ANNESS

Sostenn mill-UE għall-implimentazzjoni tar-Riżoluzzjoni 1540 (2004) tal-Kunsill tas-Sigurtà tan-Nazzjonijiet Uniti

1.   Sfond

Fir-rapport tiegħu ta’ April 2006, il-Kumitat 1540 ikkonkluda li tnejn u sittin Stat kienu għadhom iridu jippreżentaw l-ewwel rapport nazzjonali tagħhom u ħamsa u ħamsin Stat, minkejja li kienu għamlu dan, xorta kellhom jippreżentaw informazzjoni u kjarifika addizzjonali. Minħabba li dawn l-Istati kienu kkonċentrati fi tliet żoni ġeografiċi (l-Afrika, il-Karibew u n-Nofsinhar tal-Paċifiku), u billi n-nuqqasijiet fir-rapporti nazzjonali segwew ċerti mudelli reġjonali, il-Kumitat 1540 issuġġerixxa li l-attivitajiet ta’ assistenza lill-Istati sabiex jissodisfaw il-ħtiġiet ta’ l-implimentazzjoni tar-Riżoluzzjoni 1540 għandhom jikkonċentraw fuq ir-reġjuni u ż-żoni fejn ġew identifikati ħtiġijiet speċifiċi.

Bħala risposta għal dan, is-sostenn mill-UE matul il-perijodu 2004-2007 għall-attivitajiet tal-Kumitat 1540 kien doppju:

—	l-UE wettqet inizjattivi fi Stati terzi biex tippromwovi l-preżentazzjoni ta’ rapporti nazzjonali skond ir-Riżoluzzjoni 1540.

—

fit-12 ta’ Ġunju 2006 l-UE adottat l-Azzjoni Konġunta 2006/419/PESK li tipprevedi sostenn finanzjarju għal ħames attivitajiet ta’ komunikazzjoni mmirati għal ħames reġjuni differenti tal-pajjiżi li qed jiżviluppaw. L-attivitajiet ta’ komunikazzjoni, fil-forma ta’ seminars, għandhom l-għan li jissensibilizzaw l-opinjoni pubblika fost il-pajjiżi li qed jiżviluppaw dwar l-obbligi tagħhom skond ir-Riżoluzzjoni 1540 u li jikkontribwixxu għat-tisħiħ tal-kapaċitajiet ta’ l-amministrazzjonijiet nazzjonali ta’ Stati terzi fl-abbozzar ta’ rapporti nazzjonali dwar l-implimentazzjoni tar-Riżoluzzjoni 1540.

Skond l-aħħar informazzjoni ppreżentata mill-President tal-Kumitat 1540 lill-KSNU fis-17 ta’ Diċembru 2007, sar progress konsiderevoli fir-rigward ta’ l-obbligi ta’ rappurtar ta’ l-Istati Membri tan-NU iżda aktar sforzi huma meħtieġa fil-perijodu li jmiss sabiex tintlaħaq l-implimentazzjoni sħiħa ta’ l-aspetti kollha tar-riżoluzzjoni. B’mod partikolari f’Marzu 2008, mija u erbgħa u erbgħin Stat li kienu diġà ppreżentaw l-ewwel rapporti tagħhom u disa’ u disgħin Stat diġà ppreżentaw l-informazzjoni addizzjonali mitluba. B’mod simili, id-diskussjoni tematika dwar l-attivitajiet ta’ komunikazzjoni li saret mill-Kumitat 1540 f’Ottubru 2007 rrikonoxxiet il-ħtieġa għal approċċ gradwali u rrakkomandat li l-attivitajiet ta’ komunikazzjoni futuri għandhom jiffokaw anqas fuq l-kwistjoni ta’ rappurtar u aktar fuq il-assistenza lill-Istati dwar kwistjonijiet ta’ implimentazzjoni.

