Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32011D0514

Deċiżjoni tal-Kunsill 2011/514/PESK tat-22 ta’ Novembru 2010 dwar l-iffirmar u l-konklużjoni tal-Ftehim bejn l-Unjoni Ewropea u r-Repubblika tas-Serbja dwar il-proċeduri ta’ sigurtà għall-iskambju u l-protezzjoni ta’ informazzjoni klassifikata

ĠU L 216, 23.8.2011, p. 1–1 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

⏵Dan id-dokument ġie ppubblikat f’edizzjoni(jiet) speċjali (HR)

Legal status of the document In force

ELI: http://data.europa.eu/eli/dec/2011/514/oj

Related international agreement

23.8.2011   

MT

Il-Ġurnal Uffiċjali tal-Unjoni Ewropea

L 216/1

DEĊIŻJONI TAL-KUNSILL 2011/514/PESK

tat-22 ta’ Novembru 2010

dwar l-iffirmar u l-konklużjoni tal-Ftehim bejn l-Unjoni Ewropea u r-Repubblika tas-Serbja dwar il-proċeduri ta’ sigurtà għall-iskambju u l-protezzjoni ta’ informazzjoni klassifikata

IL-KUNSILL TAL-UNJONI EWROPEA,

Wara li kkunsidra t-Trattat dwar l-Unjoni Ewropea (“TUE”), b'mod partikolari l-Artikolu 37 tiegħu, u t-Trattat dwar il-Funzjonament tal-Unjoni Ewropea (“TFUE”), b'mod partikolari l-Artikolu 218(5) u l-ewwel subparagrafu tal-Artikolu 218(6) tiegħu,

Wara li kkunsidra l-proposta tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (“RGħ”),

Billi:

(1)

Fil-laqgħa tiegħu tat-22 ta’ Marzu 2010, il-Kunsill iddeċieda li jawtorizza lir-RGħ biex jiftaħ negozjati, skont l-Artikolu 37 tat-TUE u f'konformità mal-proċedura stabbilita fl-Artikolu 218(3) tat-TFUE sabiex jikkonkludi Ftehim dwar is-sigurtà tal-informazzjoni bejn l-Unjoni Ewropea u r-Repubblika tas-Serbja.

(2)

Wara dik l-awtorizzazzjoni, ir-RGħ innegozja Ftehim mar-Repubblika tas-Serbja dwar il-proċeduri ta’ sigurtà għall-iskambju u l-protezzjoni ta’ informazzjoni klassifikata.

(3)

Il-Ftehim għandu jiġi approvat,

ADOTTA DIN ID-DEĊIŻJONI:

Artikolu 1

Il-Ftehim bejn l-Unjoni Ewropea u r-Repubblika tas-Serbja dwar il-proċeduri ta’ sigurtà għall-iskambju u l-protezzjoni ta’ informazzjoni klassifikata huwa b'dan approvat f'isem l-Unjoni.

It-test tal-Ftehim huwa mehmuż ma’ din id-Deċiżjoni.

Artikolu 2

Il-President tal-Kunsill huwa b'dan awtorizzat jinnomina il-persuna jew persuni li jkollhom is-setgħa li jiffirmaw il-Ftehim sabiex tintrabat l-Unjoni.

Artikolu 3

Din id-Deċiżjoni għandha tidħol fis-seħħ fil-jum tal-adozzjoni tagħha.

Magħmul fi Brussell, it-22 ta’ Novembru 2010.

Għall-Kunsill

Il-President

S. VANACKERE

TRADUZZJONI

FTEHIM

bejn l-Unjoni Ewropea u r-Repubblika tas-Serbja dwar il-proċeduri ta’ sigurtà għall-iskambju u l-protezzjoni ta’ informazzjoni klassifikata

L-UNJONI EWROPEA, minn hawn ’il quddiem imsejħa “l-UE”,

u

R-REPUBBLIKA TAS-SERBJA,

minn hawn ’il quddiem imsejħin “il-Partijiet”;

WARA LI KKUNSIDRAW li l-Partijiet jikkondividu l-objettivi li jsaħħu s-sigurtà tagħhom stess b’kull mod;

WARA LI KKUNSIDRAW li l-Partijiet jaqblu li għandhom jiġu żviluppati bejniethom konsultazzjonijiet u kooperazzjoni dwar kwistjonijiet ta’ interess komuni relatati mas-sigurtà;

WARA LI KKUNSIDRAW li, f’dan il-kuntest, teżisti għalhekk ħtieġa permanenti għall-iskambju ta’ informazzjoni klassifikata bejn il-Partijiet;

