32009R0885

This document is an excerpt from the EUR-Lex website

EUROPA
EUR-Lex home
Regolament - 885/2009 - EN - EUR-Lex

Help

Search tips

Need more search options? Use the Advanced search

Document 32009R0885

Help

Regolament tal-Kummissjoni (KE) Nru 885/2009 tal- 25 ta’ Settembru 2009 li jemenda r-Regolament (KE) Nru 378/2005 rigward kampjuni, miżati u laboratorji ta’ referenza mniżżla fl-Anness II (Test b’relevanza għaż-ŻEE)

ĠU L 254, 26.9.2009, pp. 58–65 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

(HR)
⏵Dan id-dokument ġie ppubblikat f’edizzjoni(jiet) speċjali (HR)
Edizzjoni speċjali bil-Kroat: Kapitolu 03 Volum 037 P. 91 - 98

Legal status of the document In force

ELI: http://data.europa.eu/eli/reg/2009/885/oj

HTML

PDF

Official Journal

26.9.2009

Il-Ġurnal Uffiċjali tal-Unjoni Ewropea

L 254/58

REGOLAMENT TAL-KUMMISSJONI (KE) Nru 885/2009

tal-25 ta’ Settembru 2009

li jemenda r-Regolament (KE) Nru 378/2005 rigward kampjuni, miżati u laboratorji ta’ referenza mniżżla fl-Anness II

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 1831/2003 tal-Parlament Ewropew u tal-Kunsill tat-22 ta’ Settembru 2003 fuq l-additivi għall-użu fl-għalf tal-annimali (1), u b'mod partikolari l-ewwel sottoparagrafu tal-Artikolu 7(4) u t-tielet paragrafu tal-Artikolu 21 tiegħu,

Billi:

(1)

Ir-Regolament (KE) Nru 1831/2003 jistipula proċedura tal-Komunità għall-awtorizzazzjoni tat-tqegħid fuq is-suq u l-użu ta’ addittivi fl-għalf għan-nutriment tal-annimali. Jipprovdi li kull persuna li titlob awtorizzazzjoni għal xi addittiv tal-għalf jew għal użu ġdid ta’ addittiv tal-għalf għandha tissottometti applikazzjoni għall-awtorizzazzjoni skont dak ir-Regolament.

(2)

Ir-Regolament tal-Kummissjoni (KE) Nru 378/2005 (2) jistipula regoli dettaljati għall-implimentazzjoni tar-Regolament (KE) Nru 1831/2003 rigward applikazzjonijiet għall-awtorizzazzjoni ta’ adittiv tal-għalf jew għal użu ġdid ta’ addittiv tal-għalf u d-dmirijiet u l-ħidmiet tal-Laboratorju ta’ Referenza Komunitarju (LRK).

(3)

Jistipula li kwalunkwe persuna li tagħmel applikazzjoni għandha tibgħat kampjuni ta’ referenza fis-sura li fiha l-addittiv tal-għalf hu maħsub li jitqiegħed fis-suq mill-applikant jew f'forma li faċilment tista' tkun ikkonvertita għas-sura li fiha l-addittiv tal-ikel hu maħsub li jitqiegħed fis-suq mill-applikant.

(4)

Ir-Regolament (KE) Nru 378/2005 jistipula li l-LRK għandu jitlob ħlas lill-applikanti ta’ EUR 6 000 għal kull applikazzjoni. Barra minn hekk, l-Anness II ta’ dan ir-Regolament jistabbilixxi lista tal-konsorzju tal-Laboratorji ta' Referenza Nazzjonali li jgħinu lil-LRK fid-dmirijiet u l-ħidmiet tagħhom.

(5)

L-esperjenza miksuba tul il-funzjoni tar-Regolament (KE) Nru 378/2005 turi li hu mixtieq li jiġu ċċarati ċerti dettalji tar-rekwiżiti eżistenti għall-kampjuni ta' referenza ppreżentati mill-applikanti f’ċerti każijiet u li jiġu ssimplifikati f’każijiet ta’ a) applikazzjonijiet għall-użi ġodda ta’ addittivi diġà awtorizzati u b) applikazzjonijiet għall-bidla fit-termini ta’ awtorizzazzjonijiet meta l-bidla proposta m’għandhiex x’taqsam mal-karatteristiċi tal-addittivi fl-għalf li ntbagħtu qabel lil-LRK bħala kampjun ta’ referenza tal-addittiv tal-għalf ikkonċernat.

