(1)

Ir-Regolament (KE) Nru 994/98 jagħti s-setgħa lill-Kummissjoni biex tiddikjara, skond l-Artikolu 87 tat-Trattat, li, taħt ċerti kondizzjonijiet, għajnuna lill-intrapriżi żgħar u ta’ daqs medju hija kompatibbli mas-suq komuni u mhux suġġetta għall-ħtieġa ta’ notifika ta’ l-Artikolu 88(3) tat-Trattat.

(2)

Ir-regolament tal-Kummissjoni (KE) Nru 70/2001 tat-12 ta’ Jannar 2001 dwar l- applikazzjoni ta’ l-Artikoli 87 u 88 tat-Trattat KE għall-għajnuna ta’ l-Istat lill-intrapriżi (2) żgħar u medji ma japplikax għal attivitajiet konnessi mal-produzzjoni, l-ipproċessar u l-marketing ta’ prodotti mniżżla fl-Anness I tat-Trattat.

(3)

Il-Kummissjoni applikat l-Artikoli 87 u 88 tat-Trattat għall-intrapriżi żgħar u ta’ daqs medju attivi fil-produzzjoni, l-ipproċessar u l-marketing ta’ prodotti tas-sajd f’ bosta deciżjonijiet u li stqarret ukoll il-politika tagħha, l-aktar reċentement fil-linji ta’ gwida għall-eżami ta’ l-għajnuna ta’ l-Istat għas-sajd u l-akwakultura (3) (“Il-Linji ta’ Gwida għas-Sajd”). Fid-dawl ta’ l-esperjenza vasta tal-Kummissjoni fl-applikazzjoni ta’ dawk l-Artikoli għall-intrapriżi żgħar u ta’ daqs medju li huma attivi fil-produzzjoni, l-ipproċessar u l-marketing ta’ prodotti tas-sajd, huwa xieraq, bil-għan li tiġi żgurata superviżjoni effiċjenti u tiġi simplifikata l-amministrazzjoni mingħajr ma jiddgħajjef il-monitoraġġ tal-Kummissjoni, li l-Kummissjoni tagħmel użu mis-setgħat mogħtija lilha mir-Regolament (KE) Nru 994/98 ukoll għal intrapriżi żgħar u ta’ daqs medju li huma attivi fil-produzzjoni, l-ipproċessar u l-marketing tal-prodotti tas-sajd, sa fejn ġie ddikjarat li l-Artikolu 89 tat-Trattat huwa applikabbli għal tali prodotti.

(4)

Il-kompatibbilità ta’ l-għajnuna ta’ l-Istat fis-settur tas-sajd hija evalwata mill-Kummissjoni abbażi ta’ l-għanijiet kemm tal-Politika tal-Kompetizzjoni u tal-Politika Komuni tas-Sajd (CFP).

(5)

Dan ir-Regolament għandu jkopri għajnuna konċessa lis-settur tas-sajd li għal ħafna snin ġiet regolarment approvata mill-Kummissjon. Tali għajnuna ma teħtieġx evalwazzjoni skond il-każ min-naħa tal-Kummissjoni dwar il-kompatibbilità tagħha mas-suq komuni, jekk hija konformi mal-kundizzjonijiet imfassla għall-fondi strutturali fir-Regolament tal-Kunsill (KE) Nru 2792/1999 tas-17 ta’ Diċembru 1999 li jipprovdi regoli dettaljati u arranġamenti għal għajnuna Strutturali Komunitarja fis-settur tas-sajd (4) u b’ ċerti kundizzjonijet oħra.

(6)

Għalhekk dan ir-Regolament għandu jkopri l-għajnuna segwenti: għajnuna għall-promozzjoni u/jew reklamar ta’ prodotti tas-sajd, għajnuna għall-gruppi ta’ produtturi, għajnuna għall-protezzjoni u l-iżvilupp ta’ riżorsi akwatiċi, għajnuna għall-miżuri innovattivi u għajnuna teknika, għajnuna għall-faċilitajiet portwali tas-sajd, għajnuna għall-iskreppjar ta’ bċejjeċ tas-sajd, għajnuna għal ċerti miżuri soċjo-ekonomiċi, għajnuna għall-investimenti għall-ipproċessar u/jew l-marketing ta’ prodotti tas-sajd, għajnuna għall-investimenti għall-akwakultura u s-sajd intern.

