12.6.2012   

MT

Il-Ġurnal Uffiċjali tal-Unjoni Ewropea

L 151/22

(1)

Bir-Regolament (KE) Nru 216/2008, l-ambitu tal-attivitajiet tal-Aġenzija Ewropea dwar is-Sigurtà fl-Avjazzjoni (minn hawn ‘il quddiem “l-Aġenzija”) ġie estiż; għalhekk l-Aġenzija hija meħtieġa li toħroġ ċertifikat, approvazzjoni, liċenzja jew dokument ieħor bħala riżultat ta’ ċertifikazzjoni skont l-ambitu estiż.

(2)

Ir-Regolament tal-Kummissjoni (KE) Nru 593/2007 tal-31 ta’ Mejju 2007 dwar drittijiet u ħlasijiet imposti mill-Aġenzija Ewropea tas-Sigurtà tal-Avjazzjoni (2) ma jippermettix li jiġu imposti drittijiet u ħlasijiet għal kwalunkwe attività ta’ ċertifikazzjoni msemmija fl-Artikoli (5)(5), 21, 22, 22a, 22b u 23 tar-Regolament (KE) Nru 216/2008 minbarra dawk deskritti fir-Regolamenti tal-Kummissjoni (KE) Nru 1702/2003 tal-24 ta’ Settembru 2003 li jistabbilixxi regoli ta’ implimentazzjoni biex inġenji tal-ajru, prodotti, partijiet u tagħmir relatat jiġu ċertifikati bħala tajbin għall-ajru u li ma jagħmlux ħsara ambjentali, kif ukoll għaċ-ċertifikazzjoni ta’ organizzazzjonijiet relatati mad-disinn u l-produzzjoni tagħhom (3) u (KE) Nru 2042/2003 tal-20 ta’ Novembru 2003 dwar l-kapaċità kontinwata li jintużaw fl-ajru ta’ inġenji tal-ajru u prodotti, partijiet u tagħmir ajrunawtiku, u dwar l-approvazzjoni ta’ organizzazzjonijiet u persunal involut f’dan ix-xogħol (4).

(3)

Id-drittijiet u l-ħlasijiet imsemmijin f’dan ir-Regolament għandhom jiġu stabbiliti b’mod trasparenti, ġust u uniformi, li jirriflettu l-ispiża attwali ta’ kull servizz individwali kif stipulat fl-Artikolu 64(4)(b) tar-Regolament (KE) Nru 216/2008. Jeħtieġ li jiġi żgurat bilanċ bejn l-infiq kumplessiv imġarrab mill-Aġenzija fit-twettiq tax-xogħol ta’ ċertifikazzjoni u d-dħul kumplessiv mid-drittijiet li timponi.

(4)

Il-lok ġeografiku tal-impriżi fit-territorji tal-Istati Membri ma għandux ikun fattur diskriminatorju meta jiġu ffissati d-drittijiet.

(5)

L-applikant għandu jkollu l-għażla li jitlob kwotazzjoni finanzjarja tal-ammont previst li għandu jitħallas għas-servizz li se jiġi pprovdut. Il-kriterji għad-determinazzjoni tal-ammont li għandu jitħallas għandhom ikunu ċari, uniformi u pubbliċi. Fejn mhuwiex possibbli li jiġi determinat b’mod preċiż dan l-ammont bil-quddiem, għandhom jiġu stabbiliti mill-Aġenzija prinċipji trasparenti għall-valutazzjoni tal-ammont li jrid jitħallas matul l-provvista tas-servizz.

(6)

Għandhom jiġu ffissati skadenzi għall-ħlas tad-drittijiet u l-ħlasijiet imposti skont dan ir-Regolament. Għandhom jiġu stabbiliti rimedji xierqa, f’każijiet ta’ nuqqas ta’ ħlas, bħall-waqfien ta’ proċessi ta’ applikazzjoni relatati, l-invalidazzjoni tal-approvazzjonijiet relatati, il-waqfien ta’ kwalunke provvista ulterjuri ta’ servizzi lill-istess applikant, u l-irkuprar tal-ammont pendenti permezz tal-mezzi disponibbli.

(7)

Ħlasijiet għal appelli kontra deċiżjonijiet tal-Aġenzija għandhom jitħallsu bis-sħiħ qabel ma l-appell ikun iddikjarat ammissibbli.

(8)

Il-partijiet interessati għandhom jiġu kkonsultati qabel kull modifika tad-drittijiet. Barra minn hekk, l-Aġenzija għandha regolarment tipprovdi lill-partijiet interessati informazzjoni dwar kif u fuq liema bażi id-drittijiet huma kkalkulati sabiex tipprovdi lill-partijiet interessati ħjiel dwar l-ispejjeż imġarrba mill-Aġenzija, u biex tipprovdi l-viżibilità finanzjarja xierqa lilll-industrija u l-ħila li jantiċipaw l-ispiża tad-drittijiet li se tkun meħtieġa tħallas. Għandu għalhekk ikun possibbli li tirrevedi annwalment l-livelli tad-drittijiet abbażi tar-riżultati u tbassir finanzjarji tal-Aġenzija.

