċenza. Huwa nnotat li fl-ittra ta' qabel il-verifika, il-Kummissjoni inkludiet “regolamenti/ċirkulari/dokumentazzjoni interna dwar ir-regolamenti tar-rati tal-imgħax fir-RPĊ” fost is-suġġetti li għandhom jiġu koperti matul il-verifika. Huwa ovvju li ż-żewġ ċirkulari jaqgħu f'din il-kategorija. Fit-tweġiba tiegħu għall-ittra ta' defiċenza, il-GTĊ irrefera wkoll għal artiklu fuq il-websajt tal-PBOC li rrefera għal waħda miċ-ċirkulari tiegħu. Madankollu, il-GTĊ ma pprova l-ebda ċirkulari mill-PBOC affattu u ssottometta biss informazzjoni mill-websajt tal-PBOC li ma kinitx kompluta fir-rigward tar-regolamentazzjoni tar-rati tal-imgħax fuq self u depożiti fiċ-Ċina meta mqabbla maċ-Ċirkulari YinFa [2003] u [2004] li t-tnejn li huma jistgħu jinstabu fuq il-web. Huwa osservat ukoll li l-GTĊ ma rrifjutax milli jissottometti dawn id-dokumenti fuq il-bażi li ma kienx ippreparat għal mistoqsija bħal din iżda minflok minħabba l-allegata kunfidenzjalità taċ-ċirkulari. F'dan ir-rigward, ta' min jinnota li d-dikjarazzjoni tal-GTĊ dwar il-kunfidenzjalità taċ-ċirkulari tal-PBOC hija inkonsistenti mal-prattika tiegħu stess f'dan il-proċediment. Fil-kummenti tiegħu dwar id-divulgazzjoni definittiva, il-GTĊ issottometta verżjoni sħiħa ta' Ċirkulari ieħor tal-PBOC biex jappoġġa d-dikjarazzjoni tiegħu li s-self speċjali pprovdut mill-banek kummerċjali ta' propjetà tal-istat (SOCBs) ġie revokat u l-kunfidenzjalità allegata xi mkien ieħor ma dehritx li kienet xkiel. Fir-rigward tas-siltiet mill-websajt tal-PBOC, il-Kummissjoni ħadet nota tagħhom u ma injoratx il-kontenut. Madankollu, biex ikun hemm l-informazzjoni kompluta dwar il-kwistjoni kien hemm bżonn ukoll l-informazzjoni fiż-żewġ ċirkulari li kkomplimentaw l-informazzjoni sottomessa mill-GTĊ.

(136)

Talbiet għal EI ġew sottomessi minn 6 produtturi esportaturi li kkooperaw skont l-Artikolu 27(3) tar-Regolament bażiku, jiġifieri l-kumpaniji CNPV Dongying Solar Power Co. Ltd, Jiangsu Runda PV Co., Ltd, Kinve Solar Power Co., Ltd (Maanshan), Phono Solar Technology Co. Ltd, Shandong Linuo Photovoltaic Hi-Tech Co. Ltd, u Shandong Linuo Solar Power Holdings Co. Ltd. Ma kienx possibbli li dawn il-kumpaniji jiġu analizzati b'mod individawli peress li, minħabba n-numru kbir ta' skemi ta' sussidji allegati u l-għamla li tieħu ħafna żmien tal-investigazzjoni, dan ikun piż kbir wisq u jista' jxekkel it-tlestija tal-investigazzjoni fil-ħin.

(137)

Fuq il-bażi tal-informazzjoni li tinsab fl-ilment, il-Kummissjoni fittxet informazzjoni relatata mal-iskemi li ġejjin, li allegatament involvew l-għoti ta' sussidji mill-awtorità Governattiva:

(138)

Il-Kummissjoni talbet mill-GTĊ l-informazzjoni dwar is-sehem tas-self ipprovdut mill-banek fejn il-GTĊ huwa l-ikbar jew l-uniku azzjonist, banek fejn il-GTĊ għandu interess azzjonarju iżda mhuwiex l-ikbar azzjonist, banek fejn il-GTĊ mhuwiex azzjonist u banek b'sid barrani, kemm lill-industrija inġenerali kif ukoll lill-industrija kkonċernata minn dan il-proċediment. Il-GTĊ wieġeb li ma jżommx rekords tal-ammonti u l-perċentwali tas-self ipprovdut mill-banek tal-Istat u li l-GTĊ lanqas ma jżomm ir-rekords tas-self għall-industrija PV. Il-GTĊ ma ssuġġerixxa l-ebda sors alternattiv għal din l-informazzjoni.

(139)

Il-Kummissjoni hemżet kwestjonarju speċifiku (Appendiċi A) maħsub għall-banek/istituzzjonijiet finanzjarji mal-kwestjonarju antisussidji inizjali u talbet lill-GTĊ sabiex jgħaddih lill-banek/istituzzjonijiet finanzjarji li pprovdew self lill-industrija kkonċernata. L-iskop tal-Appendiċi A kien li jivverifika l-allegazzjonijiet fl-ilment li l-banek tal-Istat taċ-Ċina huma korpi pubbliċi. Fost l-oħrajn, il-Kummissjoni fittxet informazzjoni dwar l-istruttura tal-kontroll tal-gvern f'dawk il-banek Ċiniżi u kemm isegwu l-politiki u l-interessi tal-gvern fir-rigward tal-industrija fotovoltajka (jiġifieri l-bord tad-diretturi u l-bord tal-azzjonisti, minuti tal-laqgħat tal-azzjonisti/tad-diretturi, ċittadinanza tal-azzjonisti/diretturi, politiki dwar l-għoti b'self u valutazzjoni tar-riskju fir-rigward ta' self ipprovdut lill-produtturi esportaturi li kkooperaw). Fit-tweġiba għall-kwestjonarju, il-GTĊ issottometta tweġiba għall-Appendiċi A biss għal ħames banek (iċ-China Development Bank (CDB), il-Bank EXIM, il-Bank of Shanghai, il-Bank of China (31) u l-Huaxia Bank). Fl-ittra ta' defiċenza, il-Kummissjoni tenniet it-talba inizjali tagħha għal informazzjoni. Biex tħaffef il-kooperazzjoni tal-GTĊ, tat lista ta' banek/istituzzjonijiet finanzjarji li taw self lil kumpaniji fil-kampjun u reġgħet talbet lill-GTĊ sabiex jgħaddi l-Appendiċi A lil dawn l-entitajiet. Ma ġiet ippreżentata l-ebda tweġiba addizzjonali għall-Appendiċi A mat-tweġiba għall-ittra ta' defiċenza.

(140)

Il-Kummissjoni fittxet ukoll informazzjoni dwar is-sjieda tal-Istat tal-banek u l-istituzzjonijiet finanzjarji. Fit-tweġiba tiegħu għall-kwestjonarju, il-GTĊ iddikjara li ma jżomm l-ebda rekord dwar l-ishma ta' sjieda u ma pprova l-ebda suġġeriment dwar kif tinkiseb din l-informazzjoni. Meta l-Kummissjoni, fl-ittra ta' defiċenza tagħha, indikat li huwa obbligatorju li din l-informazzjoni tkun inkluża fl-Artikoli ta' Assoċjazzjoni tal-banek u li dawn huma aċċessibbli mill-GTĊ bħala azzjonist, il-GTĊ issottometta l-informazzjoni dwar il-parteċipazzjonijiet azzjonarja ta' 16-il bank. Madankollu, ħlief għal ħames banek, li għalihom il-GTĊ irrefera għar-rapporti annwali bħala sors, ma pprovda l-ebda evidenza ta' sostenn għal din l-informazzjoni u lanqas ma ddivulga x'kienet id-dejta tas-sors għal din l-informazzjoni. Fir-rigward tal-banek l-oħrajn li pprovdew self lill-industrija kkonċernata, il-GTĊ ma pprovda l-ebda informazzjoni affattu dwar l-interess ta' sjieda tiegħu. B'hekk, il-Kummissjoni ma setgħetx tivverifika l-preċiżjoni u l-korrettezza tad-dejta rrapportata dwar l-interessi ta' sjieda tal-Istat fil-banek u istituzzjonijiet finanzjarji oħrajn.

(141)

Il-GTĊ iddikjara li l-klassifikazzjoni BB applikata għall-produtturi esportaturi fil-kampjun (għall-fini ta' punt ta' riferiment tas-self) hija “ferm sfavorevoli” u li l-Kummissjoni, fid-dawl tal-fatti proprji tal-każ, ma spjegatx kif waslet għall-konklużjoni li din hija l-konklużjoni preċiża u l-iktar waħda raġonevoli. Il-GTĊ kompla jiddikjara li din il-metodoloġija tammonta għal “influwenza avversa li ma tistax tkun permessa”. Għad li din id-dikjarazzjoni saret fir-rigward ta' waħda mill-kawżi ta' qabel (jiġifieri Karta Fina Miksija) u qabel id-divulgazzjoni tal-informazzjoni dwar il-klassifikazzjoni applikata għall-produtturi esportaturi fil-kampjun f'dan il-proċediment, ta' min jinnota li l-Kummissjoni ma applikatx “fatti avversi disponibbli” f'dan il-każ jew f'xi każ ieħor li għalih irrefera l-GTĊ fis-sottomissjoni tiegħu. Il-Kummissjoni siltet biss konklużjonijiet xierqa mill-fatti rreġistrati, li wrew nuqqas ta' valutazzjoni xierqa tar-riskju ta' kreditu, ara l-premessi minn (175) sa (178). Ta' min jindika li matul il-PI, l-industrija PV taċ-Ċina kienet qiegħda tagħmel telf qawwi u kien ċar li l-qagħda finanzjarja kienet waħda ferm diffiċli. Bosta valutazzjonijiet tar-riskju ta' kreditu pprovduti mill-kumpaniji fil-kampjun wrew li valutazzjoni BB għall-PI inġenerali kienet raġonevoli. Ċerti valutazzjonijiet tar-riskju ta' kreditu juru biċ-ċar li bosta Gruppi kienu ftit jew wisq insolventi.

(142)

Fl-ittra ta' qabel il-verifika tagħha, il-Kummissjoni pprevediet il-verifika tal-banek li ssottomettew it-tweġibiet għall-Appendiċi A mal-kwestjonarju u li taw sehem kbir ta' self lill-produtturi esportaturi fil-kampjun, jiġifieri ċ-China Development Bank, il-Bank of China għall-Esportazzjoni-Importazzjoni, il-Bank of Shanghai u l-Huaxia Bank u inkludiet lista ta' suġġetti li ser ikunu koperti matul il-verifika. Fil-kwestjonarju inizjali għall-GTĊ, il-Kummissjoni diġà għamlitha biċ-ċar li l-informazzjoni pprovduta fit-tweġibiet għall-kwestjonarji jistgħu jkunu soġġetti għal verifika fuq il-post. Fl-ittra ta' qabel il-verifika, il-Kummissjoni kienet iddikjarat ukoll li l-GTĊ “intalab iqiegħed għad-dispożizzjoni d-dokumenti ta' sostenn kollha li ntużaw biex tħejji t-tweġiba sostantiva tiegħek, inklużi d-dokumenti u l-applikazzjonijiet sors oriġinali”. Żewġ fornituri kbar oħrajn ta' finanzjament preferenzjali lill-produtturi esportaturi fil-kampjun jew ma ssottomettewx l-informazzjoni mitluba affattu (l-Agricultural Bank of China) jew l-informazzjoni ġiet sottomessa f'isimhom bla possibbiltà ta' verifika (il-Bank of China).

(143)

Fl-ittra ta' qabel il-verifika tagħha tal-25 ta' Marzu 2013, il-Kummissjoni nnotifikat lill-GTĊ bl-intenzjoni tagħha li tivverifika l-Bank of Shanghai (“BoS”) u offriet sabiex tħaffef iż-żjara ta' verifika għall-GTĊ, jekk ikun hemm bżonn, li testendi ż-żjara ta' verifika sat-22 ta' April 2013 (32). Fit-tweġiba inizjali tiegħu għall-ittra ta' qabel il-verifika tal-5 ta' April, il-GTĊ ma kkonfermax jekk il-verifika tal-BoS kinitx se ssir iżda staqsa jekk il-Kummissjoni tkunx lesta tivverifika l-Bank of Shanghai f'post ieħor għall-bqija tal-verifika (jiġifieri Shanghai flok Beijing). Biex tħaffef iż-żjara ta' verifika, il-Kummissjoni qablet b'mod eċċezzjonali għal dan; madankollu, hija saħqet sabiex il-GTĊ jikkonferma l-verifika f'Shanghai sa mhux iktar tard mid-9 ta' April (jiġifieri tliet ijiem qabel il-bidu tal-verifika f'Beijing) sabiex it-tim ikun jista' jirranġa l-prattikalitajiet relatati ma' bidla bħal din fl-ippjanar tal-verifika. Kien biss fil-11 ta' April (jum tax-xogħol qabel ma bdiet il-verifika) li l-GTĊ ikkonferma li l-BoS kien disponibbli għal verifika fit-23 jew l-24 ta' April 2013. Dakinhar stess il-Kummissjoni kkomunikat lill-GTĊ li minħabba konferma tard bħal din ma kienx possibbli li jsiru l-bidliet fl-iskeda. Barra minn hekk, id-dati proposti mill-GTĊ (23 jew 24 ta' April) kienu jaqbżu l-perjodu maqbul bejn il-GTĊ u l-Kummissjoni li fih kellha ssir il-verifika u anki l-estensjoni offruta mill-Kummissjoni. B'hekk, il-Kummissjoni ma setgħetx tivverifika t-tweġiba għall-Appendiċi A sottomessa mill-BoS u l-informazzjoni dwar is-self ipprovdut minn dan il-bank lill-produtturi esportaturi fil-kampjun. Konsegwentement, fl-ittra tagħha tat-23 ta' Mejju 2013, il-Kummissjoni għarrfet lill-GTĊ li qiegħda tikkunsidra l-applikazzjoni tal-Artikolu 28 tar-Regolament (KE) Nru 597/2009 fir-rigward tal-informazzjoni mhux verifikata sottomessa mill-BoS.

(144)

Fl-ittra tiegħu tat-3 ta' Ġunju 2013 il-GTĊ iddikjara li l-verifika tal-BoS ma seħħitx minħabba n-nuqqas ta' flessibbiltà min-naħa tal-Kummissjoni, li l-Kummissjoni ma pproponiet l-ebda data alternattiva għall-verifika u sempliċiment “irrifjutat milli tikkunsidra l-verifika tal-Bank of Shanghai”. Dawn id-dikjarazzjonijiet huma sempliċiment żbaljati. Il-Kummissjoni ddikjarat biċ-ċar fl-ittra ta' qabel il-verifika tagħha li għall-ewwel kien propost li l-banek jiġu verifikati fis-17 u t-18 ta' April 2013 b'possibbiltà ta' jum addizzjonali fit-22 ta' April, u b'hekk ħalliet f'idejn il-GTĊ sabiex jipproponi ħinijiet xierqa meta jżuru l-banek matul il-perjodu sħiħ ta' verifika (jiġifieri l-ġimgħa sħiħa tax-xogħol flimkien ma' jum addizzjonali). Iżda l-GTĊ ippropona dati għall-verifika tal-BoS barra dan il-perjodu u għamel hekk jum tax-xogħol wieħed biss qabel ma kellha tibda ż-żjara ta' verifika. Fil-fehma tal-Kummissjoni, il-flessibbiltà offruta kienet iktar minn suffiċjenti u, b'kollox, sitt ijiem alternattivi kienu offruti għall-verifikai tal-BoS, għall-kuntrarju tad-dikjarazzjoni tal-GTĊ.

(145)

Fl-ittra tagħha tat-23 ta' Mejju 2013, il-Kummissjoni spjegat lill-GTĊ li ma setgħetx tivverifika ċerti partijiet mit-tweġiba tal-Bank Huaxia (“Huaxia”) għall-Appendiċi A, jiġifieri l-istruttura tas-sjieda, il-valutazzjoni tal-kredibbiltà kredizja tal-produtturi esportaturi fil-kampjun u l-primjums tar-riskju mitluba lil industriji differenti u b'mod partikolari lill-industrija kkonċernata.

(146)

Fit-tweġiba tiegħu tat-3 ta' Ġunju 2013, il-GTĊ iddikjara li Huaxia spjega l-istruttura tas-sjieda u ta iktar dettalji u spjegazzjonijiet lill-Kummissjoni dwar l-azzjonisti tiegħu, li l-valutazzjoni tal-kredibbiltà kredizja tal-klijenti hija koperta mil-liġijiet dwar is-segretezza bankarja u ftehimiet kuntrattwali bejn il-banek u l-klijenti tagħhom.

(147)

Fir-rigward tal-istruttura dwar is-sjieda, huwa osservat li fit-tweġiba tiegħu għall-Appendiċi A, Huaxia ddikjara li kien inkorporat “mingħajr ishma tal-gvern” u ma ddivulga ebda informazzjoni dwar is-sjieda tal-gvern għad li dan intalab b'mod speċifiku mill-Kummissjoni fl-Appendiċi A. Il-Kummissjoni indikat li dan jikkontradixxi l-informazzjoni l-oħra pprovduta mill-GTĊ u li Huaxia ammetta li wħud mill-azzjonisti huma tal-Istat u pprova dokument b'informazzjoni biċ-Ċiniż dwar uħud minnhom. Mill-informazzjoni sottomessa minn Huaxia għadu mhuwiex ċar x'inhu s-sehem tas-sjieda tal-Istat tal-bank.

(148)

Dwar il-valutazzjoni tal-kredibbiltà kredizja, il-Kummissjoni tosserva li l-bank seta' jipprovdi t-tali dokument għal waħda mill-kumpaniji (wara li pproteġa l-identità tal-kumpanija b'xi modifiki fid-dokument) filwaqt li għad-dokumenti mitluba l-oħrajn iddikjara li huma koperti mil-liġijiet dwar is-segretezza u ftehimiet kuntrattwali bejn il-banek u l-klijenti tagħhom. Din id-diskrepanza fit-trattament diffiċli biex tinftiehem.

(149)

Fl-ittra tagħha tat-23 ta' Mejju 2013 il-Kummissjoni għarrfet lill-GTĊ li t-tweġibiet tal-Export Import Bank of China (“EXIM”) għall-Appendiċi A u għall-ittri ta' defiċenza ma kinux kompluti u li l-EXIM naqas milli jissottometti ċerti dokumenti li ntalbu b'mod speċifiku, jiġifieri l-Artikoli ta' Assoċjazzjoni, in-Notifika ta' Stabbiliment tal-Export Import Bank of China Maħruġ mill-Kunsill tal-Istat jew Miżuri għall-ġestjoni ta' Kreditu tal-Bejjiegħa tal-Esportazzjonijiet għal prodotti ta' Teknoloġija Avvanzata tal-Export Import Bank of China. Fir-rigward tal-Artikoli ta' Assoċjazzjoni, fl-ittra tiegħu tat-3 ta' Ġunju 2013, il-GTĊ iddikjara li EXIM, minħabba l-politika interna tiegħu, ma setax jissottometti l-Artikoli ta' Assoċjazzjoni (li huwa dokument tal-ġestjoni interna) iżda rrefera għall-verżjoni onlajn li allegatament kienet offruta sabiex tiġi kkonsultata fuq il-laptop ipprovdut mill-EXIM matul il-verifika. Il-Kummissjoni baqgħet mistagħġba b'din l-ispjegazzjoni għaliex ma tagħmilx sens. Jekk id-dokument kien disponibbli onlajn matul il-verifika, il-Kummissjoni ma tara ebda raġuni għaliex dan ma setax ikun sottomess kif diġà talbet ripetutament fil-kwestjonraju, l-ittra ta' defiċenza u mill-ġdid matul il-verifika. Id-dikjarazzjoni li EXIM qiegħed dan id-dokument għad-dispożizzjoni fuq il-laptop matul il-verifika hija żbaljata. EXIM iddikjara li l-Kummissjoni missha rrevediet id-dokument onlajn iżda l-uffiċjal tal-Kummissjoni spjega li ma għandhomx aċċess għall-internet fil-bini tal-verifika. Barra minn hekk, EXIM lanqas ma pprova link għall-verżjoni onlajn tal-Artikoli ta' Assoċjazzjoni.

(150)

Rigward iż-żewġ dokumenti l-oħrajn, EXIM irraġuna li ma setgħux ikunu pprovduti minħabba l-għamla kunfidenzjali tagħhom u r-regoli interni. Kien EXIM stess li fit-tweġiba tiegħu għall-ittra ta' defiċenza ddikjara li l-“bank EXIM twaqqaf u jopera skont in-Notifika ta' Stabbiliment tal-Export Import Bank of China Maħruġ mill-Kunsill tal-Istat u L-Artikoli ta' Assoċjazzjoni tal-Export Import Bank of China”. Għaldaqstant, dan tqies li huwa dokument essenzjali għall-verifika tal-allegazzjonijiet fl-ilment li EXIM huwa korp pubbliku, iżda l-Kummissjoni ma ngħatatx aċċess għal dan id-dokument. F'dan il-kuntest, huwa osservat li bank pubbliku ieħor, jiġifieri CDB, ipprovda dokument simili dwar l-istabbiliment tiegħu u f'din l-investigazzjoni ġew sottomessi wkoll bosta avviżi oħrajn tal-Kunsill tal-Istat. Barra minn hekk, EXIM ma sostniex id-dikjarazzjonijiet tiegħu dwar il-kunfidenzjalità b'xi evidenza. Barra minn hekk, kif spjegat fil-premessa (117), il-gvernijiet ma jistgħux jaqbdu u sempliċiment jinvokaw regoli interni biex jevitaw obbligi skont il-Ftehim tas-SCM u r-Regolament bażiku. L-istess japplika għall-Miżuri għall-ġestjoni ta' Kreditu tal-Bejjiegħa tal-Esportazzjonijiet għal prodotti ta' Teknoloġija Avvanzata tal-Export Import Bank of China fejn EXIM iddikjara wkoll kunfidenzjalità bla ebda evidenza ta' sostenn u rrifjuta wkoll milli jiddiskuti l-iskop ta' dan id-dokument.

(151)

EXIM naqas ukoll milli jipprovdi informazzjoni dwar il-mod kif inhu ffurmat il-Bord tad-Diretturi u l-Bord tas-Superviżuri, li ntalbet ripetutament, bl-ispjegazzjoni li “l-kompożizzjoni tal-Bord tad-Diretturi qiegħda tinbidel” u li l-mistoqsijiet tal-Kummissjoni dwar l-affiljazzjonijiet fis-CCP tal-membri tal-Bord “huma mistoqsijiet invażivi u inadatti fil-kuntest ta' investigazzjoni antisussidji.” Il-fatt li l-mod kif inhu ffurmat il-Bord tad-Diretturi qiegħed jinbidel mhuwiex rilevanti għall-fini ta' din l-investigazzjoni. Li huwa rilevanti huwa kif l-Istat huwa rappreżentat fil-Bords tal-EXIM; madankollu, il-GTĊ u EXIM irrifjutaw milli jipprovdu din l-informazzjoni. Il-Kummissjoni tqis ukoll li s-sħubija fis-CCP tal-maniġment superjuri ta' EXIM (u l-banek kollha inkwistjoni) bħala essenzjali għall-fini ta' stabbiliment ta' kemm l-Istat jinfluwenza l-ġestjoni tal-banek. Skont il-Kostituzzjoni tas-CCP “Il-Parti trid tħaddan u ttejjeb is-sistema ekonomika bażika, bis-sjieda pubblika li għandha rwol dominanti u setturi ekonomiċi li jiżviluppaw id f'id…” (33), għaldaqstant, l-analiżi tal-influwenza tas-CCP f'EXIM tqieset neċessarja għall-fini ta' din l-investigazzjoni u b'mod partikolari biex jiġi vvalutat il-livell tal-kontroll tal-Istat fil-banek.

(152)

Fir-rigward tal-istatistiki dwar l-esportazzjoni ta' kategoriji differenti tal-prodotti diġà mitluba fil-kwestjonarju u li EXIM huwa obbligat jirrapporta lis-CBRC, il-GTĊ iddikjara fl-ittra tiegħu tat-3 ta' Ġunju 2013 li kellu bżonn iktar ħin biex iħejji t-tali informazzjoni. F'dan ir-rigward huwa osservat li, peress li l-Kummissjoni diġà talbet din l-informazzjoni fil-kwestjonarju inizjali, il-GTĊ kellu iktar minn tliet xhur u nofs biex iħejji din l-informazzjoni, iżda naqas milli jagħmel dan. EXIM allega li “dan it-tip ta' informazzjoni jista' jinstab fir-rapporti annwali”; madankollu, dan huwa żbaljat. L-informazzjoni fir-rapporti annwali li l-GTĊ irrefera għalihom tkopri perjodi differenti mill-informazzjoni mitluba mill-Kummissjoni fil-kwestjonarju u matul iż-żjara ta' verifika.

(153)

Il-GTĊ iddikjara kif xieraq li fit-tweġiba għall-kwestjonarju ssottommetta, fost l-oħrajn, l-ammonti ta' krediti għall-esportazzjoni ta' prodotti mekkaniċi u elettriċi u prodotti ġodda tat-teknoloġijia avvanzata. Huwa osservat li l-Kummissjoni qatt ma kkontestat is-sottomissjoni ta' dawn il-figuri. Il-Kummissjoni kkontestat il-fatt li, meta ppruvat tivverifika dawn il-figuri matul iż-żjara ta' verifika, EXIM ma seta' jipprovdi l-lebda evidenza ta' sostenn jew saħansitra spjegazzjoni mnejn ġew dawn il-figuri. B'mod simili, il-Kummissjoni ma setgħetx tivverifika d-dejta dwar is-sehem ta' krediti għall-esportazzjoni għall-industrija PV li l-GTĊ issottometta fit-tweġiba għall-kwestjonarju. Ħaġa interessanti, EXIM ma qies ebda waħda minn dawn il-figuri bħala kunfidenzjali iżda meta l-Kummissjoni talbet għad-dejta sors biex tivverifikahom, EXIM irrifjuta milli jagħti aċċess għaliha, għal raġunijiet ta' kunfidenzjalità. EXIM applika l-istess raġunament dwar l-ammonti ta' krediti għall-esportazzjoni mogħtija lill-produtturi fil-kampjun u l-produtturi li kkooperaw. Huwa rrapporta figuri fit-tweġiba għall-ittra ta' defiċenza iżda ma ħalliex lill-Kummissjoni tivverifikaha fuq il-bażi tal-kunfidenzjalità. Effettivament, ma kienx possibbli li tiġi verifikata l-maġġoranza assoluta tal-istatistiki sottomessi minn EXIM.

(154)

EXIM irrifjuta wkoll milli jispjega u jappoġġa b'evidenza rilevanti l-klassifikazzjonijiet tal-kreditu tal-produtturi esportaturi fil-kampjun u l-analiżijiet li wasslu għal dawn il-klassifikazzjonijiet.

(155)

Fl-ittra tiegħu tat-3 ta' Ġunju 2013, il-GTĊ kien imħasseb li l-Kummissjoni għamlet “mistoqsijiet personali dwar l-affiljazzjonijiet mal-partiti politiċi tal-membri tal-Bords u l-maniġment superjuri”. Dan mhuwiex korrett. Il-mistoqsijiet dwar ir-rabtiet tal-membri tal-Bord u l-maniġment superjuri mas-CCP kienu ta' karattru purament tekniku u, kif spjegat fil-premessa (151) hawn fuq, ir-raġuni għad-domandi dwarhom kien sabiex jgħinu fid-determinazzjoni tar-rwol tas-CCP fl-ekonomija Ċiniża.

(156)

Matul il-verifika, il-Kummissjoni ppruvat tivverifika l-valutazzjoni tal-kredibbiltà kredizja tal-produtturi esportaturi fil-kampjun. CDB ipprovda ċerta informazzjoni ġenerali iżda rrifjuta milli jiddivulga xi informazzjoni relatata mal-valutazzjoni tal-kredibbiltà kreditizja tal-produtturi esportaturi fil-kampjun jew saħansitra r-rapport ta' evalwazzjoni u valutazzjoni tar-riskju tal-industrjia PV.

(157)

Fit-tweġiba għall-ittra ta' defiċenza, is-CDB issottometta figura dwar il-primjum tar-riskju mitlub għall-industrija kkonċernata. Matul il-verifika, is-CDB ikkoreġa t-tweġiba tiegħu f'dan ir-rigward iżda ma pprovda ebda evidenza ta' sostenn għal din il-figura jew spjegazzjoni ta' x'kienet il-bażi għal din il-figura, minkejja talbiet ripetuti mill-Kummissjoni matul iż-żjara ta' verifika.

(158)

L-ilmentatur jiddikjara li l-SOCBs fir-RPĊ huma korpi pubbliċi skont it-tifsira tal-Artikolu 2(b) tar-Regolament bażiku.

(159)

Il-Korp tal-Appell (AB) tad-WTO, fir-rapport tiegħu fl-Istati Uniti — Definitive Anti-Dumping and Countervailing Duties on Certain Products from China (Dazji Antidumping u Kompensatorji Definittivi fuq Ċerti Prodotti miċ-Ċina) (34) (ir-rapport AB) iddefinixxa korp pubbliku bħal entità li “hija sid, teżerċita jew hija mogħtija awtorità governattiva”. Skont l-AB, l-evidenza li l-gvern jeżerċita kontroll sinifikanti fuq entità u l-kondotta tagħha tista' sservi ta' evidenza li l-entità rilevanti għandha awtorità governattiva u teżerċita t-tali awtorità fit-twettiq ta' funzjonijiet governattivi. Meta l-evidenza turi li l-indikazzjonijiet formali tal-kontroll tal-gvern huma diversi, u jkun hemm anki evidenza li t-tali kontroll ikun ġie eżerċitat b'mod sinifikanti, f'dak il-każ it-tali evidenza tista' tippermetti li ssir inferenza li l-entità kkonċernata qiegħda teżerċita awtorità governattiva (35). L-AB qies ukoll li l-korpi pubbliċi huma karatterizzati wkoll mill-“prestazzjoni ta' funzjonijiet governattivi” (36) li “normalment jitqiesu parti mill-prattika governattiva fl-ordni ġuridiku tal-Membru rilevanti” (37).

(160)

L-analiżi li ġejja tiffoka fuq jekk l-SOCBs inkwistjoni jwettqux funzjonijiet li normalment jitqiesu parti mill-prattika governattiva fiċ-Ċina u jekk iva, jekk jeżerċitawx awtorità governattiva meta jagħmlu dan. L-investigazzjoni stabbilixxiet li s-suq finanzjarju Ċiniż huwa karatterizzat minn intervent tal-gvern għaliex ħafna mill-banek il-kbar huma tal-Istat. L-awtoritajiet Ċiniżi pprovdew biss informazzjoni ferm limitata dwar il-parteċipazzjoni azzjonarja/is-sjieda tal-banek fir-RPĊ. Madankollu, kif spjegat iktar hawn taħt, il-Kummissjoni ġabret l-informazzjoni disponibbli biex tasal għal sejba rappreżentattiva. Fit-twettiq tal-analiżi tagħha dwar jekk il-banek humiex entitajiet li għandhom awtorità governattiva, huma vestiti biha jew jeżerċitawha (korpi pubbliċi), il-Kummissjoni fittxet ukoll informazzjoni mhux biss dwar is-sjieda tal-gvern tal-banek iżda anki karatteristiċi oħrajn bħall-preżenza tal-gvern fil-bord tad-diretturi, il-kontroll tal-gvern fuq l-attivitajiet tagħhom, kemm isegwu l-politiki jew l-interessi tal-gvern u jekk l-entitajiet inħolqux permezz ta' statut.

(161)

Mill-informazzjoni disponibbli, huwa konkluż li l-banek tal-Istat fir-RPĊ għandhom l-ogħla sehem mis-suq u huma l-atturi predominanti fis-suq finanzjarju taċ-Ċina. Skont ir-Riċerka tal-2006 ta' Deutsche Bank dwar is-settur bankarju tar-RPĊ (38), is-sehem tal-banek tal-Istat jista' jammonta għal iktar minn 2/3 tas-suq Ċiniż. Fuq l-istess suġġett, l-Analiżi tal-Politika Kummerċjali tad-WTO dwar iċ-Ċina osservat li “l-grad għoli ta' sjieda tal-Istat hija karatteristika sinifikanti oħra tas-settur finanzjarju fiċ-Ċina” (39) u “ftit li xejn kien hemm bidla fl-istruttura tas-suq tas-settur bankarju Ċiniż, li huwa ddominat minn banek tal-Istat” (40). Huwa rilevanti li jiġi nnotat li l-ikbar ħames banek kummerċjali tal-Istat (l-Agricultural Bank, il-Bank of China, il-Construction Bank of China, il-Bank of Communications u l-Industrial and Commercial Bank) jidhru li jirrappreżentaw iktar minn nofs is-settur bankarju taċ-Ċina (41). Is-sjieda tal-gvern tal-ikbar ħames banek tal-Istat kienet ikkonfermata wkoll mill-GTĊ fit-tweġiba tiegħu għall-ittra ta' defiċenza.

(162)

Il-Kummissjoni talbet ukoll informazzjoni dwar l-istruttura tal-kontroll tal-gvern f'dawk il-banek Ċiniżi u kemm isegwu l-politiki jew l-interessi tal-gvern fir-rigward tal-industrija fotovoltajka (jiġifieri l-bord tad-diretturi u l-bord tal-azzjonisti, il-minuti tal-laqgħat tal-azzjonisti/diretturi, ċittadinanza tal-azzjonisti/diretturi, il-politiki ta' self u l-valutazzjoni tar-riskju fir-rigward tas-self ipprovdut lill-produtturi esportaturi li kkooperaw). Minkejja dan, kif osservat fil-premessa (139) hawn fuq, il-GTĊ ipprovda biss informazzjoni ferm limitata f'dan ir-rigward u ma ppermettiex li ssir il-verifika ta' ħafna mill-informazzjoni sottomessa. Konsegwentement, il-Kummissjoni kellha tuża l-fatti disponibbli. Fuq il-bażi tad-dejta disponibbli kkonkludiet li dawk il-banek huma kkontrollati mill-gvern permezz ta' sjieda, kontroll amministrattiv tal-imġiba “kummerċjali” taħhom inklużi l-limiti stabbiliti fuq ir-rati tal-imgħax tad-depożiti u tas-self (ara l-premessi (164) — (167) hawn isfel) u f'xi każijiet anki mid-dokumenti statutorji (42).

Id-dejta rilevanti użata sabiex jinġiebu s-sejbiet imsemmija hawn fuq ġejja mill-informazzjoni sottomessa mill-GTĊ, ir-rapporti annwali tal-banek Ċiniżi li kienu sottomessi mill-GTĊ jew pubblikament disponibbli, informazzjoni misjuba mir-Riċerka tal-2006 tad-Deutsche Bank dwar is-settur bankarju taċ-Ċina (43), WTO Policy review on China (Analiżi tal-Politiki tad-WTO dwar iċ-Ċina) (2012) (44), Rapport tal-Bank Dinji dwar iċ-Ċina 2030 (45) jew l-Istħarriġ Ekonomiku tal-OECD tal-2010 dwar iċ-Ċina (46), informazzjoni sottomessa mill-produtturi esportaturi li kkooperaw u informazzjoni eżistenti fl-ilment. Rigward il-banek barranin, sorsi indipendenti jistimaw li jirrappreżentaw sehem minuri tas-settur bankarju Ċiniż u li b'hekk għandhom rwol insinifikanti fis-self għall-politiki; b'informazzjoni rilevanti li tissuġġerixxi li dan jista' jirrappreżenta ammont żgħir ta' 2 % mis-suq Ċiniż (47) Informazzjoni rilevanti pubblikament disponibbli tikkonferma wkoll li l-banek Ċiniżi, partikolarment il-banek kummerċjali l-kbar, għadhom jiddependu fuq azzjonisti tal-Istat u l-gvern għar-riforniment ta' kapital meta jkun hemm nuqqas ta' adegwatezza kapitali minħabba espansjoni tal-kreditu (48).

(163)

Fir-rigward tal-banek li taw self lill-produtturi esportaturi li kkooperaw, il-maġġoranza tagħhom huma banek tal-Istat. Tabilħaqq, fuq il-bażi tal-informazzjoni disponibbli (49) nstab li l-banek tal-Istat u entitajiet oħrajn tal-Istat ipprovdew il-maġġoranza l-kbira tas-self lill-produtturi esportaturi li kkooperaw. Dawn inkludew il-banek kummerċjali u tal-politiki ewlenin fir-RPĊ bħaċ-China Development Bank, il-Bank EXIM, l-Agricultural Bank of China, il-Bank of China, il-Construction Bank of China u l-Industrial and Commercial Bank. Fir-rigward tal-bqija tal-banek tal-Istat, mill-ġdid il-Kummissjoni talbet l-istess informazzjoni msemmija hawn fuq dwar il-kontroll tal-gvern u kemm huma segwiti l-politiki jew l-interessi tal-gvern fir-rigward tal-industrija fotovoltajka. Ma ngħatat ebda informazzjoni dettaljata bħal din. Għalhekk huwa konkluż li l-banek huma kkontrollati mill-gvern. Kontroll sinifikanti bħal dan huwa evidenzjat fost l-oħrajn mill-politika ta' appoġġ governattiva għall-industrija inkwistjoni, li tordna lill-banek sabiex jaġixxu b'mod partikolari ta' appoġġ (ara l-premessa (102) hawn fuq). Għal dawn ir-raġunijiet, il-banek kummerċjali u tal-politiki tal-Istat fir-RPĊ għandhom jitqiesu bħala korpi pubbliċi.

(164)

Sinjal ieħor ta' involviment tal-GTĊ fis-suq finanzjarju Ċiniż huwa r-rwol tal-PBOC fl-istabbiliment tal-limiti speċifiċi fuq il-mod kif ir-rati tal-imgħax jiġu stabbiliti u jiċċaqilqu. Tabilħaqq, l-investigazzjoni stabbilixxiet li l-PBOC kellu regoli speċifiċi li jirregolaw il-mod li bih jiċċaqalqu r-rati tal-imgħax fil-RPĊ. Skont l-informazzjoni disponibbli, dawn ir-regoli huma stabbiliti fiċ-Ċirkulari tal-PBOC fuq il-Kwistjonijiet dwar l-Aġġustament tar-Rati tal-Imgħax fuq Depożiti u Self-Yinfa (2004) Nru 251 (“Ċirkulari 251”). L-istituzzjonijiet finanzjarji huma mitluba jipprovdu r-rati ta' self fi ħdan ċerta medda tar-rata tal-imgħax ta' riferiment tas-self tal-PBOC. Għal self tal-banek kummerċjali u self tal-bank għal politiki mmexxija b'mod kummerċjali ma hemm l-ebda medda limitu superjuri iżda biss medda limitu inferjuri. Għal kooperattivi ta' kreditu urbani u kooperattivi ta' kreditu rurali, hemm kemm meded limitu superjuri kif ukoll inferjuri. Għal self preferenzjali u self li għalih il-Kunsill tal-Istat għandu regolamenti speċifiċi, ir-rati tal-imgħax mhumiex permessi li jiċċaqilqu b'mod li jogħlew. Il-Kummissjoni fittxet kjarifiki mill-GTĊ dwar id-definizzjoni u t-test iddikjarat fiċ-Ċirkulari 251 kif ukoll il-leġiżlazzjoni preċedenti tiegħu (Ċirkulari tal-PBOC dwar l-espansjoni tal-Medda ta' Ċaqliq tar-Rata tal-Imgħax tas-Self tal-Istituzzjoni Finanzjarja — YinFa [2003] Nru 250). Madankollu, kif spjegat fil-premessa (135) hawn fuq, il-GTĊ irrifjuta milli jipprovdi dawn iċ-Ċirkulari li żammew lill-Kummissjoni milli tivverifika l-kontenut tagħhom u tfittex spjegazzjonijiet. La l-GTĊ ma pprovda ebda informazzjoni f'dan ir-rigward li tissuġġerixxi li s-sitwazzjoni nbidlet minn Marzu 2013 meta l-Kummissjoni kkonkludiet l-investigazzjonijiet antisussidji tagħha dwar l-Azzar Miksi b'Materjal Organiku (50) huwa stabbilit li l-PBOC jinfluwenza u huwa involut fl-istabbiliment tar-rati tal-imgħax mill-banek kummerċjali tal-Istat. Il-GTĊ ma pprovda ebda evidenza li nbidlet is-sitwazzjoni kif stabbilita fl-investigazzjonijiet dwar il-Karta Fina Miksija u l-Azzar Miksi b'Materjal Organiku. Għalhekk, fuq il-bażi tal-fatti disponibbli u l-evidenza l-oħra ċċitata hawn fuq, kien konkluż li s-sitwazzjoni dwar il-metodoloġija għad-determinazzjoni tar-rati tal-imgħax kienet l-istess matul l-PI sħiħ.

(165)

Limiti fuq ir-rati tal-imgħax tas-self flimkien mal-limiti massimi imposti fuq ir-rati ta' depożitu joħolqu sitwazzjoni li fiha l-banek għandhom aċċess garantit għal kapital irħis (minħabba r-regolamentazzjoni tar-rati tad-depożiti) u kapaċi jisilfu lill-industriji magħżula b'rati favorevoli.

(166)

Il-banek huma soġġetti għal regoli ġuridiċi wkoll li jeħtiġuhom, fost l-oħrajn, iwettqu n-negozju ta' self tagħhom skont il-ħtiġijiet tal-ekonomija nazzjonali (51), jipprovdu appoġġ bi kreditu lil proġetti mħeġġa (52) jew jagħtu prijorità lill-iżvilupp ta' industriji tat-teknoloġija avvanzata u ġdida (53). Il-banek għandhom obbligu li jsegwu dawn ir-regoli. Il-produtturi esportaturi fil-kampjun jappartjenu għall-kategoriji ta' proġetti mħeġġa kif ukoll għall-kategorija tal-industriji tat-teknoloġija avvanzata u ġdida.

(167)

Bosta sorsi indipendenti ta' informazzjoni jissuġġerixxu li l-involviment tal-Istat fis-settur finanzjarju Ċiniż huw sostanzjali u attwali. Pereżempju s-sejba (i) tad-Dokument ta' Ħidma tal-IMF 2006 tissuġġerixxi li l-liberalizzazzjoni tal-banek fir-RPĊ hija inkompluta u r-riskju ta' kreditu mhuwiex rifless kif xieraq (54); (ii) tar-rapport tal-IMF 2009 xeħtet dawl fuq in-nuqqas ta' liberalizzazzjoni tar-rata tal-imgħax fiċ-Ċina (55); (iii) tar-Rapport dwar il-Pajjiżi tal-IMF 2010 iddikjarat li l-kost tal-kapital fiċ-Ċina huwa relattivament baxx, l-allokazzjoni tal-kreditu kultant hija ddeterminata minn mezzi mhux tal-prezz u tfaddil korporattiv għoli huwa parzjalment marbut ma' kost baxx ta' diversi kontributi ta' fatturi (inklużi kapital u art) (56); (iv) tal-Istħarriġ Ekonomiku tal-OECD 2010 dwar iċ-Ċina (57) u d-Dokument ta' Ħidma tad-Dipartiment Ekonomiku tal-OECD Nru 747 dwar ir-Riformi fis-Settur Finanzjarju taċ-Ċina (58) ddikjarat li s-sjieda tal-istituzzjonijiet finanzjarji għadha ddominata mill-Istat, u dan iqajjem kwistjonijiet dwar kemm id-deċiżjonijiet ta' għoti b'self tal-banek huma purament ibbażati fuq kunsiderazzjonijiet kummerċjali filwaqt li r-rwol tradizzjonali tal-banek jidher li huwa dak ta' aġenziji governattivi b'rabtiet mal-gvern.

(168)

Fuq il-bażi tal-evidenza ta' hawn fuq, huwa konkluż li l-banek kummerċjali u tal-politiki tal-Istat iwettqu funzjonijiet governattivi f'isem il-GTĊ, jiġifieri l-promozzjoni obbligatorja ta' ċerti setturi tal-ekonomija b'konformità mad-dokumenti ta' ppjanar u tal-politiki tal-Istat. Is-sjieda estensiva tal-gvern fil-banek tal-Istat u informazzjoni oħra dwar rabtiet bejn il-banek tal-istat u l-gvern (inkluż in-nuqqas ta' kooperazzjoni tal-GTĊ f'dan ir-rigward) jikkonfermaw li l-banek huma kkontrollati mill-gvern fl-eżerċizzju tal-funzjonijiet pubbliċi tagħhom. Il-GTĊ jeżerċita kontroll sinifikanti fuq il-banek kummerċjali u tal-politiki tal-istat permezz tal-involviment pervasiv tal-gvern fis-settur finanzjarju u r-rekwiżit għall-banek tal-istat li jsegwu l-politiki tal-gvern. Għaldaqstant, il-banek kummerċjali u tal-Politiki tal-istat jitqiesu li huma korpi pubbliċi għaliex għandhom awtorità governattiva, huma vestiti biha u jeżerċitawha.

(169)

Il-Kummissjoni analizzat ukoll jekk il-banek kummerċjali bi sjieda privata fil-RPĊ humiex inkarigati jew ordnati mill-GTĊ sabiex jipprovdu self preferenzjali (sussidjat) lill-produtturi fotovoltajċi, skont it-tifsira tal-Artikolu 3(1)(a)(iv) tar-Regolament bażiku.

(170)

Mit-taqsima ta' hawn fuq dwar l-involviment tal-Istat fis-settur fotovoltajku (premessa (101)) u mis-sejbiet deskritti hawn taħt jidher ċar li l-GTĊ għandu politika biex jipprovdi self preferenzjali lis-settur fotovoltajku, għaliex il-korpi pubbliċi (banek kummerċjali tal-Istat) (59) huma impenjati fit-tali forniment u għandhom post predominanti fis-suq, li jippermettilhom joffru rati tal-imgħax ferm inqas minn tas-suq.

(171)

Il-Liġi tal-ibbankjar kummerċjali [2003] tapplika bl-istess mod għall-banek kummerċjali tal-Istat u l-banek kummerċjali b'sid privat. Pereżempju l-Artikolu 38 ta' din il-liġi jordna lill-Banek kummerċjali kollha (jiġifieri anki dawk li huma ta' sid privat) sabiex “jiddeterminaw ir-rata tas-self skont il-limitu superjuri u inferjuri tar-rata ta' self stabbilita mill-PBOC”, l-Artikolu 34 tal-Liġi tal-Ibbankjar Kummerċjali jordna lill-banek kummerċjali sabiex “iwettqu n-negozju tas-self tagħhom fuq il-ħtiġijiet tal-ekonomija nazzjonali u l-iżvilupp soċjali u fl-ispirtu tal-politiki industrijali tal-Istat”.

(172)

Bosta karti politiċi ta' dokumenti ta' ppjanar tal-gvern u liġijiet jirreferu għas-self preferenzjali lill-industrija PV. Pereżempju, id-Deċiżjoni tal-Kunsill tal-Istat tal-10 ta' Ottubru 2010 biex jitħeġġeġ l-iżvilupp ta' 7 industriji strateġiċi ġodda twiegħed l-espansjoni tal-intensità ta' appoġġ fiskali u ta' politiki fiskali lill-industriji strateġiċi (60) (l-industrija PV hija elenkata fosthom), iħeġġeġ lill-istituzzjonijiet finanzjarji sabiex “jespandu l-appoġġ ta' kreditu” lil dawn l-industriji u sabiex “jużaw il-politiki preferenzjali fiskali bħal kumpens għar-riskju”. Anki l-Pjan Nazzjonali għall-Iżvilupp Xjentifiku u Teknoloġiku fit-Terminu Medju u Twil (2006-2020) li jidentifika l-enerġija Solari u ċ-ċelloli fotovoltajċi fl-oqsma u t-Temi ewlenin ta' prijorità (61) jwiegħed li “jħeġġeġ lill-istituzzjonijiet finanzjarji sabiex jagħtu appoġġ ta' kreditu preferenzjali lil proġetti ta' industrijalizzazzjoni nazzjonali kbar fix-xjenza u t-teknoloġija” u jordna lill-gvernijiet sabiex“jiggwidaw bosta istituzzjonijiet finanzjarji u kapitali privati ħalli jieħdu sehem fl-iżvilupp xjentifiku u teknoloġiku”. Il-Liġi tar-RPĊ dwar il-Progress Xjentifiku u Teknoloġiku (Ordni Nru 82 tal-President tar-RPĊ) tiddefinixxi li l-Istat iħeġġeġ u jiggwida lill-istituzzjonijiet finanzjarji biex jappoġġaw l-iżvilupp tal-industriji tat-teknoloġija avvanzata u ġdida billi jagħtu self u li l-istituzzjonijiet finanzjarji orjentati lejn il-politiki jagħtu prijorità lill-iżvilupp tal-industriji tat-teknoloġija avvanzata u ġdida (62). Skont l-istess liġi, l-istituzzjonijiet finanzjarji orjentati lejn il-politiki, fi ħdan l-ambitu tan-negozju tagħhom, joffru għajnuna speċjali lil proġetti ta' impriżi ta' innovazzjoni indipendenti mħeġġa mill-Istat (63).

