12.2.2011

MT

Il-Ġurnal Uffiċjali tal-Unjoni Ewropea

L 38/33

---

DEĊIŻJONI TAL-KUNSILL

tal-25 ta’ Mejju 2010

dwar l-iffirmar tal-Ftehim dwar ċerti aspetti tas-servizzi bl-ajru bejn l-Unjoni Ewropea u l-Istati Uniti Messikani

(2011/94/UE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 100(2) flimkien mal-Artikolu 218(5) tiegħu,

Wara li kkunsidra l-proposta mill-Kummissjoni Ewropea,

Billi:

(1)	Bid-Deċiżjoni tiegħu tal-5 ta’ Ġunju 2003, il-Kunsill awtorizza lill-Kummissjoni sabiex tiftaħ in-negozjati ma’ pajjiżi terzi dwar il-bdil ta’ ċerti dispożizzjonijiet fi ftehimiet bilaterali eżistenti bi ftehim fil-livell tal-Unjoni.

(2)	F’isem l-Unjoni, il-Kummissjoni nnegozjat Ftehim dwar ċerti aspetti tas-servizzi bl-ajru (minn hawn ‘il quddiem “il-Ftehim”) mal-Istati Uniti Messikani f’konformità mal-mekkaniżmi u d-Direttivi fl-Anness għad-Deċiżjoni tal-Kunsill tal-5 ta’ Ġunju 2003.

(3)	Il-Ftehim innegozjat mill-Kummissjoni għandu jiġi ffirmat, soġġett għall-konklużjoni possibbli tiegħu f’data aktar ‘il quddiem,

ADOTTA DIN ID-DEĊIŻJONI:

Artikolu 1

L-iffirmar tal-Ftehim dwar ċerti aspetti tas-servizzi bl-ajru bejn l-Unjoni Ewropea u l-Istati Uniti Messikani huwa b’dan approvat f’isem l-Unjoni, soġġett għall-konklużjoni tiegħu.

It-test tal-Ftehim huwa anness ma’ din id-Deċiżjoni.

Artikolu 2

Il-President tal-Kunsill huwa b’dan awtorizzat jaħtar il-persuna/i bis-setgħa li tiffirma/jiffirmaw il-Ftehim f’isem l-Unjoni soġġett għall-konklużjoni tiegħu.

Artikolu 3

Din id-Deċiżjoni għandha tidħol fis-seħħ fid-data tal-adozzjoni tagħha.

Artikolu 4

Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.

---

12.2.2011

MT

Il-Ġurnal Uffiċjali tal-Unjoni Ewropea

L 38/33

---

FTEHIM

dwar ċerti aspetti tas-servizzi tal-ajru bejn l-Unjoni Ewropea u l-Istati Uniti Messikani

L-UNJONI EWROPEA,

minn naħa waħda, u

L-ISTATI UNITI MESSIKANI,

min-naħa l-oħra,

(minn hawn 'il quddiem imsejħin “il-Partijiet”), f’konformità mal-kompetenzi rispettivi tagħhom;

WARA LI KKUNSIDRAW id-dispożizzjonijiet tal-ftehimiet bilaterali dwar is-servizzi bl-ajru bejn l-Istati Membri tal-Unjoni Ewropea u l-Istati Uniti Messikani,

FILWAQT LI JINNUTAW li fil-5 ta’ Ġunju 2003, l-Istati Membri tal-Unjoni Ewropea awtorizzaw lill-Kummissjoni Ewropea temenda ċerti dispożizzjonijiet tal-ftehimiet bilaterali dwar is-servizzi bl-ajru tagħhom fi ftehim bejn l-Unjoni Ewropea u pajjiżi terzi,

FILWAQT LI JINNUTAW li l-Unjoni Ewropea għandha l-kompetenza esklussiva fir-rigward ta’ diversi aspetti li jistgħu jiġu inklużi fi ftehimiet bilaterali dwar is-servizzi bl-ajru li l-Istati Membri tal-Unjoni Ewropea jidħlu jew ikunu daħlu fihom ma’ pajjiżi terzi,