WAQT LI JIRRIKONOXXU li konsultazzjoni u kooperazzjoni sħiħa u effettiva tista’ teħtieġ l-aċċess għal informazzjoni klassifikata u l-iskambju tagħha u ta’ materjal relatat tal-Partijiet;

KONXJI li tali aċċess għal, u skambju ta’, informazzjoni klassifikata u materjal relatat jeħtieġu li jittieħdu miżuri adegwati ta’ sigurtà,

FTIEHMU KIF ĠEJ:

Artikolu 1

1.   Sabiex jintlaħqu l-objettivi tat-tisħiħ tas-sigurtà ta’ kull wieħed mill-Partijiet b’kull mod, il-Ftehim bejn l-UE u r-Repubblika tas-Serbja dwar il-proċeduri ta’ sigurtà għall-iskambju u l-protezzjoni ta’ informazzjoni klassifikata (minn hawn ’il quddiem “il-Ftehim”) għandu japplika għal informazzjoni jew materjal ikklassifikat fi kwalunkwe forma u fi kwalunkwe qasam jew ipprovduti inkella skambjati bejn il-Partijiet.

2.   Kull Parti għandha tipproteġi l-informazzjoni klassifikata li tirċievi mill-Parti l-oħra minn żvelar mhux awtorizzat f’konformità mat-termini mniżżlin hawnhekk u f’konformità mal-liġijiet u r-regolamenti rispettivi tal-Partijiet.

Artikolu 2

Għall-finijiet ta’ dan il-Ftehim, “informazzjoni klassifikata” għandha tfisser kwalunkwe informazzjoni jew materjal, fi kwalunkwe forma, li:

(a)

jiġu ddeterminati minn waħda mill-Partijiet bħala li jeħtieġu protezzjoni, billi l-iżvelar mhux awtorizzat tagħhom jista’ joħloq livelli varji ta’ dannu jew ħsara għall-interessi tar-Repubblika tas-Serbja, jew tal-UE jew ta’ Stat Membru wieħed jew aktar tagħha; u

(b)

ikollhom marka ta’ klassifikazzjoni.

Artikolu 3

L-istituzzjonijiet u l-entitajiet tal-UE li għalihom japplika dan il-Ftehim għandhom ikunu: il-Kunsill Ewropew, il-Kunsill tal-Unjoni Ewropea (minn hawn ’il quddiem “il-Kunsill”), is-Segretarjat Ġenerali tal-Kunsill, ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà, is-Servizz Ewropew għall-Azzjoni Esterna (minn hawn ’il quddiem “is-SEAE”) u l-Kummissjoni Ewropea. Għall-finijiet ta’ dan il-Ftehim, dawn l-istituzzjonijiet u l-entitajiet għandhom jissejħu “l-UE”.

Artikolu 4

Kull waħda mill-Partijiet, u l-entitajiet tagħhom kif imsemmija fl-Artikolu 3, għandha tiżgura li jkollha fis-seħħ sistema ta’ sigurtà u miżuri ta’ sigurtà, ibbażati fuq il-prinċipji bażiċi u l-istandards minimi ta’ sigurtà stabbiliti fil-liġijiet jew fir-regolamenti rispettivi tagħhom, u riflessi fl-arranġamenti ta’ sigurtà li għandhom jiġu stabbiliti skont l-Artikolu 12, sabiex ikun żgurat li qed jiġi applikat livell ekwivalenti ta’ protezzjoni għal informazzjoni klassifikata pprovduta jew skambjata taħt dan il-Ftehim.

Artikolu 5

Kull waħda mill-Partijiet, u l-entitajiet tagħhom kif imsemmija fl-Artikolu 3, għandha:

(a)

tipproteġi l-informazzjoni klassifikata pprovduta minn jew skambjata mal-Parti l-oħra taħt dan il-Ftehim b’mod li jkun mill-inqas ekwivalenti għal dik mogħtija lilha mill-Parti provvedenti;

(b)

tiżgura li l-informazzjoni klassifikata pprovduta jew skambjata taħt dan il-Ftehim iżżomm il-marka tal-klassifikazzjoni ta’ sigurtà mogħtija lilha mill-Parti provvedenti, u li ma tbaxxix il-livell tal-klassifikazzjoni tagħha jew tiddeklassifikaha mingħajr kunsens bil-miktub minn qabel tal-Parti provvedenti. Il-Parti riċeventi għandha tipproteġi l-informazzjoni klassifikata skont id-dispożizzjonijiet stabbiliti fir-regolamenti ta’ sigurtà tagħha stess għal informazzjoni jew materjal li jkollu klassifikazzjoni ta’ sigurtà ekwivalenti kif speċifikat fl-Artikolu 7;