(173)

Barra minn hekk, il-limitazzjoni msemmija hawn fuq fuq l-istabbiliment tar-rati tal-imgħax mill-PBOC (il-premessi (164) u (165)) hija vinkolanti wkoll għal banek kummerċjali privati.

(174)

Il-kwotazzjonijiet ta' hawn fuq minn liġijiet u regolamenti rilevanti għas-settur bankarju juru li l-politika tal-GTĊ biex jipprovdi self preferenzjali lill-industrija fotovoltajka testendi anki għal banek kummerċjali privati u l-GTĊ jordnalhom sabiex “iwettqu n-negozju tas-self tagħhom skont il-ħtiġijiet tal-ekonomija nazzjonali u l-iżvilupp soċjali u fl-ispirtu tal-politiki industrijali tal-Istat” (64).

(175)

Il-Kummissjoni talbet informazzjoni rilevanti mill-GTĊ sabiex tivvaluta kif il-banek fir-RPĊ qegħdin jagħmlu valutazzjoni tar-riskju ta' kreditu tal-kumpaniji PV qabel jiddeċiedu jekk jagħtuhomx self jew le u jiddeċiedu fuq il-kundizzjonijiet tas-self li jingħataw. Fl-Appendiċi A għall-kwestjonarju, il-Kummissjoni talbet informazzjoni dwar kif il-banek jieħdu inkunsiderazzjoni r-riskju meta jagħtu self, kif inhi vvalutata l-kredibbiltà kreditizja tal-mutwatarju, x'inhuma l-primjums ta' riskju mitluba għall-kumpaniji/industriji differenti fir-RPĊ mill-bank, liema huma l-fatturi li l-bank jikkunsidra meta jivvaluta l-applikazzjoni għal self, id-deskrizzjoni tal-applikazzjoni għal self u l-proċess ta' approvazzjoni eċċ. Madankollu, la l-GTĊ u lanqas il-banek individwali identifikati fil-kwestjonarju ma pprovdew evidenza f'dan ir-rigward (b'eċċezzjoni waħda msemmija fil-premessa (176) hawn isfel. Il-GTĊ ta biss tweġibiet ta' għamla ġenerali mhux appoġġati minn xi evidenza li jseħħ xi tip ta' valutazzjoni tar-riskju ta' kreditu.

(176)

Matul il-verifiki ta' wieħed mill-banek, il-Kummissjoni rnexxilha tanalizza valutazzjoni tar-riskju. Parti minn dik il-valutazzjoni tar-riskju ta' kreditu għamlet referenza għall-appoġġ tal-gvern għall-kumpaniji solari u l-pjanijiet tal-Istat biex jippromwovi l-industrija fotovoltajka inġenerali u dan il-fatt kien rifless b'mod pożittiv fil-klassifikazzjoni tal-kreditu mogħtija lil din il-kumpanija. Dan huwa eżempju ta' kif il-politika tal-gvern (u s-sussidji diretti lejn ċertu settur) tinfluwenza t-teħid ta' deċiżjonijiet tal-banek meta jiddeċiedu fuq it-termini ta' finanzjament lil kumpaniji solari.

(177)

Il-Kummissjoni talbet ukoll informazzjoni simili mill-produtturi esportaturi li kkooperaw u ppruvat tivverifikaha matul iż-żjarat ta' verifika fuq il-post ta' produtturi esportaturi fil-kampjun. Ħafna mill-produtturi esportaturi wieġbu li l-banek jitolbu ċerti dokumenti u jagħmlu xi tip ta' analiżi ta' riskju ta' kreditu qabel jingħata s-self. Madankollu, ma setgħux isostnu d-dikjarazzjonijiet tagħhom b'xi evidenza. Matul il-verifika fuq il-post, il-Kummissjoni talbet evidenza li l-banek talbu t-tali dokumenti jew li dawn id-dokumenti kienu pprovduti lill-banek mill-kumpaniji, jew xi tip ta' rapport maħruġ mill-banek li juri li saret it-tali analiżi tar-riskju ta' kreditu. Iżda l-gruppi fil-kampjun tal-produtturi esportaturi ma rnexxilhomx jipprovdu t-tali evidenza, u lanqas ma rnexxielhom jipprovdu xi evidenza oħra li ssostni d-dikjarazzjonijiet tagħhom.

(178)

L-informazzjoni dwar il-valutazzjoni tar-riskju ta' kreditu ntalbet b'mod ripetut mill-partijiet interessati peress li titqies kruċjali fost l-oħrajn wara li ttieħdet inkunsiderazzjoni l-informazzjoni msemmija fil-premessa (167) hawn fuq.

(179)

Fid-dawl ta' dak li ntqal hawn fuq, is-sejbiet dwar il-valutazzjoni tar-riskju ta' kreditu fir-RPĊ japplikaw għal banek kummerċjali tal-Istat, banek kummerċjali privati kif ukoll banek tal-politiki. Tabilħaqq l-evidenza ta' hawn fuq twassal għall-konklużjoni li l-banek privati fir-RPĊ huma meħtieġa jsegwu politiki tal-gvern fir-rigward tas-self, b'mod partikolari għas-settur PV u li jaġixxu bl-istess mod bħal banek tal-Istat, li fil-premessa (168) instabu li huma korpi pubbliċi. Għaldaqstant huwa konkluż li l-banek privati huma inkarigati u ordnati mill-GTĊ sabiex iwettqu funzjonijiet normalment vestiti fil-gvern, skont it-tifsira tal-Artikolu 3(1)(a)(iv) tar-Regolament bażiku.

(180)

Barra minn hekk, l-evidenza ta' hawn fuq turi li anki jekk il-banek tal-Istat ma tqisux li huma korpi pubbliċi, xorta kienu jitqiesu bħala inkarigati u ggwidati mill-GTĊ sabiex iwettqu funzjonijiet normalment vestiti fil-gvern, skont it-tifsira tal-Artikolu 3(1)(a)(iv) tar-Regolament bażiku.

(181)

Mill-informazzjoni miġbura matul din l-investigazzjoni, jista' jiġi konkluż li s-sehem tal-banek tal-Istat jammonta għal iktar minn 2/3 mis-suq Ċiniż. L-ikbar ħames banek kummerċjali tal-Istat (l-Agricultural Bank, il-Bank of China, il-Construction Bank of China, il-Bank of Communications u l-Industrial and Commercial Bank ) jirrappreżentaw iktar minn nofs is-settur bankarju taċ-Ċina (65). Barra minn hekk, iċ-China Development Bank u ċ-China Export-Import Banks huma kompletament tal-Istat. Dawn is-seba' banek ipprovdew il-maġġoranza l-kbira ta' self lit-tmien produtturi esportaturi fil-kampjun fil-kawża tal-Pannelli solari. Din is-sjieda tal-Istat pervasiva flimkien mat-tfixkil tas-suq finanzjarju Ċiniż u bil-politika tal-Gvern Ċiniż li jidderieġi flus irħas lejn industriji partikolari, ixekklu l-kundizzjonijiet ekwi fil-kummerċ internazzjonali u jipprovdu vantaġġ inġust lill-produtturi Ċiniżi.

(182)

Il-banek fir-RPĊ mhumiex kompletament ħielsa sabiex jiddeċiedu dwar il-kundizzjonijiet tas-self. Fir-rigward tar-rati tal-imgħax huma obbligati jsegwu l-limiti stabbilit mill-People's Bank of China (PBOC). Dawn il-limiti, flimkien mal-limiti massimi imposti fuq ir-rati ta' depożitu joħolqu sitwazzjoni li fiha l-banek iggarantixxew aċċess għal kapital irħis (minħabba r-regolamentazzjoni tar-rati ta' depożitu) u jistgħu jisilfuh b'rati favorevoli lil industriji partikolari.

(183)

Il-banek huma soġġetti għal regoli ġuridiċi wkoll li jeħtiġuhom, fost l-oħrajn, iwettqu n-negozju ta' self tagħhom skont il-ħtiġijiet ta' ekonomija nazzjonali (66), jipprovdu appoġġ bi kreditu lil proġetti mħeġġa (67) jew jagħtu prijorità lill-iżvilupp ta' industriji tat-teknoloġija avvanzata u ġdida (68). Il-banek huma obbligati jsegwu dawn ir-regoli.

(184)

Skont sejbiet riċenti, ċerti banek kummerċjali kbar fir-RPĊ ingħataw aċċess għal riżervi tal-kambju tal-Istat (69). Dan inaqqas b'mod sinifikanti l-kost ta' kapital tagħhom u dawn il-“flus irħas” jintużaw għal self f'USD u EUR għal kumpaniji u proġetti partikolari skont il-politika “investi barra”. B'hekk, kapaċi joffru kundizzjonijiet li banek kummerċjali normali ma jistgħux.

(185)

Tfixkil kbir ieħor fil-finanzjament tal-industrija fotovoltajka huwa l-pożizzjoni privileġġata speċjali taċ-China Development Bank (“CDB”) li huwa l-mutwanti ewlieni għal din l-industrija u pprovda ammont qawwi ta' self u linji ta' kreditu lill-produtturi esportaturi fil-kampjun. Is-CDB huwa ffinanzjat kważi kollu minn bejgħ ta' bonds minflok minn depożiti u, wara l-Ministeru tal-Finanzi, huwa t-tieni l-ikbar emittent ta' bonds fil-pajjiż. Permezz ta' dan il-mekkaniżmu speċjali, is-CDB kapaċi jiffinanzja lilu nnifsu bl-irħis u wara jkun kapaċi joffri self b'kundizzjonijiet preferenzjali lil ċerti industriji (70).

(186)

L-ilmentatur allega li l-GTĊ jissussidja l-industrija PV tiegħu permezz ta' self preferenzjali u kreditu mmirat.

(187)

Id-dispożizzjonijiet legali li ġejjin jipprovdu għal self preferenzjali fiċ-Ċina: Liġi tar-RPĊ dwar il-Banek Kummerċjali, Regoli Ġenerali dwar is-Self (implimentati mill-People's Bank of China), id-Deċiżjoni Nru 40 tal-Kunsill tal-Istat dwar il-Promulgamazzjoni u l-Implimentazzjoni ta' Dispożizzjonijiet Temporanji dwar il-Promozzjoni tal-Aġġustament tal-Istruttura Industrijali.

(188)

Rigward it-totalità tal-evidenza, huwa konkluż li l-maġġoranza assoluta tas-self lill-gruppi fil-kampjun ta' produtturi esportaturi hija pprovduta minn banek tal-Istat li nstab li huma korpi pubbliċi fil-premessa (168) hawn fuq, għaliex huma vestiti b'awtorità governattiva u jeżerċitaw funzjonijiet governattivi. Hemm iktar evidenza li effettivament dawn il-banek jeżerċitaw awtorità governattiva peress li, kif spjegat fil-premessa (164), hemm intervent ċar mill-Istat (jiġifieri l-PBOC) fil-mod kif il-banek kummerċjali jieħdu deċiżjonijiet dwar ir-rati tal-imgħax għal self mogħti lil kumpaniji Ċiniżi. F'dawn iċ-ċirkustanzi, il-prattiki ta' għoti b'self ta' dawn l-entitajiet huma direttament attribwibbli lill-gvern. Il-fatt li l-banek jeżerċitaw awtorità governattiva huwa kkonfermat ukoll permezz tal-Artikoli 7 u 15 tar-Regoli Ġenerali dwar is-Self (implimentati mill-PBOC), id-Deċiżjoni 40 u l-Artikolu 34 tal-Liġi dwar il-Banek Kummerċjali jaġixxu fir-rigward tat-twettiq tal-politiki industrijali tal-gvern. Hemm ukoll għadd sostanzjali ta' evidenza ċirkustanzjali, appoġġata minn studji u rapporti oġġettivi, li ammont kbir ta' intervent tal-gvern għadu preżenti fis-sistema finanzjarja Ċiniża kif diġà ġie spjegat fil-premessi (172) u (178) hawn fuq. Fl-aħħar, il-GTĊ naqas milli jipprovdi informazzjoni li kienet tippermetti fehim aħjar tar-relazzjoni tal-banek tal-Istat mal-gvern kif spjegat fil-premessi (139) u (140). B'hekk, fil-każ ta' self ipprovdut minn banek kummerċjali tal-istat fil-RPĊ, il-Kummissjoni tikkonkludi li hemm kontribuzzjoni finanzjarja għall-produtturi tal-PV fil-forma ta' trasferiment dirett ta' fondi mill-gvern skont it-tifsira tal-Artikolu 3(1)(a)(i) tar-Regolament bażiku. Barra minn hekk, l-istess evidenza turi li l-SOCBs (kif ukoll banek privati) huma inkarigati jew iggwidati mill-gvern u b'hekk dan ifisser li teżisti kontribuzzjoni finanzjarja skont it-tifsira tal-Artikolu 3(1)(a)(iv) tar-Regolament bażiku.

(189)

Fid-dawl tal-analiżi fil-premessi minn (169) sa (178) hawn fuq, huwa ddeterminat ukoll li banek privati huma inkarigati u ggwidati mill-GTĊ sabiex jipprovdu self lill-produtturi PV u li teżisti kontribuzzjoni finanzjarja skont l-Artikoli 3(1)(a)(i) u 3(1)(a)(iv) tar-Regolament bażiku.

(190)

Benefiċċju skont it-tifsira tal-Artikoli 3(2) u 6(b) tar-Regolament bażiku jeżisti sal-punt li s-self tal-gvern, jew self minn korpi privati inkarigati jew iggwidati mill-gvern, jingħataw f'termini iktar favorevoli minn dawk li r-riċevitur jista' jikseb fis-suq. Self mhux governattiv fir-RPĊ ma jipprovdix punt ta' riferiment xieraq tas-suq, peress li ġie stabbilit li banek privati huma inkarigati u ggwidati mill-GTĊ u għalhekk huwa supponut li jsegwu l-prattiki ta' self tal-banek tal-Istat. Għalhekk, il-punti ta' riferiment issawru billi ntuża l-metodu spjegat fil-premessi (198) — (200) hawn isfel. L-użu ta' dan il-punt ta' riferiment juri li s-self jingħata lis-settur PV b'termini u kundizzjonijiet inqas minn dawk tas-suq.

(191)

L-industrija PV tappartjeni għall-kategorija mħeġġa skont id-Deċiżjoni Nru 40. Id-Deċiżjoni Nru 40, hija Ordni mill-Kunsill tal-Istat, li huwa l-ogħla korp amministrattiv fir-RPĊ u f'dak ir-rigward id-deċiżjoni hija legalment vinkolanti għal korpi pubbliċi oħrajn u l-operaturi ekonomiċi. Jikklassifika s-setturi industrijali fi “Proġetti Mħeġġa, Restrittivi u Eliminati”. Dan l-Att jirrappreżenta linja gwida tal-politika industrijali li flimkien mal-Katalogu tad-Direttorju juri kif il-GTĊ iżomm politika ta' tħeġġiġ u appoġġ lil gruppi ta' impriżi jew industriji, bħall-industrija PV/tal-Enerġija l-Ġdida, klassifikati mill-Katalogu tad-Direttorju bħala “Industrija mħeġġa”. Fir-rigward tan-numru ta' industriji elenkati bħala “Mħeġġa”, huwa osservat li dawn jirrappreżentaw sehem biss mill-ekonomija Ċiniża. Barra minn hekk, huma biss ċerti attivitajiet fi ħdan dawn is-setturi mħeġġa li jingħataw status ta' “mħeġġa”. Id-Deċiżjoni Nru 40 tistipula wkoll fl-Artikolu 17 li l-“Proġetti ta' investiment imħeġġa” għandhom jibbenefikaw minn privileġġi u inċentivi speċifiċi, fost l-oħrajn, minn appoġġ finanzjarju. Min-naħa l-oħra, b'referenza għall-“Proġetti Restrittivi u Eliminati”, id-Deċiżjoni Nru 40 tagħti s-setgħa lill-awtoritajiet statali sabiex jintervjenu direttament biex jirregolaw is-suq. L-Artikoli 18 u 19 jipprovdu li l-awtorità rilevanti żżomm lill-istituzzjonijiet finanzjarji milli jagħtu self lit-tali “Proġetti Restrittivi u Eliminati”. Minn dan ta' hawn fuq jidher ċar li d-Deċiżjoni Nru 40 tipprovdi regoli vinkolanti għall-istituzzjonijiet ekonomiċi kollha fil-forma ta' direttivi fuq il-promozzjoni u l-appoġġ tal-industriji mħeġġa, li fosthom hemm l-industrija PV.

(192)

Kif spjegat fil-premessa (172) hawn fuq, il-GTĊ jalloka self preferenzjali lin-numru limitat ta' industriji u l-industrija PV hija waħda minnhom. Wara li jittieħed inkunsiderazzjoni dan kollu li ntqal fuq jidher biċ-ċar li l-awtoritajiet jippermettu biss lill-istituzzjonijiet finanzjarji jipprovdu self preferenzjali lil numru limitat ta' industriji/kumpaniji li jikkonformaw mal-politiki rilevanti tal-GTĊ. Fuq il-bażi tal-evidenza fil-fajl u fin-nuqqas tal-kooperazzjoni mill-GTĊ f'din il-kwistjoni, huwa konkluż li s-sussidji fil-forma ta' self preferenzjali mhumiex ġeneralment disponibbli u b'hekk huma speċifiċi skont it-tifsira tal-Artikolu 4(2)(a) tar-Regolament bażiku. Barra minn hekk, ma kien hemm ebda evidenza sottomessa minn xi waħda mill-partijiet interessati li tissuġġerixxi li s-sussidju huwa bbażat fuq kriterji jew kundizzjonijiet oġġettivi skont l-Artikolu 4(2)(b) tar-Regolament bażiku.

(193)

L-investigazzjoni wriet li l-produtturi esportaturi kollha fil-kampjun ibbenefikaw mis-self preferenzjali fil-perjodu tal-investigazzjoni.

(194)

Skont dan, il-finanzjament tal-industrija PV għandu jitqies bħala sussidju.

(195)

Fid-dawl tal-eżistenza ta' kontribuzzjoni finanzjarja, benefiċċju għall-produtturi esportaturi u speċifiċità, dan is-sussidju għandu jitqies kumpensabbli.

(196)

L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri, li ntwera li jeżisti matul il-PI. Skont l-Artikolu 6(b) tar-Regolament bażiku, il-benefiċċju mogħti lir-riċevituri jitqies li huwa d-differenza bejn l-ammont li l-kumpanija tħallas fuq is-self tal-gvern u l-ammont li l-kumpanija kieku tħallas għal self kummerċjali paragunabbli li jista' jinkiseb mis-suq.

(197)

Kif spjegat hawn fuq (premessa (190)), peress li s-self ipprovdut mill-banek Ċiniżi jirrifletti intervent sostanzjali tal-gvern fis-settur bankarju u ma jirriflettix rati li jinstabu f'suq funzjonali, issawwar punt ta' riferiment xieraq tas-suq billi jintuża l-metodu deskritt hawn isfel. Barra minn hekk, minħabba n-nuqqas ta' kooperazzjoni mill-GTĊ, il-Kummissjoni rrikorriet ukoll għal fatti disponibbli sabiex tistabbilixxi rata ta' mgħax normattiva xierqa.

(198)

Meta jissawwar punt ta' riferiment xieraq għal self denominat f'RMB, jitqies raġonevoli li jiġu applikati r-rati tal-imgħax taċ-Ċina, aġġustati biex jirriflettu r-riskju normali tas-suq. Tabilħaqq, f'kuntest fejn l-istat finanzjarju attwali tal-esportaturi ġie stabbilit f'suq imfixkel u ma hemm ebda informazzjoni kredibbli mill-banek Ċiniżi dwar il-kejl tar-riskju u l-istabbiliment ta' klassifikazzjonijiet ta' kreditu, jitqies neċessarju li l-kredibbiltà kreditizja tal-esportaturi Ċiniżi ma titteħidx b'valur nominali, iżda li jiġi applikat mark-up biex ikun rifless l-impatt potenzjali tas-suq imfixkel taċ-Ċina fuq is-sitwazzjoni finanzjarja tagħhom.

(199)

L-istess sitwazzjoni tapplika għas-self denominat f'muniti barranin. Il-bonds korporattivi klassifikati BB b'denominazzjonijiet rilevanti maħruġa matul il-PI intużaw bħala punt ta' riferiment.

(200)

Fir-rigward ta' dak li ntqal hawn fuq, kif spjegat fil-premessi minn (138) sa (140), kemm il-GTĊ kif ukoll il-produtturi esportaturi li kkooperaw intalbu jipprovdu informazzjoni dwar il-politiki ta' self tal-banek Ċiniżi u l-mod kif is-self ġie attribwit lill-produtturi esportaturi. Għad li ntalbet ripetutament, din l-informazzjoni ma nkisbitx. B'hekk, fid-dawl ta' dan in-nuqqas ta' kooperazzjoni u t-totalità tal-fatti disponibbli, u skont id-dispożizzjonijiet tal-Artikolu 28(6) tar-Regolament bażiku, jitqies xieraq li jiġi kkunsidrat li d-ditti kollha fiċ-Ċina jingħataw l-ogħla grad ta' bonds ta' “Grad mhux ta' investiment” biss (BB mingħand Bloomberg) u japplikaw il-primjum xieraq mistenni fuq bonds maħruġa minn ditti b'din il-klassifikazzjoni għar-rata ta' self standard tal-People's Bank of China. Il-benefiċċju għall-produtturi esportaturi ġie kkalkolat billi ttieħed id-differenzjali tar-rata tal-imgħax, mogħti bħala perċentwal, immultiplikat bl-ammont pendenti tas-self, jiġifieri l-imgħax mhux imħallas matul l-PI. Imbagħad dan l-ammont ġie allokat fuq il-fatturat totali tal-produtturi esportaturi li kkooperaw.

(201)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(202)

L-ilmentatur allega li l-banek Ċiniżi estendew linji ta' kreditu sproporzjonati lill-esportaturi Ċiniżi tal-prodott ikkonċernat. L-investigazzjoni kkonfermat li tabilħaqq, il-kumpaniji kollha investigati rċevew linji ta' kreditu kbar ħafna mill-banek Ċiniżi li f'ħafna każijiet ingħataw b'xejn jew soġġetti għal tariffi żgħar ħafna. F'ċirkustanzi normali tas-suq, it-tali linji ta' kreditu huma soġġetti għal tariffi sostanzjali ta' impenn u amministrazzjoni li jippermettu lill-banek sabiex jikkumpensaw għall-kostijiet u r-riskji.

(203)

Ir-rapport tal-panil EC-Aircraft ikkonferma li t-tali linji ta' kreditu, minbarra l-effetti tas-self individwali, jistgħu jkunu trasferiment dirett potenzjali ta' fondi skont l-Artikolu 3(1)(a) (i) tar-Regolament bażiku u b'hekk, kontribuzzjonijiet finanzjarji. Il-panil sab li l-benefiċċju ta' trasferiment potenzjali ta' fondi ġej mis-sempliċi eżistenza ta' obbligu li jsir trasferiment dirett ta' fondi. Il-panil sab ukoll li linja ta' kreditu tista', minnha nfisha, tagħti benefiċċju lid-ditta riċevitriċi u b'hekk kienet trasferiment potenzjali ta' fondi separata minn kwalunke trasferiment dirett ta' fondi fil-forma ta' self individwali (71).

(204)

Il-linji ta' kreditu kienu pprovduti lill-produtturi esportaturi fil-kampjun mill-istess banek bħala s-self preferenzjali deskritt hawn fuq. Kif stabbilit hawn fuq, dawn il-banek huma korpi pubbliċi (il-premessi minn (158) sa (166)) jew huma inkarigati jew iggwidati mill-GTĊ sabiex jipprovdu finanzjament preferenzjali lill-industrija PV (il-premessi minn (169) sa (178)).

(205)

Kif spjegat hawn fuq (il-premessi minn (158) sa (185)) is-suq Ċiniż huwa mfixkel minn liġijiet u prattiki ta' banek tal-Istat u nstab li f'ħafna każijiet, il-linji ta' kreditu kienu pprovduti b'xejn jew soġġetti għal tariffi żgħar ħafna. F'ċirkustanzi normali tas-suq, it-tali linji ta' kreditu huma soġġetti għal tariffi sostanzjali ta' impenn u amministrazzjoni li jippermettu lill-banek sabiex jikkumpensaw għall-kostijiet u r-riskji.

(206)

L-ammont tal-benefiċċju huwa rappreżentat mit-tariffi normalment applikabbli għal-linji ta' kreditu kummerċjali estiżi għall-kumpaniji li minnhom inħelsu l-produtturi esportaturi fil-kampjun f'ħafna każijiet. Il-Kummissjoni użat it-tariffi applikati għal-linja ta' kreditu estiża għal wieħed mill-produtturi esportaturi fil-kampjun minn bank kummerċjali barrani.

(207)

L-industrija PV tappartjeni għall-kategorija mħeġġa skont id-Deċiżjoni Nru 40. Id-Deċiżjoni Nru 40 hija Ordni mill-Kunsill tal-Istat, li huwa l-ogħla korp amministrattiv fir-RPĊ u f'dak ir-rigward id-deċiżjoni hija legalment vinkolanti għal korpi pubbliċi oħrajn u l-operaturi ekonomiċi. Jikklassifika s-setturi industrijali fi “Proġetti Mħeġġa, Restrittivi u Eliminati”. Dan l-Att jirrappreżenta linja gwida tal-politika industrijali li flimkien mal-Katalogu tad-Direttorju juri kif il-GTĊ iżomm politika ta' tħeġġiġ u appoġġ lil gruppi ta' impriżi jew industriji, bħall-industrija PV/tal-Enerġija l-Ġdida, klassifikati mill-Katalogu tad-Direttorju bħala “Industrija mħeġġa”. Fir-rigward tan-numru ta' industriji elenkati bħala “Mħeġġa”, huwa osservat li dawn jirrappreżentaw sehem biss mill-ekonomija Ċiniża. Barra minn hekk, huma biss ċerti attivitajiet fi ħdan dawn is-setturi mħeġġa li jingħataw status ta' “mħeġġa”. Id-Deċiżjoni Nru 40 tistipula wkoll fl-Artikolu 17 li l-“Proġetti ta' investiment imħeġġa” għandhom jibbenefikaw minn privileġġi u inċentivi speċifiċi, fost l-oħrajn, minn appoġġ finanzjarju. Min-naħa l-oħra, b'referenza għall-“Proġetti Restrittivi u Eliminati”, id-Deċiżjoni Nru 40 tagħti s-setgħa lill-awtoritajiet statali sabiex jintervjenu direttament biex jirregolaw is-suq. L-Artikoli 18 u 19 jipprovdu li l-awtorità rilevanti żżomm lill-istituzzjonijiet finanzjarji milli jagħtu self lit-tali “Proġetti Restrittivi u Eliminati”. Minn dan ta' hawn fuq jidher ċar li d-Deċiżjoni Nru 40 tipprovdi regoli vinkolanti għall-istituzzjonijiet ekonomiċi kollha fil-forma ta' direttivi fuq il-promozzjoni u l-appoġġ tal-industriji mħeġġa, li fosthom hemm l-industrija PV.

(208)

Kif spjegat fil-premessi (172) u (192) hawn fuq il-GTĊ jalloka s-self preferenzjali li l-forniment ta' linji ta' kreditu huwa parti essenzjali minnu għan-numru limitat ta' industriji. L-industrija PV tappartjeni għal dan il-grupp ta' industriji u tibbenefika minn self preferenzjali diskriminatorju.

(209)

Jekk jittieħed dan kollu f'kunsiderazzjoni, jidher biċ-ċar li l-awtoritajiet iħallu lill-istituzzjonijiet finanzjarji jipprovdu linji ta' kreditu preferenzjali lil numru limitat ta' industriji/kumpaniji li jikkonformaw mal-politiki rilevanti tal-GTĊ biss. Fuq il-bażi tal-evidenza fil-fajl u fin-nuqqas tal-kooperazzjoni mill-GTĊ fuq din il-kwistjoni, huwa konkluż li s-sussidji fil-forma ta' linji ta' kreditu sproporzjonati mhumiex ġeneralment disponibbli u għalhekk huma speċifiċi skont it-tifsira tal-Artikolu 4(2)(a) tar-Regolament bażiku. Barra minn hekk, ma kien hemm ebda evidenza sottomessa minn xi waħda mill-partijiet interessati li tissuġġerixxi li s-sussidju huwa bbażat fuq kriterji jew kundizzjonijiet oġġettivi skont l-Artikolu 4(2)(b) tar-Regolament bażiku. (c)

(210)

L-investigazzjoni wriet li l-gruppi kollha ta' produtturi esportaturi fil-kampjun ibbenefikaw minn linji ta' kreditu pprovduti b'xejn jew b'rati inqas minn tas-suq fil-perjodu tal-investigazzjoni.

(211)

B'hekk, l-estensjoni tat-tali linji ta' kreditu għall-industrija PV għandha titqies bħala sussidju.

(212)

Fid-dawl tal-eżistenza ta' kontribuzzjoni finanzjarja, benefiċċju għall-produtturi esportaturi u speċifiċità, dan is-sussidju għandu jitqies kumpensabbli.

(213)

Il-forniment ta' linji ta' kreditu b'xejn jew b'tariffi inqas minn dawk tas-suq jitqies bħala forniment ta' servizzi finanzjarji (l-Artikolu 3(1)(a)(iii) tar-Regolament bażiku) għal remunerazzjoni inqas minn adegwata. L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri, li ntwera li jeżisti matul il-PI. Minħabba t-tfixkil tas-suq deskritt fil-premessi minn (158) sa (185) hawn fuq, l-adegwatezza tar-remunerazzjoni għas-servizzi finanzjarji (f'dan il-każ, forniment ta' linji ta' kreditu) ma setgħetx tkun iddeterminata fir-rigward tal-kundizzjonijiet prevalenti tas-suq fir-RPĊ. Għaldaqstant, b'konformità mal-Artikolu 6(d)(ii) tar-Regolament bażiku, il-benefiċċju mogħti lir-riċevituri jitqies li huwa d-differenza bejn l-ammont li l-kumpanija tħallas għall-forniment ta' linji ta' kreditu minn banek Ċiniżi u l-ammont li l-kumpanija kieku jkollha tħallas għal linja ta' kreditu kummerċjali paragunabbli li tinkiseb mis-suq. Il-linji ta' kreditu jistgħu jitqiesu wkoll bħala trasferiment potenzjali ta' fondi skont l-Artikolu 3(1)(a)(i) tar-Regolament bażiku.

(214)

Wieħed mill-produtturi esportaturi fil-kampjun kiseb linja ta' kreditu mill-bank li l-kwartieri ġenerali tiegħu huma stabbiliti f'ġurisdizzjoni finanzjarja oħra u mhux tar-RPĊ, u din il-linja ta' kreditu kienet soġġetta għal tariffi ta' impenn u arranġament kif inhi l-prattika normali fis-swieq finanzjarji dinjin. Għad li l-linja ta' kreditu ġiet estiża mis-sussidjarju Ċiniż tal-bank inkwistjoni, titqies li hija indikatur raġonevoli għal punt ta' riferiment. Tqies xieraq li jintużaw it-tariffi applikati għal din il-linja ta' kreditu bħala punt ta' riferiment skont l-Artikolu 6(d)(ii) tar-Regolament bażiku.

(215)

Il-livell tat-tariffi użati bħala punt ta' riferiment ġie applikat prorata għall-ammont ta' kull linja ta' kreditu inkwistjoni biex jinkiseb l-ammont tas-sussidju (nieqes kwalunkwe tariffa li tħallset). F'każijiet fejn id-durata tal-linja ta' kreditu kienet ta' iktar minn sena, l-ammont totali tas-sussidju kien allokat fuq id-durata tal-linja ta' kreditu u ammont xieraq attribwit għall-PI.

(216)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(217)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(218)

L-ilmentatur allega li ċ-China Export & Credit Insurance Corporation (“Sinosure”) tipprovdi assigurazzjoni tal-kreditu għall-esportazzjoni b'termini preferenzjali lil produtturi tal-prodott ikkonċernat fost l-oħrajn permezz ta' programm imsemmi “Green Express”. Skont l-ilment, l-assigurazzjoni tal-kreditu għall-esportazzjoni ta' Sinosure lanqas biss ma hi adegwata sabiex tkopri l-ispejjeż operazzjonali u t-telf operatorju fit-tul ta' dan il-programm. (b)

(219)

Kif stipulat fil-premessi (104) u (105) hawn fuq, il-Kummissjoni talbet informazzjoni fil-kwestjonarju, fl-ittra ta' defiċenza u matul iż-żjara ta' verifika fuq il-post għand il-GTĊ u Sinosure li ma ngħatatx mill-GTĊ u/jew Sinosure.

(220)

Il-Kummissjoni talbet il-qafas istituzzjonali u d-dokumenti rilevanti li jirregolaw l-operazzjonijiet ta' Sinosure bħala l-assiguratur tal-kreditu għall-esportazzjoni uffiċjali tal-Istat. Il-GTĊ issottometta biss Notifika maħruġa b'mod konġunt mill-Ministeru tal-Kummerċ (“MOFCOM”) u Sinosure fl-2004, iżda naqas milli jissottometti għadd ta' dokumenti rilevanti oħrajn inkluż, pereżempju, l-hekk imsejjaħ Pjan 840 inkluż fin-Notifika mill-Kunsill tal-Istat tas-27 ta' Mejju 2009 (72).

(221)

Fir-rigward tal-verifika tat-tweġiba għall-kwestjonarju u l-Anness 1 dwar Sinosure, il-Kummissjoni ma setgħetx tikseb għadd ta' dokumenti u tivverifika għadd ta' elementi mitluba fuq il-post. B'mod partikolari, Sinosure ma ssottomettietx l-informazzjoni u l-evidenza li ġejjin mitluba mill-Kummissjoni: (a) id-dikjarazzjonijiet finanzjarji tal-2012, li, kien irrapportat, ma kinux għadhom disponibbli fuq il-websajt ta' Sinosure; (b) id-dokumentazzjoni rilevanti dwar l-assigurazzjoni tal-kreditu għall-esportazzjoni ma' tnejn mill-esportaturi li kkooperaw fil-kampjun, inklużi kuntratti, valutazzjoni tar-riskju, korrispondenza u prova tal-pagamenti ta' primjums; (c) informazzjoni speċifika fuq il-maniġers superjuri maħtura mill-Kunsill tal-Istat; (d) evidenza dwar l-elementi u l-vantaġġi elenkati fin-Notifika tal-2004 b'mod konġunt maħruġa minn MOFCOM u Sinosure, inkluż dwar l-approvazzjoni tal-limitazzjoni, dwar il-flessibbiltà tar-rata u l-iskont fil-limiti tal-medda ta' ċaqliq tal-primjum; (e) evidenza dwar il-kostijiet u l-profitti operazzjonali fit-tul tal-attività ta' assigurazzjoni tal-kreditu għall-esportazzjoni; (f) evidenza dwar il-valutazzjoni tas-sitwazzjoni tas-suq fis-settur fotovoltajku.

(222)

Il-Kummissjoni lanqas ma setgħet tivverifika għadd ta' elementi inklużi fit-tweġiba għall-kwestjonarju dwar l-operazzjonijiet ta' Sinosure, inklużi b'mod partikolari t-tweġibiet tagħha dwar il-valutazzjoni tar-riskju, it-tfassil propju tal-primjum u l-proċess ta' applikazzjoni u approvazzjoni, peress li Sinosure rrifjutat milli tiddiskuti l-kuntratti speċifiċi mal-esportaturi li kkooperaw fil-kampjun. Sinosure lanqas ma rnexxielha tiċċara jew tissottometti dokumenti ta' appoġġ għal ċerti inkonsistenzi fil-figuri jew elementi oħrajn li jinsabu fit-tweġibiet tagħha għall-kwestjonarju u l-ittra ta' defiċenza identifikati mill-Kummissjoni.

(223)

Il-GTĊ u Sinosure ppruvaw jiġġustifikaw dan in-nuqqas ta' kooperazzjoni fuq il-bażi ta' tħassib dwar il-kunfidenzjalità matul iż-żjara ta' verifika u fl-ittra tal-GTĊ tat-3 ta' Ġunju 2013. F'dan ir-rigward, l-ittra ta' qabel il-verifika u l-korrispondenza sussegwenti bil-posta elettronika għamluha ferm ċara li l-Kummissjoni talbet sabiex il-verifika tkun sinifikanti u ovvjament tieħu l-prekawzjonijiet neċessarji kollha biex tħares l-informazzjoni kunfidenzjali sottomessa jew sempliċiment ipprovduta għal spezzjoni, skont l-obbligu ġuridiku tagħha li tħares din l-informazzjoni żgurat mir-regoli stretti rilevanti tal-UE. Fir-rigward tad-dokumenti li Sinosure ppruvat tissottometti ferm wara li ntemmet iż-żjara ta' verifika u li għalihom naqset milli tawtorizza verifika xierqa mill-Kummissjoni, dawn ma jistgħux jittieħdu inkunsiderazzjoni peress li tħejjew b'mod speċjali għall-investigazzjoni u l-Kummissjoni ma setgħetx tivverifika d-dokumenti sors.

(224)

Minħabba dan in-nuqqas ta' kooperazzjoni mill-GTĊ u Sinosure, il-Kummissjoni ma setgħetx tivverifika għadd ta' elementi dwar il-forniment ta' kopertura ta' assigurazzjoni tal-kreditu għall-esportazzjoni minn Sinosure lill-produtturi esportaturi fil-kampjun li kkooperaw tal-prodott ikkonċernat. Għalhekk, uħud mis-sejbiet tal-Kummissjoni huma bbażati fuq l-informazzjoni disponibbli fuq ir-rekord b'konformità mal-Artikolu 28 tar-Regolament bażiku. (c)

(225)

L-investigazzjoni stabbilixxiet li Sinosure hija korp pubbliku skont it-tifsira tal-Artikolu 2(b) tar-Regolament bażiku u tal-ġurisprudenza rilevanti tad-WTO (73) peress li għandha awtorità governattiva, teżerċitaha jew hija vestita biha. B'mod partikolari, il-GTĊ jeżerċita kontroll sinifikanti fuq Sinosure (74) u Sinosure teżerċita awtorità governattiva meta twettaq funzjonijiet governattivi.

(226)

Il-Kummissjoni tosserva li l-attività tal-assigurazzjoni tal-kreditu għall-esportazzjoni minn Sinosure hija parti integrali mis-settur finanzjarju usa' fejn huwa stabbilit li l-intervent tal-gvern ixekkel u jfixkel direttament l-andament normali tas-suq finanzjarju fir-RPĊ (ara l-premessa (185) u ta' warajha hawn fuq).

(227)

Sinosure twettaq funzjonijiet governattivi fir-rwol tagħha bħala l-unika istituzzjoni uffiċjali għall-assigurazzjoni tal-kreditu għall-esportazzjoni fir-RPĊ. Għaldaqstant, għandha pożizzjoni monopolistika fis-suq tal-assigurazzjoni tal-kreditu għall-esportazzjoni. Il-kumpanija kkonfermat li dan is-suq mhuwiex miftuħ, għad li hemm xi kompetituri internazzjonali li jinnegozjaw indirettament fir-RPĊ.

(228)

Il-gvern jeżerċita sjieda u kontroll finanzjarju sħaħ fuq Sinosure. Sinosure hija sjieda unika tal-Istat li hija proprjetà 100 % tal-Kunsill tal-Istat. Il-kapital irreġistrat ta' RMB 4 biljun ġej mill-fond ta' riskju tal-assigurazzjoni tal-kreditu għall-esportazzjoni b'konformità mal-baġit tal-finanzi tal-Istat. Barra minn hekk, fl-2011 l-Istat injetta RMB 20 biljun permezz taċ-China Investment Corporation, il-fond ta' investimenti sovrani taċ-Ċina. (75) L-Istatut ta' Assoċjazzjoni (“AoA”) jiddikjara li d-dipartiment tan-negozju kompetenti tal-kumpanija huwa l-Ministeru tal-Finanzi, u jeħtieġ ukoll li l-kumpanija tissottometti rapporti finanzjarji u kontabilistiċi u r-rapport tal-baġit fiskali lill-Ministeru tal-Finanzi għal analiżi u approvazzjoni.

(229)

Fir-rigward tal-kontroll tal-gvern, bħala sjieda unika tal-Istat, Sinosure ma għandhiex Bord tad-Diretturi. Rigward il-Bord tas-Superviżuri, is-superviżuri kollha jinħatru mill-Kunsill tal-Istat u jeżegwixxu dmirijiethom skont ir-“Regolament Interim dwar il-Bord tas-Superviżuri ta' Istituzzjoni Finanzjarja Importanti tal-Istat.” Il-maniġment superjuri ta' Sinosure huwa maħtur ukoll mill-gvern. Ir-Rapport Annwali tal-kumpanija 2011 (“AR 2011”) juri li l-President ta' Sinosure huwa s-Segretarju tal-Kumitat tal-Partit, u l-maġġoranza tal-Maniġment Superjuri hija wkoll magħmula minn Membri tal-Kumitat tal-Partit. Minħabba r-rifjut minn Sinosure milli tissottometti iktar informazzjoni dwar il-Maniġment Superjuri, jista' jiġi konkluż li l-maniġment huwa espressjoni diretta tal-gvern li taħtar il-membri tal-Bord tas-Superviżuri kif ukoll tal-Maniġment Superjuri direttament. Fuq din il-bażi, Sinosure hija kkontrollata b'mod sinifikanti mill-GTĊ.

(230)

Il-prestazzjoni ta' funzjonijiet u politiki tal-gvern minn Sinosure tant tidher ċara u espliċita li jista' jiġi konkluż li l-kumpanija hija espressjoni diretta tal-gvern innifsu. Ir-Rapport Annwali 2011 ta' Sinosure fih bosta dikjarazzjonijiet f'dan ir-rigward, fosthom: Sinosure “qdiet b'mod proattiv il-funzjoni politika ta' ECA … u kisbet bidu tajjeb fl-ewwel sena tat-12-il perjodu tal-Pjan ta' Ħames Snin” (p. 4 AR 2011); “l-issoktar tar-riforma korporattiva jsaħħaħ il-funzjoni politika ta' Sinosure bħala ECA. Il-Konferenza tas-CCCPC dwar l-Ekonomija xeħtet enfasi fuq it-tali funzjoni u għamlet rekwiżiti ċari fuq l-assigurazzjoni tal-kreditu, li stipulaw it-triq lejn it-tkabbir” (p. 5 AR 2011); “Fis-sena 2011, Sinosure implimentat l-istrateġiji, id-deċiżjonijiet u l-arranġamenti tal-Kumitat Ċentrali tas-CPC u l-Kunsill tal-Istat kif ukoll il-politiki tal-Istat fuq id-diplomazija, il-kummerċ barrani, l-industrija u l-finanzi, daħħlet fis-seħħ il-funzjoni politika tagħha u kisbet tkabbir rapidu” (p. 11 AR 2011); “Sinosure eżegwixxiet bis-sħiħ il-politika tal-Istat ta' ‘Arranġament Speċjali għal Assigurazzjoni tal-Finanzjament tal-Esportazzjoni għal Tagħmir Kbir b'Sett Komplut’ u laħqet l-obbligi tagħha stipulati mill-Istat” (p. 11 AR 2011).

(231)

Il-qafas istituzzjonali u dokumenti oħrajn maħruġa mill-GTĊ li skont dawn topera Sinosure jkomplu juru l-funzjoni tagħha bħala korp pubbliku u li hija vestita bl-awtorità li twettaq politiki tal-gvern. In-Notifika dwar l-Implimentazzjoni tal-Istrateġija ta' Promozzjoni tal-Kummerċ permezz tax-Xjenza u t-Teknoloġija bl-Użu tal-Assigurazzjoni tal-Kreditu għall-Esportazzjoni (Shang Ji Fa [2004] Nru 368 tas-26 ta' Lulju 2004) inħarġet b'mod konġunt minn MOFCOM u Sinosure fl-2004 u għadha tirregola l-attivitajiet ta' Sinosure. Fost l-għanijiet ta' dan l-Avviż hemm il-promozzjoni tal-esportazzjoni ta' teknoloġija avvanzata u ġdida u ta' prodotti b'valur miżjud għoli permezz tal-użu ssoktat tal-assigurazzjoni tal-kreditu għall-esportazzjoni. In-Notifika tagħti mandat espliċitu lil Sinosure sabiex tappoġġa lill-industriji ewlenin ta' esportazzjoni speċifikati fid-Direttorju tal-Prodotti Ċiniżi tat-Teknoloġija Avvanzata u Ġdida tal-2006. Dan id-Direttorju jinkludi “Ċelloli u Moduli tal-Enerġija Solari” fost il-prodotti eliġibbli u għalhekk jistgħu jitqiesu li huma direttament appoġġati minn Sinosure. Fin-Notifika huma stipulati l-vantaġġi li ġejjin: “kanal ekoloġiku”, jiġifieri appoġġ speċifiku għal prodotti koperti fil-katalogu, li għandhom jirċievu approvazzjoni fi żmien ħamest ijiem jekk jintlaħqu l-kundizzjonijiet ta' sottoskrizzjoni u l-approvazzjoni ta' limitazzjoni għal assigurazzjoni bi prijorità; veloċità tal-pretensjoni, li għandha titlesta fi żmien tliet xhur mir-riċevuta tad-dokumenti tal-pretensjoni; flessibbiltà tar-rata, li tikkonsisti fl-ogħla skont għar-rata primjum fil-limitu tal-medda ta' ċaqliq ta' Sinosure. In-Notifika tipprevedi wkoll li awtoritajiet tal-kummerċ lokali u reġjonali għandhom jieħdu miżuri oħrajn sabiex jappoġġaw il-prodotti koperti fid-Direttorju. In-Notifika teħtieġ li Sinosure tfassal il-mudell ta' sottoskrizzjoni bbażat fuq il-politika industrijali nazzjonali u l-karatteristiċi tal-esportazzjoniijet ta' prodotti tat-teknoloġija avvanzata u ġdida u li tipprovdi appoġġ lill-industriji tal-innovazzjoni u r-R&Ż appoġġati b'mod speċjali mill-Istat.

(232)

Il-Kummissjoni taf b'dokumenti oħrajn li juru li Sinosure twettaq direttament politiki governattivi li, fost l-oħrajn. jibbenefikaw lill-produtturi esportaturi. L-hekk imsejjaħ Pjan 840 huwa dettaljat fl-Avviż mill-Kunsill tal-Istat tas-27 ta' Mejju 2009 (76). Dan l-isem jirreferi għall-użu ta' USD 84 biljun bħala assigurazzjoni tal-esportazzjoni u huwa waħda mis-sitt miżuri mnedija mill-Kunsill tal-Istat fl-2009 sabiex jistabbilizza d-domanda għal esportazzjonijiet wara l-kriżi globali u d-domanda ogħla konsegwenti għal assigurazzjoni tal-kreditu għall-esportazzjoni. Is-sitt miżuri jinkludu b'mod partikolari kopertura mtejba tal-assigurazzjoni tal-kreditu għall-esportazzjoni, il-forniment ta' assigurazzjoni tal-kreditu għall-esportazzjoni b'terminu qasir fuq skala ta' USD 84 biljun fl-2009 u tnaqqis tar-rata tal-primjum. Bħala l-unika istituzzjoni tal-politika li tissottoskrivi assigurazzjoni tal-kreditu għall-esportazzjoni, Sinosure hija indikata bħala l-eżekutur tal-pjan. Rigward it-tnaqqis tal-primjum tal-assigurazzjoni, Sinosure kienet meħtieġa tiżgura li r-rata medja tal-assigurazzjoni fit-terminu qasir tal-kreditu għall-esportazzjoni tonqos bi 30 % fuq il-bażi tar-rata medja ġenerali fl-2008.