Il-laqgħa informattiva ta’ Diċembru 2007 enfażizzat ukoll kif fix-xogħol prattiku l-fokus prinċipali tal-Kumitat 1540 għandu jixxiftja mir-rappurtar għall-implimentazzjoni ta’ l-aspetti kollha tar-Riżoluzzjoni 1540. F’dan ir-rigward l-attivitajiet ta’ komunikazzjoni u assistenza mfassla individwalment, li jirrispondu għal ċirkostanzi reġjonali u oħrajn speċifiċi, jistgħu jgħinu lill-Istati Membri biex ilaħħqu ma’ l-isfidi ta’ implimentazzjoni. Kif il-Kumitat iddikjara fil-programm ta’ ħidma tiegħu, il-pjani nazzjonali jew road maps ta’ implimentazzjoni jistgħu jservu għall-Istati bħala għodod utli ta’ ppjanar u din l-idea għandha tiġi promossa aktar. Il-pajjiżi konċernati għandhom jirċievu aktar assistenza fl-iżvilupp tal-pjani ta’ azzjoni nazzjonali tagħhom. B’mod simili, għandha wkoll tissaħħaħ il-kapaċità ta’ l-Istati Membri li jifformulaw talbiet ta’ assistenza effettivi.

2.   Deskrizzjoni tal-proġetti

Il-proġetti b’appoġġ għall-implimentazzjoni tar-Riżoluzzjoni 1540 jieħdu l-forma ta’ sitt sessjonijiet ta’ ħidma li għandhom l-għan li jsaħħu l-kapaċità ta’ l-uffiċjali responsabbli għall-ġestjoni tal-proċess tal-kontroll fuq l-esportazzjoni f’sitt sub-reġjuni (l-Afrika, l-Amerika Ċentrali, il-MERCOSUR, il-Lvant Nofsani u r-Reġjuni tal-Golf, il-Gżejjer tal-Paċifiku u x-Xlokk ta’ l-Asja), sabiex huma jkunu jistgħu f’livell prattiku jwettqu sforzi ta’ implimentazzjoni tar-Riżoluzzjoni 1540. Is-sessjonijiet ta’ ħidma proposti għandhom ikunu mfassla speċifikament għall-uffiċjali tal-fruntieri, doganali u regolatorji u ser jinkludu l-elementi ewlenin tal-proċess ta’ kontroll fuq l-esportazzjoni li jinkludi inter alia, liġijiet applikabbli (inklużi aspetti legali nazzjonali u internazzjonali), kontrolli regolatorji (inklużi d-dispożizzjoni dwar il-liċenzjar, verifika ta’ l-utent aħħari u programmi ta’ sensibilizzazzjoni ta’ l-opinjoni pubblika) u infurzar (inklużi l-identifikazzjoni ta’ materja prima, il-valutazzjoni tar-riskju u metodi ta’ individwazzjoni).

Waqt is-sessjoni ta’ ħidma, l-Istati ser ikunu mħeġġa jikkonferixxu u jikkondividu esperjenzi dwar kwistjonijiet prattiċi relatati ma’ l-implimentazzjoni. L-Istati ser ikollhom l-opportunità jipparagunaw il-proċessi tagħhom ta’ kontrolli fuq l-esportazzjonijiet, u permezz ta’ dawn il-paraguni li jagħmlu, jidentifikaw dawk il-prattiki li jistgħu jibbenefikaw mill-esperjenza ta’ l-oħrajn. Fejn tista’ tkun meħtieġa assistenza biex l-Istati jkunu jistgħu japplikaw l-aktar prattiki effettivi, jistgħu jiġu ffurmati programmi ta’ assistenza.