(c)

ma tużax tali informazzjoni klassifikata għal għanijiet li mhumiex dawk stabbiliti mill-oriġinatur jew dawk li għalihom tiġi pprovduta jew skambjata l-informazzjoni;

(d)

ma tiżvelax tali informazzjoni klassifikata lil partijiet terzi, jew lil kwalunkwe istituzzjoni jew entità tal-UE mhux imsemmija fl-Artikolu 3, mingħajr il-kunsens bil-miktub minn qabel tal-Parti provvedenti;

(e)

ma tippermettix l-aċċess għal informazzjoni klassifikata lil individwi ħlief jekk ikollhom il-ħtieġa ta’ tagħrif u jkunu ngħataw l-approvazzjoni adatta tas-sigurtà u awtorizzati mill-Parti rilevanti;

(f)

tiżgura s-sigurtà tal-faċilitajiet fejn tinżamm l-informazzjoni klassifikata pprovduta mill-Parti l-oħra; u

(g)

tiżgura li l-individwi kollha li għandhom aċċess għal informazzjoni klassifikata huma infurmati bir-responsabbiltajiet tagħhom li jipproteġu l-informazzjoni skont ir-regoli u r-regolamenti applikabbli.

Artikolu 6

1.   L-informazzjoni klassifikata għandha tiġi żvelata jew rilaxxata f’konformità mal-prinċipju tal-kunsens tal-oriġinatur.

2.   Sabiex isir rilaxx lil riċevituri oħra diversi mill-Partijiet, ser tittieħed deċiżjoni dwar l-iżvelar jew ir-rilaxx ta’ informazzjoni klassifikata mill-Parti riċeventi fuq bażi ta’ każ b’każ suġġett għall-kunsens tal-Parti provvedenti u skont il-prinċipju tal-kunsens tal-oriġinatur.

3.   Ma għandu jkun possibbli l-ebda rilaxx ġeneriku sakemm ma jkunux ġew maqbula proċeduri bejn il-Partijiet rigward ċerti kategoriji ta’ informazzjoni, rilevanti għall-ħtiġiet speċifiċi tagħhom.

4.   Xejn f’dan il-Ftehim ma għandu jitqies bħala bażi għal rilaxx mandatorju ta’ informazzjoni klassifikata bejn il-Partijiet.

5.   L-informazzjoni klassifikata riċevuta mill-Parti provvedenti tista’ tiġi pprovduta lil kuntrattur jew lil kuntrattur prospettiv biss bil-kunsens bil-miktub minn qabel tal-Parti provvedenti. Qabel tali rilaxx, il-Parti riċeventi għandha tiżgura li l-kuntrattur jew il-kuntrattur prospettiv u l-faċilità tal-kuntrattur huma kapaċi jipproteġu l-informazzjoni u jkollhom approvazzjoni ta’ sigurtà adegwata.

Artikolu 7

Sabiex jiġi stabbilit livell ekwivalenti ta’ protezzjoni għal informazzjoni klassifikata pprovduta jew skambjata bejn il-Partijiet, il-klassifikazzjonijiet tas-sigurtà għandhom jikkorrispondu kif ġej:

UE

Repubblika tas-Serbja

RESTREINT UE

ИНТΕРНО РС jew INTERNO RS

CONFIDENTIEL UE

ПОΒΕРЉИВО РС jew POVERLJIVO RS

SECRET UE

СТРОГО ПОΒΕРЉИВО РС jew STROGO POVERLJIVO RS

TRES SECRET UE/EU TOP SECRET

ДРЖАВНА ТАЈНА РС jew DRŽAVNA TAJNA RS

Artikolu 8

1.   Il-Partijiet għandhom jiżguraw li l-persuni kollha li, fit-twettiq tad-dmirijiet uffiċjali tagħhom jeħtieġu aċċess, jew li d-dmirijiet jew il-funzjonijiet tagħhom jistgħu jagħtu aċċess, għal informazzjoni klassifikata CONFIDENTIEL UE, ПОΒΕРЉИВО РС jew POVJERLJIVO RS, jew ogħla, ipprovduta jew skambjata taħt dan il-Ftehim ikunu ngħataw l-approvazzjoni ta’ sigurtà adegwata qabel ma dawn jingħataw aċċess għal tali informazzjoni.

