EUR-Lex Access to European Union law
This document is an excerpt from the EUR-Lex website
Document 32010R1232
Regulation (EU) No 1232/2010 of the European Parliament and of the Council of 15 December 2010 concerning European Union financial contributions to the International Fund for Ireland (2007 to 2010)
Regolament (UE) Nru 1232/2010 tal-Parlament Ewropew u tal-Kunsill tal- 15 ta' Diċembru 2010 dwar il-kontribuzzjonijiet finanzjarji tal-Unjoni Ewropea lill-Fond Internazzjonali għall-Irlanda (2007-2010)
Regolament (UE) Nru 1232/2010 tal-Parlament Ewropew u tal-Kunsill tal- 15 ta' Diċembru 2010 dwar il-kontribuzzjonijiet finanzjarji tal-Unjoni Ewropea lill-Fond Internazzjonali għall-Irlanda (2007-2010)
ĠU L 346, 30.12.2010, p. 1–4
(BG, ES, CS, DA, DE, ET, EL, EN, FR, GA, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 31/12/2010
30.12.2010 |
MT |
Il-Ġurnal Uffiċjali tal-Unjoni Ewropea |
L 346/1 |
REGOLAMENT (UE) Nru 1232/2010 TAL-PARLAMENT EWROPEW U TAL-KUNSILL
tal-15 ta' Diċembru 2010
dwar il-kontribuzzjonijiet finanzjarji tal-Unjoni Ewropea lill-Fond Internazzjonali għall-Irlanda (2007-2010)
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 175 flimkien mal-Artikolu 352(1) tiegħu,
Wara li kkunsidraw il-proposti tal-Kummissjoni Ewropea,
Wara li l-abbozz tal-att leġislattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew (1),
Wara li kkonsultaw lill-Kumitat tar-Reġjuni,
Filwaqt li jaġixxu skont il-proċedura leġiżlattiva ordinarja u r-rekwiżit għal unanimità fil-Kunsill previsti fl-ewwel sentenza tal-Artikolu 352(1) tat-Trattat dwar il-Funzjonament tal-Unjoni Ewropea (2),
Billi:
(1) |
Il-Fond Internazzjonali għall-Irlanda (“il-Fond”) ġie stabbilit fl-1986 bil-Ftehim tat-18 ta' Settembru 1986 bejn il-Gvern tal-Irlanda u l-Gvern tar-Renju Unit tal-Gran Brittanja u l-Irlanda ta' Fuq dwar il-Fond Internazzjonali għall-Irlanda (“il-Ftehim”) sabiex jitħeġġeġ il-progress ekonomiku u soċjali, u biex jitħeġġu l-kuntatti, id-djalogu u r-rikonċiljazzjoni bejn in-nazzjonalisti u l-unjonisti fl-Irlanda sħiħa, fl-implimentazzjoni ta' wieħed mill-objettivi speċifikati mill-Ftehim Anglo-Irlandiż tal-15 ta' Novembru 1985. |
(2) |
L-Unjoni, filwaqt li tirrikonoxxi li l-objettivi tal-Fond huma riflessjoni ta' dawk imfittxija minnha stess, tat kontributi finanzjarji għall-Fond sa mill-1989. Għall-perjodu 2005 sa 2006 ġew impenjati EUR 15 miljun mill-baġit tal-Komunità għal kull waħda mis-snin 2005 u 2006 bi qbil mar-Regolament tal-Kunsill (KE) Nru 177/2005 tal-24 ta' Jannar 2005 rigward il-kontributi finanzjarji tal-Komunità għall-Fond Internazzjonali għall-Irlanda (3). Dak ir-Regolament skada fil-31 ta' Diċembru 2006. |
(3) |
