32003D0385

Id-Deċiżjoni tal-Kummissjoni

tat-28 ta’ Mejju 2003

li temenda għat-tieni darba d-Deċiżjoni 2003/56/KE dwar ċertifikati ta’ saħħa għall-importazzjoni ta’ annimali ħajjin u prodotti mill-annimali min-New Zealand

(mgħarrfa taħt dokument nru K (2003) 1788)

(Test b’rilevanza għall-EEE)

(2003/385/KE)

IL-KUMMISJONI TA’ KOMUNITAJIET EWROPEJ,

Wara li kkunsidrat t-Trattat li jistabbilixxi il-Komunità Ewropea,

Wara li kkunsidrat id-Deċiżjoni tal-Kunsill 97/132/KE tas-17 ta’ Diċembru 1996 dwar il-konklużjoni tal-Ftehim bejn il-Komunita Ewropea u n-New Zealand dwar miżuri sanitarji li japplikaw għal kummerċ f’annimali ħajjin u prodotti mill-annimali [1], kif l-aħħar emendat bid-Deċiżjoni 1999/837/KE [2], u partikolarment l-Artikolu 4 tiegħu,

Wara li kkunsidrat id-Direttiva tal-Kunsill 72/462/KEE tat-12 ta’ Diċembru 1972 dwar problemi ta’ spezzjoni ta’ saħħa u veterinarja ma’ l-importazzjoni ta’ annimali tal-fart, annimali tar-razza ovina u dik kaprina u majjali, laħam frisk u prodotti mill-laħam minn pajjiżi terzi [3], kif l-aħħar emendata bir-Regolament (KE) Nru 1452/2001 [4], u partikolarment l-Artikolu 11(2) u l-Artikolu 22(2) miġjub fih, u d-dispożizzjonijiet korrespondenti tad-Direttivi l-oħra li jistabbilixxu kondizzjonijiet sanitarji u mudelli ta’ ċertifikati għall-importazzjoni ta’ annimali ħajjin u prodotti mill-annimali minn pajjiżi terzi,

Billi:

(1) Id-Deċiżjoni tal-Kummissjoni 2003/56/KE ta’ l-24 ta’ Jannar 2003 dwar ċertifikati tas-saħħa għall-importazzjoni ta’ annimali ħajjin u prodotti mill-annimali min-New Zealand [5], kif l-aħħar emendata bid-Deċiżjoni 2003/331/KE [6], tippreskrivi l-ħtiġijiet ta’ ċertifikazzjoni u l-mudelli ta’ ċertifikati uffiċjali tas-saħħa għall-importazzjoni ta’ annimali ħajjin u prodotti mill-annimali min-New Zealand.

(2) Sabiex jiġi faċilitat il-qlib għaċ-ċertifikati uffiċjali ġodda tas-saħħa, id-Deċiżjoni 2003/56/KE tipprovdi għal perjodu transizzjonali ta’ massimu ta’ 90 ġurnata. Dan il-perjodu transizzjonali ġie estiż b’30 ġurnata biex jiġu implimentati rakkomandazzjonijiet tal-Kumitat Konġunt tat-Tmexxija għall-Ftehim fil-laqgħa tiegħu tas-27 u t-28 ta’ Frar 2003 li għandha x’taqsam ma’ ċerti emendi għall-Annessi mal-Ftehim.

(3) Diskussjonijiet qegħdin isiru bejn il-Partijiet għall-Ftehim li għandhom x’jaqsmu ma’ l-iskop tar-rakkomandazzjonijiet tal-Kumitat. Il-proċedura biex jiġu emendati l-Annessi mal-Ftehim teħtieġ ukoll li tiġi klarifikata aktar.

(4) Għal din ir-raġuni, huwa xieraq li jiġi estiż il-perjodu transizzjonali provvdut fid-Deċiżjoni 2003/56/KE sat-30 ta’ Settembru 2003.

(5) Id-Deċiżjoni 2003/56/KE għandha tiġi emendata kif mistħoqq.

(6) Il-miżura provduta f’ din id-Deċiżjoni hija bi qbil mal-opinjoni tal-Kumitat Permanenti tal-Katina ta’ l-Ikel u s-Saħħa tal-Annimali,

ADOTTAT DIN ID-DEĊIŻJONI:

Artikolu 1

L-Artikolu 4 tad-Deċiżjoni 2003/56/KE huwa mibdul b’dan li ġej:

"L-Artikolu 4

Għal perjodu transizzjonali, l-Istati Membri għandhom jawtorizzaw l-importazzjoni ta’ annimali ħajjin u prodotti mill-annimali dikjarati fl-Anness I skond il-mudelli ta’ ċertifikati applikati minn qabel sat-30 ta’ Settembru 2003."

Artikolu 2

Din id-Deċiżjoni għandha tgħodd mill-1 ta’ Ġunju 2003.

Artikolu 3

Din id-Deċiżjoni hija indirizzata lill-Istati Membri.

Magħmula fi Brussel, fit-28 ta’ Mejju 2003.

Għall-Kummissjoni

David Byrne

Membru tal-Kummissjoni

[1] ĠU L 57, tas-26.2.1997, p. 4.

[2] ĠU L 332, tat-23.12.1999, p. 1.

[3] ĠU L 302, tal-31.12.1972, p. 24.

[4] ĠU L 198, tal-21.7.2001, p. 11.

[5] ĠU L 22, tal-25.1.2003, p. 38.

[6] ĠU L 116, tat-13.5.2003, p. 24.

--------------------------------------------------