26.3.2013   

MT

Il-Ġurnal Uffiċjali tal-Unjoni Ewropea

L 86/22

(1)

Fit-3 ta’ Ottubru 2012, Magyar Posta Zrt. ippreżentat talba lill-Kummissjoni skont l-Artikolu 30(5) tad-Direttiva 2004/17/KE bil-posta elettronika. Il-Kummissjoni infurmat lill-awtoritajiet Ungeriżi b’dan permezz ta’ ittra mibghuta fid-19 ta’ Ottubru 2012, f’konformità mal-ewwel sottoparagrafu tal-Artikolu 30(5). Il-Kummissjoni talbet aktar informazzjoni mingħand l-awtoritajiet Ungeriżi permezz ta’ ittra elettronika mibgħuta fit-22 ta’ Novembru 2012, mingħand l-Awtorità Regolatorja nazzjonali rilevanti (2) permezz ta’ ittra elettronika mibgħuta fis-7 ta’ Jannar 2013, u mingħand l-applikant permezz ta’ ittri elettroniċi mibgħutin fit-12 ta’ Novembru 2012 u s-7 ta’ Jannar 2013. L-informazzjoni addizzjonali ntbagħtet mill-awtoritajiet Ungeriżi f’ittra elettronika mibgħuta fit-13 ta’ Jannar 2013, mill-Awtorità Regolatorja fil-21 ta’ Jannar 2013 u mill-applikant fl-20 ta’ Novembru 2012 u fil-15 ta’ Jannar 2013 rispettivament.

(2)

It-talba li tressqet minn Magyar Posta tikkonċerna ċerti servizzi postali, kif ukoll ċerti servizzi li mhumiex postali u li jingħataw minn Magyar Posta fit-territorju tal-Ungerija. Is-servizzi kkonċernati huma deskritti fit-talba kif ġej:

(3)

Magyar Posta tipprovdi s-servizzi ta’ hawn fuq, bl-eċċezzjoni tal-loġistika tal-kuntratti u, sa ċertu punt, is-servizzi domestiċi tal-palits, fl-hekk imsejjaħ settur tal-Kurjer, Express u l-Pakketti (CEP) tal-Ungerija. Is-settur tas-CEP huwa parti mis-suq tat-trasport tal-merkanzija u s-suq postali, li jipprovdi servizzi b’garanzija ta’ żmien, fejn il-fornitur tas-servizz jieħu l-obbligu mal-ispeditur li jikkunsinna l-oġġett f’perjodu speċifikat jew fi żmien speċifiku.

(4)

L-Artikolu 30 tad-Direttiva 2004/17/KE jistipula li l-kuntratti maħsuba biex jippermettu t-twettiq ta’ waħda mill-attivitajiet li għalihom tapplika d-Direttiva 2004/17/KE, ma għandhomx ikunu soġġetti għal din id-Direttiva jekk, fl-Istat Membru fejn titwettaq, l-attività hija direttament esposta għall-kompetizzjoni fi swieq li l-aċċess għalihom mhuwiex ristrett. L-esponiment dirett għall-kompetizzjoni jiġi vvalutat abbażi ta’ kriterji oġġettivi, b’kunsiderazzjoni tal-karatteristiċi speċifiċi tas-settur ikkonċernat. L-aċċess jitqies li mhuwiex ristrett jekk l-Istat Membru jkun implimenta u applika l-leġiżlazzjoni rilevanti tal-UE li tiftaħ settur partikulari jew parti minnu. Din il-leġiżlazzjoni hija elenkata fl-Anness XI tad-Direttiva 2004/17/KE, li għas-settur postali, tirreferi għad-Direttiva 97/67/KE.

(5)

L-applikazzjoni tikkonċerna servizzi postali bħas-servizzi domestiċi ta’ pakketti standard tal-konsumatur, servizzi domestiċi ta’ pakketti standard tan-negozji, servizzi domestiċi express tal-pakketti, servizzi domestiċi ta’ kurjer tal-pakketti u anki servizzi oħra li mhumiex servizzi postali, jiġifieri dawk is-servizzi msejħa servizzi domestiċi ta’ palits u ta’ loġistika kuntrattwali.