(6)

L-esperjenza wriet li għandhom jiġu stabbiliti rati differenti għall-miżata jiddependu mit-tipi differenti ta' applikazzjonijiet, b'mod partikolari b'kunsiderazzjoni tal-bżonn għal kampjuni ta' referenza ġodda u l-valutazzjonijiet ġodda tal-metodu ta’ analiżi għall-addittivi tal-ikel diġà awtorizzati.

(7)

Barra minn hekk, hemm metodi multi-analitiki msejsa fuq prinċipju definit applikabbli għal determinazzjoni waħdanija jew determinazzjoni simultanja ta’ waħda jew aktar sustanza/i/aġent(i) fil-matriċi speċifiċi ddefiniti fl-ambitu tal-metodu. L-esperjenza wriet li hu possibbli li jitwettqu l-valutazzjonijet tal-metodi tal-analiżi għal addittivi tal-għalf simili fi gruppi meta l-metodi tal-analizi huma simili, u b’mod partikolari fil-każ ta’ dawn il-metodi multi-analitiki.

(8)

Għadd ta’ addittivi tal-għalf li huma diġà awtorizzati suġġett għall-proċess ta’ re-valutazzjoni stipulat fl-Artikolu 10(2) tar-Regolament (KE) Nru 1831/2003 jistgħu jiġu suġġetti għall-applikazzjonijiet ippreżentati fl-istess waqt fi gruppi omoġenji meta jappartjenu għall-istess kategorija ta’ addittivi tal-ikel, grupp funzjonali u sotto klassifikazzjoni, fejn applikabbli, u meta l-metodi ta’ analiżi użati għalihom huma tat-tip multi-analitiki.

(9)

Is-sustanzi kklassifikati fil-grupp “togħmiet definiti kimikament” li jidhru fir-Reġistru Komunitarju tal-Addittivi tal-Għalf, li jappartjenu għall-kategorija addittivi sensorji u allokati fost il-komposti tat-togħmiet tal-grupp funzjonali, huma grupp ta’ addittivi tal-għalf li jirrappreżentaw daqs żewġ terzi tad-daħliet fir-Reġistru Komunitarju tal-Addittivi tal-Għalf preżenti. Dawn it-togħmiet definiti kimikament huma suġġetti għall-proċess ta’ re-valutazzjoni stipulat fl-Artikolu 10(2) tar-Regolament (KE) Nru 1831/2003 u għalhekk jistgħu jirrappreżentaw xogħol sinifikattiv fil-proċess. Dawn it-togħmiet definiti kimikament jirrappreżentaw ukoll grupp omoġenju ta’ addittivi tal-għalf fir-rigward tal-kundizzjonijiet ta’ awtorizzazzjoni tagħhom u l-evalwazzjoni tas-sigurtà tagħhom li għandhom jiġu mwettqa skont ir-rekwiżiti speċifiċi stipulati għalihom fir-Regolament tal-Kummissjoni (KE) Nru 429/2008 tal-25 ta’ April 2008 dwar regoli dettaljati għall-implimentazzjoni tar-Regolament (KE) Nru 1831/2003 tal-Parlament Ewropew u tal-Kunsill fir-rigward tal-preparazzjoni u l-preżentazzjoni ta' applikazzjonijiet u l-valutazzjoni u l-awtorizzazzjoni ta' addittivi fl-għalf (3). Il-metodi ta’ analiżi użati għal bosta minn dawn it-togħmiet definiti kimikament jistgħu jkunu tat-tip multi-analitiki.

