(1)

Ir-Regolament (KE) Nru 999/2001 jistipula regoli għall-prevenzjoni, il-kontroll u l-eradikazzjoni tal-enċefalopatiji sponġiformi li jittieħdu (TSEs) fl-annimali u jirrikjedi li kull Stat Memru jwettaq programm ta' monitoraġġ annwali għat-TSEs ibbażat fuq is-sorveljanza attiva u passiva, skont l-Anness III ta' dak ir-Regolament.

(2)

Dawk il-programmi ta' monitoraġġ annwali għandhom ikopru mill-inqas ċerti sottopopolazzjonijiet ta' annimali bovini kif previst fir-Regolament (KE) Nru 999/2001. Dawk is-sottopopolazzjonijiet għandhom jinkludu l-annimali bovini kollha li għandhom iktar minn 24 jew 30 xahar; l-età massima tiddependi mill-kategoriji stipulati fil-punti 2.1, 2.2 u 3.1 tal-Parti I tal-Kapitlu A tal-Anness III tar-Regolament (KE) Nru 999/2001.

(3)

L-Artikolu 6(1b) tar-Regolament (KE) Nru 999/2001 jistipula li Stati Membri li jistgħu juru li kien hemm titjib fil-qagħda epidemjoloġika tagħhom, skont ċerti kriterji, jistgħu japplikaw biex il-programmi ta’ monitoraġġ annwali tagħhom jiġu riveduti.

(4)

L-Anness III (il-Punt 7 tal-Parti I tal-Kapitolu A) għar-Regolament (KE) Nru 999/2001 jistabbilixxi liema informazzjoni għandha tingħata lill-Kummissjoni u liema kriterji epidemjoloġiċi għandhom jikkonformaw magħhom l-Istati Membri li jixtiequ jirrevedu l-programmi ta' monitoraġġ annwali tagħhom.

(5)

Fis-17 ta' Lulju 2008, l-Awtorità Ewropea tas-Sikurezza tal-Ikel (EFSA) ippubblikat opinjoni xjentifika (2) li vvalutat il-livell ta' riskju addizzjonali għas-saħħa tal-bniedem u tal-annimali wara l-implimentazzjoni ta' reġim ta' monitoraġġ ġdid tal-enċefalopatija sponġiformi bovina (BSE) fil-15-il pajjiż li kienu membri tal-Komunità qabel l-1 ta' Mejju 2004. L-opinjoni kkonkludiet li inqas minn każ tal-BSE wieħed jista' ma jiġix individwat kull sena f'dawk l-Istati Membri jekk l-età tal-annimali bovini koperti mill-programm jiżdied minn 24 xahar għal 48 xahar.

(6)

Id-Deċiżjoni tal-Kummissjoni 2008/908/KE tat-28 ta' Novembru 2008 li tawtorizza ċerti Stati Membri jirrevedu l-programm annwali tagħhom ta’ monitoraġġ tal-BSE (3) ġiet adottata abbażi ta' dik l-opinjoni tal-EFSA, kif ukoll abbażi tal-valutazzjoni tal-applikazzjonijiet individwali ta' dawk il-15-il Stat Membru.

(7)

Fl-1 ta’ Settembru 2008, is-Slovenja ppreżentat applikazzjoni lill-Kummissjoni biex jiġi rivedut il-programm ta’ monitoraġġ annwali tal-BSE tagħha.

(8)

L-Uffiċċju tal-Ikel u Veterinarju (FVO) wettaq spezzjoni f'dak l-Istat Membru f'Jannar 2009 sabiex jivverifika l-konformità mal-kriterji epidemjoloġiċi stipulati fil-punt 7 tal-Parti I tal-Kapitlu A tal-Anness III tar-Regolament (KE) Nru 999/2001.

(9)

Ir-riżultati ta' dik l-ispezzjoni rrikonoxxew l-implimentazzjoni korretta fis-Slovenja tar-regoli dwar il-miżuri protettivi stipulati fir-Regolament (KE) Nru 999/2001. Barra minn hekk, ir-rekwiżiti kollha stipulati fit-tielet sottoparagrafu tal-Artikolu 6(1b) u l-kriterji epidemjoloġiċi kollha stipulati fil-punt 7 tal-Parti I tal-Kapitlu A tal-Anness III tar-Regolament (KE) Nru 999/2001 ġew iċċekkjati u nstabu li s-Slovenja kienet issodisfathom.

(10)

Fid-29 ta' April 2009, l-EFSA ppubblikat opinjoni xjentifika ġdida dwar ir-riskju aġġornat għas-saħħa tal-bniedem u tal-annimali marbut mar-reviżjoni tar-reġim ta' monitoraġġ tal-BSE f'xi Stati Membri (4). L-opinjoni vvalutat ukoll is-sitwazzjoni fis-Slovenja u kkonkludiet li, kull sena, inqas minn każ tal-BSE wieħed jista' ma jiġix individwat f'dawk l-Istati Membri jekk l-età tal-annimali bovini koperti mill-programm tiżdied minn 24 xahar għal 48 xahar.

(11)

Fid-dawl tal-informazzjoni kollha disponibbli, l-applikazzjoni mressqa mis-Slovenja biex jiġi rivedut il-programm ta' monitoraġġ annwali tal-BSE ġiet ivvalutata b'mod favorevoli. Għalhekk, jixraq li s-Slovenja tiġi awtorizzata tirrevedi l-programm ta' monitoraġġ annwali tagħha u li l-età massima l-ġdida għall-ittestjar għall-BSE f'dak l-Istat Membru ssir 48 xahar.

(12)

Għal raġunijiet epidemjoloġiċi, għandu jkun stipulat li l-programmi ta' monitoraġġ riveduti jistgħu jiġu applikati biss lil annimali bovini li twieldu fi Stat Membru li huwa awtorizzat jirrevedi l-programm ta' monitoraġġ tiegħu.

(13)

Sabiex tkun iggarantita l-applikazzjoni uniformi tal-leġiżlazzjoni Komunitarja, jixraq li jiġu stipulati regoli dwar l-età massima għall-ittestjar fil-każ ta' annimali bovini li twieldu fi Stat Membru wieħed iżda li ġew ittestjati f'ieħor.

(14)

Minħabba ċ-ċarezza u l-konsistenza tal-leġiżlazzjoni Komunitarja, id-Deċiżjoni 2008/908/KE għandha tiġi rrevokata u sostitwita minn din id-Deċiżjoni.

(15)

Il-miżuri stipulati f’din id-Deċiżjoni huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali,