This document is an excerpt from the EUR-Lex website
Document 32008R0365
Commission Regulation (EC) No 365/2008 of 23 April 2008 adopting the programme of ad hoc modules, covering the years 2010, 2011 and 2012, for the labour force sample survey provided for by Council Regulation (EC) No 577/98 Text with EEA relevance
Regolament tal-Kummissjoni (KE) Nru 365/2008 tat- 23 ta' April 2008 li jadotta l-programm ta' moduli ad hoc , li jkopri s-snin 2010, 2011 u 2012, għall-istħarriġ kampjun dwar il-forza tax-xogħol stipulat bir-Regolament tal-Kunsill (KE) Nru 577/98 Test b’relevanza għaż-ŻEE
Regolament tal-Kummissjoni (KE) Nru 365/2008 tat- 23 ta' April 2008 li jadotta l-programm ta' moduli ad hoc , li jkopri s-snin 2010, 2011 u 2012, għall-istħarriġ kampjun dwar il-forza tax-xogħol stipulat bir-Regolament tal-Kunsill (KE) Nru 577/98 Test b’relevanza għaż-ŻEE
ĠU L 112, 24.4.2008, p. 22–24
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV) Dan id-dokument ġie ppubblikat f’edizzjoni(jiet) speċjali
(HR)
In force
24.4.2008 |
MT |
Il-Ġurnal Uffiċjali ta’ l-Unjoni Ewropea |
L 112/22 |
REGOLAMENT TAL-KUMMISSJONI (KE) Nru 365/2008
tat-23 ta' April 2008
li jadotta l-programm ta' moduli ad hoc, li jkopri s-snin 2010, 2011 u 2012, għall-istħarriġ kampjun dwar il-forza tax-xogħol stipulat bir-Regolament tal-Kunsill (KE) Nru 577/98
(Test b’relevanza għaż-ŻEE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat ir-Regolament tal-Kunsill (KE) Nru 577/98 tad-9 ta' Marzu 1998 dwar l-organizzazzjoni ta' stħarriġ kampjun dwar il-forza tax-xogħol fil-Komunità (1), b'mod partikolari l-Artikolu 4(2) tiegħu,
Billi:
(1) |
B'konformità ma' l-Artikolu 4(2) tar-Regolament (KE) Nru 577/98, jeħtieġ li jkunu speċifikati l-elementi tal-programm ta' moduli ad hoc li jkopri s-snin 2010, 2011 u 2012. |
(2) |
Il-Linjigwida dwar ix-Xogħol (2005-2008) adottati bid-Deċiżjoni tal-Kunsill 2005/600/KE (2), “Pjan dwar l-ugwaljanza bejn l-irġiel u n-nisa” (3) tal-Kummissjoni Ewropea u l-Patt Ewropew għall-Ugwaljanza bejn is-Sessi (4) jinkoraġġixxu lill-Istati Membri biex jieħdu miżuri biex jippromwovu bilanċ aħjar tal-ħajja tax-xogħol għal kulħadd f'termini ta' kura tat-tfal, faċilitajiet tal-kura għal dipendenti oħra u promozzjoni tal-ġranet frank tal-ġenituri kemm għan-nisa kif ukoll għall-irġiel. Għalhekk, biex jitkejjel l-impatt tal-politiki riċenti f'dan il-qasam, ikun essenzjali li tinġabar l-informazzjoni relevanti kollha bil-modulu ad hoc ta' l-2010. |
(3) |
Ir-Riżoluzzjoni tal-Kunsill tas-17 ta' Ġunju 1999 dwar l-opportunitajiet indaqs għall-persuni bid-diżabbiltajiet (5) tirreferi għall-bżonn ta' sett ta' data komprensiva u komparabbli dwar is-sitwazzjoni tas-suq tax-xogħol ta' persuni b'diżabbiltà. Aktar minn hekk, il-Pjan ta' Azzjoni tal-Kummissjoni Ewropea dwar l-opportunitajiet indaqs għall-persuni b'diżabilitajiet (6), li jiffoka fuq inklużjoni attiva tal-persuni b'diżabbiltajiet għandu jiġi sorveljat. Għalhekk, din l-informazzjoni għandha tinġabar permezz tal-modulu ad hoc għall-2011. |
(4) |
