This document is an excerpt from the EUR-Lex website
Document 32004R0997
Council Regulation (EC) No 997/2004 of 17 May 2004 amending Commission Decision No 2730/2000/ECSC on imports of coke of coal in pieces with a diameter of more than 80 mm originating in the People's Republic of China and terminating the interim review of the anti-dumping measures imposed thereby
Ir-Regolament tal-Kunsill (KE) Nru 997/2004 tas- 17 ta' Mejju 2004 li jemenda d-Deċiżjoni tal-Kummissjoni Nru 2730/2000/KEFA dwar importazzjonijiet ta' kokk tal-faħam f'biċċiet ta' dijametru ta' aktar minn 80 mm li joriġinaw fir-Repubblika tal-Poplu taċ-Ċina u li jtemm ir-reviżjoni interim tal-miżuri ta' anti-dumping imposti permezz tagħha
Ir-Regolament tal-Kunsill (KE) Nru 997/2004 tas- 17 ta' Mejju 2004 li jemenda d-Deċiżjoni tal-Kummissjoni Nru 2730/2000/KEFA dwar importazzjonijiet ta' kokk tal-faħam f'biċċiet ta' dijametru ta' aktar minn 80 mm li joriġinaw fir-Repubblika tal-Poplu taċ-Ċina u li jtemm ir-reviżjoni interim tal-miżuri ta' anti-dumping imposti permezz tagħha
ĠU L 183, 20.5.2004, p. 1–3
(ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV)
ĠU L 142M, 30.5.2006, p. 40–42
(MT)
No longer in force, Date of end of validity: 16/12/2005
30.5.2006 |
MT |
Il-Ġurnal Uffiċjali ta’ l-Unjoni Ewropea |
40 |
IR-REGOLAMENT TAL-KUNSILL (KE) Nru 997/2004
tas-17 ta' Mejju 2004
li jemenda d-Deċiżjoni tal-Kummissjoni Nru 2730/2000/KEFA dwar importazzjonijiet ta' kokk tal-faħam f'biċċiet ta' dijametru ta' aktar minn 80 mm li joriġinaw fir-Repubblika tal-Poplu taċ-Ċina u li jtemm ir-reviżjoni interim tal-miżuri ta' anti-dumping imposti permezz tagħha
IL-KUNSILL TA' L-UNJONI EWROPEA,
Wara li kkunsidra t-Trattat li jistabbilixxi l-Komunità Ewropea,
Wara li kkunsidra r-Regolament tal-Kunsill (KE) Nru 384/96 tat-22 ta' Diċembru 1995 dwar protezzjoni kontra importazzjonijiet li huma l-oġġett ta' dumping minn pajjiżi mhux membri tal-Komunità Ewropea (1) (“ir-Regolament bażiku”) u b'mod partikolari l-Artikoli 9 u 11(3) tiegħu,
Wara li kkunsidra l-proposta preżentata mill-Kummissjoni wara li kkonsultat lill-Kumitat Konsultattiv,
Billi:
A. PROĊEDURA
1. Il-proċedura preċedenti
(1) |
Permezz tad-Deċiżjoni Nru 2730/2000/KEFA (2), il-Kummissjoni imponiet dazju anti-dumping definittiv fuq importazzjonijiet ta' kokk tal-faħam f'biċċiet ta' dijametru ta' aktar minn 80 mm, li jaqa' taħt il-kodiċi NM ex 2704 00 19 (kodiċi TARIC2704001910), li joriġinaw fir-Repubblika tal-Poplu taċ-Ċina (“il-pajjiż ikkonċernat” jew “RPĊ”). L-ammont ta' dazju anti-dumping huwa ugwali għall-ammont fiss ta' EUR 32.6 għal kull tunnellata metrika ta' piż nett xott. |
(2) |
Fid-dawl tat-tmiem tat-Trattat li jistabbilixxi l-Komunità Ewropea tal-Faħam u l-Azzar fit-23 ta' Lulju 2002, il-Kunsill, permezz tar-Regolament (KE) Nru 963/2002 (3), iddeċieda li miżuri ta' anti-dumping li kienu adottati skond id-Deċiżjoni Nru 2277/96/ KEFA u li kienu għadhom fis-seħħ fit-23 ta' Lulju 2002 kellhom ikomplu u jkunu rregolati mid-disposizzjonijiet tar-Regolament bażiku b'effett mill-24 ta' Lulju 2002. |
2. Il-proċedura attwali
(3) |
Fil-11 ta' Diċembru 2002, il-Kummissjoni ħabbret, permezz tal-publikazzjoni ta' avviż fil-Ġurnal Uffiċjali ta' l-Unjoni Ewropea (4), il-bidu ta' reviżjoni interim tal-miżuri ta' anti-dumping definittivi applikabbli għal importazzjonijiet ta' kokk tal-faħam f'biċċiet ta' dijametru ta' aktar minn 80 mm (minn issa 'l quddiem “kokk 80+” jew “il-prodott ikkonċernat”) li joriġinaw fir-RPĊ skond l-Artikolu 11(3) tar-Regolament bażiku u bdiet investigazzjoni. |
(4) |