(233)

L-hekk imsejjaħ Pjan 421 iddaħħal fin-Notifika dwar il-kwistjonijiet biex jiġu implimentati arranġamenti speċjali għall-finanzjament ta' assigurazzjoni fuq l-esportazzjoni ta' settijiet sħaħ ta' tagħmir maħruġ b'mod konġunt mill-Ministeru tal-Kummerċ u l-Ministeru tal-Finanzi fit-22 ta' Ġunju 2009. Din kienet ukoll politika importanti li tappoġġa l-politika “investu barra” taċ-Ċina bħala tweġiba għall-kriżi finanzjarja globali tal-2009 u pprovdiet USD 42,1 biljun f'assigurazzjoni tal-finanzjament biex tappoġġa l-esportazzjoni ta' settijiet kbar sħaħ ta' tagħmir. Sinosure u xi istituzzjonijiet finanzjarji jkunu jimmaniġġaw u jipprovdu l-finanzjament. L-impriżi koperti minn dan id-dokument jistgħu jgawdu l-miżuri finanzjarji preferenzjali, inkluża assigurazzjoni tal-kreditu għall-esportazzjoni. Minħabba n-nuqqas ta' kooperazzjoni tal-Gvern taċ-Ċina, il-Kummissjoni ma rnexxilhiex titlob iktar dettalji dwar l-applikazzjoni ta' din in-notifika. Fin-nuqqas ta' evidenza li turi bil-kontra, il-Kummissjoni għandha raġuni biex temmen li anki t-tagħmir PV u s-settur PV huma koperti minn dan id-dokument.

(234)

Dokumenti oħrajn li juru appoġġ tal-gvern għall-forniment tal-assigurazzjoni fit-terminu qasir tal-kreditu għall-esportazzjoni inklużi żewġ dokumenti dwar l-appoġġ finanzjarju msaħħaħ għall-Industriji Strateġiċi Emerġenti (“SEIs”). In-Notifika mill-Kunsill tal-Istat dwar il-Kultivazzjoni u l-iżvilupp tal-Kunsill tal-Istat dwar l-Industriji Emerġenti b'Ħeffa ta' deċiżjoni strateġika, Guo Fa [2010] Nru 32 tat-18/10/2010, fil-Paragrafu 7(C) iħeġġeġ lill-istituzzjonijiet finanzjarji sabiex iżidu l-appoġġ finanzjarju. Il-Linji gwida ta' implimentazzjoni għall-iżvilupp tas-SEIs maħruġa b'mod konġunt mill-ministeri kollha responsabbli (jiġifieri l-Kummissjoni Nazzjonali għall-Iżvilupp u r-Riforma, il-Ministeru tal-Kummerċ, il-Ministeru tax-Xjenza, u l-Ministeru tal-Industrija u t-Teknoloġija tal-informazzjoni, il-Ministeru tal-Protezzjoni Ambjentali, il-Ministeru tal-Finanzi, l-Amministrazzjoni Statali tat-Taxxa, l-Amministrazzjoni Ġenerali tad-Dwana, l-Amministrazzjoni Ġenerali tas-Superviżjoni tal-Kwalità, l-Uffiċċju ta' Spezzjoni tal-Proprjetà Intellettwali) Guo Fa [2011] Nru 310 tal-21 ta' Ottubru 2011, jirreferu b'mod speċifiku wkoll fil-Paragrafu (Xxvii) għall-appoġġ attiv, fost l-oħrajn, permezz tal-assigurazzjoni tal-kreditu għall-esportazzjoni lill-industriji strateġiċi emerġenti. Dawn l-industriji strateġiċi emerġenti jiffokaw fuq prodotti, teknoloġiji u servizzi biex jiżviluppaw is-suq internazzjonali, l-ajruspazju, il-manifattura ta' tagħmir tal-aħħar teknoloġija, ammont kbir jew jistimolaw teknoloġija bi privattivi domestiċi u prodotti industrijali emerġenti strateġiċi standard għall-esportazzjoni. Għalhekk, fin-nuqqas ta' evidenza, għall-kuntrarju hemm raġuni għaliex wieħed jemmen li anki l-prodott ikkonċernat u l-esportaturi fil-kampjun jikkwalifikaw bħala “indusriji emerġenti strateġiċi” u huma intitolati għall-benefiċċji li jirriżultaw.

(235)

Fuq il-bażi tal-elementi ta' hawn fuq, il-Kummissjoni tikkonkludi li Sinosure hija korp pubbliku u hija vestita b'awtorità governattiva sabiex twettaq politiki tal-gvern, hija kkontrollata b'mod sinifikanti mill-gvern u teżerċita funzjonijiet governattivi. (d)

(236)

Il-bażijiet ġuridiċi ta' dan il-programm huma dawn li ġejjin: in-Notifika dwar l-Implimentazzjoni tal-Istrateġija ta' Promozzjoni tal-Kummerċ permezz tax-Xjenza u t-Teknoloġija bl-Użu tal-Assigurazzjoni tal-Kreditu għall-Esportazzjoni (Shang Ji Fa [2004] Nru 368), maħruġ b'mod konġunt minn MOFCOM u Sinosure; id-Direttorju ta' Esportazzjoni ta' Prodotti Ċiniżi tat-Teknoloġija Avvanzata u Ġdida tal-2006; l-hekk imsejjaħ Pjan 840 inkluż fin-Notifika mill-Kunsill tal-Istat tas-27 ta' Mejju 2009; l-hekk imesjjaħ Pjan 421 inkluż fin-Notifika dwar il-kwistjonijiet sabiex jiġu implimentati arranġamenti speċjali għall-finanzjament tal-assigurazzjoni fuq l-esportazzjoni ta' settijiet sħaħ ta' tagħmir, maħruġa b'mod konġunt mill-Ministeru tal-Kummerċ u l-Ministeru tal-Finanzi fit-22 ta' Ġunju 2009; in-Notifika dwar il-Kultivazzjoni u l-iżvilupp tal-Kunsill tal-Istat dwar l-Industriji Emerġenti b'Ħeffa ta' deċiżjoni strateġika (Guo Fa [2010] Nru 32 tat-18 ta' Ottubru 2010), maħruġ mill-Kunsill tal-Istat u l-Linji Gwida ta' Implimentazzjoni tiegħu (Guo Fa [2011] Nru 310 tal-21 ta' Ottubru 2011).

(237)

Peress li Sinosure hija korp pubbliku vestita b'awtorità governattiva u li teżegwixxi l-liġijiet u l-pjanijiet governattivi, il-forniment tal-assigurazzjoni tal-kreditu għall-esportazzjoni lil produtturi tal-prodott ikkonċernat jikkostitwixxi kontribuzzjoni finanzjarja fil-forma ta' trasferiment potenzjali dirett ta' fondi mill-gvern skont it-tifsira tal-Artikolu 3(1)(a)(i) tar-Regolament bażiku.

(238)

Fir-rigward tat-tnaqqis ta' parti tal-primjum imħallas mill-produtturi esportaturi mill-awtoritajiet lokali, anki dan jikkostitwixxi trasferiment dirett ta' fondi fil-forma ta' għotja skont l-Artikolu 3(1)(a)(i) tar-Regolament bażiku.

(239)

Benefiċċju skont it-tifsira tal-Artikoli 3(2) u 6(c) tar-Regolament bażiku jeżisti sal-punt li Sinosure tipprovdi kopertura tal-assigurazzjoni tal-kreditu għall-esportazzjoni b'termini iktar favorevoli milli r-riċevitur ikun jista' jikseb normalment fis-suq, jew li tipprovdi kopertura tal-assigurazzjoni li ma tkunx disponibbli affattu fis-suq. Benefiċċju addizzjonali skont it-tifsira tal-Artikolu 3(2) riċevut mill-produttur esportatur huwa t-tnaqqis fil-flus mill-parti tal-primjum tal-assigurazzjoni mħallas lil Sinosure minn uħud mill-awtoritajiet lokali meta ġew stabbiliti ċerti produtturi esportaturi.

(240)

In-Notifika tal-2004 elenkat il-firxa kollha ta' benefiċċji mogħtija minn Sinosure u/jew mill-awtoritajiet lokali għall-impriżi li jaqgħu taħt id-Direttorju tal-2006 u jikkonformaw mal-politiki nazzjonali. L-investigazzjoni wriet li l-ftehimiet ta' assigurazzjoni konklużi bejn Sinosure u l-produtturi esportaturi fil-kampjun, u t-tnaqqis ta' parti mill-primjums mogħtija mill-awtoritajiet lokali jirriflettu bis-sħiħ dawn il-benefiċċji. It-trattament “Green Express” jikkonsisti fis-simplifikazzjoni u r-rapidità fl-indirizzar tal-proċess ta' forniment ta' kopertura u s-saldu tal-pretensjonijiet b'valutazzjoni rapida tat-telf u l-pagament sussegwenti rapidu lill-klijent.

(241)

L-investigazzjoni wriet ukoll li l-miżuri meħuda wara l-kriżi finanzjarja tal-2009 u indikati fil-pjan 840 u fil-pjan 421, u iktar tard fil-miżuri tal-2011 favur l-industriji emerġenti strateġiċi, ipprovdew benefiċċji sostanzjali lill-produtturi esportaturi. Dawn il-miżuri żiedu d-disponibbiltà tal-kopertura tal-assigurazzjoni u komplew inaqqsu l-primjum mitlub minn Sinosure, minkejja s-sitwazzjoni ekonomika diffiċli u r-riskji sostanzjalment ikbar għal Sinosure fil-forniment ta' kopertura tal-assigurazzjoni, u dawn huma kompletament riflessi fil-kopertura tal-assigurazzjoni pprovduta minn Sinosure lill-produtturi esportaturi. B'mod partikolari, l-investigazzjoni wriet li l-kundizzjonijiet u l-primjum mitlub fis-snin rilevanti tal-PI baqgħu sostanzjalment l-istess jew tjiebu, minkejja ż-żieda fil-pretensjonijiet għal inadempjenza mħallsa minn Sinosure u s-sitwazzjoni li sejra lura b'mod sostanzjali tas-settur PV.

(242)

Fir-rigward tal-eżistenza ta' benefiċċju, il-Kummissjoni l-ewwel eżaminat kemm il-primjums ta' Sinosure koprew il-kost tal-assigurazzjoni fit-terminu qasir tal-kreditu għall-esportazzjoni. Sinosure bniet l-argument abbażi tal-Punt (j) tal-Ftehim tad-WTO dwar is-Sussidji u l-Miżuri Kompensatorji (“SCM”), li fl-Artikolu 3(1)(a) ta' dak il-ftehim iqis bħala sussidju tal-esportazzjoni “projbit”, il-forniment ta' programmi ta' assigurazzjoni tal-kreditu għall-esportazzjoni b'rati primjum li huma inadegwati biex ikunu koperti l-ispejjeż operazzjonali u t-telf operatorju fit-tul tal-programmi. Fit-tweġiba tagħha għall-kwestjonarju, Sinosure rreferiet sempliċiment għall-profitti u t-telf li kien hemm tul l-aħħar ħames snin u kkonkludiet li peress li b'mod ġenerali għamlet profitt matul dan il-perjodu, il-forniment ta' assigurazzjoni fit-terminu qasiru tal-kreditu għall-esportazzjoni lill-produtturi esportaturi ma kienx jikkostitwixxi sussidju skont il-Ftehim dwar l-SCM tad-WTO. Kif spjegat hawn fuq (ara l-premessi (221) u (222)), il-Kummissjoni talbet lil Sinosure sabiex tipprovdi informazzjoni u evidenza speċifika dwar il-profittabbiltà fit-tul tal-attivitajiet tagħha ta' assigurazzjoni tal-kreditu għall-esportazzjoni, inkluż id-dħul mill-primjum u l-ispejjeż operazzjonali u t-telf operatorju tal-programm skont il-Ftehim dwar l-SCM tad-WTO. Madankollu, Sinosure naqset milli tissottometti d-dokumenti u l-evidenza mitluba matul iż-żjara ta' verifika, filwaqt li saħqet fuq id-dejta dwar il-profittabbiltà ġenerali kif indikata fir-Rapporti Annwali awditjati tagħha.

(243)

Il-Kummissjoni tosserva li, anki li kieku kellha toqgħod sempliċiment fuq ir-Rapporti Annwali ta' Sinosure bla ma tkun kapaċi tivverifika l-figuri u l-elementi li jinsabu f'dawn ir-Rapporti, ma tkunx tista' tikkonkludi li Sinosure laħqet profitti fit-tul fid-diviżjoni tagħha ta' assigurazzjoni tal-kreditu għall-esportazzjoni, li tikkorrispondi għall-“programm” imsemmi fil-Punt (j). Sinosure twettaq għadd ta' attivitajiet minbarra l-assigurazzjoni tal-kreditu għall-esportazzjoni, u l-figuri u d-dejta rrapportati fir-Rapport Annwali huma dejta konsolidata għal dawn l-attivitajiet kollha u ma hemm ebda disaggregazzjoni preċiża ta' kull waħda minn dawn l-attivitajiet. Minn uħud mir-Rapporti Annwali (iżda mhux dak riċenti), jidher li l-assigurazzjoni tal-kreditu għall-esportazzjoni fit-terminu qasir hija biċ-ċar l-iktar attività importanti għal Sinosure, iżda ma hemm ebda perċentwal preċiż disponibbli. Peress li Sinosure rrifjutat milli tipprovdi l-informazzjoni u l-evidenza mitluba fir-rigward ta' din l-aħħar attività biss, li huma meħtieġa biex issir l-analiżi tal-“programm” fil-Punt (j) tal-Anness 1 tal-Ftehim dwar l-SCM tad-WTO, il-Kummissjoni kellha tibbaża s-sejbiet tagħha fuq l-evidenza disponibbli fir-rekords.

(244)

Il-Kummissjoni tosserva inizjalment li skont l-Artikolu 11 tal-Artikoli ta' Assoċjazzjoni ta' Sinosure, il-kumpanija topera f'punt ta' ekwilibriju. Fi kliem ieħor, permezz tal-istatut, Sinosure ma għandhiex l-għan li timmassimizza l-profitti tagħha, iżda timmira biss sabiex tilħaq ekwilibriju skont il-funzjoni tagħha bħala l-uniku assiguratur uffiċjali tal-kreditu għall-esportazzjoni fir-RPĊ. Kif spjegat hawn fuq, ir-rekords fil-fajl urew li l-ambjent ġuridiku u politiku li fih topera Sinosure jeħtieġ li l-kumpanija teżegwixxi l-politiki u l-pjanijiet tal-gvern biex tissodisfa l-mandat tal-politika pubblika tagħha. Fost l-industriji u l-impriżi magħżula appoġġati b'mod speċifiku mill-Istat, il-produtturi esportaturi kellhom aċċess sħiħ għall-assigurazzjoni tal-kreditu għall-esportazzjoni pprovdut minn Sinosure b'rati preferenzjali anki wara l-kriżi globali tal-2009 u anki meta s-settur fotovoltajku esperjenza kriżi li qatt ma ra bħalha, inkluż matul il-PI. Għalhekk, Sinosure tipprovdi disponibbiltà llimitata ta' kopertura tal-assigurazzjoni għas-settur PV u l-primjum tal-assigurazzjoni estremament baxx li toffri ma jirriflettix ir-riskji attwali mġarrba fl-assigurazzjoni tal-esportazzjonijiet f'dan is-settur. Fuq il-bażi ta' dawn l-elementi kollha fir-rekords, diġà jista' jiġi konkluż li ma jistax ikun eskluż li r-rati tal-primjum mitluba minn Sinosure probabbli jkunu inadegwati biex ikopru l-operazzjonijiet fit-tul tagħha, u dan jidher li huwa probabbli.

(245)

Fin-nuqqas ta' kooperazzjoni minn Sinosure, il-Kummissjoni qieset anki elementi addizzjonali li jkomplu jsostnu din il-konklużjoni. L-evidenza pubblikament disponibbli diġà turi b'mod espliċitu li, Sinosure topera f'sitwazzjoni ta' telf operatorju fit-tul (77). Il-Kummissjoni analizzat ukoll il-figuri rilevanti fir-rapport tal-introjtu tar-Rapporti Annwali ta' Sinosure li jkopru s-snin 2006 sal-2011 sottomessi minn Sinosure biex tiġġustifika l-figuri tal-profittabbiltà rrapportati fit-tweġiba tagħha għall-kwestjonarju. Dawn il-figuri juru li Sinosure inkludiet telf operatorju fit-tul sinifikanti mill-attivitajiet tagħha kombinati tal-assigurazzjoni li jeskludu introjtu minn investiment u introjtu ieħor. B'mod iktar speċifiku, f'kull sena partikolari bejn l-2006 u l-2011 (bl-unika eċċezzjoni tal-2010) il-pretensjonijiet imħallsa diġà huma (kważi) daqs jew jaqbżu (sew) il-primjums netti riċevuti minn Sinosure. Jekk l-ispejjeż operazzjonali u l-ispejjeż tal-kummissjoni jitnaqqsu wkoll mill-primjums netti, ir-riżultat huwa telf saħansitra iktar sostanzjali. Il-figuri juru li minkejja l-gwadann modest fl-2010, fil-perjodu ġenerali t-telf operatorju fuq l-operazzjonijiet ta' assigurazzjoni huwa sinifikanti. Mir-Rapport Annwali jirriżulta li l-kontributuri importanti għall-introjtu ġenerali ta' Sinosure huma introjtu minn investiment u introjtu ieħor, li mhumiex rilevanti għall-valutazzjoni tal-vijabbiltà tal-programm tagħha ta' assigurazzjoni tal-kreditu għall-esportazzjoni. Peress li l-assigurazzjoni tal-kreditu għall-esportazzjoni fit-terminu qasir tikkostitwixxi l-maġġoranza tal-attività kummerċjali ta' Sinosure, fin-nuqqas ta' evidenza li juri bil-kontra huwa konkluż li Sinosure ġarrbet telf sinifikanti fit-tul mill-programm tagħha ta' assigurazzjoni tal-kreditu għall-esportazzjoni.

Peress li Sinosure tagħmel telf fil-programm tagħha ta' assigurazzjoni tal-kreditu għall-esportazzjoni, l-eżistenza ta' benefiċċju hija ddeterminata bit-tqabbil tal-primjums imħallsa mill-produtturi esportaturi ma' dawk disponibbli fis-suq. Sinosure hija l-uniku assiguratur uffiċjali ta' kreditu għall-esportazzjoni u għalhekk tikkontrolla bis-sħiħ is-suq domestiku. Fin-nuqqas ta' xi punt ta' riferiment kummerċjali fir-RPĊ għat-tali strumenti u peress li s-suq finanzjarju fir-RPĊ huwa mfixkel mill-intervent tal-gvern, huwa raġonevoli li jintuża punt ta' riferiment barra r-RPĊ, jiġifieri l-primjums mitluba f'sitwazzjoni normali tas-suq. Fuq din il-bażi, kif spjegat fit-taqsima hawn isfel dwar il-kalkolu tal-ammont tas-sussidju, il-primjums huma b'rati inqas minn tas-suq u b'hekk jirriżulta benefiċċju.

(246)

Is-sussidji ta' hawn fuq huma kontinġenti mal-prestazzjoni tal-esportazzjoni skont it-tifsira tal-Artikolu 4(4)(a) tar-Regolament bażiku għaliex ma jistgħux jinkisbu bla esportazzjoni. Barra minn hekk, huma speċifiċi wkoll skont l-Artikolu 4(2)(a) tar-Regolament bażiku għaliex l-aċċess huwa limitat għal ċerti impriżi. Iċ-ċelloli u l-moduli solari huma elenkati b'mod espliċitu fid-Direttorju tal-2006 ta' Prodotti tat-Teknoloġija Avvanzata u Ġdida, u din hija l-kundizzjoni biex igawdu mit-trattament preferenzjali stipulat fin-Notifika tal-2004. Barra minn hekk, wieħed mill-għanijiet ewlenin ta' Sinosure huwa li timplimenta l-politiki u l-pjanijiet nazzjonali, inkluż it-12-il pjan ta' ħames snin fis-settur PV. Anki l-pjan 840 u l-pjan 421 jibbenefikaw lis-settur PV fost xi ftit setturi oħrajn magħżula f'dawk il-pjanijiet (ara l-premessi (232) u (233)). Is-settur PV jitqies ukoll bħala waħda mill-industriji mħeġġa skont id-Deċiżjoni Nru 40 u dokumenti u liġijiet oħrajn ta' ppjanar (ara l-premessa (207) u (208)). Din l-industrija taqa' wkoll fi ħdan il-kategorija tal-“industriji Strateġiċi u Emerġenti” li jibbenefikaw minn numru ta' benefiċċji skont il-politiki tal-gvern (ara l-premessa (102)). Ħafna mill-produtturi esportaturi għandhom ukoll l-istatus formali ta' impriżi tat-Teknoloġija Avvanzata u Ġdida, u dan jagħtihom għadd ta' vantaġġi minħabba l-politiki vantaġġużi tal-gvern.

(247)

Għaldaqstant, huwa evidenti li l-benefiċċji mogħtija minn Sinosure jew mill-awtoritajiet lokali li jroddu lura parti mill-primjum ta' assigurazzjoni mhumiex disponibbli għas-setturi industrijali kollha jew għall-impriżi kollha, iżda huma ristretti biss għal dawk is-setturi u l-impriżi li jikkonformaw b'mod speċifiku mal-politiki ta' appoġġ rilevanti tal-gvern u d-dokumenti sottostanti tagħhom. Il-Kummissjoni tikkonkludi li l-benefiċċji mogħtija minn Sinosure u/jew mill-awtoritajiet lokali lill-produtturi tal-prodott ikkonċernat huma speċifiċi skont it-tifsira tal-Artikolu 4(2)(a) tar-Regolament bażiku. Barra minn hekk, peress li ma kien hemm ebda evidenza li tissuġġerixxi li s-sussidju huwa bbażat fuq kriterji jew kundizzjonijiet oġġettivi skont l-Artikolu 4(2)(b) tar-Regolament bażiku, il-benefiċċju huwa speċifiku f'dan ir-rigward ukoll. (f)

(248)

L-investigazzjoni wriet li sitt gruppi ta' produtturi esportaturi fil-kampjun ibbenefikaw mill-assigurazzjoni tal-kreditu għall-esportazzjoni pprovduta minn Sinosure fil-perjodu tal-investigazzjoni.

(249)

Il-forniment ta' assigurazzjoni tal-kreditu għall-esportazzjoni minn Sinosure lill-industrija PV għandu jitqies bħala sussidju, sal-punt li l-primjums huma inqas mir-rati tas-suq.

(250)

Fid-dawl tal-eżistenza ta' kontribuzzjoni finanzjarja, benefiċċju għall-produtturi esportaturi u speċifiċità, dan is-sussidju għandu jitqies kumpensabbli.

(251)

L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri, li ntwera li jeżisti matul il-PI. Il-kalkolu tal-benefiċċju jixbah lis-sitwazzjoni li tinvolvi l-garanziji tas-self. Skont l-Artikolu 6(c) tar-Regolament bażiku, il-benefiċċju mogħti lir-riċevituri jitqies li huwa d-differenza bejn l-ammont tal-primjum li l-kumpanija tħallas fuq l-assigurazzjoni fit-terminu qasir ipprovduta minn Sinosure u l-ammont tal-primjum li l-kumpanija tħallas għal assigurazzjoni paragunabbli tal-kreditu għall-esportazzjoni li kieku tiksibha mis-suq.

(252)

Peress li l-assigurazzjoni tal-kreditu għall-esportazzjoni fit-terminu qasir ipprovduta minn Sinosure hija r-riżultat ta' għanijiet politiċi tal-gvern u peress li Sinosure hija f'sitwazzjoni ta' monopolju fis-suq domestiku fil-funzjoni tagħha bħala l-unika aġenzija ta' kreditu għall-esportazzjoni uffiċjali, issawwar punt ta' riferiment xieraq tas-suq billi ntuża l-metodu spjegat hawn isfel. Barra minn hekk, minħabba n-nuqqas ta' kooperazzjoni mill-GTĊ u Sinosure, il-Kummissjoni rrikorriet ukoll għall-fatti disponibbli sabiex tistabbilixxi primjum tas-suq xieraq għall-assigurazzjoni pprovduta lill-produtturi PV.

(253)

Il-Kummissjoni temmen li l-iktar punt ta' riferiment xieraq li għalih hemm informazzjoni disponibbli minnufih huwa r-rati tal-primjum applikati mill-Export-Import Bank tal-Istati Uniti tal-Amerika (“Ex-IM Bank”). Skont informazzjoni disponibbli għall-pubbliku, (78) Ex-Im Bank huwa l-aġenzija uffiċjali tal-kreditu għall-esportazzjoni tal-gvern federali tal-Istati Uniti u jsostni lilu nnifsu. L-attivitajiet ta' Ex-Im Bank jinkludu assigurazzjoni tal-kreditu għall-esportazzjoni u attivitajiet oħrajn, bħal garanziji tal-kapital li jdur u garanziji tas-self (finanzjament tax-xerrej). Il-missjoni tiegħu huwa li joħloq u jappoġġa l-impjiegi tal-Istati Uniti billi jappoġġa l-esportazzjonijiet tal-Istati Uniti lil xerrejja internazzjonali. Ex-Im Bank jaġixxi bħala korporazzjoni governattiva mill-Kungress tal-Istati Uniti. Għaldaqstant, hemm għadd ta' similaritajiet ma' Sinosure u l-bank jitqies li huwa istituzzjoni ta' riferiment xierqa.

(254)

Il-primjum normattiv ġie kkalkolat b'referenza għa-tariffi attwali mitluba għal esportazzjonijiet lejn pajjiżi tal-OECD għal politiki tal-fatturat sħiħ b'kopertura ta' 90 % tal-ammont assigurat u durata ta' 120 jum. Il-primjum attwali huwa l-medja mezzana għall-ħames kategoriji differenti ta' xerrejja barranin skont is-solvenza u r-riskju ta' inadempjenza tagħhom. Dan jirrappreżenta l-eqreb punt ta' riferiment għad-dispożizzjoni biex jiġi kkalkolat il-primjum li l-produtturi tal-prodott ikkonċernat ikollu jħallas fis-suq.

(255)

L-ammont tal-benefiċċju kien ikkalkolat billi ntużat l-informazzjoni pprovduta mill-GTĊ u huwa relatat mal-ammonti ta' Sinosure koperti minn assigurazzjoni tal-kreditu għall-esportazzjoni u t-tariffi mħallsa fil-PI għat-tali assigurazzjoni. L-informazzjoni pprovduta mill-kumpaniji li kkooperaw għal Sinosure ma ntużatx għaliex jidher ċar li l-GTĊ kien iktar komplut (pereżempju mhux il-kumpaniji kollha rrapportaw il-politika ta' Sinosure tagħhom fit-tweġiba għall-kwestjonarju jew iddikjarawha matul il-verifika fuq il-post).

(256)

Fir-rigward tal-pagament ta' parti mill-primjum tal-assigurazzjoni mill-awtoritajiet lokali, il-benefiċċju huwa kkalkolat bħala l-livell ta' tnaqqis u għotjiet li saru lill-kumpaniji fil-kampjun li jkopru l-perjodu tal-PI.

(257)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(258)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(259)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(260)

Il-Kummissjoni sabet li wħud mill-produtturi esportaturi fil-kampjun ibbenefikaw minn dawn l-iskemi fil-PI. Madankollu, minħabba l-ammonti żgħar ta' benefiċċji riċevuti u l-impatt negliġibbli tagħhom fuq il-marġni tas-sussidju, il-Kummissjoni ma qisitx li hemm bżonn li tiġi analizzata l-kumpensabbiltà tal-iskemi.

(261)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(262)

L-ilment allega li l-produtturi tal-prodott ikkonċernat irċevew sussidji skont il-Programm ta' Dimostrazzjoni Golden Sun (“Golden Sun”) implimentat mill-gvern taċ-Ċina f'Lulju 2009. Fih evidenza prima facie li erbgħa fost l-esportaturi fil-kampjun kienu rċevew sussidji diretti għall-prodott ikkonċernat minn dan il-programm. Barra minn hekk, wera li wieħed mill-esportaturi fil-kampjun kien intgħażel bħala l-fornitur tal-prodott ikkonċernat fir-rigward ta' 70 % tal-kapaċità totali installata minn operaturi ta' proġetti (jiġifieri kumpaniji li jipproduċu u jbigħu elettriku prodott minn sistemi PV) fl-2011. L-ilment kien fih ukoll informazzjoni li tissuġġerixxi li l-finanzjament minn Golden Sun ma kienx allokat b'mod trasparenti u kompetittiv lill-operaturi ta' proġetti. (b)

(263)

Il-Kummissjoni talbet informazzjoni dwar il-programm Golden Sun fil-kwestjonarju, fl-ittra ta' defiċenza u matul iż-żjara ta' verifika fuq il-post għand il-GTĊ li l-GTĊ naqas milli jipprovdi, kif speċifikat f'iktar dettall fil-premessi (104) u (105) hawn fuq.

(264)

Rigward l-informazzjoni mitluba fil-kwestjonarju u fl-ittra ta' defiċenza, il-GTĊ baqa' jisħaq li dan il-programm ta' għotja mhuwiex maħsub għall-produtturi tal-prodott ikkonċernat. Konsegwentement, il-GTĊ naqas milli jwieġeb għadd ta' mistoqsijiet dwar il-programm u l-benefiċċji għall-produtturi tal-prodott ikkonċernat billi wieġeb “mhux applikabbli”. Il-GTĊ naqas ukoll milli jissottometti l-liġijiet, ir-regolamenti, il-linji gwida u atti oħrajn li huma kollha rilevanti kif mitlub fil-kwestjonarju, u llimita lilu nnifsu għas-sottomissjoni tal-bażi ġuridika ewlenija biss.

(265)

Fil-bidu tas-sessjoni ta' verifika fuq il-programm Golden Sun, il-Kummissjoni talbet lill-GTĊ sabiex jissottometti l-annessi kollha għall-bażi ġuridika ewlenija diġà sottomessa u staqsietu jekk kienx beħsiebu jissottometti dokumenti uffiċjali addizzjonali dwar il-programm. Il-GTĊ issottometta l-annessi mitluba iżda wieġeb li ma kienx beħsiebu jissottometi xi dokument addizzjonali. Imbagħad il-Kummissjoni wriet lill-GTĊ dokument tal-baġit dwar il-proġetti attwali ffinanzjati u l-ammonti korrispondenti mogħtija skont dan il-programm maħruġ mill-Ministeru tal-Finanzi (“MOF”) li kien sottomess minn esportaturi kooperattivi (Dokument tal-MOF Nru 965 [2010] tat-2 ta' Diċembru 2010). L-appendiċijiet għal dan id-dokument juru li wieħed mill-esportaturi fil-kampjun irċieva finanzjament sostanzjali minn Golden Sun għall-proġetti tiegħu stess u anki bħala fornitur tat-tagħmir eliġibbli għal bosta proġetti ffinanzjati mill-programm Golden Sun. Ir-rappreżentanti tal-MOF preżenti fil-verifika kienu jafu bid-dokument muri u l-Kummissjoni talbithom jissottomettu d-dokumenti baġitarji simili kollha maħruġa mill-MOF għas-snin ta' implimentazzjoni tal-programm Golden Sun. Filwaqt li r-rappreżentanti tal-MOF qablu sabiex fil-prinċipju jissottomettu dawn id-dokumenti, qatt ma ssottomettewhom lill-Kummissjoni.

(266)

Il-Kumissjoni wriet ukoll lill-MOFCOM id-dokumenti tal-baġit dwar il-Programm Golden Sun, maħruġ mid-Dipartiment lokali tal-Finanzjament ta' provinċja u muniċipalità, sottomessi minn wieħed mill-esportaturi li kkoopera, u talbet lill-GTĊ sabiex jissottometti d-dokumenti simili rilevanti (jiġifieri maħruġa minn provinċji jew muniċipalitajiet) dwar il-programm. Il-GTĊ wieġeb li ma kellux dawn id-dokumenti peress li kienu jikkonċernaw il-provinċiji u/jew il-muniċipalitajiet u b'hekk ma setax jissottomettihom.

(267)

Fl-ittra tiegħu tat-3 ta' Ġunju 2013, il-GTĊ tenna l-pożizzjoni tiegħu li l-programm Golden Sun mhuwiex maħsub għall-produtturi tal-prodott ikkonċernat u ċċara li filwaqt li dawn il-produtturi setgħu bbenefikaw minn dan il-programm, għamlu hekk sabiex operaturi tal-proġetti ta' impjanti tal-enerġija u mhux bħala produtturi ta' pannelli solari, peress li huma biss l-operaturi tal-proġetti tal-elettriku li jistgħu jirċievu sussidji skont dan il-programm. Din l-ittra tisħaq ukoll li l-Kummissjoni talbet biss tliet dokumenti msemmija b'mod speċifiku li kienu sottomessi mill-GTĊ. Dan huwa żbaljat, peress li l-Kummissjoni talbet għal verifika għal dokumenti baġitarji speċifiċi maħruġa mill-MOF (imsemmija b'mod espliċitu wkoll fl-ittra tal-Kummissjoni tat-23 ta' Mejju 2013) u minn dipartimenti lokali fejn kienu jinsabu l-produtturi esportaturi (li jirreferu għal dokumenti speċifiċi sottomessi mill-produtturi esportaturi), li l-GTĊ iddeċieda li ma jipprovdix.

(268)

Il-Kummissjoni talbet ukoll għal informazzjoni speċifika dwar l-iżborżamenti ta' Golden Sun riċevuti minn esportatur minnhom li kkoopera fil-kampjun fejn dan l-esportatur kien forna l-prodott ikkonċernat u rċieva r-rikavat direttament mill-gvern. Mill-ġdid, il-GTĊ ma kienx f'pożizzjoni li jispjega s-sitwazzjoni u jipprovdi xi dettalji matul iż-żjara ta' verifika u sempliċiment ikkuntattja l-avukat tal-kumpanija, li allegatament spjega li s-sitwazzjoni kienet ġiet iċċarata mal-uffiċjali tal-Kummissjoni matul iż-żjara ta' verifika, li assolutament ma kienx il-każ. Dettalji addizzjonali dwar is-sitwazzjoni huma spjegati hawn isfel fil-premessi (276)-(278). Kif speċifikat ulterjorment fil-premessi (275)-(278) hawn isfel, l-investigazzjoni stabbilixxiet li huwa minnu li l-produtturi li kkooperaw fil-kampjun ibbenefikaw mill-għotjiet fil-programm Golden Sun inkluż b'mod speċifiku għall-provvista tal-prodott ikkonċernat. Il-pożizzjoni tal-GTĊ li dan il-programm ma huwiex ta' benefiċċju għall-produzzjoni tal-prodott ikkonċernat kienet f'kontradizzjoni ċarissima mal-evidenza u l-fatti verifikati fl-investigazzjoni.

(269)

Minħabba dan in-nuqqas ta' kooperazzjoni mill-GTĊ, il-Kummissjoni ma setgħetx tivverifika bosta aspetti kruċjali tal-programm Golden Sun u l-benefiċċji attwali mogħtija lill-produtturi tal-prodott ikkonċernat. Dan minbarra n-nuqqas tal-GTĊ milli jissottometti d-dokumenti rilevanti kollha mitluba, b'mod partikolari d-dokumenti baġitarji dwar l-approprjazzjonijiet ta' Golden Sun maħruġa mill-MOF għas-snin tal-implimentazzjoni tal-programm. Għaldaqstant, ċerti sejbiet tal-investigazzjoni huma bbażati fuq l-aħjar fatti disponibbli fir-rekords b'konformità mal-Artikolu 28 tar-Regolament bażiku.

(270)

Il-bażi ġuridika ewlenija hija n-Notifika dwar l-Implimentazzjoni tal-Programm ta' Dimostrazzjoni Golden Sun tas-16 ta' Lulju 2009 u l-Programm ta' Dimostrazzjoni Golden Sun Miżuri Interim għall-Ġestjoni tal-Fond ta' Assistenza Finanzjarja mehmuż, Fajl CaiJian Nru 397 [2009] maħruġ mill-Ministeru tal-Finanzi, il-Ministeru tax-Xjenza, u l-Bord tal-Enerġija Nazzjonali; Ċirkulari dwar l-Implimentazzjoni b'suċċess għall-Assenjamenti għall-Programm ta' dimostrazzjoni Golden Sun, Fajl Nru 718 [2009]; Ċirkulari dwar it-Twettiq b'Suċċess tal-Programm ta' dimostrazzjoni Golden Sun 2010, Fajl Nru 622 [2010]; Ċirkulari dwar Struzzjonijiet fuq l-Indiċijiet tal-Baġit tas-Sussidju tal-Finanzjament għall-Ispejjeż ta' Kostruzzjoni għall-Programmi ta' Dimostrazzjoni Golden Sun 2010, Fajl Nru 965 [2010] tat-2 ta' Diċembru 2010 maħruġ mill-Ministeru tal-Finanzi; Ċirkulari fir-rigward tad-Distribuzzjoni tal-Mira Baġitarja għas-Sussidju Fiskali Xieraq għall-Programmi Golden Sun 2011, JCJ Fajl Nru 336 tal-1 ta' Settembru 2011 maħruġ mid-Dipartiment tal-Finanzi ta' Hebei; iċ-Ċirkulari fir-rigward tad-Distribuzzjoni tal-Mira Baġitarja għas-Sussidju Fiskali Approprjat għall-Programmi Golden Sun 2011, HCJ Fajl Nru 135 tat-8 ta' Novembru 2011 maħruġ minn Hengshui Municipal Finance Bureau

(271)

Il-programm Golden Sun ġie stabbilit fl-2009 biex jiġi promoss il-progress teknoloġiku u l-iżvilupp skalat tal-industrija distribwita tas-sistema PV solari. L-awtoritajiet responsabbli għall-programm f'livell ċentrali huma l-Ministeru tal-Finanzi, il-Ministeru tax-Xjenza u l-Bord tal-Enerġija Nazzjonali. In-Notifika dwar l-Implimentazzjoni tal-Programm Golden Sun jelenka numru ta' kriterji biex ikunu eliġibbli għal fondi skont dan il-programm, inklużi: a) li l-impriżi jkunu inklużi fil-pjan ta' implimentazzjoni tal-proġett ta' dimostrazzjoni Golden Sun; b) ikollhom kapaċità installata ta' mhux inqas minn 300 kWh; c) ikollhom perjodu ta' bini ta' mhux iktar minn sena u perjodu ta' operazzjoni ta' xejn inqas minn għoxrin sena; d) is-sidien tal-proġetti PV irid ikollhom assi totali ta' tal-inqas RMB 100 miljun u kapital ta' tal-inqas 30 % tal-ispejjeż ta' investiment; e) il-produtturi tas-sistema integrata u t-tagħmir ewlieni użati għall-proġetti ta' ġenerazzjoni PV għandhom jintgħażlu permezz ta' proċeduri ta' offerti. Il-proġetti eliġibbli jitsgħu jirċievu sa 50 fil-mija tal-ispejjeż totali tal-investiment mill-gvern, filwaqt li dan il-massimu jiżdied għal 70 fil-mija għal sidien ta' proġetti li jinsabu f'żoni remoti mingħajr grilja elettrika stabbilita.

(272)

Rigward il-proċedura, l-impriżi li lesti jirċievu finanzjament skont il-programm iridu jissottomettu l-applikazzjonijiet u d-dokumenti ta' sostenn tagħhom lill-awtorità rilevanti tal-gvern. Id-dipartimenti tal-finanzi, tat-teknoloġija u tal-enerġija fil-livell provinċjali responsabbli għall-organizzazzjoni tal-programm jissottomettu rapport sommarju konġunt lill-Ministeru tal-Finanzi, il-Ministeru tax-Xjenza u l-Bord tal-Enerġija Nazzjonali li huma responsabbli għall-analiżi tal-proġetti provinċjali, b'mod partikolari l-programmi tekniċi, il-kundizzjonijiet tal-bini, il-finanzjament u l-aspetti l-oħrajn kollha. Wara approvazzjoni finali mill-gvern, il-Ministeru tal-Finanzi jalloka l-fondi direttament lil sid il-proġett u ser iżomm id-dokumenti ta' approvazzjoni u żborż rilevanti.

(273)

Fil-prattika, l-operaturi ta' proġetti jissottomettu applikazzjonijiet għal finanzjament lill-gvern wara li jidħlu f'kuntratt mal-fornitur(i) tat-tagħmir PV eliġibbli (jiġifieri l-prodott ikkonċernat). Skont il-leġiżlazzjoni relevanti, dawk il-fornituri tat-tagħmir PV eliġibbli jintgħażlu permezz ta' proċeduri ta' offerti. Madankollu, il-GTĊ ma ċċarax kif jeżerċita d-diskrezzjoni tiegħu fl-għażla tal-operaturi ta' proġetti għall-pjanijiet lokali ta' implimentazzjoni tal-proġetti ta' dimostrazzjoni ta' Golden Sun, u kif dawn l-operaturi ta' proġetti mbagħad jagħżlu l-fornitur tat-tagħmir PV eliġibbli. Il-GTĊ u l-partijiet interessati ma wrewx li l-proċess tal-għażla huwa miftuħ, trasparenti u nondiskriminatorju, peress li naqsu milli jipprovdu d-dokumenti relevanti. Ma hemm l-ebda indikazzjoni li nxtara xi tagħmir PV barrani. Parti sostanzjali tat-tagħmir PV eliġibbli ġiet ipprovduta minn produttur wieħed li kkoopera fil-kampjun. Fuq il-bażi tal-fatti disponibbli, l-Istituzzjonijiet għalhekk jikkonkludu li l-Programm Golden Sun intuża bħala mezz biex joħloq domanda artifiċjali għall-prodotti ta' produtturi partikolari Ċiniżi tal-prodott ikkonċernat.. Jekk il-gvern iqis il-proġett bħala eliġibbli, suppost jagħti l-fondi.

(274)

Il-programm Golden Sun jagħti sussidju skont it-tifsira tal-Artikolu 3(1)(a)(i) u l-Artikolu 3(2) tar-Regolament bażiku fil-forma ta' trasferiment ta' fondi mill-GTĊ, fil-forma ta' għotjiet lill-produtturi tal-prodott ikkonċernat.

(275)

B'mod partikolari, l-investigazzjoni stabbilixxiet li bosta produtturi li kkooperaw fil-kampjun irċevew għotjiet b'mod dirett mill-programm Golden Sun għall-installazzjonijiet ta' tagħmir għall-enerġija ġġenerata mix-xemx fil-bini tagħhom. Dawn l-għotjiet imħallsa lill-produtturi li kkooperaw fil-kampjun jikkontrobilanċjaw parti mill-ispejjeż li huma kienu jġarrbu u għaldaqstant huma direttament marbuta mal-prodott ikkonċernat.

(276)

Barra minn hekk, l-investigazzjoni stabbilixxiet ukoll li l-produtturi li kkooperaw fil-kampjun ibbenefikaw ukoll minn finanzjament skont dan il-programm għall-għanijiet ta' provvista tal-prodott ikkonċernat għal operaturi mhux relatati ta' proġetti. B'mod partikolari, matul il-verifika fuq il-post, instab li tal-inqas esportatur mill-esportaturi li kkooperaw fil-kampjun irċieva direttament mill-GTĊ pagament ta' ammont b'rata fissa sostanzjali għall-40 proġett kollha ffinanzjati mill-programm Golden Sun li għalih kien forna l-prodott ikkonċernat. Ammont bħal dan ma ġiex irrapportat mill-produttur esportatur li kkoopera fil-kampjun fit-tweġiba għall-kwestjonarji tiegħu. Iċ-Ċirkulari tal-2010 mill-Ministeru tal-Finanzi uriet li dan l-esportatur li kkoopera ntgħażel biex jipprovdi l-prodott ikkonċernat lil bosta operaturi ta' proġetti mhux relatati li jappartjenu kemm għas-settur privat kif ukoll pubbliku. Il-Kummissjoni ppruvat tikseb informazzjoni mill-GTĊ fir-rigward ta' dan il-pagament dirett lill-esportatur li kkoopera fil-kampjun, peress li l-Artikolu 13 tal-Miżuri Interim dwar il-programm Golden Sun fl-Avviż tal-2009 jitlob b'mod speċifiku li l-għotjiet jitħallsu direttament lill-operatur tal-proġett (jiġifieri mhux il-fornitur tat-tagħmir tal-PV) u l-GTĊ ikkonferma b'mod espliċitu dan l-element fil-verifika. Kif spjegat hawn fuq, il-GTĊ ma rnexxilux jipprovdi spjegazzjoni matul iż-żjara ta' verifika fir-rigward ta' għaliex esportatur fil-kampjun kien irċieva finanzjament dirett. Fl-ittra tiegħu tat-3 ta' Ġunju 2013, il-GTĊ jillimita l-kummenti tiegħu għal proġett wieħed minn 40 proġett biss, billi ddikjara sempliċiment li kien hemm arranġament finanzjarju bejn l-operatur tal-proġett u l-produttur esportatur li kkoopera fil-kampjun għaliex l-operatur ma kellux biżżejjed flus biex iħallas lill-produttur esportatur li koopera fil-kampjun u għalhekk qablu li s-sussidju jitħallas direttament lill-produttur esportatur li kkoopera fil-kampjun. Minħabba li din l-ispjegazzjoni mhux sostanzjata u ferm konċiża kienet tikkonċerna biss proġett wieħed biss li involva l-esportatur li kkoopera fil-kampjun mill-40 proġett elenkati fid-dokument tal-MOF hija kompletament insuffiċjenti sabiex il-Kummissjoni tiċċara s-sitwazzjoni.

(277)

Fl-ittra tiegħu tal-24 ta' Ġunju 2013, l-esportatur li kkoopera fil-kampjun spjega li l-pagament dirett għall-40 proġett ikkonċernat ma ġiex irrapportat għaliex jikkonstitwixxi sussidju għall-“utent” għall-operatur tal-proġett u mhux għall-fornitur. Dan l-esportatur ikkonferma li kien irċieva l-pagament dirett ta' somma b'rata fissa marbut mal-provvisti fl-40 proġett elenkati fiċ-ċirkulari tal-MOF, filwaqt li żied li huwa possibbli li l-gvern jittrasferixxi fondi direttament lill-fornitur u li r-raġuni għal dan huwa li jiżgura li dawn l-għotjiet jintużaw biss għas-sistemi PV awtorizzati u sabiex jitħaffef il-kontroll. Madankollu, l-esportatur iffoka t-tweġiba tiegħu fuq proġett wieħed li għalih kienu nġabru dokumenti fuq il-post u warrab id-39 proġett l-ieħor li għalihom kien irċieva finanzjament minn Golden Sun direttament. Għad li l-esportatur wera li l-fondi għal dan il-proġett partikolari kienu ġew irreġistrati bħala kont riċevibbli u mhux bħala prepagament ta' għotja tal-gvern, ma ġiet sottomessa l-ebda evidenza oħra dwar it-tlestija propja ta' dan jew ta' xi proġett ieħor, inkluż dwar il-provvista propja tal-prodott ikkonċernat li għalih ġew riċevuti fondi. L-ispjegazzjoni tiegħu lanqas ma xeħtet dawl fuq l-inkonsistenza tal-pagamenti diretti tal-gvern mar-regoli ta' implimentazzjoni relevanti msemmijin hawn fuq, li jistipulaw li normalment, ir-rikavat jiġi ttrasferit mill-GTĊ lill-operatur ta' proġett u mhux lill-fornitur tat-tagħmir.

(278)

Il-Kummissjoni tqis l-ispjegazzjoni tal-GTĊ dwar l-arranġament finanzjarju bejn l-esportatur li kkoopera fil-kampjun u l-operatur tal-proġett bħala waħda mhux konvinċenti, għaliex tidher stramba li żewġ partijiet privati jistgħu jiddeċiedu b'mod awtonomu li jidħlu f'arranġament li tinvolvi l-azzjoni ta' gvern (jiġifieri pagament dirett mill-gvern lill-fornitur b'deroga mill-Artikolu 13 tal-Avviż tal-2009) mingħajr ma kien involut ukoll il-gvern jew saħansitra jkun jaf b'dan. Il-GTĊ naqas milli jipprovdi evidenza iktar sostanzjali u kummenti dwar dan l-aspett ta' pagamenti diretti lil fornituri u ddeċieda li jillimita t-tweġiba tiegħu għal proġett wieħed bla isem mill-40 proġett imwettqa mill-esportaturi li kkooperaw fil-kampjun. L-ispjegazzjonijiet ipprovduti minn dan l-esportatur baqgħu siekta wkoll fuq dan il-kumment mill-GTĊ dwar is-sitwazzjoni finanzjarja diffiċli tal-operatur dwar proġett li l-GTĊ ma speċifikax. Barra minn hekk, id-dikjarazzjonijiet mill-esportatur dwar il-possibbiltà ta' pagament dirett u l-ħsieb sottostanti ma jsibu ebda konferma minn sorsi oħrajn u mill-GTĊ.