Il-valutazzjonijiet imwettqa skont l-Artikolu 5 tar-Regolament (KE) Nru 177/2005 kkonfermaw il-ħtieġa għal appoġġ ulterjuri għal attivitajiet tal-Fond, filwaqt li jissoktaw is-sinerġiji ta' tisħiħ tal-objettivi u l-koordinazzjoni tiegħu għall-interventi tal-Fondi Strutturali, b’mod partikolari mal-Programm Speċjali għall-Paċi u r-Rikonċiljazzjoni fl-Irlanda ta' Fuq u l-Pajjiżi Konfinali tal-Irlanda (minn issa ’l quddiem “il-programm PEACE”) stabbilit skont ir-Regolament tal-Kunsill (KE) Nru 1260/1999 tal-21 ta' Ġunju 1999 li jistipula dispożizzjonijiet ġenerali dwar il-Fondi Strutturali (4). |
(4) |
Il-proċess ta' paċi fl-Irlanda ta' Fuq jeħtieġ kontinwazzjoni ta' appoġġ mill-Unjoni lill-Fond, lil hinn mill-31 ta' Diċembru 2006. Bħala rikonoxximent tal-isforz speċjali għall-proċess ta' paċi, il-programm PEACE ġie allokat appoġġ addizzjonali mill-Fondi Strutturali għall-perjodu 2007 sal-2013 skont il-paragrafu 22 tal-Anness II tar-Regolament tal-Kunsill (KE) Nru 1083/2006 tal-11 ta' Lulju 2006 li jistipula dispożizzjonijiet ġenerali dwar il-Fond Ewropew tal-Iżvilupp Reġjonali, il-Fond Soċjali Ewropew u l-Fond ta' Koeżjoni u li jirrevoka r-Regolament (KE) Nru 1260/1999 (5). |
(5) |
Waqt il-laqgħa tiegħu fi Brussell fil-15 u s-16 ta' Diċembru 2005, il-Kunsill Ewropew stieden lill-Kummissjoni sabiex tieħu l-passi meħtieġa bil-ħsieb ta' appoġġ issuktat tal-Komunità għall-Fond hekk kif dieħel fil-fażi finali kruċjali ta' xogħlu sal-2010. |
(6) |
L-għan ewlieni ta' dan ir-Regolament hu li jappoġġa l-paċi u r-rikonċiljazzjoni permezz ta' firxa ta' attivitajiet usa’ minn dawk koperti mill-Fondi Strutturali, u li jestendu lil hinn mill-ambitu tal-politika tal-Unjoni dwar il-koeżjoni ekonomika u soċjali. |
(7) |
Il-kontribuzzjonijiet tal-Unjoni lill-Fond għandhom jieħdu s-sura ta' kontribuzzjonijiet finanzjarji għas-snin 2007, 2008, 2009 u 2010, u b’hekk jintemmu fl-istess waqt li tintemm il-ħajja tal-Fond. |
(8) |
Fl-allokazzjoni tal-kontribuzzjonijiet tal-Unjoni, il-Fond għandu jagħti priorità lill-proġetti li min-natura tagħhom japplikaw bejn il fruntieri, jew madwar il-Komunità, b’tali mod li jikkumplementaw l-attivitajiet iffinanzjati mill-Programm PEACE għall-perjodu bejn l-2007 sal-2010. |
(9) |
Skont il-Ftehim, il-kontributuri finanzjarji kollha tal-Fond għandhom jipparteċipaw bħala osservaturi fil-laqgħat tal-Bord tal-Fond. |
(10) |
Huwa essenzjali li tiġi żgurata koordinazzjoni xierqa bejn l-attivitajiet tal-Fond u dawk finanzjati taħt il-Fondi Strutturali previsti mill-Artikolu 175 tat-Trattat dwar il-Funzjonament tal-Unjoni Ewropea, b’mod partikolari l-Programm PEACE. |
(11) |
Dan ir-Regolament jistabbilixxi pakkett finanzjarju għat-tul ta' żmien kollu tal-Fond li jikkostitwixxi r-referenza prinċipali, fit-tifsira tal-punt 37 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba (6), għall-awtorità baġitarja matul il-proċedura annwali baġitarja. |