FILWAQT LI JAGĦRFU l-importanza li r-relazzjoni bejn l-Istati Membri tal-Unjoni Ewropea u l-Istati Uniti Messikani tiġi aġġornata fir-rigward tas-servizzi bl-ajru, sabiex ikun hemm bażi legali soda għas-servizzi bl-ajru bejn l-Unjoni Ewropea u l-Istati Uniti Messikani u sabiex tiġi żgurata l-kontinwità ta’ dawn is-servizzi bl-ajru,

FILWAQT LI JSOSTNU l-interess tagħhom li jippromwovu l-kompetizzjoni ħielsa fil-qasam tas-servizzi bl-ajru, u li jevitaw li kumpaniji tal-ajru jidħlu fi ftehimiet li jkollhom bħala l-għan tagħhom li jtellfu, jirrestrinġu jew joħolqu distorsjoni fil-kompetizzjoni,

FILWAQT LI JINNUTAW li mhuwiex għan tal-Unjoni Ewropea li taffettwa l-bilanċ bejn it-trasportaturi bl-ajru tal-Unjoni Ewropea u t-trasportaturi bl-ajru tal-Istati Uniti Messikani, jew li temenda d-dispożizzjonijiet ta’ ftehimiet bilaterali eżistenti dwar is-servizzi bl-ajru li jikkonċernaw id-drittijiet tat-traffiku,

FTIEHMU KIF ĠEJ:

Artikolu 1

Dispożizzjonijiet ġenerali

1.   Ir-referenzi għaċ-ċittadini ta’ Stat Membru tal-Unjoni Ewropea li huwa Parti fi kwalunkwe wieħed mill-ftehimiet bilaterali elenkati fl-Anness 1 għandhom jinftiehmu bħala referenzi għaċ-ċittadini tal-Istati Membri tal-Unjoni Ewropea.

2.   Ir-referenzi għat-trasportaturi bl-ajru tal-Istat Membru tal-Unjoni Ewropea li huwa Parti fi kwalunkwe wieħed mill-ftehimiet bilaterali elenkati fl-Anness I għandhom jinftiehmu bħala referenzi għat-trasportaturi bl-ajru ddeżinjati minn dak l-Istat Membru tal-Unjoni Ewropea.

3.   Dan il-Ftehim jimmodifika ċerti dispożizzjonijiet tal-ftehimiet bilaterali eżistenti dwar is-servizzi bl-ajru elenkati fl-Anness I, mingħajr ma jaffettwa d-drittijiet tat-traffiku eżistenti.

Artikolu 2

Deżinjazzjoni minn Stat Membru tal-Unjoni Ewropea

1.   Id-dispożizzjonijiet tal-paragrafi 2 u 3 ta’ dan l-Artikolu għandhom jipprevalu fuq id-dispożizzjonijiet li jikkorrispondu magħhom fl-Artikoli elenkati fil-punti (a) u (b) rispettivament tal-Anness II, f’dak li għandu x’jaqsam mad-deżinjazzjoni ta’ trasportatur bl-ajru minn Stat Membru tal-Unjoni Ewropea, l-awtorizzazzjonijiet u l-permessi mogħtija mill-Istati Uniti Messikani, u r-rifjut, ir-revoka, is-sospensjoni jew il-limitazzjoni tal-awtorizzazzjonijiet jew tal-permessi tat-trasportatur bl-ajru, rispettivament.

