Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32009R1047

Regolament tal-Kunsill (KE) Nru 1047/2009 tad- 19 ta’ Ottubru 2009 li jemenda r-Regolament (KE) Nru 1234/2007 li jistabbilixxi organizzazzjoni komuni ta’ swieq agrikoli fir-rigward tal-istandards ta’ kummerċjalizzazzjoni għal-laħam tat-tjur

ĠU L 290, 6.11.2009, p. 1–3 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

⏵Dan id-dokument ġie ppubblikat f’edizzjoni(jiet) speċjali (HR)

Legal status of the document No longer in force, Date of end of validity: 31/12/2013; Imħassar b' 32013R1308

ELI: http://data.europa.eu/eli/reg/2009/1047/oj

6.11.2009   

MT

Il-Ġurnal Uffiċjali tal-Unjoni Ewropea

L 290/1

REGOLAMENT TAL-KUNSILL (KE) Nru 1047/2009

tad-19 ta’ Ottubru 2009

li jemenda r-Regolament (KE) Nru 1234/2007 li jistabbilixxi organizzazzjoni komuni ta’ swieq agrikoli fir-rigward tal-istandards ta’ kummerċjalizzazzjoni għal-laħam tat-tjur

IL-KUNSILL TAL-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b’mod partikolari l-Artikolu 37 tiegħu,

Wara li kkunsidra l-proposta mill-Kummissjoni,

Wara li kkunsidra l-opinjoni tal-Parlament Ewropew (1),

Billi:

(1)

Ir-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (ir-Regolament Waħdieni dwar l-OKS) (2), jistabbilixxi ċerti standards ta’ kummerċjalizzazzjoni għal-laħam tat-tjur.

(2)

L-Artikolu 116 tar-Regolament (KE) Nru 1234/2007 jipprevedi li l-prodotti tas-settur tal-laħam tat-tjur għandhom ikunu kkummerċjalizzati skont id-dispożizzjonijiet tal-Anness XIV għal dak ir-Regolament.

(3)

L-istandards ta’ kummerċjalizzazzjoni kienu żviluppati biex jikkontribwixxu għal titjib fil-kwalità tal-laħam tat-tjur u l-informazzjoni relatata ma’ dan u, konsegwentement, biex jiffaċilitaw il-bejgħ ta’ tali laħam. B’mod partikolari, kienet introdotta definizzjoni ta’ laħam tat-tjur frisk li hija aktar preċiża milli fil-leġislazzjoni dwar is-sigurtà tal-ikel, b’effett mill-1 ta’ Lulju 1991, permezz tar-Regolament tal-Kunsill (KEE) Nru 1906/90 tas-26 ta’ Ġunju 1990 dwar ċerti standards tal-marketing għal-laħam tat-tjur (3). L-esperjenza turi li hemm ħtieġa li jkun ikkonfermat il-prinċipju strett li hemm wara din id-definizzjoni u biex issir anke aktar espliċita.

(4)

Fid-dawl tal-fatt li l-laħam tat-tjur qed jiġi kkonsumat dejjem aktar fil-forom ta’ preparati u prodotti tal-laħam, il-kamp ta’ applikazzjoni tal-istandards ta’ kummerċjalizzazzjoni għal-laħam tat-tjur għandu jiġi estiż biex jinkludi preparati u prodotti tal-laħam tat-tjur.

(5)

Bl-istess mod, il-laħam tat-tjur fis-salmura li jaqa’ taħt il-kodiċi NM 0210 99 39 għandu wkoll ikun kopert mill-istandards ta’ kummerċjalizzazzjoni.

(6)

L-esperjenza turi li f’ċerti każijiet il-preparati tal-laħam tat-tjur frisk jista’ faċilment jissostitwixxi l-laħam tat-tjur frisk meta jiġu ppreżentati għall-bejgħ lill-konsumatur. Sabiex tkun evitata kwalunkwe distorsjoni fil-kompetizzjoni bejn il-laħam tat-tjur frisk u l-preparati tal-laħam tat-tjur frisk, huwa adatt li jiġi estiż il-prinċipju wara d-definizzjoni ta’ laħam tat-tjur frisk u l-preparati tal-laħam tat-tjur frisk.

(7)

Taħt il-leġislazzjoni Komunitarja dwar it-tikkettar ta’ oġġetti tal-ikel, it-tikkettar u l-metodi użati m’għandhomx ikunu b’mod li jqarrqu lix-xerrej, b’mod partikolari fir-rigward tal-karatteristiċi tal-oġġett tal-ikel, u b’mod partikolari rigward in-natura tal-prodott, l-identità, il-kwalitajiet, l-għamla, il-kwantità, id-durabbiltà, l-oriġini jew il-provenjenza tiegħu, jew il-metodu ta’ produzzjoni jew ta’ manifattura tiegħu.

(8)

Il-laħam tat-tjur li jkun ġie ffriżat jew iffriżat malajr għandu jinbiegħ f’dak l-istat jew jintuża fi preparati kkummerċjalizzati fl-istat iffriżat jew iffriżat malajr, jew fi prodotti tal-laħam.

(9)

Billi s-sottotaqsima tal-Kategorija A f’A 1 u A 2 u s-sottotaqsima tal-laħam tat-tjur iffriżat permezz ta’ kategoriji tal-piż prevista fir-Regolament (KE) Nru 1234/2007 ma jintużawx ħafna fil-prattika u għalhekk huma żejda, dawn id-dispożizzjonijiet għandhom jitneħħew għal raġunijiet ta’ simplifikazzjoni.