2.   Il-proċeduri għall-approvazzjoni tas-sigurtà għandhom jitfasslu biex jiġi determinat jekk individwu jistax, b’kont meħud tal-lealtà u l-affidabbiltà tiegħu, ikollu aċċess għal informazzjoni klassifikata.

Artikolu 9

Il-Partijiet għandhom jipprovdu assistenza reċiproka fir-rigward tas-sigurtà tal-informazzjoni klassifikata pprovduta jew skambjata taħt dan il-Ftehim u materji ta’ interess komuni ta’ sigurtà. L-awtoritajiet imsemmija fl-Artikolu 12 għandhom imexxu konsultazzjonijiet u żjajjar ta’ evalwazzjoni reċiproċi ta’ sigurtà biex tiġi stmata l-effettività tal-arranġamenti tas-sigurtà fil-qasam tar-responsabbiltà rispettiva tagħhom stabbiliti skont dak l-Artikolu.

Artikolu 10

1.   Għall-fini ta’ dan il-Ftehim:

(a)

fir-rigward tal-UE, il-korrispondenza kollha għandha tintbagħat mill-Uffiċjal Kap tar-Reġistru tal-Kunsill u għandha tintbagħat minnu/minnha lill-Istati Membri u l-entitajiet imsemmija fl-Artikolu 3, soġġett għall-paragrafu 2;

(b)

fir-rigward tar-Repubblika tas-Serbja, il-korrispondenza kollha għandha tintbagħat permezz tal-Uffiċċju tal-Kunsill għas-Sigurtà Nazzjonali u l-Protezzjoni ta’ Informazzjoni Klassifikata.

2.   Madankollu, il-korrispondenza minn Parti waħda li tkun aċċessibbli biss għal uffiċjali, organi jew servizzi kompetenti speċifiċi ta’ dik il-Parti tista’, għal raġunijiet operattivi, tiġi indirizzata u tkun aċċessibbli biss għal uffiċjali, organi jew servizzi kompetenti speċifiċi tal-Parti l-oħra magħżula b’mod speċifiku bħala riċevituri, b’kont meħud tal-kompetenzi tagħhom u skont il-prinċipju ta’ ħtieġa ta’ tagħrif. Sa fejn tkun ikkonċernata l-UE, tali korrispondenza għandha tiġi trasmessa permezz tal-Uffiċjal Kap tar-Reġistru tal-Kunsill, l-Uffiċjal Kap tar-Reġistru tal-Kummissjoni Ewropea, jew l-Uffiċjal Kap tar-Reġistru tas-SEAE, kif adatt. Sa fejn tkun ikkonċernata r-Repubblika tas-Serbja, tali korrispondenza għandha tiġi trasmessa permezz tal-Uffiċjal Kap tar-Reġistru tal-Missjoni tar-Repubblika tas-Serbia għall-UE.

Artikolu 11

Il-Ministru tal-Affarijiet Barranin tar-Repubblika tas-Serbja, is-Segretarju-Ġenerali tal-Kunsill u l-Membru tal-Kummissjoni Ewropea responsabbli għal kwistjonijiet ta’ siġurtà għandhom jissorveljaw l-implimentazzjoni ta’ dan il-Ftehim.

Artikolu 12

1.   Sabiex dan il-Ftehim jiġi implimentat, għandhom jiġu stabbiliti arranġamenti ta’ sigurtà bejn it-tliet awtoritajiet indikati hawn taħt, fejn kull waħda taġixxi taħt id-direzzjoni u f’isem is-superjuri organizzattivi tagħha, sabiex jiġu stabbiliti l-istandards għall-protezzjoni reċiproka ta’ informazzjoni klassifikata soġġett għal dan il-Ftehim:

—

l-Uffiċċju tal-Kunsill għas-Sigurtà Nazzjonali u l-Protezzjoni ta’ Informazzjoni Klassifikata, għal informazzjoni kklassifikata pprovduta lir-Repubblika tas-Serbja taħt dan il-Ftehim;

—

l-uffiċċju tas-Sigurtà tas-Segretarjat Ġenerali tal-Kunsill, għal informazzjoni klassifikata pprovduta lill-UE taħt dan il-Ftehim;

—

id-Direttorat tas-Sigurtà tal-Kummissjoni Ewropea, għal informazzjoni klassifikata pprovduta jew skambjata taħt dan il-Ftehim fi ħdan il-Kummissjoni Ewropea u fil-bini tagħha.