(10)

Għalhekk huwa xieraq li tiġi stabbilita sistema ta’ miżati mnaqqsa għall-gruppi ta’ applikazzjonijiet għall-awtorizzazzjonijiet li jikkonċernaw addittivi tal-għalf li huma diġà awtorizzati għat-togħmiet definiti kimikament meta l-applikazzjonijiet jiġu ppreżentati f’daqqa u fihom metodi ta’ analiżi simili, b’mod partikolari tat-tip multi-analitiki.

(11)

Minħabba l-kalkolu tal-miżati differenti, il-miżata titqies li hi magħmula minn żewġ komponenti. L-ewwel komponent hu maħsub biex isostni l-ispejjeż amministrattivi tal-LRK u l-ispejjeż marbuta mat-trattament tal-kampjuni ta' referenza. It-tieni komponent hu maħsub biex isostni l-ispejjeż tal-Laboratorju Relatur għall-valutazzjoni xjentifika u t-tħejjija tar-rapport ta’ valutazzjoni.

(12)	Huwa xieraq ukoll li jiġi addattat l-ambitu tal-gwida għall-applikanti mħejji mil-LRK wara l-adozzjoni tar-Regolament (KE) Nru 429/2008 kif ukoll li jiddaħħlu emendi żgħar oħra għar-Regolament (KE) Nru 378/2005, b’kunsiderazzjoni tal-esperjenza miksuba.

(13)

Il-Belġju ssottometta talba lill-Kummissjoni għall-ħatra tas-Centre wallon de recherches agronomiques (CRA-W) f’Gembloux bħala laboratorju ta' referenza nazzjonali ġdid biex jieħu sehem fil-konsorzju. Peress li l-laboratorju jissodisfa r-rekwiżiti stipulati fl-Anness I tar-Regolament (KE) Nru 378/2005 għandu jiddaħħal fil-lista ta’ laboratorji stipulati fl-Anness II ta’ dan ir-Regolament. Il-Litwanja infurmat lill-Kummissjoni li tixtieq tirtira l-Klaipėdos apskrities VMVT laboratorija, fil-Klaipėda, mill-konsorzju tal-laboratorji nazzjonali ta’ referenza. Għalhekk, dan il-laboratorju għandu jitneħħa minn dik il-lista ta' laboratorji. Barra minn hekk, bosta Stati Membri infurmaw lill-Kummissjoni li nbidlu ċerti dettalji tal-Laboratorji ta' Referenza Nazzjonali tagħhom li qed jieħdu sehem fil-konsorzju. Il-lista fl-Anness II għar-Regolament (KE) Nru 378/2005 għandha tiġi emendata skont dan. Fl-interess taċ-ċarezza tal-leġiżlazzjoni Komunitarja, din għandha tinbidel kollha bil-lista fl-Anness I ta’ dan ir-Regolament.

(14)	Għalhekk, ir-Regolament (KE) Nru 378/2005 għandu jiġi emendat skont dan.

(15)	Il-miżuri stipulati f'dan ir-Regolament huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali,

ADOTTAT DAN IR-REGOLAMENT:

Artikolu 1

Ir-Regolament (KE) Nru 378/2005 qiegħed jiġi emendat kif ġej:

(1)	L-Artikolu 1 għandu jinbidel b’dan li ġej: “Artikolu 1 Suġġett u ambitu Dan ir-Regolament jistipula regoli dettaljati għall-implimentazzjoni tar-Regolament (KE) Nru 1831/2003 dwar id-dmirijiet u l-ħidmiet tal-Laboratorju ta’ Referenza Komunitarju (LRK).”

(2)

Fl-Artikolu 2, jiżdiedu l-punti (h) u (i) li ġejjin:

“(h)	‘il-metodi multi analitiki’ huma metodi msejsa fuq prinċipju definit applikabbli għal determinazzjoni waħdanija jew simultanja ta’ sustanza/i/aġent(i) waħda jew aktar fil-matriċi speċifiċi ddefiniti fl-ambitu tal-metodu.

(i)	‘standard ta’ referenza’ hu kampjun ta’ aġent attiv pur użat għall-għanijiet ta’ kalibrazzjoni.”