(12) |
L-ammont tal-kontribuzzjonijiet tal-Unjoni lill-Fond għandu jkun ta' EUR 15-il miljun għal kull waħda mis-snin 2007, 2008, 2009 u 2010, espressi f’valuri attwali. |
(13) |
L-istrateġija tal-Fond imniedi għall-fażi finali tal-attivitajiet tiegħu (mill-2006 sal-2010) u intitolata “Naqsmu dan l-Ispazju” tiffoka fuq erba’ oqsma ewlenin: il-bini ta' pedamenti għal rikonċiljazzjoni fl-aktar komunitajiet marġinalizzati, il-bini ta' pontijiet għall-kuntatt bejn komunitajiet diviżi, ċaqliq lejn soċjetà aktar integrata u t-tħollija ta' patrimonju. Konsegwentement, l-għan aħħari tal-Fond u ta' dan ir-Regolament huwa li jinkoraġġixxi r-rikonċiljazzjoni inter-komunitarja. |
(14) |
L-appoġġ tal-Unjoni jikkontribwixxi biex isaħħaħ is-solidarjetà bejn l-Istati Membri u l-popli tagħhom. |
(15) |
L-Għajnuna mill-Fond għandha titqies bħala waħda effettiva fuq il-bażi unika tal-grad sa fejn jirnexxielha tiġġenera titjib ekonomiku u soċjali sostenibbli u ma tintużax bħala sostitut għal infiq ieħor pubbliku jew privat. |
(16) |
Ir-Regolament tal-Kunsill (KE) Nru 1968/2006 tal-21 ta' Diċembru 2006 li għandu x’jaqsam mal-kontribuzzjonijiet finanzjarji tal-Komunità lill-Fond Internazzjonali għall-Irlanda (mill-2007 sal-2010) (7) stabbilixxa l-ammont ta' referenza finanzjarja għall-implimentazzjoni tal-Fond għall-perjodu mill-2007 sal-2010. |
(17) |
Fis-sentenza tagħha tat-3 ta' Settembru 2009 fil-Kawża C–166/07 (Il-Parlament Ewropew v il-Kunsill tal-Unjoni Ewropea) (8), il-Qorti tal-Ġustizzja annullat ir-Regolament (KE) Nru 1968/2006 billi kien imsejjes biss fuq l-Artikolu 308 tat-Trattat li jistabbilixxi l-Komunità Ewropea (Trattat tal-KE), waqt li ddeċidiet li t-tielet paragrafu tal-Artikolu 159 tat-Trattat tal-KE u l-Artikolu 308 tat-Trattat tal-KE kienu l-bażi legali xierqa. Madankollu, il-Qorti ddeċidiet ukoll li l-effetti tar-Regolament (KE) Nru 1968/2006 kellhom jinżammu sad-dħul fis-seħħ, sa perjodu raġonevoli, ta' regolament ġdid adottat fuq bażijiet legali xierqa u li l-annullament tar-Regolament (KE) Nru 1968/2006 ma kellux jaffettwa l-validità tal-ħlasijiet li saru jew il-garanziji mogħtija skont dan ir-Regolament. F’dan ir-rigward huwa meħtieġ li, għall-finijiet taċ-ċertezza legali, isir provvediment għall-applikazzjoni b’effett retroattiv tal-Artikolu 6 ta' dan ir-Regolament billi dan jirrigwarda l-perjodu sħiħ tal-programm 2007 sal-2010, |
ADOTTAW DAN IR-REGOLAMENT:
Artikolu 1
Il-pakkett finanzjarju għall-implimentazzjoni tal-Fond Internazzjonali għall-Irlanda (“il-Fond”) għall-perjodu 2007 sal-2010 għandu jkun ta' EUR 60 miljun.
L-approprjazzjonijiet annwali għandhom ikunu awtorizzati mill-awtorità baġitarja fi ħdan il-limitu tal-qafas finanzjarju.