Hemm il-bżonn ta' sett ta' data sħiħa u komparabbli dwar it-tranżizzjonijiet mix-xogħol għall-irtirar sabiex jiġi osservat il-progress lejn l-għanijiet komuni ta' l-Istrateġija ta' l-Impjiegi tal-Komunità u tal-metodu miftuħ ta' koordinazzjoni fil-qasam tal-pensjonijiet li ġie mibdi mill-Kunsill Ewropew ta' Laeken f'Diċembru 2001. Iż-żewġ proċessi jidentifikaw il-promozzjoni ta' xjuħija attiva u t-titwil tal-ħajja tax-xogħol bħala prijoritajiet għall-azzjoni. Għalhekk, l-informazzjoni dwar is-sitwazzjoni tas-suq tax-xogħol ta' ħaddiema akbar fl-età u l-fatturi ewlenin li jinfluwenzaw il-parteċipazzjoni tagħhom fis-suq tax-xogħol u t-tranżizzjonijiet għandha tinġabar permezz tal-modulu ad hoc ta' l-2012. |
(5) |
Ir-Regolament tal-Kummissjoni (KE) Nru 430/2005 tal-15 ta' Marzu 2005 li jimplimenta r-Regolament tal-Kunsill (KE) Nru 577/98 dwar l-organizzazzjoni ta’ stħarriġ kampjun dwar il-forza tax-xogħol fil-Komunità li jirrigwarda l-kodifikazzjoni li għandha tintuża għat-trażmissjoni tad-data mill-2006 ’l quddiem u l-użu ta’ sotto-kampjun għall-ġbir ta' data dwar il-varjabbli strutturali (7) jistabbilixxi l-karatteristiċi tal-kampjun li jrid jintuża għall-ġbir ta' l-informazzjoni dwar moduli ad hoc. |
(6) |
Il-miżuri previsiti f'dan ir-Regolament huma konformi ma' l-opinjoni tal-Kumitat tal-Programm Statistiku mwaqqaf bid-Deċiżjoni tal-Kunsill 89/382/KEE, Euratom (8), |
ADOTTAT DAN IR-REGOLAMENT:
Artikolu 1
Il-programm ta' moduli ad hoc għall-istħarriġ kampjun dwar il-forza tax-xogħol, li jkopri s-snin 2010, 2011 u 2012, kif stabbilit fl-Anness, huwa b'dan adottat.
Artikolu 2
Dan ir-Regolament għandu jidħol fis-seħħ fis-seba' jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, 23 ta’ April 2008.
Għall-Kummissjoni
Joaquín ALMUNIA
Membru tal-Kummissjoni
(1) ĠU L 77, 14.3.1998, p. 3. Ir-Regolament kif emendat l-aħħar bir-Regolament (KE) Nru 1372/2007 tal-Parlament Ewropew u tal-Kunsill (ĠU L 315, 3.12.2007, p. 42).
(2) ĠU L 205, 6.8.2005, p. 21.
(3) Adottat fl-1.3.2006, COM(2006) 92 finali.
(4) Il-Konklużjonijiet tal-Presidenza tal-Kunsill Ewropew ta’ Brussell tat-23-24 ta' Marzu 2006.
(6) COM(2003) 650.
(7) ĠU L 71, 17.3.2005, p. 36. Ir-Regolament kif emendat l-aħħar bir-Regolament (KE) Nru 973/2007 (ĠU L 216, 21.8.2007, p. 10).
(8) ĠU L 181, 28.6.1989, p. 47.
ANNESS
STĦARRIĠ TAL-FORZA TAX-XOGĦOL
Programm fuq firxa ta' snin ta' moduli ad hoc.
1. RIKONĊILJAZZJONI BEJN IX-XOGĦOL U L-ĦAJJA TAL-FAMILJA
Listi ta' varjabbli: li għandhom ikunu definiti qabel Diċembru 2008
Perjodu ta’ referenza: 2010.
L-Istati Membri u r-reġjuni konċernati: Kollha.
Kampjun: Il-kampjun għandu jissodisfa l-kundizzjonijiet ta' l-Anness I, punt 4 tar-Regolament tal-Kummissjoni (KE) Nru 430/2005.
Trażmissjoni tar-riżultati: qabel il-31 ta’ Marzu 2011.
2. IMPJIEG TA' NIES B'DIŻABILITÀ
Listi ta' varjabbli: li għandhom ikunu definiti qabel Diċembru 2009.
Perjodu ta’ referenza: 2011.
L-Istati Membri u r-reġjuni konċernati: Kollha.
Kampjun: Il-kampjun għandu jissodisfa l-kundizzjonijiet ta' l-Anness I, punt 4 tar-Regolament tal-Kummissjoni (KE) Nru 430/2005.
Trażmissjoni tar-riżultati: qabel il-31 ta’ Marzu 2012.
3. TRANŻIZZJONI MIX-XOGĦOL GĦALL-IRTIRAR
Listi ta' varjabbli: li għandhom ikunu definiti qabel Diċembru 2010.
Perjodu ta’ referenza: 2012.
L-Istati Membri u r-reġjuni konċernati: Kollha.
Kampjun: Il-kampjun għandu jissodisfa l-kundizzjonijiet ta' l-Anness I, punt 4 tar-Regolament tal-Kummissjoni (KE) Nru 430/2005.
Trażmissjoni tar-riżultati: qabel il-31 ta’ Marzu 2013.