ANNESS

Kwestjonarju dwar l-implimentazzjoni tad-Direttiva 2000/76/KE dwar l-inċinerazzjoni ta’ skart

Noti ġenerali:

Dan it-tielet kwestjonarju skont id-Direttiva 2000/76/KE jkopri l-perjodu mill-2012 sal-2013. Fid-dawl tal-esperjenza miksuba mill-implimentazzjoni tad-Direttiva u l-informazzjoni diġà miksuba permezz tal-kwestjonarji preċedenti, dan il-kwestjonarju jiffoka fuq il-bidliet u l-progress li sar mill-Istati Membri fl-implimentazzjoni proprja tad-Direttiva. Peress li d-Direttiva 2000/76/KE għandha titħassar mis-7 ta’ Jannar 2014 u għandha tiġi sostitwita bid-Direttiva 2010/75/UE dwar l-emissjonijiet industrijali (IED), il-perjodu ta’ rappurtar huwa limitat għal sentejn minflok tliet snin.

Sabiex tkun żgurata l-kontinwità u sabiex ikun jista’ jsir tqabbil dirett mar-reazzjonijiet preċedenti, il-kwestjonarju ma jbiddilx l-approċċ ġenerali li jinsab fid-Deċiżjoni 2010/731/UE. F’dawk il-każijiet fejn il-mistoqsijiet huma simili għal dawk tal-kwestjonarju preċedenti, tista’ sempliċiment issir referenza għat-tweġibiet preċedenti fejn is-sitwazzjoni ma nbidlitx. Jekk kien hemm żviluppi ġodda, dawn għandhom jiġu deskritti fi tweġiba ġdida.

1.   L-għadd ta’ impjanti u permessi

1.1

Jekk jogħġbok, agħti l-informazzjoni li ġejja dwar l-għadd ta’ impjanti (impjanti mqassma bejn impjanti ta’ inċinerazzjoni u ta’ koinċinerazzjoni) li jaqgħu fi ħdan l-ambitu tad-Direttiva 2000/76/KE, kif ukoll dwar il-permessi u l-kapaċitajiet permessi tagħhom: (a) l-għadd ta’ impjanti; (b) l-għadd ta’ permessi maħruġa skont l-Artikolu 4(1); (ċ) l-għadd ta’ impjanti li jirkupraw is-sħana li tkun ġiet iġġenerata mill-proċess ta’ inċinerazzjoni; (d) il-kapaċitajiet permessi totali ta’ volum ta’ skart (tunnellati fis-sena) (fakultattivi).

1.2

Jekk jogħġbok ipprovdi lista tal-impjanti kollha li jaqgħu fi ħdan l-ambitu tad-Direttiva 2000/76/KE, u indika l-informazzjoni li ġejja għal kull wieħed minn dawk l-impjanti b’kapaċità ta’ iktar minn 2 tunnellati fis-siegħa: (a) jekk huwiex impjant ta’ inċinerazzjoni jew ta’ koinċinerazzjoni u, għal dan tal-aħħar, it-tip ta’ impjant (forn tas-siment, impjant ta’ kombustjoni, faċilitajiet industrijali oħrajn li mhumiex koperti bl-Anness II.1 jew II.2 għad-Direttiva 2000/76/KE); (b) għall-impjanti ta’ inċinerazzjoni muniċipali bi skart solidu li jwettqu operazzjonijiet ta’ rkupru li jaqgħu fl-Anness II, R1 għad-Direttiva 2008/98/KE tal-Parlament Ewropew u tal-Kunsill tad-19 ta' Novembru 2008 dwar l-iskart u li tħassar ċerti Direttivi (1): l-effiċjenza fl-enerġija tal-impjant, ikkalkulata bl-użu tal-formula mogħtija fin-nota tal-qiegħ tal-Anness II, R1 għad-Direttiva 2008/98/KE.

2.   Jekk jogħġbok iddeskrivi kwalunkwe problema li ġiet identifikata fl-implimentazzjoni tad-Direttiva 2000/76/KE bid-definizzjonijiet li ngħataw fl-Artikolu 3. Agħti informazzjoni speċifika għal kull definizzjoni li għaliha huma identifikati l-problemi.

3.   Kien hemm xi impjanti mobbli li rċevew permessi skont id-Direttiva 2000/76/KE?

4.   Jekk jogħġbok indika l-kategoriji tal-iskart li kienu koinċinerati, maqsuma skont it-tip ta’ impjant ta’ koinċinerazzjoni (fran tas-siment, impjanti ta’ kombustjoni, faċilitajiet industrijali oħrajn li mhumiex koperti bl-Anness II.1 jew II.2).

