20.11.2009   

MT

Il-Ġurnal Uffiċjali tal-Unjoni Ewropea

L 306/5

(1)

Bi qbil mal-Artikolu 2 tar-Regolament tal-Kummissjoni (KEE) Nru 3149/92 tad-29 ta’ Ottubru 1992 li jippreskrivi regoli dettaljati għar-riforniment ta’ ikel mill-ħażna ta’ intervent għall-benefiċċju tal-persuni l-aktar fil-bżonn fil-Komunità (3), il-Kummissjoni għandha tadotta pjan ta’ distribuzzjoni li għandu jkun iffinanzjat mir-riżorsi disponibbli fis-sena tal-baġit 2010. Dak il-pjan għandu jistabbilixxi partikolarment, għal kull Stat Membru li japplika l-miżura, ir-riżorsi finanzjarji massimi disponibbli sabiex iwettaq il-parti tiegħu tal-pjan, u l-kwantità ta’ kull tip ta’ prodott li għandha tittieħed mill-ħażniet miżmuma mill-aġenziji tal-intervent.

(2)

L-Istati Membri involuti fil-pjan tat-tqassim għas-sena tal-baġit 2010 kienu fornew l-informazzjoni meħtieġa skont l-Artikolu 1 tar-Regolament (KEE) Nru 3149/92.

(3)

Għall-finijiet tal-allokazzjoni tar-riżorsi, għandhom jiġu kkunsidrati l-esperjenza u sa liema punt l-Istati Membri utilizzaw ir-riżorsi allokati lilhom fis-snin preċedenti.

(4)

Il-punt 1(c) tal-Artikolu 2(3) tar-Regolament (KEE) Nru 3149/92 jipprovdi għall-allokazzjoni tar-riżorsi għax-xiri fis-suq ta’ prodotti temporanjament mhux disponibbli fil-ħażniet tal-intervent. Peress illi l-ħażniet taċ-ċereali attwalment miżmuma mill-aġenziji tal-intervent mhumiex biżżejjed biex jiġu koperti l-allokazzjonijiet li jikkorrispondu għat-talbiet għaċ-ċereali u r-ross, l-allokazzjonijiet tar-riżorsi għandhom jiġu stabbiliti sabiex jippermettu x-xiri fis-suq ta’ ċereali jew ross, kif meħtieġ għall-implimentazzjoni tal-pjan ta’ distribuzzjoni għas-sena tal-baġit 2010.

(5)

L-Artikolu 7(1) tar-Regolament (KEE) Nru 3149/92 jipprovdi għat-trasferiment bejn l-Istati Membri ta’ prodotti li mhumiex disponibbli fil-ħażniet tal-intervent tal-Istat Membru fejn prodotti bħal dawn huma meħtieġa biex jiġi implimentat il-pjan tat-tqassim annwali. Jeħtieġ għalhekk li jiġu awtorizzati t-trasferimenti intra-Komunitarji meħtieġa għall-implimentazzjoni ta’ dak il-pjan għall-2010, bil-kundizzjonijiet stipulati fl-Artikolu 7 tar-Regolament (KEE) Nru 3149/92.

(6)

L-Artikolu 7(3) tar-Regolament (KEE) Nru 3149/92 jipprovdi l-għażla, f’każijiet fejn ikun previst it-trasferiment ta’ prodotti mill-Istat Membru li fih jinżammu f’intervent, għal Stat Membru ieħor, għall-operaturi, biex iressqu offerta mingħajr ma jittrasferixxu l-prodotti rilaxxati mill-ħażniet tal-intervent lejn l-Istat Membru applikant. L-Artikolu 25 tar-Regolament (KE) Nru 1234/2007 jipprovdi li l-ħruġ ta’ prodotti akkwistati b’intervent pubbliku għandu jsir b’tali mod li tiġi evitata kwalunkwe disturbanza tas-suq,

(7)