Artikolu 2
Il-kontribuzzjonijiet għandhom jintużaw mill-Fond skont il-Ftehim tat-18 ta' Settembru 1986 bejn il-Gvern tal-Irlanda u l-Gvern tar-Renju Unit tal-Gran Brittanja u l-Irlanda ta' Fuq f’dak li għandu x’jaqsam mal-Fond Internazzjonali għall-Irlanda (“il-Ftehim”).
Fl-allokazzjoni tal-kontribuzzjonijiet il-Fond għandu jagħti prijorità lill-proġetti ta' natura transkonfinali jew transkomunitarja, b’tali mod li jikkomplementa l-attivitajiet iffinanzjati mill-Fondi Strutturali, u speċjalment dawk tal-Programm Speċjali għall-Paċi u r-Rikonċiljazzjoni fl-Irlanda ta' Fuq u l-Pajjiżi Konfinali tal-Irlanda (“il-Programm PEACE”).
Il-kontribuzzjonijiet għandhom jiġu użati b’mod li jwasslu għal żvilupp soċjali u ekonomiku sostenibbli fl-oqsma kkonċernati. Huma m’għandhomx jintużaw bħala sostitut għal infiq ieħor pubbliku jew privat.
Artikolu 3
Il-Kummissjoni għandha tirrappreżenta lill-Unjoni bħala osservatur fil-laqgħat tal-Bord tal-Fond.
Il-Fond għandu jkun rappreżentat bħala osservatur fil-laqgħat tal-Kumitat ta' Sorveljanza tal-programm PEACE, u f’interventi oħrajn tal-Fondi Strutturali skont kif ikun xieraq.
Artikolu 4
Il-Kummissjoni għandha, f’koperazzjoni mal-Bord tal-Fond, tiddetermina proċeduri xierqa sabiex trawwem il-koordinazzjoni fil-livelli kollha bejn il-Fond u l-awtoritajiet ta' ġestjoni u l-korpi implimentattivi stabbiliti taħt l-interventi kkonċernati tal-Fondi Strutturali, b’mod partikolari taħt il-programm PEACE.
Artikolu 5
Il-Kummissjoni għandha, f’koperazzjoni mal-Bord tal-Fond, tiddetermina proċeduri adattati ta' pubbliċità u tagħrif sabiex jirreklamaw il-kontribuzzjonijiet tal-Unjoni għall-proġetti ffinanzjati mill-Fond.
Artikolu 6
Sat-30 ta' Ġunju 2008, il-Fond għandu jressaq quddiem il-Kummissjoni l-istrateġija tiegħu għall-għeluq (strateġija tal-għeluq) tal-attivitajiet tiegħu, inklużi
(a) |
pjan ta' azzjoni bi ħlasijiet ipproġettati u data mbassra ta' konklużjoni; |
(b) |
proċedura ta' tħollija mill-impenji; |
(c) |
it-trattament ta' kwalunkwe ammont residwu u imgħax imħallas waqt l-għeluq tal-Fond. |
Ħlasijiet sussegwenti lill-Fond jiddependu fuq l-approvazzjoni tal-Kummissjoni tal-istrateġija tal-għeluq. Jekk l-istrateġija tal-għeluq ma tiġix ippreżentata lill-Kummissjoni sat-30 ta' Ġunju 2008, il-ħlasijiet lill-Fond għandhom jiġu interrotti sa meta tiġi riċevuta l-istrateġija.