Jekk jogħġbok indika l-kodiċijiet tal-Katalogu Ewropew tal-Iskart (fakultattiv)

Jekk jogħġbok, identifika l-kapaċità permessa mogħtija għall-koinċinerazzjoni f’dawn l-impjanti (fakultattiv)

5.   Kemm hemm impjanti ta’ koinċinerazzjoni li huma soġġetti għal-limitu tal-emissjonijiet stipulati fl-Anness V għad-Direttiva 2000/76/KE (jiġifieri meta ssir l-koinċinerazzjoni ta’ skart muniċipali li ma jkunx trattat, jew meta iktar minn 40 % tas-sħana rilaxxata jirriżulta mill-kombustjoni ta’ skart perikoluż)?

6.   X’dispożizzjonijiet saru fil-proċess ta’ permess għal:

(a)	L-identifikazzjoni ta’ kwantitajiet u kategoriji ta’ skart perikoluż li jista’ jiġi trattat?

(b)	Il-flussi minimi u massimi ta’ skart perikoluż li jrid jiġi trattat?

(ċ)	Il-medda ta’ valuri kalorifiċi ta’ skart perikoluż permess?

(d)	Ir-restrizzjonijiet tal-kontenut ta’ sustanzi li jniġġsu, eżempju PCB, PCP, kloru, fluworu, kubrit, metalli tqal?

7.   Liema skart ġie kkunsidrat bħala “mhux xieraq” biex jittieħed kampjun rappreżentattiv?

8.   Fir-rigward tal-kundizzjonijiet għall-ħinijiet u t-temperaturi tar-residenza [ta’ permanenza] tal-gass tal-forn kif stipulati fl-Artikolu 6(1) u 6(2) tad-Direttiva 2000/76/KE, ingħataw xi awtorizzazzjonijiet għal kundizzjonijiet differenti ta’ operat skont l-Artikolu 6(4)? Jekk it-tweġiba hija “iva”, jekk jogħġbok indika:

(a)	Kemm ingħataw awtorizzazzjonijiet?

(b)

Fejn din id-dejta hija disponibbli, jekk jogħġbok iddeskrivi r-raġunijiet għall-għoti tad-deroga/i għal għadd ta’ każijiet rappreżentattivi kif ukoll għall-informazzjoni li ġejja: (i) l-identifikazzjoni tal-kapaċità tal-impjant; (ii) jekk tikkonċernax impjant eżistenti kif definit fl-Artikolu 3(6) jew impjant ġdid; (iii) it-tip ta’ skart inċinerat; (iv) kif jiġi żgurat li ma jiġux prodotti iktar residwi meta mqabbla ma’ impjant mhux eżentat, u li l-kontenut ta’ sustanzi organiċi li jniġġsu f’dawk ir-residwi ma jkunx iktar minn dak mistenni minn impjant mhux eżentat; (v) il-kundizzjonijiet tal-operat stabbiliti fil-permess; (vi) il-valuri tal-limitu għall-emissjonijiet [il-valuri tal-limiti ta’ emissjoni] li għandhom jintlaħqu mill-impjant.

9.   Fir-rigward tal-ifran tas-siment użati għall-koinċinerazzjoni tal-iskart, ingħataw xi eżenzjonijiet mil-limiti ta’ emissjoni għall-NOx, trab, SO2 jew TOC skont l-Anness II.1? Jekk it-tweġiba hija “iva”, jekk jogħġbok indika dan li ġej:

(a)	kemm ingħataw eżenzjonijiet;

(b)

fejn din id-dejta hija disponibbli, jekk jogħġbok iddeskrivi r-raġunijiet għall-għoti tad-deroga/i għal għadd ta’ każijiet rappreżentattivi kif ukoll għall-informazzjoni li ġejja: (i) il-kapaċità tal-impjant; (ii) jekk tikkonċernax impjant eżistenti jew ġdid (b’kunsiderazzjoni tal-Artikolu 20(3) tad-Direttiva 2000/76/KE); (iii) it-tip ta’ skart koinċinerat; (iv) il-valuri ta’ limiti tal-emissjoni li għandhom jintlaħqu mill-impjanti; (v) il-kundizzjonijiet tal-operat l-oħrajn stabbiliti fil-permess.