(279)

Fid-dawl tal-kummenti limitati u kontradittorji ta' hawn fuq sottomessi mill-GTĊ u mill-esportatur li kkoopera fil-kampjun, l-uniku punt komuni u l-konklużjoni li tista' tinħareġ hija li l-pagament dirett tas-somma f'daqqa mill-GTĊ lill-esportatur li kkoopera fil-kampjun kien neċessarju sabiex jiġi żgurat li dan l-esportatur jirċievi r-rikavat għaliex ikun hemm riskju ta' nuqqas ta' pagament marbut mad-diffikultà finanzjarja tal-operatur ta' proġett. Il-fatt jibqa' li l-esportatur li kkoopera fil-kampjun ma rnexxilux jispjega kif uża l-pagament f'daqqa mill-gvern, kemm jekk it-tagħmir PV finalment ġiex ipprovdut lill-operaturi ta' proġetti kif ukoll xi prezz, jekk jeżisti, tħallas mill-operaturi ta' proġetti. Minħabba n-nuqqas ta' evidenza oħra disponibbli fil-fajl jew raġonevolment disponibbli b'xi mod ieħor għall-Kummissjoni, fuq il-bażi tal-Artikolu 28 tar-Regolament bażiku kkonkludiet li l-pagament ta' somma b'rata fissa lill-esportatur li kkoopera tikkostitwixxi għotja diretta skont it-tifsira tal-Artikolu 3(1)(a)(i) tar-Regolament bażiku.

(280)

Il-Kummissjoni kompliet tikkonkludi li l-għotjiet ipprovduti lill-fornituri tal-prodott ikkonċernat, jew bħala operaturi ta' proġetti jew meta allegatament fornew it-tagħmir PV lil operaturi ta' proġetti mhux relatati, jagħtuhom benefiċċju skont l-Artikolu 3(2) tar-Regolament bażiku. Bħall-operaturi ta' proġetti, il-finanzjament mill-programm Golden Sun jippermetti lill-produtturi tal-prodott ikkonċernat sabiex jiffrankar spejjeż tal-installazzjoni ta' tagħmir tal-enerġija ġġenerata mix-xemx fil-bini tagħhom. Bħall-fornituri ta' tagħmir PV lil operaturi ta' proġetti mhux relatati, il-finanzjament mill-programm Golden Sun jinżamm direttament mill-produtturi tal-prodott ikkonċernat mingħajr il-bżonn li effettivament jipprovdu t-tagħmir u/jew jipproteġihom mir-riskju ta' nuqqas ta' pagament ta' operaturi ta' proġetti mhux relatati. Fl-aħħar każ, il-produtturi tal-prodott ikkonċernat jiksbu pagament li f'każ ieħor ma kinux jiksbu mill-operatur ta' proġett mhux relatat.

(281)

Din l-iskema ta' sussidju hija speċifika wkoll skont it-tifsira tal-Artikolu 4(2)(a) tar-Regolament bażiku peress li l-leġiżlazzjoni stess, li skont din topera l-awtorità awtorizzanti, tillimita l-aċċess għall-iskema biss għal dawk l-operaturi ta' proġetti speċifiċi li jissodisfaw il-bosta kriterji elenkati fil-leġiżlazzjoni u b'mod usa' għall-operaturi tal-proġetti involuti fis-settur tal-enerġija solari biss. Barra minn hekk, peress li la sseħħ l-għażla tal-fornitur tat-tagħmir PV u lanqas l-għażla tal-operaturi ta' proġetti ma huma bbażati fuq proċess kompetittiv miftuħ, trasparenti u nondiskriminatorju u li jidderieġi pagamenti mill-GTĊ għall-fornituri ta' tagħmir PV, l-iskema hija speċifika wkoll għaliex huma biss ċerti fornituri ta' tagħmir PV li de facto jistgħu jibbenefikaw minnha. Dan il-programm ma jissodisfax ir-rekwiżiti ta' nonspeċifiċità tal-Artikolu 4(2)(b) tar-Regolament bażiku, peress li l-kundizzjonijiet ta' eliġibbiltà u l-kriterji propji tal-għażla sabiex l-impriżi jkunu inklużi fil-pjanijiet lokali ta' implimentazzjoni tal-proġetti u sabiex jintgħażlu l-proġetti finali fuq il-bażi tal-aspetti tekniċi u finanzjarji differenti mhumiex oġġettivi u ma japplikawx b'mod awtomatiku. (e)

(282)

Il-programm Golden Sun huwa sussidju speċifiku fil-forma ta' għotja. L-investigazzjoni stabbilixxiet li wħud mill-esportaturi li kkooperaw fil-kampjun ibbenefikaw minn dan is-sussidju. (f)

(283)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(284)

L-ilment allega l-eżistenza ta' leġiżlazzjoni speċifika datata lura fl-1991 biex tħeġġeġ investiment barrani fiċ-Ċina permezz tal-Liġi dwar l-Impriżi b'Investiment Barrani u t-Taxxa fuq l-Introjtu tal-Impriżi Barranin (“Liġi dwar it-Taxxa tal-FIEs”). Fost il-benefiċċji għall-hekk imsejħa Impriżi b'Investitment Barrani (“FIEs”) hemm programm ta' sussidju msemmi bħala 'Tnejn b'Xejn/Tlieta Nofs', li jipprovdi għal eżenzjoni kompluta mit-taxxa diretta għall-ewwel sentejn ta' profittabbiltà tal-FIEs u għal nofs ir-rata tat-taxxa fuq l-introjtu applikabli għat-tliet snin ta' wara.

(285)

Il-programm tnejn b'xejn/tlieta nofs jeżisti wkoll f'varjant differenti għall-kumpaniji rikonoxxuti bħala Impirżi tat-Teknoloġija Ġdida u Avvanzata u li jinsabu f'ċerti żoni magħżula. Il-benefiċċji f'dan il-varjant tal-programm jistgħu japplikaw anki wara s-sena 2013. L-investigazzjoni sabet li wieħed mill-esportaturi li kkooperaw (Yingli Hainan) beda jgawdi benefiċċji minn dan il-programm mill-2011 b'eżenzjoni sħiħa mit-taxxa għas-snin 2011 u 2012 u tnaqqis ta' 50 % fir-rata tat-taxxa fit-tliet snin li jmiss.

(286)

Il-Kummissjoni ppruvat tivverifika dan il-programm matul iż-żjara ta' verifika mal-GTĊ. Madankollu, il-GTĊ naqas milli jipprovdi informazzjoni dwar dan il-varjant differenti tal- programm tnejn b'xejn/tlieta nofs. Fl-ittra tiegħu tat-3 ta' Ġunju 2013, il-GTĊ argumenta li dan il-programm ma kienx allegat fl-ilment u mhuwiex programm ta' sostituzzjoni tal-varjant tal-programm tnejn b'xejn tlieta nofs għall-FIEs allegat fl-ilment, li japplika bla limitazzjonijiet ġeografiċi. Il-Kummissjoni tieħu nota ta' dawn l-ispjegazzjonijiet mogħtija mill-GTĊ u tifhem li dan il-programm ta' taxxa huwa formalment programm separat mill-programm tnejn b'xejn tlieta nofs għall-FIEs. Madankollu, peress li l-benefiċċji tiegħu baqgħu wara l-allegata skadenza tal-iskema tal-FIE, il-mekkanika, l-għamla u l-effetti tal-benefiċċji tiegħu huma l-istess bħal dawk fil-programm għall-FIEs u li kien irrapportat minn wieħed mill-esportaturi li kkooperaw fil-kampjun, tqis li għandu rabta mill-qrib mal-programm tnejn b'xejn/tlieta nofs tal-FIEs, bħala kontinwazzjoni tal-istess programm, u li għandu jkun ikkumpensat. F'dan ir-rigward, il-Kummissjoni tosserva li l-Artikolu 10(1) tar-Regolament bażiku jippermetti li ssir investigazzjoni ta' kwalunkwe “sussidju allegat” identifikat mill-ilmentatur u ma tirreferi għal ebda “programm ta' sussidju allegat”. Peress li f'dan il-każ iż-żewġ programmi jinvolvu l-istess sussidju, jiġifieri dħul mit-taxxa korporattivi mitluf, il-Kummissjoni hija intitolata li tinvestigahom bħala sussidju wieħed. (b)

(287)

Il-bażi ġuridika ta' dan il-programm hija l-Artikolu 8 tal-Liġi dwar it-Taxxa tal-FIEs u l-Artikolu 72 tar-Regoli ta' Implimentazzjoni tal-Liġi dwar it-Taxxa fuq l-Introjtu tar-Repubblika Popolari taċ-Ċina ta' Impriżi b'Investiment Barrani u Impriżi Barranin. Skont il-GTĊ, dan il-programm intemm bl-adozzjoni fis-16 ta' Marzu 2007 tal-Liġi dwar it-Taxxa fuq l-Introjtu tal-Impriżi (“Liġi dwar l-EIT”) tal-2008 fil-Ħames Sessjoni tal-Għaxar Kungress Popolari Nazzjonali tar-Repubblika Popolari taċ-Ċina, jiġifieri l-Artikolu 57 tal-Liġi dwar l-EIT, b'eliminazzjoni gradwali tal-benefiċċji tiegħu sa tmiem is-sena 2012.

(288)

Il-bażi ġuridika tal-programm speċjali tnejn b'xejn tlieta nofs hija d-Digriet Nru 40 [2007] jiġifieri Notifika tal-Kunsill tal-Istat dwar l-Implimentazzjoni tal-Politiki Preferenzjali Tranżitorji dwar it-Taxxa fuq l-Introjtu għal Impriżi tat-Teknoloġija Avvanzata Stabbiliti f'Żona Ekonomika Speċjali u d-Distrett il-Ġdid Shanghai Pudong, fuq il-bażi tal-Artikolu 57 (3) tal-Liġi dwar it-Taxxa fuq l-Introjtu tal-Impriżi tar-RPĊ, flimkien mal-Miżuri Amministrattivi għad-determinazzjoni ta' Impriżi tat-Teknoloġija Avvanzata u Ġdida.

(289)

Huma biss l-impriżi produttivi b'investiment barrani skedati sabiex joperaw għal perjodu ta' mhux inqas minn għaxar snin li huma eżentati mit-taxxa fuq l-introjtu. L-eżenzjoni tibda mis-sena li fiha l-impriża tibda tagħmel profitt għall-ewwel sentejn, segwita minn tnaqqis ta' ħamsin fil-mija tar-rati tat-taxxa applikabbli għat-tliet snin ta' wara.

(290)

Għall-iskema ta' varjanti speċjali, l-impriżi eliġibbli jrid ikollhom ukoll l-istatus rikonoxxut tal-impriżi tat-Teknoloġija Ġdida u Avvanzata biċ-ċertifikazzjoni amministrattiva speċifika, jiġifieri impriżi bi proprjetà intellettwali ċentrali u li jissodisfaw ukoll il-kundizzjonijiet stipulati fl-Artikolu 93 tar-Regolamenti ta' Implimentazzjoni tal-Liġi tal-RPĊ dwar l-EIT.

(291)

Kwalunkwe kumpanija li beħsiebha tapplika għal din l-iskema trid tippreżenta l-Formola Annwali tar-Ritorn tat-Taxxa fuq l-Introjtu tal-Korporazzjonijiet u l-Appendiċijiet u d-dikjarazzjonijiet finanzjarji mal-Amministrazzjoni Statali tat-Taxxa. Dawn il-prattiki japplikaw ukoll għall-iskema speċjali ta' varjanti.

(292)

Il-GTĊ argumenta li dan il-programm kien qiegħed jiġi eliminat b'mod progressiv sa mid-dħul fis-seħħ tal-Liġi dwar l-EIT fl-2008 u l-benefiċċji tiegħu huma disponibbli sa tmiem l-2012. Il-GTĊ iddikjara wkoll li ma hemm ebda programm sostitut għall-FIEs u li issa, it-trattament tat-taxxa tal-FIEs huwa l-istess bħal kontribwenti korporattivi oħrajn. Il-Kummissjoni tosserva li dan il-programm tat-taxxa ta' benefiċċji matul il-PI peress li bosta produtturi PV ibbenefikaw minnu matul il-PI. Barra minn hekk, ma jistax jiġi eskluż li l-benefiċċji għadhom disponibbli skont dan il-programm jew li hemm disponibbli programm sostitut ieħor jew li wieħed simili ser jitnieda fil-ġejjieni. Tabilħaqq, kif spjegat hawn fuq, l-investigazzjoni wriet li hemm ukoll varjanti oħrajn tal-programm “tnejn b'xejn/tlieta nofs” li għadhom jibbenefikaw lil manifatturi ta' pannelli solari. Għalhekk, instab li dan il-programm għadu kumpensabbli.

(293)

L-iskema speċjali ta' varjanti ntużat minn esportatur minnhom li kkoopera, jiġifieri Yingli Green Energy. (d)

(294)

Dan il-programm jikkostitwixxi sussidju skont it-tifsira tal-Artikolu 3(1)(a)(ii) u l-Artikolu 3(2) tar-Regolament bażiku fil-forma ta' dħul mitluf tal-gvern li jagħti benefiċċju lill-kumpaniji riċevituri.

(295)

Din l-iskema ta' sussidju hija speċifika skont it-tifsira tal-Artikolu 4(2)(a) tar-Regolament bażiku peress li l-leġiżlazzjoni skont din topera l-awtorità awtorizzanti, tillimita l-aċċess għal din l-iskema għal ċerti impriżi li jikkwalifikaw bħala FIEs u li jikkonformaw mal-kriterji speċifiċi stipulati fil-leġiżlazzjoni rilevanti biss.

(296)

B'hekk, dan is-sussidju għandu jitqies kumpensabbli.

(297)

Għall-iskema varjanti, għandu jitqies sussidju skont it-tifsira tal-Artikolu 3(1)(a)(ii) u l-Artikolu 3(2) tar-Regolament bażiku fil-forma ta' dħul mitluf tal-gvern li jagħti benefiċċju lill-kumpaniji riċevituri.

(298)

Din l-iskema ta' sussidju hija speċifika skont it-tifsira tal-Artikolu 4(2)(a) tar-Regolament bażiku peress li l-leġiżlazzjoni nfisha, li skont din topera l-awtorità awtorizzanti, illimitat l-aċċess għal din l-iskema għal ċerti impriżi u industriji kklassifikati bħala mħeġġa biss, bħall-industrija PV. L-iskema hija speċifika wkoll skont l-Artikolu 4(3) għaliex l-eliġibbiltà hija limitata għal ċerti reġjuni.

(299)

B'hekk, dan il-varjant għandu jitqies kumpensabbli.

(300)

L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri li nstab li jeżisti matul il-PI. Il-benefiċċju mogħti lir-riċevituri jitqies li huwa l-ammont tat-taxxa totali pagabbli skont ir-rata normali tat-taxxa, wara t-tnaqqis ta' dak li tħallas bir-rata ta' taxxa preferenzjali mnaqqsa. L-ammonti kkumpensati huma bbażati fuq il-figuri fir-ritorn tat-taxxa tal-kumpaniji għas-sena 2011. Peress li r-ritorn tat-taxxa awditjat għas-sena fiskali 2012 ma kienx disponibbli għand l-ebda wieħed mill-esportaturi li kkooperaw fil-kampjun, ittieħdu inkunsiderazzjoni l-figuri għas-sena sħiħa taxxabbli 2011.

(301)

B'konformità mal-Artikolu 7(2) tar-Regolament bażiku dan l-ammont ta' sussidju (numeratur) ġie allokat fuq il-fatturat totali tal-bejgħ tal-produtturi esportaturi li kkooperaw matul il-PI, għaliex is-sussidju mhuwiex kontinġenti fuq il-prestazzjoni tal-esportazzjonijiet u ma ngħatax b'referenza għall-kwantitajiet manifatturati, prodotti, esportati jew trasportati.

(302)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(303)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(304)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(305)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(306)

L-ilment allega li l-FIEs huma intitolati għal politiki tat-taxxa għall-attivitajiet ta' R&Ż tagħhom permezz ta' kumpens tat-taxxa ta' 150 fil-mija tal-ispejjeż tagħhom jekk dawn żdiedu b'10 fil-mija jew iktar meta mqabbla mas-sena ta' qabel.

(307)

Il-GTĊ iddikjara li din l-iskema spiċċat mad-dħul fis-seħħ tal-liġi dwar l-EIT fl-2008 u li ma kien hemm għad-dispożizzjoni ebda perjodu ta' eliminazzjoni gradwali. Madankollu, bosta esportaturi li kkooperaw fil-kampjun irrapportaw li bbenefikaw minn programm simili skont il-liġi dwar l-EIT tal-2008, u dan juri li l-programm preferenzjali ta' kumpens għall-kost tar-R&Ż għall-FIEs ittiħidlu postu minn programm speċifiku fl-2008. Il-GTĊ ma pprovdiex iktar informazzjoni dwar il-kumpens tat-taxxa ta' 150 % fit-tweġiba għall-kwestjonarju tiegħu jew fit-tweġiba għall-ittra ta' defiċenza.

(308)

Din l-iskema hija pprovduta mill-Artikolu 30(1) tal-Liġi dwar l-EIT u mill-Artikolu 95 tar-Regolamenti dwar l-Implimentazzjoni tal-Liġi dwar it-Taxxa fuq id-Dħul tal-Impriżi tar-RPĊ (“Regolamenti ta' Implimentazzjoni tal-EIT”), u Miżuri Amministrattivi għad-Determinazzjoni ta' Impriżi tat-Teknoloġija Avvanzata u Ġdida (Guo Ke Fa Huo [2008] Nru 172), u l-Artikolu 93 tar-Regolament ta' Implimentazzjoni dwar l-EITs, flimkien mal-avviż tal-Amministrazzjoni Statali tat-Taxxa dwar il-kwistjonijiet li jikkonċernaw Il-Pagament tat-Taxxa fuq l-Introjtu tal-Impriżi ta' Impriżi tat-Teknoloġija Avvanzata u Ġdida (Guo Shui Han [2008] Nru 985).

(309)

L-Artikolu 95 jiddikjara li tnaqqis addizzjonali ta' 50 % tan-nefqiet tar-R&Ż imsemmija fil-Punt 1 tal-Artikolu 30 jingħata għat-tali nefqiet fuq prodotti tat-teknoloġija għolja u ġdida sabiex ikunu soġġetti għal ammortizzament ibbażat fuq 150 % tal-kost tal-assi intanġibbli.

(310)

Kif indikat hawn fuq, il-GTĊ ma pprovda ebda informazzjoni rilevanti għal din l-iskema fit-tweġibiet għall-kwestjonarji u l-ittra ta' defiċenza. Din l-iskema diġà kienet ikkumpensata fl-investigazzjoni ta' Karta Fina Miksija  (79) u fl-investigazzjoni ta' Azzar Miksi b'Materjal Organiku  (80) . Tabilħaqq, id-dispożizzjonijiet ġuridiku rilevanti juru li din l-iskema tipprovdi benefiċċju limitat għal kumpaniji li huma rikonoxxuti b'mod formali bħala Impriżi tat-Teknoloġija Avvanzata u Ġdida. Dawn il-kumpaniji jridu jġarrbu wkoll spejjeż tar-R&Ż għall-fini ta' żvilupp ta' teknoloġiji ġodda, prodotti ġodda u snajja' ġodda. L-impriżi eliġibbli jistgħu jpaċu 50 % addizzjonali tal-ispejjeż ta' R&Ż tagħhom kontra l-obbligazzjoni tat-taxxa fuq l-introjtu tagħhom. Anki spejjeż minn assi intanġibbli tar-R&Ż jintitolaw lill-kumpaniji eliġibbli għal tnaqqis ta' 150 % fl-ispejjeż attwali mġarrba minn dawn il-kumpaniji.

(311)

L-investigazzjoni stabbilixxiet li l-kumpaniji li jibbenefikaw minn din l-iskema jippreżentaw ir-Ritorn tat-Taxxa fuq l-Introjtu tagħhom u l-Annessi rilevanti. L-ammont propju tal-benefiċċju huwa inkluż kemm fir-ritorn tat-taxxa kif ukoll fl-Anness V. Huma biss kumpaniji li kisbu ċ-ċertifikat formali li jirrikonoxxihom bħala impriżi tat-Teknoloġijia Avvanzata u Ġdida li huma intitolati għal din l-iskema.

(312)

Din l-iskema tikkostitwixxi sussidju skont it-tifsira tal-Artikolu 3(1)(a)(ii) u l-Artikolu 3(2) tar-Regolament bażiku fil-forma ta' dħul mitluf mill-gvern li jagħti benefiċċju lill-kumpaniji riċevituri.

(313)

Dan is-sussidju huwa speċifiku skont it-tifsira tal-Artikolu 4(2)(a) tar-Regolament bażiku peress li l-leġiżlazzjoni nfisha tillimita l-applikazzjoni ta' din l-iskema għal ċerti impriżi biss li huma rikonoxxuti b'mod formali bħala impriżi tat-Teknoloġija Avvanzata u Ġdida u li jġarrbu spejjeż tar-R&Ż biex jiżviluppaw teknoloġiji ġodda, prodotti ġodda u snajja' ġodda.

(314)

B'hekk, dan is-sussidju għandu jitqies kumpensabbli.

(315)

L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri, li ntwera li jeżisti matul il-PI. Il-benefiċċju mogħti lir-riċevituri jitqies li huwa l-ammont tat-taxxa totali pagabbli skont ir-rata normali tat-taxxa, wara li jitnaqqas xi tħallas bit-tnaqqis addizzjonali ta' 50 % tal-ispejjeż attwali fuq ir-R&Ż għall-proġetti approvati. L-ammonti kkumpensati huma bbażati fuq il-figuri fir-ritorn tat-taxxa tal-kumpaniji għas-sena 2011. Peress li r-ritorn tat-taxxa awditjat għas-sena fiskali 2012 ma kienx disponibbli għand l-ebda wieħed mill-esportaturi li kkooperaw fil-kampjun, ittieħdu inkunsiderazzjoni l-figuri għas-sena sħiħa taxxabbli 2011.

(316)

B'konformità mal-Artikolu 7(2) tar-Regolament bażiku, dan l-ammont tas-sussidju (numeratur) ġie allokat fuq il-fatturat totali tal-bejgħ tal-produtturi esportaturi li kkooperaw matul il-PI, għaliex is-sussidju mhuwiex kontinġenti fuq il-prestazzjoni tal-esportazzjonijiet u ma kienx iggarantit b'referenza għall-kwantitajiet manifatturati, prodotti, esportati jew trasportati.

(317)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(318)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(319)

L-investigazzjoni kkonfermat li ma kien riċevut ebda benefiċċju skont il-programm mill-kumpaniji fil-kampjun matul il-PI peress li l-kumpaniji bbenefikaw mill-programm il-ġdid li ħa post dan it-trattament preferenzjali. Id-dettalji huma diskussi fil-punt 3.4.4.8. ta' hawn taħt.

(320)

Dan il-programm jippermetti lil impriża rikonoxxuta bħala Impriża tat-Teknoloġija Avvanzata u Ġdida biex tibbenefika minn rata tat-taxxa fuq l-introjtu imnaqqsa ta' 15 % meta mqabbla mar-rata ordinarja ta' 25 %. Dan il-programm instab li huwa kumpensabbli mill-UE fl-investigazzjoni ta' Karta Fina Miksija u fl-investigazzjoni ta' Azzar Miksi b'Materjal Organiku; instab ukoll li huwa kumpensabbli mill-awtoritajiet tal-Istati Uniti.

(321)

Il-bażi ġuridika ta' dan il-programm hija l-Artikolu 28(2) tal-Liġi dwar l-EIT flimkien mal-Miżuri Amministrattivi għad-Determinazzjoni ta' Impriżi tat-Teknoloġija Avvanzata u Ġdida (Guo Ke Fa Huo [2008] Nru 172), u l-Artikolu 93 tar-Regolament ta' Implimentazzjoni dwar l-EITs, flimkien man-Notifika tal-Amministrazzjoni Statali tat-Taxxa dwar il-kwistjonijiet li jikkonċernaw il-Pagament tat-Taxxa fuq l-Introjtu tal-Impriżi ta' Impriżi tat-Teknoloġija Avvanzata u Ġdida (Guo Shui Han [2008] Nru 985).

(322)

Din l-iskema tapplika għal Impriżi rikonoxxuti tat-Teknoloġija Avvanzata u Ġdida li jeħtieġu appoġġ importanti mill-Istat. Dawn l-impriżi jkollhom drittijiet tal-proprjetà intellettwali ċentrali indipendenti u jridu jissodisfaw għadd ta' rekwiżiti: (i) il-produtturi tagħhom huma inklużi fl-ambitu tal-prodott fl-Oqsma tat-Teknoloġija Avvanzata b'Appoġġ Importanti tal-Istat; (ii) l-ispejjeż totali għar-R&Ż jammontaw għal ċertu sehem mid-dħul totali mill-bejgħ; (iii) l-introjtu minn prodotti tat-teknoloġija avvanzata u ġdida jammonta għal ċertu sehem mid-dħul totali mill-bejgħ; (iv) il-persunal attiv fir-R&Ż jammonta għal ċertu sehem mill-persunal totali; (v) ir-rekwiżiti l-oħrajn stabbiliti mill-Miżuri Amministrattivi tal-2008 għall-Impriżi tat-Teknoloġija Avvanzata u Ġdda huma ssodisfati.

(323)

Il-kumpaniji li jibbenefikaw minn din l-iskema jridu jippreżentaw ir-Ritorn tat-Taxxa fuq l-Introjtu tagħhom u l-Annessi rilevanti. L-ammont propju tal-benefiċċju huwa inkluż kemm fir-ritorn tat-taxxa kif ukoll fl-Anness V.

(324)

B'hekk, l-iskema għandha titqies li hija sussidju skont it-tifsira tal-Artikolu 3(1)(a)(ii) u l-Artikolu 3(2) tar-Regolament bażiku għaliex hemm kontribuzzjoni finanzjarja fil-forma ta' dħul mitluf mill-gvern li jagħti benefiċċju lill-kumpaniji riċevituri. Il-benefiċċju għar-riċevitur huwa daqs l-iffrankar tat-taxxa miksub minn dan il-programm skont l-Artikolu 3(2) tar-Regolament bażiku.

(325)

Dan is-sussidju huwa speċifiku skont it-tifsira tal-Artikolu 4(2)(a) tar-Regolament bażiku peress li huwa limitat għall-impriżi li jirċievu ċ-ċertifikazzjoni ta' Impriżi tat-Teknoloġija Avvanzata u Ġdida u jikkonformaw mar-rekwiżiti kollha tal-miżuri amministrattivi tal-2008. Barra minn hekk, ma hemm ebda kriterji oġġettivi stabbiliti mil-leġiżlazzjoni jew l-awtorità awtorizzanti dwar l-eliġibbiltà tal-iskema u din mhijiex awtomatika skont l-Artikolu 4(2)(b) tar-Regolament bażiku.

(326)

B'hekk, dan is-sussidju għandu jitqies kumpensabbli.

(327)

L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri, li ntwera li jeżisti matul il-PI. Il-benefiċċju mogħti lir-riċevituri jitqies li huwa l-ammont tat-taxxa totali pagabbli skont ir-rata normali tat-taxxa, wara t-tnaqqis ta' dak li tħallas bir-rata ta' taxxa preferenzjali mnaqqsa. L-ammonti kkumpensati huma bbażati fuq il-figuri fir-ritorn tat-taxxa tal-kumpaniji għas-sena 2011. Peress li r-ritorn tat-taxxa awditjat għas-sena fiskali 2012 ma kienx disponibbli għand l-ebda wieħed mill-esportaturi li kkooperaw fil-kampjun, ittieħdu inkunsiderazzjoni l-figuri għas-sena sħiħa taxxabbli 2011.

(328)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(329)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(330)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(331)

Dan il-programm jipprovdi eżenzjoni mill-VAT u t-tariffi ta' importazzjoni favur l-FIEs jew impriżi domestiċi għal importazzjonijiet ta' tagħmir kapitali użat fil-produzzjoni tagħhom. Biex jibbenefikaw mill-eżenzjoni, it-tagħmir ma jistax ikun jaqa' taħt lista ta' tagħmir mhux eliġibbli u l-impriża li tagħmel it-talba trid tikseb Ċertifikat ta' proġett Imħeġġeġ mill-Istat maħruġ mill-awtoritajiet Ċiniżi jew l-NDRC skont il-leġiżlazzjoni rilevanti dwar l-investimenti, it-taxxa u d-dwana. Dan il-programm kien ikkumpensat fil-proċedimenti antisussidji ta' Karta Fina Miksija u Azzar Miksi b'Materjal Organiku.

(332)

Il-bażijiet ġuridiċi ta' dan il-programm huma ċ-Ċirkulari tal-Kunsill tal-Istat dwar l-Aġġustament tal-Politiki tat-Taxxa fuq it-Tagħmir Importat, Guo Fa Nru 37/1997, in-Notifika tal-Ministeru tal-Finanzi, l-Amministrazzjoni Ġenerali tad-Dwana u l-Amministrazzjoni Statali tat-Taxxa dwar l-Aġġustament ta' Ċerti Politiki Preferenzjali dwar id-Dazju fuq l-Importazzjonijiet, it-Tħabbira tal-Ministeru tal-Finanzi, l-Amministrazzjoni Ġenerali tad-Dwana u l-Amministrazzjoni Statali tat-Taxxa [2008] Nru 43, in-Notifika tal-NDRC dwar il-kwistjonijiet rilevanti li jikkonċernaw il-Ġestjoni tal-ittra ta' Konferma dwar Proġetti ffinanzjati b'mod domestiku jew minn barranin imħeġġa għall-iżvilupp mill-Istat, Nru 316 2006 tat-22 ta' Frar 2006 u l-Katalogu ta' Oġġetti ta' importazzjoni li ma jistgħux ikunu eżentati mid-dazju għal FIEs jew impriżi domestiċi, 2008.

(333)

Dan il-programm jitqies li jipprovdi kontribuzzjoni finanzjarja fil-forma ta' dħul mitluf mill-GTĊ skont it-tifsira tal-Artikolu 3(1)(a)(ii) tar-Regolament bażiku peress li l-FIEs u impriżi domestiċi eliġibbli oħrajn jiġu eżentati milli jħallsu l-VAT u/jew tariffi li normalment ikunu dovuti. Għaldaqstant, il-kumpaniji riċevituri jibbenefikaw skont it-tifsira tal-Artikolu 3(2) tar-Regolament bażiku. Il-programm huwa speċifiku skont it-tifsira tal-Artikolu 4(2)(a) tar-Regolament bażiku peress li l-leġiżlazzjoni li skont din topera l-awtorità awtorizzanti tillimita l-aċċess tiegħu għal impriżi li jinvestu f'kategoriji kummerċjali speċifiċi definiti b'mod eżawrjenti mil-liġi u li jappartjenu jew għall-kategorija mħeġġa jew għall-kategorija ristretta B fil-Katalogu għall-gwida tal-industriji għal investiment barrani u trasferiment ta' teknoloġija jew dawk li huma konformi mal-Katalogu ta' industriji, prodotti u teknoloġiji importanti li l-iżvilupp tagħhom huwa mħeġġeġ mill-Istat. Barra minn hekk, ma hemm l-ebda kriterju oġġettiv li jillimita l-eliġibbiltà għal dan il-programm u l-ebda evidenza konklużiva li tikkonkludi li l-eliġibbiltà hija awtomatika skont l-Artikolu 4(2)(b) tar-Regolament bażiku.

(334)

L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri, li ntwera li jeżisti matul il-PI. Il-benefiċċju mogħti lir-riċevituri jitqies li huwa l-ammont ta' VAT u dazji eżentat fuq tagħmir importat. Sabiex jiġi żgurat li l-ammont kumpensabbli kopra biss il-perjodu tal-PI, il-benefiċċju riċevut ġie ammortizzat fuq il-ħajja tat-tagħmir skont il-proċeduri kontabilistiċi normali tal-kumpanija.

(335)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(336)

Dan il-programm jipprovdi għal eżenzjoni mill-VAT għax-xiri ta' tagħmir prodott b'mod domestiku mill-FIEs. Biex jibbenefika mill-eżenzjoni, it-tagħmir ma jistax ikun jaqa' taħt lista ta' tagħmir mhux eliġibbli u l-valur tat-tagħmir ma jistax jaqbeż ċertu livell limitu. Dan il-programm kien fil-proċedimenti antisussidji ta' Karta Fina Miksija u Azzar Miksi b'Materjal Organiku.

(337)

Il-bażijiet ġuridiċi huma l-Miżuri provviżorji għall-Amministrazzjoni tar-Rifużjonijiet tat-Taxxa għax-Xiri ta' Tagħmir manifatturat b'mod Domestiku mill-FIEs, il-Miżuri Prova għall-Amministrazzjoni tar-Rifużjoni tat-Taxxa mix-Xiri ta' Tagħmir magħmul iċ-Ċina għal Proġetti ta' Investiment Barrani u n-Notifika tal-Ministeru tal-Finanzi u l-Amministrazzjoni Statali tat-Taxxa dwar il-Kanċellazzjoni tal-Politika ta' Rifużjoni għat-Tagħmir Domestiku Mixtri minn Impriżi b'Investiment Barrani.

(338)

Fit-tweġiba tiegħu għal-kwestjonarju antisussidji, il-GTĊ iddikjara li dan il-program waqaf mill-1 ta' Jannar 2009 u rrefera għaċ-Ċirkulari tal-Ministeru tal-Finanzi u l-Amministrazzjoni Statali tat-Taxxa dwar il-Waqfien tal-Politika ta' Rifużjoni fuq ix-Xiri ta' Tagħmir Manifatturat b'mod Domestiku minn Impriżi b'Investiment Barrani (CAISHUI{2008} Nru 176). Madankollu l-investigazzjoni wriet li bosta produtturi esportaturi fil-kampjun ibbenefikaw minn din l-iskema matul il-perjodu tal-investigazzjoni. L-esportaturi fil-kampjun ikkonċernati ssottomettew informazzjoni dettaljata dwar l-iskema, inkluż l-ammont ta' benefiċċju riċevut. Wara li dan ittieħed inkunsiderazzjoni ġie konkluż li l-GTĊ ma pprovdiex informazzjoni preċiża dwar dan il-programm u kif turi s-sitwazzjoni ta' ċerti produtturi esportaturi, dan il-programm għadu għaddej.

(339)

Peress li l-ebda informazzjoni mitluba ma ġiet ipprovduta mill-GTĊ, il-Kummissjoni qagħdet fuq l-informazzjoni sottomessa mill-produtturi esportaturi fil-kampjun.

(340)

Dan il-programm jitqies li jipprovdi kontribuzzjoni finanzjarja fil-forma ta' dħul mitluf mill-GTĊ skont it-tifsira tal-Artikolu 3(1)(a)(ii) tar-Regolament bażiku peress li FIEs huma eżentati mill-ħlas tal-VAT li kien ikun dovut li kieku ma kinux eżentati. Għaldaqstant, il-kumpaniji riċevituri jibbenefikaw skont it-tifsira tal-Artikolu 3(2) tar-Regolament bażiku. Il-programm huwa speċifiku skont it-tifsira tal-Artikolu 4(2)(a) tar-Regolament bażiku peress li l-leġiżlazzjoni li skont din topera l-awtorità awtorizzanti tillimita l-aċċess tiegħu għal impriżi b'investiment barrani li jixtru tagħmir manifatturat b'mod domestiku u li jaqgħu taħt il-kategorija mħeġġa u l-Kategorija ristretta B tal-Katalogu ta' Industriji ffinanzjati minn Barranin u tagħmir mixtri fis-suq domestiku elenkat fil-Katalogu ta' industriji, prodotti u teknoloġiji importanti li l-iżvilupp tagħhom huwa mħeġġeġ mill-Istat. Barra minn hekk, il-Miżuri Prova għall-Amministrazzjoni tar-Rifużjoni tat-Taxxa mix-Xiri ta' Tagħmir Magħmul iċ-Ċina għal Proġetti b'Investiment Barrani u n-Notifika tal-Ministeru tal-Finanzi jillimitaw il-benefiċċju għall-FIEs li jappartjenu għall-kategorija mħeġġa fil-Katalogu Gwida tal-industriji b'investiment barrani jew il-Katalogu ta' industriji b'investiment barrani vantaġġużi fir-reġjuni Ċentrali u tal-Punent taċ-Ċina. Barra minn hekk, ma hemm l-ebda kriterju oġġettiv li jillimita l-eliġibbiltà għal dan il-programm u l-ebda evidenza konklużiva li tikkonkludi li l-eliġibbiltà hija awtomatika skont l-Artikolu 4(2)(b) tar-Regolament bażiku. Il-programm huwa speċifiku wkoll skont l-Artikolu 4(4)(b) tar-Regolament bażiku għaliex huwa kontinġenti fuq l-użu ta' prodotti domestiċi fuq dawk importati.

(341)

L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri, li ntwera li jeżisti matul il-PI. Il-benefiċċju mogħti lir-riċevituri jitqies li huwa l-ammont ta' VAT eżentat fuq it-tagħmir domestiku. Sabiex jiġi żgurat li l-ammont kumpensabbli kopra biss il-perjodu tal-PI, il-benefiċċju riċevut ġie ammortizzat fuq il-ħajja tat-tagħmir skont il-prattika industrijali normali.

(342)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(343)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(344)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(345)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(346)

L-investigazzjoni kkonfermat li matul il-PI il-kumpaniji fil-kampjun ma rċevew l-ebda benefiċċju mill-programm.

(347)

L-ilmentatur allega li wħud mill-produtturi Ċiniżi tal-polisiliċju bbenefikaw mill-elettriku rħis ipprovdut b'remunerazzjoni inqas minn adegwata.

(348)

L-investigazzjoni stabbilixxiet li ħafna mill-produtturi esportaturi fil-kampjun kellhom produttur tal-polisiliċju relatat fi ħdan il-grupp tal-kumpaniji tagħhom. Instab li wieħed mill-gruppi ta' produtturi esportaturi fil-kampjun, jiġifieri LDK Solar, irċieva b'mod regolari sussidji sinifikanti fit-tariffi tal-elettriku mill-Uffiċċju Finanzjarju taż-Żona Ekonomika ta' Xin Yu. Għad li f'dan il-każ il-kumpanija ma bbenefikatx direttament mir-rata inqas tal-elettriku minn dik disponibbli fis-suq, ir-rifużjonijiet sinifikanti pprovduti mill-Uffiċċju Finanzjarju taż-Żona Ekonomika ta' Xin Yu eventwalment irriżultaw f'sitwazzjoni fejn il-kumpanija rċeviet benefiċċji mill-forniment ta' elettriku rħis u b'hekk huma funzjonalment ekwivalenti għal forniment mill-gvern bi prezzijiet inqas minn tas-suq. Xorta waħda, anki jekk ir-rifużjoni titqies bħala għotja, il-miżura hija marbuta mill-qrib mal-allegazzjoni tal-ilmentatur u taqa' taħt l-ambitu tal-investigazzjoni. Il-kumpanija kkonċernata f'LDK Group irċeviet kważi rifużjoni totali tat-tariffi tal-elettriku tagħha dovuti fil-PI.

(349)

Il-grupp LDK Solar irċieva, permezz tal-produttur tal-polisiliċju relatat miegħu, kontribuzzjoni finanzjarja fis-sens tal-Artikolu 3(1)(a)(iii) tar-Regolament bażiku peress li l-gvern lokali pprovda s-sussidji tat-tariffa tal-elettriku, jew fis-sens tal-Artikolu 3(1)(a)(i). Dan jikkostitwixxi kontribuzzjoni finanzjarja tal-gvern fil-forma ta' forniment ta' prodotti oħrajn minbarra l-infrastruttura ġenerali skont it-tifsira tar-Regolament bażiku. Inkella, huwa trasferiment dirett ta' fondi.

(350)

LDK Solar irċeviet benefiċċju skont it-tifsira tal-Artikolu 3(2) tar-Regolament bażiku sal-punt li l-gvern ipprovda elettriku għal remunerazzjoni inqas minn adegwata. Ġie stabbilit li dan l-esportatur, minħabba s-sussidji fit-tariffa tal-elettriku, kien effettivament soġġett għal rata inqas mir-rata ġeneralment disponibbli. It-trasferiment dirett ta' fondi jagħti benefiċċju għaliex huwa għotja mhux ripagabbli li mhijiex disponibbli fis-suq.

(351)

Is-sussidju fil-forma ta' forniment tal-elettriku rħis permezz ta' rifużjoni lil produttur minnhom fil-kampjun huwa speċifiku skont it-tifsira tal-Artikolu 4(2)(a) tar-Regolament bażiku peress li s-sussidji tat-tariffi tal-elettriku tħallsu biss lil LDK. Is-sussidju huwa reġjonalment speċifiku wkoll għal ċerti impriżi fi ħdan iż-Żona Ekonomika ta' Xin YU. In-nuqqas ta' kooperazzjoni ta' LDK u l-GTĊ fir-rapportar ta' dan is-sussidju wassal għas-sejbiet ta' hawn fuq li saru fuq il-bażi tal-fatti disponibbli.

(352)

L-ammont tas-sussidju kien daqs l-ammont tar-rifużjoni li jkopri l-perjodu tal-PI.

(353)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(354)

L-ilmentatur allega li l-produtturi Ċiniżi tal-prodott ikkonċernat jirċievu drittijiet ta' użu tal-art mill-GTĊ għal remunerazzjoni inqas minn adegwata peress li l-gvernijiet nazzjonali jew lokali ma jipprovdux id-drittijiet b'konsistenza mal-prinċipji tas-suq.

(355)

Il-GTĊ iddikjara li hemm suq tal-artijiet kompetittiv standardizzat u ordinat li fih id-drittijiet ta' użu tal-art iridu jkunu nnegozjati b'mod pubbliku skont il-liġi fis-suq tal-artijiet. Il-GTĊ iddikjara wkoll li l-art industrijali u kummerċjali għandha tinkiseb permezz ta' kumpens għall-użu fis-suq miftuħ permezz ta' offerti, irkant u kompetizzjoni u “irrispettivament min-numru ta' offerti jew il-prezz inizjali, il-prezz imħallas fl-aħħar jirrappreżenta l-prezz tas-suq li huwa ddeterminat minn provvista u domanda tas-suq ħieles”. Il-GTĊ iddikjara wkoll li t-trasferiment tad-drittijiet ta' użu tal-art ma għandux jinkludi restrizzjonijiet fit-tħabbira tat-trasferiment permezz ta' offerti, irkant u kwotazzjoni li jaffettwaw dik il-kompetizzjoni ġusta

(356)

Il-GTĊ ma pprovda l-ebda dejta fir-rigward tal-prezzijiet kurrenti tad-drittijiet ta' użu tal-art u l-prezzijiet inizjali tal-art imsawra mill-gvern. L-informazzjoni pprovduta mill-GTĊ fir-rigward tat-tranżazzjonijiet tad-drittijiet ta' użu tal-art kif mitlub fil-kwestjonarju kienet inkompluta. Meta kkoreġa t-tweġiba inizjali tiegħu għall-kwestjonarju matul iż-żjara ta' verifika, ikkonferma wkoll li wħud mit-tranżazzjonijiet irrapportati kienu soġġetti għal proċedura tal-offerti. Madankollu, ma ġew ipprovduti l-ebda dettalji dwar in-numru ta' offerti u d-differenza bejn il-prezz inizjali u finali, kif mitluba fil-kwestjonarju.

(357)

Matul il-verifika, il-Kummissjoni talbet għal evidenza mill-GTĊ biex issostni d-dikjarazzjonijiet tiegħu dwar it-trasferimenti tad-drittijiet ta' użu tal-art fiċ-Ċina huma assenjati permezz ta' offerti, kwotazzjoni jew irkant. Ta' min jinnota li skont l-Artikolu 11 tad-Dispożizzjonijiet dwar l-Assenjament tad-Dritt ta' Użu tal-Art ta' Kostruzzjoni tal-Istat permezz ta' Stedina għal Offerta, Irkant u Kwotazzjoni, l-awtorità responsabbli tal-Istat toħroġ avviż pubbliku kull meta jseħħ il-proċess ta' offerta/irkant/kwotazzjoni. Fuq din il-bażi, il-Kummissjoni talbet in-notifiki pubbliċi kollha għat-tranżazzjonijiet li kienu soġġetti għal dawn il-proċeduri sabiex tiġbor u tivverifika informazzjoni mitluba fil-kwestjonarju. Il-GTĊ ma pprovda l-ebda wieħed minn dawn in-notifiki peress li ddikjara li “ma għadhomx jeżistu”. Għalhekk, il-Kummissjoni ma setgħetx tivverifika l-informazzjoni dwar it-tranżazzjonijiet tad-drittijiet ta' użu tal-art ta' produtturi esportaturi fil-kampjun.

(358)

Il-Kummissjoni għarrfet lill-GTĊ bil-kunsiderazzjoni tagħha li tapplika d-dispożizzjonijiet tal-Artikolu 28 tar-Regolament (KE) Nru 597/2009 fir-rigward ta' din l-iskema ta' sussidju u peress li l-GTĊ, fit-tweġiba tiegħu għall-ittra tal-Kummissjoni tat-23 ta' Mejju 2013 ma pprovdiex spjegazzjoni sodisfaċenti jew xi evidenza ġdida dwar din il-kwistjoni, il-Kummissjoni kellha tibbaża s-sejbiet tagħha fuq l-aħjar fatti disponibbli, jiġifieri f'dan il-każ fuq l-informazzjoni sottomessa mill-produtturi esportaturi fil-kampjun u informazzjoni oħra pubblikament disponibbli.

(359)

Il-Kummissjoni talbet ukoll mill-GTĊ, bis-suppożizzjoni li ma hemm ebda prezz tas-suq għall-art fir-RPĊ, il-fehmiet tiegħu fuq punti ta' riferiment possibbli. Għad li din kienet biss suppożizzjoni u b'ebda mod sejba jew konklużjoni fiż-żmien meta l-kwestjonarju ntbagħat lill-GTĊ, il-GTĊ ta l-fehma tiegħu li din is-suppożizzjoni hija falza u ma pprovda l-ebda informazzjoni konkreta fuq punti ta' riferiment possibbli. Il-GTĊ issottometta biss li “jekk għandu jintuża xi punt ta' riferiment, dan għandu jkun il-prezzijiet li l-industriji Ċiniżi li mhumiex favoriti jkollhom iħallsu għal art simili”. Peress li l-GTĊ ma ddivulgax liema industriji mhumiex “favoriti” u lanqas ma pprovda xi informazzjoni dwar il-prezzijiet li dawn l-industriji qegħdin iħallsu għall-art industrijali fiċ-Ċina, il-Kummissjoni ma setgħetx tivvaluta jekk jikkostitwixxux punt ta' riferiment xieraq. F'dan ir-rigward ta' min jinnota li fl-investigazzjonijiet preċedenti tagħha Karta Fina Miksija u Azzar Miksi b'Materjal Organiku, il-Kummissjoni sabet li lanqas il-forniment tad-drittijiet ta' użu tal-art lil dawn l-industriji ma jirrispetta l-prinċipji tas-suq.

(360)

Il-forniment tad-dritt ta' użu tal-art fiċ-Ċina jaqa' taħt il-Liġi dwar l-Amministrazzjoni tal-Artijiet tar-Repubblika Popolari taċ-Ċina.

(361)

Skont l-Artikolu 2 tal-Liġi dwar l-Amministrazzjoni tal-Artijiet, l-art hija kollha proprjetà tal-Istat peress li, skont il-kostituzzjoni Ċiniża u d-dispożizzjonijiet ġuridiċi rilevanti, l-art tappartjeni b'mod kollettiv għall-Poplu taċ-Ċina. L-ebda art ma tista' tinbiegħ iżda d-drittijiet ta' użu tal-art jistgħu jkunu assenjati skont il-liġi. L-awtoritajiet tal-Istat jistgħu jassenjaw it-tali drittijiet permezz ta' offerti pubbliċi, kwotazzjoni jew irkant.

(362)

Il-produtturi esportaturi li kkooperaw irrapportaw informazzjoni dwar l-art li għandhom kif ukoll ħafna mill-kuntratti/ċertifikati rilevanti tad-drittijiet ta' użu tal-art, iżda ġiet ipprovduta biss informazzjoni ferm limitata mill-GTĊ dwar il-prezzijiet tad-drittijiet ta' użu tal-art.

(363)

Kif intqal hawn fuq il-GTĊ iddikjara li d-drittijiet ta' użu tal-art fiċ-Ċina huma assenjati permezz ta' offerti, irkant u kompetizzjoni. Dan huwa stipulat ukoll fl-Artikolu 137 tal-Liġi tad-Dritt Reali tar-Repubblika Popolari taċ-Ċina.