(6)

L-Ungerija implimentat u applikat id-Direttiva 97/67/KE kif ġiet emendata bid-Direttiva 2002/39/KE u d-Direttiva 2008/6/KE, bl-użu tal-possibbiltà skont l-Artikolu 3(1) tad-Direttiva tal-aħħar li tirriżerva ċerti oġġetti ta’ korrispondenza (3) sal-31 ta’ Diċembru 2012 għall-fornitur tas-servizzi universali magħżul, Magyar Posta (4). L-ebda wieħed mis-servizzi kkonċernati mit-talba preżenti ma kienu rriżervati fil-ħin tat-talba. Minħabba li l-Ungerija laħqet il-livell tal-ftuħ tas-suq previst fil-leġiżlazzjoni elenkata fl-Anness XI għad-Direttiva 2004/17/KE, l-aċċess għas-suq għandu jitqies li ma għandux jiġi limitat skont l-ewwel subparagrafu tal-Artikolu 30(3) tad-Direttiva aktar reċenti. L-esponiment dirett għall-kompetizzjoni f’suq partikolari għandu jiġi vvalutat abbażi ta’ diversi kriterji, li ebda wieħed minnhom mhu deċiżiv per se.

(7)

Fir-rigward tas-swieq milqutin minn din id-deċiżjoni, is-sehem tas-suq tal-atturi ewlenin f’xi suq partikolari jikkostitwixxi kriterju wieħed li għandu jitqies. Il-livell ta’ konċentrazzjoni f’dawn is-swieq huwa kriterju ieħor. Billi l-kundizzjonijiet ivarjaw għall-attivitajiet differenti li huma milqutin minn din id-Deċiżjoni, l-eżami tas-sitwazzjoni kompetittiva għandu jikkunsidra s-sitwazzjonijiet differenti fi swieq differenti.

(8)

Din id-Deċiżjoni hija mingħajr ħsara għall-applikazzjoni tar-regoli dwar il-kompetizzjoni. B’mod partikolari, il-kriterji u l-metodoloġija użati biex jiġi vvalutat l-esponiment dirett għall-kompetizzjoni skont l-Artikolu 30 tad-Direttiva 2004/17/KE mhumiex neċessarjament identiċi għal dawk użati biex titwettaq valutazzjoni skont l-Artikolu 101 jew 102 tat-TFUE jew ir-Regolament tal-Kunsill (KE) Nru 139/2004 tal-20 ta’ Jannar 2004 dwar il-kontroll ta’ konċentrazzjonijiet bejn impriżi (ir-Regolament dwar l-Għaqdiet) (5).

(9)

Il-Kummissjoni sostniet f’deċiżjonijiet preċedenti meħudin abbażi tar-Regolament dwar l-Għaqdiet (6), li s-suq għas-servizzi ta’ kunsinna ta’ pakketti jista’ jinqasam kif ġej:

(10)

L-applikant huwa tal-fehma li s-swieq tal-prodotti rilevanti għas-servizzi tal-kunsinna tal-pakketti huma dawk elenkati fil-premessa 2 hawn fuq. B’mod ġenerali, dan l-approċċ huwa konsistenti mal-prattika preċedenti tal-Kummissjoni. Madankollu, l-applikant ivvaluta s-suq domestiku B2X b’mod ġenerali (jiġifieri mingħajr ma għamel distinzjoni bejn it-taqsimiet B2B u B2C) li jista’ jkun li mhux konsistenti għalkollox mal-prattika preċedenti tal-Kummissjoni (9).

