(a)

fl-2010 id-defiċit baġitarju reali eċċeda l-mira b’0.4 % tal-PDG filwaqt li t-tkabbir ekonomiku kien akbar fl-2010 milli previst mit-tbassir tar-rebbiegħa 2009 tas-servizzi tal-Kummissjoni, li kien serva bħala l-bażi għar-rakkomandazzjonijiet tal-Kunsill tas-7 ta’ Lulju 2009. Fl-2011, il-bilanċ tal-amministrazzjoni pubblika huwa mistenni (kemm mill-gvern kif ukoll mit-tbassir tal-ħarifa 2011 tas-servizzi tal-Kummissjoni - “tbassir tal-ħarifa 2011”) li jkun f’surplus, imma grazzi għal dħulijiet ta’ darba ta’ 9,75 % tal-PDG marbuta mat-trasferiment tal-assi tal-pensjonijiet mill-iskemi ta’ pensjoni privati lill-pilastru tal-istat u 0,9 % tal-PDG mil-levies settorjali (fuq is-setturi tat-telekom, l-enerġija, il-konsum u finanzjarji). Mingħajr il-miżuri ta’ darba d-defiċit ilaħħaq madwar 6 % tal-PDG u jaqbeż sew il-valur referenzjarju ta’ 3 % tal-PDG stabbilit fl-Artikolu 1 tal-Protokoll (Nru 12) dwar il-proċedura ta’ żbilanċ eċċessiv mehmuż mat-Trattat dwar l-Unjoni Ewropea u t-Trattat. Fin-notifika tagħhom tal-PDE tal-ħarifa 2011, l-awtoritajiet Ungeriżi pproġettaw surplus ta’ 3,9 % tal-PDG. It-tbassir tal-ħarifa 2011 pproġettaw surplus kemmxejn iżgħar (notevolment 3,6 % tal-PDG), minħabba li inkludiet l-assunzjoni ta’ parti mid-dejn tal-kumpaniji tat-trasport pubbliku (0,2 % tal-PDG). Abbażi tal-informazzjoni dwar dħulijiet ta’ darba li jaslu wara d-data ta’ skadenza tat-tbassir tal-ħarifa 2011, is-surplus jista’ jkun saħansitra iżgħar. Id-defiċit strutturali ddeterjora b’1,5 % fl-2010 u b’1,25 % fl-2011, 2,75 % kumulattivi tal-PDG, kuntrarju għar-rakkomandazzjoni tal-Kunsill tas-7 ta’ Lulju 2009 li rrakkomandat li jiġi żgurat, tal-anqas, sforz fiskali kumulattiv ta’ 0,5 % tal-PDG fuq l-istess sentejn kif meħtieġ biex jiġi kkoreġut id-defiċit sal-iskadenza tal-2011 b’mod sostenibbli. Dan id-deterjorament strutturali huwa riflessjoni tal-fatt li t-tnaqqisiet ta’ taxxa li ammontaw għal aktar minn 2 % tal-PDG ma kinux ikkumpensati biżżejjed minn miżuri strutturali;

(b)

fir-rigward tal-2012, l-abbozz tal-baġit jimmira għal defiċit ta’ 2,5 % tal-PDG b’konformità mal-aġġornament tal-2011 tal-Programm ta’ Konverġenza. Sabiex jintlaħaq dan, il-proposta tal-baġit fiha bosta miżuri, li flimkien iqarrbu l-4 % tal-PDG skont l-awtoritajiet, filwaqt li twarrab 0,7 % tal-PDG bħala bafer ta’ riżerva straordinarja. B’kuntrast ma’ dan, it-tbassir tal-ħarifa 2011 jipproġetta li d-defiċit tal-amministrazzjoni pubblika għall-2012 jilħaq it-2,8 % tal-PDG u li d-defiċit strutturali jitjieb b 2,4 % tal-PDG. Meta mqabbel mal-abbozz tal-baġit, dawn iċ-ċifri ogħla tad-defiċit jirriflettu, fost fatturi oħra, proġettazzjoni iċken tat-tkabbir ekonomiku għall-2012 b'punt perċentwali 1 kif ukoll valutazzjoni aktar prudenti tal-iżviluppi fid-dħul u n-nefqa. Fl-istess waqt, l-abbozz tal-baġit jassumi b’konformità mal-leġiżlazzjoni relevanti li r-riserva straordinarja mhijiex mistennija tintnefaq. Madankollu, il-livell limitu tad-defiċit ta’ 3 % tal-PDG ser jintlaħaq biss grazzi għal dħul ta’ darba ta’ kważi 0,9 % tal-PDG mil-levies settorjali straordinarji diġà msemmija;

(c)

skont it-tbassir tal-ħarifa 2011, u abbażi tal-assunzjoni solita tal-ebda bidla fil-politika, id-defiċit baġitarju kien proġettat li jerġa’ jiddeterjora għal 3,7 % fl-2013. Dan huwa primarjament dovut għall-fatt li l-eliminazzjoni gradwali tal-levies straordinarji ta’ madwar 0,9 % tal-PDG mhuwiex mistenni jissalda b’iffrankar addizzjonali mill-programm ta’ riforma strutturali għal dik is-sena;

(d)

Abbażi tal-iżviluppi baġitarji sa mill-pubblikazzjoni tat-tbassir tal-ħarifa 2011, il-proġettazzjonijiet tal-2012 ta’ defiċit ġenerali tal-gvern ta’ 2,8 % tal-PDG xorta waħda jidhru plawsibbli (mingħajr ma jitqies id-deterjorament reċenti fl-ambjent makroekonomiku). Dan huwa spjegat mill-fatt li l-impatt li jnaqqas id-defiċit tal-pakkett ta’ konsolidament il-ġdid ta’ 0,4 % tal-PDG adottat mill-gvern fil-15 ta’ Diċembru 2011 huwa ġeneralment saldat mill-emendi li jżidu d-defiċit adottati fl-abbozz tal-baġit kif ukoll mill-kosijiet baġitarji netti tal-ftehim mas-settur bankarju konkluż fil-15 ta’ Diċembru 2011 li għadhom ma tpaċewx kif xieraq b’miżuri addizzjonali ta’ konsolidament;

(e)

għall-2013, meta jitqiesu xi speċifikazzjonijiet oħra tal-programm ta’ riforma strutturali (deċiżjonijiet tal-gvern u Parlamentari relatati huma ddettaljati fir-rapport ta’ progress tal-Ungerija ta’ Diċembru 2011), l-effet bażilari pożittiv mill-2012 u l-kost nett li joħroġ mill-ftehim mas-settur bankarju, il-proġettazzjoni tad-defiċit għall-2013 inkluża fit-tbassir tal-ħarifa 2011 tista’ tkun anqas minn 3,7 % tal-PDG sa 3,25 % tal-PDG, li, madankollu, huwa ċarament ogħla mil-livell limitu tad-defiċit ta’ 3 % tal-PDG. Id-differenza bejn din il-valutazzjoni aġġornata u l-mira uffiċjali (2,2 % tal-PDG) stabbilita fil-Programm ta’ Konverġenza ta’ April 2011 tal-Ungerija notevolment toħroġ mill-fatt li n-nuqqas ta’ passi speċifiċi, madwar nofs mill-programm ta’ riforma strutturali, ma tistax tiġi kkunsidrata. Il-bqija tad-differenza mqabbla mal-mira uffiċjali hija marbuta ma’ tbassir ta’ nefqa ogħla partikolarment fil-qasam tal-intrapriżi statali tat-trasport u l-manutenzjoni tat-toroq u tinkopora wkoll xi differenzi fl-assunzjonijiet tat-tkabbir. Riformi strutturali ulterjuri huma ppjanati, li jistgħu jnaqqsu t-tbassir tad-defiċit, iżda għadhom mhumiex speċifikati b’mod suffiċenti;

(f)

ir-riskji għal dawn il-proġettazzjonijiet ta’ terminu medju aġġornati jxaqilbu lejn il-lat negattiv. Hemm xi riskju pożittiv, partikolarment mill-kontinwazzjoni ta’ influssi ta’ dħul aħjar minn dawk mistennija fl-2012 u 2013. Madankollu, ir-riskji negattivi huma mistennija li jkunu ogħla mir-riskji pożittivi kompensatorji. Partikolarment, ir-rati tal-imgħax għall-maturitajiet kollha żdiedu, ir-rata tal-kambju ddgħajfet, u l-prospetti ekonomiċi ta’ terminu medju jidhru li ħżienu minn meta t-tbassir tal-ħarifa 2011 ġie ppubblikat fl-10 ta’ Novembru 2011. Kumplessivament, jekk jitqiesu dawn il-fatturi, il-proġettazzjonijiet tad-defiċit kemm fl-2012 u fl-2013 jiżdiedu aktar b’0,5 % tal-PDG, li jwassal għal defiċits ta’ ftit aktar minn 3 % tal-PDG u 3,75 % tal-PDG, rispettivament;

(g)

skont it-tbassir tal-ħarifa 2011, id-dejn pubbliku gross, fid-dawl taċ-ċifri tad-defiċit fit-tbassir u l-assunzjonijiet tar-rati tal-kambju, huwa mistenni li jerġa’ jiżdied għal 77 % tal-PDG sal-2013, wara tnaqqis temporanju fl-2011 minħabba l-akkwiżizzjoni totali tal-assi tal-pensjonijiet privati. Jekk il-proġettazzjonijiet baġitarji ta’ terminu medju jiġu aġġornati biss abbażi tal-miżuri l-ġodda adottati wara d-data ta’ skadenza tat-tbassir, il-proporzjon tad-dejn proġettat tal-2012 ma tantx jinbidel u jitjieb biss ħarira fl-2013. Madankollu, aktar reviżjonijiet possibbli fil-proġettazzjonijiet baġitarji, fejn jitqiesu l-aktar ir-redditi akbar, ir-rata tal-kambju HUF/EUR fi tmiem l-2011 ta’ 311 (li hija madwar 12 % anqas mill-assunzjoni teknika użata fit-tbassir tal-ħarifa 2011) kif ukoll, l-ambjent makroekonomiku aktar dgħajjef, iwasslu għal proporzjon tad-dejn ta’ madwar 80 % fl-2011, u wara dan jistabilizza għal madwar 78,5 % fl-2012 u 2013 filwaqt li l-Kunsill irrakkomanda li l-proporzjon tad-dejn gross għandu jinġieb fuq perkors ta’ tnaqqis konsistenti.