32002D0578

Id-Deċiżjoni tal-Kummissjoni

ta’ l-10 ta’ Lulju 2002

li temenda d-Deċiżjoni 2002/199/KE dwar kondizzjonijiet tas-saħħa ta’ l-annimali u ċ-ċertifikazzjoni veterinarja għal importazzjonijiet ta’ annimali bovini u porċini ħajjin minn xi pajjiżi terzi

(notifikata bid-dokument numru C(2002) 2553)

(Test b’relevanza għaż-ŻEE)

(2002/578/KE)

KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 72/462/KEE tat-12 ta’ Diċembru 1972 dwar problemi ta’ saħħa u spezzjonijiet veterinarji fl-importazzjoni ta’ annimali bovini, ovini u kaprini u qżieqeż, laħam frisk jew prodotti tal-laħam minn pajjiżi terzi [1], kif l-aħħar emendata bir-Regolament (KE) Nru1452/2001 [2], u b’mod partikolari l-Artikolu 8(3) tagħha,

Billi:

(1) Taħt l-Artikolu 8(3) tad-Direttiva 72/462/KEE il-ħtiģijiet dwar l-ittestjar tal-bruċellosi, tal-lewkosi enzootika bovina u tat-tuberkolożi stabbiliti f’ċerti pajjiżi terzi jistgħu jitqiesu bħala ekwivalenti għal dawk stabbiliti fin-negozju ta’ gol-Komunità.

(2) Il-Kanada bagħtet informazzjoni li tirrigwarda l-iskema tagħha għall-għarfien ta’ merħliet bħala ħielsa uffiċjalment mil-lewkosi enzootika bovina.

(3) Ir-Repubblika Ċeka bagħtet informazzjoni li tirrigwarda l-iskema tagħha għall-għarfien ta’ merħliet bħala ħielsa uffiċjalment mil-lewkosi enzootika bovina

(4) Dawn il-garanziji magħmula mill-Kanada u r-Repubblika Ċeka rigward il-Lewkosi enzootika bovina jistgħu jitqiesu bħala ekwivalenti għal dawk meħtieġa fin-negozju ta’ ģol-Komunità.

(5) L-awtoritajiet kompetenti veterinarji tal-Kanada u tar-Repubblika Ċeka obbligaw ruħhom li jinnotifikaw mingħajr telf ta’ żmien lill-Kummissjoni b’xi bidliet proposti fir-regoli tagħhom dwar dawn l-iskemi.

(6) Id-Deċiżjoni tal-Kummissjoni 2002/199/KE( [3]) għandha tkun emendata skond dan.

(7) Il-miżuri previsti f’din id-Deċiżjoni huma skond l-opinjoni tal-Kumitat Permanenti dwar il-Katina ta’ l-Ikel u s-Saħħa ta’ l-Annimali,

ADOTTAT DIN ID-DEĊIŻJONI:

Artikolu 1

L-Anness VI għad-Deċiżjoni 2002/199/KE huwa sostitwit bit-test fl-Anness ta’ din id-Deċiżjoni.

Artikolu 2

Din id-Deċiżjoni għandha tapplika mis-60 jum mill-publikazzjoni tagħha fil-Ġurnal Uffiċjali tal-Komunitajiet Ewropej.

Artikolu 3

Din id-Deċiżjoni hija ndirizzata lill-Istati Membri.

Magħmul fi Brussel, fl-10 ta’ Lulju 2002.

Għall-Kummissjoni

David Byrne

Membru tal-Kummissjoni

[1] ĠU L 302, tal-31.12.1972, p. 28.

[2] ĠU L 198, tal-21.7.2001, p. 11.

[3] ĠU L 71, tat-13.3.2002, p. 1.

--------------------------------------------------

L-ANNESS

L-ANNESS VI

Ħtiġijiet għall-għarfien ta’ merħliet ta’ bovini, pajjiżi u reġjuni bħala uffiċjalment ħielsa

(Sezzjoni A jew B tapplika)

Sezzjoni A

1. Tuberkolosi u bruċellosi: l-Anness A tad-Direttiva tal-Kunsill 64/432/KEE

2. Lewkosi enzootika bovina (LEB): l-Anness D tad-Direttiva tal-Kunsill 64/432/KEE

Sezzjoni B Ekwivalenza

1. Il-programm uffiċjali ta’ kontroll tal-pajjiż terz esportatur huwa meqjus bħala ekwivalenti għall-Annessi A u jew D tad-Direttiva tal-Kunsill 64/432/KEE.

2. Il-programmi uffiċjali ta’ kontroll li ģejjin ġew magħrufa bħala ekwivalenti:

ISO deco | Pajjiż | Tuberkolosi | Brucellosi | LEB |

Merħla | Reģjun jew pajjiż | Merħla | Reģjun jew pajjiż | Merħla | Reģjun jew pajjiż |

CA | Kanada | – | – | – | – | X | – |

CZ | Repubblika Ċeka | – | – | – | – | – | X |

--------------------------------------------------