(364)

Madankollu, instab li din is-sistema kif deskritta mill-GTĊ mhux dejjem taħdem bl-istess mod fil-prattika. Matul il-verifika ta' produtturi esportaturi fil-kampjun, il-Kummissjoni kisbet ċerti notifiki maħruġa minn awtoritajiet rilevanti dwar tad-drittijiet ta' użu tal-art disponibbli għal trasferiment. Filwaqt li notifika minnhom tillimita b'mod speċifiku lix-xerrejja potenzjali tad-drittijiet ta' użu tal-art għall-industrija fotovoltajka (81), hemm ieħor li jistabbilixxi l-limiti għall-prezz inizjalment stipulat mill-awtoritajiet u ma jħallix lis-suq jiddetermina l-prezz. (82) L-irkanti nfushom ma tqisux li jipprovdu kompetizzjoni vera għaliex f'ħafna mill-eżempji li dehru matul il-verifiki fuq il-post tal-produtturi esportaturi, kumpanija waħda biss għamlet offerta (il-produttur PV fil-kampjun biss) u għalhekk, l-offerta tal-ftuħ tiegħu (il-valur stabbilit mill-Uffiċċju lokali tal-Artijiet) kien il-prezz finali għal kull metru kwadru.

(365)

L-evidenza ta' hawn fuq tikkontradixxi d-dikjarazzjonijiet tal-GTĊ li l-prezzijiet imħallsa għad-drittijiet ta' użu tal-art fir-RPĊ jirrappreżentaw il-prezz tas-suq li huwa ddeterminat minn provvista u domanda tas-suq ħieles u li t-trasferiment tad-drittijiet ta' użu tal-art ma għandux jinkludi restrizzjonijiet fit-tħabbira tat-trasferiment permezz ta' offerti, irkant u kwotazzjoni li jaffettwaw il-kompetizzjoni ġusta. Instab ukoll li xi produtturi esportaturi fil-kampjun irċevew rifużjonijiet minn awtoritajiet lokali biex jikkumpensaw għall-prezzijiet (diġà baxxi) li ħallsu għad-drittijiet ta' użu tal-art.

(366)

Minbarra l-prezzijiet baxxi, uħud mill-produtturi esportaturi fil-kampjun irċivew fondi oħrajn relatati max-xiri ta' drittijiet ta' użu tal-art li effettivament naqqsu saħansitra iktar il-prezz propju mħallas għad-drittijiet ta' użu tal-art.

(367)

Is-sejbiet tal-proċediment jikkonfermaw li s-sitwazzjoni li tikkonċerna l-forniment u x-xiri tal-art fir-RPĊ mhijiex ċara u trasparenti u spiss il-prezzijiet jiġu stabbiliti b'mod arbitrarju mill-awtoritajiet. L-awtoritajiet jistabbilixxu l-prezzijiet skont is-Sistema ta' Evalwazzjoni tal-Artijiet Urbani li tobbligahom sabiex fost kriterji oħrajn iqisu wkoll il-politika industrijali meta jfasslu l-prezz tal-art industrijali (83).

(368)

Barra minn hekk, l-informazzjoni indipendenti pubblikament disponibbli tissuġġerixxi li l-art fir-RPĊ hija pprovduta b'rati inqas minn dawk normali tas-suq. (84)

(369)

B'hekk, il-forniment ta' drittijiet ta' użu tal-art mill-GTĊ għandu jitqies li huwa sussidju skont it-tifsira tal-Artikolu 3(1)(a)(iii) u l-Artikolu 3(2) tar-Regolament bażiku fil-forma ta' forniment ta' prodotti li jagħti benefiċċju lill-kumpaniji riċevituri. Kif spjegat fil-premessi minn (364) sa (367) hawn fuq, ma hemm l-ebda suq funzjonanti għall-artijiet fir-RPĊ u l-użu ta' punt ta' riferiment estern (ara l-premessa (372) hawn isfel) juri li l-ammont imħallas għad-drittijiet ta' użu tal-art mill-esportaturi fil-kampjun huwa ferm inqas mir-rata normali tas-suq. Barra minn hekk, ir-rifużjonijiet mill-awtoritajiet lokali huma trasferimenti diretti ta' fondi li jagħtu benefiċċju għaliex huma għotjiet mhux ripagabbli mhux disponibbli fis-suq. Is-sussidju huwa speċifiku skont l-Artikolu 4 2(a) u 4 2(c) tar-Regolament bażiku għaliex l-aċċess preferenzjali għall-art industrijali huwa limitat biss għal kumpaniji li jappartjenu għal ċerti industriji, f'dan il-każ l-industrija fotovoltajka, ċerti tranżazzjonijiet biss kienu soġġetti għal proċess ta' offerti, spiss il-prezzijiet jitfasslu mill-awtoritajiet u l-prattiki tal-gvern f'dan il-qasam mhumiex ċari u mhumiex trasparenti. Is-sitwazzjoni li tikkonċerna l-art fir-RPĊ hija diskussa wkoll fid-Dokument ta' Ħidma tal-FMI li jikkonferma li l-forniment ta' drittijiet ta' użu tal-art lill-industriji Ċiniżi ma jirrispettax il-kundizzjonijiet tas-suq (85).

(370)

Konsegwentement, dan is-sussidju jitqies kumpensabbli.

(371)

Kif kien konkluż li s-sitwazzjoni fir-RPĊ fir-rigward tad-drittijiet ta' użu tal-art mhijiex immexxija mis-suq, jidher li ma hemm ebda punt ta' riferiment privat disponibbli affattu fir-RPĊ. Għalhekk, aġġustament tal-ispejjeż jew il-prezzijiet fir-RPĊ mhuwiex prattikabbli. F'dawn iċ-ċirkustanzi, jitqies li ma hemm ebda suq fir-RPĊ u, b'konformità mal-Artikolu 6(d)(ii) tar-Regolament bażiku, l-użu ta' punt ta' riferiment estern għall-kejl tal-ammont ta' benefiċċju huwa ġġustifikat. Peress li l-GTĊ ma kkooperax jew naqas milli jissottometti xi proposta għal punt ta' riferiment estern, il-Kummissjoni kellha tirrikorri għal fatti disponibbli sabiex tistabbilixxi punt ta' riferiment estern xieraq. F'dan ir-rigward jitqies xieraq li tintuża informazzjoni mit-Territorju Doganali Separat tat-Tajwan bħala punt ta' riferiment xieraq. Din l-informazzjoni ntużat ukoll f'investigazzjonijiet preċedenti ta' Karta Fina Miksija u Azzar Miksi b'Materjal Organiku.

(372)

Il-Kummissjoni tqis li l-prezzijiet tal-art fit-Tajwan joffru l-aħjar sostitut għaż-żoni fir-RPĊ fejn huma bbażati l-produtturi esportaturi li kkooperaw. Il-biċċa l-kbira tal-produtturi esportaturi jinsabu fiż-żoni żviluppati b'PDG għoli fi provinċji b'densità tal-popolazzjoni għolja.

(373)

L-ammont tas-sussidju kumpensabbli huwa kkalkolat f'termini tal-benefiċċju mogħti lir-riċevituri, li ntwera li jeżisti matul il-PI. Il-benefiċċju mogħti lir-riċevituri huwa kkalkolat billi tittieħed inkunsiderazzjoni d-differenza bejn l-ammont imħallas minn kull kumpanija (imnaqqas bl-ammont ta' rifużjonijiet tal-gvern lokali) għad-drittijiet ta' użu tal-art u l-ammont li normalment kellu jitħallas fuq il-bażi tal-punt ta' riferiment Tajwaniż.

(374)

Meta għamlet dan il-kalkolu, il-Kummissjoni użat il-prezz medju tal-art għal kull metru kwadru stabbilit fit-Tajwan ikkoreġut għad-deprezzament tal-munita u l-evoluzzjoni tal-PDG mid-dati tal-kuntratti rispettivi tad-dritt ta' użu tal-art. L-informazzjoni dwar il-prezzijiet tal-art industrijali nkisbet mill-websajt tal-Uffiċċju Industrijali tal-Ministeru tal-Affarijiet Ekonomiċi tat-Tajwan. Id-deprezzament tal-munita u l-evoluzzjoni tal-PDG għat-Tajwan ġew ikkalkolati fuq il-bażi tar-rati ta' inflazzjoni u l-evoluzzjoni tal-PDG per capita bil-prezzijiet kurrenti f'USD għat-Tajwan kif ippubblikati mill-FMI fil-Ħarsa Ġenerali Ekonomika Dinjija tiegħu tal-2011. B'konformità mal-Artikolu 7(3) tar-Regolament bażiku, dan l-ammont tas-sussidju (numeratur) ġie allokat għall-PI billi ntuża ż-żmien tal-ħajja normali tad-dritt ta' użu tal-art għall-art ta' użu industrijali, jiġifieri 50 sena. Imbagħad, dan l-ammont ġie allokat għall-fatturat ta' bejgħ totali tal-produtturi esportaturi li kkooperaw matul il-PI, għaliex is-sussidju mhuwiex kontinġenti fuq il-prestazzjoni tal-esportazzjonijiet u ma kienx iggarantit b'referenza għall-kwantitajiet manifatturati, prodotti, esportati jew trasportati.

(375)

Ir-rata ta' sussidju stabbilita fir-rigward ta' din l-iskema matul il-PI għall-produtturi esportaturi fil-kampjun tammonta għal:

(376)

Il-GTĊ oġġezzjona għall-fatt li ċerta informazzjoni mid-dokument ta' divulgazzjoni definittiva ġiet ikkwotata minn ċerti mezzi tax-xandir u partijiet interessati wara d-divulgazzjoni. F'dan ir-rigward, huwa osservat li l-Kummissjoni ma ppubblikatx id-dokument. Iżda mhuwiex possibbli li l-Kummissjoni tikkontrolla l-azzjonijiet ta' bosta mijiet ta' partijiet interessati li rċveew id-dokument ta' divulgazzjoni. Jekk uħud mill-partijiet iddeċidew li jagħmlu d-dokument ta' divulgazzjoni pubbliku jew jesprimu l-fehma tagħhom dwar id-dokumet, il-Kummissjoni ma kellha ebda mezz biex iżżommhom milli jagħmlu dan.

(377)

Il-GTĊ iddikjara li l-Kummissjoni kisret ir-rekwiżit ta' “żmien adegwat” tal-Artikolu 12.1 tal-Ftehim tal-SCM. Skont il-GTĊ l-estensjonijiet estensivi tad-data ta' skadenza mogħtija mill-Kummissjoni għat-tweġib tal-kwestjonarju (kif spjegat fil-premessa (104) hawn fuq) ma kinux biżżejjed għal dan l-għan. Il-GTĊ kompla billi ddikjara li dak li huwa “perjodu raġonevoli” skont l-Artikolu 12.7 tal-ASCM jikkostitwixxi wkoll “żmien adegwat” skont l-Artikolu 12.1 tal-ASCM għad-dokumenti kollha l-oħrajn tat-tip ta' kwestjonarju. Il-GTĊ iddikjara wkoll li ma setax jikkomunika mal-produtturi esportaturi fil-kampjun ladarba l-kampjun ġie finalizzat u għaldaqstant, iż-żmien mogħti għat-tweġiba bejn ir-riċevuta tal-kwestjonarju u d-deċiżjoni ta' kampjunar kien inutli. Il-GTĊ iddikjara li x-“xewqa” tal-Kummissjoni li tlesti l-investigazzjoni malajr donnha tirbaħ fuq ir-“rekwiżit mhux negozjabbli” li jingħataw żmien adegwat skont l-Artikolu 12.1. Il-Kummissjoni ma taqbilx ma' dawn id-dikjarazzjonijiet peress li tat iż-żmien massimu possibbli kollu li setgħet lill-GTĊ biex jissottometti tweġibiet għall-kwestjonarju u l-ittra ta' defiċenza. Il-GTĊ kien mgħarraf ukoll li jkun possibbli li jissottometti d-dokumenti mitlubin sad-data taż-żjara ta' verifikazzjoni.

Il-Kummissjoni ma pprekludietx lill-GTĊ milli jissottometti xi informazzjoni matul il-proċediment u f'bosta okkażjonijiet fakkret lill-GTĊ bil-possibilità li jitlob għal smigħ li matulu setgħu jiġu ppreżentati l-informazzjoni u l-fehmiet tal-GTĊ. Huwa osservat li ebda informazzjoni sottomessa mill-GTĊ matul il-proċediment ma ġiet rifjutata minħabba l-puntwalità. Id-dikjarazzjoni tal-GTĊ li ż-żmien mogħti għat-tweġiba bejn ir-riċevuta tal-kwestjonarju u d-deċiżjoni tal-kampjunar kien inutli mhijiex korretta. Parti kbira tal-kwestjonarju kienet tikkonċerna l-livell ġenerali tas-sussidju tal-industrija/prodott ikkonċernat u l-GTĊ bl-ebda mod ma kien limitat mid-deċiżjoni ta' kampjunar biex jiġbor informazzjoni ta' għamla ġenerali. B'mod iktar importanti, wara l-għamla tal-kampjun, il-GTĊ kien baqagħlu 43 jum biex jiġbor informazzjoni speċifika għall-produtturi esportaturi fil-kampjun. Il-Kummissjoni aġixxiet skont l-Artikolu 12.1 tal-Ftehim tal-SCM u tat lill-GTĊ żmien adegwat biex jippreżenta l-evidenza kollha li qies relevanti, filwaqt li jiftakar li obbligu bħal dan ma jistax ikun bla data ta' skadenza, sabiex tkun żgurata t-tlestija fil-ħin tal-investigazzjoni.

(378)

Il-GTĊ iddikjara wkoll li għall-ewwel il-Kummissjoni talbet informazzjoni dettaljata dwar produtturi esportaturi mhux fil-kampjun li ma kinitx “informazzjoni neċessarja” għall-fini tal-investigazzjoni li hija bbażata fuq il-kampjunar. F'dan ir-rigward ta' min jinnota li fiż-żmien li fih intbagħat il-kwestjonarju indirizzat għall-GTĊ, id-deċiżjoni dwar jekk kienx se jkun hemm kampjunar applikat f'dan il-proċediment ma kinitx finali. Wara li l-Kummissjoni rċeviet tweġibiet dwar il-kampjunar mill-produtturi esportaturi Ċiniżi u deher li l-kooperazzjoni min-naħa tal-esportaturi kienet waħda tajba, u ladarba beda jidher li l-esportaturi fil-kampjun kienu se jikkooperaw billi jwieġbu b'mod adegwat għall-kwestjonarji tagħhom, il-Kummissjoni ma insistietx fuq il-forniment ta' informazzjoni speċifika għall-kumpaniji dwar is-sussidjar minn produtturi esportaturi mhux fil-kampjun. Għaldaqstant, il-Kummissjoni ma taqbilx ma' dan.

(379)

Il-GTĊ iddikjara li fid-dokument ta' divulgazzjoni definittiva, il-Kummissjoni ddikjarat b'mod żbaljat li l-GTĊ baqa' lura milli jagħti ċerta informazzjoni fit-tweġiba għall-kwestjonarju u s-sottomissjoijiet sussegwenti. Dan mhuwiex korrett. Kif diġà ddikjarat il-Kummissjoni fl-ittra tagħha tat-23 ta' Mejju 2013 lill-GTĊ, il-GTĊ naqas milli jipprovdi l-informazzjoni mitluba fir-rigward tal-istituzzjonijiet finanzjarji tal-Istat, dokumenti relatati ma' Sinosure u l-forniment ta' assigurazzjoni tal-kreditu għall-esportazzjoni, dokumenti relatati mal-Programm ta' Dimostrazzjoni Golden Sun, u informazzjoni dwar il-forniment ta' Drittijiet ta' Użu tal-Art.

(380)

Skont il-GTĊ, il-Kummissjoni ma kinitx applikat il-fatti disponibbli bħala mekkaniżmu biex timla l-informazzjoni nieqsa kif preskritt mill-Bords u t-tilwim tad-WTO (86) u minflok “applikat inferenzi avversi b'mod punittiv u kompliet tikser id-dispożizzjonijiet tal-Ftehim tal-SCM”. Il-GTĊ kompla jiddikjara li l-Kummissjoni ma użatx il-fatti disponibbli “biss għall-fini ta' sostituzzjoni tal-informazzjoni li tista' tkun nieqsa iżda bħala l-bażi speċifika għas-sejbiet kollha tagħha ta' sussidju filwaqt li warrbet kompletament l-ammont importanti ta' informazzjoni pprovduta mill-GTĊ u l-istituzzjonijiet finanzjarji involuti spiss fuq il-bażi tal-allegat nuqqas ta' għoti ta' tweġibiet perfetti jew li tiġi ppruvata kull figura”. Dan mhuwiex dak li għamlet il-Kummissjoni. L-informazzjoni kollha inklużi pjanijiet u leġiżlazzjoni mill-GTĊ tqieset u ġiet analizzata u s-sejbiet huma bbażati fuq dawn id-dokumenti kif stipulat mill-GTĊ, kull meta dawn id-dokumenti kienu disponibbli u l-verifika kkonfermat il-preċiżjoni tagħhom. Il-kwotazzjonijiet spissi minn dawn id-dokumenti li jappoġġaw il-fatti huma eżempju ta' kif il-Kummissjoni ttrattat l-informazzjoni sottomessa mill-GTĊ. Fil-premessa (110) hawn fuq il-Kummissjoni tispejga biċ-ċar l-uniċi sitwazzjonijiet li fihom l-informazzjoni sottomessa ma tteħditx bil-valur nominali tagħha.

(381)

Il-GTĊ kompla jiddikjara li l-Kummissjoni kkontradixxiet lilha nnifisha meta fid-dokument ta' divulgazzjoni definittiva iddikjarat li f'din l-investigazzjoni talbet informazzjoni speċifika għat-tranżazzjonijiet biss fir-rigward tal-esportaturi fil-kampjun u xi mkien ieħor fid-dokument iddikjarat li “l-kwestjonarju tal-gvern mhuwiex limitat għall-esportaturi fil-kampjun.” Dan mhuwiex minnu. Il-Kummissjoni ma għamlitx dikjarazzjonijiet kontradittorji. Kif diġà ġie spjegat fil-premessa (378) hawn fuq, il-Kummissjoni llimitat it-talba inizjali tagħha dwar il-forniment tal-informazzjoni speċifika għall-kumpaniji għall-produtturi esportaturi fil-kampjun wara d-deċiżjoni li tapplika l-kampjunar. Madankollu, sabiex tivvaluta l-kumpensabilità tal-iskemi ta' sussidju allegati, il-Kummissjoni talbet anki informazzjoni oħra li mhijiex informazzjoni relatata mal-produtturi esportaturi fil-kampjun, bħal informazzjoni dwar is-swieq finanzjarji fiċ-Ċina jew is-suq għad-drittijiet ta' użu tal-art. Għaldaqstant, jintqal li “l-kwestjonarju tal-gvern mhuwiex limitat għall-esportaturi fil-kampjun”.

(382)

Il-GOCGTĊ iddikjara wkoll li l-Kummissjoni donnha qed tinjora l-fatt li ma tistax taqbad u tirrifjuta l-informazzjoni jekk din ma tkunx disponibbli għal verifika. Dan mhuwiex kif il-Kummissjoni ttrattat informazzjoni f'dan il-proċediment. Fl-ebda okkażjoni n-“nuqqas ta' disponibilità ta' verifika” ma kienet l-unika raġuni għaliex ma ġietx aċċettata t-tali informazzjoni bis-sħiħ. Madankollu, meta informazzjoni oħra fil-fajl kienet qed tikkontradixxiha u fl-istess ħin il-GTĊ ma kienx kapaċi jsostniha b'xi xorta ta' evidenza, it-tali informazzjoni ma setgħetx tiġi aċċettata bil-valur nominali tagħha.

(383)

Skont il-GTĊ, fil-paragrafu 85 tad-dokument ta' divulgazzjoni definittiva (replikat hawn fuq fil-premessa (117)), il-Kummissjoni “rrikonoxxiet” li l-GTĊ ma jikkontrollax istituzzjonijiet bankarji u finanzjarji u ma jistax iġiegħlhom jipprovdu informazzjoni. Huwa osservat li l-Kummissjoni ma tafx b'din id-dikjarazzjoni u wara li rrevediet it-test tal-premessa, jidher li dan mhuwiex il-każ.

(384)

Il-GTĊ iddikjara li l-Kummissjoni donnha taqbel mal-GTĊ li l-liġijiet nazzjonali ma jistax jittiħdilhom posthom fil-każ ta' investigazzjoni mir-rekwiżiti tar-Regolament bażiku tal-UE jew il-Ftehim tal-SCM. Ir-rabta li l-GTĊ għamel man-nuqqas ta' forniment tal-informazzjoni allegatament kunfidenzjali mhijiex relevanti. Madankollu, il-Kummissjoni argumentat (premessa (117) hawn fuq) li d-dispożizzjonijiet tal-liġi muniċipali jew ir-regoli interni ta' Membru tad-WTO ma jistgħux jassolvuh mill-obbligi tiegħu tad-WTO sabiex jikkoopera mal-investigazzjonijiet u fil-każijiet ta' kunflitt, huwa f'idejn il-GTĊ li jissuġġerixxi modi li bihom jista' jingħata aċċess għall-informazzjoni sabiex din tkun tista' tiġi verifikata b'mod adegwat. Il-GTĊ irrefera għas-sitwazzjoni li fiha bank uffiċjali pprovda valutazzjoni tar-riskju ta' kreditu għal kumpaniji fil-kampjun bħala eżempju ta' suġġeriment ta' mod ta' verifika tal-informazzjoni allegatament limitata u ddikjara li “l-Kummissjoni kienet għadha mhux issodisfata”. Għall-kuntrarju, kif inhu ċar mit-test tal-premessa (148) hawn fuq), il-Kummissjoni ma kellhiex problema bil-verifika ta' dan id-dokument partikolari u qieset din l-informazzjoni kollha fis-sejbiet tagħha. Madankollu, din kienet sitwazzjoni eċċezzjonali u b'xorti ħażina ma saritx replika għal ħafna mill-informazzjoni ta' għamla simili mitluba f'din il-proċedura.

(385)

F'dan ir-rigward, il-GTĊ kompla jiddikjara li “dokumenti interni sensittivi” ta' banek kienu previsti li jkunu informazzjoni relevanti skont il-Ftehim tal-SCM, u n-nuqqas ta' produzzjoni tagħhom ma tistax twassal għall-applikazzjoni tal-fatti disponibbli. Il-Kummissjoni ssib li din id-dikjarazzjoni hija vaga wisq u ma tarax kif tista' ssir verifika xierqa (imwettqa bil-proċeduri ta' kunfidenzjalità adattati fis-seħħ) fil-każijiet kollha jekk it-tali dokumenti (inklużi dawk li jinvolvu tranżazzjonijiet ma' klijenti) sempliċiment ma jiġux ippreżentati. Fin-nuqqas ta' verifiki, jista' jkun hemm bżonn li l-fatti disponibbli jintużaw biex jimlew in-nuqqasijiet fis-sejbien tal-fatti.

(386)

Il-GTĊ ripetutament saħaq li l-ittra ta' verifika minn qabel ma kienx fiha mistoqsijiet speċifiċi dwar il-verifika u rrefera għall-ittra tal-Kummissjoni tat-23 ta' Mejju 2013 li użat din il-formolazzjoni ta' kliem. Madankollu, il-Kummissjoni, fil-paragrafu 86 tad-dokument tad-divulgazzjoni definittiv (replikat bħala l-premessa (118) fuq) iddikjarat li l-ittra ta' qabel il-verifika tal-25 ta' Marzu 2013 kien fiha lista ferm speċifika u ddettaljata tal-kwistjonijiet u d-dokumenti li se jkunu indirizzati matul il-verifika, b'mod totalment konformi mal-Artikolu 26(3) tar-Regolament bażiku u r-rekwiżiti tad-WTO. In-nuqqas ta' lista ta' mistoqsijiet speċifiċi, li l-forniment tagħha ma għandu l-ebda bażi fir-Regolament bażiku jew ir-regoli tad-WTO, mhuwiex skuża sabiex il-GTĊ ma jikkooperax matul il-verifika.

(387)

Il-GTĊ iddikjara li l-Kummissjoni wriet nuqqas assolut ta' flessibilità matul il-verifika. Din hija interpretazzjoni ħażina tal-fatti u s-sitwazzjoni ta' qabel u matul iż-żjara ta' verifikazzjoni. Kif diġà spjegat fil-paragrafi 88 — 90 tad-dokument ta' divulgazzjoni definittiva (replikati bħala l-premessi (120) — (122) hawn fuq), il-grad ta' flessibilità muri mill-Kummissjoni kien sħiħ u inkundizzjonali. B'xorti ħażina, it-tentattivi tal-GTĊ sabiex jipprovdi informazzjoni li bl-ebda mod possibbli ma setgħet tiġi verifikata fi ħdan l-iskeda taż-żjarat fuq il-post fissru li t-tali informazzjoni ma setgħetx tiġi kontroverifikata u tingħata l-piż ta' dokument verifikat. Il-GTĊ fakkar ukoll lill-Kummissjoni bil-ġurisprudenza tad-WTO mill-bord ta' KE-Salamun li jekk id-dokumenti humiex “verifikabbli” mhuwiex dejjem determinat biss mill-possibilità ta' investigazzjonijiet fuq il-post u ddikjara li l-Kummissjoni ma tistax tirrifjuta informazzjoni sempliċiment għax mhijiex disponibbli fiż-żjarat ta' verifika. Il-Kummissjoni tosserva li t-tali informazzjoni, mhux suxxettibbli għall-verifika fuq il-post sabiex jiġu ttestjati l-kredibbiltà u l-preċiżjoni tagħha, tista' tingħata inqas piż milli kieku ġiet ivverifikata kif suppost u li xi kultant dan seħħ f'dan il-każ.

(388)

Il-GTĊ ilmenta l-prattika allegata tal-Kummissjoni li ma taċċettax dokumenti u evidenza ġodda li jeħtieġu li jiġu verifikati wara tmiem is-sessjoni ta' verifika li jappartjenu għaliha. Kif diġà spjegat fil-paragrafu 89 tad-dokument ta' divulgazzjoni definittiva (replikat fil-premessa (121) hawn fuq) dan mhuwiex u qatt ma kien il-każ. Huwa minnu li l-Kummissjoni normalment ma tistax taċċetta dokumenti bħala wiri ta' verifika ladarba tintemm is-sessjoni ta' verifika u mhuwiex prattikament possibbli li jiġu verifikati t-tali dokumenti, iżda xejn ma jżomm lill-GTĊ milli jissottometti t-tali dokumenti bil-miktub, xi ħaġa li ġrat f'dan il-każ ukoll.

(389)

Il-GTĊ iddikjara li l-Kummissjoni ma spjegatx ir-raġuni għaliex talbet is-sitt dokumenti msemmijin fil-premessa (122) hawn fuq u fuq din il-bażi, ma setgħetx issir il-verifika tagħhom. Din id-dikjarazzjoni diġà tqajmet mill-GTĊ fl-ittra tiegħu tat-3 ta' Ġunju 2013 u l-Kummissjoni weġbitha bis-sħiħ fil-premessa (122) hawn fuq. Huwa nnotat għal darba oħra li dawn id-dokumenti kollha jirrigwardaw direttament l-industrija kkonċernata u anki għandhom x'jaqsmu ma' skemi partikolari ta' sussidji bħal self preferenzjali jew skemi ta' taxxa preferenzjali. Għaldaqstant, huwa ovvju mill-ismijiet u l-kontenut tagħhom li kienu relevanti għall-investigazzjoni. Madankollu, il-GTĊ sempliċiment irrifjuta milli jwieġeb kwalunkwe mistoqsija f'dan ir-rigward matul il-verifika, billi kkwota l-allegata irrelevanza tad-dokument għall-proċediment bħala l-unika raġuni.

(390)

Il-GTĊ iddikjara li ma setax jipprovdi l-evidenza ta' sostenn għall-informazzjoni li pprovda fit-tweġiba għall-kwestjonarju dwar il-perċentwal tas-self mogħti lill-industrija kkonċernata peress li din l-informazzjoni kienet għand banek li huma entitajiet indipendenti u mhux dipartimenti tal-GTĊ u li l-Kummissjoni għandha tivverifika l-figuri mal-banek. Il-GTĊ irrefera għad-dispożizzjonijiet tal-Liġi tal-Ibbankjar Kummerċjali li tistipula li l-banek għandhom iwettqu n-negozju tagħhom skont il-liġi (l-Artikolu 4) u ma għandu jkun hemm ebda interferenza mill-gvernijiet lokali jew dipartimenti tal-gvern fil-bosta livelli, organizzazzjonijiet pubbliċi jew individwi fl-operat kummerċjali tal-banek (Artikolu 5). Il-fatt huwa li l-GTĊ għamel dikjarazzjoni fit-tweġiba għall-kwestjonarju u mhuwiex kapaċi jsostniha kollha. Il-banek li l-Kummissjoni ppruvat tivverifika lanqas ma kienu kapaċi jsostnu din l-informazzjoni b'ebda informazzjoni. Jekk din għandha titqies bħala prattika aċċettabbli, il-parti investigata tista' sempliċiment tagħmel kwalunkwe dikjarazzjoni li ssostni l-każ tagħha u l-awtorità li tinvestiga jkollha taċċettaha bla ma jkunilha possibbli tivverifika jekk tirrappreżentax ir-realtà. Dan huwa saħansitra iktar importanti meta jitqies li din l-informazzjoni partikolari tikkontradixxi informazzjoni oħra fil-fajl. Hemm ukoll artikoli oħrajn fil-Liġi dwar l-Ibbankjar Kummerċjali li jobbligaw lill-banek iwettqu n-negozju tas-self tagħhom fuq il-ħtiġijiet tal-ekonomija nazzjonali u l-iżvilupp soċjali u fl-ispirtu tal-politiki industrijali statali (Artikolu 34). Kif indikat tajjeb mill-GTĊ fil-kummenti tiegħu, il-banek iwettqu l-attivitajiet kummerċjali tagħhom skont il-liġi, jiġifieri anki skont it-tali dispożizzjonijiet tal-Artikolu 34 tal-Liġi dwar l-Ibbankjar Kummerċjali. Għaldaqstant, din il-linja suppost ċara bejn il-gvern u l-banek ma kinitx ikkonfermata mill-fatti.

(391)

Il-GTĊ iddikjara li pprovda l-informazzjoni kollha fir-rigward tas-sjieda tal-banek li huma proprjetà tiegħu. Iddikjara wkoll li l-figuri rrapportati dwar is-sjieda tal-banek huma l-figuri uffiċjali tas-CBRC u li għaldaqstant, ma kien hemm ebda raġuni għaliex jemmen li l-informazzjoni pprovduta mill-GTĊ hija falza jew qarrieqa u japplika d-dispożizzjonijiet tal-Artikolu 28 tar-Regolament bażiku. Barra minn hekk, il-GTĊ iddikjara li mhuwiex konxju ta' x'kien is-sors għad-dikjarazzjoni tal-Kummissjoni fil-paragrafu 95 (replikat fil-premessa (127) hawn fuq) tad-dokument ta' divulgazzjoni definittiva (“L-informazzjoni pubblikament disponibbli tissuġġerixxi li hemm ukoll banek oħrajn tal-Istat li taw self lill-produtturi esportaturi fil-kampjun”), jiġifieri minbarra dawk irrapportati mill-GTĊ bħala li huma posseduti mill-Istat fit-tweġiba tiegħu għall-ittra ta' defiċenza Dawn id-dikjarazzjonijiet ma setgħux jiġu aċċettati. Din il-pretensjoni ma setgħetx tiġi aċċettata. Huwa osservat li għall-ewwel, il-GTĊ iddikjara fit-tweġiba għall-kwestjonarju tiegħu li ma għandu l-ebda informazzjoni dwar is-sjieda tiegħu tal-banek. Kien biss wara li l-Kummissjoni indikat fl-ittra ta' defiċenza li, skont il-leġiżlazzjoni Ċiniża, il-GTĊ irid jiġbor it-tali informazzjoni li l-GTĊ ta xi informazzjoni f'dan ir-rigward. Matul il-verifika, l-uffiċjal tas-CBRC irrifjuta milli jappoġġa l-figuri dwar is-sjieda tal-banek b'xi evidenza, irrifjuta milli jipprovdi s-sors tal-informazzjoni u ma spjegax mnejn ġejja. Huwa osservat ukoll li l-GTĊ ma kkontestax il-fatt li tal-inqas ħames banek oħrajn imsemmijin mill-Kummissjoni fid-dokument ta' divulgazzjoni definittiva (ara n-nota f'qiegħ il-paġna fil-premessa (127)) huma proprjetà tal-Istat.

(392)

Il-GTĊ ma qabilx mad-dikjarazzjoni fil-paragrafu 97 tad-dokument ta' divulgazzjoni definittiva (replikat fil-premessa (129) hawn fuq) li s-CBRC irrifjuta milli jwieġeb il-mistoqsija dwar l-ikbar 10 banek fiċ-Ċina għaliex ma kinitx sottomessa bil-miktub u ddikjara li l-Kummissjoni interpretat ħażin il-fatti, għaliex ir-raġuni ewlenija għan-nuqqas ta' tweġiba kienet li peress li din il-mistoqsija ma kinitx fl-ittra ta' qabel il-verifika, kellu bżonn iż-żmien biex jipprepara għaliha. Huwa l-GTĊ li jinterpreta l-fatti ħażin dwar din il-kwistjoni. Il-Kummissjoni ma saħqitx fuq tweġiba minnufih, iżda s-CBRC irrifjuta milli tal-inqas jara l-mistoqsija għar-raġuni li ma kinitx ipprovduta minn qabel bil-miktub. Jekk ir-raġuni kienet nuqqas ta' żmien biex iħejji t-tweġiba, il-GTĊ seta' ssottometta t-tweġiba iktar tard matul il-verifika jew bil-posta elettronika (għad li mingħajr il-possibilità li l-Kummissjoni tivverifikaha) kif għamel b'bosta dokumenti oħrajn. Madankollu, il-GTĊ ma għamilx hekk.

(393)

Il-GTĊ iddikjara li pprovda d-dokumenti kollha dwar l-istabbiliment u l-mandat tas-CBRC li l-Kummissjoni talbet fil-kwestjonarju, u li peress li l-Kummissjoni ma qajmet ebda kwistjoni dwar dan fl-ittra ta' defiċenza u ma talbitx id-dokumenti fil-“lista ta' dokumenti li għandhom jiġu pprovduti qabel tibda iż-żjara ta' verifika” fl-Anness 2 għall-ittra ta' qabel il-verifika, il-GTĊ ma ħassux obbligat jipprovdi xi dokument ieħor. Dan mhuwiex minnu. Il-Kummissjoni talbet id-dokumenti kollha li kienu l-bażi għall-istabbiliment u l-mandat tas-CBRC iżda l-GTĊ ipprovda biss uħud minnhom. Kien biss fuq il-bażi tad-dikjarazzjoni tal-uffiċjal tas-CBRC li l-Kummissjoni saret taf li hemm dokumenti oħrajn f'dan ir-rigward. It-tweġiba tal-GTĊ fil-kwestjonarju f'dan ir-rigward kienet inkompluta u qarrieqa peress li, ovvjament, il-GTĊ (CBRC) kien jaf bl-eżistenza tat-tali dokumenti oħrajn kif ammettiet is-CBRC matul il-verifika fuq il-post.

(394)

Il-GTĊ saħaq li matul il-verifika, il-Kummissjoni ma talbitx l-istatistiki u r-rapporti mill-banek li pprovdew self lill-esportaturi fil-kampjun għall-PI. Iddikjaraw li l-Kummissjoni talbet biss ir-rapport tal-istatistika tal-2012 sottomess lis-CBRC mill-Bank of China u għal dan, l-uffiċjal tas-CBRC kellu jivverifika mas-servizzi ġuridiċi involuti minħabba l-obbligi ta' kunfidenzjalità. Dan mhuwiex korrett. Matul il-verifika, il-Kummissjoni tenniet it-talba tagħha mill-kwestjonarju u l-ittra ta' defiċenza sabiex jiġu pprovduti l-istatistiki mill-banek kollha li pprovdew self lill-esportaturi fil-kampjun (87).

(395)

Il-GTĊ kompla jiddikjara li r-referenza tal-ilmentatur fl-ilment għall-kawża Karta Fina Miksija li fiha l-Kummissjoni sabet “fuq il-bażi ta' inferenzi avversi” li l-SOCBs kienu qed jaġixxu bħala korpi pubbliċi hija “dikjarazzjoni mhux sostanzjata mingħajr kuntest fir-rigward tal-għamla u l-eżistenza ta' sussidju mogħti lill-produtturi esportaturi tal-prodott ikkonċernat u għaldaqstant ma tistax titqies bħala evidenza suffiċjenti” tal-eżistenza ta' kontribuzzjoni finanzjarja minn gvern jew korp pubbliku skont it-tifsira tal-Artikolu 11.2 tal-Ftehim SCM. L-ewwel nett, irid jiġi indikat li s-sejbiet ikkonċernati fil-kawża Karta Fina Miksija ma kinux ibbażati fuq inferenzi avversi iżda fuq fatti disponibbli skont l-Artikolu 28 tar-Regolament bażiku u ma hemm l-ebda sentenza sussegwenti li tikkonferma d-dikjarazzjoni tal-GTĊ li s-sejba tal-Kummissjoni f'dan ir-rigward hija bbażata fuq l-użu inadatt tal-fatti disponibbli. Għall-kuntrarju, il-Kummissjoni għamlet sejbiet simili fir-rigward tal-SOCBs f'kawża antisussidju oħra dwar importazzjonijiet miċ-Ċina, Azzar Miksi b'Materjal Organiku, u anki awtoritajiet investgattivi oħrajn waslu għall-konklużjoni li l-SOCBs Ċiniżi huma korpi pubbliċi, b'mod partikolari l-Istati Uniti, f'sejba li kienet ikkonfermata mill-Korp tal-Appell tad-WTO. (88)

(396)

Il-GTĊ kompla jiddikjara li l-Kummissjoni talbet ċerta informazzjoni mill-banek kollha stabbiliti fiċ-Ċina u li ma kienx fi ħdan l-abilità prattika tal-GTĊ li jipprovdi t-tali informazzjoni għal “iktar minn 3 800” bank. Il-Kummissjoni ma taqbilx ma' din id-dikjarazzjoni u mill-ġdid tirreferi għall-ittra ta' defiċenza li fiha, wara t-tweġiba tal-GTĊ għall-kwestjonarju, hija llimitat l-ambitu tal-informazzjoni mitluba biss għall-banek li fihom il-GTĊ għandu interess azzjonarju dirett jew indirett (89).

(397)

Il-GTĊ iddikjara wkoll li d-dikjarazzjoni tal-Kummissjoni li ħadet f'kunsiderazzjoni s-sommarju taċ-ċirkulari tal-PBOC inkwistjoni mill-websajt sottomessi matul il-verifika hija żbaljata u li dan huwa ppruvat fil-paragrafu 133 tad-dokumenti ta' divulgazzjoni definittiva (replikat fil-premessa (164) hawn fuq). Dan mhuwiex korrett. Il-premessa (164) ma tikkontradixxix il-kontenut tas-siltiet mill-websajt. Tieħdu f'kunsiderazzjoni iżda toqgħod ukoll fuq il-kontenut propju taċ-Ċirkulari li qatt ma kien ikkontestat mill-GTĊ sa issa bħala wieħed impreċiż.

(398)

Il-GTĊ iddikjara li l-Kummissjoni “ħadet siltiet ta' ċerti termini u frażijiet barra mill-kuntest minn bosta dokumenti”, interpretat oħrajn ħażin u ppruvat torbothom flimkien biex tistabbilixxi li l-GTĊ jippromwovi l-industrija li tipproduċi l-prodott ikkonċernat jew tistabbilixxi li l-SOCBs huma korpi pubbliċi. Jargumenta li “qari sħiħ” ta' dawn id-dokumenti (pjanijiet, spjegazzjonijiet u deċiżjonijiet) juri li s-sejbiet tal-Kummissjoni huma neqsin minn bażi ġuridika u mhumiex imsejsin fuq evidenza. Dan mhuwiex korrett. Il-Kummissjoni analizzat u qieset id-dokumenti kollha, inklużi dawk imsemmijin fil-premessa (102) fit-totalità tagħhom, eżattament bil-mod li jirrakkomanda l-GTĊ.

(399)

Fir-rigward tad-Deċiżjoni Nru 40, il-GTĊ iddikjara li fid-dokument ta' divulgazzjoni definittiva, il-Kummissjoni kkwotat minnu barra l-kuntest “biex tibdel it-tifsira korretta tiegħu”. Skont il-GTĊ huwa ċar mid-dispożizzjonijiet l-oħrajn tad-Deċiżjoni Nru 40 li hija ffokata lejn l-iżvilupp tal-użu tas-sorsi tal-enerġija rinnovabbli u mhux il-klassifikazzjoni ta' moduli u ċelloli solari bħala mira ta' xi politika ta' żvilupp mistenni kif propost mill-Kummissjoni. Mhuwiex minnu li r-referenza tal-Kummissjoni għat-test tal-Artikolu V tad-Deċiżjoni Nru 40 kienet barra l-kuntest. Il-Kummissjoni mhijiex targumenta jekk wieħed mill-iskopijiet kienx l-iżvilupp tal-użu ta' sorsi tal-enerġija rinnovabbli. Il-fatt huwa li fid-Deċiżjoni Nru 40, il-Kunsill tal-Istat identifika l-industrija tal-enerġija l-ġdida u l-enerġija solari bħala industriji prijoritizzati u li għalhekk, kienu jaqgħu taħt il-kategorija mħeġġa ta' proġetti fil-Katalogu ta' Gwida tar-Ristrutturar Industrijali. Jekk jittieħdu f'kunsiderazzjoni l-Artikoli 17, 18 u 19 tad-Deċiżjoni Nru 40 l-istituzzjonijiet finanzjarji jistgħu jagħtu biss self lill-industriji/kumpaniji li jappartjenu għal din il-kategorija. Din hija indikazzjoni ċara li l-industrija PV li tipproduċi, fost l-oħrajn, moduli u ċelloli solari hija mogħtija prijorità.

(400)

Il-GTĊ iddikjara li ma hemm ebda referenza fit-test tad-Deċiżjoni tal-Kunsill tal-Istat tal-10 ta' Ottubru għall-moduli u ċ-ċelloli solari jew l-industrjia PV u li jekk tħeġġeġ xi appoġġ fiskali, dan sar fir-rigward tal-għanijiet li jappartjenu għall-użu tal-enerġija alternattiva li ma għandhom l-ebda effett fuq l-iżvilupp tal-produzzjoni ta' moduli u ċelloli inġenerali. Il-Kummissjoni ma taqbilx. Ta' min jinnota li din id-Deċiżjoni tal-Kunsill tal-Istat ma tidhirx li hija mmirata esklussivament lejn il-promozzjoni tal-użu tas-sorsi tal-enerġija alternattiva. Mit-titlu tagħha (Deċiżjoni tal-Kunsill tal-Istat dwar l-Aċċelerazzjoni tal-Inkubazzjoni u l-Iżvilupp tal-Industriji Strateġiċi Emerġenti) kif ukoll mill-kontenut (fosthom l-Artikoli 1(1),1(2),2(2)) huwa ċar li l-għan huwa li tappoġġa l-iżvilupp ta' ċerti industriji (f'dan il-każ industriji strateġiċi emerġenti). Dan huwa kkonfermat ukoll mill-fatt li l-għanijiet stabbiliti f'din id-Deċiżjoni jappartjenu direttament għall-produzzjoni u l-prestazzjoni tal-industriji strateġiċi emerġenti (Artikolu 2(3)). Barra minn hekk, fid-Deċiżjoni hemm rabta ċara bejn l-industriji strateġiċi emerġenti u l-industrija PV li tipproduċi, fost l-oħrajn, moduli u ċelloli solari. L-ewwel nett, ma hemm l-ebda dubju li l-industrija PV hija segment tal-industrija tal-enerġija alternattiva li hija msemmija fl-Artikolu 2 tad-Deċiżjoni bħala industrija li l-Istat għandu jkabbar u jiżviluppa. It-tieni nett, il-produtturi esportaturi fil-kampjun jappartjenu għall-kategorija ta' industriji tat-teknoloġija avvanzata li huma msemmijin fl-Artikolu 2(2) tad-Deċiżjoni. B'mod simili, it-12-il pjan ta' ħames snin jinkludi l-industrija tal-enerġija solari fost l-industriji strateġiċi u anki t-12-il Pjan ta' Ħames Snin għall-Industrija Solari Fotovoltajka jikkonferma li d-Deċiżjoni tal-Kunsill tal-Istat “niżżlet l-industrjia solari fotovoltajka fil-qasam importanti ta' industriji strateġiċi emerġenti, li l-pajjiż tagħna ser jiżviluppa fil-ġejjieni”. (90)

(401)

Skont il-GTĊ, il-Kummissjoni kkwotat il-Pjan Xjentifiku u Teknoloġiku fit-Terminu Medju u fit-Tul iżda naqset milli tirreferi għal waqt jew dispożizzjoni fejn dan id-dokument jiddefinixxi impriżi tat-teknoloġija avvanzata li jinkludu impriżi li jipproduċu moduli u ċelloli jew l-industrija PV inġenerali. Skont il-GTĊ l-għanijiet tal-Ispjegazzjoni huma ffokati biss lejn l-iżvilupp ta' sorsi tal-enerġija alternattiva biex tonqos id-dipendenza fuq fjuwils fossili. Il-Kummissjoni ma taqbilx. Il-maġġoranza tal-produtturi esportaturi fil-kampjun investigati ngħataw ċertifikati ta' impriżi tat-teknoloġija avvanzata u ġdida u fuq din il-bażi bbenefikaw minn sussidji li l-forniment tagħhom kien limitat għal impriżi tat-teknoloġija avvanzata u ġdida (pereżempju eżenzjonijiet mit-taxxa). L-istess tipi ta' programmi individwali ta' appoġġ imsemmijin f'dan il-Pjan intużaw mill-esportaturi fil-kampjun.

(402)

Il-GTĊ saħaq li d-dikjarazzjoni tal-Kummissjoni li l-Liġi tar-RPĊ dwar il-Progress Xjentifiku u Teknoloġiku telenka numru ta' miżuri għall-appoġġ tal-industriji strateġiċi inkluża l-industrija PV solari, mhijiex ibbażata fuq xi fatti u li din il-liġi ma ssemmix l-industrija tal-PV jew l-industriji strateġiċi u ma hemm ebda bażi sabiex wieħed jisħaq li l-prodott ikkonċernat huwa inkluż fl-ambitu ta' din il-liġi. Dan mhuwiex korrett. Il-bażi għal din id-dikjarazzjoni huma l-Artikoli 18 u 34 ta' din il-liġi. Skont l-Artikolu 18, l-Istat iħeġġeġ u jiggwida lill-istituzzjonijiet finanzjarji sabiex jappoġġaw l-iżvilupp ta' industriji ta' teknoloġija għolja. Skont l-Artikolu 34, l-istituzzjonijiet finanzjarji orjentati lejn il-politiki joffru għajnuna speċjali għal proġetti ta' impriżi mħeġġa mill-Istat. L-industrija PV taqa' fi ħdan il-kategorija tal-industriji tat-teknoloġija avvanzata u ġdida u taqa' wkoll fi ħdan il-kategorija ta' impriżi li l-proġetti tagħhom huma mħeġġin mill-Istat. Barra minn hekk, l-Artikolu 17 tal-istess liġi jwiegħed politiki ta' taxxa preferenzjali lil, fost l-oħrajn, entitajiet li huma impenjati fi proġetti koperti mill-pjanijiet xjentifiċi u teknoloġiċi nazzjonali. Mill-premessa (401) hawn fuq jidher biċ-ċar li l-proġetti tal-kumpaniji fl-industrija PV jaqgħu fi ħdan dan il-kamp ta' applikazzjoni. Bħala konklużjoni, hemm tal-inqas tliet indikazzjonijiet ċari li l-industrija PV u l-kumpaniji li jipproduċu u jesportaw il-prodott ikkonċernat huma inkluż fil-kamp ta' applikazzjoni ta' din il-liġi.