(7)

Bil-għan ta’ ċertezza legali, eżenzjonijiet tat-taxxa huma applikabbli lis-settur tas-sajd kollu li l-Istati Membri tagħhom jintroduċu skond Artikolu 15 tas-Sitt Direttiva tal-Kunsill 77/388/KEE tas-17 ta’ Mejju 1977 dwar l-armonizzazzjoni tal-liġijiet ta’ l-Istati Membri relatati mat-taxxi fuq id-dħul - Sistema komuni tat-taxxa fuq il-valur miżjud: bażi uniformi ta’ stima, (5) jew lil Artikolu 14 jew Artikolu 15 (1) tad-Direttiva tal-Kunsill 2003/96/KE tas-27 ta’ Ottubru 2003 li tirristruttura il-qafas tal-Komunità għat-tassazjoni ta’ prodotti ta’ l-enerġija u elettriku (6), sal-punt li jikkostitwixxu għajnuna ta’ l-Istat, huma kompattibli mas-suq komuni u eżenti minn notifikazzjoni meħtieġa ta' Artikolu 88(3) tat-Trattat. Eżenzjonijiet tat-taxxa li l-Istati Membri huma obbligati li jintroduċu skond dawk id-dispożizzjonijiet ma jikkostitwux għajnuna ta’ l-Istat.

(8)

Dan ir-Regolament għandu japplika mingħajr ħsara għall-possibilità għall-Istati Membri li jinnotifikaw għajnuna lill-intrapriżi żgħar u ta’ daqs medju li huma attivi fil-produzzjoni, l-ipproċessar u l-marketing tal-prodotti tas-sajd. Tali notifiki jkunu evalwati mill-Kummissjoni fid-dawl ta’ dan ir-Regolament u abbażi tal-Linji ta’ Gwida għas-Sajd.

(9)

L-għajnuna li Stati Membri għandhom l-intenzjoni jagħtu fis-settur tas-sajd iżda li ma taqax fl-iskop ta’ dan ir-Regolament, jew ta’ Regolamenti oħra adottati in segwitu għall-Artikolu 1 tar-Regolament (KE) Nru 994/98, għandha tibqa’ suġġetta għal ħtieġa ta’ notifika ta’ l-Artikolu 88(3) tat-Trattat. Tali għajnuna tkun evalwata fid-dawl tal-Linji ta’ Gwida għas-Sajd. Dan huwa partikolarment il-każ għall-għajnuna għat-tiġdid tal-flotta u għat-tagħmir jew l-imodernizzar ta’ bċejjeċ tas-sajd, għall-għajnuna għal kumpens finanzjarju għall-waqfa temporanja ta’ l-attivitajiet tas-sajd, għall-għajnuna għal trasferiment permanenti ta’ bċejjeċ tas-sajd lill pajjiż terz, għal għajnuna fuq id-dħul u għajnuna għall-operat, għal għajnuna sabiex jagħmel tajjeb għall-ħsara ikkawżata minn diżastru naturali jew ġrajjet mhux tas-soltu.

(10)

Dan ir-Regolament għandu jeżenta kull għajnuna li tissodisfa il-ħtiġijiet kollha li jimponi, u kull skema ta’ għajnuna, jekk kwalunkwe għajnuna li tista’ tingħata taħt tali skema tissodisfa l-ħtiġijiet rilevanti kollha ta’ dan ir-Regolament. Skemi ta’ għajnuna u għotjiet individwali li qegħdin barra kwalunkwe skema ta’ għajnuna għandu jkollhom fihom referenza speċifika għal dan ir-Regolament.

(11)

Fl-interessi tal-koerenza ma’ miżuri ta’ appoġġ iffinanzjati mill-Komunità, il-kwoti ta’ għajnuna koperti minn dan ir-Regolament għandhom jkunu daqs dawk stabbiliti għall-istess tip ta’ għajnuna fir-Regolament (KE) Nru 2792/1999.

(12)

Huwa essenzjali li l-ebda għajnuna ma tkun konċessa f’ ċirkostanzi fejn il-Liġi Komunitarja, u partikolarment ir-regoli tal-Politika Komuni tas-Sajd, ma jkunux ġew sodisfatti. Għalhekk għajnuna tista’ tingħata biss minn Stat Membru fis-settur tas-sajd jekk il-miżuri ffinanzjati u l-effetti tagħhom huma konformi mal-Liġi Komunitarja. Qabel ma tingħata l-għajnuna, l-Istati Membri għandhom għalhekk jiżguraw li l-benefiċjarji ta’ l-għajnuna Ta’ l-Istat jkunu konformi mar-regoli tal- Politika Komuni tas-Sajd.

