19.3.2009   

MT

Il-Ġurnal Uffiċjali tal-Unjoni Ewropea

C 64/1

(1)

Fl-10 ta' Marzu 2009 l-Kunsill eżamina l-programm ta' stabbiltà aġġornat ta' Franza, li jkopri l-perijodu bejn l-2008 u l-2012.

(2)

Fl-2008, il-kriżi finanzjarja globali amplifikat it-tnaqqis fit-tkabbir permezz tal-fiduċja aktar baxxa tal-konsumaturi u tan-negozji u kondizzjonijiet ta' kreditu aktar stretti. Wara kollass tal-produzzjoni industrijali fl-aħħar tliet xhur tal-2008, il-PDG annwali hu mistenni li jonqos f'daqqa fl-2009. L-isfidi tal-politika prinċipali fil-kriżi ekonomika huma li jiġi stabbilizzat is-settur finanzjarju, terġa' tinbena l-fiduċja tal-konsumaturi u tan-negozji, u jiġi appoġġat l-investiment. Il-kriżi ekonomika ser ikollha impatt sinifikattiv fuq il-finanzi pubbliċi billi l-iżbilanċ qabeż it-3 % tal-PDG fl-2008 kif indikat mill-Ministru Franċiż tal-Ekonomija, l-Industrija u l-Impjiegi, f'ittra indirizzata lill-Kummissarju tal-Affarijiet Ekonomiċi u Finanzjarji fis-6 ta' Frar 2009, u hu mistenni li jaqbeż il-5 % tal-PDG fl-2009 skont it-tbassir proviżorju ta' Jannar 2009 tas-servizzi tal-Kummissjoni. Dan tal-aħħar jirrifletti wkoll l-impatt ta' 0,8 % tal-PGD fuq il-bilanċ tal-baġit tal-pjan ta' rkupru adottat f'Diċembru, li l-miżuri prinċipali tiegħu huma l-antiċipazzjoni ta' investiment pubbliku u l-għoti ta' appoġġ finanzjarju lill-intrapriżi. Il-Gvern implimenta għadd ta' riformi strutturali, li mistennija jkollhom impatt pożittiv fuq it-tkabbir potenzjali tal-ekonomija.

(3)

Ix-xenarju makroekonomiku li fuqu huwa msejjes il-programm jipprevedi li t-tkabbir tal-PDG ser ikun pożittiv tul il-perijodu kollu tal-programm. Wara li naqas għal madwar 1 % fl-2008, mistenni li jkompli jonqos għal medda ta' 0,2-0,5 % fl-2009, qabel ma jiżdied għal madwar 2 % fl-2010 u ulterjorment għal 2,5 % għall-bqija tal-perijodu tal-programm. Meta jiġi vvalutat skont l-informazzjoni disponibbli attwalment (2), dan ix-xenarju jidher li huwa bbażat fuq suppożizzjonijiet ta' tkabbir konsiderevolment favorevoli. Din l-evalwazzjoni tqis it-tnaqqis serju tal-PDG fl-aħħar tliet xhur tal-2008 u l-prospetti ekonomiċi xejn tajba bbażati fuq l-indikaturi ta' livell baxx ta' fiduċja u t-tnaqqis f'daqqa projettat fl-investiment u fil-kummerċ, iżda wkoll l-impatt fuq it-tkabbir tal-pjan ta' rkupru u l-liġi dwar il-modernizzazzjoni tal-ekonomija (3). Fid-dawl tal-aħħar żviluppi fil-prezzijiet taż-żejt u l-intensità tal-kriżi ekonomika globali, il-projezzjonijiet tal-programm għall-inflazzjoni jidhru li huma pjuttost għoljin għall-2009, iżda minn hemm 'il quddiem jistgħu jitqiesu realistiċi. Fis-6 ta' Frar l-awtoritajiet Franċiżi informaw lill-Kummissjoni li t-tbassir makroekonomiku u tal-finanzi pubbliċi għandhom jiġu riveduti.