(3)

L-Artikolu 3 għandu jinbidel b’dan li ġej:

“Artikolu 3

Kampjuni ta’ referenza

1. Kwalunkwe persuna li tressaq applikazzjoni għall-awtorizzazzjoni għal addittiv tal-għalf jew għal xi użu ġdid ta’ addittiv tal-għalf, kif stipulat fl-Artikolu 4(1) tar-Regolament (KE) Nru 1831/2003, għandu jibgħat tliet kampjuni ta' referenza f'sura li fiha l-applikant għandu l-ħsieb li jqiegħed l-addittiv tal-għalf fis-suq.

Barra minn hekk, l-applikant għandu jipprovdi lil-LRK:

(a)

l-istandards ta’ referenza tal-aġenti attivi puri fil-każ tal-addittivi tal-għalf:

—	li jappartjenu għall-kategorija ta’ addittivi żootekniċi msemmija fl-Artikolu 6(1)(d) tar-Regolament (KE) Nru 1831/2003, ħlief għall-addittivi tal-għalf li huma magħmula jew li fihom il-mikro-organiżmi;

—	li jappartjenu għall-kategorija ta’ koċċidijostati u istomonostati msemmija fl-Artikolu 6(1)(e) tar-Regolament (KE) Nru 1831/2003;

—	li jagħmlu parti mill-ambitu tal-leġiżlazzjoni Komunitarja dwar it-tpoġġija fis-suq ta' prodotti li jkunu magħmula minn, li jkun fihom, jew li jkunu ġejjin minn organiżmi mmodifikati ġenetikament (OMĠ);

—	li ġew stabbiliti għalihom il-Limiti ta’ Fdalijiet Massimi fl-Anness I jew III tar-Regolament tal-Kunsill (KEE) Nru 2377/90 (*1) jew skont ir-Regolament (KE) Nru 1831/2003.

(b)

meta l-applikazzjoni tikkonċerna addittiv tal-għalf li hu magħmul minn jew fih xi mikro-organiżmi, awtorizzazzjoni lil-LRK biex taċċessa r-razza tal-mikrobu tingħata lill-kollezzjoni tal-kultura magħrufa internazzjonalment imsemmija fil-punt 2.2.1.2. tal-Anness II tar-Regolament tal-Kummissjoni (KE) Nru 429/2008 (*2), jekk miltub mil-LRK

Meta l-applikazzjoni tikkonċerna addittiv tal-għalf li jappartjeni għall-kategorija ta' addittivi sensorji u tinsab fi ħdan il-grupp funzjonali ta' komponenti tat-togħmiet imsemmija fil-punt 2(b) tal-Anness I tar-Regolament (KE) Nru 1831/2003, suġġett għall-Artikolu 10(2) ta' dak ir-Regolament, li jagħmel parti minn grupp ta' applikazzjonijiet, il-kampjuni ta' referenza għandhom ikunu rappreżentattivi tal-komponenti/sustanzi kollha fil-grupp.

2. It-tliet kampjuni ta’ referenza tal-addittiv tal-għalf għandhom jiġu akkumpanjati minn stqarrija bil-miktub mill-applikant li l-miżata stipulata fl-Artikolu 4(1) tħallset.

3. L-applikant għandu jżomm il-kampjuni ta’ referenza validi għall-perjodu sħiħ tal-awtorizzazzjoni tal-addittiv tal-għalf billi jipprovdi kampjuni ta’ referenza ġodda għal-LRK biex jissostitwixxi dawk li skadew.

L-applikant għandu jipprovdi kampjuni ta’ referenza, standards ta’ referenza u materjali għat-testjar tal-għalf u/jew l-ikel supplimentari, kif iddefinit fl-Artikolu 2, jekk ikun mitlub mil-LRK. Fuq talba ġġustifikata mil-laboratorji nazzjonali ta’ referenza tal-konsorzju u mingħajr ħsara għall-Artikoli 11, 32 u 33 tar-Regolament (KE) Nru 882/2004, il-LRK jista’ jitlob kampjuni ta’ referenza, standards ta’ referenza, materjali għat-testjar tal-għalf u/jew ikel supplimentari mingħand l-applikant.