2.   Mal-wasla ta’ deżinjazzjoni minn Stat Membru tal-Unjoni Ewropea, l-Istati Uniti Messikani għandhom joħorġu l-awtorizzazzjonijiet u l-permessi rilevanti mingħajr dewmien, bil-kondizzjoni li:

(a)	it-trasportatur bl-ajru jkun stabbilit fit-territorju tal-Istat Membru tal-Unjoni Ewropea li jkun qed jiddeżinjah skont it-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea u jkollu liċenzja operattiva valida f’konformità mal-liġi tal-Unjoni, u

(b)	kontroll regolatorju effettiv tat-trasportatur bl-ajru huwa mħaddem u miżmum mill-Istat Membru tal-Unjoni Ewropea responsabbli għall-ħruġ taċ-Ċertifikat tal-Operatur tal-Ajru tiegħu u l-awtorità ajrunawtika rilevanti tkun identifikata b’mod ċar fid-deżinjazzjoni, u

(c)	it-trasportatur bl-ajru jkun il-proprjetà, direttament jew permezz tal-akbar sehem azzjonarju, u kkontrollat effettivament mill-Istati Membri tal-Unjoni Ewropea jew miċ-ċittadini ta’ tali pajjiżi jew mill-pajjiżi elenkati fl-Anness III jew miċ-ċittadini ta’ dawk il-pajjiżi l-oħra.

3.   L-Istati Uniti Messikani jistgħu jirrifjutaw, jirrevokaw, jissospendu jew jillimitaw l-awtorizzazzjonijiet jew il-permessi mogħtija lil trasportatur bl-ajru ddeżinjat minn Stat Membru tal-Unjoni Ewropea fejn ma tiġix sodisfatta waħda mill-kondizzjonijiet imsemmija fil-paragrafu 2.

Fl-eżerċizzju tad-dritt tagħhom taħt dan il-paragrafu, l-Istati Uniti Messikani m’għandhomx jiddiskriminaw bejn trasportaturi bl-ajru mill-Unjoni Ewropea abbażi tan-nazzjonalità.

Artikolu 3

Sikurezza

1.   Id-dispożizzjonijiet tal-paragrafu 2 ta’ dan l-Artikolu għandhom jikkomplementaw l-Artikoli elenkati fl-Anness II, punt (c).

2.   Fejn Stat Membru tal-Unjoni Ewropea jkun iddeżinja trasportatur bl-ajru li l-kontroll regolatorju fuqu huwa eżerċitat u miżmum minn Stat Membru ieħor tal-Unjoni Ewropea, id-drittijiet tal-Istati Uniti Messikani skont id-dispożizzjonijiet tas-sikurezza tal-ftehim bejn l-Istat Membru tal-Unjoni Ewropea li ddeżinja t-trasportatur bl-ajru u l-Istati Uniti Messikani għandhom japplikaw b’mod ugwali fir-rigward tal-adozzjoni, l-eżerċizzju u ż-żamma tal-istandards tas-sikurezza mill-Istat Membru l-ieħor tal-Unjoni Ewropea u fir-rigward tal-awtorizzazzjoni għall-operat ta’ dak it-trasportatur bl-ajru.

Artikolu 4

Kompatibbiltà mar-regoli tal-kompetizzjoni

1.   L-ebda wieħed mill-ftehimiet bilaterali bejn l-Istati Uniti Messikani u l-Istati Membri tal-Unjoni Ewropea m’għandu:

(a)	jiffavorixxi l-adozzjoni ta’ akkordji bejn impriżi, deċiżjonijiet minn assoċjazzjonijiet ta’ impriżi jew prattiki miftiehma li jipprevjenu, joħolqu distorsjoni jew jirrestrinġu l-kompetizzjoni;

(b)	isaħħaħ l-effetti ta’ kwalunkwe akkordju, deċiżjoni jew prattika miftiehma bħal dawn; jew

(ċ)	jiddelega lil operaturi ekonomiċi privati r-responsabbiltà għat-teħid ta’ miżuri li jipprevjenu, joħolqu distorsjoni jew jirrestrinġu l-kompetizzjoni.

2.   Kwalunkwe dispożizzjoni fil-ftehimiet bilaterali elenkati fl-Anness I li tkun inkompatibbli mal-paragrafu 1 m’għandhiex tapplika.

Artikolu 5

Annessi għall-Ftehim

L-Annessi għal dan il-Ftehim għandhom jiffurmaw parti integrali minnu.