Il-proċediment ingħata bidu fuq talba ppreżentata mill-Eucoke-EEIG (l-“applikant”) għan-nom ta' produtturi li jirrappreżentaw proporzjon maġġur tal-produzzjoni Komunitarja totali ta' kokk tal-faħam f'biċċiet ta' dijametru ta' aktar minn 80 mm. L-applikant allega li d-dumping fir-rigward tar-RPĊ baqa' sejjer u anke żdied u li l-miżuri eżistenti ma kienux se jibqgħu iżjed suffiċjenti sabiex jikkontrabattu l-effetti dannużi tad-dumping. L-evidenza miġjuba fit-talba għal reviżjoni kienet ikkunsidrata suffiċjenti biex tiġġustifika li jingħata bidu għall-investigazzjoni. |
(5) |
Il-Kummissjoni uffiċjalment avżat lill-produtturi/esportaturi, lill-importaturi u lill-utenti magħrufa bħala kkonċernati, lir-rappreżentanti tal-pajjiż esportatur ikkonċernat, lill-industrija Komunitarja applikanti u lill-produtturi Komunitarji oħra magħrufa dwar il-bidu tar-reviżjoni interim. Il-partijiet interessati ngħataw l-opportunità li jagħmlu magħrufa l-fehmiet tagħhom bil-miktub u li jitolbu udjenza fil-limitu taż-żmien stipulat fl-avviż tal-bidu. |
3. Is-sospensjoni tal-miżuri
(6) |
Ta' min ifakkar li matul l-investigazzjoni tal-proċediment preżenti numru ta' partijiet interessati ipprovda nformazzjoni dwar bidla fil-kondizzjonijiet tas-suq wara t-tmiem tal-perjodu ta' investigazzjoni (mill-1 ta' Ottubru 2001 sat-30 ta' Settembru 2002), u b'hekk ġew sodisfatti l-kondizzjonijiet meħtieġa skond l-Artikolu 14(4) tar-Regolament bażiku sabiex tkun iġġustifikata s-sospensjoni tal-miżuri preżentement fis-seħħ. |
(7) |
L-investigazzjoni wriet li l-ħtiġiet kollha għas-sospensjoni tal-miżuri ta' anti-dumping ġew sodisfatti. Għaldaqstant, permezz tad-Deċiżjoni tal-Kummissjoni Nru 264/2004/KE (5), id-dazju anti-dumping applikabbli għal importazzjonijiet ta' kokk tal-faħam f'biċċiet ta' dijametru ta' aktar minn 80 mm li joriġinaw fir-RPĊ ġie sospiż għal perijodu ta' disa' xhur |
4. L-irtirar ta' l-applikazzjoni
(8) |
Permezz ta' ittra tal-15 ta' Diċembru 2003 lill-Kummissjoni, il-Eucoke-EEIG irtirat formalment l-applikazzjoni tagħha. |
(9) |
Fir-rigward tal-fatt li l-investigazzjoni ma rriżultat fl-ebda kunsiderazzjoni li turi li tali terminazzjoni ma tkunx fl-interess tal-Komunità, huwa kkunsidrat li l-proċediment preżenti għandu jiġi tterminat skond l-Artikolu 9(1) tar-Regolament bażiku. |
5. Il-forma tal-miżuri
(10) |
Madankollu, matul l-investigazzjoni, instab li kien meħtieġ li jiġi ċċarat il-kamp ta' applikazzjoni tal-miżuri eżistenti minħabba d-diffikultajiet iffaċċjati minn operatur ekonomiku għar-rigward ta' l-applikazzjoni tal-miżuri fis-seħħ. Tabilħaqq, instab li dazji anti-dumping kienu qegħdin jiġu miġbura mill-awtoritajiet tad-dwana ta' Stat Membru wieħed fuq vjaġġi ta' kokk iddestinat għall-użu f'kalkari ta' funderiji, li mhumiex milquta mil-miżuri ta' anti--dumping, u li jikkomprendu parti żgħira biss tal-prodott ikkonċernat. Sabiex jiġi żgurat infurzar aktar effiċjenti u uniformi tal-miżuri, l-eżenzjoni prevista fid-Deċiżjoni Nru 2730/2000/KEFA għal esportazzjonijiet li huma taħlita ta' kokk tal-faħam f'biċċiet iżgħar mill-prodott ikkonċernat u ta' kokk tal-faħam f'biċċiet ta' mhux aktar minn 100mm hija sostitwita b'eżenzjoni li tkopri taħlita li fiha l-proporzjon ta' kokk li jeċċedi t-80 mm ma jikkostitwix aktar minn 20 % tal-vjaġġ imħallat. Minbarra dan, l-istandard ISO għandu jintuża bħala l-metodu ta' kejl. |
6. Konklużjoni
(11) |
Ir-reviżjoni interim għandha tiġi tterminata. Il-kamp ta' applikazzjoni tal-miżuri eżistenti għandu jiġi ċċarat, |
ADOTTA DAN IR-REGOLAMENT:
Artikolu 1
Ir-reviżjoni interim tal-miżuri ta' anti-dumping imposti permezz tad-Deċiżjoni Nru 2730/2000/KEFA fuq importazzjonijiet ta' kokk tal-faħam f'biċċiet ta' dijametru massimu ta' aktar minn 80mm, li jaqa' taħt il-kodiċi NM ex 2704 00 19 (kodiċi TARIC2704001910) u li joriġinaw fir-Repubblika tal-Poplu taċ-Ċina hija b'dan itterminata.