Artikolu 7
1. Il-Kummissjoni għandha tamministra l-kontribuzzjonijiet.
Suġġetta għall-paragrafu 2, il-kontribuzzjoni annwali għandha titħallas ratealment kif ġej:
(a) |
l-ewwel ħlas bil-quddiem ta' 40 % għandu jsir wara li l-Kummissjoni tkun irċiviet il-garanzija, iffirmata mill-President tal-Bord tal-Fond, li tiddikjara li l-Fond ser jikkonforma mal-kondizzjonijiet tal-għotja tal-kontribuzzjoni stipulati f’dan ir-Regolament; |
(b) |
it-tieni ħlas bil-quddiem ta' 40 % għandu jsir sitt xhur wara; |
(c) |
ħlas finali ta' 20 % għandu jsir wara li l-Kummissjoni tkun irċiviet u aċċettat ir-rapport annwali tal-attivitajiet tal-Fond u l-kontijiet verifikati tas-sena inkwistjoni. |
2. Qabel ma tħallas pagament il-Kummissjoni għandha twettaq valutazzjoni tal-ħtiġijiet finanzjarji tal-Fond fuq il-bażi tal-bilanċ tal-kontanti tal-Fond fiż-żmien skedat għal kull ħlas. Jekk wara l-valutazzjoni, il-ħtiġijiet finanzjarji tal-Fond ma jiġġustifikawx ħlas ta' wieħed minn dawn il-pagamenti, il-ħlas ikkonċernat għandu jiġi sospiż. Il-Kummissjoni għandha tirrivedi dik is-sospensjoni abbażi ta' tagħrif ġdid mogħti mill-Fond u għandha tkompli bil-ħlasijiet hekk kif dawn ikunu kkunsidrati ġustifikati.
Artikolu 8
Kontribuzzjoni mill-Fond tista’ tiġi allokata għal operazzjoni li tirċievi jew li għandha tieħu għajnuna finanzjarja taħt l-intervent tal-Fondi Strutturali fil-każ biss li jekk wieħed jgħodd din l-għajnuna finanzjarja u jżid magħha 40 % tal-kontribuzzjoni mill-Fond, it-total ma jaqbiżx 75 % tal-ispejjeż totali eliġibbli tal-operazzjoni.
Artikolu 9
Għandu jitressaq rapport finali lill-Kummissjoni sitt xhur qabel id-data tal-konklużjoni prevista fl-istrateġija għall-għeluq jew sitt xhur wara l-ħlas finali msemmi fil-punt (c) tat-tieni subparagrafu tal-Artikolu 7(1), skont liema minnhom iseħħ l-ewwel, u għandu jinkludi t-tagħrif kollu meħtieġ li għandu jippermetti lill-Kummissjoni tevalwa l-implimentazzjoni tal-għajnuna u l-milja tal-għanijiet tal-Fond.
Artikolu 10
Il-kontribuzzjoni tas-sena finali għandha titħallas wara l-analiżi tal-ħtiġijiet finanzjarji msemmija fl-Artikolu 7(2) u sakemm il-prestazzjoni tal-Fond tirrispetta l-istrateġija għall-għeluq.
Artikolu 11
Id-data finali ta' eliġibbiltà tan-nefqa hija l-31 ta' Diċembru 2013.
Artikolu 12
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
L-Artikolu 6 għandu japplika mill-1 ta' Jannar 2007.
Dan ir-Regolament jiskadi fil-31 ta' Diċembru 2010.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Strasburgu, il-15 ta’ Diċembru 2010.
Ghall-Parlament Ewropew
Il-President
J. BUZEK
Ghall-Kunsill
Il-President
O. CHASTEL
(1) Opinjoni tad-29 ta' April 2010 (għadha mhijiex ippubblikata fil-Ġurnal Uffiċjali).
(2) Pożizzjoni tal-Parlament Ewropew tal-15 ta' Ġunju 2010 (għadha mhijiex ippubblikata fil-Ġurnal Uffiċjali) u d-Deċiżjoni tal-Kunsill tal-10 ta' Diċembru 2010.
(4) ĠU L 161, 26.6.1999, p. 1.
(5) ĠU L 210, 31.7.2006, p. 25.
(6) ĠU C 139, 14.6.2006, p. 1.
(7) ĠU L 409, 30.12.2006, p. 86.
(8) Każ C-166/07 Parlament v Kunsill [2009] ECR I-7135.