Artikolu 6

Reviżjoni u emendar

Il-Partijiet jistgħu, f’kull ħin, jirrevedu jew jemendaw dan il-Ftehim bi qbil reċiproku, bil-miktub. Dawk il-modifiki għandhom jidħlu fis-seħħ skont il-proċedura mniżżla fl-Artikolu 7(1) ta’ dan il-Ftehim.

Artikolu 7

Dħul fis-seħħ

1.   Dan il-Ftehim għandu jidħol fis-seħħ tletin (30) jum wara d-data tal-aħħar nota li permezz tagħha l-Partijiet ikunu nfurmaw lil xulxin bil-miktub, permezz tal-mezzi diplomatiċi, li l-proċeduri interni rispettivi tagħhom meħtieġa għal dan il-għan ikunu tlestew.

2.   Dan il-Ftehim għandu japplika għall-ftehimiet bilaterali elenkati fl-Anness I, punt (b) malli dawn tal-aħħar ikunu daħlu fis-seħħ.

3.   Dan il-Ftehim għandu jipprevali f’każ li jkun hemm differenza bejn id-dispożizzjonijiet ta’ dan il-Ftehim u l-ftehimiet bilaterali elenkati fl-Anness I.

Artikolu 8

Terminazzjoni

1.   F’każ li kwalunkwe wieħed mill-ftehimiet bilaterali elenkati fl-Anness I jiġi tterminat, id-dispożizzjonijiet kollha ta’ dan il-Ftehim li jkollhom x’jaqsmu ma’ dak il-ftehim għandhom jiġu tterminati fl-istess ħin.

2.   F’każ li l-ftehimiet kollha bilaterali elenkati fl-Anness I jiġu tterminati, dan il-Ftehim għandu jiġi tterminat fl-istess ħin meta jiġi tterminat l-aħħar wieħed minn dawk il-ftehimiet.

---

ANNESS I

LISTA TA’ FTEHIMIET BILATERALI MSEMMIJA FL-ARTIKOLU 1 TA’ DAN IL-FTEHIM

(a)