(11)

L-applikant jargumenta li Magyar Post ma tagħmilx distizjoni bejn is-servizzi B2B u dawk B2C fir-rigward ta’ prezzijiet disponibbli, u lanqas ma tiddistingwi bejn is-servizzi abbażi tal-gruppi ta’ destinatarji indirizzati. Dan l-argument jinġieb ukoll mill-Awtoritajiet Ungeriżi (10), li jenfasizzaw ukoll li skont l-informazzjoni disponibbli fil-websajt tal-kompetituri ewlenin ta’ Magyar Post, fir-rigward tal-pakketti tal-posta standard B2X, ma ssirx dinstinzjoni fir-rigward tal-prezzijiet ippubblikati, dwar jekk ir-riċevituri tal-pakketti jkunux konsumaturi jew negozji.

(12)

Id-Deċiżjonijiet preċedenti (11) skont l-Artikolu 30 tad-Direttiva 2004/17/KE, rigward il-pakketti tal-posta għamlu distinzjoni bejn il-pakketti tal-posta standard B2B u dawk B2C. Madankollu, fil-każijiet kollha r-riżultat tal-valutazzjoni għaż-żewġt iswieq kien l-istess, li jista’ jidher bħala indikazzjoni tal-fatt li d-definizzjoni tas-suq tal-prodotti setgħet tħalliet miftuħa.

(13)

Barra minn hekk, mill-informazzjoni mogħtija mill-Awtorità Regolatorja Nazzjonali (12) jidher li fiż-żewġ xenarji (jekk jitqiesu żewġt iswieq separati għall-pakketti tal-posta standard B2B u B2C, jew suq wieħed biss għall-pakketti tal-posta standard B2X) ir-riżultat tal-valutazzjoni tas-sitwazzjoni kompetittiva jkun l-istess.

(14)

Abbażi tal-informazzjoni fil-premessi 9 sa 13, għall-finijiet tal-valutazzjoni skont din id-Deċiżjoni u mingħajr ħsara għal-liġi tal-kompetizzjoni, jista’ jitqies li s-suq tal-prodotti rilevanti huwa B2X, filwaqt li d-definizzjoni preċiża tas-suq rilevanti tista’ titħalla miftuħa billi r-riżultat tal-analiżi jibqa’ l-istess, sew jekk din tkun ibbażata fuq definizzjoni ristretta u sew jekk tkun ibbażata fuq waħda usa’.

(15)

Id-Deċiżjonijiet tal-Kummissjoni preċedenti skont l-Artikolu 30 tad-Direttiva 2004/17/KE (13) kkunsidraw s-servizzi express u ta’ kurjer tal-pakketti bħala prodott wieħed. L-applikant jassumi li s-servizzi express u dawk ta’ kurjer tal-pakketti jagħmlu parti minn swieq differenti. Biex issir valutazzjoni skont din id-Deċiżjoni u mingħajr ħsara għal-liġi tal-kompetizzjoni, jista’ jitqies li s-swieq tal-prodotti rilevanti huma s-servizzi express tal-pakketti u s-servizzi ta’ kurjer tal-pakketti, filwaqt li d-definizzjoni preċiża tas-suq rilevanti tista’ titħalla miftuħa billi r-riżultat tal-analiżi jibqa’ l-istess, sew jekk din tkun ibbażata fuq definizzjoni ristretta u sew jekk tkun ibbażata fuq waħda usa’.

(16)

Is-servizzi domestiċi ta’ palits huma parti mill-hekk imsejħa swieq ta’ dispaċċ tal-merkanzija, li ġew ivvalutati wkoll f’Deċiżjonijiet preċedenti skont ir-Regolament dwar l-Għaqdiet. Fil-każijiet preċedenti, id-dispaċċ tal-merkanzija ġie ddefinit (14) bħala l-“organizzazzjoni tat-trasport tal-oġġetti (…) f’isem il-konsumaturi abbażi tal-bżonnijiet tagħhom”. Għalkemm f’każijiet preċedenti ġew ikkunsidrati ċerti delineazzjonijiet oħra tas-swieq tal-prodotti (jiġifieri bejn is-servizzi domestiċi u internazzjonali ta’ dispaċċ tal-merkanzija (15) jew bejn il-mezzi differenti tat-trasport (16)) f’dan ir-rigward, minħabba li d-definizzjoni tas-suq ma għandhiex impatt deċiżiv fuq ir-riżultat tal-valutazzjoni skont l-Artikolu 30 tad-Direttiva 2004/17/KE, mhux se jiġu kkunsidrati aktar delineazzjonijiet tas-suq, għall-finijiet ta’ din il-valutazzjoni.