Artikolu 2
L-Artikolu 1 tad-Deċiżjoni Nru 2730/2000/KEFA huwa sostitwit b'dan li ġej:
“Artikolu 1
1. Huwa b'dan impost dazju anti-dumping definittiv fuq importazzjonijiet ta' kokk tal-faħam f'biċċiet ta' dijametru ta' aktar minn 80 mm, li jaqa' taħt il-kodiċi NM ex 2704 00 19 (kodiċi TARIC2704001910) u li joriġinaw fir-Repubblika tal-Poplu taċ-Ċina. Id-dijametru tal-biċċiet għandu jiġi ddeterminat skond in-norma ISO 728: 1995.
2. L-ammont ta' dazju anti-dumping għandu jkun ugwali għall-ammont fiss ta' EUR 32.6 għal kull tunnellata metrika ta' piż nett xott.
3. Id-dazju anti-dumping għandu wkoll japplika għal kokk tal-faħam f'biċċiet ta' dijametru ta' aktar minn 80 mm, meta dan ikun mibgħut f'taħlitiet li jikkontjenu kemm kokk tal-faħam f'biċċiet ta' dijametru ta' aktar minn 80 mm u kokk tal-faħam f'biċċiet ta' dijametri iżgħar sakemm ma jiġix ddeterminat li l-kwantità ta' kokk tal-faħam f'biċċiet ta' dijametru ta' aktar minn 80 mm ma tikkostitwix aktar minn 20 % tal-piż nett xottt tal-vjaġġ imħallat. Il-kwantità ta' kokk tal-faħam f'biċċiet ta' dijametru ta' aktar minn 80 mm li hemm f'taħlit tista' tiġi ddeterminata abbażi ta' kampjuni skond l-Artikoli 68 sa 70 tar-Regolament tal-Kunsill (KEE) Nru 2913/92 (*). Fil-każijiet fejn il-kwantità ta' kokk tal-faħam f'biċċiet ta' dijametru ta' aktar minn 80 mm tiġi ddeterminata abbażi ta' kampjuni, il-kampjun għandu jiġi magħżul skond in-norma ISO 2309: 1980.
4. L-awtoritajiet tad-dwana ta' l-Istati Membri jistgħu, meta jirċievu mingħand importaturi talba li tkun debitament sostanzjata, jivvalutaw mill-ġdid fid-dawl tal-kjarifikazzjoni mogħtija hawn fuq, is-sitwazzjoni ta' l-importazzjonijiet tal-prodott ikkonċernat li saru bejn is-16 ta' Diċembru 2000 u l-21 ta' Mejju 2004.
Artikolu 3
Dan ir-Regolament għandu jidħol fis-seħħ fil-jum ta' wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, nhar is-17 ta' Mejju 2004.
Għall-Kunsill
Il-President
B. COWEN
(1) ĠU L 56, tas-6.3.1996, p. 1, Regolament kif l-aħħar emendat bir-Regolament (KE) Nru 461/2004 (ĠU L 77, tat-13.3.2004, p. 12).
(2) ĠU L 316, tal-15.12.2000, p. 30.
(3) ĠU L 149, tas-7.6.2002, p. 3. Regolament kif l-aħħar emendat bir-Regolament (KE) Nru 1310/2002 (ĠU L 192, ta' l-20.7.2002, p. 9).
(4) ĠU C 308, tal-11.12.2002, p. 2.
(5) ĠU L 81, tad-19.3.2004, p. 89.