10.3.2010   

MT

Il-Ġurnal Uffiċjali tal-Unjoni Ewropea

L 60/9

(1)

L-Artikolu 14o(2) tar-Regolament tal-Kummissjoni (KEE) Nru 2454/93 (2) jipprovdi li Ċertifikat AEO jrid jinħareġ fi żmien 90 jum kalendarju mid-data li fiha tkun waslet l-applikazzjoni skont l-Artikolu 14c ta’ dak ir-Regolament. Dak il-perjodu jista’ jiġi estiż b’perjodu wieħed ieħor ta’ 30 jum kalendarju meta l-awtorità doganali ma tkunx tista’ tirrispetta l-iskadenza u sakemm tgħarraf lill-applikant bir-raġunijiet għall-estensjoni. Madanakollu, l-Artikolu 2 tar-Regolament tal-Kummissjoni (KE) Nru 1875/2006 (3) li jemenda r-Regolament (KEE) Nru 2454/93 jestendi l-perjodu ta’ 90 jum kalendarju għall-ħruġ ta’ Ċertifikat AEO għal 300 jum kalendarju, matul perjodu tranżitorju ta’ 24 xahar li jiskadi fil-31 ta’ Diċembru 2009. It-termini ta’ żmien stipulati fl-Artikolu 14o tar-Regolament (KEE) Nru 2454/93 japplikaw mill-1 ta’ Jannar 2010.

(2)

L-implimentazzjoni fil-prattika tal-leġiżlazzjoni AEO wriet li fil-biċċa l-kbira tal-każijiet il-proċess sħiħ ta’ awtorizzazzjoni normalment jieħu aktar minn 90 jum kalendarju u fil-każ ta’ xi kumpaniji kbar, il-proċess jista’ jieħu sa 150 ġurnata.

(3)

Minħabba li r-Regolament tal-Kummissjoni (KE) Nru 1192/2008 (4) li jemenda r-Regolament (KEE) Nru 2454/93 introduċa sistema li fiha l-applikant għal awtorizzazzjoni unika għal dikjarazzjoni simplifikata, għal proċedura ta’ rilaxx lokali, għal proċeduri doganali b’impatt ekonomiku jew għal użu aħħari, irid jikkonforma ruħu mal-kriterji AEO jew kriterji ekwivalenti, in-numru ta’ applikazzjonjiet għal Ċertifikat AEO żdied b’mod konsiderevoli, peress li l-biċċa l-kbira tal-operaturi ekonomiċi jippreferu japplikaw l-ewwel għal Ċertifikat AEO li bħala detenturi tiegħu jitqiesu li jissodisfaw ċerti kundizzjonijiet u kriterji meħtieġa għall-awtorizzazzjonijiet għal ċerti proċeduri. Minħabba dik iż-żieda, sar diffiċli ħafna għall-awtoritajiet doganali li jikkonformaw ruħhom mal-obbligu li joħorġu Ċertifikati AEO fit-termini ta’ żmien stipulati fl-Artikolu 14o(2) tar-Regolament (KEE) Nru 2454/93.

(4)

Għaldaqstant, sabiex jiġi żgurat it-tħaddim bla xkiel tas-sistema AEO mill-1 ta’ Jannar 2010, huwa neċessarju li l-perjodu biex jinħareġ Ċertifikat AEO jew biex tiġi miċħuda applikazzjoni jiġi estiż għal 120 jum u li tiġi prevista estensjoni ta’ dak il-perjodu b’perjodu wieħed ieħor ta’ 60 jum.

(5)

Ir-Regolament (KEE) Nru 2454/93 għandu għaldaqstant jiġi emendat b’dan il-mod.

(6)

Peress li l-perjodu tranżitorju previst fir-Regolament (KE) Nru 1875/2006 jiskadi fil-31 ta’ Diċembru 2009, dan ir-Regolament għandu japplika mill-1 ta’ Jannar 2010.

(7)

Il-miżuri previsti f’dan ir-Regolament huma skont l-opinjoni tal-Kumitat tal-Kodiċi Doganali,