Ftehimiet dwar is-servizzi bl-ajru bejn l-Istati Uniti Messikani u l-Istati Membri tal-Unjoni Ewropea li, fid-data tal-iffirmar ta’ dan il-Ftehim, ġew konklużi u/jew iffirmati: — Ftehim dwar it-Trasport bl-Ajru bejn il-Gvern tal-Istati Uniti Messikani u l-Gvern Federali tal-Awstrija, iffirmat fi Vjenna, l-Awstrija, fis-27 ta’ Marzu 1995, minn hawn 'il quddiem imsejjaħ “il-Ftehim Messiku – Awstrija”, — Ftehim dwar it-Trasport bl-Ajru bejn il-Gvern tal-Istati Uniti Messikani u l-Gvern tar-Renju tal-Belġju, iffirmat fil-Belt tal-Messiku, fis-26 ta’ April 1999, minn hawn 'il quddiem imsejjaħ “il-Ftehim Messiku – Belġju”, — Ftehim dwar it-Trasport bl-Ajru bejn il-Gvern tal-Istati Uniti Messikani u l-Gvern tar-Repubblika Federali Ċeka u Slovakka, iffirmat fil-Belt tal-Messiku nhar l-14 ta' Awwissu 1990, minn hawn 'il quddiem imsejjaħ “il-Ftehim Messiku – Repubblika Ċeka”, — Ftehim dwar it-Trasport bl-Ajru bejn il-Gvern tal-Istati Uniti Messikani u l-Gvern tar-Repubblika Franċiża, iffirmat f’Pariġi, Franza, fit-18 ta' Mejju 1993, emendat bil-Ftehim li Jemenda u Jissupplimenta l-Ftehim dwar it-Trasport bl-Ajru bejn il-Gvern tal-Istati Uniti Messikani u l-Gvern tar-Repubblika Franċiża, konkluż permezz ta’ skambju ta’ noti datat f’Pariġi u fil-Belt tal-Messiku fit-13 ta’ Jannar u l-4 ta’ Frar 2004, minn hawn 'il quddiem imsejjaħ “il-Ftehim Messiku – Franza”, — Ftehim dwar it-Trasport bl-Ajru bejn l-Istati Uniti Messikani u r-Repubblika Federali tal-Ġermanja, iffirmat fil-Belt tal-Messiku, fit-8 ta' Marzu 1967, minn hawn 'il quddiem imsejjaħ “il-Ftehim Messiku – Ġermanja”, — Ftehim dwar it-Trasport bl-Ajru bejn l-Istati Uniti Messikani u r-Repubblika Taljana, iffirmat fil-Belt tal-Messiku fit-23 ta' Diċembru 1965, emendat bil-Ftehim li Jemenda u Jissupplimenta l-Ftehim dwar it-Trasport bl-Ajru bejn l-Istati Uniti Messikani u l-Gvern tar-Repubblika Taljana tat-23 ta’ Diċembru 1965, konkluż permezz ta’ skambju ta’ noti datat f’Ruma, l-Italja fit-2 t’Awwissu u s-7 ta’ Diċembru 2004, minn hawn 'il quddiem imsejjaħ “il-Ftehim Messiku – Italja”, — Ftehim bejn il-Gvern tal-Istati Uniti Messikani u l-Gvern tal-Gran Dukat tal-Lussemburgu dwar it-trasport bl-ajru, iffirmat fil-Belt tal-Messiku, fid-19 ta' Marzu 1996, minn hawn 'il quddiem imsejjaħ “il-Ftehim Messiku – Lussemburgu”, — Ftehim dwar it-Trasport bl-Ajru bejn il-Gvern tal-Istati Uniti Messikani u l-Gvern tar-Renju tal-Olanda, iffirmat fil-Belt tal-Messiku, fis-6 ta' Diċembru 1971, emendat bil-Ftehim li Jemenda l-Ftehim dwar it-Trasport bl-Ajru tas-6 ta’ Diċembru 1971 bejn il-Gvern tal-Istati Uniti Messikani u l-Gvern tar-Renju tal-Olanda, konkluż permezz ta’ skambju ta’ noti datat l-24 ta’ Awwissu 1992 fil-Belt tal-Messiku, minn hawn 'il quddiem imsejjaħ “il-Ftehim Messiku – Olanda”, — Ftehim dwar is-Servizzi tal-Ajru bejn il-Gvern tal-Istati Uniti Messikani u l-Gvern tar-Repubblika tal-Polonja, iffirmat fil-Belt tal-Messiku, fil-11 ta' Ottubru 1990, minn hawn 'il quddiem imsejjaħ “il-Ftehim Messiku – Polonja”, — Ftehim dwar it-Trasport Ċivili bl-Ajru bejn il-Gvernijiet tal-Messiku u tal-Portugall, iffirmat f’Lisbona, il-Portugall fit-22 ta' Ottubru 1948, minn hawn 'il quddiem imsejjaħ “il-Ftehim Messiku – Portugall”, — Ftehim dwar it-Trasport bl-Ajru bejn il-Gvern tal-Istati Uniti Messikani u l-Gvern tar-Renju ta' Spanja, iffirmat fil-Belt tal-Messiku, fil-21 ta’ Novembru 1978, minn hawn 'il quddiem imsejjaħ “il-Ftehim Messiku – Spanja”, — Ftehim bejn il-Gvern tal-Istati Uniti Messikani u l-Gvern tar-Renju Unit tal-Gran Brittanja u l-Irlanda ta' Fuq dwar is-servizzi bl-ajru, iffirmat fil-Belt tal-Messiku, fit-18 ta’ Novembru 1988, minn hawn 'il quddiem imsejjaħ “il-Ftehim Messiku – Renju Unit”.

