ANNESS I

AZZJONIJIET

1.   AZZJONI 1: IL-ĠLIEDA KONTRA L-KONTENUT ILLEGALI

Il-hotlines jippermettu lill-membri tal-pubbliku jirrappurtaw kontenut illegali. Huma jgħaddu r-rapporti lill-korp xieraq (il-fornitur tas-servizz ta’ l-internet (ISP), il-pulizija jew hotline xierqa) sabiex tittieħed azzjoni. Il-hotlines ċivili jikkomplimentaw il-hotlines tal-pulizija, fejn jeżistu. L-irwol tagħhom hu differenti minn dak ta’ l-awtoritajiet ta’ l-infurzar tal-liġi, peress li ma jinvestigawx reati, jarrestaw jew iħarrku lil min jikser il-liġi. Jistgħu jikkostitwixxu ċentri ta’ kompetenza li jipprovdu gwida lil fornituri tas-servizzi ta’ l-internet dwar liema kontenut jista’ jkun illegali.

In-network ta’ hotlines eżistenti huwa struttura unika li ma kenitx tiġi stabbilita mingħajr il-finanzjament mill-Komunità. Kif indikat fil-rapport ta’ valutazzjoni ta’ l-2002 għall-Pjan ta’ Azzjoni Internet Aktar Sigur, in-network kellu suċċess kbir fiż-żieda ta’ membri u għandu medda internazzjonali. Sabiex il-hotlines jiżviluppaw il-potenzjal sħiħ tagħhom, hu meħtieġ li jiġu żgurati kopertura u koperazzjoni fl-Ewropa kollha, u tiżdied l-effettività permezz ta’ l-iskambju ta’ informazzjoni u l-esperjenza. Fondi Komunitarji għandhom jiġu wżati wkoll biex ikun hemm sensibilizzazzjoni dwar il-hotlines, biex dawn isiru aktar effettivi.

Għajnuna finanzjarja għandha tiġi pprovduta lill-hotlines, magħżula wara sejħa għal proposti, sabiex iservu ta’ punti strateġiċi fin-network u jikkoperaw ma’ punti strateġiċi oħrajn fin-network tal-hotlines Ewropej.

Jekk meħtieġ, linji telefoniċi ta’ għajnuna jistgħu jiġu appoġġjati, fejn permezz tagħhom it-tfal ikunu jistgħu jqajmu tħassib dwar kontenut illegali u dannuż fuq l-internet.

Għall-fini tal-valutazzjoni ta’ l-effettività tal-hotlines, għandu jittieħed kont ta’ diversi indikaturi. Għandha tiġi miġbura data kwalitattiva u kwantitattiva dwar l-istabbiliment u l-funzjonament tal-hotlines, in-numru ta’ punti strateġiċi nazzjonali, il-kopertura ġeografika fl-Istati Membri, in-numru ta’ rapporti rċevuti, in-numru u l-livell ta’ esperjenza tal-persunal tal-hotlines, ir-rappori mibgħuta għal azzjoni lill-awtoritajiet pubbliċi u lill-fornituri tas-servizzi ta’ l-internet u, fejn possibbli, dwar l-azzjoni meħuda bħala riżultat, b’mod partikolari n-numru u t-tip ta’ paġni ta’ l-internet irtirati mill- fornituri tas-servizzi ta’ l-internet bħala riżultat ta’ informazzjoni provduta mill-hotlines. Jekk ikun possibbli dik id-data għandha ssir pubblika u tintbagħat lill-awtoritajiet kompetenti.

Sabiex jiġi żgurat li l-programm ikun effettiv, huma meħtieġa hotlines fl-Istati Membri u fil-pajjiżi kandidati kollha fejn bħalissa ma jeżistux. Dawn il-hotlines ġodda għandhom jiġu nkorporati malajr u b’mod effettiv fin-network Ewropew eżistenti, u jingħataw inċentivi biex jitħaffef il-proċess tat-twaqqif tagħhom. Kollegamenti bejn dan in-network u l-hotlines f’pajjiżi terzi (b’mod partikolari f’pajjiżi Ewropej oħra fejn il-kontenut illegali huwa ospitat u prodott) għandhom jiġu promossi, biex b’hekk jiġi permess li approċċi komuni jkunu żviluppati u li t-tagħrif u l-aħjar prattika jkunu trasferiti. Skond il-leġiżlazzjoni nazzjonali, u fejn xieraq u meħtieġ, mekkaniżmi għall-koperazzjoni bejn il-hotlines ċivili u l-awtoritajiet ta’ l-infurzar tal-liġi għandhom jiġu mtejjba aktar, inkluż, per eżempju, l-iżvilupp ta’ kodiċi ta’ kondotta għal tali hotlines. Fejn xieraq, jista’ jkun hemm il-ħtieġa li l-persunal tal-hotlines jiċievu taħriġ legali u tekniku. Il-parteċipazzjoni attiva tal-hotlines fin-networking u fl-attivitajiet trans-konfini tkun obbligatorja.