L-attivitajiet proposti għandhom jippożizzjonaw ukoll lill-uffiċjali msemmija hawn fuq biex jidentifikaw b’mod ċar nuqqasijiet u ħtiġijiet b’kont meħud tal-perspettivi differenti (gvern u industrija) sabiex ikunu jistgħu jiġu fformulati talbiet ta’ assistenza effettivi għal taħriġ, tagħmir, u oqsma oħrajn ta’ attivitajiet. Dawn it-talbiet għandhom jiġu ppreżentati lill-Kumitat 1540 - biex jiġu ċċirkulati lill-Istati - jew direttament lill-Istati, l-organizzazzjonijiet internazzjonali, reġjonali u mhux governattivi. Dawn is-sessjonijiet ta’ ħidma, minbarra li jirrikorru għall-esperti tal-Kumitat 1540, jeħtieġu jirrikorru għall-kompetenzi disponibbli internazzjonalment. Għalhekk, pajjiżi donaturi, kif ukoll organizzazzjonijiet intergovernattivi internazzjonali, jistgħu jipprovdu wkoll kompetenzi stabbiliti u magħrufa sew billi jagħmlu l-esperti tagħhom disponibbli għad-durata tas-sessjoni ta’ ħidma.

Din l-Azzjoni Konġunta ġdida tibni fuq u tintensifika l-isforzi li saru taħt l-Azzjoni Konġunta preċedenti 2006/419/PESK li ffukat prinċipalment fuq is-sensibilizzazzjoni ta’ l-opinjoni pubblika u l-obbligi ta’ rappurtar. Din ser tipprovdi b’mod ċar dimensjoni operattiva u sub-reġjonali għall-proġetti billi tinvolvi madwar tliet uffiċjali ta’ l-Istat (operaturi fuq il-post/livell espert) minn kull Stat parteċipanti fis-sessjonijiet ta’ ħidma, b’durata ta’ bejn tliet u erbat ijiem.

L-identifikazzjoni ċara ta’ nuqqasijiet u ħtiġiet li għandha tiġi ffaċilitata mis-sessjonijiet ta’ ħidma ffinanzjati permezz ta’ l-Azzjoni Konġunta ser tkun utili partikolarment għall-Unjoni Ewropea, l-aktar għall-għażla ta’ pajjiżi li jistgħu jibbenefikaw minn proġetti għall-bini tal-kapaċità ffinanzjati taħt l-Istrument ta’ Stabbilità l-ġdid. Hija ser tgħin ukoll biex jiġu ddefiniti l-oqsma preċiżi li fihom hemm l-iktar bżonn ta’ azzjonijiet addizzjonali ta’ l-UE. Il-parteċipanti tas-sessjonijiet ta’ ħidma ser ikunu mħeġġa jagħmlu talbiet speċifiċi għall-għajnuna. L-UE ser tidentifika l-għan ta’ l-għajnuna billi tieħu kont ta’ l-intenzjonijiet ta’ donaturi potenzjali oħrajn u ser tiżgura sinerġija massima ma’ strumenti finanzjarji oħrajn ta’ l-UE (eż. b’mod komplimentari ma’ din l-Azzjoni Konġunta ta’ attivitajiet skond l-Istrument ta’ Stabbilità fil-qasam tal-kontroll fuq l-esportazzjonijiet f’ pajjiżi terzi).

Riżultati tal-Proġetti:

—	Tissaħħaħ il-komprensjoni mill-parteċipanti dwar l-isforzi nazzjonali, reġjonali u internazzjonali għall-prevenzjoni tal-proliferazzjoni ta’ l-armi ta’ Distruzzjoni Massiva u l-mezzi kif jitwasslu.

—	Ċarezza akbar tal-miżuri ta’ implimentazzjoni u nfurzar attwali u jiżdiedu l-passi meħuda jew ippjanati li jittieħdu lejn l-implimentazzjoni sħiħa tar-Riżoluzzjoni 1540;

—	Jissaħħu t-tekniki tal-valutazzjoni tar-riskju, ta’ l-individwazzjoni u ta’ l-eżaminazzjoni.