Minħabba l-qagħda attwali tas-suq fis-settur tal-ħalib, karatterizzat minn livelli ta’ prezzijiet baxxi, l-użu tal-għażla pprovduta fl-Artikolu 7(3) tar-Regolament (KEE) Nru 3149/92 ma għandux jitħalla fil-pjan ta’ distribuzzjoni tal-2010 għall-butir u għat-trab tal-ħalib xkumat sabiex jiġu evitati d-disturbi fis-suq wara r-rilaxx ta’ dawk il-prodotti f’ċerti swieq li diġà huma fornuti tajjeb. Għall-istess raġuni, l-użu tal-possibbiltajiet offerti lill-operaturi fil-paragrafi 2 u 2a tal-Artikolu 4 ta’ dak ir-Regolament għandu jkun limitat sabiex il-prodotti tal-ħalib maħsuba għatqassim lill-persuni l-aktar fil-bżonn fil-Komunità, jikkonformaw ma’ ċerti rekwiżiti li jikkonċernaw il-kompożizzjoni tagħhom u l-kwantità ta’ ħalib użat fil-manifattura tagħhom. Sabiex tiġi sorveljata l-konformità ma’ dik ir-regola, l-Istati Membri għandhom jipprovdu fir-rapporti tal-progress tagħhom lista dettaljata ta’ prodotti mqassma mqiegħda taħt il-kategoriji “kontenut għoli ta’ xaħam” jew “oħrajn”.

(8)

Sabiex jiġi żgurat li l-prodotti tal-ħalib mill-ħażniet tal-intervent ma jidħlux fis-suq f’mument inopportun matul is-sena, il-perjodu ta’ żmien ipprovdut fit-tielet subparagrafu tal-Artikolu 3(2) tar-Regolament (KEE) Nru 3149/92 li matulu l-butir u t-trab tal-ħalib xkumat jistgħu jittieħdu mill-ħażniet tal-intervent għandu jitqassar.

(9)

Jekk titqies il-kumplessità tal-implimentazzjoni tal-pjan ta’ tqassim tal-2010, li tesiġi volum għoli ta’ trasferimenti intra-Komunitarji, huwa xieraq li tiżdied il-marġni ta’ 5 % pprovduta fl-Artikolu 3(3) tar-Regolament (KEE) Nru 3149/92.

(10)

Għall-implementazzjoni tal-pjan ta’ tqassim annwali, l-avveniment operattiv fil-qofol tat-tifsira tal-Artikolu 3 tar-Regolament (KE) Nru 2799/98 għandu jkun id-data li fiha tibda s-sena finanzjarja għall-amministrazzjoni tal-ħażniet fil-ħażna pubblika.

(11)

Bi qbil mal-Artikolu 2(2) tar-Regolament (KEE) Nru 3149/92, il-Kummissjoni fittxet il-parir tal-organizzazzjonijiet ewlenin li huma familjari mal-problemi tal-persuni l-aktar fil-bżonn fil-Komunità meta kienet qed tħejji dan il-pjan ta’ tqassim annwali.

(12)

L-Artikolu 2(1) tar-Regolament (KEE) Nru 3149/92 jipprovdi li l-Kumissjoni għandha tadotta l-pjan ta’ tqassim annwali qabel l-1 ta’ Ottubru ta’ kull sena. Minħabba l-qagħda attwali fis-suq tal-prodotti tal-ħalib, u fid-dawl tal-ħtieġa għal aktar konsultazzjonijiet mal-Istati Membri dwar it-talbiet tagħhom, għadu ma kienx possibbli għall-Kummissjoni biex tadotta l-pjan ta’ tqassim. Għalhekk, sabiex tiġi żgurata l-esekuzzjoni f’waqtha tal-pjan ta’ tqassim annwali, dan ir-Regolament għandu jidħol fis-seħħ immedjatament wara l-pubblikazzjoni tiegħu.

(13)

Il-Kumitat ta’ Ġestjoni għall-Organizzazzjoni Komuni tas-Swieq Agrikoli ma tax opinjoni tiegħu fil-limitu taż-żmien stabbilit mill-president tiegħu,