(403)

Il-GTĊ iddikjara wkoll li l-Kummissjoni qieset li pjanijiet, deċiżjonijiet u liġijiet tar-RPĊ għandhom l-istess effett u valur legali u dan imur kontra l-prinċipji ta' interpretazzjoni legali, il-liġi tal-leġiżlazzjoni taċ-Ċina u l-argumenti ripetuti li saru mill-GTĊ. Skont il-GTĊ, ir-referenza għall-pjan ġenerali ta' 5 snin u l-pjan speċifiku għall-PV ma għandha ebda referenza legali għaliex ma ġiet ipprovduta ebda evidenza pożittiva li l-pjanijiet huma legalment vinkolanti. Dan mhuwiex minnu peress li d-dikjarazzjoni tal-GTĊ u l-pjanijiet mhumiex legalment vinkolanti mhijiex appoġġata minn evidenza oħra fil-fajl. Għall-kuntrarju, it-test tal-Pjan kif sottomess mill-GTĊ fit-tweġiba għall-kwestjonarju jiddikjara biċ-ċar: “Dan il-pjan ġie deliberat u approvat mill-Kungress Popolari Nazzjonali, u għandu l-effett tal-liġi.” (91) Il-GTĊ, fil-kummenti tiegħu dwar id-divulgazzjoni definittiva, iddikjara: “Skont il-Liġi tal-Leġiżlazzjoni taċ-Ċina, il-Kostituzzjoni, il-liġijiet, il-leġiżlazzjoni amministrattiva, ir-regolamenti lokali, u r-regoli huma l-leġiżlazzjoni fiċ-Ċina.” Peress li l-pjan għandu effett ta' liġi u l-GTĊ ikkonferma li l-liġijiet huma l-leġiżlazzjoni fiċ-Ċina, il-Kummissjoni waslet għall-konklużjoni li, tabilħaqq, il-pjan huwa legalment vinkolanti. Skont l-ispjegazzjoni tal-GTĊ matul iż-żjara ta' verifika, il-pjanijiet settorjali u reġjonali ta' ħames snin ġejjin mill-pjan ġenerali ta' ħames snin, u għalhekk il-Kummissjoni ma kellha ebda bażi biex tittratta l-pjan settorjali ta' ħames snin dwar il-PV (2011-2015) b'mod differenti mill-Pjan ġenerali ta' ħames snin.

(404)

Il-GTĊ jikkwota l-“linji gwida maħruġin mill-Kummissjoni dwar ir-rimborż/rifużjonijiet” bħala eżempju ta' dokument mhux vinkolanti simili fil-kuntest tal-UE. Il-Kummissjoni tassumi li l-GTĊ qed jirreferi għan-“Notifika tal-Kummissjoni dwar ir-rimborż tad-dazji antidumpting” (traduzzjoni mhux uffiċjali) (ĠU C 127 tad-29.5.2002 p. 10). Mhuwiex preċiż li dawn il-linji gwida jiġu karatterizzati bħala mhux vinkolanti għaliex jorbtu lill-Kummissjoni diment li ma jiksrux regoli superjuri. Il-Kummissjoni ddeterminat li l-pjanijiet taċ-Ċina huma legalment vinkolanti. Madankollu, anki jekk b'mod ipotetiku jiġi supponut li dan ma kienx il-każ, huwa ċar li l-pjanijiet nazzjonali, settorjali u reġjonali, li ġejjin direttament mill-ogħla livelli tal-gvern u li jistabbilixxu l-politika tal-gvern fir-rigward ta' żvilupp ekonomiku u industrijali, ikollhom valur ta' prova għoli fir-rigward tal-għamla de-facto obbligatorja tal-għanijiet iddikjarati tagħhom. Daqstantieħor huwa ċar li jistgħu jkunu invokati mill-gvern sabiex iwiddbu lill-entitajiet meta ma jimplimentawhomx kif suppost. Għaldaqstant, xorta jkunu għadhom ferm relevanti biex isiru determinazzjonijiet relatati mal-intervent tal-gvern fl-ekonomija u d-direzzjoni u l-kontroll ta' ċerti industriji.

(405)

Il-GTĊ iddikjara li n-nuqqas tiegħu milli jipprovdi tweġibiet għall-Appendiċi A ma għandux iwassal għall-applikazzjoni tal-fatti disponibbli skont l-Artikolu 28 tar-Regolament bażiku. Skont il-GTĊ, li kieku l-Kummissjoni fil-verità kellha l-għan li tivverifika l-allegazzjonijiet fl-ilment li l-banek tal-Istat Ċiniż huma korpi pubbliċi ma kienx ikollha bżonn timla l-kwestjonarji b'talbiet għal dejta interna, sensittiva u speċifika għat-tranżazzjonijiet dwar banek, li ħafna minnhom bl-ebda mod ma kienu proprjetà tal-gvern. F'dan ir-rigward, il-GTĊ irrefera għall-informazzjoni dwar self individwali pprovdut mill-bank lill-produtturi esportaturi fil-kampjun. Il-Kummissjoni ma taqbilx ma' din id-dikjarazzjoni. L-iskop tal-informazzjoni mitluba fl-Appendiċi A kien li tivverifika jekk il-banek Ċiniżi humiex korpi pubbliċi u jekk humiex inkarigati u ordnati mill-gvern. Bl-eċċezzjoni tal-informazzjoni fuq self individwali, il-GTĊ ma speċifikax liema mill-informazzjoni mitluba l-oħra qies li mhijiex relevanti għal dak l-għan.

(406)

Huwa mfakkar li l-mistoqsijiet fl-Appendiċi A saqsew għal informazzjoni dwar is-sjieda tal-banek, fuq il-kompożizzjoni tal-bord tad-diretturi u l-bord tal-azzjonisti, minuti tal-laqgħat tal-azzjonisti/tad-diretturi, rabtiet tal-maniġment superjuri mal-awtoritajiet tal-Istat, analiżi settorjali tas-self, politiki dwar l-għoti b'self u valutazzjoni tar-riskju fir-rigward ta' self ipprovdut lill-produtturi esportaturi li kkooperaw. Il-GTĊ iddikjara li għas-sejbiet fuq il-korpi pubbliċi, it-tali talba kienet “irraġonevoli b'mod ċar” u l-ambitu tal-informazzjoni mitluba kien wiesa' wisq. Il-GTĊ iddikjara wkoll li d-determinazzjoni “tal-limitu” dwar jekk l-entità hijiex korp pubbliku trid issir qabel biss intalbet it-tali informazzjoni. Il-Kummissjoni ma taqbilx. Fid-dawl tal-istandards għoljin stabbiliti mill-AB tad-WTO f'DS 379 (92) l-informazzjoni mitluba kollha hija neċessarja, inklużi s-sejbiet dwar kemm il-gvern huwa involut fis-sistema finanzjarja. Pereżempju, evidenza li entitajiet jaġixxu b'mod mhux kummerċjali tista' tkun li turi inkarigu u ordnijiet, jekk tingħata flimkien ma' indikazzjonijiet ta' interferenza mill-gvern. Xorta waħda, huwa osservat li ladarba l-kooperazzjoni mill-produtturi esportaturi fil-kampjun kienet disponibbli, il-Kummissjoni ddeċidiet li tillimita l-informazzjoni mitluba dwar self għal dawn id-ditti u ma għamlet ebda inferenza min-nuqqas tal-GTĊ sabiex jipprovdi informazzjoni oħra dwar is-self individwali li ntalbet oriġinarjament. Madankollu, it-talbiet kollha l-oħrajn għal informazzjoni baqgħu relevanti għall-investigazzjoni. Dwar id-dikjarazzjoni tal-GTĊ li ma setax jipprovdi ċerta informazzjoni dwar l-Appendiċi A, huwa osservat li l-GTĊ irrifjuta milli jipprovdi l-Appendiċijiet A kollha kemm huma bl-eċċezzjoni ta' bosta banek. Wara li tqies dan li ntqal hawn fuq, ġie konkluż li l-GTĊ naqas milli jipprovdi l-bqija tal-informazzjoni mitluba fi ħdan il-perjodu raġonevoli.

(407)

Il-GTĊ, billi invoka r-Rapport tal-Korp tal-Appell tad-WTO Stati Uniti-Azzar Illaminat bis-Sħana (Para.99) (93), jargumenta li ma kellux il-ħila prattika li jaqdi t-talbiet “irraġonevoli” tal-Kummissjoni għal informazzjoni u li n-nuqqas tal-Kummissjoni milli tindirizza din il-kwistjoni, u li torbot il-bosta rabtiet mad-determinazzjonijiet fattwali li huma relatati magħhom, fisser li l-Kummissjoni ma aġixxietx b'bona fide. Għad li l-każ imsemmi huwa relatat mal-kooperazzjoni minn esportaturi f'każ antidumping, il-Kummissjoni taċċetta li, fil-każ tal-kwestjonarji tal-gvern fil-kawżi CVD, hemm bżonn li jinkiseb bilanċ bejn l-informazzjoni meħtieġa u l-ħila prattika ta' min iwieġeb sabiex jikkonforma. Madankollu, dan il-bilanċ irid jinkiseb fil-kuntest tal-fatti kollha. Determinazzjonijiet fir-rigward tal-istatus tal-banek tal-Istat fiċ-Ċina bħala korpi pubbliċi diġà kienu saru fil-kawżi Karta Fina Miksija u Azzar Miksi b'Materjal Organiku u f'dan il-każ l-ilmentatur ipprovda biżżejjed evidenza prima facie biex juri li l-banek tal-Istat kienu għadhom korpi pubbliċi. Għaldaqstant, il-GTĊ missu stenna investigazzjoni intensiva fil-fatti jekk xtaq jirribatti din l-allegazzjoni. B'xorti ħażina, il-GTĊ kompla jagħmel dikjarazzjonijiet,pereżempju, li kellu biss ftit informazzjoni jew xejn affattu fuq is-sjieda tal-gvern tal-banek (fattur ferm relevanti fid-determinazzjoni ta' korp pubbliku), xi ħaġa li ssuġġeriet li ma kienx qed jaġixxi bl-aqwa ħiliet tiegħu u billi rrifjuta milli jagħti aċċess għal informazzjoni neċessarja. Din hija waħda miċ-“ċirkustanzi limitati” li fihom jista' jiġi applikat l-Artikolu 12.7 tal-Ftehim tal-SCM (skont ir-Rapport tal-Bord tad-WTO (94). Barra minn hekk, filwaqt li l-Kummissjoni kienet taf li t-talbiet tagħha għal informazzjoni kienu, minħabba l-bżonn, kemxejn estensivi, il-kooperazzjoni hija proċess reċiproku u għall-ewwel, ir-reazzjoni tal-GTĊ kienet li sempliċiment jitlob spjegazzjonijiet li minnhom kien hemm determinazzjonijiet fattwali li t-talbiet kienu marbutin magħhom (xi ħaġa li ma tistax tiġi determinata minn qabel) minflok ma ppropona modi li bihom it-talbiet għal informazzjoni jistgħu jiġu indirizzati b'mod raġonevoli.

(408)

Dwar il-verifika tal-Bank of Shanghai, il-GTĊ iddikjara li l-fatt li l-verifika ma saritx mhijiex raġuni suffiċjenti biex jiġu applikati fatti disponibbli u li xorta waħda, huwa t-tort tal-Kummissjoni stess li l-verifika ma saritx. Bħala tweġiba, il-Kummissjoni tosserva li s-sitwazzjoni fattwali fir-rigward tal-organizzazzjoni taż-żjara ta' verifika tal-Bank of Shanghai ġiet deskritta fil-paragrafi 111 u 112 tad-dokument ta' divulgazzjoni definittiva (replikati fil-premessi (143) u (144) hawn fuq). Ma kien hemm ebda bidla fis-sitwazzjoni fattwali dwar din il-verifika u l-Kummissjoni ma taqbilx mal-interpretazzjoni ta' dawn il-fatti mill-GTĊ u tisħaq li għamlet l-almu tagħha sabiex issir il-verifika iżda dan ma kienx possibbli minħabba x-xkiel min-naħa tal-GTĊ. Il-GTĊ jinvoka r-Rapport tal-Bord tad-WTO (95), li kkonkluda li n-nuqqas ta' żjara fuq il-post ma ġabx fi tmiemhom il-possibilitajiet kollha ta' verifika tad-dokumenti. Madankollu, f'din l-investigazzjoni, il-GTĊ għarraf lill-Kummissjoni bid-disponibilità tal-bank għal verifika jum tax-xogħol wieħed biss qabel ma bdiet il-verifika tal-GTĊ (wara d-data ta' skadenza diġà estiża għat-tali konferma), u b'hekk temm kwalunkwe possibilità ta' żjara fuq il-post minħabba li kienu saru arranġementi li ma setgħux jinbidlu. F'dawn iċ-ċirkustanzi, huwa konkluż li l-GTĊ ma aġixxiex bl-aqwa ħiliet tiegħu u l-Kummissjoni ma tara ebda mod li bih il-verifiki pprovduti minn żjara fuq il-post setgħu ġew replikati b'xi mod ieħor.

(409)

Il-GTĊ iddikjara li l-Kummissjoni ma tistax tinjora l-informazzjoni pprovduta mill-Huaxia Bank fir-rigward tal-istruttura tas-sjieda tiegħu għaliex mhijiex “ideali fl-aspetti kollha”. Il-Kummissjoni tosserva li r-raġuni għar-rifjut ta' din l-informazzjoni ma kinitx għax ma kinitx ideali fl-aspetti kollha. Kif diġà spjegat fil-premessa (147) hawn fuq, Huaxia Bank ma ddivulga ebda informazzjoni dwar is-sjieda tal-gvern saż-żjara ta' verifika anki jekk diġà kien intalab jagħmel hekk mill-Kummissjoni fil-kwestjonarju inizjali. Wara li l-Kummissjoni indikat li Huaxia Bank kellu xi azzjonisti tal-Istat, il-bank issottometta folja bl-informazzjoni minn sors mhux magħruf u barra minn hekk, din l-informazzjoni kienet tikkontradixxi informazzjoni oħra fil-fajl. Ma kienx possibbli li tiġi aċċettata t-tali informazzjoni.

(410)

Fir-rigward tad-deċiżjoni tal-Huaxia Bank sabiex jipprovdi biss uħud mill-valutazzjonijiet tal-kredibbiltà kredizja kif deskritt fil-premessa (148) hawn fuq, il-GTĊ iddikjara li l-Kummissjoni rċeviet spjegazzjoni raġonevoli dwar għaliex ma jistgħux jiġu pprovduti l-valutazzjonijiet l-oħrajn. Il-Kummissjoni ma taqbilx. Peress li kien iddikjarat b'mod ċar fl-ittra ta' qabel il-verifika li t-tali dokumenti se jkunu soġġetti għaż-żjara ta' verifika, l-ispjegazzjoni li “ż-żewġ rapporti ta' valutazzjoni tar-riskju kienu indirizzati minn fergħat oħrajn tal-Bank u l-impjegati responsabbli kienu indisponibbli dak il-ħin” ma kinitx sodisfaċenti. Barra minn hekk, il-GTĊ iqajjem l-argument, ripetut f'partijiet oħrajn fil-kummenti tiegħu, li l-informazzjoni ma setgħetx tiġi pprovduta minħabba kunfidenzjalità tal-klijenti. Il-Kummissjoni tosserva li hemm dispożizzjonijiet għat-trattament ta' informazzjoni kunfidenzjali fl-investigazzjonijiet tagħha tad-dazju kompensatorju (96) u li, xorta waħda, ħafna mit-talbet tal-Kummissjoni, fuq din il-kwistjoni u oħrajn, kienet li tispezzjona, u mhux tikkopja, it-tali informazzjoni. Xorta waħda, il-Kummissjoni tosserva li applikazzjoni stretta tal-prinċipju ta' “kunfidenzjalità tal-klijenti” tista' tagħmel il-verifika ta' ħafna mill-informazzjoni relevanti fl-investigazzjonijiet tas-CVD impossibbli. F'dawn is-sitwazzjonijiet, isir impossibbli li jiġu kontroverifikati t-tweġibiet tal-esportatur fuq ħafna kwistjonijiet u li jsiru spezzjonijiet għal għarrieda tar-riċevituri ta' ċerti skemi f'każijiet fejn ma kien hemm ebda kooperazzjoni minn esportaturi jew fejn l-investigazzjoni saret fuq bażi aggregata.

(411)

Il-GTĊ iddikjara li l-Bank EXIM ikkoopera bis-sħiħ fl-investigazzjoni u ċerti dokumenti mitlubin mill-Kummissjoni ma setgħux jiġu pprovduti minħabba regoli tal-politika interna, segretezza tal-Istat, kunfidenzjalità jew liġijiet oħrajn. Għaldaqstant, in-nuqqas ta' forniment ta' dawn id-dokumenti ma jistax iwassal għall-applikazzjoni tal-fatti disponibbli. Skont il-Liġi dwar l-Ibbankjar Kummerċjali, dawn id-dokumenti ma setgħux jiġu pprovduti mill-uffiċjali tal-Bank EXIM matul il-verifika. F'dan ir-rigward, u għall-kuntrarju tas-suppożizzjoni tal-Kummissjoni, ir-Regolament bażiku u l-Ftehim tal-SCM ma jistgħux jieħdu post il-liġijiet sovrani tar-RPĊ. Il-GTĊ iddikjara wkoll li l-mistoqsijiet dwar affiljazzjonijiet ma' partiti politiċi ta' uffiċjali superjuri huma irrelevanti u inkwetanti għall-GTĊ. Il-Kummissjoni ma taqbilx. Filwaqt li r-regoli tad-WTO (li fuqhom huwa bbażat fil-parti l-kbira r-Regolament bażiku) ma jistgħux “jieħdu post” il-liġi domestika, dan ma jżommx milli l-Kummissjoni tagħmel inferenzi meta t-tali liġijiet domestiċi jidhru li jwaqqgħu talbiet raġonevoli għal informazzjoni. Barra minn hekk, il-fatt li filwaqt li l-Bank EXIM ipprovda xi tweġibiet fit-tweġiba għall-Appendiċi A, irrifjuta milli jsostni kważi din l-informazzjoni kollha b'dejta tas-sors jew xi xorta ta' evidenza. Għaldaqstant, l-informazzjoni għandha biss valur ta' dikjarazzjoni orali, mhux sostnuta minn dokumenti bil-miktub verifikati. Li kieku kellha tiġi aċċettata din il-prattika, il-Bank EXIM seta' jipprovdi prattikament kwalunkwe informazzjoni u l-awtorità investigattiva kien ikollha taċċettaha bla ma tkun tista' tivverifika l-preċiżjoni tagħha.

Il-mistoqsijiet dwar l-affiljazzjonijiet ma' partiti politiċi u unitajiet CCP fi ħdan il-Bank EXIM (u kwalunkwe bank ieħor f'din il-kwistjoni) huma ferm relevanti sabiex jiġi stabbilit kemm hija importanti l-influwenza tal-Istat fuq il-ġestjoni tal-banek fid-dawl tar-rwol partikolari tas-CCP skont il-Kostituzzjoni tar-RPĊ. Minbarra l-ġustifikazzjoni tat-tali mistoqsijiet li l-Kummissjoni offriet fil-premessa (151) hawn fuq, huwa osservat ukoll li skont il-Kostituzzjoni tas-CCP, l-organizzazzjonijiet kollha, inklużi impriżi kummerċjali privati, huma meħtieġa jistabbilixxu “organizzazzjonijiet primarji tal-partit” jekk id-ditta timpjega tal-inqas tliet membri tal-partiti. Dawn l-organizzazzjonijiet jiggarantixxu u jissorveljaw l-implimentazzjoni tal-prinċipji u l-politiki tal-Parti u l-Istat u jappoġġaw il-laqgħa tal-azzjonisti, bord tad-diretturi, u maniġers fl-eżerċizzju tal-funzjonijiet u s-setgħat tagħhom skont il-liġi (97). Il-Liġi dwar il-Kumpaniji tar-RPĊ tobbliga wkoll lill-kumpaniji kollha fiċ-Ċina sabiex iwaqqfu organizzazzjoni tas-CCP fi ħdan l-istruttura organizzazzjonali tagħhom biex iwettqu l-attivitajiet tas-CCP (98).Għaldaqstant, is-CCP huwa marbut biċ-ċar mal-attivitajiet tal-GTĊ u mal-operazzjoni ta' kull tip ta' ditta u istituzzjoni fiċ-Ċina; għaldaqstant, huwa leġittimu li jsiru mistoqsijiet dwar l-affiljazzjonijiet mal-partiti f'dan ir-rigward.

(412)

Rigward il-verifika tas-CDB, il-GTĊ għamel l-istess dikjarazzjoni fir-rigward tal-mistoqsijiet dwar l-affiljazzjonijiet politiċi tal-maniġment u r-rwol tas-CCP fil-bank. F'dan ir-rigward, il-Kummissjoni tirreferi għall-ġustifikazzjonijiet fil-premessi (151) u (411) hawn fuq. Il-GTĊ iddikjara wkoll li s-CDB ma setax jipprovdi r-rapporti tal-valutazzjoni tar-riskju ta' kreditu mitlubin għal raġunijiet ta' kunfidenzjalità u li pprovda mudell tal-valutazzjoni tal-kreditu u anki eżempju konkret ta' valutazzjoni tar-riskju ta' kreditu bl-isem tal-kumpanija mħassar. Huwa osservat li l-mudell tal-klassifikazzjoni tal-kreditu u l-klassifikazzjoni tal-kreditu għal kumpanija mhux magħrufa ta' industrija mhux magħrufa mhuwiex evidenza tal-valutazzjoni tar-riskju ta' kreditu ta' wieħed mill-esportaturi fil-kampjun kif talbet il-Kummissjoni. Fir-rigward tal-kwistjonijiet ta' kunfidenzjalità, il-Kummissjoni tirreferi għall-ispjegazzjoni fil-premessa (410).

(413)

Il-GTĊ iddikjara li s-sejba tal-Kummissjoni li l-SOCBs huma korpi pubbliċi hija inkonsistenti mal-Artikolu 1.1 tal-Ftehim tal-SCM għaliex il-Kummissjoni ma bbażat id-determinazzjoni tagħha fuq l-ebda evidenza u ma pprovdietx analiżi rraġunata u adegwata tad-determinazzjoni tagħha li l-involviment tal-gvern fis-settur finanzjarju Ċiniż tant huwa sostanzjali li l-banek huma meħtieġa jsegwu l-politiki preferenzjali. Il-Kummissjoni fundamentalment ma taqbilx ma' din il-pretensjoni. L-informazzjoni indipendenti msemmija fil-premessi minn (162) sa (168) turi li l-banek jimplimentaw il-politiki preferenzjali u dan huwa ċar ukoll mill-bosta pjanijiet, liġijiet u dokumenti politiċi taċ-Ċina msemmijin fil-premessa (102) hawn fuq. Il-Kummissjoni rrevediet, analizzat u kkwotat għadd ta' dokumenti ppubblikati mill-organizzazzjonijiet internazzjonali, inklużi d-WTO, il-Bank Dinji, l-FMI u l-OECD, li kollha kemm huma jikkonkludu li s-settur bankarju taċ-Ċina huwa soġġett għall-interventi importanti mill-Istat b'mod partikolari fir-rigward ta' riċevituri privileġġati ta' self u tfassil ta' rati tal-imgħax.

(414)

Il-GTĊ jikkontesta r-relevanza ta' bosta dokumenti użati bħala l-aħjar fatti disponibbli li l-Kummissjoni rreferiet għalihom fir-rigward tad-determinazzjoni tal-korpi pubbliċi dwar l-SOCBs. Bħala kumment preliminari, irid jiġi indikat li l-Kummissjoni kellha tirrikorri għall-aħjar fatti disponibbli biss minħabba n-nuqqas ta' kooperazzjoni tal-GTĊ u l-fatt li rrifjuta milli jipprovdi l-informazzjoni mitluba.

(415)

Il-GTĊ iddikjara li r-rapport ta' Riċerka ta' Deutsche Bank (“ir-rapport ta' DB”) li l-Kummissjoni kkwotat fil-premessa (161) jiddeskrivi sitwazzjoni storika fiċ-Ċina u ma jistax jipprovdi bażi pożittiva biex jiġi vvalutat is-settur bankarju taċ-Ċina ta' 7 snin wara. L-ewwel nett, il-GTĊ huwa żbaljat meta jiddikjara li r-rapport jipprovdi bażi biex tiġi vvalutata s-sitwazzjoni “7 snin wara”. Ir-rapport huwa mill-2007 u l-PI, li huwa l-perjodu relevanti għall-valutazzjoni tas-settur bankarju fiċ-Ċina għall-fini ta' dan il-proċediment, jibda fis-sena 2011. Għaldaqstant, ir-rapport jirreferi għal sitwazzjoni 4 snin qabel il-perjodu relevanti. It-tieni, ir-rapport ta' DB mhuwiex l-uniku dokument li fuqu l-Kummissjoni tibbaża s-sejbiet tagħha iżda huwa biss punt ta' tluq għall-analiżi tal-Kummissjoni tas-settur bankarju taċ-Ċina u l-istruttura tas-sjieda tiegħu b'mod partikolari. It-tielet, l-informazzjoni l-oħra li l-Kummissjoni semmiet sabiex tistabbilixxi l-istruttura tas-sjieda tas-settur bankarju taċ-Ċina (rapporti tad-WTO, FMI u OECD) hija konformi mas-sejbiet tar-rapport ta' DB. F'dan il-kuntest, ta' min jinnota li l-GTĊ innifsu pprovda l-minimu tal-informazzjoni mitluba b'mod ripetut f'dan ir-rigward u qatt ma kkontesta s-sejbiet tal-Kummissjoni dwar il-livell ta' sjieda tal-Istat fis-settur bankarju u l-interferenza tal-Istat fis-sistema bankarja fuq bażi fattwali.

(416)

Il-GTĊ ikkontesta wkoll ir-referenza tal-Kummissjoni għar-rapport tal-2012 ta' Analiżi tal-Politika Kummerċjali tad-WTO bid-dikjarazzjoni li l-istqarrija li “ġeneralment ftit li xejn kien hemm bidla fl-istruttura tas-suq tas-settur bankarju taċ-Ċina” kienet iddikjarata bi tqabbil mal-perjodu ta' analiżi ta' qabel fis-sena 2010. Il-Kummissjoni mhux ma taqbilx ma' din il-pretensjoni. Il-Kummissjoni, fid-dokument ta' divulgazzjoni definittiva tagħha, ikkwotat ir-rapporti ta' Analiżi tal-Politika Kummerċjali tad-WTO mill-2010 u l-2012 fl-istess premessa (161) sabiex turi li ftit li xejn inbidel fil-perjodu ta' sentejn. Filwaqt li r-rapport tal-2010 iddikjara li “l-grad għoli ta' sjieda tal-Istat huwa karatteristika sinifikanti oħra tas-settur finanzjarju fiċ-Ċina”, ir-rapport tal-2012 ikkonferma li ftit inbidel f'dan ir-rigward. Il-GTĊ ikkwota wkoll mir-rapport tal-2012 u fuq il-bażi ta' dawn il-kwotazzjonijiet iddikjara li r-rapport jikkontradixxi l-valutazzjoni tal-Kummissjoni fil-premessa (161) hawn fuq. Din il-pretensjoni ma tistax tiġi aċċettata. L-ebda waħda mill-kwotazzjonijiet mir-rapport riprodott fil-kummenti tal-GTĊ għad-divulgazzjoni definittiva ma tikkontradixxi u lanqas ma tixħet l-iċken dubju fuq il-valutazzjoni tal-Kummissjoni fil-premessa (161).

(417)

Il-GTĊ iddikjara li s-sejbiet tal-Kummissjoni fil-premessa (162) hawn fuq huwa nieqes minn evidenza pożittiva għaliex il-Kummissjoni (minbarra r-rapport ta' DB u l-Analiżijiet tal-Politiki Kummerċjali tad-WTO diskussi fil-premessi hawn fuq) “sempliċiment tirreferi għar-Rapport tal-Bank Dinji u l-istħarriġ Ekonomiku, eċċ., iżda ma tipprovdi l-ebda spjegazzjoni rraġunata u adegwata biex issostni s-sejbiet tagħha”. Din il-pretensjoni ma tistax tiġi aċċettata. F'dan ir-rigward, huwa osservat li, fost l-oħrajn, ir-rapport tal-Bank Dinji jiddikjara dan li ġej: “Minkejja progress impressjonanti fir-riforma u t-tisħiħ tas-settur finanzjarju fl-aħħar tliet deċennji, is-sistema finanzjarja taċ-Ċina għadha taħt pressjoni u tbati minn żbilanċi strutturali importanti. Is-sistema attwali, karatterizzata minn dominju tal-banek tal-Istat, intervent qawwi mill-Istat, u kontrolli li għad hemm fuq ir-rati tal-imgħax, irnexxielha b'mod notevoli timmobilizza t-tfaddil u talloka kapital lil setturi strateġiċi meta l-ekonomija taċ-Ċina qabdet it-triq”, jew “Kontrolli paralleli, diretti u indiretti tal-istituzzjonijiet finanzjarji jridu jagħtu lok għal arranġamenti ta' distakkament ibbażati fuq is-suq. Dan ikun ifisser bank ċentrali awtonomu li jadotta operazzjonijiet tas-suq miftuħ u li juża rati tal-imgħax, minflok limiti massimi tal-kreditu, biex jikkontrolla l-likwidità. Il-banek kummerċjali jkunu jużaw prinċipji kummerċjali u analiżi tal-kredibbiltà kreditizja, minflok ma jsegwu sinjali tal-gvern, biex jiggwidaw is-self” u “Il-gvern fil-livelli kollha kien involut mill-qrib fl-operazzjonijiet kummerċjali tal-istituzzjonijiet finanzjarji, jew permezz ta' parteċipazzjoni azzjonarja jew influwenzi indiretti, l-iktar għaliex huwa ferm dipendenti fuq l-użu tal-kreditu tal-banek kummerċjali għall-għanijiet politiċi”. L-Istħarriġ Ekonomiku tal-2010 tal-OECD dwar iċ-Ċina jiddeskrivi l-politiki tal-PBOC dwar il-minimu tar-rati ta' għoti b'self u l-limitu massimu tar-rata tad-depożiti bħala diżinċentiv għall-banek sabiex jipprezzaw ir-riskju kif xieraq u miżura kontroproduċenti għall-kompetizzjoni fis-settur bankarju u jiddikjara li l-iskop huwa li tiġi salvagwardjata l-profittabilità tas-settur bankarju li b'mod predominanti huwa tal-Istat.

(418)

Il-GTĊ jisħaq ukoll li d-determinazzjoni tal-Kummissjoni li l-PBOC huwa involut u jinfluwenza l-istabbiliment tar-rati tal-imgħax mill-banek kummerċjali ipposseduti mill-Istat la għandha raġunar tajjeb u lanqas bażi evidenzjarja. F'dan ir-rigward, il-GTĊ iddikjara li l-Kummissjoni missha kienet taf li f'Lulju 2013 tneħħew il-minimi tar-rati ta' għoti b'self. L-ewwel nett, ta' min josserva li l-Kummissjoni ma analizzatx is-sitwazzjoni tas-suq bankarju fiċ-Ċina f'Lulju 2013, peress li dan il-perjodu ma kienx relevanti għal din l-investigazzjoni. It-tieni nett, id-dikjarazzjoni li d-determinazzjoni tal-Kummissjoni nieqsa mir-raġunament xieraq u bażi ta' evidenza hija żbaljata. Iċ-ċirkulari relevanti jiddikjaraw b'mod ċar li l-PBOC jistabbilixxi limiti fuq ir-rati ta' għoti b'self kif ukoll fuq ir-rati tad-depożiti. U t-tielet nett, l-Istħarriġ Ekonomiku tal-OECD: Ċina 2010 ikkwotat fil-premessa (162) ukoll jikkonferma l-eżistenza tat-tali limiti.

(419)

Il-GTĊ iddikjara li l-“Kummissjoni kienet taf li ċ-ċirkulari, inklużi ċ-ċirkulari tat-8 ta' Ġunju u t-8 ta' Lulju 2012 maħruġin wara s-sejbiet tas-Karta Fina Miksija kienu bidlu l-prattika tar-rati tal-imgħax tal-PBOC b'mod sinifikanti”. Dan huwa żbaljat. Il-Kummissjoni ma setgħetx tkun taf jekk jew kif eżattament inbidlet il-prattika peress li l-GTĊ irrifjuta milli jipprovdi dawn iċ-ċirkulari. Anki s-sommarji mill-websajts tal-PBOC sottomessi matul il-verifika, li madankollu l-GTĊ jiddikjara b'mod żbaljat li l-Kummissjoni injorat kompletament, jikkonfermaw li t-tali limiti għadhom jeżistu.

(420)

Il-GTĊ iddikjara wkoll li “l-Kummissjoni ma dehritx li tibbaża s-sejba tagħha fuq ‘fatti propji disponibbli’ li tikkontradixxi l-informazzjoni storika li l-Kummissjoni kellha, iżda minflok ippretendiet li l-GTĊ juri li nbidlet il-qagħda attwali eżaminata matul Azzar Miksi b'Materjal Organiku.” Fid-dawl tal-ispjegazzjoni fil-premessi (415) — (419) hawn fuq, huwa ċar li din id-dikjazzjoni mhijiex korretta. Ma hemm l-ebda fatt disponibbli fil-fajl li jikkontradixxi s-sejbiet tal-Kummissjoni u s-sejbiet mhumiex ibbażati fuq l-informazzjoni storika iżda fuq evidenza pożittiva, ibbażata fuq l-informazzjoni kollha relevanti għall-PI.

(421)

Il-GTĊ iddikjara li l-erba' punti ddikjarati mill-Kummissjoni fil-premessa (166) hawn fuq huma żbaljati u neqsin minn valutazzjoni ġuridika xierqa. Il-GTĊ argumenta wkoll li r-referenza għall-Artikolu 34 tal-Liġi tal-Ibbankjar Kummerċjali, li l-banek għandhom “iwettqu n-negozju ta' self tagħhom skont il-ħtiġijiet tal-ekonomija nazzjonali” hija kompletament newtrali. Mhuwiex ċar x'kien ifisser il-GTĊ bit-terminu “newtrali”, iżda skont il-pjanijiet, id-dokumenti politiċi u l-liġijiet ikkwotati fil-premessa (102) hawn fuq, l-iżvilupp tal-industrija PV u l-appoġġ finanzjarju u appoġġ ieħor tagħha jidhru li huma fost il-ħtiġijiet tal-ekonomija nazzjonali fiċ-Ċina. Fil-kuntest tal-appoġġ finanzjarju mħeġġeġ u muri f'dawn id-dokumenti, huwa ċar li l-banek jappoġġaw lill-kumpaniji li jappartjenu għall-industrija PV. Dwar is-sejba li l-banek huma soġġetti għal regoli ġuridiċi li jeħtiġuhom jipprovdu appoġġ ta' kreditu lill-proġetti mħeġġin li għalihom il-Kummissjoni qagħdet fuq it-test tad-Deċiżjoni tal-Kunsill tal-Istat Nru 40, il-GTĊ iddikjara li “hija kompletament skorretta” għaliex id-Deċiżjoni la tiddikjara u lanqas tindika li l-industrija solari hija proġett imħeġġeġ. Din id-dikjarazzjoni hija żbaljata wkoll. Mill-premessa (399) hawn fuq, jidher ċar li l-industrjia solari tappartjeni għall-kategorija ta' proġetti/industriji mħeġġin. Il-GTĊ għamel dikjarazzjoni simili li tikkonċerna l-Liġi tar-RPĊ dwar il-Progress Xjentifiku u Teknoloġiku u s-sejba tal-Kummissjoni li jeħtieġ li l-banek jagħtu prijorità lill-iżvilupp ta' industriji tat-teknoloġija avvanzata u ġdida u li l-produtturi fil-kampjun jaqgħu fil-kategorija tat-teknoloġija avvanzata. Skont il-GTĊ, il-Kummissjoni ma għamlet ebda analiżi ġuridika dwar il-kwistjoni ta' jekk l-industrija solari tal-produzzjoni ta' moduli u ċelloli deskritta bħala industrija tat-teknoloġija avvanzata taqax fi ħdan il-kamp ta' applikazzjoni ta' din il-liġi. Dan mhuwiex korrett. Il-Kummissjoni tagħmel rabta ċara bejn il-kategorija ta' industriji tat-teknoloġija avvanzata u l-industrija solari li tipproduċu moduli u ċelloli. Dan huwa spjegat f'dettall fil-premessa (402) hawn fuq.

(422)

Il-GTĊ saħaq li d-dikjarazzjoni tal-Kummissjoni, li l-involviment tal-Istat fis-settur finanzjarju Ċiniż huwa sostanzjali u attwali, mhuwiex appoġġat minn evidenza pożittiva. Il-GTĊ ikkontesta l-evidenza kkwotata mill-Kummissjoni u ddikjara li r-rapport tal-2009 tal-FMI li jixħet dawl fuq in-nuqqas ta' liberalizzazzjoni tar-rata tal-imgħax huwa irrelevanti għaliex ir-rati tal-imgħax ġew kompletament liberalizzati fiċ-Ċina. Dan mhuwiex korrett. L-evidenza fil-fajl tikkonferma li l-liberalizzazzjoni tar-rati tal-imgħax fiċ-Ċina mhijiex lesta u dan kien ikkonfermat ukoll mill-uffiċjali tal-PBOC preżenti matul iż-żjara ta' verifika. Fir-rigward tar-Rapport tal-2010 tal-FMI dwar il-Pajjiżi msemmi mill-Kummissjoni, il-GTĊ iddikjara li l-Kummissjoni injorat kompletament is-sejbiet tal-FMI dwar il-liberalizzazzjoni tas-settur finanzjarju. Dan mhuwiex minnu. Il-Kummissjoni ma injorat l-ebda sejba tal-FMI f'dan ir-rapport li kienu relevanti. Is-sejbiet tal-FMI li l-GTĊ irrefera għalihom fil-kummenti tiegħu ma kienu jikkontradixxu l-ebda sejba tal-Kummissjoni dwar l-involviment tal-Istat fis-settur finanzjarju taċ-Ċina u ċertament żgur li mhux fir-rigward tas-sjieda tal-Istat jew il-politika dwar ir-rata tal-imgħax għas-self jew id-depożiti. Il-fatt li r-Rapport iddikjara li sar progress fl-aħħar snin fl-iżvilupp ta' sistema finanzjarja bbażata iktar fuq is-suq fiċ-Ċina ma jfissirx li r-Rapport qal li hemm sistema finanzjarja bbażata fuq is-suq fiċ-Ċina. Fir-rigward tal-istħarriġ tal-OECD ikkwotat mill-Kummissjoni, il-GTĊ iddikjara li ma jistax ikun konkluż li l-banek ma joperawx b'mod indipendneti fiċ-Ċina fuq il-bażi “ta' frażi waħda bl-esklużjoni ta' progress importanti fir-rigward tal-liberalizzazzjoni tas-settur bankarju”. Rigward din id-dikjarazzjoni, ta' min jinnota li l-Kummissjoni qatt ma ħarġet xi konklużjoni fuq il-bażi ta'“frażi waħda” iżda kif muri fit-test ta' hawn fuq, fuq il-bażi ta' bosta dokumenti mfasslin minn organizzazzjonijiet internazzjonali indipendenti.

(423)

Il-GTĊ iddikjara li l-analiżi tal-Kummissjoni dwar id-determinazzjoni tal-korp pubbliku “hija mimlija żbalji” u l-konklużjoni tagħha fil-premessa (168) hawn fuq hija inkonsistenti mal-interpretazzjoni tal-AB tad-WTO tat-terminu “korp pubbliku” fi Stati Uniti — Dazji antidumping u kumpensatorji definittivi fuq Ċerti Prodotti għaċ-Ċina. Produttur esportatur minnhom iddikjara wkoll li r-raġunar tal-Kummissjoni dwar id-determinazzjoni ta' korp pubbliku hija “legalment żbaljata”. Il-GTĊ iddikjara li l-Kummissjoni naqset milli tistabbilixxi li l-SOCBs għandhom, huma vestiti, u jeżerċitaw awtorità governattiva u li ma stabbilixxietx i) li l-funzjonijiet inkwistjoni li allegatament jitwettqu mill-SOCBs huma dawk li huma eżegwiti minn gvern inġenerali, jiġifieri huma funzjonijiet tal-gvern, ii) il-karatteristiċi komuni li l-SOCBs jaqsmu mal-gvern minbarra l-parteċipazzjoni azzjonarja li lanqas ma kienet stabbilita għall-SOCBs kollha; u iii) li l-SOCBs kollha għandhom l-awtorità governattiva meħtieġa sabiex ikunu jistgħu jeżerċitaw jew kienu vestiti bis-setgħa li jeżegwixxu funzjonijiet governattivi kkonċernati. Dawn il-pretensjonijiet kellhom jiġu rifjutati. Il-Kummissjoni tirreferi għall-analiżi tagħha ta' din il-kwistjoni fil-premessi (158) — (167). L-għoti b'self jissemma fid-definizzjoni ta' sussidju fl-Artikolu 3.1(a)(i) tar-Regolament bażiku bħala funzjoni tal-gvern. F'din l-investigazzjoni, l-SOCBs huma ordnati permezz ta' rekwiżit, pjanijiet u dokumenti politiċi oħrajn, sabiex jippromwovu ċerti setturi, inkluż is-settur PV. Fuq il-bażi tal-fatti disponibbli, kien konkluż ukoll li hemm sjieda sostanzjali tal-banek mill-gvern fiċ-Ċina u li l-gvern jeżerċita kontroll importanti fuq l-SOCBs. Peress li l-GTĊ ma pprovdiex l-informazzjoni mitluba fuq is-sjieda tal-gvern tal-SOCBs kollha fiċ-Ċina, il-Kummissjoni għamlet is-sejbiet tagħha fuq il-fatti disponibbli. B'hekk, il-Kummissjoni tikkonkludi li l-SOCBs jaġixxu bħala fergħa tal-gvern li twettaq funzjoni pubblika fl-implimentazzjoni tal-politiki ta' għoti b'self preferenzjali tal-GTĊ lil ċerti setturi.

(424)

Il-GTĊ iddikjara wkoll li l-Kummissjoni naqset milli tistabbilixxi li hemm ordni jew inkarigu ta' banek privati fiċ-Ċina u b'mod partikolari li l-Kummissjoni ma stabbilixxietx li l-GTĊ ta delega espliċita jew affermattiva jew kmand jew responsabilità jew awtorità lill-banek privati u l-SOCBs biex jipprovdu self preferenzjali. Il-Kummissjoni ma taqbilx ma' din id-dikjarazzjoni. Kif spjegat fil-premessi (170) — (173), hemm politika tal-gvern fiċ-Ċina sabiex tipprovdi appoġġ b'għoti b'self preferenzjali lill-industrija PV. Il-banek privati huma obbligati jimplimentaw il-politika tal-gvern: Il-GTĊ, permezz tal-Liġi tal-Ibbankjar Kummerċjali, ta struzzjonijiet lill-banek kollha taċ-Ċina sabiex “iwettqu n-negozju tas-self tagħhom skont il-ħtiġijiet tal-ekonomija nazzjonali u l-iżvilupp soċjali u fl-ispirtu tal-politiki industrijali tal-Istat”. Dawn il-ħtiġijiet u l-politiki industrijali tal-Istat huma, fost l-oħrajn, stabbiliti fil-bosta pjanijiet u dokumenti politiċi u l-forniment ta' finanzjament preferenzjali lil ċerti industriji inkluża l-industrija PV huwa wieħed minnhom. Il-GTĊ iddikjara wkoll li l-Artikolu relevanti tal-Liġi dwar l-Ibbankjar Kummerċjali ttieħed barra mill-kuntest tiegħu u ma jurix b'mod espliċitu xi delega jew kmand, għoti ta' responsabilità jew eżerċizzju ta' awtorità mill-GTĊ jew xi bank kummerċjali. Il-Kummissjoni ma taqbilx li l-Artikolu 34 ittieħed barra l-kuntest kif diġà spjegat fil-premessa (390) hawn fuq u tqis li t-test tiegħu huwa struzzjoni ċara legalment vinkolanti lill-banek kollha fiċ-Ċina. Il-Kummissjoni lanqas ma taqbel mad-dikjarazzjoni tal-GTĊ li d-dokumenti li jipprovdu għall-għoti b'self preferenzjali lill-industrija PV msemmija fil-premessa (102) huma “bażi ġuridika inadegwata”. Dan huwa spjegat fit-tul fil-premessi (399) — (403) hawn fuq.

(425)

Produttur esportatur minnhom iddikjara li l-Kummissjoni ma wrietx li l-banek ta' proprjetà barranija fiċ-Ċina huma inkarigati u ordnati mill-GTĊ. Din il-pretensjoni kellha tiġi rifjutata. Il-Kummissjoni wriet inkarigu u ordni għall-banek kollha bi sjieda privata fiċ-Ċina (inter alia l-premessi (169) — (172) u (424) hawn fuq) u l-banek bi sjieda barranija jappartjenu għal din il-kategorija.

(426)

Fir-rigward tad-determinazzjoni ta' inkarigu u ordni, il-GTĊ iddikjara wkoll li l-Kummissjoni għamlet konklużjonijiet fuq il-bażi ta' valutazzjoni tar-riskju ta' kreditu ta' esportatur fil-kampjun wieħed ipprovduta minn bank u applikathom għall-banek kollha fiċ-Ċina u b'hekk użat inferenzi avversi f'dan ir-rigward. Huwa osservat li l-GTĊ kif ukoll il-banek irrifjutaw milli jipprovdi xi valutazzjoni tar-riskju ta' kreditu oħra ta' produtturi esportaturi oħrajn fil-kampjun. Peress li l-Kummissjoni kienet imġiegħla tapplika l-fatti disponibbli f'dan ir-rigward u l-valutazzjoni tar-riskju ta' kreditu msemmija hawn fuq hija l-aħjar fatti disponibbli, il-Kummissjoni bbażat il-konklużjonijiet tagħha b'mod parzjali fuq dan id-dokument. Iżda huwa mtenni li l-konklużjonijiet saru fuq il-bażi tal-fatti disponibbli u mhux inferenzi avversi.

(427)

Il-GTĊ oġġezzjona għall-valutazzjoni tal-Kummissjoni tat-tfixkil tas-suq finanzjarju Ċiniż “peress li hija legalment żbaljata”. Il-GTĊ iddikjara li ma hemm l-ebda evidenza li tappartjeni għall-PI li tindika li l-SOCBs jammontaw għal 2/3 mis-suq finanzjarju Ċiniż. Il-Kummissjoni ma taqbilx ma' din il-pretensjoni. Fin-nuqqas tal-informazzjoni dwar is-settur bankarju li ntalbet b'mod ripetut iżda li ma kinitx ipprovduta mill-GTĊ, il-Kummissjoni applikat il-fatti disponibbli. Il-Kummissjoni rreferiet għar-rapport ta' DB f'dan ir-rigward li jiddikjara li l-SOCBs jammontaw għal iktar minn 2/3 tas-suq finanzjarju Ċiniż. Dan huwa sostnut ukoll mill-evidenza mid-dokumenti tad-WTO, l-FMI, l-OECD u l-Bank Dinji li jikkonfermaw li l-preżenza tal-Istat fis-settur bankarju Ċiniż ma nbidilx wisq fl-PI. Il-GTĊ iddikjara li d-dikjarazzjoni tal-Kummissjoni dwar ir-rati tal-imgħax (jiġifieri li l-banek huma marbutin li jibqgħu fi ħdan il-limiti stabbiliti mill-PBOC) hija żbaljata għaliex ir-rata minima ta' għoti b'self tneħħiet għal kollox. Dan mhuwiex korrett. Huwa minnu li fil-kummenti tiegħu l-GTĊ iddikjara li r-rati minimi ta' għoti b'self tneħħew f'Lulju 2013, iżda dan jiġi iktar minn sena wara li ntemm il-PI. Huwa minnu wkoll li l-limiti massimi fuq ir-rati tad-depożiti għadhom fis-seħħ. Għaldaqstant, is-sejba tal-Kummissjoni li l-banek mhumiex kompletament ħielsa sabiex jiddeċiedu l-kundizzjonijiet tas-self (tal-inqas fir-rigward tal-PI) hija korretta u sostnuta mill-evidenza fil-fajl. Il-GTĊ oġġezzjona wkoll għas-sejbiet tal-Kummissjoni fil-premessi (183) — (188) fuq il-bażi tal-allegat nuqqas ta' relevanza ta' bosta pjanijiet, dokumenti politiċi u liġijiet ikkwotati mill-Kummissjoni. Il-Kummissjoni ma taqbilx ma' din id-dikjarazzjoni u tirreferi għall-premessi (399) — (403) hawn fuq li fihom hemm spjegat għaliex dawn id-dokumenti huma relevanti għat-tali sejbiet.