(13)

Skond prassi stabbilita tal-Kummissjoni, u sabiex jiġi żgurat li l-għajnuna hija proporzjonali u limitata għall-ammont neċessarju, normalment il-limiti għandhom jiġu espressi f’ termini ta’ l-intensità ta’ l-għajnuna f’relazzjoni ma’ sett ta’ spejjeż eliġibbli, milli f’ termini ta’ ammonti massimi ta’ għajnuna.

(14)

In vista tal-ħtieġa li jinstab il-bilanċ xieraq bejn il-minimizzar ta’ xkiel għall-kompetizzjoni fis-settur megħjun u l-għanijiet ta’ dan ir-Regolament, m’għandux jeżenta għotjiet individwali li jeċċedu ammont massimu stabbilit, kemm jekk magħmula taħt skema ta’ għajnuna enżetata minn dan ir-Regolament u kemm jekk le.

(15)

Sabiex jiġu eliminati d-differenzi li jistgħu jagħtu lok għal xkiel għall-kompetizzjoni u sabiex tiġi ffaċilitata l-koordinazzjoni bejn inizzjattivi Komunitarji u nazzjonali differenti li għandhom x’ jaqsmu ma’ l-intrapriżi żgħar u ta’ daqs medju, id-definizzjoni ta’ “intrapriżi żgħar u ta’ daqs medju” użata f’ dan ir-Regolament għandha tkun dik li tinstab fir-Regolament (KE) Nru 70/2001.

(16)

Sabiex jiġi determinat jekk l-għajnuna hijiex kompatibbli mas-suq komuni in segwitu ta’ dan ir-Regolament jew le, huwa neċessarju li jiġu kkunsidrati l-intensità ta’ l-għajnuna u għalhekk l-ammont ta’ għajnuna espress bħala ekwivalenti għall-għotja. Il-kalkolu ta’ l-għotja ekwivalenti għall-għajnuna dovuta f’ numr ta’ rati ta’ pagament u għajnuna fil-forma ta’ soft loan jeħtieġu l-użu ta’ rati ta' l-imgħax tas-suq fil-ħin ta’ l-għotja. In vista ta’ l-applikazzjoni uniformi, trasparenti, u sempliċi tar-regoli ta’ għajnuna ta’ l-Istat, ir-rati tas-suq għall-fini ta’ dan ir-Regolament għandhom jiġu meqjusa li jkunu rati ta’ referenza, ipprovdut li, fil-każ ta’ soft loan, is-self huwa garantit minn garanzija normali u ma jinvolviex riskji mhux normali. Ir-rati ta’ referenza għandhom ikunu dawk li huma ffissati perjodikament mill-Kummissjoni abbażi tal-kriterji ta’ l-għanijiet u ppubblikati fil-Ġurnal Uffiċjali ta’ l-Unjoni Ewropea u fuq l-Internet.

(17)

Wara li ġie ikkunsidrat l-Artikolu 87 (3) (c) tat-Trattat, l-għajnuna normalment m’ għandhiex ikollha biss l-effett li kontinwament jew perjodikament tnaqqas l-ispejjeż operattivi li l-benefiċjarju s-soltu jkollu jiġi sottopost għalihom, u għandha tkun proporzjonqli għall-iżvantaġġi li jridu jingħelbu sabiex jitħarsu l-benefiċċji soċjo-ekonomiċi li huma meqjusa bħala fl-interess Komunitarju. Miżuri ta’ għajnuna ta’ l-Istat li sempliċement għandhom l-għan li jtejbu s-sitwazzjoni finanzjarja tal-produtturi iżda li bl-ebda mod ma jikkontribwixxu għall-iżvilupp tas-settur, u partikolarment għajnuna li tingħata biss abbażi tal-prezz, il-kwantità, l-unità ta’ produzzjoni jew l-unità tal-meżżi ta’ produzzjoni huma kkunsidrati li jikkostitwixxu l-għajnuna operattiva li hija inkompatibbli mas-suq komuni. Minbarra dan, tali għajnuna probabbilment tinterferixxi mal-mekkaniżmi ta’ l-organizzazzjoni komuni tas-sweiq. Għalhekk huwa xieraq li jiġi limitat l-għan ta’ dan ir-Regolament dwar l-għajnuna għall-investimenti, kif ukoll għajnuna għal ċerti miżuri soċjo-ekonomiċi.