(9)

Għaldaqstant, ir-Regolament (KE) Nru 593/2007 għandu jiġi emendat skont dan.

(10)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 65 tar-Regolament (KE) Nru 216/2008,

1.

Fl-Artikolu 1, it-tieni paragrafu jinbidel b’dan li ġej:

“Huwa jiddetermina, b’mod partikolari l-materji li għalihom huma dovuti drittijiet u ħlasijiet msemmija fl-Artikolu 64(4) tar-Regolament (KE) Nru 216/2008, l-ammont ta’ dawk id-drittijiet u ħlasijiet u l-mod ta’ kif għandhom jitħallsu.”

2.

Fl-Artikolu, il-punti 2(a) sa (d) jinbidlu b’dan li ġej:

3.

Fl-Artikolu 4, għandhom jiżdiedu t-tieni u t-tielet paragrafu li ġejjin:

“Mal-applikazzjoni ta’ Regolamenti futuri, l-Aġenzija tista’ timponi drittijiet skont it-Taqsima II tal-Anness għal xogħol ta’ ċertifikazzjoni għajr dak imsemmi fit-Taqsima I tal-Anness.

Kwalunkwe tibdiliet fl-organizzazzjoni li huma rrappurtati lill-Aġenzija u jaffettwaw l-approvazzjoni tagħha jista’ jkollhom l-effett ta’ kkalkular mill-ġdid tad-dritt ta’ sorveljanza dovut, li se jkun applikabbli miċ-ċiklu ta’ drittijiet li jmiss.”

4.

L-Artikolu 8 jinbidel b’dan li ġej:

“Artikolu 8

1.   Id-dritt għandu jitħallas mill-applikant f’EUR. It-termini tal-ħlas għandhom ikunu disponibbli għall-applikanti fuq il-websajt tal-Aġenzija. L-applikant għandu jħallas id-dritt bis-sħiħ inklużi tariffi bankarji possibbli relatati mal-ħlas qabel il-ħruġ, iż-żamma jew l-emendar ta’ ċertifikat, sakemm l-Aġenzija ma tiddeċidix mod ieħor wara konsiderazzjoni xierqa tar-riskji finanzjarji. Id-dritt għandu jitħallas fi żmien 30 jum kalendarju mid-data li fiha l-fattura hija nnotifikata lill-applikant mill-Aġenzija. L-applikazzjoni tista’ tiġi kkanċellata jew iċ-ċertifikat jista’ jiġi sospiż jew revokat jekk il-ħlas dovut għad-drittijiet ma jasalx sa tmiem l-iskadenza u wara li l-Aġenzija tkun bagħtet twissija formali.

2.   L-Aġenzija tista’ tiffattura d-dritt fi ħlas wieħed wara li tkun irċeviet l-applikazzjoni jew fil-bidu tal-perjodu annwali jew dak ta’ sorvelljanza.

3.   Għax-xogħol kollu ta’ ċertifikazzjoni li jwassal għall-ħlas ta’ drittijiet ikkalkulati għal kull siegħa, l-Aġenzija, fuq talba speċifika, tista’ tipprovdi stima lill-applikant. L-istima għandha tkun emendata mill-Aġenzija jekk jidher li x-xogħol huwa iktar sempliċi jew li jista’ jitwettaq aktar malajr milli kien imbassar inizjalment jew, bil-kontra, jekk inhu iktar kumpless u jieħu iktar żmien biex jitwettaq minn dak li l-Aġenzija setgħet raġonevolement tbassar.

4.   Jekk, wara verifika tal-applikazzjoni, l-Aġenzija tiddeċiedi li ma taċċettax din l-applikazzjoni, kwalunkwe dritt li diġà tħallas jiġi ritornat lura lill-applikant, bl-eċċezzjoni tal-ammont li jkopri l-ispejjeż amministrattivi tat-trattament tal-applikazzjoni. Dak l-ammont għandu jkun ekwivalenti għad-doppju tad-dritt għal kull siegħa fit-Taqsima II tal-Anness. Fejn l-Aġenzija jkollha provi li l-kapaċità finanzjarja tal-applikant tkun f’riskju, hija tista’ tirrifjuta applikazzjoni sakemm l-applikant jipprovdi garanzija bankarja jew depożitu garantit. L-Aġenzija tista’ wkoll tirrifjuta applikazzjoni, jekk l-applikant ma jissodisfax l-obbligi tal-ħlas tiegħu li jirriżultaw mix-xogħol ta’ ċertifikazzjoni jew servizzi mwettqa mill-Aġenzija, sakemm l-applikant iħallas l-ammonti pendenti dovuti għal dak ix-xogħol ta’ ċertifikazzjoni jew servizzi provduti.