(17)

Id-Deċiżjonijiet Preċedenti skont ir-Regolament dwar l-Għaqdiet iddefinixxew (17) il-loġistika tal-kuntratti bħala: “il-parti tal-proċess tal-katina tal-provvista li tippjana, timplimenta u tikkontrolla l-fluss u l-ħażna effikaċi u effettivi tal-oġġetti, is-servizzi u l-informazzjoni relatata mill-punt tal-oriġini sal-punt tal-konsum sabiex jintlaħqu l-bżonnijiet tal-konsumatur”. Il-Kummissjoni vvalutat distinzjonijiet possibbli oħrajn (18) (jiġifieri bejn is-servizzi domestiċi u transfruntiera, b’referenza għat-tipi ta’ oġġetti mmaniġġati jew l-industrija fornuta, jew bejn il-fornituri ewlenin tal-loġistika u l-fornituri tas-servizzi tradizzjonali tal-loġistika b’kuntratt) iżda fl-aħħar mill-aħħar il-kamp ta’ applikazzjoni tad-definizzjoni tas-suq tal-prodotti tħalla miftuħ (19). L-applikant huwa tal-istess fehma tal-Kummissjoni. F’dan il-każ, minħabba li m’hemmx indikazzjonijiet li jeħtieġ li tkompli ssir distinzjoni, għall-finijiet ta’ din id-deċiżjoni u mingħajr ħsara għal-liġi tal-kompetizzjoni, is-suq tal-prodotti huwa ddefinit bħala loġistika kuntrattwali.

(18)

B’konklużjoni, b’kunsiderazzjoni xierqa ta’ dak li ntqal fuq, għall-finijiet ta’ din id-Deċiżjoni, u mingħajr ħsara għal-liġi tal-kompetizzjoni, is-swieq tal-prodotti rilevanti għandhom ikunu dawk elenkati fil-premessa 2.

(19)

Fil-prattika tagħha (20), il-Kummissjoni assumiet li s-swieq għas-servizzi domestiċi tal-kunsinna tal-pakketti u kull taqsima minnhom huma nazzjonali fil-kamp ta’ applikazzjoni tagħhom. Dan it-tqassim huwa bbażat, prinċipalment, fuq il-fatt li servizzi bħal dawn jingħataw f’livell nazzjonali. Il-fehma tal-applikant hija konsistenti mal-prattika tal-Kummissjoni.

(20)

Minħabba li, f’dan il-każ, m’hemmx indikazzjonijiet ta’ kamp ta’ applikazzjoni ġeografiku usa’ jew aktar ristrett, għall-finijiet tal-evalwazzjoni jekk il-kundizzjonijiet stipulati fl-Artikolu 30(1) tad-Direttiva 2004/17/KE humiex issodisfati jew le, u mingħajr ħsara għal-liġi tal-kompetizzjoni, it-territorju tal-Ungerija huwa kkunsidrat bħala s-suq ġeografiku rilevanti.

(21)

Fir-rigward, tas-servizzi domestiċi tal-palits u l-loġistika tal-kuntratti, l-applikant jikkunsidra li s-swieq huma nazzjonali fil-kamp ta’ applikazzjoni tagħhom. Billi s-servizzi kkonċernati mit-talba huma servizzi domestiċi, u Magyar Posta hija attiva biss fis-suq Ungeriż, għall-finijiet ta’ din id-deċiżjoni, it-territorju tal-Ungerija huwa kkunsidrat bħala s-suq ġeografiku rilevanti.