(4)

Għall-2008, l-iżbilanċ ġenerali tal-gvern huwa stmat għal 3,2 % tal-PDG fit-tbassir proviżorju tas-servizzi tal-Kummissjoni, li huwa 0,3 % agħar miċ-ċifra li tidher fil-programm iżda kkonfermat mill-ittra msemmija hawn fuq fis-6 ta' Frar (4). Id-differenza ta' 0,9 % tal-PDG bil-mira mill-aġġornament preċedenti (2,3 % tal-PDG) hija fil-biċċa l-kbira dovuta għal (i) riżultat agħar milli antiċipat fl-2007 (0,3 % tal-PDG), (ii) tkabbir tal-PDG reali fl-2008 notevolment aktar dgħajjef milli mistenni fl-aġġornament preċedenti li naqqas id-dħul mit-taxxi meta mqabbel mal-pjan (b'0,3 % tal-PDG), u (iii) ħlasijiet ogħla ta' interessi li jirriflettu l-impatt ta' inflazzjoni ogħla fl-2008 fuq l-ispejjeż tas-servizz tad-dejn ta' bonds marbutin mal-inflazzjoni (0,2 % tal-PDG).

(5)

L-aġġornament jinkludi mira tal-iżbilanċ għall-2009 ta' 3,9 % tal-PDG, meta mqabbla mal-projezzjoni ta' 5,4 % fit-tbassir proviżorju tas-servizzi tal-Kummissjoni. Id-deterjorament fl-iżbilanċ tal-2009 jirrifletti l-funzjonament tal-istabbilizzaturi awtomatiċi b'rispons għall-kriżi ekonomika iżda wkoll l-impatt tal-pakkett ta' stimolu fiskali ta' Diċembru 2008 li jammonta għal 0,8 % tal-PDG. Aktar reċentement, il-Gvern ħabbar mira ta' żbilanċ ogħla ta' 4,4 % tal-PDG (5). L-iżbilanċ strutturali (jiġifieri l-bilanċ aġġustat ċiklikament nett mill-miżuri ta' darba u miżuri temporanji oħra), skont l-informazzjoni mogħtija fil-programm ta' stabbiltà aġġornat u kkalkolata mill-ġdid mis-servizzi tal-Kummissjoni, hu projettat li jilħaq it-3 % tal-PDG fl-2009, meta mqabbel ma' 2,5 % fl-2008. Din il-qagħda fiskali tista' titqies espansjonarja u tista' tiġi spjegata b'mod sħiħ mill-impuls fiskali assoċjat mal-pakkett ta' stimolu.

(6)

L-għan ta' Franza għall-istrateġija baġitarja għall-perijodu medju stipolat fil-programm huwa li tilħaq l-objettiv tal-perijodu medju (MTO) ta' pożizzjoni baġitarja bbilanċjata f'termini strutturali fl-2012. Skont il-projezzjonijiet tal-programm riveduti mill-ittra tas-6 ta' Frar imsemmija hawn fuq, l-iżbilanċ ġenerali tal-gvern mistenni li jkun l-ogħla fl-2009 b'4,4 % tal-PDG (minn 3,9 % tal-PDG) u mbagħad jerġa' jinżel għal 3,1 % tal-PDG fl-2010 (minn 2,7 % tal-PDG) waqt li l-impatt baġitarju tal-pjan ta' rkupru għandu jonqos gradwalment. Dan jikkompara mat-tbassir proviżorju tas-servizzi tal-Kummissjoni, li jipprojetta li l-iżbilanċ ġenerali tal-gvern ser jiżdied għal 5,4 % tal-PDG fl-2009 u mbagħad jilħaq 5,0 % tal-PDG fl-2010. Skont il-projezzjonijiet riveduti mill-ittra msemmija hawn fuq, l-iżbilanċ hu projettat li jkompli jitjieb wara l-2010 biex jilħaq 1,5 % tal-PDG fl-2012. Il-bilanċ primarju jsegwi xejra simili. L-iżbilanċ strutturali hu mistenni li jaqa' għal 3 % tal-PDG fl-2009 u jitjieb b'madwar 1 % tal-PDG fl-2010 u b'0,5 % tal-PDG kull sena matul l-aħħar snin. Minbarra t-tneħħija gradwali tal-pjan ta' rkupru, dan mistenni li jinkiseb permezz ta' trażżin tal-infiq speċifikat. Il-programm aġġornat ibassar li l-proporzjon tad-dejn għall-PGD għandu jiżdied għal 69,1 % fl-2009 u jistabbilizza ruħu kumplessivament għal 69,4 % fl-2010 qabel ma jonqos ftit fis-sentejn ta' wara. Minbarra l-qagħda baġitarja, dan jinkludi l-impatt tar-rikapitalizzazzjonijiet bankarji u l-parteċipazzjoni tal-Fond ta' Investiment Strateġiku (6), li tammonta għal madwar 0,75 % tal-PDG iżda jeskludi obbligi kontinġenti potenzjali li joħorġu mill-iskema ta' garanzija. Skont it-tbassir proviżorju tas-servizzi tal-Kummissjoni, il-proporzjon tad-dejn għandu jilħaq 72,4 % tal-PDG fl-2009 u 76 % tal-PDG fl-2010, filwaqt li d-differenza fir-rigward tal-programm ta' stabbiltà aġġornat tiġi spjegata bit-tkabbir diverġenti u ċ-ċifri tal-iżbilanċ ġenerali tal-gvern.