Il-hotlines għandhom ikunu marbuta ma’ inizjattivi ta’ l-Istati Membri, appoġġjati fuq livell nazzjonali u għandhom ikunu finanzjarjament vijabbli sabiex jiġi żgurat li jib għu eżistenti wara li jintemm dan il-programm. Il-kofinanzjament huwa intiż għall-hotlines ċivili, u għalhekk mhux se ikun provdut għal hotlines amministrati mill-pulizija. Il-hotlines jagħmluha ċara lill-utenti d-differenza bejn l-attivitajiet tagħhom u dawk ta’ l-awtoritajiet pubbliċi, u jinfurmawhom bl-eżistenza ta’ metodi alternativi għar-rappurtar ta’ kontenut illegali.

Sabiex jintlaħaq il-livell massimu ta’ impatt u effettività bil-finanzjament disponibbli, in-network ta’ hotlines għandu jopera bl-aktar mod effiċenti possibbli. Dan jista’ jintlaħaq bl-aħjar mod billi jiġi assenjat punt ta’ kordinazzjoni lin-network, li jiffaċilita l-ftehim bejn il-hotlines sabiex jiġu żviluppati linji gwida fuq livell Ewropew, metodi ta’ ħidma u prattiċi li jirrispettaw il-limiti tal-liġijiet nazzjonali li japplikaw għall-hotlines individwali.

Il-punt strateġiku ta’ kordinazzjoni se:

—	jippromwovi n-network kollu, sabiex jiġġenera l-viżibbiltà tiegħu fuq livell Ewropew u jissensibilizza lill-pubbliku dwaru fl-Unjoni Ewropea, billi jipprovdi per eżempju identità u punt ta’ dħul wieħed li jagħtu aċċess faċli lill-kuntatt nazzjonali xieraq;

—	jagħmel kuntatt mal-korpi xierqa bil-għan li tiġi kompluta l-kopertura tan-network fl-Istati Membri u l-pajjiżi kandidati;

—	itejjeb l-effiċenza operazzjonali tan-network;

—	ifassal linji gwida għall-aħjar prattika għall-hotlines u jadattahom għal teknoloġija ġdida;

—	jorganizza skambji regolari ta’ informazzjoni u esperjenza bejn il-hotlines;

—	jipprovdi grupp ta’ esperti għall-konsulenza u għal proċess ta’ taħriġ għall-bidu tal-ħidma tal-hotlines, b’mod partikolari fil-pajjiżi kandidati;

—	jiżgura kollegament ma’ hotlines f’pajjiżi terzi;

—	iżomm relazzjoni ta’ ħidma mill-qrib mal-punt strateġiku ta’ kordinazzjoni ta’ l-attivitajiet ta’ sensibilizzazzjoni (ara punt 4 hawn isfel) sabiex jiġu żgurati l-koeżjoni u l-effettività ta’ l-operazzjonijiet ġenerali tal-programm u tiżdied is-sensibilizzazzjoni dwar il-hotlines;

—	jipparteċipa fil-Forum Internet Aktar Sigur u avvenimenti rilevanti oħrajn, filwaqt li jikkordina l-kontributi u l-osservazzjonijiet mil-hotlines.

Il-punt strateġiku ta’ kordinazzjoni għandu jagħmel monitoraġġ ta’ l-effikaċja tal-hotlines u jiġbor statistika preċiża u sinifikattiva dwar il-funzjonament tagħhom (numru u tip ta’ rapporti rċevuti, azzjoni meħuda u riżultat eċċ.). Dawn l-istatistiċi għandhom ikunu komparabbli għall-Istati Membri kollha.

In-network tal-hotlines għandu jiżgura kopertura ta’ u l-iskambju ta’ rapporti dwar it-tipi ewlenin ta’ kontenut illegali li jqanqal tħassib — li jestendi lil hinn mill-qasam tal-pornografija tat-tfal. Jistgħu jkunu meħtieġa mekkaniżmi u kompetenzi differenti sabiex jiġu trattati oqsma oħra bħal kontenut razzist, li jistgħu jinvolvu tipi oħrajn ta’ punti strateġiċi li jittrattaw il-kwistjonijiet varji. Billi r-riżorsi finanzjarji u amministrattivi tal-Programm huma limitati, mhux dawn il-punti strateġiċi kollha neċessarjament jirċievu finanzjament, li jista’ jkollu jiġi kkonċentrat fuq rwol rinfurzat għall-punt strateġiku ta’ kordinazzjoni f’dawk l-oqsma.

2.   AZZJONI 2: IT-TRATTAMENT TA’ KONTENUTI MHUX MIXTIEQA U DANNUŻI

Barra mill-azzjoni għall-ġlieda kontra l-kontenut illegali fis-sors tiegħu, l-utenti — adulti responsabbli fejn l-utenti huma minuri — jistgħu jeħtieġu għodda tekniċi. L-aċċessibiltà għal dawn l-għodda tista’ tiġi promossa sabiex l-utenti ikunu jistgħu jieħdu d-deċiżjonijiet tagħhom dwar kif jittrattaw kontenut dannuż u mhux mixtieq (responsabilizzazzjoni ta’ l-utent).

Għandu jiġi provdut aktar finanzjament sabiex tiżdied l-informazzjoni disponibbli dwar il-prestazzjoni u l-effettività ta’ software ta’ filtrazzjoni u servizzi sabiex l-utent ikun jista’ jagħmel għażla infurmata. L-organizzazzjonijiet ta’ l-utenti u l-istituti ta’ riċerka xjentifika jistgħu jkunu sħab prezzjużi f’dan l-isforz.

Sistemi ta’ valutazzjoni u tikketti tal-kwalità, flimkien ma’ teknoloġiji ta’ filtrazzjoni, jistgħu jgħinu sabiex l-utenti jkunu jistgħu jagħżlu l-kontenut li jixtiequ jirċievu u jipprovdu lill-ġenituri u lill-edukaturi Ewropej bl-informazzjoni meħtieġa sabiex jieħdu deċiżjonijiet skond il-valuri kulturali u lingwistiċi tagħhom. B’kunsiderazzjoni għar-riżultati tal-proġetti preċedenti, jista’ jingħata finanzjament għal proġetti li l-għan tagħhom hu li jadattaw is-sistemi ta’ valutazzjoni u t-tikketti tal-kwalità biex jittieħed kont tal-konverġenza tat-telekomunikazzjonijiet, tal-mijdja awdjoviżiva u tat-teknoloġija ta’ l-informazzjoni, u ta’ inizjattivi awtoregolatorji sabiex tiġi sostnuta l-affidabbiltà ta’ l-awto-tikkettatura u s-servizzi sabiex tiġi verifikata l-preċiżjoni tat-tikketti ta’ awto-valutazzjoni. Jista’ jkun meħtieġ ukoll aktar xogħol sabiex tiġi mħeġġa l-adozzjoni ta’ sistemi ta’ valutazzjoni u tikketti ta’ kwalità mill-fornituri tal-kontenut.

Ikun mixtieq li wieħed jipprova jieħu kont ta’ l-użu sigur mit-tfal meta teknoloġiji ġodda jkunu qed jiġu żviluppati, minflok ma wieħed jipprova jittratta kwalunkwe konsegwenza tat-teknoloġiji l-ġodda wara li jkunu ġew imfassla. Is-sigurtà ta’ l-utent finali hija kriterju li jrid jiġi meqjus flimkien ma’ kunsiderazzjonijiet tekniċi u kummerċjali. Mod kif dan jista’ jsir jkun li jiġi mħeġġeġ skambju ta’ opinjonijiet bejn l-ispeċjalisti fil-kura tat-tfal u l-esperti tekniċi. Madankollu, għandu jittieħed kont tal-fatt li mhux kull prodott żviluppat għad-dinja online huwa maħsub għall-użu mit-tfal.

Il-programm, għalhekk, jipprovdi finanzjament għal miżuri teknoloġiċi li jissodisfaw il-ħtiġijiet ta’ l-utenti u li jippermettulhom li jillimitaw l-ammont ta’ kontenut mhux mixtieq u dannuż, u li jamministraw l-ispemm mhux mixtieq, li jirċievu, inklużi:

—	il-valutazzjoni ta’ l-effettività tat-teknoloġija ta’ filtrazzjoni disponibbli u l-provvediment ta’ din l-informazzjoni lill-pubbliku b’mod ċar u sempliċi li jiffaċilita l-paragun;

—	it-tħaffif u l-kordinazzjoni ta’ l-iskambju ta’ informazzjoni u ta’ l-aħjar prattika dwar modi effettivi għat-trattament ta’ kontenut mhux mixtieq u dannuż;

—

iż-żieda fl-adozzjoni ta’ sistemi ta’ klassifikazzjoni tal-kontenut u tikketti tal-kwalità tas-siti minn fornituri tal-kontenut u l-addattament tal-klassifikazzjoni tal-kontenut u t-tikketti sabiex jittieħed kont tad-disponibbiltà ta’ l-istess kontenut permezz ta’ mekkaniżmi differenti ta’ trasmissjoni (konverġenza);

—	jekk meħtieġ, kontribut għall-aċċessibiltà ta’ teknoloġiji ta’ filtrazzjoni notevolment f’lingwi mhux koperti b’mod adegwat mis-suq. Fejn xieraq, it-teknoloġiji wżati għandhom jissalvagwardjaw id-dritt għall-privatezza skond id-Direttivi 95/46/KE (1) u 2002/58/KE.

L-użu ta’ miżuri teknoloġiċi li jsaħħu l-privatezza jiġu mħeġġa. Attivitajiet previsti f’din l-azzjoni jieħdu kont sħiħ tad-dispożizzjonijiet tad-Deċiżjoni Kwadru tal-Kunsill 2005/222/ĠAI ta’ l-24 ta’ Frar 2005 dwar attakki kontra sistemi ta’ informazzjoni (2).

L-implimentazzjoni ta’ din l-azzjoni ser tkun ikkordinata mill-qrib m0a’ l-azzjonijiet għall-promozzjoni ta’ ambjent aktar sigur (azzjoni awtoregolatorja) u ta’ sensibilizzazzjoni (li jinfurmaw lill-pubbliku dwar mezzi għat-trattament ta’ kontenut mhux mixtieq u dannuż).

3.   AZZJONI 3: PROMOZZJONI TA’ AMBJENT AKTAR SIGUR

Sistema ta’ awto-regolazzjoni li tiffunzjona bis-sħiħ hija element essenzjali biex jiġi limitat il-fluss ta’ kontenut dannuż u illegali. L-awto-regolazzjoni tinvolvi numru ta’ komponenti: il-konsultazzjoni u r-rappreżentazzjoni xierqa tal-partijiet konċernati; kodiċi ta’ kondotta; korpi nazzjonali li jiffaċilitaw il-koperazzjoni fuq livell Komunitarju u l-valutazzjoni nazzjonali ta’ oqfsa awto-regolatorji (3). Hemm ħtieġa kontinwa għal ħidma Komunitarja f’dan il-qasam sabiex tħeġġeġ lill-Internet Ewropew u lill-industriji tat-teknoloġiji online il-ġodda biex jimplimentaw kodiċi ta’ kondotta.

Il-Forum Internet Aktar Sigur żviluppat fl-2004 taħt il-Pjan ta’ Azzjoni Internet Aktar Sigur għandu jsir forum ta’ diskussjoni li jinkludi rappreżentanti ta’ l-industrija, awtoritajiet ta’ l-infurzar tal-liġi, dawk responsabbli mit-teħid ta’ deċiżjonijiet politiċi u organizzazzjonijiet ta’ l-utenti (p.e. organizzazzjonijiet tal-ġenituri u ta’ l-għalliema, gruppi għall-protezzjoni tat-tfal, korpi għall-protezzjoni tal-konsumatur, organizzazzjonijiet għad-drittijiet ċivili u diġitali). Dan jipprovdi pjattaforma biex korpi nazzjonali ko-regolatorji jew awto-regolatorji jiskambjaw l-esperjenzau jipprovdi l-opportunità sabiex jiġu diskussi modi li bihom l-industrija tkun tista’ tikkontribwixxi għall-ġlieda kontra l-kontenut illegali.

Il-Forum Internet Aktar Sigur jipprovdi punt fokali għal diskussjoni fuq livell ta’ esperti u pjattaforma biex jinkiseb kunsens, u jiġu fformulati konklużjonijiet, rakkomandazzjonijiet, linji gwida eċċ. għall-kanali nazzjonali u Ewropej rilevanti.

Il-Forum Internet Aktar Sigur ikopri l-azzjonijiet kollha, jiffaċilita d-diskussjoni u jistimola azzjoni rilevanti għal kontenut illegali, mhux mixtieq u dannuż. Filwaqt li jkun jikkonsisti f’sessjonijiet plenarji u, fejn meħtieġ għal kwistjonijiet speċifiċi, fi gruppi ta’ ħidma b’għanijiet u skadenzi ċari, ikun post fejn jiltaqgħu l-atturi mill-oqsma kollha — inklużi aġenziji u programmi governattivi, korpi normattivi, industrija, servizzi fi ħdan il-Kummissjoni u organizzazzjonijiet ta’ l-utenti (p.e. organizzazzjonijiet tal-ġenituri u ta’ l-għalliema, gruppi għall-protezzjoni tat-tfal, korpi għall-protezzjoni tal-konsumatur u organizzazzjonijiet għad-drittijiet ċivili u diġitali). Il-Forum jipprovdi opportunità għal persuni attivi fuq livell nazzjonali u Ewropew, speċjalment dawk involuti fi programmi u inizjattivi ta’ l-Istati Membri, biex jiskambjaw opinjonijiet, informazzjoni u esperjenzi. Fejn xieraq, il-Forum Internet Aktar Sigur għandu jiskambja l-informazzjoni u jikkopera ma’ organizzazzjonijiet rilevanti attivi f’oqsma relatati, bħas-sigurtà tan-networks u ta’ l-informazzjoni.

Il-Forum Internet Aktar Sigur ikollu l-għanijiet speċifiċi li:

1.	Jistimola n-networking ta’ l-istrutturi approprjati fl-Istati Membri u jiżviluppa kuntatti ma’ korpi awto-regolatorji barra mill-Ewropa;

2.

Jistimola l-kunsens u l-awto-regolazzjoni fuq kwistjonijiet bħaċ-ċertifikazzjoni tal-kwalità ta’ siti web, il-klassifikazzjoni tal-kontenuti li jinsab fuq varjetà ta’ medja, tekniki ta’ klassifikazzjoni u ta’ filtrazzjoni u jestendihom għal forom ġodda ta’ kontenuti bħal logħob online u forom ġodda ta’ aċċess bħat-telefowni ċellulari;

3.	Iħeġġeġ il-fornituri tas-servizzi biex ifasslu kodiċi ta’ kondotta dwar kwistjonijiet bħat-trattament tal-proċeduri ta’ Notifika u Tneħħija b’mod trasparenti u kuxjenzjuż u jinforma lill-utenti dwar użu aktar sigur ta’ l-Internet u l-eżistenza ta’ hotlines biex jiġu rrappurtati kontenuti illegali;

4.	Jippromwovi r-riċerka dwar l-effikettività tal-proġetti ta’ valutazzjoni u tat-teknoloġiji ta’ filtrazzjoni. L-organizzazzjonijiet ta’ l-utenti u l-istituti ta’ riċerka xjentifika jistgħu jkunu sħab prezzjużi f’dan l-isforz.

Ir-riżultati ta’ u s-sejbiet minn proġetti li għaddejjin u dawk lesti ko-finanzjati mill-Programm jidħlu fil-proċess. Billi jipprovdi pjattaforma miftuħa, il-Forum jgħin biex jiżdiedu l-livelli ta’ sensibilizzazzjoni u jattira l-involviment ta’ l-istati kandidati u pajjiżi terzi oħrajn, u dan jipprovdi arena internazzjonali sabiex tiġi indirizzata problema globali. Għandu, għalhekk, jiżgura li assoċjazzjonijiet prinċipali, bħal organizzazzjonijiet ta’ l-utenti (p.e. organizzazzjonijiet tal-ġenituri u ta’ l-għalliema, gruppi għall-protezzjoni tat-tfal, korpi għall-protezzjoni tal-konsumatur u organizzazzjonijiet għad-drittijiet ċivili u diġitali) industriji u korpi pubbliċi huma konxji ta’, jiġu konsultati dwar u jikkontribwixxu għal inizjattivi għal użu aktar sigur fil-Komunità u fuq livell internazzjonali.

Parteċipazzjoni fil-Forum Internet Aktar Sigur se tkun miftuħa għal partijiet interessati minn barra l-Komunità u l-pajjiżi kandidati. Il-koperazzjoni internazzjonali tissaħħaħ permezz ta’ round table marbuta mal-Forum sabiex jiġi żgurat djalogu regolari dwar l-aħjar prattika, il-kodiċi ta’ kondotta, l-awto-regolazzjoni u l-klassifikazzjoni tal-kwalità. Il-Kummissjoni tiżgura li sinerġiji ma’ fora relatati u inizjattivi simili jkunu sfruttati bis-sħiħ.

Tista’ tiġi organizzata sejħa għal offerti sabiex jiġi provdut segretarjat għas-sostenn tal-Forum Internet Aktar Sigur inklużi esperti fil-qasam tas-suġġett biex jissuġġerixxu temi għal studju, iħejju dokumenti ta’ ħidma, jimmoderaw diskussjonijiet u jirreġistraw konklużjonijiet.

Tip ieħor ta’ attività li tattira l-appoġġ finanzjarju fuq livell “Komunitarju jista” per eżempju jinkludi proġetti awto-regolatorji sabiex ifasslu kodiċi ta’ kondotta trans-fruntiera. Tista’ tiġi provduta konsulenza u assistenza sabiex tiġi żgurata l-koperazzjoni fuq livell Komunitarju permezz ta’ networking tal-korpi approprjati fl-Istati Membri u l-pajjiżi kandidati u permezz ta’ reviżjoni sistematika u rappurtar ta’ kwistjonijiet legali u regolatorji rilevanti, sabiex jgħinu biex jiġu żviluppati metodi ta’ valutazzjoni u ċertifikazzjoni ta’ l-awto-regolazzjoni, sabiex tiġi provduta assistenza prattika lill-pajjiżi li jixtiequ jistabbilixxu korpi awto-regolatorji u biex iżidu l-kuntatti ma’ korpi awto-regolatorji barra mill-Ewropa.

4.   AZZJONI 4: SENSIBILIZZAZZJONI

Azzjonijiet ta’ sensibilizzazzjoni għandhom jindirizzaw sensiela ta’ kategoriji ta’ kontenut illegali, mhux mixtieq u dannuż (inkluż p.e. kontenut meqjus mhux tajjeb għat-tfal, u kontenut razzist u ksenofobiku) u, fejn xieraq, jieħdu kont ta’ kwistjonijiet relatati fil-qasam tal-protezzjoni tal-konsumatur, il-protezzjoni tad-data u s-sigurtà ta’ l-informazzjoni u n-networks (viruses/spam). Għandhom jittrattaw il-kontenut distribwit fil-World Wide Web kif ukoll forom ġodda ta’ informazzjoni u komunikazzjoni interattivi li saru possibbli permezz tal-firxa mgħaġġla ta’ l-Internet u t-telefownija ċellulari (p.e. servizzi peer-to-peer, video fuq broadband, messaġġi istantaneji, chat-rooms, eċċ.).

Il-Kummissjoni ser tkompli tieħu passi sabiex tħeġġeġ mezzi ta’ distribuzzjoni ta’ informazzjoni ekonomikament effettivi lil numru kbir ta’ utenti, b’mod partikolari bl-użu ta’ organizzazzjonijiet “multiplikaturi” u kanali ta’ disseminizzazzjoni elettronika sabiex jintlaħqu l-gruppi ta’ mira maħsuba. Il-Kummissjoni tista’ tikkunsidra b’mod partikolari l-użu tal-medja tal-massa u d-distribuzzjoni ta’ materjal informattiv lil skejjel u lil Internet Cafés.

Il-Programm jipprovdi appoġġ lil korpi xierqa li jiġu magħżula wara sejħa pubblika għal proposti sabiex jaġixxu ta’ punti ta’ sensibilizzazzjoni f’kull Stat Membru u pajjiż kandidat u li jwettqu azzjonijiet u programmi ta’ sensibilizzazzjoni f’koperazzjoni mill-qrib ma’ l-atturi rilevanti kollha fuq livelli nazzjonali, reġjonali u lokali. Valur miżjud Ewropew jiġi provdut minn punt strateġiku ta’ kordinazzjoni li ser jikkollabora mill-qrib ma’ punti strateġiċi oħra sabiex jiġi żgurat li l-aħjar prattika tiġi skambjata.

Korpi li jfittxu li jaġixxu ta’ punti strateġiċi ta’ sensibilizzazzjoni jkunu jridu juru li għandhom is-sostenn qawwi ta’ l-awtoritajiet nazzjonali. Għandu jkollhom mandat ċar biex jedukaw lill-pubbliku dwar l-użu aktar sigur ta’ l-Internet u teknoloġiji online ġodda jew biex iħarrġuh dwar il-medja u l-informazzjoni, u għandu jkollhom ir-riżorsi finanzjarji meħtieġa sabiex dak il-mandat jiġi implimentat.

Il-punti strateġiċi ta’ sensibilizzazzjoni jkunu mistennija li:

—	joħolqu kampanja ta’ sensibilizzazzjoni koeżiva, ta’ impatt qawwi u mmirata bl-użu tal-medja l-aktar xierqa, b’kont meħud ta’ l-aħjar prattika u l-esperjenza f’pajjiżi oħra;

—

jistabbilixxu u jżommu sħubija (formali jew informali) ma’ l-atturi prinċipali (aġenziji tal-gvern, gruppi ta’ l-istampa u tal-medja, assoċjazzjonijiet ta’ l-ISP, organizzazzjonijiet ta’ l-utenti, partijiet interessati fil-qasam ta’ l-edukazzjoni) u azzjonijiet f’pajjiżhom relatati ma’ użu aktar sigur ta’ l-Internet u teknoloġiji online ġodda;

—	jippromwovu d-djalogu u l-iskambju ta’ informazzjoni b’mod partikolari bejn partijiet interessati mill-oqsma ta’ l-edukazzjoni u tat-teknoloġija;

—	fejn xieraq, jikkoperaw f’xogħol f’oqsma relatati ma’ dan il-Programm, bħal fl-oqsma usa tal-medja u tat-taħriġ dwar il-medja u l-informazzjoni jew il-protezzjoni tal-konsumatur;

—	jinfurmaw lill-utenti dwar software ta’ filtrazzjoni u servizzi Ewropej u dwar hotlines u skemi ta’ awto-regolazzjoni;