(22)

Wieħed għandu jżomm f’moħħu li l-għan ta’ din id-Deċiżjoni huwa li tistabbilixxi jekk is-servizzi kkonċernati mit-talba humiex esposti għal tali livell ta’ kompetizzjoni (fis-swieq li l-aċċess għalihom mhuwiex ristrett fit-tifsira tal-Artikolu 30 tad-Direttiva 2004/17/KE) li jiżgura li anki fin-nuqqas tad-dixxiplina miġjuba mir-regoli dettaljati tal-akkwist stabbiliti fid-Direttiva 2004/17/KE, l-akkwist għat-twettiq tal-attivitajiet ikkonċernati hawnhekk isir b’mod trasparenti u mhux diskriminatorju abbażi ta’ kriterji li jippermettu lix-xerrejja jidentifikaw l-iktar soluzzjoni vantaġġuża ekonomikament b’mod ġenerali.

(23)

F’dan il-kuntest, għandu jitfakkar li s-swieq tal-prodotti ddefiniti hawn fuq, b’mod ġenerali, huma kkaratterizzati minn għadd kbir ta’ operaturi. Madankollu, mill-informazzjoni disponibbli (21), minn fost dawn, Magyar Posta biss hija entità kontraenti fis-sens tad-Direttiva 2004/17/KE. L-akkwist tal-kompetituri ta’ Magyar Posta, għall-finijiet tat-twettiq tal-attivitajiet deskritti hawn fuq, mhuwiex suġġett għad-dispożizzjonijiet tad-Direttiva 2004/17/KE. Konsegwentement, għall-finijiet ta’ din id-deċiżjoni u mingħajr ħsara għal-liġi tal-kompetizzjoni, l-analiżi tas-suq mhix se tiffoka fuq il-livell ġenerali ta’ kompetizzjoni f’suq partikolari, iżda se tivvaluta jekk l-attivitajiet ta’ Magyar Posta humiex esposti għall-kompetizzjoni fi swieq li għalihom l-aċċess huwa ristrett.

(24)

Is-servizzi tal-pakketti standard tal-konsumatur għandhom jitqiesu apparti, minħabba li jissodisfaw ħtiġijiet differenti ta’ domanda (servizz postali universali) meta mqabbla ma’ pakketti kummerċjali, fejn il-proċess teknoloġiku għall-forniment ta’ dan is-servizz ġeneralment ivarja b’mod sinfikanti. Fir-rigward ta’ dawn is-servizzi, il-pożizzjoni fis-suq ta’ Magyar Posta hija soda ferm b’sehem stmat tas-suq li baqa’ relattivament stabbli matul il-perjodu bejn l-2008 u l-2011, b’madwar 80 % bħala valur. Il-kompetitur ewlieni għandu sehem tas-suq ta’ madwar […], filwaqt li l-bqija tal-atturi tas-suq ewlenin għandhom ishma tas-suq anqas minn […].

(25)

Il-Kummissjoni tinnota wkoll li minkejja l-espansjonijiet kontinwi ta’ netwerks ta’ kompetituri differenti, bħalissa hemm differenza kunsiderevoli fid-daqs tan-netwerk ta’ Magyar Posta meta dan jitqabbel ma’ tal-kompetituri tagħha (22).

(26)

Għaldaqstant, għandu jiġi konkluż li l-kategorija ta’ servizzi eżaminata hawnhekk mhix esposta direttament għall-kompetizzjoni fl-Ungerija. Dan huwa konsistenti mal-opinjonijiet tal-Awtoritajiet Ungeriżi (23). Konsegwentement, l-Artikolu 30(1) tad-Direttiva 2004/17/KE ma japplikax għal kuntratti intiżi biex jippermettu t-twettiq ta’ dawn l-attivitajiet fl-Ungerija.