(7)

Ir-riżultati baġitarji huma soġġetti għal riskji negattivi tul il-perijodu kollu tal-programm. L-ewwel nett, dawn għadhom ma jirriflettux l-agħar riżultat fl-2008 (b'0,3 % tal-PDG) li ġie kkonfermat dan l-aħħar permezz tal-ittra msemmija hawn fuq. Dan ir-riżultat jirrifletti wkoll il-fatt li kien hemm nuqqas ta' konsolidazzjoni fiskali fi żminijiet ekonomiċi tajbin/newtrali (7) u jispjega parti mir-reviżjoni 'l fuq tal-mira tal-iżbilanċ tal-2009 għal 4,4 % tal-PDG (li tqis ukoll reviżjoni negattiva tat-taxxi korporattivi). Aktar importanti minn hekk, il-perspettiva makroekonomika tal-programm ma tinkludix ir-reċessjoni mistennija għall-2009, u dan jimplika riskji baġitarji sostanzjali, anke għall-aħħar mira ta' żbilanċ imħabbra mill-Gvern. Barra minn hekk, flimkien mal-impatt tal-istabbilizzaturi awtomatiċi, hemm riskji ta' nfiq eċċessiv fil-qasam tal-kura tas-saħħa (8). Fl-aħħar nett, fid-dawl tar-riżultati milħuqa fl-imgħoddi mill-awtoritajiet lokali, hemm riskju li l-miri tal-infiq ippjanati ma jintlaħqux. Ir-riskji għax-xenarju tad-dejn huma wkoll pjuttost għoljin, filwaqt li jirriflettu r-riskji għall-bilanċ baġitarju kif ukoll l-effetti possibbli tal-miżuri tal-istabbilizzazzjoni tas-settur finanzjarju.

(8)

L-impatt baġitarju tat-tixjiħ għall-perijodu medju huwa ftit inqas mill-medja tal-UE, bl-infiq tal-pensjonijiet juri żieda kemmxejn aktar limitata, b'riżultat tar-riformi tal-pensjonijiet li diġà daħlu fis-seħħ, fosthom ir-riforma tal-hekk imsejħa régimes spéciaux (sistemi speċjali tal-pensjonijiet), immirati li jallinjaw il-perijodu ta' kontribuzzjoni meħtieġ mar-regoli ta' sistemi oħra. Il-pożizzjoni baġitarja fl-2008, kif stmata fil-programm, li hija agħar mill-pożizzjoni tal-bidu tal-programm preċedenti, aggravat l-impatt baġitarju tat-tixjiħ tal-popolazzjoni fuq id-distakk fis-sostenibbiltà. Jekk il-pożizzjoni baġitarja tal-2009 tat-tbassir proviżorju tas-servizzi tal-Kummissjoni tkun ittieħdet bħala l-punt tal-bidu, id-distakk fis-sostenibbiltà jmur għall-agħar b'mod sostanzjali. Il-livell attwali tad-dejn gross huwa ogħla mill-valur ta' referenza tat-Trattat. L-iskemi msemmija hawn għall-istabbiltà tas-settur finanzjarju implimentati minn Franza jista' jkollhom impatt fuq is-sostenibbiltà għall-perijodu twil tal-finanzi pubbliċi, jekk l-ispejjeż tas-sostenn tal-Gvern ma jiġux irkuprati bis-sħiħ fil-futur. L-iżgurar ta' bilanċi favorevoli primarji għoljin għall-perijodu medju, kif diġà previst fil-programm, jikkontribwixxi biex jonqsu r-riskji medji għas-sostenibbiltà tal-finanzi pubbliċi.