2.   Qabel ma tiġi pprovduta jew skambjata informazzjoni klassifikata bejn il-Partijiet taħt dan il-Ftehim, l-awtoritajiet tas-sigurtà kompetenti msemmijin fil-paragrafu 1 għandhom jaqblu li l-Parti riċeventi tkun tista’ tipproteġi l-informazzjoni b’mod konsistenti mal-arranġamenti ta’ sigurtà li għandhom jiġu stabbiliti skont dak il-paragrafu.

Artikolu 13

1.   L-awtorità kompetenti ta’ kwalunkwe Parti msemmija fl-Artikolu 12 għandha tinforma immedjatament lill-awtorità kompetenti tal-Parti l-oħra bi kwalunkwe każ ta’ żvelar mhux awtorizzat ippruvat jew suspettat jew telf ta’ informazzjoni klassifikata pprovduta minn dik il-Parti, u għandha twettaq investigazzjoni u għandha tirrapporta r-riżultati lill-Parti l-oħra.

2.   L-awtoritajiet kompetenti msemmijin fl-Artikolu 12 għandhom jistabbilixxu l-proċeduri li għandhom jiġu segwiti f’każijiet bħal dawn.

Artikolu 14

Kull Parti għandha tassumi l-ispejjeż tagħha stess fl-implimentazzjoni ta’ dan il-Ftehim.

Artikolu 15

Xejn f’dan il-Ftehim m’għandu jbiddel il-ftehimiet jew l-arranġamenti eżistenti bejn il-Partijiet, lanqas ftehimiet bejn ir-Repubblika tas-Serbja u l-Istati Membri tal-UE. Dan il-Ftehim m’għandux jipprekludi lill-Partijiet milli jikkonkludu ftehimiet oħra relatati mal-provvediment jew l-iskambju ta’ informazzjoni klassifikata soġġetta għal dan il-Ftehim sakemm dan ma jkunx inkompatibbli mal-obbligi taħt dan il-Ftehim.

Artikolu 16

Kwalunkwe differenza bejn il-Partijiet li tirriżulta mill-interpretazzjoni jew l-applikazzjoni ta’ dan il-Ftehim għandha tiġi indirizzata permezz ta’ negozjar bejniethom. Matul in-negozjar iż-żewġ Partijiet għandhom ikomplu jwettqu l-obbligi kollha tagħhom taħt dan il-Ftehim.

Artikolu 17

1.   Dan il-Ftehim għandu jidħol fis-seħħ fl-ewwel jum tal-ewwel xahar wara li l-Partijiet ikunu nnotifikaw lil xulxin bit-tlestija tal-proċeduri interni meħtieġa għal dan l-għan.

2.   Kull Parti għandha tinnotifika lill-Parti l-oħra bi kwalunkwe tibdil fil-liġijiet u r-regolamenti tagħha li jista’ jaffettwa l-protezzjoni tal-informazzjoni klassifikata msemmija f’dan il-Ftehim.

3.   Dan il-Ftehim jista’ jiġi rivedut sabiex jiġu kkunsidrati emendi possibbli fuq talba ta’ kwalunkwe Parti.

4.   Kwalunkwe emenda magħmula lil dan il-Ftehim għandha ssir biss bil-miktub u bi ftehim komuni bejn il-Partijiet. Għandha tidħol fis-seħħ ma’ notifika reċiproca kif previst taħt il-paragrafu 1.

Artikolu 18

Dan il-Ftehim jista’ jiġi terminat minn Parti waħda b’notifika bil-miktub tat-terminazzjoni mogħtija lill-Parti l-oħra. Tali terminazzjoni għandha ssir effettiva sitt xhur wara li l-Parti l-oħra tkun irċeviet in-notifika, iżda ma għandhiex taffettwa l-obbligi li l-Partijiet ikunu daħlu għalihom taħt id-dispożizzjonijiet ta’ dan il-Ftehim. B’mod partikolari, kull informazzjoni klassifikata pprovduta jew skambjata skont dan il-Ftehim għandha tibqa’ tiġi protetta skont id-dispożizzjonijiet stabbiliti hawnhekk.

B’xiehda ta’ dan is-sottoskritti, debitament awtorizzati rispettivament, iffirmaw dan il-Ftehim.

Magħmul duplikatament f’Belgrad, dan is-sitta u għoxrin jum ta’ Mejju fis-sena 2011, kull eżemplari bl-Ingliż.

Għall-Unjoni Ewropea

Għar-Repubblika tas-Serbja

Top