4. Il-kampjuni ta’ referenza ma jinħteġux għal:

(a)	applikazzjoni għal użu ġdid ta' addittiv tal-għalf li jkun diġà awtorizzat għal użu ieħor, ippreżentata skont l-Artikolu 4(1) tar-Regolament (KE) Nru 1831/2003, meta jkunu diġà ntbagħtu l-kampjuni ta' referenza lil-LRK għal dak l-użu l-ieħor;

(b)

applikazzjoni għall-bdil tat-termini tal-awtorizzazzjoni eżistenti ppreżentata skont l-Artikolu 13(3) tar-Regolament (KE) Nru 1831/2003, meta l-bidla proposta m'għandhiex x'taqsam mal-karatteristiċi tal-addittiv tal-għalf li ntbagħat qabel lil-LRK bħala kampjun ta' referenza tal-addittiv tal-għalf ikkonċernat.

(*1) ĠU L 224, 18.8.1990, p. 1."

(*2) ĠU L 133, 22.5.2008, p. 1.” "

(4)	Fl-Artikolu 4, il-paragrafu 1 jinbidel b’dan li ġej: “1. Il-LRK għandu jitlob miżata mill-applikant skont ir-rati stipulati fl-Anness IV (‘il-miżata’).”

(5)

L-Artikolu 5 huwa emendat kif ġej:

(a)

Il-paragrafu 1 għandu jinbidel b’dan li ġej:

“1. Il-LRK għandu jissottometti rapport ta’ valutazzjoni komplut lill-Awtorità Ewropea dwar is-Sigurtà Alimentari (l-Awtorità) għal kull applikazzjoni, jew kull grupp ta’ applikazzjonijiet, fi żmien tliet xhur mid-data ta’ meta tasal applikazzjoni valida kif imsemmi fl-Artikolu 8(1) tar-Regolament (KE) Nru 1831/2003 u l-ħlas tal-miżata.

Madankollu, jekk il-LRK jikkunsidra l-applikazzjoni bħala kumplessa ħafna, jista’ jestendi dak il-perjodu għal xahar ieħor. Il-LRK għandu jinforma lill-Kummissjoni, lill-Awtorità u lill-applikant meta l-perjodu jiġi estiż.

Il-limiti taż-żmien stipulati f’dan il-paragrafu jistgħu jiġu estiżi aktar bil-ftehim tal-Awtorità, kull meta l-LRK jitlob tagħrif supplimentari li ma jistax jiġi pprovdut mill-applikant u/jew ma jistax jiġi vvalutat mil-LRK fi ħdan dawk il-limiti ta’ żmien.

Madankollu, il-limitu ta’ żmien għal-LRK biex jippreżenta rapport ta’ valutazzjoni lill-Awtorità m’għandux jaqbeż il-limitu taż-żmien għall-Awtorità biex tipprovdi l-opinjoni tagħha, kif stipulat fl-Artikolu 8(1) tar-Regolament (KE) Nru 1831/2003.”

(b)

Jiżdiedu l-paragrafi 3 u 4 li ġejjin:

“3. Ir-rapport ta’ valutazzjoni stipulat fil-paragrafu 1 jista’ jiġi emendat mil-LRK fuq talba tal-Kummissjoni jew tal-Awtorità fejn:

(a)	il-kondizzjonijiet għat-tqegħid fis-suq tal-addittiv tal-għalf li rriżultaw mill-opinjoni tal-Awtorità skont l-Artikolu 8(3)(a) tar-Regolament (KE) Nru 1831/2003 huma differenti minn dawk li ġew proposti oriġinarjament mill-applikant;

(b)	tagħrif supplimentari rilevanti għall-metodu tal-analiżi ngħata mill-applikant lill-Awtorità.