—	Jitjiebu l-azzjoni reċiproka u l-kondiviżjoni ta’ l-informazzjoni bejn l-awtoritajiet nazzjonali u reġjonali għall-kontroll u l-infurzar fuq l-esportazzjonijiet;

—	Tissaħħaħ il-komprensjoni dwar iċ-ċaqliq tal-merkanzija u tal-metodi li jintużaw biex jiġu evitati l-proċessi ta’ kontrolli fuq l-esportazzjonijiet.

—	Tissaħħaħ il-komprensjoni dwar ix-xorta ta’ użu doppju ta’ ċerta materja prima u titjieb il-kapaċità għall-identifikazzjoni ta’ dik il-materja prima ta’ użu doppju relatata ma’ l-armamenti ta’ Distruzzjoni Massiva u l-mezzi kif jitwasslu;

—	Tissaħħaħ il-kooperazzjoni bejn l-uffiċjali regolatorji u ta’ l-infurzar u l-industrija;

—

Eżitu tas-sessjoni ta’ ħidma għall-parteċipanti: (a) Jiġu prodotti pjani potenzjali ta’ azzjoni nazzjonali; (b) Jiġu żviluppati talbiet ta’ assistenza għal segwitu fil-futur dwar oqsma aktar speċifiċi f’din is-sessjoni ta’ ħidma, u skond il-każ, tissaħħaħ il-kooperazzjoni ma’ organizzazzjonijiet intergovernattivi u organizzazzjonijiet sub-reġjonali fl-għoti ta’ tali assistenza, u (ċ) Rapport tal-proċedimenti tas-seminar;

3.   Durata

Id-durata stmata totali għall-proġett ser tkun ta’ 24 xahar.

4.   Benefiċjarji u parteċipanti

L-Istati magħżula biex jattendu ntagħżlu skond kriterji diversi. L-eżami tal-matriċijiet tal-pajjiżi dwar l-implimentazzjoni tar-Riżoluzzjoni 1540 intuża biex jiġu identifikati dawk l-Istati li jistgħu jeħtieġu assistenza f’oqsma ta’ valutazzjoni tar-riskju, kontrolli tal-fruntieri u tat-trasbord, identifikazzjoni tal-materja prima u tekniki ta’ l-individwazzjoni.

Bil-proposta għall-Istati msemmija hawn taħt biex jipparteċipaw fil-proġetti, tqiesu wkoll il-livelli varji tagħhom ta’ implimentazzjoni u kapaċità. Is-similaritajiet fi kwistjonijiet reġjonali, bħat-trasbord, jipprovdu linja komuni, u jippermettu li jiġu identifikati u żviluppati sinerġiji bejn l-Istati.

Barra minn dan, l-Isati magħżula pparteċipaw f’attivitajiet ta’ komunikazzjoni li qabel kienu qed isiru fis-sub-reġjuni rilevanti.

L-Istati ser ikunu mitluba jinnominaw uffiċjali fil-livell ta’ implimentazzjoni, li jkunu familjari mal-proċessi ta’ kontrolli fuq l-esportazzjonijiet u l-fruntieri. Dawn jinkludu rappreżentanti mill-oqsma tal-Gvern li ġejjin:

—	Awtoritajiet regolatorji; u

—	Infurzar fuq il-fruntieri (inklużi awtoritajiet Doganali u tal-Pulizija; ser tingħata attenzjoni partikolari lill-proċessi transgovernattivi u bejn l-aġenziji).

L-aġenziji addizzjonali identifikati bħala ċentrali għall-proċessi ta’ kontrolli fuq l-esportazzjonijiet ser ikunu mistiedna skond il-każ, b’segwitu għal deċiżjoni mill-Presidenza ta’ l-UE, assistita mis-SG/RGħ.

Ser tkun ikkunsidrata wkoll stedina għall-organizzazzjonijiet intergovernattivi u reġjonali relevanti biex jattendu u jipparteċipaw fis-sessjoni ta’ ħidma.