(27)

Fir-rigward tas-servizzi tal-pakketti standard B2X, skont l-informazzjoni disponibbli (24), is-sehem tas-suq ta’ Magyar Posta kien madwar 35 % bħala volum fl-2011, u dan kien it-tieni l-akbar volum wara l-attur ewlieni fis-suq li kellu 40 % tas-sehem tas-suq, filwaqt li t-tielet kompetitur kellu 15 % mis-sehem tas-suq. Dawn il-fatturi għalhekk għandhom jittieħdu bħala indikazzjoni ta’ esponiment dirett għall-kompetizzjoni ta’ Magyar Posta, fir-rigward ta’ servizzi tal-pakketti standard B2X.

(28)

Is-sehem tas-suq ta’ Magyar Posta għas-servizzi domestiċi espress tal-pakketti wera tnaqqis kostanti fil-perjodu bejn l-2008 u l-2011, minn madwar 55 % bil-valur (25) fl-2008 għal madwar 41 % fl-2011, bil-valur. Is-sehem aggregat fis-suq tal-ikbar żewġ kompetituri ammonta għal ftit iktar minn 22 % bħala valur fl-2008 u żdied għal 30 % bħala valur fl-2011, jiġifieri kważi żewġ terzi tas-sehem tas-suq ta’ Magyar Posta, livell li fih ikunu jistgħu joħolqu pressjoni kompetittiva b’mod sinifikanti fuq Magyar Posta (26). Għalhekk, dawn il-fatturi għandhom jitqiesu bħala indikazzjoni ta’ esponiment dirett għall-kompetizzjoni.

(29)

Skont l-applikant, is-suq għas-servizzi ta’ kurjer tal-pakketti mhuwiex ikkonċentrat ħafna. Tmien kumpaniji jikkostitwixxu bejn 60 % u 67 % tas-suq rilevanti, bħala valur. Is-suq huwa ddominat minn tliet kumpaniji, iżda s-sehem tas-suq kumulattiv tagħhom kien anqas minn 50 % tul l-aħħar erba’ snin.

(30)

Is-sehem tas-suq ta’ Magyar Posta għas-servizzi domestiċi ta’ kurjer tal-pakketti kien bejn 2 % u 3 % bħala valur tul l-aħħar erba’ snin. Għalhekk, dawn il-fatturi għandhom jitqiesu bħala indikazzjoni ta’ esponiment dirett għall-kompetizzjoni ta’ Magyar Posta.

(31)

Id-daqs tas-suq tas-servizzi domestiċi tal-palits huwa t-tieni l-iżgħar fis-settur tas-CEP fl-Ungerija, u minħabba l-importanza marġinali tiegħu, is-suq għandu biss ftit operaturi permanenti. Is-sehem tas-suq ta’ Magyar Posta naqas, fil-valur, minn 67,6 % fl-2008 għal 38,7 % fl-2010, imbagħad żdied fl-2011 għal 56,7 % bħala valur. L-ewwel kompetitur żied l-ishma tas-suq tiegħu b’mod kostanti bejn l-2008 u l-2011. L-ishma tas-suq kumulattivi tat-tieni u t-tielet kompetituri kienu jvarjaw bejn 20 % u 49 % bejn l-2008 u l-2011, f’liema livell dawn ikunu jistgħu jagħmlu pressjoni kompetittiva sinifikanti fuq Magyar Posta.

(32)

Barra minn hekk, it-talba ta’ Magyar Posta tirreferi biss għal servizzi mogħtija fis-settur tas-CEP. Barra minn hekk, is-servizzi tal-palits jingħataw ukoll minn impriżi barra mis-settur tas-CEP.

(33)

Għalhekk, il-fatturi elenkati fil-premessi ta’ hawn fuq għandhom jitqiesu bħala indikazzjoni ta’ esponiment dirett għall-kompetizzjoni ta’ Magyar Posta. Din hija wkoll l-opinjoni tal-Awtoritajiet Ungeriżi (27).

(34)

L-ishma tas-suq ta’ Magyar Posta f’din it-taqsima huma anqas minn 1 %. Is-suq huwa kkaratterizzat minn għadd kbir ta’ atturi fis-suq (28) u huwa meqjus bħala suq tassew dinamiku. Għalhekk, dawn il-fatturi għandhom jitqiesu bħala indikazzjoni ta’ esponiment dirett għall-kompetizzjoni.