5.   Jekk xi xogħol ta’ ċertifikazzjoni jkollu jiġi interrott mill-Aġenzija minħabba li l-applikant ma għandux riżorsi biżżejjed jew minħabba li jonqos li jikkonforma mar-rekwiżiti applikabbli, jew għax l-applikant iddeċieda li jtemm l-applikazzjoni tiegħu jew li jipposponi l-proġett tiegħu, il-bilanċ ta’ kwalunkwe ħlasijiet dovuti, ikkalkulati bi prezz fis-siegħa għall-perjodu ta’ tnax-il xahar iżda li ma jaqbiżx id-dritt uniformi applikabbli, għandu jitħallas bis-sħiħ fil-mument li l-Aġenzija tieqaf taħdem, flimkien ma’ kwalunkwe ammont ieħor dovut f’dak il-mument. L-għadd rilevanti ta’ sigħat għandu jiġi fatturat bi dritt għal kull siegħa kif stipulat fit-Taqsima II tal-Anness. Meta, fuq talba tal-applikant, l-Aġenzija terġa’ tibda xogħol ta’ ċertifikazzjoni li kien ġie interrott qabel, il-ħlas ta’ dan ix-xogħol għandu jkun daqslikieku kien proġett ġdid.

6.   Jekk id-detentur taċ-ċertifikat iċedi ċ-ċertifikat korrispondenti jew jekk l-Aġenzija tirrevoka ċ-ċertifikat, il-bilanċ ta’ kwalunkwe dritt dovut, ikkalkulat kull siegħa iżda li ma jaqbiżx id-dritt uniformi applikabbli, għandu jitħallas fil-mument li sseħħ il-konċessjoni jew ir-revoka, flimkien ma’ kwalunkwe ammonti oħrajn dovuti sa dak il-mument. L-għadd rilevanti ta’ sigħat għandu jiġi fatturat bi dritt għal kull siegħa kif stipulat fit-Taqsima II tal-Anness.

7.   Jekk l-Aġenzija tissospendi ċertifikat minħabba nuqqas ta’ ħlas ta’ dritt annwali jew dritt ta’ sorveljanza jew għaliex l-applikant jonqos milli jikkonforma mar-rekwiżiti applikabbli, għandhom ikomplu l-perjodi rispettivi tad-drittijiet.”

5.

Fl-Artikolu 10, jitħassar il-paragrafu 2.

6.

Fl-Artikolu 11, it-tieni u t-tielet paragrafu jinbidlu b’dan li ġej:

“Għandhom jiġu imposti ħlasijiet għall-ipproċessar ta’ appell imressaq skont l-Artikolu 44 tar-Regolament (KE) Nru 216/2008 tal-Parlament Ewropew u tal-Kunsill (*). L-ammonti tal-ħlasijiet huma stipulati fit-Taqsima IV tal-Anness. Fejn l-appellant ikun persuna ġuridika, jeħtieġ li tipprovdi lill-Aġenzija ċertifikat iffirmat minn uffiċjal awtorizzat tal-organizzazzjoni kkonċernata li jispeċifika l-fatturat finanzjarju tal-appellant. Dan iċ-ċertifikat għandu jitressaq flimkien man-notifika tal-appell. Ħlasijiet ta’ appelli għandhom jitħallsu fi żmien 60 jum kalendarju mid-data li fiha l-appell kien reġistrat fl-Aġenzija skont il-proċedura applikabbli stabbilita mill-Aġenzija. Fil-każ li l-ħlas ma jsirx qabel din l-iskadenza, il-Bord tal-appell għandu jiċħad l-appell. Jekk l-appell ikun konkluż favur l-appellant, il-ħlasijiet tal-appell imħallsa għandhom jiġu rimborsati mill-Aġenzija mingħajr dewmien.

Tista’ tiġi kkomunikata stima tal-ammont tal-ħlasijiet lill-applikant fuq talba speċifika qabel ma jiġi pprovdut is-servizz. L-istima għandha tkun emendata mill-Aġenzija jekk jidher li x-xogħol huwa iktar sempliċi jew li jista’ jitwettaq aktar malajr milli kien imbassar inizjalment jew, bil-kontra, jekk inhu iktar kumpless u jieħu iktar żmien biex jitwettaq milli seta’ raġonevolment jiġi imbassar mill-Aġenzija.

(*)  ĠU L 79, 19.3.2008, p. 1.”"

7.

Fl-Artikolu 14 għandu jiżdied il-paragrafu 3 li ġej:

“3.   L-Anness ta’ dan ir-Regolament għandu jiġi rivedut perjodikament biex jiġi żgurat li l-informazzjoni sinifikanti relatata għas-suppożizzjonijiet sottostanti għad-dħul u n-nefqa antiċipata tal-Aġenzija hija riflessa debitament fl-ammonti tad-drittijiet jew ħlasijiet imposti mill-Aġenzija. Fejn meħtieġ, dan ir-Regolament u l-Anness tiegħu jistgħu jiġu riveduti sa mhux aktar tard minn ħames snin wara d-dħul tiegħu fis-seħħ.”

8.

L-Anness huwa emendat kif stipulat fl-Anness għal dan ir-Regolament.