4. Ir-rapport ta’ valutazzjoni ma jinħtieġx għal:

(a)

applikazzjonijiet għal użu ġdid tal-addittiv tal-għalf ippreżentati skont l-Artikolu 4(1) tar-Regolament (KE) Nru 1831/2003, meta l-kondizzjonijiet proposti għat-tqegħid fis-suq tal-addittiv tal-għalf għall-użu ġdid huma fi ħdan l-ambitu tal-metodu ta’ analiżi ppreżentat qabel skont il-paragrafu 2.6 tal-Anness II tar-Regolament (KE) Nru 429/2008 u diġà vvalutati mil-LRK;

(b)

applikazzjonijiet għal bdil fit-termini ta’ awtorizzazzjoni eżistenti ppreżentati skont l-Artikolu 13(3) tar-Regolament (KE) Nru 1831/2003, meta l-bidla proposta jew il-kondizzjonijiet il-ġodda għat-tqegħid fis-suq tal-addittiv tal-għalf huma fi ħdan l-ambitu tal-metodu ta’ analiżi ppreżentat qabel skont il-paragrafu 2.6 tal-Anness II tar-Regolament (KE) Nru 429/2008 u diġà vvalutati mil-LRK.

Minkejja l-paragrafu 4, il-Kummissjoni, il-LRK jew l-Awtorità jistgħu, fuq il-bażi ta' fatturi leġittimi rilevanti għall-applikazzjoni, iqisu li hi meħtieġa valutazzjoni ġdida tal-metodi tal-analiżi. F’tali każijiet, l-applikant għandu jiġi infurmat mil-LRK.”

(6)

Fl-Artikolu 8, jiżdied il-punt (d) li ġej:

“(d)	jekk ikun mitlub mil-LRK, li titressaq emenda għall-valutazzjoni tar-rapport li tikkonċerna d-dejta supplimentari mressqa mill-applikant lil-LRK jew lill-Awtorità.”

(7)

Fl-Artikolu 12(1), il-punt (d) li ġej huwa miżjud:

“(d)	rekwiżiti li jikkonċernaw metodi tal-analiżi mressqa skont il-paragrafi 2.6 tal-Anness II tar-Regolament (KE) Nru 429/2008;”

(8)	L-Anness II jinbidel bit-test tal-Anness I ta' dan ir-Regolament.

(9)	Anness IV ġdid, li t-test tiegħu huwa stabbilit fl-Anness II ta’ dan ir-Regolament, huwa miżjud.

Artikolu 2

Dan ir-Regolament jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, 25 ta’ Settembru 2009.

Għall-Kummissjoni

Androulla VASSILIOU

Membru tal-Kummissjoni

(1) ĠU L 268, 18.10.2003, p. 29.

(2) ĠU L 59, 5.3.2005, p. 8.

(3) ĠU L 133, 22.5.2008, p. 1.

ANNESS I

“ANNESS II

Laboratorji ta’ Referenza Komunitarji u konsorzju tal-Laboratorji ta’ Referenza Nazzjonali, kif imsemmija fl-Artikolu 6(2)

LABORATORJU TA’ REFERENZA KOMUNITARJU

Ċentru ta’ Riċerka Konġunt tal-Kummissjoni Ewropea. Istitut għall-Materjali u Kejl ta’ Referenza. Geel, il-Belġju

LABORATORJI NAZZJONALI TA’ REFERENZA TAL-ISTATI MEMBRI

Belgique/België

—	Federaal Laboratorium voor de Voedselveiligheid Tervuren (FLVVT – FAVV).

—	Vlaamse Instelling voor Technologisch Onderzoek (VITO), Mol.

—	Centre wallon de Recherches agronomiques (CRA-W), Gembloux.

Česká republika

—	Ústřední kontrolní a zkušební ústav zemědělský (ÚKZÚZ), Praha.

Danmark

—	Plantedirektoratet, Laboratorium for Foder og Gødning, Lyngby.

Deutschland

—	Schwerpunktlabor Futtermittel des Bayerischen Landesamtes für Gesundheit und Lebensmittelsicherheit (LGL), Oberschleißheim.

—	Landwirtschaftliches Untersuchungs- und Forschungsanstalt (LUFA) Speyer, Speyer.

—	Sächsische Landesanstalt für Landwirtschaft. Fachbereich 8 – Landwirtschaftliches Untersuchungswesen, Leipzig.

—	Thüringer Landesanstalt für Landwirtschaft (TLL). Abteilung Untersuchungswesen, Jena.

Eesti

—	Põllumajandusuuringute Keskus (PMK). Jääkide ja saasteainete labor, Saku, Harjumaa.

—	Põllumajandusuuringute Keskus (PMK), Taimse materjali labor, Saku, Harjumaa.

España

—	Laboratorio Arbitral Agroalimentario, Ministerio de Agricultura, Pesca y Alimentación, Madrid.

—	Laboratori Agroalimentari, Departament d’Agricultura, Ramaderia i Pesca, Generalitat de Catalunya, Cabrils.

France

—	Laboratoire de Rennes, SCL L35, Service Commun des Laboratoires, Rennes.

Ireland

—	The State Laboratory, Kildare.

Italia

—	Istituto Superiore di Sanità. Dipartimento di Sanità alimentare ed animale, Roma.

—	Centro di referenza nazionale per la sorveglienza ed il controllo degli alimenti per gli animali (CReAA), Torino.

Kypros

—	Feedingstuffs Analytical Laboratory, Department of Agriculture, Nicosia.

Latvija

—	Valsts veterinārmedicīnas diagnostikas centrs (VVMDC), Riga.

Lietuvos

—	Nacionalinis maisto ir veterinarijos rizikos vertinimo institutas, Vilnius.

Luxembourg

—	Laboratoire de Contrôle et d’essais – ASTA, Ettelbruck.

Magyarország

—	Mezőgazdasági Szakigazgatási Hivatal Központ, Élelmiszer- és Takarmány-biztonsági Igazgatóság, Takarmányvizsgáló Nemzeti Referencia Laboratórium, Budapest.

Nederland

—	RIKILT- Instituut voor Voedselveiligheid, Wageningen.

—	Rijkinstituut voor Volksgezondheid en Milieu (RIVM), Bilthoven.

Österreich

—	Österreichische Agentur für Gesundheit und Ernährungssicherheit (AGES), Wien.

Polska

—	Instytut Zootechniki w Krakowie. Krajowe Laboratorium Pasz, Lublin.

—	Państwowy Instytut Weterynaryjny, Puławy.

Portugal

—	Instituto Nacional dos Recursos Biológicos, I.P./Laboratório Nacional de Investigação Veterinária (INRB,IP/LNIV), Lisboa.

Slovenija

—	Univerza v Ljubljani. Veterinarska fakulteta. Nacionalni veterinarski inštitut. Enota za patologijo prehrane in higieno okolja, Ljubljana.

—	Kmetijski inštitut Slovenije, Ljubljana.

Slovensko

—	Skúšobné laboratórium - Oddelenie analýzy krmív, Ústredný kontrolný a skúšobný ústav poľnohospodársky, Bratislava.

Suomi/Finland

—	Elintarviketurvallisuusvirasto/Livsmedelssäkerhetsverket (Evira), Helsinki/Helsingfors.

Sverige

—	Foderavdelningen, Statens Veterinärmedicinska Anstalt (SVA), Uppsala.

United Kingdom

—	The Laboratory of the Government Chemist, Teddington.

NATIONAL REFERENCE LABORATORIES OF EFTA COUNTRIES

Norway

—	LabNett AS, Agricultural Chemistry Laboratory, Stjørdal.”

ANNESS II

“ANNESS IV

IR-RATI GĦALL-MIŻATI KIF IMSEMMIJA FL-ARTIKOLU 4(1)

Il-Kompożizzjoni tal-miżata

Minħabba l-kalkolu tal-miżata, il-miżata hi magħmula minn żewġ komponenti:

1.	L-ewwel komponent hu maħsub biex isostni l-ispejjeż amministrattivi tal-LRK u l-ispejjeż marbuta mat-trattament tal-kampjuni ta’ referenza. L-ewwel komponent jammonta għal EUR 2 000.