(b)

Ftehimiet dwar is-servizzi bl-ajru bejn l-Istati Uniti Messikani u l-Istati Membri tal-Unjoni Ewropea li, fid-data tal-iffirmar ta' dan il-Ftehim, għadhom ma daħlux fis-seħħ: — Ftehim dwar it-Trasport bl-Ajru bejn l-Istati Uniti Messikani u r-Renju ta’ Spanja, iffirmat f’Madrid, Spanja, fit-8 ta' April 2003.

---

ANNESS II

LISTA TAL-ARTIKOLI FIL-FTEHIMIET ELENKATI FL-ANNESS I U MSEMMIJA FL-ARTIKOLI 2 U 3 TA’ DAN IL-FTEHIM

(a)

Deżinjazzjoni minn Stat Membru: — Artikolu 3 tal-Ftehim Messiku – Awstrija, — Artikolu 3 tal-Ftehim Messiku – Belġju, — Artikolu 3 tal-Ftehim Messiku – Repubblika Ċeka, — Artikolu 3 tal-Ftehim Messiku – Franza, — Artikolu 3 tal-Ftehim Messiku – Ġermanja, — Artikolu 3 tal-Ftehim Messiku – Italja, — Artikolu 3 tal-Ftehim Messiku – Lussemburgu, — Artikolu 3 tal-Ftehim Messiku – Olanda, — Artikolu 3 tal-Ftehim Messiku – Polonja, — Artikolu II tal-Ftehim Messiku – Portugall, — Artikolu 3 tal-Ftehim Messiku – Spanja, — Artikolu 4 tal-Ftehim Messiku – Renju Unit.

(b)

Rifjut, revoka, sospensjoni jew limitazzjoni tal-awtorizzazzjonijiet jew tal-permessi: — Artikolu 4 tal-Ftehim Messiku – Awstrija, — Artikolu 5 tal-Ftehim Messiku – Belġju, — Artikolu 4 tal-Ftehim Messiku – Repubblika Ċeka, — Artikolu 4 tal-Ftehim Messiku – Franza, — Artikolu 4, l-ewwel sentenza, tal-Ftehim Messiku – Ġermanja, — Artikolu 4 tal-Ftehim Messiku – Italja, — Artikolu 4 tal-Ftehim Messiku – Lussemburgu, — Artikolu 4 tal-Ftehim Messiku – Olanda, — Artikolu 4 tal-Ftehim Messiku – Polonja, — Artikolu VII tal-Ftehim Messiku – Portugall, — Artikolu 4 tal-Ftehim Messiku – Spanja, — Artikolu 5 tal-Ftehim Messiku – Renju Unit.

(c)

Sikurezza: — Artikolu 6 tal-Ftehim Messiku – Awstrija, — Artikolu 7 tal-Ftehim Messiku – Belġju, — Artikolu 6 tal-Ftehim Messiku – Repubblika Ċeka, — Artikolu 6a tal-Ftehim Messiku – Franza, — Artikolu 6a tal-Ftehim Messiku – Italja, — Artikolu 6 tal-Ftehim Messiku – Lussemburgu, — Artikolu 6 tal-Ftehim Messiku – Olanda, — Artikolu V tal-Ftehim Messiku – Portugall, — Artikolu 8 tal-Ftehim Messiku – Renju Unit.

---

ANNESS III

LISTA TA’ PAJJIŻI OĦRA MSEMMIJA FL-ARTIKOLU 2 TA’ DAN IL-FTEHIM

(a)	Ir-Repubblika tal-Islanda (taħt il-Ftehim dwar iż-Żona Ekonomika Ewropea).

(b)	Il-Prinċipat tal-Liechtenstein (taħt il-Ftehim dwar iż-Żona Ekonomika Ewropea).

(c)	Ir-Renju tan-Norveġja (taħt il-Ftehim dwar iż-Żona Ekonomika Ewropea).

(d)	Il-Konfederazzjoni Svizzera (taħt il-Ftehim bejn il-Komunità Ewropea u l-Konfederazzjoni Svizzera dwar it-Trasport bl-Ajru).