Il-GTĊ iddikjara wkoll li s-sejba tal-Kummissjoni li ċerti banek ingħataw aċċess għar-riżervi tal-muniti barranin tas-SAFE hija żbaljata għaliex l-evidenza li l-Kummissjoni rreferiet għaliha semmiet biss il-Bank EXIM u s-CDB u spjegat li s-self miġjub minn dawn ir-riżervi ngħata biss lil impriżi tal-Istat. Il-Kummissjoni ma taqbilx. L-evidenza tiddikjara biss li meta dan il-programm beda, għall-ewwel kien disponibbli biss għal banek tal-politiki CDB u EXIM, iżda ssemmi wkoll self qawwi tal-Bank of China, li jindika li tneħħiet ir-restrizzjoni inizjali. Anki d-dikjarazzjoni li l-evidenza “tiddikjara biċ-ċar li s-self jingħata biss lil impriżi tal-Istat bħal Sinopec” mhijiex preċiża. Huwa ddikjarat li impriżi kbar tal-Istat huma ppreferuti, iżda ma tindikax li l-forniment tat-tali self kien limitat għalihom. U xorta waħda, minħabba d-daqs tal-Bank EXIM u s-CDB u l-impatt tagħhom fuq is-suq finanzjarju fiċ-Ċina, anki jekk il-programm kien limitat għalihom, dan ikun ifisser tfixkil sinifikanti tas-suq finanzjarju sħiħ.

(428)

Il-GTĊ iddikjara wkoll li l-Kummissjoni ma stabbilixxietx speċifiċità fir-rigward tal-għoti b'self preferenzjali u l-analiżi tal-ispeċifiċità tagħha hija legalment inkoerenti għaliex ma stabbilixxietx jekk id-Deċiżjoni Nru 40 tirreferix għal proġetti jew industriji. Skont il-GTĊ il-fatt li l-“medda ferm wiesa' ta' setturi ekonomiċi u industriji huma koperti mid-Deċiżjoni Nru 40, dan id-dokument ma jillimitax b'mod espliċitu l-aċċess tal-allegat sussidju lil ċerti impriżi kif inhu meħtieġ ikun stabbilit mill-ġurisprudenza tad-WTO”. Il-Kummissjoni ma taqbilx ma' din id-dikjarazzjoni. Fir-rigward tal-proġetti mħeġġin, huwa mfakkar li dawn ikopru biss ċerti attivitajiet fi ħdan numru limitat ta' setturi industrijali u b'hekk, din il-kategorizzazzjoni, li tkopri biss sottosett ta' impriżi fiċ-Ċina, ma tistax titqies bħala għamla ġenerali u mhux speċifika. Il-Kummissjoni qieset li din hija l-iktar interpretazzjoni naturali fin-nuqqas ta' kwalunkwe spjegazzjoni (u dokumenti li jikkonfermaw) dwar kif il-GTĊ applika b'mod preċiż il-kunċett tal-industrija PV, pereempju għall-fini tad-Deċiżjoni 40 u l-Katalogu ta' Gwida tar-Ristrutturar Industrijali relatat. Barra minn hekk, kif spjegat fil-premessa (102) hawn fuq, l-industrija solari PV tappartjeni wkoll għall-kategorija ta' industriji strateġiċi kif definiti mit-12-il pjan ta' ħames snin u fuq din il-bażi tgawdi minn aċċess għal finanzjament preferenzjali li huwa ċar mill-kwotazzjonijiet minn bosta dokumenti ta' ppjanar u politiki u liġijiet fl-istess premessa.

(429)

Il-GTĊ iddikjara wkoll li l-Kummissjoni ma stabbilixxietx l-eżistenza ta' benefiċċju li jikkonċerna self preferenzjali għaliex l-użu tal-parametru referenzjarju estern għall-fini tal-istabbiliment tal-benefiċċju ma kienx sostnut mis-sejbiet tal-Kummissjoni. Skont il-GTĊ, il-Kummissjoni ma kellha l-ebda bażi biex tapplika l-klassifikazzjoni BB peress li ma pprovdiet l-ebda evidenza li l-klassifikazzjoni BB għandha probabilità ikbar li tkun klassifikazzjoni tal-kreditu mhux imfixkla milli xi klassifikazzjoni oħra u l-applikazzjoni tagħha “tirrifletti l-inferenzi avversi impermissibbli li saru bi ksur tal-Artikolu 12.7 tal-Ftehim tal-SCM”. Din il-pretensjoni kellha tiġi rifjutata. Minħabba t-tfixkil u n-nuqqas ta' kredibbiltà kreditizja jew valutazzjoni tar-riskju xierqa tal-produtturi esportaturi fil-kampjun mill-banek ta' għoti b'self, il-Kummissjoni ma setgħetx tieħu l-klassifikazzjoni tal-kreditu (jekk kien hemm waħda) tal-produtturi esportaturi individwali bil-valur nominali tagħha. F'dan il-każ, il-klassifikazzjoni BB mhijiex inferenza avversa u lanqas ma hi sfavorevoli għall-produtturi esportaturi għaliex hija l-aħjar klassifikazzjoni mhux ta' investiment fis-suq.

(430)

L-ilmentatur iddikjara li l-Kummissjoni missha użat klassifikazzjoni ta' kreditu inqas favorevoli mill-klassifikazzjoni BB għall-bini tal-parametru referenzjarju għal uħud mill-produtturi esportaturi li kienu f'qagħda finanzjarju partikolarment ħażina. Għar-raġunijiet spjegati fil-premessa (429) hawn fuq, il-Kummissjoni qieset li l-klassifikazzjoni BB (klassifikazzjoni mhux ta' investiment) tirrifletti b'mod xieraq is-sitwazzjoni finanzjarja tal-produtturi esportaturi fil-kampjun matul il-PI.

(431)

L-ilment talab ukoll li l-Kummissjoni tiddivulga l-kalkolu tal-mark-up għas-self fil-munita Ċiniża. Il-Kummissjoni spjegat il-metodoloġija fil-paragrafu 169 tad-dokument ta' divulgazzjoni definittiva (replikat fil-premessa (198) hawn fuq). B'konformità mal-metodoloġija mill-proċedimenti Karta Fina Miksija u Azzar Miksi b'Materjal Organiku, il-Kummissjoni aġġustat ir-rati tal-imgħax taċ-Ċina billi żiedet id-differenzjali tal-imgħax bejn il-bonds bl-aħjar klassifikazzjoni u l-bonds klassifikati BB negozjati fis-swieq fil-PI.

(432)

Produttur esportatur minnhom iddikjara li l-Kummissjoni, sabiex tistabbilixxi l-benefiċċju minn self preferenzjali, għandha tqabbel ir-rati ta' għoti b'self tal-industriji “preferuti” minn dawk tal-industriji “mhux preferuti”. Fid-dawl tal-analiżi tal-Kummissjoni tas-suq finanzjarju (il-premessi (181) — (185)) din id-dikjarazzjoni kellha tiġi rifjutata. Wara li jittieħed f'kunsiderazzjoni t-tfixkil stabbilit, ir-rati tal-imgħax fis-suq finanzjarju Ċiniż jitqiesu mhux kredibbli.

(433)

Il-GTĊ iddikjara wkoll li għas-self f'EUR u USD, il-Kummissjoni ma għandhiex tirrikorri għall-parametru referenzjarju estern għaliex wieħed mill-elementi ewlenin li fuqu l-Kummissjoni sawret l-analiżi tat-tfixkil tagħha, jiġifieri l-limitazzjonijiet tal-PBOC fuq ir-rati tal-imgħax, ma jeżistix għat-tali self. Din il-pretensjoni kellha tiġi rifjutata. Il-limitazzjonijiet tal-PBOC fuq ir-rati tal-imgħax huma biss wieħed mill-elementi ewlenin li l-Kummissjoni użat fl-analiżi tagħha tas-suq finanzjarju Ċiniż. Kif spjegat fil-premessi (180) — (184) hawn fuq, hemm għadd ta' waqtiet ta' tfixkil oħrajn li waħedhom iġġustifikaw l-użu tal-parametru referenzjarju estern anki għas-self denominat f'EUR u USD.

(434)

Bosta esportaturi u l-GTĊ jiddikjaraw li l-Ftehimiet bejn l-esportaturi u ċerti banek tal-Istat (imsemmijin bħala “l-Ftehimiet” f'din it-taqsima) mhumiex ekwivalenti għal linji ta' kreditu u ma jammontawx għal kontribuzzjoni finanzjarja għaliex ma fihomx obbligu jew impenn sabiex il-bank jipprovdi finanzjament fil-ġejjieni b'termini u kundizzjonijiet partikolari. Jirreferu wkoll għall-konklużjonijiet tal-bord ta' KE-Inġenji tal-Ajru, li ddikjara li s-“sempliċi possibilità” li gvern jista' jittrasferixxi fondi sabiex jissodisfa kundizzjoni predefinita mhijiex ser tkun biżżejjed biex tintwera l-eżistenza ta' kontribuzzjoni finanzjarja. Osservaw li d-dikjarazzjoni tal-bord li l-ftehim kuntrattwali għandu jkun “minnu nnifsu ddikjarat u kapaċi jagħti benefiċċju lir-riċevitur, hija separata u indipendenti mill-benefiċċju li jista' jingħata minn xi trasferiment ta' fondi fil-ġejjieni.”

(435)

Fir-rigward tas-sejbiet tal-bord ta' KE-Inġenji tal-Ajru, il-Kummissjoni tosserva li t-tali sejbiet mhumiex eżawrjenti fir-rigward tal-ambitu tal-linji ta' kreditu jew ftehimiet simili oħrajn u ma jorbtux l-interpretazzjoni tal-Kummissjoni tar-Regolament bażiku f'dan il-każ. Minkejja dan, il-Kummissjoni mhijiex tgħid li ma taqbilx mal-konklużjonijiet tal-bord, iżda mal-applikazzjoni ta' dawk il-konklużjonijiet għal din l-investigazzjoni mill-GTĊ. Il-Ftehimiet normalment jipprovdu sabiex il-bank tal-Istat jislef sal-ammont meħtieġ ta' flus, kultant flimkien ma' titjib possibbli fil-prestazzjoni tad-ditta involuta. B'hekk, minn naħa waħda, it-test tal-Ftehimiet jaf ikun fih obbligi testwalment inqas espliċiti jew awtomatiċi dwar it-termini u l-kundizzjonijiet tal-għoti b'self fil-ġejjieni minn dawk li fihom xi tipi ta' Ftehimiet tal-Linja ta' Kreditu. Kultant huma supplimentati minn self separat jew ftehimiet ta' kreditu. Madankollu, kien osservat li s-self skont dawn il-Ftehimiet normalment isir b'termini ferm simili, jekk mhux identiċi. Min-naħa l-oħra, il-Ftehimiet fihom numru ta' dispożizzjonijiet li jmorru ferm lil hinn mil-lingwa normali tal-ftehimiet tal-linja ta' kreditu u li jammontaw għall-ħolqien ta' mekkaniżmu ta' appoġġ iggarantit mill-bank inkwistjoni. Il-Kummissjoni tqis li f'dan il-każ, id-dispożizzjonijiet miktubin tal-Ftehimiet mhux bilfors huma konklużivi, għaliex l-“obbligi” jew l-“impenji” li jiġu trasferiti fondi jistgħu jkunu espressi f'forma miktuba jew mhux miktuba u li l-eżistenza tagħhom għandha tkun determinata fuq il-bażi tat-totalità tal-fatti rrekordjati.

(436)

Fuq din il-bażi, in-numru eżatt tal-impenji jew l-obbligi tal-banek tal-Istat skont il-Ftehimiet jiddependi fuq:

(437)

Fuq il-bażi tal-evidenza kollha, huwa konkluż li l-Ftehimiet huma offruti mill-banek bħala parti minn strateġija tal-gvern biex jippromwovi l-industrija PV u jitqiesu li huma ta' valur kbir mill-esportaturi kkonċernati, indipendentement minn jekk ġewx trasferiti xi fondi. Dan jikkontradixxi l-argumenti tal-partijiet li effettivament ma għandhom l-ebda valur. Għad li l-Ftehimiet għandhom il-karatteristiċi ta' linji ta' kreditu normali, imorru lil hinn mit-termini u l-kundizzjonijiet ta' linji ta' kreditu normali u effettivament huma sħubijiet strateġiċi bejn korpi pubbliċi u ditti biex jissodisfaw politika tal-gvern. F'dan ir-rigward, huma joperaw bħala mekkaniżmu ta' appoġġ/garanzija tal-Istat, li jsaħħaħ il-pożizzjoni fis-suq tal-esportaturi kkonċernati u jippermettilhom jespandu l-kapaċità u l-produzzjoni tagħhom biċ-ċertezza li se jirċievu l-finanzjament meħtieġ. Fin-nuqqas tat-tali appoġġ/garanzija, l-esportaturi evidentement kienu jitqiesu mis-swieq li huma f'pożizzjoni iktar dgħajfa. Konsegwentement, huma jikkwalifikaw bħala trasferiment potenzjali ta' fondi jew bħala forniment ta' servizzi finanzjarji. “Garanzija” ta' valur bħal din ikollha ċertu valur fis-suq u, tal-inqas, tkun tinvolvi l-pagament ta' tariffa sostanzjali. Fid-dawl ta' dan, il-Ftehimiet jagħtu wkoll benefiċċju li huwa, fil-kliem tal-bord ta' KE-Inġenji tal-Ajru, “separat u indipendenti mill-benefiċċju li jista' jingħata minn xi trasferiment ta' fondi fil-ġejjieni”, minħabba, fost l-oħrajn, l-obbligu potenzjali tal-pagamenti mill-gvern. Huma iktar minn sempliċi wiegħda vaga ta' għoti ta' finanzjament “irħis” (99) u iqiegħdu lir-riċevituri b'mod ċar f'“pożizzjoni aħjar” milli kienu jkunu fin-nuqqas tal-Ftehim.

(438)

Fir-rigward tal-ammont tal-benefiċċju, dan ġie stabbilit fuq il-bażi tat-tariffi mitlubin għal-linja ta' kreditu miksuba minn wieħed mill-produtturi esportaturi fil-kampjun. Din il-linja ta' kreditu ngħatat minn bank li l-kwartieri ġenerali tiegħu huma stabbiliti fil-ġurisdizzjoni finanzjarja li mhijiex ir-RPĊ u turi l-elementi kollha tal-linji ta' kreditu kummerċjali disponibbli fis-swieq finanzjarji dinjin u ftehimiet oħrajn misjubin fis-settur kummerċjali. Huwa osservat ukoll li din il-linja ta' kreditu mhijiex sostanzjalment differenti fil-kundizzjonijiet tagħha mil-linji ta' kreditu kummerċjali l-oħrajn miksubin mill-produtturi esportaturi fil-kampjun, fejn jintalbu tariffi, inklużi dawk minn banek barranin. Fid-dawl tal-analiżi ta' hawn fuq, dan huwa parametru referenzjarju konservattiv, peress li l-evidenza turi li fil-verità l-Ftehimiet għandhom valur ikbar għad-ditti bħala miżura awtonoma meta mqabbla ma' linja ta' kreditu standard. Madankollu, il-Kummissjoni tqis li t-tariffi meħtieġa jservu ta' prokura raġonevoli għal dawk li jkunu pagabbli skont il-Ftehimiet.

(439)

Il-GTĊ iddikjara wkoll li l-banek li daħlu fil-Ftehimiet mal-esportaturi fil-kampjun mhumiex korpi pubbliċi jew ma kinux inkarigati mill-gvern li jagħmlu hekk. Din il-pretensjoni kellha tiġi rifjutata. Il-banek involuti kienu l-istess banek li taw finanzjament preferenzjali u fil-premessi (159) — (168) u (169) — (180) hawn fuq, il-Kummissjoni tat spjegazzjoni dettaljata għaliex huma korpi pubbliċi u/jew għaliex huma inkarigati u ordnati mill-GTĊ.

(440)

Il-GTĊ iddikjara li d-dikjarazzjoni tal-Kummissjoni li f'ċirkustanzi normali tas-suq il-linji ta' kreditu huma soġġetti għal tariffi ta' impenn u amministrazzjoni sostanzjali hija mingħajr bażi peress li t-tali tariffi japplikaw biss għal “linji impenjati ta' kreditu”. Din il-pretensjoni kellha tiġi rifjutata. Kif iddikjarat fil-premessa ta' hawn fuq, il-linja ta' kreditu użata bħala parametru referenzjarju mhijiex sostanzjalment differenti fil-kundizzjonijiet tagħha mil-linji ta' kreditu l-oħrajn miksubin mill-produtturi esportaturi fil-kampjun, inklużi minn banek barra ċ-Ċina. Barra minn hekk, wieħed mill-banek li kkonkluda bosta ftehimiet bħal dawn ma' produtturi esportaturi fil-kampjun donnu jitlob tariffi simili lill-klijenti tiegħu barra l-pajjiż (100).

(441)

Il-GTĊ iddikjara wkoll li l-Kummissjoni ma pprovdietx evidenza biex issostni d-dikjarazzjoni tagħha li l-forniment mill-Gvern ta' linji ta' kreditu (jiġifieri l-Ftehimiet) huwa parti minn self preferenzjali. Dan mhuwiex korrett. Il-forniment ta' linji ta' kreditu huwa l-parti standard tal-finanzjament ipprovdut minn banek lil kumpaniji u l-Ftehimiet huma miżuri separati u distinti li jaqgħu taħt l-ambitu tas-self preferenzjali. Kif iddikjarat fil-premessa (102) hawn fuq, il-GTĊ jipprovdi, permezz ta' għadd ta' dokumenti ta' ppjanar u politiki u liġijiet, għall-finanzjament preferenzjali lill-industrija PV. Barra minn hekk, ġie prelevat ħafna self b'dawn il-ftehimiet, xi ħaġa li turi biċ-ċar li huma parti integrali mill-finanzjament preferenzjali tal-industrija PV.

(442)

Produttur esportatur minnhom iddikjara li l-forniment ta' linji ta' kreditu mhuwiex sussidju speċifiku. Din il-pretensjoni kellha tiġi rifjutata. Kif spjegat fil-premessa (441) hawn fuq, il-forniment ta' linji ta' kreditu huwa parti essenzjali mis-self preferenzjali u għaldaqstant, l-analiżi tal-ispeċifiċità fil-premessi (191), (192), (209) u (428) t'hawn fuq, tapplika ugwalment għall-għoti ta' linji ta' kreditu.

(443)

Skont l-ilmentatur, il-Kummissjoni missha stabbilixxiet marġni ta' sussidju għall-użu ta' krediti tax-xerrejja ta' esportazzjoni, peress li l-Bank EXIM irrifjuta milli jikkoopera. Il-Kummissjoni missha użat l-informazzjoni fl-ilment u s-sejbiet tad-DOC tal-Istati Uniti fil-kawża PV simili. Din il-pretensjoni ma tistax tiġi aċċettata. Il-Kummissjoni investigat l-allegazzjonijiet fl-ilment iżda ma nstabet l-ebda evidenza li l-produtturi esportaturi fil-kampjun ibbenefikaw mit-tali miżuri matul il-PI. Qiegħed jiġi nnotat li l-perjodi ta' investigazzjoni għall-każ tal-Istati Uniti u l-każ inkwistjoni kienu differenti.

(444)

Fir-rigward tad-dokumenti mitlubin mill-Kummissjoni fiż-żjara ta' verifika kif speċifikat fil-premessi (220) u (221), il-GTĊ iddikjara li ma kienx iċċarat meta ntalab il-Pjan 840, li d-dikjarazzjonijiet finanzjarji 2012 ta' Sinosure ma kinux disponibbli fi żmien il-verifika, u li l-informazzjoni dwar il-kumpaniji kkonċernati kienet kunfidenzjali u xorta waħda, il-kuntratti relevanti ma kinux fil-kwartieri ġenerali ta' Sinosure. Il-Kummissjoni tirreferi għall-ispjegazzjonijiet tagħha inklużi fil-premessi (219), (220), u (223) li jindirizzaw dawn l-argumenti kollha. Fir-rigward tal-Pjan 840, il-Kummissjoni żżid li hi talbet id-dokumenti relevanti kollha li jikkonċernaw l-attività ta' Sinosure u l-programm allegat ta' sussidju li jibbenefika lill-esportaturi fil-kampjun, u li dan il-Pjan 840 żgur li huwa relevanti għas-sejbiet tagħha, flimkien mad-dokumenti kollha l-oħrajn speċifikati fil-premessa (236), kif sostnut mill-ispjegazzjonijiet fil-premessa (232). Rigward id-dikjarazzjonijiet finanzjarji 2012 ta' Sinosure, il-Kummissjoni talbet il-kontijiet ta' tqabbil preliminari, jekk id-dikjarazzjonijiet finanzjarji tal-2012 ma kinux finalizzati, iżda Sinosure rrifjutat ukoll milli tipprovdi kwalunkwe kont ta' tqabbil preliminari għall-2012.

(445)

Il-GTĊ iddikjara wkoll li ma hemm ebda evidenza ġuridika u fattwali biex issostni l-konklużoni li l-industrija fotovoltajka hija “industrija strateġika” u li dan ikun ir-riżultat ta' suppożizzjoni. Il-Kummissjoni tirreferi għall-ispjegazzjoni fil-premessa (231) u tfakkar li dan il-punt kien ikkonfermat b'mod speċifiku mill-GTĊ matul iż-żjara ta' verifika. Fir-rigward tad-dikjarazzjoni simili dwar il-pjan 840, il-pjan 421 u l-miżuri ta' sostenn għall-“Industriji Strateġiċi Emerġenti” u d-dikjarazzjoni li l-pjanijiet ma jkunux legalment vinkolanti, il-Kummissjoni tirreferi għall-ispjegazzjonijiet fil-premessi (232) — (234) rispettivament. Hija tosserva wkoll li l-GTĊ naqas milli jissottometti dawn id-dokumenti u jiddiskutihom mal-Kummissjoni, u li ma hemm ebda evidenza rreġistrata li tipprova li l-konklużjonijiet tal-Kummissjoni huma ħżiena.

(446)

Il-GTĊ u esportatur fil-kampjun jiddikjaraw li r-rifużjonijiet u l-għotjiet għall-pagament tal-primjums tal-assigurazzjoni tal-kreditu għall-esportazzjoni mogħtija mill-awtoritajiet lokali ġew ikkumpensati b'mod illegali għaliex ma kienx stabbilit li jikkostitwixxu sussidji skont it-tifsira tal-Ftehim tal-SCM tad-WTO. Il-Kummissjoni tirreferi għall-analiżi tagħha dwar is-sejbiet tal-investigazzjoni u b'mod partikolari l-premessi (239) u (247). Il-Kummissjoni tkompli tosserva li r-rifużjonijiet u l-għotjiet huma marbutin mill-qrib ħafna mal-programm ta' assigurazzjoni tal-kreditu għall-esportazzjoni għaliex ir-ripagament tagħhom huwa l-konsegwenza tal-pagament tal-primjum lil Sinosure skont il-politika ewlenija ta' assigurazzjoni tal-kreditu għall-esportazzjoni. Fl-aħħar iżda mhux l-inqas, dawn ir-rifużjonijiet jaqgħu wkoll taħt l-ambitu tan-Notifika [2004] Nru 368 maħruġ b'mod konġunt minn MOFCOM u Sinosure, li jistipula li “l-awtoritajiet reġjonali u tal-gvern lokali jagħmlu iktar sforzi b'mod konġunt biex jimplimentaw iktar miżuri ta' appoġġ għall-prodotti inklużi fid-Direttorju u l-impriżi tat-teknoloġija avvanzata u ġdida għall-assigurazzjoni tal-kreditu għall-esportazzjoni”.

(447)

Il-GTĊ ikkontesta wkoll is-sejba dwar il-Punt (j) tal-Anness 1 tal-Ftehim tal-SCM tad-WTO li l-programm ta' assigurazzjoni tal-kreditu għall-esportazzjoni fit-terminu qasir ta' Sinosure kien operat b'rati tal-primjum inadegwati biex ikunu koperti l-kostijiet u t-telf operatorji fit-tul tal-programm. B'appoġġ ta' dan, il-GTĊ jikkwota l-ġurisprudenza tas-sejba tal-Bord tad-WTO fi Stati Uniti-Upland Cotton u jippreżenta spjegazzjonijiet ibbażati fuq settijiet differenti ta' figuri u argumenti li jinsabu fir-Rapporti Annwali ta' Sinosure. Il-GTĊ jiddubita wkoll mir-referenza tal-Kummissjoni għall-Artikolu 11 tal-Artikoli ta' Assoċjazzjoni ta' Sinosure u għall-Artikolu mill-kumpanija ġuridika Stewart Law. Il-Kummissjoni ttenni l-argumenti kollha tagħha fil-premessi (242) — (245) u tfakkar li l-konklużjonijiet tagħha huma bbażati fuq l-aħjar evidenza għad-dispożizzjoni fil-fajl minħabba nuqqas ta' kooperazzjoni tal-GTĊ li żammet lill-Kummissjoni milli tikseb l-informazzjoni relevanti li talbet. Għas-sejbiet tagħha, il-Kummissjoni tqis għadd ta' elementi u evidenza fil-fajl, li fosthom kien hemm l-Artikolu ta' Assoċjazzjoni ta' Sinosure u l-Artikolu mill-kumpanija ġuridika Stewart Law. Il-Kummissjoni tqis li, filwaqt li l-ebda element minn dawn ma huwa determinanti minnu nnifsu, dawn u l-elementi kollha l-oħrajn huma relevanti għad-determinazzjoni tagħha. Rigward il-ġurisprudenza ta' Stati Uniti-Upland Cotton, il-Kummissjoni ħadet f'kunsiderazzjoni sħiħa s-sejbiet tagħha u l-kwotazzjonijiet ta' din il-ġurisprudenza mill-GTĊ huma tabilħaqq ferm pertinenti.

(448)

Fil-kontestazzjoni tal-analiżi tal-Kummissjoni fil-premessa (245), il-GTĊ jissottometti tabella b'figuri meħudin mir-Rapport tal-Introjtu tar-Rapporti Annwali ta' Sinosure disponibbli pubblikament għall-perjodu 2006-2011 u jikkonkludi li huwa evidenti li l-primjums riċevuti kienu ogħla mill-kostijiet operatorji tal-programm. L-ewwel nett, il-Kummissjoni tosserva li t-tabella pprovduta mill-GTĊ ma tinkludix ir-ringiela relevanti dwar l-ammonti tal-kummissjonijiet imħallsin minn Sinosure iżda l-ispejjeż operatorji biss. It-tieni nett, il-figuri juru b'mod inekwivokabbli li f'kull sena individwali mill-2006 sal-2011, bl-eċċezzjoni tal-2010, l-ammonti tal-primjum nett qatt ma huma ogħla mill-ammonti tal-pretensjonijiet netti flimkien mal-kostijiet operatorji, anki jekk jiġu injorati l-pagamenti tal-kummissonijiet li tneħħew mill-GTĊ. Dan jinkludi s-sena 2011, li parzjalment tkopri l-perjodu ta' investigazzjoni, u l-ammont tat-telf huwa kemxejn sostanzjali f'ċerti snin (pereżempju l-2008). It-tielet nett, il-Kummissjoni tosserva li għall-2010 il-GTĊ indika ammont sproporzjonatament baxx ta' pretensjonijiet netti mħallsin (primjums imħallsin huma ddikjarati bħala 20 darba ogħla mill-pretensjonijiet imħallsin), xi ħaġa li mhijiex riflessa fir-Rapport Annwali tal-2010. Dan l-ammont irrapportat mill-GTĊ għas-sena 2010 huwa bbażat fuq aġġustamenti ex-post enormi li jikkonċernaw l-irkupru ta' pretensjonijiet u bidla fir-riżervi ta' pretensjonijiet pendenti li jidhru biss fir-Rapport Annwali tal-2011 b'referenza għas-sena 2010. Dawn l-aġġustamenti jidhru li huma ta' għamla straordinarja u anormali u huma riflessi biss fir-rapport tas-sena ta' wara. Il-Kummissjoni tosserva wkoll li għall-2011 il-GTĊ minflok irrapporta l-ammonti inklużi fir-Rapport Annwali tal-2011. Il-Kummissjoni ssib l-aġġustamenti sussegwenti diffiċli biex jiġu rikonċiljati mas-sitwazzjoni propja, speċjalment minħabba n-nuqqas ta' kooperazzjoni u spjegazzjoni ulterjuri mill-GTĊ jew Sinosure matul l-investigazzjoni.

Skont Stati Uniti-Upland Cotton, kif ikkwotata mill-GTĊ stess, “ir-referenza għat-‘terminu twil’ fil-punt (j) tirreferi għal perjodu ta' durata suffiċjenti sabiex tiġi żgurata eżaminazzjoni oġġettiva li tippermetti valutazzjoni dettaljata tal-programm u li tevita milli tattribwixxi importanza żejda lil xi esperjenza unika jew mhux tas-soltu f'jum, xahar, trimestru, nofs sena, sena speċifiċi jew xi perjodu ta' żmien speċifiku ieħor”. Il-Kummissjoni tqis il-perjodu 2006-2011 bħala perjodu b'terminu twil biżżejjed għall-kunsiderazzjoni, u Sinosure ġarrbet telf f'kull sena ta' dan il-perjodu. Is-sitwazzjoni tal-2010 għandha jew titqies bħala unika jew mhux tas-soltu jekk wieħed iqis il-figuri aġġustati fir-Rapport Annwali 2011 u b'hekk ta' sinifikanza limitata, jew inkella l-figuri ordinarji mhux aġġustati fir-Rapport Annwali 2010 iridu jittieħdu f'kunsiderazzjoni bħala relevanti li juru li r-riżultat huwa biss ftit aħjar minn ekwilibriju. Minħabba t-telf importanti mġarrab fi snin oħrajn, dan jikkonferma s-sejbiet tal-Kummissjoni li Sinosure, b'mod ġenerali, hija f'pożizzjoni ta' telf fit-tul matul il-perjodu 2006-2011. Barra minn hekk, anki li kieku d-dejta tal-2010 kellha titqies bħala rappreżentattiva, il-fatt jibqa' li Sinosure għamlet telf f'ħamsa mis-sitt snin bejn l-2006 u l-2011. It-tabelli u s-settijiet ta' figuri l-oħrajn sottomessi mill-GTĊ biex jikkontesta s-sejba tal-Kummissjoni fuq il-punt (j) tal-Ftehim tal-SCM tad-WTO ma jistgħux ikunu rikonċiljati ma' informazzjoni oħra preżenti rreġistrati u/jew mhumiex verifikabbli. Xorta waħda, huma nfushom ma jurux li Sinosure laħqet ekwilibriju lanqas fil-programm ta' assigurazzjoni tal-kreditu għall-esportazzjonijiet ta' terminu qasir matul il-perjodu 2006-2011.

(449)

Rigward il-parametru referenzjarju għall-kalkolu tal-benefiċċju, il-GTĊ iqis li l-istabbiliment ta' punt referenzjarju barra l-pajjiż huwa inkonsistenti mal-Ftehim tal-SCM, iżda ma jżid ebda argument biex jiġġustifika din id-dikjarazzjoni. Il-Kummissjoni tirreferi għall-ispjegazzjoni tagħha fil-premessa (245).

(450)

Il-GTĊ u esportatur li kkoopera fil-kampjun jikkontestaw il-parametru referenzjarju użat għaliex il-Kummissjoni ma ġġustifikatx għaliex: (i) il-kalkolu tal-primjum huwa bbażat fuq id-dejta tal-Istati Uniti dwar il-bank EXIM; (ii) użat l-Italja bħala l-pajjiż importatur u mhux il-Ġermanja, li hija s-suq ta' esportazzjoni ewlieni għall-prodott ikkonċernat; (iii) ħadet il-perjodu ta' żmien ta' 120 jum u mhux 60 jum jew xi perjodu ieħor iqsar; (iv) ma użatx il-kalkolu tal-primjum għall-esportazzjonijiet diretti iżda minflok għall-Assigurazzjoni fuq l-Esportazzjoni tal-Kreditu tax-Xerrej ta' Istituzzjoni Finanzjarja (FIBC). Fir-rigward ta' (i), il-Kummissjoni tirreferi għall-premessa (253). Fir-rigward ta' (ii), il-Kummissjoni temmen li l-Italja tirrappreżenta l-aħjar bilanċ bejn il-pajjiż tal-UE bl-inqas riskju u l-pajjiżi tal-UE b'riskju u, konsegwentement, primjums mitlubin notevolment ogħla, li huma wkoll swieq tas-suq ikkonċernat. Rigward (iii), in-nuqqas ta' simulazzjoni speċifika bbażata fuq perjodu ta' 90 jum disponibbli fuq il-websajt tal-Bank EXIM, il-Kummissjoni tqis id-durata ta' 120 jum bħala l-iktar waħda xierqa biex tirrappreżenta t-termini tal-bejgħ matul il-perjodu ta' investigazzjoni. Fir-rigward ta' (iv), il-Kummissjoni ma rnexxilhiex tikseb simulazzjoni għall-kalkolu tal-primjum għal esportazzjonijiet diretti u tqis li dan il-parametru referenzjarju jirrifletti s-sitwazzjoni ta' riskju ġenerali fil-pajjiż ta' xiri.

(451)

Esportatur minnhom li kkoopera fil-kampjun jiddikjara li xtara assigurazzjoni tal-kreditu għall-esportazzjoni għal uħud mill-esportazzjonijiet tiegħu iżda ħallas primjums tal-assigurazzjoni regolari u ma gawdiex mill-programm Green Express jew xi trattament benefiċjarju ieħor allegat mill-ilment. Fin-nuqqas ta' evidenza li turi din id-dikjarazzjoni, il-Kummissjoni tirreferi għas-sejbiet tagħha dwar dan il-programm fit-Taqsima 3.4.1.4 ta' dan ir-Regolament. Rigward “Green Express”, il-Kummissjoni tirreferi għas-sejbiet tagħha fil-premessa (240) u tosserva li dan jikkostitwixxi aspett speċifiku tal-programm ta' assigurazzjoni tal-kreditu fit-terminu qasir ta' Sinosure u li s-sejbiet tal-Kummissjoni mhumiex limitati għal dan l-aspett iżda għall-programm sħiħ.

(452)

Il-GTĊ jargumenta wkoll li dan il-programm jipprovdi għotjiet għal “sistemi solari PV distribwiti” u mhux għall-produtturi/esportaturi tal-prodott ikkonċernat u li l-kriterji relevanti fil-leġiżlazzjoni mhumiex immirati għal produtturi ta' moduli u ċelloli. F'dan ir-rigward, il-GTĊ jiddikjara li pprovda d-dokumenti relevanti dwar il-programm u li anki kkoordina mal-kumpaniji fil-kampjun biex isostni dan il-punt. Tliet esportaturi li kkooperaw fil-kampjun jiddikjaraw li dan huwa “sussidju tal-utent” u ma jagħtix benefiċċju lill-prodott ikkonċernat, u għaldaqstant mhuwiex kumpensabbli skont it-tifsira tal-Artikoli 1(1) u 3(2) tar-Regolament bażiku, l-Artikolu VI:3 GATT 1994, u l-Artikolu 19.1 tar-Regolament tal-SCM tad-WTO. Dawn l-esportaturi jirreferu għad-deċiżjoni tal-UE fil-kawża Bijodiżil mill-Istati Uniti (il-premessa 97 tar-Regolament tal-Kummissjoni (KE) Nru 194/2009, ĠU L 67 tat-12.03.2009 p. 50 u l-ġurisprudenza tad-WTO fi Stati Uniti-Vireg taċ-Ċomb (par. 6.50, 6.53, 6.56 u 6.57 tar-Rapport tal-Bord), Kanada-Miżuri li Jaffettwaw l-Esportazzjoni ta' Inġenji tal-Ajru Ċivili (para. 9.112 tar-Rapport tal-Bord), Brażil-Programm ta' Finanzjament għall-Esportazzjoni għal Inġenji tal-Ajru (para. 7.24 tar-Rapport tal-Bord), u Kanada-Miżuri li Jaffettwaw l-Esportazzjoni ta' Inġenji tal-Ajru (par. 157 u 159 tar-Rapport tal-Korp tal-Appellat).

(453)

Il-Kummissjoni tirreferi għas-sejbiet tagħha tal-investigazzjoni u b'mod partikolari għall-premessi (243) — (246) ta' dan ir-Regolament, li jipprovdu spjegazzjonijiet eżawrjenti fuq l-argumenti ta' hawn fuq u jikkonfermaw li d-determinazzjoni hija konsistenti mad-dispożizzjonijiet relevanti u mal-ġurisprudenza kkwotata mill-GTĊ u l-esportaturi li kkooperaw fil-kampjun. Il-Kummissjoni ttenni li l-għotjiet mill-programm huma direttament marbutin mal-prodott ikkonċernat għaliex is-“sistemi solari PV distribwiti” eliġibbli jinkludu b'mod speċifiku l-provvista ta' moduli u ċelloli bħala parti importanti mill-proġetti u għaldaqstant in-nisġa bejn il-benefiċċju mogħti mill-gvern u l-prodott ikkonċernat hija diretta u inseparabbli. Kif speċifikat ukoll b'mod partikolari fil-premessi (244) u (245), l-investigazzjoni kkonfermat li l-pagament diretti ngħataw mill-GTĊ lil bosta esportaturi li kkooperaw fil-kampjun (jiġifieri l-iskop ta' installazzjoni ta' pannelli solari biex tiġi ġġenerata enerġija għall-użu proprju tagħhom, inkluż fil-proċess ta' produzzjoni tal-prodott ikkonċernat) billi jintużaw fost l-oħrajn moduli u ċelloli solari manifatturati tagħhom stess. Ġie stabbilit wkoll li l-pagamenti diretti li saru lill-esportaturi fil-kapaċità tagħhom bħala fornituri tal-prodott ikkonċernat lil operaturi ta' proġetti ta' partijiet terzi huma f'kunflitt mad-dispożizzjonijiet fil-leġiżlazzjoni relevanti u li l-GTĊ naqas milli jipprovdi evidenza biex jirrikonċilja s-sitwazzjoni (ara b'mod partikolari l-premessi (245) u (246)).

L-ispjegazzjoni limitata pprovduta mill-GTĊ u l-esportatur li kkoopera fil-kampjun li t-trasferiment dirett ta' fondi, bi ksur tal-leġiżlazzjoni Ċiniża, kien neċessarju għaliex l-operatur tal-proġett kien f'diffikultà finanzjarja u sabiex jiġi żgurat li l-għotjiet jintużaw biss għal sistemi PV awtorizzati tindika li, fin-nuqqas ta' dan it-trasferiment dirett mill-gvern, l-esportatur li kkoopera fil-kampjun li jaġixxi bħala fornitur ma kienx ikun kapaċi jirċievi ebda flus għall-provvista tal-prodott ikkonċernat u li l-gvern ma kienx ikun kapaċi jiżgura li s-sussidju jintuża għall-iskop intiż tiegħu. Minn din il-perspettiva u fin-nuqqas ta' iktar evidenza, dawn il-pagamenti jridu jitqiesu bħala għotja diretta mill-GTĊ lill-produttur tal-prodott ikkonċernat, li inkella ma kien jirċievi l-ebda flus għall-provvista tal-prodott ikkonċernat (jekk jiġi supponut li din il-provvista qatt seħħet, xi ħaġa li, mill-ġdid, ma hemm l-ebda evidenza rreġistrata tagħha). Fuq din il-bażi, il-Kummissjoni temmen li l-argumenti mressqin mill-GTĊ u mill-esportaturi li kkooperaw fil-kampjun ma għandhomx bażi ġuridika.

(454)

Il-GTĊ jiddikjara wkoll li għas-sitwazzjonijiet li fihom il-benefiċċji mill-programm ikkonċernaw il-provvista tal-prodott ikkonċernat lil operaturi ta' proġetti mhux relatati, il-Kummissjoni kienet obbligata tagħmel analiżi ta' trasferiment biex tistabbilixxi dan il-punt, billi kkwotat id-deċiżjoni tad-WTO fi Stati Uniti-Softwood Lumber IV (par. 141 u 142 tar-Rapport tal-Korp tal-Appellat). Il-Kummissjoni tirreferi għall-ispjegazzjonijiet fil-premessi (244) — (246) u fil-premessa (352) hawn fuq biex twaqqa' din id-dikjarazzjoni. Barra minn hekk, minħabba n-nuqqas ta' kooperazzjoni tal-GTĊ u l-partijiet interessati, il-Kummissjoni ma kinitx f'pożizzjoni li tagħmel analiżi ta' trasferiment. Għaldaqstant, ma hemmx kwistjoni ta' mogħdija u l-ġurisprudenza kkwotata tad-WTO hija irrelevanti f'din is-sitwazzjoni peress li r-rikavat tħallas direttament lill-produtturi tal-prodott ikkonċernat u kien marbut direttament mal-provvista tal-prodott ikkonċernat, fost l-oħrajn. Peress li dawn il-pagamenti kienu għotjiet mhux ripagabbli, hemm kontribuzzjoni finanzjarja (trasferiment dirett ta' fondi), u l-Kummissjoni hija intitolata tassumi li dawn jagħtu benefiċċju lir-riċevitur (il-produtturi), fin-nuqqas ta' xi evidenza dwar użu ulterjuri tas-somom ikkonċernati. Li kieku dawn il-pagamenti minn dan il-programm saru mill-gvern lil operaturi ta' proġetti ta' partijiet terzi u t-tagħmir mixtri b'valur tas-suq ekwu, ma kien ikun hemm ebda benefiċċju għall-esportaturi kkonċernati. Madankollu, f'sitwazzjoni fejn il-pagamenti jsiru lill-produtturi esportaturi, l-ammonti użati minn dawn il-kumpaniji għall-installazzjoni ta' pannelli solari jagħtu benefiċċju għaliex teħlishom mill-ispejjeż li kien ikollhom iġarrbu f'dan il-proċess. Jekk il-produttur esportatur mhuwiex kapaċi juri li parti mill-għotja ġiet trasferita lil utenti ta' partijiet terzi, huwa supponut, fuq il-bażi tal-fatti disponibbli, li din il-parti tal-għotja tagħti benefiċċju lill-esportaturi bħala sussidju ġenerali li jibbenefika l-attivitajiet tal-kumpanija b'mod totali. Dan huwa l-każ hawnhekk.

(455)

Żewġ esportaturi li kkooperaw fil-kampjun jiddikjaraw li l-programm Golden Sun mhuwiex speċifiku għaliex ir-rekwiżiti relevanti fil-leġiżlazzjoni Ċiniża huma oġġettivi u l-impriżi kollha li jissodisfawhom jistgħu jibbenefikaw mill-programm, u l-eliġibilità hija miftuħa għall-kumpaniji kollha, kemm jekk huma manifatturi jew le tal-prodott ikkonċernat. Il-Kummissjoni tirreferi għas-sejba tagħha ta' speċifiċità fil-premessa (247) li turi li l-kundizzjonijiet u l-kriterji tal-għażla mhumiex oġġettivi u ma japplikawx b'mod awtomatiku. Il-kriterji relevanti meħtieġa jikkonfermaw li l-programm huwa limitat biss għas-sottosett limitat ta' impriżi li kapaċi jissodisfawhom, jiġifieri dawk b'kapaċità sostanzjali installata ta' tal-inqas 300kWh u b'assi sostanzjali ta' tal-inqas RMB 100 miljun. Il-kriterji tal-għażla jirreferu wkoll għall-bżonn li l-impriżi riċevituri jkunu inklużi fil-pjan lokali ta' implimentazzjoni ta' proġett ta' dimostrazzjoni Golden Sun, u l-investigazzjoni stabbilixxiet li l-inklużjoni f'dawn il-pjanijiet lokali tiddependi fuq deċiżjoni diskrezzjonali tal-awtoritajiet kompetenti mhux trasparenti u mhux ibbażata fuq kriterji oġġettivi. Il-Kummissjoni żżid li s-“sistemi solari distribwiti” eliġibbli jiddependu fuq il-manifattura u l-provvista ta' tagħmir li jiġġenera enerġija solari li moduli u ċelloli jsawru parti kbira minnu. Għaldaqstant, għall-kuntrarju tal-argumenti tal-esportaturi fil-kampjun, din l-iskema hija wkoll speċifika fis-sens li huma biss il-produtturi ta' sistemi solari, jew fi kliem ieħor produtturi tal-prodott ikkonċernat li fil-prattika huma eliġibbli għall-benefiċċji minn dan il-programm jew direttament fil-kwalità tagħhom bħala sidien ta' proġetti jew indirettament fl-allegata kwalità tagħhom bħala fornituri tal-prodott ikkonċernat lil sidien ta' proġetti.

Għalhekk, anki jekk jitqies in-nuqqas ta' kooperazzjoni tal-GTĊ li naqas milli jipprovdi d-dokumenti kollha tal-baġit mitlubin mill-Kummissjoni (ara l-premessi (234)-(239)), huwa konkluż li dan il-programm huwa wkoll de facto speċifiku skont l-Artikolu 4(2)(c) tar-Regolament bażiku għaliex huma primarjament il-produtturi tal-prodott ikkonċernat li jibbenefikaw direttament jew indirettament minn dan il-programm. Is-sussidju jintuża wkoll minn numru limitat ta' impriżi (il-produtturi tal-prodott ikkonċernat), jew jintuża fil-parti l-kbira jew b'mod sproporzjonat minn dawn id-ditti, peress li huma biss sottosett tar-riċevituri potenzjali allegati iżda jidhru li jirċievu l-finanzjament kollu.

(456)

Il-GTĊ itenni l-argument tiegħu li l-programm li jikkonċerna l-impriżi b'investiment barrani (FIEs) allegat fl-ilment intemm mill-2013. Il-Kummissjoni tosserva li l-perjodu ta' investigazzjoni ntemm ferm qabel l-2013 u b'hekk, il-benefiċċji mogħtijin minn dan il-programm matul il-PI huma kumpensabbli. Dan huwa kkonfermat mis-sejba tal-investigazzjoni, li sabet benefiċċji mogħtijin matul il-PI minn dan il-programm lil bosta esportaturi li kkooperaw fil-kampjun. Il-benefiċċji mogħtija minn dan il-programm, anki jekk il-programm intemm fl-2013, jissoktaw fil-ġejjieni wkoll.

(457)

Il-GTĊ u esportatur li kkoopera fil-kampjun komplew jiddikjaraw li l-iskema varjanti għall-Impriżi tat-Teknoloġija Avvanzata u Ġdida (HNTEs) ma jistgħux ikunu kkumpensati fuq il-bażi tal-Artikolu 10(1) tar-Regolament bażiku peress li ma kienx allegat fl-ilment. Il-Kummissjoni tirreferi għar-replika dettaljata tagħha għal dan l-argument li tinsab fil-premessa (286). Il-Kummissjoni tfakkar ukoll li l-GTĊ iddeċieda li ma jikkooperax matul l-investigazzjoni dwar il-varjant ta' dan il-programm. Minbarra dawn l-elementi, il-Kummissjoni tosserva li l-ilment jelenka skemi ta' taxxa diretta preferenzjali oħrajn għall-HNTEs minbarra l-varjant ta' tnejn b'xejn/tlieta nofs għall-FIEs (it-Taqsima 4.2.5.1 tal-ilment), li huma jew it-tnaqqis tat-taxxa għall-HTNEs (it-Taqsima 4.2.5.9 tal-ilment) jew il-programmi ta' taxxa preferenzjali għall-FIEs rikonoxxuti bħala HTNE (it-Taqsima 4.2.5.8 tal-ilment). Għaldaqstant, dan il-programm jista' anki jitqies li għandu nisġa ferm mill-qrib ma' wieħed minn dawn il-programmi tat-taxxa allegati l-oħrajn jew mat-tnejn li huma f'dak li għandu x'jaqsam ma' tnaqqis tar-rata tat-taxxa diretta u għandu fil-mira speċifika l-istess sett ta' HNTEs benefiċjarji. Mill-ġdid, il-kooperazzjoni mill-GTĊ setgħet tippermetti lill-Kummissjoni sabiex tivvaluta kif xieraq u b'mod dettaljat l-elementi kollha li huma relatati man-nisġa mal-programmi allegati fl-ilment u sabiex timla kwalunkwe nuqqas ta' informazzjoni li huwa preżenti fl-ilment, li huwa bbażat fuq l-evidenza prima facie raġonevolment disponibbli għall-ilmentatur. Fuq il-bażi ta' dawn l-argumenti, il-Kummissjoni ttenni li l-kumpens ta' dan il-programm huwa kompletament konformi mal-Artikolu 10(1) tar-Regolament bażiku, peress li din id-dispożizzjoni tippermetti li ssir investigazzjoni ta' kwalunkwe “sussidju allegat” identifikat mill-ilmentatur, mhux biss programm speċifiku. F'dan il-każ, is-sussidju allegat, il-preċedenti tad-dħul mit-taxxi tal-gvern li fil-mira għandu l-istess tip ta' benefiċjarji, huwa komuni għall-programmi kollha inkwistjoni.