(9)

Ir-riżultati miksuba fil-passat minn Franza juru li l-infiq eċċessiv ġenerali tal-gvern ma kienx eċċezzjonali matul l-aħħar għaxar snin, u dan jindika d-dgħufijiet fir-regoli baġitarji eżistenti. Ir-riforma tal-Kostituzzjoni adottata fit-23 ta' Lulju 2008 introduċiet objettiv ġenerali ta' baġits ibbilanċjati għall-gvern ġenerali (9). Madankollu, in-natura mhux vinkolanti tal-objettiv tal-baġit ibbilanċjat tqajjem il-mistoqsija dwar jekk huwa jistax jiġi kkontrollat b'mod effettiv. Ir-riforma tintroduċi wkoll baġit pluriennali, adottat mill-Parlament, li jibda fl-2009, għall-perijodu 2009-2012, jiġifieri l-istess tul ta' żmien bħal fil-programm ta' stabbiltà. Din ir-riforma għandha tikkontribwixxi għall-ġestjoni aħjar ta' finanzi pubbliċi u tgħin lid-dixxiplina baġitarja.

Barra minn hekk, wara t-tnedija tar-Reviżjoni Ġenerali tal-Politika Pubblika f'nofs l-2007, ittieħdu għadd ta' miżuri biex tiżdied l-effiċjenza fin-nefqa pubblika, inkluż tnaqqis fl-għadd ta' ħaddiema taċ-ċivil. Fl-2008 daħlet fis-seħħ regola ġdida dwar id-dejn, applikata għas-sottosettur tas-sigurtà soċjali (10).

(10)

B'rispons għall-kriżi finanzjarja, il-Gvern Franċiż implimenta għadd ta' miżuri indirizzati biex jiżguraw l-istabbiltà tas-settur finanzjarju. Sabiex jimmodera l-konsegwenzi tagħha fuq il-kapaċità ta' għoti ta' kreditu tal-banek Franċiżi, il-Gvern iddeċieda (11) li jixtri sa EUR 40 biljun dejn subordinat tal-banek mingħajr ma jakkwista d-drittijiet tal-vot. Min-naħa tagħhom il-banek impenjaw ruħhom biex iżidu s-self għall-ekonomija sabiex jiġi garantit livell ta' finanzjament konformi mal-ħtiġijiet tal-aġenti ekonomiċi. Barra minn hekk, ġie awtorizzata bil-liġi fond ta' EUR 320 biljun (12) biex jiggarantixxi d-djun tal-banek. L-iskema ta' garanzija hi mmirata li ttejjeb l-aċċess għall-finanzjament tal-banek, fil-kuntest tal-pressjoni serja li kellu jħabbat wiċċu magħha s-suq tas-self interbankarju, sa mill-bidu tal-kriżi finanzjarja. Il-banek ser iħallsu premium għall-garanzija tal-Gvern għas-self tagħhom u ser jipprovdu kollaterali.

(11)

B'rispons għall-kriżi ekonomika, il-Gvern Franċiż fl-4 ta' Diċembru ppreżenta pjan ta' rkupru, li jista' jiġi deskritt bħala taħlita bbilanċjata ta' strumenti ta' dħul u ta' nfiq u huwa konformi mal-PERE (Pjan Ewropew ta' Rilanċ Ekonomiku). Il-miżuri tiegħu jinkludu l-investiment pubbliku (prinċipalment lill-intrapriżi pubbliċi, l-infrastrutturi, ir-riċerka u d-difiża), il-miżuri tas-suq tax-xogħol (bħal eżenzjoni totali minn kontribuzzjonijiet tas-sigurtà soċjali fuq impenji ġodda lis-sidien ta' kumpanniji żgħar), is-sostenn għall-impriżi (bħal għajnuna settorjali għall-industrija tad-djar u tal-karozzi kif ukoll aċċelerazzjoni ta' ħlasijiet tal-Gvern lill-intrapriżi, speċjalment l-SMEs) u s-sostenn lill-kapaċità tal-akkwist domestiku (prinċipalment għotjiet ta' EUR 200 f'April 2009 lil familji bi dħul baxx). Il-pakkett jista' jitqies li hu mmirat u f'waqtu. Il-miżuri mħabbra huma temporanji, u għalhekk riversibbli, bl-ebda spiża għall-finanzi pubbliċi lil hinn mill-2010. Il-Gvern qed jimplimenta wkoll għadd ta' riformi strutturali, li mistennija jkollhom impatt pożittiv fuq it-tkabbir potenzjali tal-ekonomija, u, għalhekk, fuq il-finanzi pubbliċi fit-tul. Safejn għandhom x'jaqsmu s-swieq tal-merkanzija u s-servizzi, il-liġi msemmija hawn fuq dwar il-modernizzazzjoni tal-ekonomija timmira li żżid it-tkabbir potenzjali, partikolarment billi tippromwovi l-intraprenditorija individwali u tnaqqas l-ostakli eżistenti għall-kompetizzjoni, inkluż fis-settur tal-bejgħ bl-imnut. Anki fejn għandu x'jaqsam is-suq tax-xogħol ġew adottati liġijiet ġodda, partikolarment fir-rigward tal-flessigurtà. Il-liġi dwar il-modernizzazzjoni tas-suq tax-xogħol, li ġiet adottata f'Ġunju 2008 u tirrappreżenta t-traspożizzjoni tal-ewwel ftehim interprofessjonali bejn l-imsieħba soċjali, timmira li tiżviluppa kuntratti kemm aktar sikuri kif ukoll aktar flessibbli. Ġiet ukoll introdotta riforma importanti tal-proċeduri ta' djalogu soċjali biex tiffaċilita l-ftehim tal-maġġoranza. Il-miżuri huma relatati mal-aġenda ta' riforma għall-perijodu medju u mar-rakkomandazzjonijiet speċifiċi għal pajjiżi li ġew proposti mill-Kummissjoni fit-28 ta' Jannar 2009 skont l-Istrateġija ta' Liżbona għat-Tkabbir u l-Impjiegi.