2.	It-tieni komponent hu maħsub biex isostni l-ispejjeż tal-Laboratorju Relatur għall-valutazzjoni xjentifika u t-tħejjija tar-rapport ta’ valutazzjoni. It-tieni komponent jammonta għal EUR 4 000.

Iż-żewġ komponenti huma applikati kif spjegat hawn isfel biex jiġu kkalkulati r-rati tal-miżata.

Ir-rati skont it-tip ta’ applikazzjoni għall-awtorizzazzjoni ta’ addittivi tal-għalf skont ir-Regolament (KE) Nru 1831/2003

Awtorizzazzjoni ta’ addittiv tal-għalf ġdid (Artikolu 4(1) tar-Regolament (KE) Nru 1831/2003):

Miżata = Komponent 1 + Komponent 2 = EUR 6 000

Awtorizzazzjoni għal użu ġdid ta’ addittiv fl-għalf (Artikolu 4(1) tar-Regolament (KE) Nru 1831/2003):

—	meta l-Artikolu 3(4)(a) u l-Artikolu 5(4)(a) japplikaw: Miżata = EUR 0

—	meta l-Artikolu 3(4)(a) biss japplika, il-Komponent 2 biss japplika: Miżata = EUR 4 000

Awtorizzazzjoni ta’ addittiv tal-għalf diġà awtorizzat (Artikolu 10(2) tar-Regolament (KE) Nru 1831/2003):

Miżata = Komponent 1 + Komponent 2 = EUR 6 000

—

Għal gruppi ta’ applikazzjonijiet li jikkonċernaw aktar minn addittiv tal-għalf wieħed imressqa f’daqqa li jappartjenu għall-istess kategorija, grupp funzjonali u fejn meħtieġ, sotto klassifikazzjoni, ta’ addittivi tal-għalf, jekk ma jikkonċernax togħmiet definiti kimikament, addittivi żootekniċi jew, koċċidijostati u istomonostati oħra, u meta l-metodi ta’ analiżi użati għal dawn l-addittivi tal-għalf huma tat-tip multi-analitiki, il-miżata għandha tiġi kkalkulata kif ġej:

L-ewwel komponent hu mmultiplikat bin-numru (n) tal-addittivi tal-għalf fil-grupp:

Komponent 1 = (EUR 2 000 × n) = N

It-tieni komponent hu mmultiplikat bin-numru (m) tal-metodi ta’ analiżi li għandhom jiġu vvalutati mil-LRK:

Komponent 2 = (EUR 4 000 × m) = M

Il-miżata għandha tkun is-somma taż-żewġ komponenti:

Miżata = N + M

—

Għal gruppi ta’ applikazzjonijiet li jikkonċernaw aktar minn togħma definita kimikament waħda mressqa f’daqqa, u meta l-metodi ta’ analiżi użati għal dawn l-addittivi tal-għalf huma tat-tip multi-analitiki, il-miżata għandha tiġi kkalkulata kif ġej:

L-ewwel komponent hu mmultiplikat bin-numru (n) tal-kampjuni ta’ referenza, kif speċifikat fl-Artikolu 3(1), imressaq lil-LRK:

Komponent 1 = (EUR 2 000 × n) = N

It-tieni komponent hu mmultiplikat bin-numru (m) tal-metodi ta’ analiżi li għandhom jiġu vvalutati mil-LRK:

Komponent 2 = (EUR 4 000 × m) = M

Il-miżata għandha tkun is-somma taż-żewġ komponenti:

Miżata = N + M

L-applikazzjonijiet għall-bidla fit-termini ta’ awtorizzazzjoni eżistenti (Artikolu 13(3) tar-Regolament (KE) Nru 1831/2003):

—	meta l-Artikolu 3(4)(b) u l-Artikolu 5(4)(b) japplikaw: Miżata = EUR 0

—	meta l-Artikolu 3(4)(b) japplika, il-Komponent 2 biss japplika: Miżata = EUR 4 000

Tiġdid ta’ awtorizzazzjoni għal addittiv fl-għalf (Artikolu 14 tar-Regolament (KE) Nru 1831/2003):

Miżata = EUR 4 000 ”

Top

Choose the experimental features you want to try