(458)

Fir-rigward tal-kalkolu tal-ammont tas-sussidju, żewġ esportaturi li kkooperaw fil-kampjun jargumentaw li l-Kummissjoni żbaljat meta użat il-figuri tas-sena sħiħa fid-Dikjarazzjoni Annwali 2011 tat-Taxxa fuq l-Inrojtu minkejja li l-PI ikopri nofs l-2011 u nofs l-2012, u dan jikser il-metodu ta' kalkolu fit-Taqsima E(a)(ii) tal-Linji Gwida tal-Kummissjoni għall-kalkolu tal-ammont tas-sussidju f'investigazzjonijiet tad-dazju kumpensatorju (traduzzjoni mhux uffiċjali), ĠU C 394, 17.12.1998, p. 6. Wieħed minn dawn l-esportaturi kompla jiddikjara li, peress li d-dikjarazzjoni tat-taxxa tal-2012 sħiħa ma kienx disponibbli fi żmien il-verifika, għall-2012, il-Kummissjoni missha bbażat il-kalkolu tagħha fuq id-dikjarazzjonijiet trimestrali tat-taxxa fuq l-introjtu li jikkonċernaw l-ewwel nofs tas-sena 2012 miġbura fuq il-post u/jew fuq it-tabelli tal-profitt u t-telf għall-2012, li juru li l-kumpanija kienet f'pożizzjoni ta' telf.

(459)

Il-Kummissjoni tirreferi għall-premessa (300) u ttenni l-importanza li l-kalkolu tal-benefiċċju jkun ibbażat fuq dikjarazzjonijiet tat-taxxa finali awditjati għal ċerta sena fiskali. Il-Kummissjoni żżid li d-dikjarazzjoni finali tad-dikjarazzjoni tat-taxxa 2011 matul il-PI tagħmel kwalunkwe benefiċċju mitlub fuq id-dikjarazzjoni bħala waħda finali, xi ħaġa li tkompli turi l-korrettezza tal-approċċ tagħha. Il-Kummissjoni ma tistax tibbaża l-kalkolu tagħha fuq dikjarazzjoni tat-taxxa trimestrali, għaliex dawn id-dikjarazzjonijiet jirriflettu s-sitwazzjoni provviżorja kurrenti fi żmien il-preżentazzjoni u b'hekk, ma jiħdux f'kunsiderazzjoni s-sitwazzjoni konsolidata finali tas-sena fiskali annwali. L-għan ta' dawn id-dikjarazzjonijiet huwa li jiżguraw likwidità lill-gvern f'każ li t-taxxi jkunu dovuti b'mod provviżorju, iżda jirriflettu biss is-sitwazzjoni parzjali fi żmien il-preżentazzjoni. Jaf ikun minnu li jekk il-kumpanija tagħmel profitt sostanzjali fl-aħħar żewġ trimestri tas-sena li jpaċi t-telf fit-trimestri inizjali, f'dak il-każ tirrapporta profitt taxxabbli fuq id-dikjarazzjoni finali tat-taxxa. Għaldaqstant, filwaqt li d-dikjarazzjonijiet provviżorji 2012 tat-taxxa jagħtu indikazzjoni parzjali tas-sitwazzjoni tal-esportatur fi żmien il-preżentazzjoni u jispjegaw għaliex il-Kummissjoni ġabrithom, ir-relevanza tagħhom mhijiex assoluta peress li ma jistax ikun eskluż li s-sitwazzjoni fi tmiem is-sena fiskali kif murija fuq id-dikjarazzjoni definittiva hija kompletament differenti. Rigward it-tabelli tal-profitt u t-telf dwar is-sena 2012, il-Kummissjoni tosserva li l-kontabilità finanzjarja mhux dejjem tikkorrispondi għall-kontabilità fiskali u jaf ikun il-każ li l-obbligu ta' rapportar tal-attributi tal-introjtu u t-telf għal skopijiet tat-taxxa diretta jaf ivarja b'mod sostanzjali mill-obbligi ta' rapportar għal skopijiet kontabilistiċi. Jaf ikun hemm ukoll aġġustament għal skopijiet tat-taxxa li mhumiex kompletament riflessi fil-kontijiet finanzjarji. Kollox ma' kollox, il-fatt li kumpanija hija f'pożizzjoni ta' telf fil-kontijiet finanzjarji tagħha mhux bilfors ifisser li ser tkun fl-istess pożizzjoni ta' telf fid-dikjarazzjoni finali tat-taxxa tagħha. Fuq il-bażi ta' dawn l-argumenti, il-Kummissjoni tikkonferma li l-kalkolu tas-sussidju għal skemi tat-taxxa diretta bilfors irid joqgħod fuq il-figuri finali li jidhru fid-dikjarazzjoni awditjata finali tat-taxxa fuq l-introjtu u mhux fuq dikjarazzjoni perjodika tat-taxxa jew fuq dikjarazzjonijiet kontabilistiċi definittivi jew ta' tqabbil preliminari.

(460)

Il-GTĊ jiddikjara li hija l-ewwel darba li sar jaf li l-Kummissjoni qed tikkumpensa programm ta' R&Ż li mhuwiex programm sostitut tal-programm ta' R&Ż għall-FIEs allegati fl-ilment. Il-GTĊ jibbaża fuq argumenti simili użati għall-iskema preċedenti kif spjegat fil-premessa (457) u jargumenta li l-kumpens ta' din l-iskema jikser l-Artikoli 11 u 13 tal-Ftehim tal-SCM tad-WTO. Il-GTĊ ikompli billi jiddikjara li l-programm ta' R&Ż għall-FIEs intemm fl-2008 u l-programm ta' R&Ż il-ġdid inkluż fil-Liġi Ċiniża dwar it-Taxxa fuq l-Introjtu tal-Impriżi mhuwiex programm sostitut peress li ma jirreferix għall-FIEs u ma jeħtieġx li l-ispiża ta' R&Ż tkun 10 % ogħla mis-sena ta' qabel.

(461)

Il-Kummissjoni tosserva li l-GTĊ ma pprovdiex informazzjoni dwar din l-iskema fit-tweġiba għat-tweġiba għall-kwestjonarju u għall-ittra ta' defiċenza, iżda li din l-iskema diġà kienet ikkumpensata f'investigazzjonijiet imgħoddijin (ara l-premessa (310)). Madankollu, il-Kummissjoni tosserva wkoll li dan il-programm kien mitħaddet matul iż-żjara ta' verifika mal-GTĊ u li d-dispożizzjonijiet relevanti ta' implimentazzjoni nġabru bħala prova (diġà kienu sottomessi minn wieħed mill-esportaturi fil-kampjun). Għaldaqstant, l-allegazzjoni tal-GTĊ li din kienet l-ewwel darba li kien mgħarraf bil-kumpensabbiltà potenzjali ta' dan il-programm ma għandhiex bażi, anki minħabba li bosta esportaturi li kkooperaw fil-kampjun li magħhom il-GTĊ ikkoordina t-tweġiba tiegħu rrapportaw dan il-programm fit-tweġibiet għall-kwestjonarju tagħhom. Il-GTĊ kien kompletament konxju minn dan il-fatt peress li bosta drabi spezzjona l-fajl mhux kunfidenzjali. Is-sejbiet tal-investigazzjoni juru li dan il-programm huwa kumpensabbli (il-premessi (310) — (314) hawn fuq). Il-Kummissjoni żżid li dan il-programm huwa sostitut b'mod ċar tal-programm ta' qabel li kien immirat lejn FIEs, minħabba n-nisġa mill-qrib murija mill-istess forma u ammont tal-benefiċċju tat-taxxa (tpaċija tat-taxxa addizzjonali deduċibbli mill-bażi taxxabbli), l-istess proporzjon u l-istess sitwazzjoni sottostanti (spejjeż eliġibli għal attivitajiet ta' R&Ż) bi ftit varjazzjonijiet biss. Dawn il-ftit varjazzjonijiet saru b'konformità mar-riforma tal-liġi l-ġdida dwar l-EIT fl-2008, iżda l-għamla u s-sustanza tal-programm baqgħu fundamentalment l-istess. Il-Kummissjoni tirreferi wkoll għall-argumenti fuq l-istandard ta' bidu stipulat fil-premessa (457).

(462)

Il-GTĊ u esportatur li kkoopera fil-kampjun jiddikjaraw ukoll li dan il-programm mhuwiex speċifiku għaliex il-Kummissjoni ma wrietx li l-kisba taċ-ċertifikat tal-HNTE hija limitata għal ċerti impriżi. Il-Kummissjoni tirreferi għall-ispjegazzjoni tagħha fil-premessa (313) hawn fuq u l-premessi (321) u (325) dwar programm ieħor tat-taxxa għall-HNTEs. Il-Kummissjoni żżid li r-regoli ta' implimentazzjoni għall-applikazzjoni ta' dan il-programm (ara l-premessa (321)) hawnhekk ikomplu jikkonfermaw is-sejba ta' speċifiċità ta' HNTEs peress li huma biss kumpaniji fis-setturi appoġġati minn politiki tal-gvern u eliġibbli skont il-Katalogi u l-Linji Gwida relevanti tal-Gvern li jistgħu jiksbu ċ-ċertifikat relevanti. Pereżempju, huma biss impriżi attivi fi proġett ta' R&Ż preskritt fl-Oqsma tat-Teknoloġija Avvanzata u Ġdida bl-Appoġġ Ewlieni tal-Istat u l-Linji gwida għal Prijoritajiet Kurrenti għall-Iżvilupp f'Setturi Importanti tal-Industrija tat-Teknoloġija Avvanzata tal-2007 mill-NDRC jew attivitajiet ta' R&Ż inklużi fl-ambitu tan-Notifika tal-Kunsill tal-Istat dwar l-Implimentazzjoni tal-Bosta Politiki ta' Appoġġ għat-Tfassil tal-Iżvilupp Xjentifiku u Teknoloġiku fit-Terminu Medju u fit-Tul tal-Istat (2006-2020), Nru 6 [2006] tal-Kunsill tal-Istat) li jistgħu jiksbu dan iċ-ċertifikat. Għaldaqstant, huwa ċar li dan il-programm ta' taxxa huwa limitat biss għal dawk il-kumpaniji speċifiċi fis-setturi relevanti u attivitajiet ta' R&Ż appoġġati mill-GTĊ, inklużi kumpaniji fis-settur PV imħeġġeġ.

(463)

Fir-rigward tal-kalkolu tal-ammont tas-sussidju, żewġ esportaturi li kkooperaw fil-kampjun jargumentaw li l-Kummissjoni użat b'mod żbaljat il-figuri fid-Dikjarazzjoni Annwali 2011 tagħha tat-Taxxa fuq l-Introjtu filwaqt li l-PI ikopri nofs l-2011 u nofs l-2012, u li dan imur kontra l-metodu ta' kalkolu fit-Taqsima E(a)(iii) tal-Linji Gwida tal-Kummissjoni għall-kalkolu tal-ammont ta' sussidju fl-investigazzjoni tad-dazju kumpensatorju tal-1998. Il-Kummissjoni tirreferi għall-argumenti kollha żviluppati fil-premessa (459) li bl-istess mod huma permanenti biex tiġi rifjutata din id-dikjarazzjoni għal dan il-programm. Barra minn hekk, il-Kummissjoni tosserva li l-argument dwar pożizzjoni ta' suppost telf tat-taxxa fis-sena fiskali 2012 għandha relevanza limitata jew mhijiex relevanti affattu, għaliex tnaqqis tat-taxxa jista' jiġi riportat b'ħames snin fiskali addizzjonali u jitpaċa bi kwalunkwe introjtu taxxabbli ddikjarat fil-ħames snin ta' wara. Għaldaqstant, anki li kieku l-Kummissjoni kellha taċċetta li dawn il-kumpaniji għamlu telf tat-taxxa fis-sena 2012 jew kieku d-dikjarazzjoni tat-taxxa 2012 finali awditjata kienet disponibbli u tkun turi telf tat-taxxa (li hawnhekk mhuwiex il-każ), xorta tieħu f'kunsiderazzjoni l-benefiċċji minn dan il-programm peress li ma jistax ikun eskluż li l-benefiċċji mit-tnaqqis tat-taxxa dovuti fl-2012 jintużaw malli l-kumpanija tirrapporta d-dħul taxxabbli f'xi waħda mill-ħames snin fiskali ta' wara.

(464)

Il-GTĊ u esportatur li kkoopera jargumentaw li dan il-programm mhuwiex speċifiku, li l-analiżi tal-ispeċifiċità mhijiex ibbażata fuq xi fatt, u li r-rekwiżiti biex jinkiseb status ta' HTNE għandhom jitqiesu bħala kriterji oġġettivi jew kundizzjonijiet li jirregolaw l-eliġibilità għas-sussidju u li l-eliġibilità għal dan il-programm hija awtomatika. Fir-rigward tas-sejba ta' speċifiċità dwar il-limitazzjoni ta' dan il-programm u tat-tpaċija tat-taxxa tar-R&Ż anki għall-HNTEs, il-Kummissjoni tirreferi għall-ispjegazzjoni tagħha fil-premessi (321) u (325), u anki għall-premessa (462) bl-istess mod applikabbli għal dan il-programm. Il-Kummissjoni ttenni li l-miżuri ta' implimentazzjoni u d-dokumenti elenkati hawn fuq b'mod partikolari juru li l-applikazzjoni ta' dan il-programm u r-rikonoxximent tal-istatus ta' HNTE, peress li mhumiex disponibbli għall-impriżi kollha u lanqas ma jibbażaw fuq kriterji oġġettivi, hija limitata biss għal ċerti setturi u impriżi mill-GTĊ fuq il-bażi ta' kriterji li ma jidhrux li huma oġġettivi jew newtrali. L-eliġibilità għall-benefiċċji f'dan il-programm lanqas ma hija awtomatika iżda tiddependi fuq l-għoti taċ-ċertifikat tal-HNTE, li jinħareġ wara proċedura diskrezzjonali mill-awtoritajiet kompetenti u għaldaqstant mhijiex awtomatika.

(465)

Esportatur li kkoopera jiddikjara li l-Kummissjoni kkalkolat ħażin il-benefiċċju tas-sussidju mill-programm għaliex użat id-dikjarazzjoni tat-taxxa awditjata tal-2011 filwaqt li d-dikjarazzjonijiet tat-taxxa trimestrali għall-ewwel u t-tieni trimestri tal-2012 kienu disponibbli u nġabru fil-verifika, u xorta waħda, il-Kummissjoni setgħet titlob kopja tad-dikjarazzjoni annwali finali tat-taxxa fuq id-dħul għall-2012 malli kienet tkun disponibbli. Dan l-esportatur jargumenta wkoll li jekk tintuża d-dikjarazzjoni tat-taxxa tal-2011 biex jiġi kkalkolat il-benefiċċju tas-sussidju, f'dak il-każ, għandu jintuża l-fatturat tal-kumpanija għall-2011 u mhux il-fatturat ta' matul l-PI. Il-Kummissjoni tirreferi għall-ispjegazzjoni fil-premessa (459) ta' hawn fuq. Il-Kummissjoni tinnota wkoll li fl-ittra tagħha ta' qabel il-verifika għall-esportaturi fil-kampjun, inkluż l-esportatur inkwistjoni, kienet talbet b'mod speċifiku d-dikjarazzjonijiet sħaħ tat-taxxa/redditu għas-snin fiskali li jkopru l-PI u t-tliet snin ta' qabel. Għalhekk, dan l-esportatur li kkoopera seta' u kellu jissottomessi r-redditu tal-2012 hekk kif ikun għad-dispożizzjoni tiegħu, il-Kummissjoni tinnota li għadu ma għamilx hekk lanqas meta bagħtet il-kummenti tagħha għad-dokument ta' divulgazzjoni. Fir-rigward tal-argument li l-Kummissjoni għandha tuża l-fatturat tal-2011 biex tikkalkola l-benefiċċju, hija tinnota li l-ammont tal-benefiċċju mir-redditu tat-taxxa għall-2011 huwa kkunsidrat bħala raġonevolment riflettiv tas-sitwazzjoni fil-PI, speċjalment peress li l-ħlas tat-taxxa għall-2011 kien dovut fil-PI (xahar) u d-data finali għall-2012 ma kinux disponibbli meta saret il-verifika. Fi kwalunkwe każ, il-Kummissjoni ma tistax tuża denominazzjonijiet differenti biex tkejjel sussidji differenti, inkella l-figuri perċentwali mhux se jkunu paragunabbli u ma tiġix iggarantita konsistenza fil-kalkolazzjoni. Il-Kummissjoni fl-aħħar iżżid li ma għandhiex ċifri vverifikati għall-fatturat tal-2011, iżda għandha biss ċifri ta' fatturat ivverifikati għall-PI.

(466)

Il-GTĊ iddikjarat li l-Kummissjoni ma stabbilixxietx l-ispeċifiċità skont l-Artikoli 2.1 u 2.2 tal-ASCM u ma ssustantjatx b'mod ċar id-determinazzjoni tagħha tal-ispeċifiċità abbażi tal-evidenza pożittiva, kif meħtieġ mill-Artikolu 2.4 tal-ASCM. Skont il-GTĊ, il-Kummissjoni ma pprovdietx xi evidenza fattwali dwar liema huma l-industriji partikolari li huma mogħtija drittijiet ta' użu tal-art b'rati preferenzjali u l-bażi ġuridika tal-valutazzjoni tagħha li l-industrija li tipproduċi ċ-ċelloli u l-moduli solari tifforma parti minn dawn l-industriji. Produttur esportatur minnhom għamel dikjarazzjoni simili. Dawn il-pretensjonijiet kellhom jiġu rifjutati. Il-Kummissjoni, fil-premessa (364) ta' hawn fuq iċċitat l-eżempji tan-notifiki tad-dritt ta' użu tal-art fejn l-awtoritajiet rilevanti llimitaw ix-xerrejja potenzjali għall-prezz stabbilit għall-industrija fotovoltajka u l-limiti tal-prezzijiet stabbiliti fuq id-dritt ta' użu tal-art mixtrija mill-produtturi esportaturi fil-kampjun. Fin-nuqqas ta' xi informazzjoni oħra mitluba mill-GTĊ u, fid-dawl tal-appoġġ tal-gvern lill-industrija PV, flimkien man-natura diskrezzjonali u mhux trasparenti tal-allokazzjoni tad-drittijiet tal-użu tal-art, il-Kummissjoni kkunsidrat li din l-informazzjoni tistabbilixxi l-eżistenza ta' speċifiċità.

(467)

Il-GTĊ u diversi produtturi esportaturi ddikjaraw li l-valur referenzjarju tad-dritt ta' użu tal-art magħżul mill-Kummissjoni mhuwiex xieraq. Il-GTĊ iddikjarat ukoll li Kummissjoni ma għamiltx dak kollu li setgħet biex tidentifika valur referenzjarju li japprossima l-kundizzjonijiet tas-suq li jipprevalu fin-nuqqas tad-distorsjoni kif meħtieġ mid-deċiżjoni tal-Bord tad-WTO fl-Istati Uniti — Dazji Kumpensatorji u Antidumping Definittivi dwar Ċerti Prodotti miċ-Ċina  (101). Din il-pretensjoni kellha tiġi rifjutata. Il-Kummissjoni tat daqqa t'għajn fid-dettall lejn id-diversi indikaturi u qabblet lit-Tajwan u r-RPĊ b'mod globali kif ukoll il-provinċji Ċiniżi individwali kkonċernati. Wara tali analiżi, il-Kummissjoni tikkunsidra t-Tajwan bħala valur referenzjarju xieraq minħabba t-totalità tal-informazzjoni fuq il-fajl jiġifieri (i) il-livell komparabbli tal-iżvilupp ekonomiku u l-istruttura ekonomika li tipprevali fit-Tajwan u l-maġġoranza l-kbira tal-provinċji u bliet Ċiniżi fejn huma stabbiliti l-prodotturi esportaturi li jikkooperaw, (ii) il-viċinanza fiżika taċ-Ċina u t-Tajwan, (iii) il-livell għoli ta' infrastruttura industrijali li għandhom it-Tajwan u dawn il-provinċji Ċiniżi, (iv) ir-rabtiet ekonomiċi b'saħħithom u l-kummerċ transfruntier bejn it-Tajwan u r-RPĊ, (v) id-densità għolja tal-popolazzjoni fil-provinċji Ċiniżi kkonċernati u fit-Tajwan, (vi) is-similarità bejn it-tip ta' art u t-tranżazzjonijiet użati għall-bini tal-valur referenzjarju rilevanti fit-Tajwan ma' dawk fir-RPĊ u (vii) il-karatteristiċi komuni demografiċi, lingwistiċi u kulturali kemm fit-Tajwan kif ukoll fir-RPĊ.

Barra minn hekk, ħafna mill-provinċji kkonċernati jitqiesu bħala l-aqwa provinċji fil-manifattura fir-RPĊ. Għalkemm il-PDG għal kull ras tat-Tajwan u ta' dawn il-provinċji u l-ibliet mhuwiex identiku, il-PDG ta' dawn il-provinċji u l-ibliet kiber b'mod rapidu fl-aħħar snin jiġifieri qiegħed ilaħħaq mat-Tajwan. Barra minn hekk, dejta riċenti tissuġġerixxi li kemm ir-RPĊ b'mod globali, kif ukoll il-provinċji u l-ibliet ikkonċernati għandhom PDG ħafna aktar għoli mit-Tajwan, jiġifieri qegħdin ilaħħqu b'mod rapidu ħafna. Madankollu, huwa importanti li jiġi nnotat li l-paragun eżatt li jsir bejn il-PDG ta' ekonomija mhux tas-suq (ir-RPĊ) u l-PDG ta' ekonomija tas-suq stabbilita sew (it-Tajwan) mhijiex fatt deċiżiv peress li huwa normali għal ekonomija mhux tas-suq li taqa' lura meta mqabbla ma' ekonomija tas-suq funzjonanti f'termini ta' PDG. Barra minn hekk, ħafna fatturi oħra, pereżempju r-regoli ta' ppjanar, il-politika ambjentali jistgħu jaffettwaw il-provvista u d-domanda għal art industrijali. Il-kwistjoni reali hija xi jkunu l-“kundizzjonijiet prevalenti fis-suq” fir-rigward tad-dritt ta' użu tal-art fil-provinċji Ċiniżi kkonċernati jekk kienet ekonomija tas-suq funzjonanti u fuq il-bażi tal-evidenza kollha, huwa konkluż li jkunu simili ħafna għal dawk tat-Tajwan.

(468)

L-ilmentatur iddikjara li l-Kummissjoni għandha tiddivulga skemi ta' sussidju addizzjonali li nstabu matul l-investigazzjoni u tistabbilixxi wkoll marġnijiet ta' sussidju għal skemi bħal dawn mhux imsemmija fl-ilment. F'dan ir-rigward, huwa nnotat li s-sussidji kollha li huma sodisfatti fir-rekwiżiti ġuridiċi għat-tnedija kienu investigati mill-Kummissjoni.

(469)

L-ilmentatur iddikjara li l-Kummissjoni kellha tistabbilixxi marġni ta' sussidju fir-rigward tal-provvista ta' polisiliċju għal remunerazzjoni anqas minn adegwata abbażi tal-informazzjoni fl-ilment u abbażi tas-sejbiet tal-US DOC f'każ PV simili. Il-Kummissjoni investigat dan il-programm u, abbażi tal-informazzjoni riċevuta mill-produtturi esportaturi fil-kampjun u l-GTĊ, ikkonkludiet li ma kien hemm ebda benefiċċju minn dan il-programm matul il-PI, prinċipalment peress li l-prezzijiet ta' importazzjoni tal-polisiliċju kienu aktar baxxi mill-prezzijiet imposti mill-fornituri Ċiniżi. Qiegħed jiġi nnotat li l-perjodu ta' investigazzjoni għall-każ tal-Istati Uniti u l-każ inkwistjoni kienu differenti.

(470)

L-ilmentatur iddikjara wkoll li l-Kummissjoni kien imissha stabbilixxiet marġni ta' sussidju fir-rigward tal-forniment tal-elettriku għal remunerazzjoni anqas minn adegwata. Din il-pretensjoni kellha tiġi rifjutata. Il-Kummissjoni ma sabitx evidenza suffiċjenti li produtturi esportaturi fil-kampjun, bl-eċċezzjoni tal-LDK, ibbenefikaw minn forniment preferenzjali ta' elettriku fil-PI.

(471)

Il-GTĊ iddikjara li l-metodoloġija ta' kalkolu tal-Kummissjoni rriżultat f'“għadd doppju fil-livell tal-kalkoli tal-marġini antidumping u antisussidji”. Skont il-GTĊ, il-Kummissjoni missha naqqset il-marġini ta' sussidju kkalkulat għall-programm ta' assigurazzjoni tal-kreditu għall-esportazzjoni mill-marġini ta' dumping fuq il-bażi li huwa sussidju ta' esportazzjoni. Il-GTĊ iddikjara wkoll li l-Kummissjoni missha naqqset mill-marġini ta' dumping il-marġini ta' sussidju kkalkolati fuq il-bażi tal-limiti 'l barra mill-pajiż. Huwa rraġuna li “parti mid-dumping ikkalkolat fuq il-bażi ta' valur normali ta' pajjiż analogu hija attwalment l-istess sussidju li ġie kkumpensat fl-investigazzjoni parallela antisussidji”. L-ebda pretensjoni minn dawn ma jkollha impatt fuq il-livell tal-miżuri li jirriżultaw billi fil-każ preżenti d-dazji kkombinati huma limitati mill-marġini ta' dannu. Il-GTĊ kkonferma dan ukoll fil-kummenti għad-dokument ta' divulgazzjoni definittiva. Għaldaqstant ma tqiesx neċessarju li tiġi indirizzata s-sustanza ta' dawn il-pretensjonijiet.

(472)

L-ammonti ta' sussidji kumpensabbli skont id-dispożizzjonijiet tar-Regolament bażiku, mogħtija ad valorem, għall-kumpaniji investigati huma stipulati fit-tabella ta' hawn taħt:

(473)

B'konformità mal-Artikolu 15(3) tar-Regolament bażiku, il-marġni tas-sussidju totali għall-kumpaniji li kkooperaw mhux inklużi fil-kampjun huwa kkalkolat fuq il-bażi tal-marġni totali medju ponderat tas-sussidju stabbilit għall-kumpaniji li kkooperaw fil-kampjun, jiġifieri 6,4 %.

(474)

Minħabba l-livell għoli ta' kooperazzjoni tal-produtturi esportaturi Ċiniżi, id-dazju tal-“kumpaniji l-oħrajn kollha” kien stabbilit għal-livell tal-ogħla dazju impost fuq il-kumpaniji, rispettivament, fil-kampjun jew li kkooperaw fl-investigazzjoni. Id-dazju tal-“kumpaniji l-oħrajn kollha” se jkun applikat għal dawk il-kumpaniji li ma kkooperawx fl-investigazzjoni.

(475)

Il-prodott simili kien manifatturat minn madwar 215-il produttur fl-Unjoni. Dawn jikkostitwixxu l-industrija tal-Unjoni skont it-tifsira tal-Artikolu 9(1) tar-Regolament bażiku u minn hawn 'il quddiem se jissejħu “l-industrija tal-Unjoni”. L-Istituzzjonijiet ivverifikaw id-dikjarazzjonijiet mill-partijiet interessati li kien kemm numru akbar; din il-verifika żvelat li l-allegati produtturi addizzjonali fir-realtà kienu fil-biċċa l-kbira tagħhom produtturi esportaturi, importaturi relatati ma' dawn, distributuri u installaturi.

(476)

L-informazzjoni kollha għad-dispożizzjoni dwar l-industrija tal-Unjoni, inkluża informazzjoni pprovduta fl-ilment, dejta makroekonomika pprovduta minn Europressedienst, ditta indipendenti ta' konsulenza (“il-konsulent”) u t-tweġibiet verifikati għall-kwestjonarju tal-produtturi tal-Unjoni fil-kampjun intużaw biex tiġi stabbilita l-produzzjoni totali tal-Unjoni fil-PI peress li ma kienx hemm disponibbli informazzjoni pubblika dwar il-produzzjoni. Peress li l-moduli u ċ-ċelloli huma importati fl-Unjoni taħt intestaturi doganali li jkopru prodotti oħrajn mhux koperti għal din l-investigazzjoni u l-volumi tal-importazzjonijiet irrapportati huma f'tunnellati, ma setax jintuża l-Eurostat biex jiġu ddeterminati l-volumi u l-valuri tal-importazzjoni, li ssawru fuq id-dejta pprovduta mill-konsulent. Meta dan kien possibbli, id-dejta riċevuta mill-konsulent ġiet kontroverifikata ma' sorsi pubbliċi disponibbli oħrajn u mat-tweġibiet verifikati għall-kwestjonarju.

(477)

Fuq din il-bażi, il-produzzjoni totali tal-Unjoni ġiet stmata għal madwar 4 GW għall-moduli u 2 GW għaċ-ċelloli matul il-PI.

(478)

Kif indikat fil-premessa (21) hawn fuq, intgħażlu disa' produtturi tal-Unjoni fil-kampjun li rrappreżentaw 18 % — 21 % tal-produzzjoni sħiħa tal-Unjoni ta' moduli u 17 % — 24 % tal-produzzjoni sħiħa tal-Unjoni ta' ċelloli.

(479)

Bosta partijiet ikkontestaw il-fatt li d-dejta pprovduta mill-konsulent intużat biex jiġu determinati, fost l-oħrajn, il-produzzjoni tal-Unjoni, il-kapaċità ta' produzzjoni tal-Unjoni kif ukoll indikaturi oħrajn tad-dannu makroekonomiku dwar l-industrija tal-Unjoni u d-dejta tal-importazzjonijiet. Dawn il-partijiet xeħtu dubju fuq l-indipendenza tal-konsulent billi allegaw li kienet marbuta mal-ilmentatur. Talbu wkoll kjarifiki fuq liema bażi ntgħażel il-konsulent mill-Kummissjoni u xeħtu dubju fuq il-kompetenza tiegħu fil-ġbir ta' dejta ekonomika relatata mas-settur PV. F'dan ir-rigward, kien iddikjarat li l-Kummissjoni missha bbażat is-sejbiet tagħha fuq dejta minn sorsi oħrajn għad-dispożizzjoni, b'mod partikolari istituti ta' riċerka magħrufa. Fl-aħħar nett, l-AFASE għamlet referenza għall-Aħjar Prattiki għas-sottomissjoni ta' evidenza ekonomika u ġbir ta' dejta f'każijiet li jikkonċernaw l-applikazzjoni tal-Artikoli 101 u 102 tat-Trattat dwar il-Funzjonament tal-Unjoni Ewropea (TFUE) u f'każijiet ta' fużjoni biex tikkontesta l-kredibbiltà tad-dejta sottomessa mill-konsulent.

(480)

Fir-rigward tar-rabtiet allegati bejn il-konsulent u l-ilmentatur, l-artijiet interessati rilevanti ma ssottomettew l-ebda evidenza li turi li jeżistu t-tali rabtiet. Bl-istess mod, l-investigazzjoni ma xeħtitx dawl fuq xi evidenza ta' relazzjoni li tmur lil hinn minn karattru purament kummerċjali. Wara divulgazzjoni finali, parti interessata minnhom iddikjarat li kien hemm indikazzjonjiet li l-evidenza prima facie pprovduta mill-industrija tal-Unjoni fl-ilment kienet ibbażata fuq dejta pprovduta mill-istess konsulent. Anki jekk huwa rikonoxxut li s-sejbiet għal xi indikaturi kienu simili għall-evidenza pprovduta fl-ilment, dan mhux bilfors ifisser li ġew stabbiliti fuq il-bażi ta' sors wieħed biss. F'dan ir-rigward, l-ilment jipprovdi d-diversi sorsi użati. Għaldaqstant, id-dikjarazzjonijiet f'dan ir-rigward kellhom jiġu rifjutati.

(481)

Il-Kummissjoni qieset li huwa xieraq li jsir użu minn din il-konsulenza f'din l-investigazzjoni, minħabba n-nuqqas ta' disponibbiltà minn sorsi pubblikament disponibbli oħrajn tad-dejta makroekonomika neċessarja li tkopri s-suq totali tal-Unjoni kif ukoll dejta tal-importazzjonijiet. Qabel ma għażlet lil Europressedienst il-Kummissjoni vvalutat il-metodoloġija użata mill-konsulent għall-ġbir tad-dejta rilevanti kif ukoll il-ħila tal-konsulent biex jipprovdi d-dejta neċessarja għat-tipi kollha tal-prodott u għall-perjodu sħiħ ikkunsidrat.

(482)

Barra minn hekk, matul l-investigazzjoni, id-dejta pprovduta mill-konsulent kienet kontroverifikata fejn dan kien possibbli ma' sorsi oħrajn disponibbli u kienet ikkonfermata. F'dan ir-rigward, huwa osservat li jeżistu bosta kumpaniji ta' riċerka speċjalizzati fil-ġbir ta' statistiki tad-dejta fis-suq u l-figuri rrapportati kważi qatt ma huma l-istess. Dan huwa dovut għall-fatt li diffiċli jinħarġu figuri preċiżi għal kwalunkwe istitut ta' riċerka u għaldaqstant, l-indikaturi rrapportati tas-suq PV dejjem se jkunu msawra fuq stimi, indipendenti mill-fornitur tat-tali figura. F'dan il-kuntest, l-eżerċizzju ta' kontroverifika mwettaq mill-Kummissjoni kkonsista fit-tqabbil tax-xejriet tad-dejta riċevuta mill-konsulent max-xejriet tal-istess dejta ppubblikata minn kumpaniji oħrajn ta' riċerka, iċ-Ċentru Konġunt tar-Riċerka (“JRC”) tal-Kummissjoni u l-EPIA fuq l-istess suġġett, meta kienet disponibbli. Ma ġiet osservata l-ebda differenza importanti bħala riżultat tal-eżerċizzju ta' kontroverifika u x-xejriet tal-indikaturi li għalihom saret il-kontroverifika kienu simili. Għaldaqstant, is-sejbiet antidumping provviżorji ma kinux ibbażati biss fuq dejta pprovduta mill-konsulent iżda anki wara analiżi u valutazzjoni ta' din id-dejta mill-Kummissjoni stess. Barra minn hekk, kif intqal hawn fuq fil-premessa (8), wara l-impożizzjoni ta' miżuri antidumping provviżorji saret żjara ta' verifika fil-bini tal-konsulent. Il-Kummissjoni wettqet verifika fuq il-post fil-bini tal-konsulent biex tivverifika l-kredibbiltà tal-metodoloġija u d-dejta fornita. Il-verifika fuq il-post twettqet bħala segwitu għall-kontroverifika tad-dejta mill-Kummissjoni u sabiex tinkiseb garanzija dwar l-kredibbiltà u l-kwalità tad-dejta u l-metodoloġija relatata. Il-verifika fuq il-post tqieset xierqa fl-applikazzjoni tal-prinċipju ta' amministrazzjoni tajba, anki jekk dik id-dejta ma kinitx ipprovduta minn parti interessata iżda minn konsulent. Bis-saħħa ta' dan, il-Kummissjoni kompliet isserraħ rasha dwar l-kredibbiltà tad-dejta pprovduta mill-konsulent.

(483)

Parti minnhom iddikjarat li l-metodoloġija tal-kontroverifika użata mill-Kummissjoni ma ġietx spjegata f'dettall suffiċjenti u talbet li s-sorsi l-oħrajn użati għall-kontroverifika għandhom jiġu ddivulgati. Din il-parti argumentat ulterjorment li l-metodoloġija użata kienet fi kwalunkwe każ invalida peress li tqabblu biss xejriet ta' diversi sorsi u mhux valuri assoluti.

(484)

Sa fejn huma kkonċernati s-sorsi l-oħrajn użati biex tiġi kontroverifikata d-dejta pprovduta mill-konsulent, dawn kienu rapporti ppubblikati mill-JRC u mill-EPIA dwar l-istess suġġetti. Fir-rigward tal-paragun tad-dejta ma' sorsi oħrajn, huwa nnotat li dawn ma urewx biss xejriet simili iżda anki daqsijiet simili. Għalhekk, kien konkluż li l-metodoloġija użata kienet xierqa u d-dikjarazzjonijiet f'dan ir-rigward kienu rifjutati.

(485)

L-attività ewlenija tal-konsulent hija li jiġbor id-dejta relatata mas-settur PV u jiżviluppa bażi tad-dejta aġġornata ta' kumpaniji attivi fis-suq PV. Din id-dejta hija ppubblikata f'rivisti speċjalizzati fotovoltajċi u anke użati minn kumpaniji individwali li twettaq riċerka speċjalizzata għalihom. Il-bażi tad-dejta żviluppata minn Europressedienst hija aġġornata u ppubblikata mill-ġdid b'mod regolari. Barra minn hekk, il-konsulent għandu bosta snin esperjenza fis-settur. B'mod iktar preċiż, il-metodoloġija tal-konsulent hija li jiġbor, jagħmel kontroverifika u jagglomera informazzjoni billi juża bosta sorsi disponibbli fis-suq. Għal dan l-għan, huwa jiġbor id-dejta permezz ta' kwestjonarji standard mibgħuta lill-kumpaniji elenkati fil-bażi tad-dejta jew bit-telefown, speċjalment mill-produtturi tal-Unjoni, jew matul il-fieri speċjalizzati, l-iktar minn produtturi f'pajjiżi terzi. Meta l-informazzjoni ma tkunx tista' tinkiseb permezz tal-mezzi li għadhom kif issemmew, Europressedienst tivverifika r-rapporti finanzjarji tal-kumpaniji fis-settur fotovoltajku jew tikkoopera minn jeddha ma' istituti ta' riċerka oħrajn bil-għan li tikseb jew tagħmel kontroverifika tad-dejta. Ġie verifikat li dawn is-sorsi ntużaw mill-konsulent fl-attività ta' kuljum tiegħu. Fid-dawl ta' dan li ntqal hawn fuq, jitqies xieraq li jintużaw is-servizzi ta' Europressedienst f'din l-investigazzjoni u għalhekk, id-dikjarazzjonijiet tal-partijiet f'dan ir-rigward ġew rifjutati.

(486)

Fir-rigward tal-Aħjar Prattiki għas-sottomissjoni tal-evidenza ekonomika maħruġa mis-servizz kompetenti tal-Kummissjoni (“l-Aħjar Prattiċi”), għandhom isiru l-kummenti li ġejjin. L-ewwel nett, huwa dokument li ma jistax jimpenja l-Kummissjoni peress li ma ġiex adottat mill-Kulleġġ, iżda ġie pubblikat mis-servizz kompetenti bil-għan li jiġu pprovduti rakkomandazzjonijiet lill-partijiet dwar kif għandha tiġi ppreżentata l-evidenza ekonomika. It-tieni nett, l-Aħjar Prattiki għandhom x'jaqsmu mas-sottomissjoni tal-analiżi u d-dejta ekonomika użata f'xi investigazzjonijiet tal-kompetizzjoni skont l-Artikolu 101 u 102 tat-TFUE u f'każijiet ta' fużjoni. Ir-regoli applikabbli, l-istandards ta' prova u s-setgħat ta' investigazzjoni tal-Kummisjoni f'dawk il-każijiet ta' kompetizzjoni ma jistgħux jitqabblu mal-investigazzjonijiet ta' difiża kummerċjali, li għalihom japplika sett sħiħ ta' regoli differenti.

(487)

Bosta partijiet ikkontestaw il-metodoloġija użata mill-konsulent billi ddikjaraw li ma kinitx se tilħaq standards xjentifiċi rikonoxxuti. Madankollu, kif intqal hawn fuq fil-premessa (481) ta' hawn fuq, il-metodoloġija ġiet ivvalutata u d-dejta li rriżultat ġiet kontroverifikata u verifikata u bħala riżultat, tqieset li hija konformi ma' dejta pubblikata oħra u għalhekk raġonevolment kredibbli. Punti speċifiċi mqajma minn ċerti partijiet interessati, ġew iċċarati b'mod bilaterali u tqiegħdu għad-dispożizzjoni fil-fajl miftuħ tal-investigazzjoni għal spezzjoni mill-partijiet interessati.

(488)

Is-CCCME argumentat li l-metodoloġija tal-aggregazzjoni tad-dejta ma kinitx iċċarata. Din id-dikjarazzjoni ġiet rifjutata peress li l-informazzjoni rilevanti tqiegħdet għad-dispożizzjoni tal-partijiet interessati kollha fil-fajl miftuħ għal spezzjoni mill-partijiet interessati.

(489)

Wara divulgazzjoni finali, diversi partijiet tennew it-tħassib tagħhom dwar l-għażla tal-konsulent mill-Kummissjoni u dwar il-kwalità tad-dejta fornuta. F'dan ir-rigward, ġie ddikjarat li d-dejta tal-konsulent tista' tiġi ordnata u mixtrija fuq bażi ad hoc biex tissodisfa t-talbiet speċifikament identifikati ta' klijenti potenzjali u għalhekk jaf ma tkunx oġġettiva. Barra minn hekk, is-CCCME kkuntestat li d-dejta miġbura mill-konsulent tista' tiġi kkunsidrata bħala evidenza pożittiva skont it-tifsira tal-Artikolu 3(2) tar-Regolament bażiku peress li d-dejta kienet sa ċertu punt ibbażata fuq suppożizzjonijiet u stimi. Minbarra dan, ġie ddikjarat ukoll li d-dejta fornuta ma kinitx sostnuta b'mod suffiċjenti mill-evidenza fil-fajl u li ma kinitx ta' karattru affermattiv, oġġettiv u verifikabbli.

(490)

Fir-rigward ta' dawn id-dikjarazzjonijiet, saret referenza għall-premessi (481) — (482) ta' hawn fuq, fejn ġiet ipprovduta informazzjoni addizzjonali dwar l-għażla tal-konsulent. Barra minn hekk, huwa nnotat li l-Kummissjoni qabbdet lill-konsulent fuq il-bażi tal-aqwa informazzjoni disponibbli dak iż-żmien u f'konformità sħiħa mar-Regolament Finanzjarju tal-Kummissjoni applikabbli għall-proċedura. Minbarra dan, qiegħed jiġi mfakkar li l-ħila tal-konsulent li jipprovdi d-dejta kollha meħtieġa fil-ħin opportun kienet ta' importanza kbira peress li l-Kummissjoni kienet marbuta ma' skadenzi statutorji għall-pubblikazzjoni tas-sejbiet provviżorji fl-investigazzjoni li għadha għaddejja.

(491)

Fir-rigward tal-kwalità tad-dejta fornuta u jekk tistax tiġi kkunsidrata bħala evidenza pożittiva skont l-Artikolu 3(2) tar-Regolament bażiku, kif intqal hawn fuq fil-premessa (482), il-metodoloġija tal-konsulent għall-ġbir tad-dejta ġiet eżaminata u vvalutata li kienet ta' kwalità sodisfaċenti. Barra minn hekk, kif intqal ukoll hawn fuq fl-istess premessa, id-dejta fornuta mill-konsulent kienet kontroverifikata meta kien possibbli ma' sorsi oħrajn u nstabet li hija raġonevolment preċiża. Fl-aħħar nett, huwa nnotat li l-konsulent għandu bażi tad-dejta waħda li tiġi aġġornata fuq bażi regolari, indipendentement mill-ħtiġijiet u t-talbiet tal-klijenti. L-istess bażi tad-dejta tintuża biex taggrega u twassal statistiki PV lil diversi klijenti, u għalhekk l-allegazzjoni li d-dejta ma kinitx oġġettiva hija rifjutata.

(492)

Wara d-divulgazzjoni final, parti interessata saħqet li l-Kummissjoni ma kinitx iddivulgat is-sorsi, il-metodoloġija użata u l-kumpaniji li magħhom ikkoopera l-konsulent biex jikkumpila d-dejta makroekonomika fornuta. Parti interessata oħra tenniet li l-metodoloġija applikata mill-konsulent tindika riżultati ħżiena. Bosta partijiet interessati talbu għal aktar informazzjoni dwar il-metodoloġija użata mill-konsulent bħar-rati medji ta' tweġibiet għall-kwestjonarji/intervisti, il-perċentwal tad-dejta miġbura minn kull mezz, kif ġiet ivverifikata, l-approssimazzjonijiet/assunzjonijiet użati biex tiġi ġġenerata d-dejta, in-numru ta' kumpaniji li għalihom saru approssimazzjonijiet, u tal-inqas firxa ta' għadd ta' impjegati tal-konsulent.

(493)

Fir-rigward ta' dawn id-dikjarazzjonijiet, huwa nnotat li sussegwentement għall-impożizzjoni tal-miżuri provviżorji, il-Kummissjoni pprovdiet lill-partijiet interessati bil-metodoloġija u bis-sorsi użati mill-konsulent fl-aggregazzjoni tad-dejta u indirizzat mistoqsijiet speċifiċi tal-partijiet interessati f'dan ir-rigward wara d-divulgazzjoni antidumping provviżorju. It-talbiet addizzjonali għal informazzjoni tal-partijiet interessati kkonċernati wara divulgazzjoni finali huma kkunsidrati bħala koperti mill-informazzjoni li tqiegħdet għad-dispożizzjoni wara l-impożizzjoni tad-dazji provviżorji sal-punt li ppermettew il-limitazzjonijiet ta' kunfidenzjalità. Barra minn hekk, hija enfasizzat li l-Kummissjoni vverifikat fuq il-post, il-mod li bih inġabret u ġiet aggregata d-dejta mill-konsulent u s-suppożizzjonijiet sottostanti rilevanti għall-aggregazzjoni tad-dejta. Ir-riżultati tal-verifika kienu sodisfaċenti u l-Kummissjoni kienet assigurata bir-raġonevolezza tas-suppożizzjonijiet sottostanti u l-kwalità tad-dejta pprovduta mill-konsulent. Barra minn hekk, il-partijiet ma kkontestawx id-dejta bħala tali.

(494)

Wara d-divulgazzjoni finali, parti oħra talbet għal kjarifiki fir-rigward tan-numru ta' produtturi tal-Unjoni kkunsidrati mill-konsulent fil-ġbir tad-dejta u l-koinċidenza bejniethom u l-madwar 215-il produttur tal-Unjoni magħrufa mill-Kummissjoni. F'dan ir-rigward, qiegħed jiġi ċċarat li l-prodotturi tal-Unjoni kkunsidrati mill-konsulent huma fil-biċċa l-kbira l-istess bħal dawk li huma magħrufa li jirrappreżentaw l-industrija tal-Unjoni fl-investigazzjoni msemmija fil-premessa (475) ta' hawn fuq.

(495)

Wara d-divulgazzjoni finali, parti minnhom iddikjarat li l-Kummissjoni wettqet l-analiżi tad-dannu b'mod mhux konsistenti peress li saret b'mod separat għall-moduli u ċ-ċelloli filwaqt li l-kalkoli ta' marġini ta' dannu u sussidju ġew stabbiliti bħala medja ponderata għall-moduli u ċ-ċelloli flimkien. F'dan ir-rigward, huwa nnotat li filwaqt li l-indikaturi kienu ntwerew b'mod separat għal kull tip ta' prodott, il-konklużjonijiet milħuqa għal kull indikatur jirreferu għall-prodott li qiegħed jiġi investigat kollu kemm hu. Qiegħed jiġi mfakkar ukoll li l-moduli u ċ-ċelloli huma prodott uniku wieħed u għalhekk il-marġnijiet ta' sussidju u l-livell ta' eliminazzjoni tad-dannu ġew stabbiliti fuq din il-bażi. Għaldaqstant, din il-pretensjoni ġiet rifjutata.

(496)

Fl-aħħar nett, parti oħra ddikjarat li l-konklużjoni tal-valuri tal-indikaturi makroekonomiċi matul il-PI kienet ibbażata b'mod żbaljat fuq medja sempliċi tas-snin 2011 u 2012, bħala tali l-metodoloġija ma tkunx oġġettiva u ma twassalx għal riżultati li jirriflettu r-realtà matul il-PI. Qiegħed jiġi ċċarat li medja sempliċi tad-dejta ntużat biss f'każ fejn kien hemm xejriet simili fil-perjodi kkonċernati. F'każ li x-xejriet kienu differenti, il-metodoloġija ġiet adattata kif xieraq billi ngħata kas tar-realtà tas-suq. Il-parti kkonċernata ma żviluppatx sa liema punt ir-riżultati tal-metodoloġija użata kienu jirriflettu r-realtà tas-suq. Għaldaqstant, dawn id-dikjarazzjonijiet huma rifjutati.

(497)

Parti mill-industrija tal-Unjoni hija integrata vertikalment u sehem sostanzjali mill-produzzjoni tal-industrija tal-Unjoni kien allokat għal użu ristrett, b'mod partikolari għall-produzzjoni ta' ċelloli.

(498)

Sabiex jiġi stabbilit jekk l-industrija tal-Unjoni ġarrbitx dannu materjali u sabiex jiġu ddeterminati l-indikaturi tal-konsum u oħrajn ekonomiċi, ġie analizzat jekk u kemm l-użu sussegwenti tal-produzzjoni tal-industrija tal-Unjoni tal-prodott simili (użu “ristrett”) kellu jittieħed inkunsiderazzjoni.