Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32006E0120

    Azzjoni Konġunta tal-Kunsill 2006/120/PESK ta' l- 20 ta' Frar 2006 li testendi l-mandat tar-Rappreżentant Speċjali ta' l-Unjoni Ewropea għall-Moldova

    ĠU L 49, 21.2.2006, p. 11–13 (ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV)
    ĠU L 270M, 29.9.2006, p. 230–232 (MT)

    ⏵Dan id-dokument ġie ppubblikat f’edizzjoni(jiet) speċjali (BG, RO)

    Legal status of the document No longer in force, Date of end of validity: 28/02/2007

    ELI: http://data.europa.eu/eli/joint_action/2006/120/oj

    29.9.2006   

    MT

    Il-Ġurnal Uffiċjali ta’ l-Unjoni Ewropea

    230

    AZZJONI KONĠUNTA TAL-KUNSILL 2006/120/PESK

    ta' l-20 ta' Frar 2006

    li testendi l-mandat tar-Rappreżentant Speċjali ta' l-Unjoni Ewropea għall-Moldova

    IL-KUNSILL TA' L-UNJONI EWROPEA,

    Wara li kkunsidra t-Trattat dwar l-Unjoni Ewropea u, b'mod partikolari, l-Artikoli 14, 18(5) u 23(2) tiegħu,

    Billi:

    (1)

    Il-mandat tar-Rappreżentant Speċjali tal-Unjoni Ewropea (EUSR) għall-Moldova, kif espost fl-Azzjoni Konġunta tal-Kunsill 2005/265/PESK tat-23 ta' Marzu 2005 li taħtar Rappreżentant Speċjali ta' l-Unjoni Ewropea għall-Moldova (1) għandu jiskadi fit-28 ta' Frar 2006.

    (2)

    Fl-20 ta' Settembru 2005, il-Kumitat Politiku u ta' Sigurtà (PSC) qabel dwar it-twaqqif ta' Missjoni ta' l-UE tal-Fruntiera għal Moldova-Ukrajna anke permezz tar-rinfurzar tal-grupp ta' l-EUSR għall-Moldova.

    (3)

    Abbażi ta' reviżjoni ta' l-Azzjoni Konġunta 2005/265/PESK, il-mandat ta' l-EUSR għandu jiġi estiż b'perjodu ta' 12-il xahar.

    (4)

    L-EUSR sejjer jimplementa l-mandat tiegħu fil-kuntest ta' sitwazzjoni li tista' tiħżien u li tista' tagħmel ħsara lill-objettivi tal-Politika Estera u ta' Sigurtà Komuni kif stabbiliti fl-Artikolu 11 tat-Trattat,

    ADOTTA DIN L-AZZJONI KONĠUNTA:

    Artikolu 1

    Il-mandat tas-Sur Adriaan JACOBOVITS de SZEGED bħala Rappreżentant Speċjali tal-Unjoni Ewropea (EUSR) għall-Moldova huwa b'dan estiż sat-28 ta' Frar 2007.

    Artikolu 2

    1.   Il-mandat ta' l-EUSR għandu jkun ibbażat fuq l-għanijiet tal-politika ta' l-Unjoni Ewropea fil-Moldova. Dawn l-għanijiet jinkludu:

    (a)

    kontribuzzjoni għal riżoluzzjoni paċifika tal-konflitt fit-Transnistrja u għall-implementazzjoni ta' tali riżoluzzjoni abbażi ta' soluzzjoni vijabbli, li tirrispetta s-sovranità u l-integrità tar-Repubblika ta' Moldova fil-limiti tal-fruntieri tagħha li huma internazzjonalment rikonoxxuti;

    (b)

    kontribuzzjoni għat-tisħiħ tad-demokrazija, għall-istat tad-dritt u għar-rispett għad-drittijiet tal-bniedem u l-libertajiet fundamentali għaċ-ċittadini kollha tar-Repubblika ta' Moldova;

    (ċ)

    promozzjoni ta' relazzjonijiet tajbin u mill-qrib bejn ir-Repubblika ta' Moldova u l-UE abbażi ta' valuri u interessi komuni u kif stabbilit fil-Politika Ewropea tal-Viċinat (ENP);

    (d)

    għajnuna fil-ġlieda kontra t-traffikar tal-bnedmin u ta' l-armi u ta' oġġetti oħra, kemm dak li joriġina mill-Moldova kif ukoll dak li jgħaddi minnha;

    (e)

    kontribuzzjoni għat-tisħiħ ta' l-istabbiltà u l-koperazzjoni fir-reġjun;

    (f)

    tisħiħ ta' l-effikaċja u l-viżibbiltà ta' l-UE fir-Repubblika ta' Moldova u fir-reġjun;

    (g)

    tisħiħ ta' l-effikaċja tal-kontrolli tal-fruntiera u tad-dwana u ta' l-attivitajiet ta' sorveljanza fuq il-fruntiera fil-Moldova u fl-Ukrajna tul il-fruntiera komuni tagħhom, b'attenzjoni partikolari fuq is-sezzjoni tat-Transnistrja, partikolarment permezz ta' Missjoni ta' l-UE tal-Fruntiera.

    2.   L-EUSR għandu jappoġġa l-ħidma tas-Segretarju Ġenerali/Rappreżentant Għoli (SĠ/RGħ) fir-Repubblika ta' Moldova u fir-reġjun, u jaħdem f'koperazzjoni mill-qrib mal-Presidenza, mal-Kapijiet tal-Missjoni ta' l-UE u mal-Kummissjoni.

    Artikolu 3

    1.   Sabiex jintlaħqu l-għanijiet tal-politika ta' l-Unjoni Ewropea, il-mandat ta' l-EUSR għandu jkun li:

    (a)

    jsaħħaħ il-kontribut ta' l-UE għar-riżoluzzjoni tal-konflitt fit-Transnistrja skond l-għanijiet miftiehma tal-politika ta' l-UE u f'koperazzjoni mill-qrib ma' l-OSCE, filwaqt li jirrappreżenta lill-UE permezz ta' kuntatti adegwati u fil-fora miftiehma u billi jiżviluppa u jżomm kuntatti mill-qrib ma' l-atturi rilevanti kollha;

    (b)

    jgħin fil-preparazzjoni, skond il-każ, tal-kontributi ta' l-UE għall-implementazzjoni ta' riżoluzzjoni eventwali tal-konflitt;

    (ċ)

    jsegwi mill-qrib l-iżviluppi politiċi fir-Repubblika ta' Moldova, inkluż ir-reġjun tat-Transnistrja billi jiżviluppa u jżomm kuntatti mill-qrib mal-Gvern tar-Repubblika ta' Moldova u ma' atturi domestiċi oħra, u joffri, skond il-każ, il-konsulenza u l-faċilitazzjoni ta' l-UE;

    (d)

    jassisti fl-iżvilupp ulterjuri tal-politika ta' l-UE lejn ir-Repubblika ta' Moldova u r-reġjun, partikolarment fir-rigward tal-prevenzjoni u riżoluzzjoni ta' konflitti;

    (e)

    permezz ta' grupp ta' appoġġ immexxi minn Konsulent Politiku Anzjan għall-EUSR:

    (i)

    jiżgura s-sorveljanza politika ta' l-iżviluppi u l-attivitajiet relatati mal-fruntiera Statali bejn il-Moldova u l-Ukrajna;

    (ii)

    janalizza l-impenn politiku tal-Moldova u ta' l-Ukrajna sabiex itejbu l-ġestjoni tal-funtiera;

    (iii)

    jippromwovi l-koperazzjoni dwar kwistjonijiet dwar il-fruntiera bejn in-naħat tal-Moldova u ta' l-Ukrajna, anke bil-ħsieb li jiġu żviluppati dawk il-prekondizzjonijiet għar-riżoluzzjoni tal-konflitt fit-Transnistrja.

    2.   Għall-finijiet tat-twettiq tal-mandat tiegħu, l-EUSR għandu jżomm l-attenzjoni tiegħu b'mod ġenerali fuq l-attivitajiet kollha ta' l-UE, partikolarment l-aspetti rilevanti tal-Pjan ta' Azzjoni ta' l-ENP.

    Artikolu 4

    1.   L-EUSR għandu jkun responsabbli mill-implementazzjoni tal-mandat waqt li jaġixxi taħt l-awtorità u d-direzzjoni operattiva tas-SĠ/RGħ. L-EUSR għandu jagħti rendikont ta' kull infiq lill-Kummissjoni.

    2.   Il-PSC għandu jżomm kuntatt privileġġat ma' l-EUSR u għandu jkun il-punt primarju ta' kuntatt mal-Kunsill. Il-PSC għandu jipprovdi gwida strateġika u kontribut politiku lill-EUSR fil-qafas tal-mandat.

    Artikolu 5

    1.   L-ammont finanzjarju ta' referenza maħsub sabiex ikopri n-nefqa relatata mal-mandat ta' l-EUSR għandu jkun ta' EUR 1 030 000.

    2.   In-nefqa finanzjata mill-ammonti stipulati fil-paragrafu 1 għandha tiġi amministrata skond il-proċeduri u r-regoli applikabbli għall-budget ġenerali ta' l-UE bl-eċċezzjoni li kwalunkwe pre-finanzjament ma għandux jibqa' l-proprjetà tal-Komunità.

    3.   L-amministrazzjoni tan-nefqa għandha tiġi kuntrattata bejn l-EUSR u l-Kummissjoni. Id-data meta tkun tista' tibda titwettaq in-nefqa għandha tkun l-1 ta' Marzu 2006.

    4.   Il-Presidenza, il-Kummissjoni, u/jew l-Istati Membri, kif xieraq, għandhom jipprovdu appoġġ loġistiku fir-reġjun.

    Artikolu 6

    1.   Fil-limiti tal-mandat tiegħu u tal-mezzi finanzjarji korrispondenti li jkunu disponibbli, l-EUSR għandu jkun responsabbli mill-formazzjoni tal-grupp tiegħu b'konsultazzjoni mal-Presidenza, assistit mis-SĠ/RGħ, u f'assoċjazzjoni sħiħa mal-Kummissjoni. L-EUSR għandu jinforma l-Presidenza u l-Kummssjoni dwar il-kompożizzjoni finali tal-grupp tiegħu

    2.   L-Istati Membri ta' l-UE u l-Istituzzjonijiet jistgħu jipproponu s-sekondar ta' persunal sabiex jaħdem ma' l-EUSR. Ir-rimunerazzjoni ta' persunal li jista' jiġi sekondat, minn Stat Membru ta' l-UE jew minn Istituzzjoni, ma' l-EUSR għandu jkun kopert mill-Istat Membru ta' l-UE jew Istituzzjoni konċernati, rispettivament.

    3.   Il-karigi kollha tat-tip A li ma jimtlewx permezz ta' sekondar, għandhom jiġu pubbliċizzati kif xieraq mis-Segretarjat Ġenerali tal-Kunsill u għandhom jiġu notifikati wkoll lill-Istati Membri ta' l-UE u lill-Istituzzjonijiet sabiex jiġu reklutati l-applikanti bl-aħjar kwalifiki.

    4.   Il-privileġġi, l-immunitajiet u l-garanziji ulterjuri meħtieġa għat-tlestija u għall-funzjonament bla xkiel tal-missjoni ta' l-EUSR u tal-membri tal-persunal tiegħu għandhom jiġu definiti mal-partijiet. L-Istati Membri u l-Kummissjoni għandhom jagħtu l-appoġġ kollu meħtieġ għal dan l-iskop.