(35)

Minħabba l-fatturi eżaminati fil-premessi 2 sa 34, il-kundizzjoni ta’ esponiment dirett għall-kompetizzjoni stabbilita fl-Artikolu 30(1) tad-Direttiva 2004/17/KE għandha titqies li hija milħuqa fl-Ungerija fir-rigward tas-servizzi li ġejjin:

(36)

Minħabba li l-kundizzjoni ta’ aċċess mhux ristrett għas-suq titqies li ntlaħqet, id-Direttiva 2004/17/KE ma għandhiex tapplika meta l-entitajiet kontraenti jagħtu kuntratti bl-intenzjoni li jippermettu li jingħataw is-servizzi elenkati fil-punti (a) sa (e) tal-premessa 35 fl-Ungerija, u lanqas meta jiġu organizzati konkorsi ta’ disinn għat-twettiq ta’ attività bħal din f’dan il-pajjiż.

(37)

Din id-Deċiżjoni hija bbażata fuq is-sitwazzjoni legali u fattwali minn Ottubru 2012 sa Jannar 2013 kif jidher mill-informazzjoni mogħtija minn Magyar Posta u l-Awtoritajiet Ungeriżi. Din tista’ tiġi riveduta, jekk il-kundizzjonijiet għall-applikabbiltà tal-Artikolu 30(1) tad-Direttiva 2004/17/KE ma jibqgħux jintlaħqu, wara li jkun hemm tibdil sinifikanti fis-sitwazzjoni legali jew fattwali.

(38)

Madankollu, il-kundizzjoni tal-esponiment dirett għall-kompetizzjoni, stipulata fl-Artikolu 30(1) tad-Direttiva 2004/17/KE, għandha titqies li ma tintlaħaqx fir-rigward tas-servizzi domestiċi tal-pakketti standard fit-territorju Ungeriż.

(39)

Billi s-servizzi domestiċi ta’ pakketti standard tal-konsumatur jibqgħu suġġetti għad-Direttiva 2004/17/KE, ta’ min isemmi li l-kuntratti tal-akkwist li jkopru diversi attivitajiet għandhom jiġu trattati skont l-Artikolu 9 tad-Direttiva 2004/17/KE. Dan ifisser li, meta entità kuntrattwali tkun involuta f’akkwist “imħallat”, li jfisser akkwist użat biex jappoġġja l-prestazzjoni tat-tnejn li huma, l-attivitajiet eżentati mill-applikazzjoni tad-Direttiva 2004/17/KE u l-attivitajiet li mhumiex eżentati, għandhom jitqiesu l-attivitajiet li għalihom huwa intenzjonat prinċipalment il-kuntratt. F’każ ta’ akkwist imħallat bħal dan, meta l-iskop ikun prinċipalment l-appoġġ tas-servizzi domestiċi tal-pakketti tal-konsumatur standard, għandhom japplikaw id-dispożizzjoni tad-Direttiva 2004/17/KE. Jekk ikun oġġettivament impossibbli li jiġi determinat għal liema attività jkun primarjament intiż il-kuntratt, il-kuntratt għandu jingħata skont ir-regoli msemmija fil-paragrafi (2) u (3) tal-Artikolu 9 tad-Direttiva 2004/17/KE.

(40)

Il-miżuri previsti f’din id-Deċiżjoni huma skont l-opinjoni tal-Kumitat Konsultattiv għall-Kuntratti Pubbliċi,

(a)

Servizzi domestiċi ta’ pakketti tal-posta standard tan-Negozji (B2X);

(b)

Servizzi domestiċi express tal-pakketti;

(c)

Servizzi domestiċi ta’ kurjer tal-pakketti;

(d)

Servizzi kkumbinati tal-ġarr tal-merkanzija; kif ukoll

(e)

Loġistika tal-kuntratti.