(10)

Ir-Regolament (KE) Nru 1234/2007 għandu għalhekk jiġi emendat kif meħtieġ,

ADOTTA DAN IR-REGOLAMENT:

Artikolu 1

L-Anness XIV tar-Regolament (KE) Nru 1234/2007 huwa b’dan emendat skont l-Anness għal dan ir-Regolament.

Artikolu 2

Dan ir-Regolament għandu jidħol fis-seħħ fis-seba’ jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu japplika mill-1 ta’ Mejju 2010.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fil-Lussemburgu, id-19 ta’ Ottubru 2009.

Għall-Kunsill

Il-President

E. ERLANDSSON

(1)  Opinjoni tal-5 ta’ Mejju 2009 (għadha mhijiex ippubblikata fil-Ġurnal Uffiċjali).

(2)  ĠU L 299, 16.11.2007, p. 1.

(3)  ĠU L 173, 6.7.1990, p. 1.

ANNESS

Il-Parti B tal-Anness XIV għar-Regolament (KE) Nru 1234/2007 hija emendata kif ġej:

1.

il-paragrafu 1 tal-Parti I jinbidel b’dan li ġej:

“1.

Mingħajr preġudizzju għall-Parti Ċ ta’ dan l-Anness rigward id-dispożizzjonijiet dwar il-produzzjoni u l-kummerċjalizzazzjoni ta’ bajd għat-tifqis u ta’ flieles tat-tjur tar-razzett, dawn id-dispożizzjonijiet għandhom japplikaw għall-kummerċjalizzazzjoni, fil-Komunità, b’negozju jew kummerċ, ta’ ċerti tipi u preżentazzjonijiet tal-laħam tat-tjur, u preparati u prodotti bbażati fuq laħam tat-tjur jew intern tat-tjur, tal-ispeċi li ġejjin kif imniżżel fil-Parti XX tal-Anness I:

—

Gallus domesticus,

—

papri,

—

wiżż,

—

dundjani,

—

fargħuni.

Dawn id-dispożizzjonijiet għandhom japplikaw ukoll għal-laħam tat-tjur fis-salmura li jaqa’ taħt il-kodiċi NM 0210 99 39 kif imsemmi fil-Parti XXI tal-Anness I.”;

2.

il-Parti II hija emendata kif ġej:

(a)

il-punti 2 u 3 huma sostitwiti b’dan li ġej:

“2.

‘laħam tat-tjur frisk’ tfisser laħam tat-tjur li qatt ma twebbes fi kwalunkwe ħin bi proċess ta’ tkessiħ qabel ma tqiegħed f’temperatura permanenti ta’ mhux anqas minn – 2 °C, u mhux aktar + 4 °C. Madankollu, l-Istati Membri jistgħu jistabbilixxu rekwiżiti ta’ temperatura kemm kemm differenti għat-tul ta’ żmien minimu meħtieġ għat-tqattigħ u l-manipulazzjoni ta’ laħam tat-tjur frisk li jitwettqu fi ħwienet li jbiegħu bl-imnut jew fi stabbilimenti ħdejn il-punti ta’ bejgħ, fejn it-tqattigħ u l-manipulazzjoni jitwettqu biss għall-fini ta’ forniment lill-konsumatur direttament fuq il-post;

3.

‘laħam tat-tjur iffriżat’ tfisser laħam tat-tjur li għandu jkun iffriżat mill-iktar fis possibbli fil-limiti tar-restrizzjonijiet tal-proċeduri normali tal-qatla u li għandu jinżamm f’temperatura li ma tkunx ogħla minn – 12 °C fi kwalunkwe ħin;”;

(b)

il-punti li ġejjin huma miżjudin:

“5.

‘preparat tal-laħam tat-tjur’ tfisser laħam tat-tjur, inkluż laħam tat-tjur li jkun ġie ridott għal frak, li jkun miżjud b’oġġetti tal-ikel, ħwawar jew additivi jew li jkun għadda minn proċess li jkun insuffiċjenti għall-modifikar tal-istruttura interna tal-muskoli tal-laħam;

6.

‘preparat ta’ laħam tat-tjur frisk’ tfisser preparat tal-laħam tat-tjur li għaliha jkun intuża laħam tat-tjur frisk. Madankollu, l-Istati Membri jistgħu jistabbilixxu rekwiżiti ta’ temperatura kemmxejn differenti li għandhom jiġu applikati għat-tul ta’ żmien minimu meħtieġ u biss sakemm ikun meħtieġ għall-iffaċilitar tat-trattament u t-tqattigħ imwettaq fil-fabbrika matul il-produzzjoni tal-preparati tal-laħam tat-tjur frisk;

7.

‘prodott tal-laħam tat-tjur’ tfisser prodott tal-laħam kif definit fil-punt 7.1 tal-Anness I għar-Regolament (KE) Nru 853/2004 li għalih intużat id-definizzjoni laħam tat-tjur.”;

3.

il-Parti III hija emendata kif ġej:

(a)

it-tieni subparagrafu tal-paragrafu 1 huwa mħassar;

(b)

il-frażi introduttorja tal-paragrafu 2 hija sostitwita b’dan li ġej:

“Il-laħam tat-tjur u l-preparati tal-laħam tat-tjur għandhom ikunu kummerċjalizzati skont waħda minn dawn il-kondizzjonijiet:”;

(c)

il-paragrafu 3 huwa mħassar.
Top