    Artikolu 7

    Bħala regola ġenerali, l-EUSR għandu jirrapporta personalment lis-SĠ/RGħ u lill-PSC u jista' jirrapporta wkoll lill-Grupp ta' Ħidma rilevanti. Għandhom jiġu ċirkolati rapporti regolari bil-miktub lis-SĠ/RGħ, lill-Kunsill u lill-Kummissjoni. L-EUSR jista' jirrapporta lill-Kunsill għall-Affarijiet Ġenerali u għar-Relazzjonijiet Esterni fuq rakkomandazzjoni tas-SĠ/RGħ u tal-PSC.

    Artikolu 8

    1.   Sabiex tiġi żgurata l-konsistenza fl-azzjoni esterna ta' l-Unjoni Ewropea, l-attivitajiet ta' l-EUSR għandhom ikunu koordinati ma' dawk tas-SĠ/RGħ, tal-Presidenza u tal-Kummissjoni. L-EUSR għandu jipprovdi aġġornamenti regolari lill-missjonijiet ta' l-Istati Membri u lid-delegazzjonijiet tal-Kummissjoni. Għandu jinżamm, fil-kamp, kollegament mill-qrib mal-Presidenza, mal-Kummissjoni u mal-Kapijiet tal-Missjoni li għandhom jagħmlu mill-aħjar sabiex jgħinu lill-EUSR fl-implementazzjoni tal-mandat. L-EUSR għandu wkoll iżomm kuntatt ma' atturi internazzjonali u reġjonali oħrajn fil-kamp.

    2.   Il-Kunsill u l-Kummissjoni għandhom, fil-limiti tal-poteri rispettivi tagħhom, jiżguraw il-koerenza bejn l-implementazzjoni ta' din l-Azzjoni Konġunta u l-attivitajiet esterni tal-Komunità konformement mat-tieni subparagrafu ta' l-Artikolu 3 tat-Trattat. Il-Kunsill u l-Kummissjoni għandhom jikkoperaw għal dan l-iskop.

    Artikolu 9

    L-implementazzjoni ta' din l-Azzjoni Konġunta u l-koerenza tagħha ma' kontributi oħrajn mill-UE lir-reġjun għandhom jiġu riveduti regolarment. L-EUSR għandu jippreżenta lis-SĠ/RGħ, lill-Kunsill u lill-Kummissjoni rapport ta' progress qabel l-aħħar ta' Ġunju 2006 u rapport komprensiv dwar l-implementazzjoni tal-mandat sa nofs Novembru 2006. Dawn ir-rapporti għandhom jiffurmaw bażi għal valutazzjoni ta' din l-Azzjoni Konġunta fil-Gruppi ta' Ħidma rilevanti u mill-PSC. Fil-kuntest tal-prijoritajiet ġenerali għall-insedjament, l-SĠ/RGħ għandu jagħmel rakkomandazzjonijiet lill-PSC fir-rigward tad-deċiżjoni tal-Kunsill dwar it-tiġdid, l-emendament jew it-terminazzjoni tal-mandat.

    Artikolu 10

    L-Azzjoni Konġunta għandha tidħol fis-seħħ fid-data ta' l-adozzjoni tagħha.

    Artikolu 11

    Din l-Azzjoni Konġunta għandha tiġi pubblikata fil-Ġurnal Uffiċjali ta' l-Unjoni Ewropea.

    Maghmul fi Brussell, nhar l-20 ta' Frar 2006.

    Ghall-Kunsill

    Il-President

    J. PRÖLL

    (1)  ĠU L 81, 30.3.2005, p. 50. Azzjoni Konġunta kif emendata l-aħħar mill-Azzjoni Konġunta 2005/776/PESK (ĠU L 292, 8.11.2005, p. 13).

    Top