Huwa importanti li jiġi enfasizzat li xi wħud mill-Istati parteċipanti jistgħu jiġu ffaċċjati, anki b’mod involontarju, b’riskji ta’ proliferazzjoni ta’ armamenti ta’ Distruzzjoni Massiva (AQM), minħabba l-lokazzjoni ġeografika tagħhom, is-sitwazzjoni politika jew il-pjani nazzjonali tagħhom dwar l-eneġija. Fosthom kien hemm diversi li impenjaw ukoll ruħhom fi djalogu kostruttiv dwar in-non-proliferazzjoni ta’ l-AQM ma’ l-UE, anki permezz tan-negozjati u l-firma tal-ftehim bilaterali inklużi klawsoli dwar in-non-proliferazzjoni ta’ l-AQM. Għaldaqstant, l-organizzazzjoni ta’ din is-serje ta’ sessjonijiet ta’ ħidma tirrappreżenta opportunità kbira għall-UE biex twettaq l-impenji tagħha skond dawn il-klwasoli u biex turi l-importanza li hija tagħti lill-assistenza tal-pajjiżi li qed jiżviluppaw ukoll permezz ta’ mezzi multilaterali.

L-Istati magħżula biex jattendu f’din is-sessjoni ta’ ħidma jinkludu:

1.	Proġett li jkopri l-Afrika Gana, Kenja, Marokk, Niġerja, Uganda, Afrika t’Isfel, Repubblika tal-Kongo, Eġittu, Libja u Tanzanja.

2.	Proġett li jkopri l-Amerika Latina Beliże, Kosta Rika, El Salvador, Gwatemala, Ħonduras, Messiku, Nikaragwa u Panama.

3.	Proġett li jkopri l-Istati MERCOSUR Arġentina, Brażil, Urugwaj, Paragwaj, Venezwela, Bolivja, Ċilì, Kolumbja, Ekwador u Perù.

4.	Proġett li jkopri l-Lvant Nofsani u r-reġjuni tal-Golf Baħrejn, Iraq, Ġordan, Kuwajt, Oman, Għarabja Sawdita, Sirja, Emirati Għarab Magħquda.

5.	Proġett li jkopri l-Istati tal-Gżejjer tal-Paċifiku Fiġi, Gżejjer Marshall, (Stati Federati tal-) Mikronesja, Nauru, Palaw, Papwa Ginea Ġdida, Gżejjer Solomon (Repubblika tal-), Timor Leste, Tuvalu, Vanwatu.

6.	Proġett li jkopri l-Istati tax-Xlokk ta’ l-Asja Kambodja, Indoneżja, Malasja, Mjanmar, Filippini, Singapor, Tajlandja u Vjetnam.

5.   Entità ta’ implimentazzjoni

Il-Presidenza, megħjuna mis-SĠ/RGħ, hija responsabbli għall-implimentazzjoni ta’ din l-Azzjoni Konġunta. Il-Presidenza għandha tafda l-implimentazzjoni teknika lis-Segretarjat tan-NU (UAD). Is-Segretarjat tan-NU (UAD) ser jiffirma ftehim ta’ Sostenn tan-Nazzjon Ospitanti ma’ l-Istati, li ser jiġu identifikati bħala Stati ospitanti. L-Istat ospitanti ser jipparteċipa fl-implimentazzjoni tal-proġetti ffinanzjati minn din l-Azzjoni Konġunta. L-akkwist ta’ kwalunkwe merkanzija, xogħlijiet jew servizz mis-Segretarjat tan-NU (UAD) ta’ l-Istati ospitanti fil-kuntest ta’ din l-Azzjoni Konġunta jitwettaq skond ir-regoli u l-proċeduri applikabbli tan-NU, kif spjegat fid-dettall fil-ftehim finanzjarju mas-Segretarjat tan-NU (UAD) (Artikolu 3(3) ta’ din l-Azzjoni Konġunta).