—	jikkoperaw b’mod attiv ma’ punti strateġiċi nazzjonali oħrajn fin-network Ewropew billi jiskambjaw informazzjoni dwar l-aħjar prattiki, jipparteċipaw f’laqgħat u jiddisinjaw u jimplimentaw approċċ Ewropew, adattat kif meħtieġ għall-preferenzi lingwistiċi u kulturali nazzjonali;

—	jipprovdu grupp ta’ esperti u assistenza teknika għal punti strateġiċi ta’ sensibilizzazzjoni li jkunu għadhom qed jibdew (punti strateġiċi ġodda jistgħu jiġu “adottati” minn punt strateġiku b’aktar esperjenza).

Sabiex jiġu żgurati koperazzjoni u effettività massimi, il-punt strateġiku ta’ kordinazzjoni għandu jiġi ffinanzjat sabiex jipprovdi sostenn loġistiku u ta’ infrastruttura għal punti strateġiċi f’kull Stat Membru, u b’hekk tiġi żgurata viżibbiltà fuq livell Ewropew, komunikazzjoni tajba u skambju ta’ esperjenzi sabiex il-lezzjonijiet meħuda jkunu jistgħu jiġu applikati fuq bażi kontinwa (per eżempju billi jiġi adattat materjal użat biex jissensibilizzalill-pubbliku).

Il-punt strateġiku ta’ kordinazzjoni għandu:

—	jipprovdi komunikazzjoni effettiva u jiżgura li informazzjoni u l-aħjar prattika jkunu skambjati fi ħdan in-network;

—	jipprovdi taħriġ fl-użu aktar sigur ta’ l-Internet u t-teknoloġiji online il-ġodda għall-persunal tal-punt strateġiku ta’ sensibilizzazzjoni (taħriġ għal min iħarreġ);

—	jipprovdi assistenza teknika lill-pajjiżi kandidati li jixtiequ jistabbilixxu azzjonijiet ta’ sensibilizzazzjoni;

—	jikkordina l-forniment ta’ kompetenza u assistenza teknika mill-punti ta’ sensibilizzazzjoni għall-punti strateġiċi ta’ sensibilizzazzjoni li jkunu għadhom qed jibdew;

—	jipproponi indikaturi u jamministra l-ġbir, l-analiżi u l-iskambju ta’ informazzjoni statistika dwar attivitajiet ta’ sensibilizzazzjoni sabiex jiġi valutat l-impatt tagħhom;

—

jipprovdi infrastruttura għal repositorju trans-nazzjonali (web portal) uniku u komprensiv ta’ l-informazzjoni u r-riżorsi ta’ sensibilizzazzjoni u dawk ta’ riċerka b’kontenut lokalizzat (jew sotto-siti lokali skond kif xieraq) li jkunu rilevanti, li jistgħu jinkludu siltiet minn aħbarijiet, artikli u fuljetti ta’ aħbarijiet li joħorġu kull xahar f’bosta lingwi u jipprovdi viżibbiltà lill-attivitajiet tal-Forum Internet Aktar Sigur;

—	jespandi r-rabtiet ma’ attivitajiet ta’ sensibilizzazzjoni barra mill-Ewropa;

—	jipparteċipa fil-Forum Internet Aktar Sigur u avvenimenti rilevanti oħra, filwaqt li jikkordina l-kontributi u l-feedback minn networks ta’ sensibilizzazzjoni.

Għandha titwettaq ukoll riċerka fuq bażi komparabbli dwar il-mod kif il-persuni, speċjalment it-tfal, jużaw it-teknoloġiji online il-ġodda. Aktar azzjoni fuq livell Komunitarju tista’ per eżempju tinkludi appoġġ għal servizzi ta’ l-Internet tajbin għat-tfal jew l-għoti ta’ premju għall-aħjar attività ta’ sensibilizzazzjoni tas-sena.

---

(1)  Direttiva 95/46/KE tal-Parlament Ewropew u tal-Kunsill ta’ l-24 ta’ Ottubru 1995 dwar il-protezzjoni ta’ individwi fir-rigward ta’ l-ipproċessar ta’ data personali u dwar il-moviment liberu ta’ dik id-data (ĠU L 281, tat-23.11.1995, p. 31). Direttiva kif emendata bir-Regolament (KE) Nru 1882/2003 (ĠU L 284, tal-31.10.2003, p. 1).

(2)  ĠU L 69, tas-16.3.2005, p.67.

(3)  Ara l-linji gwida indikattivi għall-implimentazzjoni, fuq livell nazzjonali, ta’ qafas ta’ awto-regolazzjoni għall-protezzjoni tal-minuri u tad-dinjità tal-bniedem fis-servizzi awdjoviżivi u ta’ informazzjoni on-line fir-Rakkomandazzjoni 98/560/KE.

ANNESS II

ANALIŻI INDIKATTIVA TA’ L-ISPIŻA

1)	Il-ġlieda kontra l-kontenuti illegali	25-30 %
2)	It-trattament ta’ kontenut mhux mixtieq u dannuż	10-17 %
3)	Il-promozzjoni ta’ ambjent aktar sigur	8-12 %
4)	Is-sensibilizzazzjoni	47-51 %

ANNESS III

IL-MEZZI GĦALL-IMPLIMENTAZZJONI TAL-PROGRAMM

1.	Il-Kummissjoni għandha timplimenta l-Programm skond il-kontenut tekniku speċifikat fl-Anness I.

2.

Il-Programm għandu jiġi mwettaq permezz ta’ azzjoni indiretta li tinkludi: (a) azzjonijiet bi spejjeż maqsuma (i) Proġetti pilota u azzjonijiet ta’ l-aħjar prattika. Proġetti ad-hoc f’oqsma rilevanti għall-Programm, inklużi proġetti li juru l-aħjar prattika jew li jinvolvu użi innovattivi ta’ teknoloġija eżistenti. (ii) Networks: networks li jlaqqgħu flimkien varjetà ta’ partijiet interessati sabiex tiġi żgurata azzjoni fl-Unjoni Ewropea kollha u sabiex jiġu ffaċilitati l-attivitajiet ta’ kordinazzjoni u t-trasferiment ta’ l-għarfien. Dawn jistgħu jiġu marbuta ma’ azzjonijiet ta’ l-aħjar prattika. (iii) Riċerka applikata madwar l-Ewropa kollha mwettqa fuq bażi komparabbli dwar il-mod kif in-nies, speċjalment it-tfal, jużaw it-teknoloġiji online il-ġodda. Il-finanzjament Komunitarju normalment ma’ jaqbiżx 50 % ta’ l-ispiża tal-proġett. Korpi tas-settur pubbliku jistgħu jiġu rimborsati abbażi ta’ 100 % ta’ l-ispejjeż addizzjonali. (b) miżuri ta’ akkumpanjament Il-miżuri ta’ akkumpanjament li ġejjin jikkontribwixxu għall-implimentazzjoni tal-Programm jew għall-preparazzjoni ta’ attivitajiet futuri: (i) analiżi komparattiva u stħarriġ ta’ opinjoni sabiex tiġi prodotta data affidabbli dwar l-użu aktar sigur ta’ l-Internet u tat-teknoloġiji online il-ġodda għall-Istati Membri kollha miġbura permezz ta’ metodoloġija komparabbli; (ii) valutazzjoni teknika ta’ teknoloġiji bħal filtrazzjoni ddisinnjata għall-promozzjoni ta’ użu aktar sigur ta’ l-Internet u tat-teknoloġiji online il-ġodda. Il-valutazzjoni tieħu kont ukoll ta’ jekk dawn it-teknoloġiji jsaħħux il-privatezza jew le; (iii) studji li jsostnu l-Programm u l-azzjonijiet tiegħu, inklużi l-awto-regolazzjoni u x-xogħol tal-Forum Internet Aktar Sigur, jew il-preparazzjoni ta’ attivitajiet futuri; (iv) kompetizzjonijiet bi premji għall-aħjar prattika; (v) skambju ta’ informazzjoni, konferenzi, seminars, workshops jew laqgħat oħra u l-amministrazzjoni ta’ attivitajiet raggruppati; (vi) attivitajiet ta’ disseminazzjoni, informazzjoni u komunikazzjoni. Il-miżuri dedikati għall-kummerċjalizzazzjoni ta’ prodotti, proċessi jew servizzi, għal attivitajiet ta’ marketing u għall-promozzjoni ta’ bejgħ huma esklużi.

3.	L-għażla ta’ azzjonijiet bi spejjeż maqsuma tkun ibbażata fuq sejħiet għal proposti ppublikati fis-sit ta’ l-Internet tal-Kummissjoni skond id-dispożizzjonijiet finanzjarji fis-seħħ.

4.	Applikazzjonijiet għal appoġġ Komunitarju għandhom jinkludu, fejn xieraq, pjan finanzjarju li jsemmi l-komponenti kollha tal-finanzjament tal-proġetti, inkluż l-appoġġ finanzjarju mitlub mill-Komunità, u kwalunkwe talba oħra għal jew għotjiet ta’ appoġġ minn sorsi oħra.

5.	Il-miżuri ta’ akkumpanjament jiġu mplimentati permezz ta’ sejħiet għal offerti skond id-dispożizzjonijiet finanzjarji fis-seħħ.