12.12.2006   

MT

Il-Ġurnal Uffiċjali ta’ l-Unjoni Ewropea

279

(1)

Id-Deċiżjoni tal-Kummissjoni 2004/122/KE li tikkonċerna ċerti miżuri ta' protezzjoni rigward l-influwenza ta' l-għasafar f'ċerti pajjiżi Ażjatiċi (3) ġiet adottata b’reazzjoni għat-tifqigħat ta’ l-influwenza ta’ l-għasafar f’għadd ta’ pajjiżi Ażjatiċi.

(2)

Id-Deċiżjoni tal-Kummissjoni 2000/666/KE li tistabbilixxi r-rekwiżiti tas-saħħa ta' l-annimal u ċ-ċertifikat veterinarju għall-importazzjoni ta' għasafar, barra mit-tjur u l-kondizzjonijiet għall-kwarantina (4) tipprevedi li l-Istati Membri għandhom jawtorizzaw l-importazzjonji ta’ l-għasafar minn pajjiżi terzi elenkati bħala membri ta' l-Organizzazzjoni Dinjija għas-Saħħa ta' l-Annimali (OIE - World Organisation for Animal Health) u li dawk l-għasafar għandhom ikunu suġġetti għal kwarantina u jkunu eżaminati mad-dħul tagħhom fil-Komunità.

(3)

Ir-Russja kkonfermat mal-Kummissjoni tifqigħa ta’ l-influwenza ta' l-għasafar H5N1 fit-territorju tagħha nhar il-5 ta' Awwissu 2005.

(4)

Il-Każakstan ikkonferma tifqigħa ta’ l-influwenza ta’ l-għasafar H5 lill-OIE minkejja li t-tip ta’ nuweraminidasi għadu mhux magħruf. Madankollu fid-dawl tal-prossimità mat-tifqigħa fir-Russja, aktarx li huwa l-istess varjant.

(5)

Il-Każakstan u r-Russja huma membri ta' l-OIE u skond dan l-Istati Membri għandhom jaċċettaw l-importazzjoni ta’ l-għasafar, għajr it-tjur ta’ l-irziezet, minn dawn il-pajjiżi skond id-Deċiżjoni 2000/666/KE. B’kunsiderazzjoni tal-konsegwenzi potenzjali serji marbuta mal-varjant speċifiku tal-vajrus ta' l-influwenza ta' l-għasafar (H5N1) inkwistjoni, li huwa l-istess bħal dak ikkonfermat f'għadd ta' pajjiżi Ażjatiċi, l-importazzjoni ta' dawn l-għasafar mill-Każakstan u r-Russja għandha tiġi sospiża bħala miżura prekawzjonali.

(6)

Skond ir-Regolament (KE) Nru 1774/2002 tal-Parlament Ewropew u l-Kunsill tat-3 ta’ Ottubru 2002 li jippreskrivi regoli tas-saħħa li jirrigwardjaw prodotti sekondarji ta' l-annimali mhux maħsuba għall-konsum uman (5), l-importazzjoni tar-rix u partijiet mir-rix mhux proċessati li jkunu ġejjin mill-Każakstan u r-Russja hija awtorizzata. Invista tas-sitwazzjoni kurrenti tal-marda fil-Każakstan u r-Russja, dik l-importazzjoni għandha tiġi sospiża wkoll bħala miżura prekawzjonali.

(7)

L-Artikolu 4 tad-Deċiżjoni tal-Kummissjoni 2004/122/KE jissospendi l-importazzjoni minn ċerti pajjiżi terzi tar-rix jew partijiet mir-rix mhux ipproċessati u għasafar ħajjin għajr it-tjur ta' l-irziezet, kif imfisser fid-Deċiżjoni 2000/666/KE. Għaldaqstant, fl-interessi tas-saħħa ta' l-annimali u dik pubblika, il-Każakstan u r-Russja għandhom jingħaddu mal-pajjiżi terzi msemmija fl-Artikolu 4 tad-Deċiżjoni 2004/122/KE.

(8)

Id-Deċiżjoni 2004/122/KE għandha tiġi emendata skond dan.

(9)

Il-miżuri previsti f’din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,

1.

Fit-titolu, il-kelmiet “li tikkonċerna ċerti miżuri ta' protezzjoni rigward l-influwenza ta' l-għasafar f'ċerti pajjiżi Ażjatiċi” jinbidlu b’“li tikkonċerna ċerti miżuri protettivi fir-rigward ta’ l-influwenza ta’ l-għasafar f’ċerti pajjiżi terzi”.

2.

L-Artikolu 4 (1) tad-Deċiżjoni 2004/122/KE jinbidel b’dan li ġej:

“1.   L-Istati Membri għandhom jissospendu l-importazzjoni mill-Kambodja, iċ-Ċina inkluż Ħong Kong, l-Indoneżja, il-Każakstan, il-Laos, il-Malażja, il-Korea ta' Fuq, il-Pakistan, ir-Russja, it-Tajlandja u l-Vjetnam ta':