(18)

Sabiex jiġi żgurat li l-għajnuna hija neċessarja u jkollha l-effett ta’ inċentiv għall-iżvilupp ta’ ċerti attivitajiet, dan ir-Regolament m’għandux jeżenta l-attivitajiet li fih il-benefiċjarju kieku jkun diġà qed jaħdem taħt kundizzjonijiet tas-suq biss. L-ebda għajnuna m’għandha tingħata għal attivitajiet li diġà bdew.

(19)

Dan ir-Regolament m’għandux jeżenta għajnuna kumulata ma’ għajnuna Ta’ l-Istat oħra, inkluża għajnuna mogħtija minn awtoritajiet nazzjonali, reġjonali jew lokali, b’ appoġġ pubbliku mogħti fil-qafas tar-Regolament (KE) Nru 2792/1999 jew b’ għajnuna Komunitarja, in konnessjoni ma’ l-istess spejjeż eliġibbli, meta tali kumulazzjoni taqbeż il-limiti stabbiliti f’ dak ir-Regolament.

(20)

Sabiex jiġu żgurati trasparenza u monitoraġġ effettivi, f’ konformità ma’ l-Artikolu 3 tar-Regolament (KE) Nru 994/98, huwa xieraq li jiġi stabbilit format standardizzat li fiha Stati Membri għandhom jipprovdu lill-Kummissjoni b’ informazzjoni konċiża kull meta, in segwitu ta’ dan ir-Regolament, skema ta’ għajnuna tiġi implimentata jew meta tingħata għajnuna individwali barra minn tali skemi, intiża għall-pubblikazzjoni fil-Ġurnal Uffiċċjali tal-Unjoni Ewropea. Għall-istess raġunijiet, huwa xieraq li jiġu stabbiliti regoli dwar rekords li l-Istati Membri għandhom iżommu fir-rigward ta’ l-għajnuna eżentata minn dan ir-Regolament. Għall-fini tar-rapport annwali li jrid jingħata lill-Kummissjoni mill-Istati Membri, huwa xieraq għall-Kummissjoni li tistabbilixxi l-ħtiġijiet speċifiċi tagħha. In vista tad-disponibbilità wiesgħa tat-teknoloġija meħtieġa, l-informazzjoni konċiża u r-rapport annwali għandhom ikunu f’ forma kompjuterizzata.

(21)

Jekk Stat Membru jonqos mill-obbligu ta’ rappurtar stabbiliti f’ dan ir-Regolament, dan jista’ jagħmilha impossibbli għall-Kummisjoni sabiex twettaq il-kompitu ta’ monitoraġġġ skond l-Artikolu 88(1) tat-Trattat u, partikolarment, sabiex jiġi evalwat jekk l-effett ekonomiku kumulattiv ta’ l-għajnuna eżentata taħt dan ir- Regolament huwa tali li jaffetwa b’ mod negattiv il-kundizzjonijiet tal-kummerċ sal punt li jmur kontra l-interessi komuni. Huwa għalhekk ta’ importanza primarja li l-Istati Membri jissottomettu mill-aktar fis informazzjoni approprjata meta jimplimentaw għajnuna taħt dan ir-Regolament. Hu partikolarment neċessarju li jiġi evalwat l-effett kumulattiv ta’ l-għajnuna ta’ l-Istat fejn l-istess benefiċjarju jista’ jirċievi l-għajnuna mogħtija minn numru ta’ għejun.

(22)

Wara li tiġi kkunsidrata l-esperjenza tal-Kumissjoni f’ dan il-qasam, u partikolarment il-frekwenza li permezz tagħha huwa ġeneralment meħtieġ li il-politika ta’ l-għajnuna ta’ l-Istat tiġi riveduta, huwa xieraq li jiġi limitat il-perjodu ta’ l-applikazzjoni ta’ dan ir-Regolament. Jekk dan ir-Regolament jiskadi mingħajr ma jkun ġie estiż, skemi ta’ għajnuna li huma diġà eżentati minn dan ir-Regolament għandhom ikomplu jiġu eżentati għal sitt xhur.

(23)

Huwa xieraq li jiġu pprovduti dispożizzjonijiet transitorji għall-notifikazzjonijiet pendenti fid-data tad-dħul fis-seħħ ta’ dan ir-Regolament u għal għajnuna li kienet ingħatat qabel id-dħul fis-seħħ ta’ dan ir-Regolamenti u li ma kinitx notifikata bi ksur ta’ l-obbligu fl-Artikolu 88 (3) tat-Trattat.