10.   Għar-rilaxxi mill-impjanti ta’ inċinerazzjoni u ta’ koinċinerazzjoni fl-arja, ġew stabbiliti valuri tal-limiti ta’ emissjoni differenti minn dawk mogħtija fl-Anness II jew fl-Anness V, kif xieraq? Jekk it-tweġiba hija “iva” u fejn dik id-dejta hija disponibbli, jekk jogħġbok identifika:

(a)	l-impjanti li japplikaw għalihom, jiġifieri l-impjanti ta’ inċinerazzjoni jew ta’ koinċinerazzjoni, u għal dan tal-aħħar indika t-tip ta’ impjant;

(b)	liema minn dawn l-impjanti huma “ġodda” jew “eżistenti”;

(ċ)	is-sustanzi li jniġġsu li għalihom japplikaw il-valuri tal-limiti u l-valuri tal-limiti stabbiliti;

(d)	għaliex jiġu applikati dawn il-valuri tal-limiti;

(e)	is-sistema ta’ monitoraġġ tal-emissjonijiet għal dawn is-sustanzi li jniġġsu (kontinwament jew mhux kontinwament, u għal dan tal-aħħar indika l-frekwenza).

11.   Għas-sustanzi li jniġġsu elenkati fl-Anness IV għad-Direttiva 2000/76/KE, kif huma ddeterminati l-valuri tal-limiti ta’ emissjoni għall-iskarigi [ir-rimi] tal-ilma tal-iskart mit-tagħmir tat-tindif tal-gass taċ-ċumnija [tal-gass tal-egsost] fl-ambjent akkwatiku? Jekk jogħġbok indika dawk il-każijiet fejn il-valuri tal-limiti tal-emissjoni għal dawk is-sustanzi li jniġġsu huma differenti minn dawk fl-Anness IV.

12.   Fil-każ li ġew stabbiliti valuri tal-limiti ta’ emissjoni għal sustanzi li jniġġsu addizzjonali skargati [mormija] fl-ilma, imqabbla mas-sustanzi li jniġġsu speċifikati fl-Anness IV:

(a)	għal liema impjanti japplikaw (jiġifieri l-impjanti ta’ inċinerazzjoni jew ta’ koinċinerazzjoni, “ġodda” jew “eżistenti”)?

(b)	għal liema sustanzi li jniġġsu japplikaw u x’inhuma l-valuri tal-limiti stabbiliti?

(ċ)	għaliex jiġu applikati dawn il-valuri tal-limiti?

13.   Liema parametri operattivi ta’ kontroll (pH, temperatura, rata tal-fluss, eċċ.) ġew stabbiliti fil-proċess ta’ awtorizzazzjoni għar-rimi tal-ilma tal-iskart?

14.   X’dispożizzjonijiet saru sabiex jiżguraw li l-ħamrija, l-ilma tal-wiċċ jew l-ilma ta’ taħt l-art ikunu protetti skont l-Artikolu 8(7)?

15.   Liema kriterji huma użati biex jiżguraw li l-kapaċità tal-ħażna tkun adegwata biex fejn meħtieġ l-ilma jiġi ttestjat u ttrattat qabel ma jintrema?

16.   B’mod ġenerali, x’dispożizzjonijiet saru biex jiġu minimizzati l-kwantitajiet tar-residwi u l-ħsara kkaġunata minnhom li jirriżultaw mill-impjanti ta’ inċinerazzjoni jew ta’ koinċinerazzjoni?

17.   Ir-rekwiżiti tal-permess għall-kejl tas-sustanzi li jniġġsu fl-arja u l-parametri tal-proċess tal-ħidma [ta’ operat] huma identiċi għal dawk stabbiliti fl-Artikolu 11(2)? Jekk le, jekk jogħġbok agħti l-informazzjoni dettaljata dwar li ġej:

(a)	ir-raġuni għall-iddevjar mill-Artikolu 11(2), b’referenza għall-possibbiltajiet ta’ deroga msemmija fl-Artikolu 11(4) sa (7);

(b)	is-sustanza li tniġġes jew il-parametru konċernat u r-rekwiżit tal-kejl imponut.

18.   Ir-rekwiżiti tal-permess għall-kejl tas-sustanzi li jniġġsu fl-ilma huma identiċi għal dawk stabbiliti fl-Artikolu 11(14) sa (15)? Jekk le, jekk jogħġbok agħti l-informazzjoni dettaljata dwar li ġej:

(a)	ir-raġuni għall-iddevjar mill-Artikolu 11(14) sa (15);

(b)	is-sustanza li tniġġes jew il-parametru konċernat u r-rekwiżit tal-kejl imponut.