(12)

Wara d-deterjorament tal-finanzi pubbliċi fl-2007 u fl-2008 meta l-kondizzjonijiet ekonomiċi kienu aktar favorevoli, il-qagħda fiskali fl-2009 hija espansjonarja (filwaqt li tirrifletti r-reazzjoni tal-Gvern Franċiż għall-PERE) meta ż-żminijiet huma ħżiena. Minn hemm 'il quddiem, il-finanzi pubbliċi ser jiġu kkonsolidati skont il-programm; madankollu, meta jitqiesu r-riskji sinifikanti għall-miri baġitarji, li jimplikaw żbilanċ ferm ogħla minn 3 % fl-2009 u l-2010, l-MTO ta' baġit ibbilanċjat f'termini strutturali mhuwiex ser jintlaħaq sal-2012.

F'dan il-kuntest, Franza tista' tnaqqas ir-riskju ta' nfiq eċċessiv permezz tal-implimentazzjoni u titjib ulterjuri tal-qafas tagħha tal-finanzi pubbliċi, b'mod partikolari fir-rigward tar-regoli tal-infiq. Fl-aħħar nett, meta jitqiesu r-riskji għall-projezzjonijiet tad-dejn imsemmija hawn fuq, il-proporzjon tad-dejn, li jirrifletti l-qagħda espansjonarja fl-2009, ser ikun għoli u ser tinħtieġ azzjoni deċiżiva matul is-snin li ġejjin biex titbiddel din ix-xejra.

(13)

Fir-rigward tar-rekwiżiti tad-data speċifikati fil-kodiċi ta' kondotta għal programmi ta' stabbiltà u konverġenza, il-programm jipprovdi d-data meħtieġa kollha u l-parti l-kbira ta' dik fakultattiva (13).

(i)

timplimenta l-miżuri fiskali fl-2009 kif ippjanat, inklużi l-miżuri ta' stimolu f'konformità mal-PERE u fil-qafas tal-SGP filwaqt li jinżamm l-objettiv li jiġi evitat deterjorament ulterjuri tal-finanzi pubbliċi;

(ii)

fid-dawl tar-rilanċ previst tal-attività ekonomika, tagħmel sforz għal konsolidazzjoni fl-2010 u ssaħħaħ il-pass tal-aġġustament minn hemm 'il quddiem sabiex tiżgura li l-iżbilanċ jitniżżel malajr għal taħt il-valur ta' referenza, u b'hekk tistabbilixxi l-proporzjon tad-dejn għall-PDG b'xejra għan-niżla;

(iii)

tinforza b'mod effettiv ir-regoli eżistenti tal-infiq u tieħu aktar passi biex tiggarantixxi r-rispett tal-miri pluriennali tat-tnaqqis tal-infiq tal-gvern ġenerali fis-sottosetturi kollha u tkompli timplimenta miżuri fil-kuntest tar-Reviżjoni Ġenerali tal-Politika Pubblika. Timplimenta l-programm ta' riforma strutturali, b'mod partikolari fir-rigward tas-sostenibbiltà tas-sistema tal-pensjonijiet.