19.   Liema dispożizzjonijiet isiru fil-proċess tal-permess biex jiżguraw il-konformità mad-dispożizzjonijiet li ġejjin fir-rigward tal-emissjonijiet fl-arja:

(a)	l-Artikolu 11(8);

(b)	l-Artikolu 11(9);

(ċ)	l-Artikolu 11(11);

(d)	l-Artikolu 11(12);

(e)	is-sistema ta’ konformità stabbilita fl-Artikolu 11(10).

20.   Liema dispożizzjonijiet isiru fil-proċess tal-permess biex jiżguraw il-konformità mad-dispożizzjonijiet li ġejjin fir-rigward tal-emissjonijiet fl-ilma:

(a)	l-Artikolu 11(9);

(b)	Is-sistema ta’ konformità stabbilita fl-Artikolu 11(16).

21.   Jekk jogħġbok iddeskrivi kwalunkwe gwida uffiċjali li ġiet żviluppata dwar il-produzzjoni ta’ dejta medja tal-emissjonijiet li tiġi vvalidata kuljum (l-Artikolu 11(11)? Jekk jogħġbok agħti l-indirizz elettroniku fil-każ li dan huwa disponibbli.

22.   X’inhuma l-proċeduri sabiex tiġi infurmata l-awtorità kompetenti f’każ ta’ ksur tal-valur tal-limiti ta’ emissjoni?

23.   X’arranġamenti saru sabiex tiġi żgurata l-parteċipazzjoni tal-pubbliku fil-proċess tal-permess (permessi ġodda u/jew aġġornati)? Jekk jogħġbok agħti d-dettalji, tal-inqas, dwar l-aspetti li ġejjin:

(a)	bis-saħħa ta’ liema awtorità saret disponibbli għall-pubbliku l-applikazzjoni tal-permess;

(b)	il-perjodu li matulu l-pubbliku jista’ jikkummenta;

(ċ)	bis-saħħa ta’ liema awtorità d-deċiżjoni finali saret disponibbli.

24.   Fir-rigward tad-disponibbiltà tal-informazzjoni matul il-proċess ta’ permess:

(a)	Hemm xi informazzjoni relatata ma’ aspetti ambjentali li mhijiex disponibbli pubblikament/parzjalment fl-applikazzjoni, fil-proċess ta’ deċiżjoni u fil-permess sussegwenti? Jekk iva, jekk jogħġbok speċifika liema informazzjoni.

(b)	Fejn din id-dejta hija disponibbli/parzjalment disponibbli, jekk jogħġbok speċifika jekk din l-informazzjoni hijiex disponibbli b’xejn u, jekk le, indika l-livelli ta’ ħlasijiet, u f’liema ċirkustanzi dawn il-ħlasijiet japplikaw.

25.   Għall-impjanti ta’ inċinerazzjoni u ta’ koinċinerazzjoni b’kapaċità nominali ta’ żewġ tunnellati jew iktar fis-siegħa, x’dispożizzjonijiet qed isiru sabiex l-operatur jintalab iressaq rapport annwali dwar il-funzjonament u l-monitoraġġ tal-impjant lill-awtortità kompetenti?

26.   Jekk ikun provdut rapport annwali:

(a)	X’informazzjoni jkun fih?

(b)	Il-pubbliku kif jista’ jkollu aċċess għal dan ir-rapport?

27.   Kif inhuma identifikati pubblikament l-impjanti ta’ inċinerazzjoni jew ta’ koinċinerazzjoni li jkollhom kapaċità nominali ta’ inqas minn żewġ tunnellati fis-siegħa?

28.   Liema dispożizzjonijiet isiru fil-permess biex jiġi kkontrollat il-perjodu ta’ operat ta’ impjant ta’ inċinerazzjoni jew ta’ koinċinerazzjoni meta l-operat tiegħu jkun anormali (jiġifieri waqfien, tfixkil jew nuqqas fis-sistema ta’ tnaqqis jew ta’ monitoraġġ)?

29.   Għall-proċessi ta’ inċinerazzjoni u ta’ koinċinerazzjoni, x’inhuma l-perjodi massimi ta’ operat permessi meta jkun hemm operat anormali qabel ma l-impjant ikollu jagħlaq:

(a)	il-perjodu massimu permessibbli li matulu jinqabżu l-valuri tal-limiti ta’ emissjoni

(b)	it-tul ta’ żmien kumulattiv u massimu tal-perjodi f’sena waħda li matulu jinqabżu l-valuri tal-limiti ta’ emissjoni

30.   Xi rimarki oħrajn.

---

(1)  ĠU L 312, 22.11.2008, p. 3.